شلونكم بنات
بنات يا أمهات انا بجري بنت الله يحفظها وقبل فتره يبت الولد الله يخليه وقريب ان شاءالله اطلع من النفاس
بقولكم اخر الأخبار الطبيه ، الياهل "مايحتاج" أي شي غير "الحليب" لين يكمل عمر 6 أشهر!!
تصورا اخر التطورات الطبيه اكشفت ان الأكل المبكر هو اللي يسبب أمراض الربو والحساسيه والأمراض الجلدية مثل اكزيما الأطفال!!
ويقولون بعد ان الينسون وغيره من الأعشاب اللي احنا نظن انها تريح البطن وتوخر الغازات اهي سبب الغازات للطفل الرضيع!!
وممكن توكلين البيبي في عمر ال4 أشهر لكن تبلشين بوجبات قليله وخفيفه جدا وتكون كلها طبيعيه 100% ومن صنع ايدج يعني تسوينها في البيت مثل تفاح تحطينه بالخلاط بروحه أو مع سريلاك عيش ويعني بعض الفواكه والخضروات اللي تحضرينها بنفسج
لـــــــــــــــــــكن
اذا كنتي تبين سن الأمان لطفلك فهو عند انتهائه الشهر السادس من عمره
وعن تجربتي
بما اني ساكنه في بيت حمولتي فكانت خالتي تعطي بنتي بعض الأكل مثلا تلحسها قيمر أو مربي أو تعطيها فاكهه من صغرها وحالها حال الأمهات تقول وكليها كل شي من صغرها عشان اذا كبرت تاكل كل شي ماتأذيج!
وبصراحه انا كنت اتضايق من هالشي بس اسكت وكان ريلي بعد مومقتنع وكان يحاجيها مرات يقولها لاتعطينها توها صغيره ومرات يسكت
وفعلا صار فيها اكزيما أطفال ومنعت عنها كل شي فيه قمح لين كبرت وصار عمرها تقريبا 8 أشهر فجت عنها الاكزيما
والله أعلم
وبالنسبه حق "تحنيك الطفل" الرسول صلى الله عليه وسلم كان يحنك الطفل أو ماينولد يعني أول شي كان يدش حلج الطفل ريج الرسول عليه الصلاة والسلام مع التمر طبعا
وقبل ماأولد وانا حامل في بجري سألت شيخ دين ومفتي عن تحنيك الطفل فقالي لاتحنكينها لأن هذا شي خاص بالرسول صلى الله عليه وسلم لأن انتي ماتدرين شنو الجراثيم أو البكتيريا اللي موجوده بريجج فلما تحنكين الطفل راح تنتقل له كل الجراثيم وبالتالي تضرينه ماتنفعينه!
وفعلا لما ولدت مشيت على كلامه وماحنكتها
وبالنسبه حق ولدي الحين راح أطبق عليه سالفة اني ما أعطيه غير الحليب لين يكمل 6 أهر ان شاء الله وبعدين ببلش بالأكل
تحياتي
