تجمع أولياء أمور مدرسة التكامل(صباح السالم)للعام الدراسي2009-2010

[كويتيه ذربه]

ام حسون احسن شي مس كاثي
اومس جيمي

 

[manarah]

ام حسون وفطومه ليتل جيم مكانه بالجابريه وحلو حق اليهال فيه جيم وفيه مكان تلوين واشغال فنيه وفيه سباحه بس طبعا ما اعتقد يخلونهم يسبحون واول مره يودونهم هالمكان يعني اعيالنا لما كانوا بالكي جي ماراحوا هالنادي بس انا دخلته مره كنت بسأل عن اشتراك الصيف عندهم .
اذا تبون امريكيات بكي جي 2 عندكم مس كاثي ومس جيمي مثل ماقالت كويتيه ذربه بس والله الباجي ناسيتهم جنه يبيلي أمر عالكي جي 2 اتذكر الابلات واشوف منو الاجانب غيرهم .
انا اليوم دقوا على المدرسه الساعه 10 ولدي حايش عيونه بالمسطره ووديته الطبيب وجرح بالقرنيه والحمدلله على كل حال .

 

[كويتيه ذربه]

منارة مايشوف شر ولدج وديروا بالكم عليهم هاليهال عيونهم بسرعه تتعور

 

[ام حسون وفطومه]

ما يشوف شر ولدج مناره وماعليه الا العافية انشالله شلونه الحين نشالله احسن
ومشكورة حبيبتي انزين وطيبين مع اليهال انا ما احب ابله عصبيه

 

[ام _خلودي]

ام خلودي

مس لين مساعدة مس مر يم فلبينيه بس محترمه وشخصيتها هادية وحبوبه واااايد وحتى مس مريم كنت في البدايه واااايد متخوفه منها بس الحين اشوه ماغيرت كلاس بنتي


وامهات بنتي بودونها رحله جيم ماتدرون وين مكانه؟؟؟

همم انا بنتى بتروح الرحله بتاريخ 20/4

 

[كويتيه ذربه]

ام حسون مس كاثي تحب اليهال وحبوبه
ومس جيمي وااايد حنونه مع اليهال وتحبهم
انتي مري وشوفيهم واختاري الاحسن
انا مجربتهم ثنتينهم واااايد زينين

 

[ام _خلودي]

صــبـــاح الــخـــيـــر

شلونكم امهات وشلون عيالكم مع الدراسه؟؟

 

[Miss_Tiger79]

شخباركم بنات
من زمان ما دشيت الموضوع

شكلكم نفسي ليلحين ادورون الابلات
انا الحمدلله خلصت بس بقي ابله حق قريد 2
محتاره
يقولون آن زينه بس واااااااايد شديده ما عدهل لعب

بنات انا جربت حق كي جي2 ابلتين
مس اندريا ..... اتينننن
مس كارين.... عجيبه وتهبل بعد

 

[manarah]

تسلمون بنات الشر ما اييكم ..

مس تايقر يعني ابلات الكي جي نقيتهم عند مس سارا والا شهر 5 ؟

 

[رفرف]

شلونكم امهات ؟؟

مناره
خطاكم السو ما يشوف شر وليدج


انا بعد محتارة بأبلة قريد 2 ابي وحدة قوية وحنووونة وحليوة لأن بنتي بسرعة تكش اذا المدرسة عصبية وتصرخ تتعب نفسيتها ..

 

[Miss_Tiger79]

مناره
نسيييت ..... خطاكم السو انشالله ... سامحيني
الابلات نقيتهم عند مس ساره بس حق كي جي١ نقيتها من التسجيل الي بالاداره نسيت اسمها

رفرف
انا بغيت مس آن بس كذا وحده قالتلي انها واااااايد شديده فخفت
وقلت بسأل ابلته

 

[كويتيه ذربه]

السلام عليكم

امهات قريد ون اذا تبون مس زينه حق قريد 2
انا بنتي الحين عند مس جيتا
صج انها بارده بس قويه وتفهم وكل اليهال يحبونها
وهيا اقوى مس حق قريد 2 عشان جذي الاغلبيه يطلبونها
وتفهم انا عند نفسي اشوف اليهال يحبونها ومستانسين منها

ومس ان قويه بس شديده الكل يمدحها بس اليهال مايحبون مس شديده وجاده
ومس اتيه هم زينه ويحبونها اليهال والحين ولد اختي عندها وهم قويه واختي هم تمدحها

 

[Miss_Tiger79]

كويتيه ذربه
صح صح مس براين قالي اسمها بعد لما سالته
قالي آن وجيتا وبعد وحده
بس شنو جنسيتها ومس اتيه شنو جنسيتها
ومشكوره عالمساعده

 

[ام _خلودي]

صباح الخير

امهات ابي احن مس بكى جى2 تواا

انا بنتى وووووووووووايد حساسه ودلوعه ابي مس بالدرجه الاولى حنوونه

 

[manarah]

ومازالت الحيره قائمه الله يعينا الكل محتار بهالابلات

مس تايقر خطاج اللاش ما قصرتي .. بس بغيت اسإلج ليش حددتي ابلات الكي جي 1 عند التسجيل ومو عند مس سارا ؟؟

كويتيه ذربه مشكوره عالافاده ومس جيتا تعتبر مدرسه مرتبه ؟ يعني هووموركاتكم وامتحاناتكم بوقتها ؟ واشلون تعاملها مع اليهال يعني حليوه بس بنفس الوقت تسيطر على الصف والا اشلوون ؟ اكثرت اسإلتي

ام خلودي والله مس كاثي ومس جيمي ومس فرح دشتي هذوله كلهم حليوين وايهبلون واللي اعرفهم والبنات مدحوا مس كارين ومس اندريا

 

[نواره الحلوة]

السلام عليكم وصباح الخير
مناره
خطاكم السو وماتشوفون شر
آنا شكلي بخلي وليدي عند مس كاثي بكي جي 2 لأني كنت أشوفها وايد نشيطة وحركية لليهال

 

[ام _خلودي]

مناره

خطاكم السو

وعلى فكره انا حزت التسجيل قالوا لريلى ينفع تختار الحين

بس الاكيد شهر 5 يعنى هم الااختارت حزت حجز المقعد لازم ترد

اتاكد شهر 5 انا للحين ماسويت الفحص الطبي مال ولدى

 

[كاكاو مارس]

هلااااااااااااااااااا والله بأمهات التكامل
ابي انضم حق تجمعكم
وعلى طول بدش معاكم بالموضوع :ggdw:
احسن مس حق قريد 2 مس جيتا مثل ما قالو البنات وهي اصلا (coordinator ) مشرفه قريد 2 على كل المسات
وكي جي 2 مس فرح زينة وهادية ما تعصب على الياهال
وعفية بنات ابيكم تساعدوني ابى احسن مس حق قريد 3 وقريد 1

 

[manarah]

نواره خطاج اللاش وترى توني أذكر اقولج سألت بنتي وقالت محد خذا قياسنا (توه الناس )

ام خلودي ولا انا سويت الفحص متى بروح مادري وسألت التسجيل قالوا اوراق الفحص لازم تكون عندنا اخر 4

كاكاو مارس حياج الله معانا .. بالنسبه لقريد 3 رفيجتي تمدح مس فاطمه .. وقريد 1 ولد اخوي عند مس مريم وواايد زينه والبنات يفيدونج اكثر بخصوص مس نافيدا لانهم مجربينها هالسنه .

 

[نواره الحلوة]

مناره
معذورة يالغالية و اشيذكر هالقلب اداد له والله اني قعدت أكتب بورقة كل شي عشان ما أنسى من كثر اللوية