تجربتي الشخصيه ( دبي ) تقريري بيفيدكم ان شاءالله

[لوكي 22]

السلام عليكم ورحمة الله وبركاته


حابه اكتب تجربتي بسفر لدبي من جميع النواحي وسامحوني لان تقريري مافيه صور
وادري شكثر المواضيع تشوق بصور لان صوري خاصه
وموضوعي شوي بيكون ملخبط ماعرف ارتب يعني بكتب بعفويه على قولتهم

قبل ماسافر لدبي تخيلتها شي وطلعت شي ثاني
اول ماطبيت مطارهم اليديد صراحه عجيييب والعاملين فيه خدومين بزياده
بس ان لقيتوا رياييل يقولون لكم ربحتوا معانا ولك دعوه .. الخ انحاشوا منهم
قولوا لاشكرا , مشغولين , اعذرنا < مؤدبه خخخ

<عن نظام دبي <

ومشاءالله على نظام دبي صراحه ممتااااااااااااز لان مستحيل اتوهقون كل العاملين
موظفين حتى ناس العاديه خدومين ومبتسمين وعندهم النظام نظام
يعني تطلع من مطار , مجمع , فندق , محطة مترو تلقى لك تاكسي او باص وواقفين ورا بعض
لو تروحون للثاني او الاخير يعتذر مايوصلكم يقول النظام نظام لازم تروح للاول
وتصفون طابور اذا معاكم ناس
وفي بعد عاملين ينظمون السير بكل مكان ياحلو الترتيب والنظام بس
والحلو بـ تكرمون حماماتهم بكل مكاان تقريبا في غرفه خاصه للبيبي ولاطفال الصغار
بما اني ام لياهل ربي يحفظه
والقى الطاوله لتغيير الحفاظ وكل هالامور مرتبينها لكم
وعيبهم اي شي خارج عن القانون لو بسيط تاخذ مخالفه وتدفع ضريبه
وبكل شي عندهم ضريبه ياحبهم للضرايب والمشكله المبلغ مو بسيط يعني لكم عليه
مثلا ييت بشتري من محل ولا شوي السعر زايد عن الي بديرتنا ليش ولا ضريبه !
واذا بركب تكسي لازم ادفع مع المطلوب للضريبه ومره كنت بمترو دبي وحده خالفت
دفعوها ضريبه 100 درهم مافي كلام القانون قانون
والشي الي ماعجبني بدبي من الناس الي فيه حسيت اني برى باوروبا والله
ثلاث ارباع الشعب اجنبي من اوروبا وامريكا يااناس ابي اشوف خشة اماراتي مااكو
ينعدون عالاصابع بدبي وهنود يوووه شكثررهم وفي عاد بعدهم من العرب
وقليل القى لي جم اماراتي باليوم
والموحلو ان الاجانب ماخذين راحتهم عالاخر شوي ويقطون اللبس الي عليهم
واغلب فنادقهم فيها بارات ونايت كلاب

عن الجو<
معروفه دبي بحرها ورطوبتها مرات اكره نفسي ليش طلعت من الفندق
واتوقع لشتا دبي دافي لوول

الاسواق <
وااااي يادبي عليج اسواق انا فلوس اطير بيوم وليله من السوق عليهم شغلات غريبه
اتهببببل والله نصيحه تبون سوق من غير تفكير دددددبببببي
عندكم دبي مول هذا اتوقع ان ماخاب ظني اكبر مول بشرق الاوسط شنو يخطر على بالج
موجود فيه يهبل وفيه الاكواريوم حرام ادشونه بخمسين درهم حده صغيره ومايستاهل
شوفيه من برى احلا وجباله محل كاندي هذا اغوص فيه خخخ
وفي النافوره الراقصه صراحه العرض سحرني وااو هذا مجاني طلعي برى يم برج خليفه
شوفيه يبدا بليل عالسبع يمكن
وبرج خليفه ندمت اني دفعت له 100 درهم عشان اشوفه على كبره مافي تكييف حررررر
ولي انا شخصيا مايستاهل تصعدون بس اذا نفسكم فيه توكلوا على الله المهم صعدتوا
لاطول برج بالعالم شعليه هههه


يتبع ....

 

[لوكي 22]

وفي دار الازياء للحين مارحت له
وعندكم الامارات مول بالمرتبه الثانيه يهببببل فيه الاسكي يووونس بس مايدخلون اصغر من 3 سنوات
للشخص 150 درهم من غير الكافيه عندهم
ومعاهم كارفور
ومول ديره ستي سنتر بضاعته ارخص من المولات الي ذكرتهم مادري ليش
حلو ويستحق تروحون له عشان تخمون المحلات وتطلعون لقيت في محلات ماشفتها بالكويت ولا حتى السعوديه
بس فيه واايد اجانب من شرق اسيا

اما سوق نايف جنه مباركيه عندنا انصدمت فيه شغلات يبيعونها عندنا الحريم وبجم برخيص بوااايد
ويمه عكاظ وجم مجمع فيه عليهم عبي والله يصك عاللي عندنا ورخاص اغلى شي اتوقع حول ال 500 درهم
عندهم بجايم تونس كيوت وجناط ماركه تقليد مو الدرجه الاولى

سوق الصيني على انه مسكر بس مافي تكييف بذوبون داخل تاخذون سونا خيسه
بس بضايعهم حلوه ترى اهما يطقونكم بالعلالي لااازم تكاسرونها نشفوا ريجهم
عندهم جناط تقليد درجه اولى شغلاااته غريبه صراحه وحيل عجبني

وفي مولات ابن بطوطه عنده المنطاد تركبونه اتوقع حول ال 100 درهم تجربه حلوه
وفي فيستفال دبي مول عنده اكبر محل ايكيا
وماريكاتو مول صغير جنه ايطالي

يتبع..

 

[لوكي 22]

قبل لاكمل المولات والسوقه

عن السكن <
عندكم فنادق البرشاء هذي اليديده
على سبيل المثال ستي ماكس البرشاء ركزوا عالبرشاء يعني المطور اليديد مو القديم
حلو ونظيف 3 نجوم غرفه صغيره من غير ريوق 240 درهم الليله وعندهم الحجز بالنت وبالايام يختلف
عشان تتأكدون من الفندق الي تبونه دخلوا على موقعه بالنت واقروا
ولاتضايقون من البارات الي فيها تبدا بليل بالدخله والطلعه بتشوفونهم داشين وطالعين منه هالاجانب
وفي شقق مفروشه مثل روز قاردن البرشاء غرفة ستيديو معاها مطبخ تحضيري الليله 240 بدون ريوق
من موقع اجودا تقدرون تحجزون منه او بوكنق
www.agoda.com
الحجز من النت ارخص وافضل

نرجع للمولات والسياحه<

تايمز سكوير هذا يسمونه الكترونك كل شي فيه عن هالسوالف
ويتميز بالكوفي الثلجي عندهم تدخلونه ب 60 درهم بس ماعندهم شي غيره
يعني اطق عنوه عشان الكافيه البارد ! خلوني بدبي مول بس خخخ

ممشى الجي بي ار مكشوف طبعا بهالوقت حرر ماله داعي ناس زحمه ويمه محلات ومطاعم وكوفيات بس
بس يمه دبي مارينا

وفي سوق جميرا حلو فيه مثل نهر وفي بعد حديقة الخور خضرا بس هم بالوقت هذا مابتحملون الرطوبه
وفي بعد وايلد وادي اذا كنتوا بس بنات روحوله اذا معاكم شباب لا لان فيه تفصخ :/

اما القريه العالميه حللوه مكان مكشوف الدخله 10 درهم وتصلح لليهال
وفندق اتلانتس بما انكم ماراح تسكنون فيه ( لمحدودي الدخل ) كحلوا عيونكم بزيارته خخخ
عندهم انواع من السياحه فيه الي اهو حوض الاسمج ب 25 درهم للشخص

يتبع ..

 

[لوكي 22]

نكمل اتلانتس
فيه المدينه المائيه للشخص ب 200 درهم
وفي استكشاف الفندق ب 100 للشخص وعرض دلافين ب 300 للشخص

واذا معاكم شباب ويبون سياحه تعدل مزاجهم في السفاري هذي تقحيص بسيارات كبار ب 150 درهم
عندي بروشورهم مارحت له شبي بهالسوالف بس بكتبه عشانكم
وفي عندهم تجربة بالهليكوبتر للشخص ب 990 درهم من برج العرب لمدة ربع ساعه
وفي رحله عالبحر من اليخت تمرون النخله واتلانتس وبرج العرب للشخص 444 على حسب الدقايق

نسيت اقولكم الوايلد وادي عشان اطبون فيه للشخص 150 درهم بس دخلته اتوقع 170 للشخص
وفي تقدرون تاخذون الجت سكي نص ساعه للشخص ب 250 درهم
اما عاالم فراري الي بابو ظبي هذا وناسه دخلته في ب 225 و 165

يتبع ..

 

[لوكي 22]

نيي الحين للمواصلات

عندهم نار بروحه يبيله ميزانيه
في الي يأجرون سيايير وفي الي عالتاكسي وفي الذكي الي ياي بسيارته
اول شي اجارها غالي حتى لو صغيره لاتنسونه بانزينهم اغلى شي
وتكسيهم نصهم نصابين يلفونج ويفرون فيج وايد عشان يزيدون عليج وينهبون وايد
فشتسوون ؟؟؟ (( ملاحظه : هالحركه للشخصين ))
تستخدمون المترو !! شلون بشرح لكم ( عاد ماعرف اشرح
محطات المترو اتكون بالمولات التاليه
دبي مول امارات مول ستي سنتر هذا الي اعرفهم
اذا كنتوا ساكنين يم المول وتقدرون تروحون له مشي بوديكم للمترو
واذا رحتوا قصوا اي تذكره تعجبكم في 3 انواع الحمرا هذي للاستخدام مره وحده عليها يمكن 20 درهم
وتتعبى ب 4 درهم في الذهبيه اغلى من الحمرا والفضيه بجم درهم بس له فايده انكم تحصلون مقاعد بالمترو
ومايكون زحمه يعني في اي بي عشتو
اما الفضيه ارخص بس بتكون واقف طول الطريج باليالله تلقون مقعد لانه زحمه كله عماله
ومن تنزلون من المترو روحوا مع التكسي للمكان الي تبونه بيكون اوفر لكم
بس اهم شي تعرفون وجهتكم عشان تعرفون اذا تاخذون المترو او تكسي مثال .
بتروحون دبي مول وانتوا ركبتوا المترو من امارات مول
اول ماتنزلون ركبوا باص او تكسي بياخذ التكس 10 درهم او اقل الباص مرات فري مرات 4 درهم
اذا تبون سوق نايف نزلوا على محطة الاتحاد عشان منه تاخذون تكسي ويقطكم لنايف

الحين ليش هالعباله هالنظام للشخصين اذا كانت ميزانيتكم شويه يعني حرام اتيمعون واخر شي كله على تكاسي
وعندهم نار قطوهم على سوق اكل فندق مصبغه سوبر ماركت وليش للشخصين لان لو كنتوا اربعه كل واحد كرته 25 درهم
جم صاروا وايد قطوهم كلكم على تكسي احسن
اذا مافهمتوا هالنقطه قولولي اعيدها
المتروا للشخصين ..

يتبع ..

 

[لوكي 22]

الحين نيي لحركه بايخه يسوونها الفنادق
يتكلمون انجليزي فقط ( حتى الي بالسوقه ومطاعم ماتلقى الي يتكلم عربي)
ويلفون ويدورون بالانجليزي ( يعني صعبه تصيدهم )
بشنو يحتالون يذكرون لك الاغلى فتضطر توافق ع اساس مافي ارخص
مثال , رحت بحجز برسبشن غرفه قالوا 300 وشي تدفع وتروح ومايقولون لك اصلا حجزولك مع ريوق واشياء ثانيه
لااازم تعرفوون لهم ..
وفي حركه سووها معاي حيل نرفزتني عندهم الاحتيال بكل حركه
كنت ابي النت ( الي لاحظته بدبي النت بفلوس حتى بالكافيهات والمطاعم ) فللساعه 25 درهم
في الي يطلب نص ساعه ب 15 اتوقع يذكرون له الاغلى ويسكتون والمسكين يحسب مافي الا ساعه فيضطر يدفع اكثر
وفي لليوم كامل ب غاالي وبالرسبشن كنت ابي نت شفته غالي قلت خلاص مابي وخلينا بقشيش للعامل
جان ينادينا ولا يقول في كيبل اشتروه ب 20 درهم ومجاني النت يوم ونص @@
شفتوا شلون

والحين بتكلم عن كتاب
ذا انترتينر <<
هذا شريته من فيرجن ب 350 كتابين فيه كوبونات للمطاعم كافيهات العاب لليهال اسكريم عصاير بولنق قولف
اكواريوم .. الخ
ومن كل شي 3 كوبونات مثل مطعم دومنيز بيتزا فيه 3 كوبونات شنو هالكوبون
عباره عن تشترين اي وجبه او اي كوفي او اي شي يضم هالعرض تشترينه بسعره العادي والثاني فري مجاني
لو كنتوا شخصين مع هالكوبون بتدفعون لوجبتين قيمة وجبه
واذا كنتوا اربعه اشخاص تطلبون اربع وجبات بقيمة وجبتين ... فهمتوا هالنقطه .
راح تستفيدون منه ..

واذا تذكرت اي شي برد اكتبه لكم باذن الله ,,
اخر شي احب اشكر اخوي احمد2004 لانه واايد ساعدني بالسفره الله يعطيه العافيه ...
واشكر خواتي كويتيات لانكم ساعدتوني بالسوقه بس ياحبكم للسوق

عسى فدتكم ان شاءالله ؟؟؟

 

[ابتسمامه]

تقرير روعه ودقيق ما شاء الله
ما فهمت سالفة المترو بس يالله ما دمنا اربع اشخاص نضل عالتاكسي احسن
شنو دار الازياء اللي مارحتيله ؟؟

 

[جروح ودموع]

مشكووووره ودبي رووووعه ونظام وامان وكل شي بدبي يهبببببل

 

[لوكي 22]

دار الازياء يعني عارضات ازياء يستعرضون ازياء
محل مانوكيان الفرنسي ويصورونهم
ودامكم وايد تكسي اريح لكم
:
مشكورين عالمرور

وينكم ...

 

[لوكي 22]

انا كاتبته لكم ترى ؟؟؟؟

( استغفرالله واتوب اليه )

 

[HaYoOoMa]

يعطيج الف عاافيه ياحيااتي


توووني قبل شهرين راده منها

يااحلووو سوقهااااااااا وبسسسسسسس


وماقصررتي

 

[Om_Ksha]

يعطييييج العافيه عالتقرير الحلو ماشالله عليج من زياره عرفتيلها ،،
عاااد تصدقين حجزت بالجي بي ار واادري انه حلوووو وحلاااااااته بالربيع غيره ماينسكن بس حجزته عشان البحر ومادري متردده ،، ولا بالعاده كلا نسكن بفنادق دبي مول

 

[ميشووو]

الله يهنيك

 

[KOKO_284I]

تقريرج واااااااااااااااااااو بدق عليج قبل لا اروح : )

 

[مزيونه موت]

تقرير رائع من قلب رائع
أنا بودي عيالي بس .........انصدمت من اسعار الشقق انصحيني ويين اسكن انا واعيالي 6

 

[لوكي 22]

مشكورين عالردود
حيااكم
مزيونه تقدرين تسكنين بشقق فندقيه غرفتين وصاله صغيره
يمكن يكون 400 وشي
دشي موقع بوكنق من النت تحجزين ارخص
شوفي شلي يناسبج
اذا قدرت احصل معلومات اكثر بردلج خير

 

[om-rayyan]

مشكووورة على هالتقرير الحلوو
استفدت منه وااااايد

 

[مزيونه موت]

مشكوووره على الرد ...وتقريرج نفعنا واااااايد
Thanks ​

 

[دبي.دبي]

والشي الي ماعجبني بدبي من الناس الي فيه حسيت اني برى باوروبا والله
ثلاث ارباع الشعب اجنبي من اوروبا وامريكا يااناس ابي اشوف خشة اماراتي مااكو
ينعدون عالاصابع بدبي وهنود يوووه شكثررهم وفي عاد بعدهم من العرب
وقليل القى لي جم اماراتي باليوم
والموحلو ان الاجانب ماخذين راحتهم عالاخر شوي ويقطون اللبس الي عليهم
واغلب فنادقهم فيها بارات ونايت كلاب


دبي منطقه سياحيييييييييه مب مثل باقي الخليج فعشان جيه وايييييييييييد ايووونا سواااااااح واجانب وجميع الاشكال و الانواع نحن فوق الوافدين عندنا سواح تبينا نبين بعد بسسسسسسسس هذا شي حلو و يشرف يوم ان دولتنا تجذبببببببب العالمممممممممم لهااااااااااا و بعد مشكلتنا هل دبي نتواجد باماكان معينه و باوقات معينه خاصه الويك اند في دبي مول و الجي بي ار

عالعمووم تقريرررر حلو و يا مرحبا بج في دبي

 

[nouran84]

موضوع رائع شكرا على الموضوع


يسلموووووووووو​

​

​