بنتى والعرس

[أموت برزة عقاله]

رد : بنتى والعرس

تلعنين العادات والتقاليد وانتي اصلا اتسوين فيها؟؟

ليش

؟؟
كااا انتي قاعده اتسوين بنفس العادات والتقاليد تبين تزوجين امبجر.. ومتحقرصه على زتاات البنت<- - اي والله زتاات بهالعمر من زواج

شوفي عمره الترزز عند الحريم والعروس ماكانت السبب بتزويج البنات الرزق من الله

بحياتي ماحظرت غير عرسين لان اهلي مايروحون عروس

حظرت عرس رفيجتي حييييل وكان عائلي جدا وكنت مع امي وخواتي واصلا حتى لو بنخطب منهم ماراح اهلي يرضون لانهم مو من مواخيذنا

والعرس الثاني ولد عمتي ولاه بالسعوديه وووووووووتسلمين وتعيشين

تزوجت واحد لا اعرفه ولايعرفني ولااابحياتي عرفته او حتى عرفت اهله حتى منطقتهم بحياتي ماطبيتها اسمع فيها انها بالكويت بس مارحت لها ولا مره كله

من وين

مادري

بس الاكيد انه رزق من رب العالمين

بنت خالتي كانت لمن اتحظر عرس مو من باب انها تبي اتزوج والا اترزز لا ماعندنا هالسوالف ولا خالتي.. وعلى كثر الي اخطبوها

صار بختها ولد عمتها وبحياتنا ماتخيلناها تاخذ هالانساان بس نصيب ورزق من ربج


ذكرتيني بوحده من اهلنا شببت على بنتها شي مو طبيعي تبي اتزوجها وصارت بنتها نفس الشي والنتيجه

بنتها باول ال20 ومنفصله مع بيبي..وبوقتها كانت حامل ومع المشاكل والقلاقل اجهضت وخيره من رب العالمين

زين جذيه

تقول الام استعيلت على بنتي

باجر ان ياها نصيب وكروتييها كروته على ابو تصير عند ريل وماتصير اقل من بنات العايله وصار هالريل كرييهه بغيض ايده والطق وخوان سكير عربيد

بتفيدج دمعتج على بنتج؟؟

ابتبجين على بجييج شكوو استعيلت عليها وزوجتها وغثيها وهي صغيره

الحين معدل سن الزواج ارتفع واحسن علشان يكون فيه نضوج فكري نفسي والطرفين مهيئين للزواج

ام 14 فديتج انا بتلعب برووي مثلا اكيد الي ماخذها يا طقتها

ياا اكبر بوايد

وين التوافق؟؟

عند اول زعل كلمن شال شلايله وراح عند امه والا بيسفهه كلامها على ابو انها ياهل وماتفهم

وياكرهه العيشه الي رايج مسفهه ولا لج اعتبار؟؟

ذكري ربج يمكن خاش لها بخت احسن من قريناتها وربعها كلهم بييها الناضج فكريا ونفسيا وعقليا بس يبي الاستقراار مو لعب عيال

يمكن الزوج الي ربي كاتبه لها قاعد يكون نفسه

او يدرس وبيكمل دراسته ومايبي يغرب مرته معاه

يمكن قاعد يبيني بيت العمر مايبي يسكنها اباجار مثلا
واايد احتمالات بس انتي طولي بالج ومثل ماقالت وحده من الخوات ساعات كثر الحنه على الشي يقبس عليه ويخليه فال سيئ

وترى كثر الدعاء يغير المكتوب ولا تتمنيين على ربي بقولتج داعيه واستغفر بس تعبت

ترى هذا شرعا يعد تبرم وتمنن على الله عزوجل وعلى قوله المصريين كل الي يجيبو ربنا كويس

اجتهدي وألهجي بالدعااء من غير الاستعجال بالاجابه وهذا شررط من ربي لانه يحب يسمع دعاء عبده كطنين النحل

شفتي النحل شلون يزننننننن يزنننن ربي يحب يسمع الدعاء من عبده جذيه

ولاتستعييلين ترى لاحقه خير لاحقه على الكراف والحمال ودعاله الريال واهله لاااحقه شكو بتغثينها وهي ياهل توها اي والله

وبعدين الي اتزوج ام 18 نفس الوناسه والطرابه بتاخذها الي تزوجت ام 40 مووووووو؟؟؟

لاا تستعيليين وانا اختج خل بنتج ابحظنج ياايها بختها ياايها لامحاله وربي يرزقها بالريل الصالح عاجلا غير اجل

بس انتي لا تنطرين ترى النطره ممله

وكليها لربج وبتشوفين

:ggdw::ggdw: اصفق لج بالعشر على الرد المفحم صج صج بردتي قلبي وصح لسانج:ggdw::ggdw:


حبيبتي ترا بنتج صغيروونه وتو الناس .....!!


وايد معقده سالفه


تدري انه لمن اتضايق على ابو كل بنات عيله الي كبري تزوجوا والاقي روحي للحين مع ان الحمدلله مافيني عيب

ولا اترزز باعراس ولا شي اروح عاديه كلش ومشكله ينعجبون فيني ويتكلمون بس مافيه نصيب

امي دوم تسمعني الحجي انتي معززة مكرمة عندنا والحمدلله موب ناقصج شي وانتي الوحيده الي خلصتي جامعه

في حد ياب شهاده مثلج .. في حد شاطر مثلج ...يمكن الله مأخر لج لان يبي يعطيج ريال احسن من رياايل بنات خوالج


والله نفسيتي لمن تكون تعبانه وبس اسمع كلامي امي تعلي ثقه عندي وتححسني اني موب ناقصني شي وهشي نصيب

والله استانس وانسى المووضع فالام لها دور كبير بنفسيه بنتها !! ترا بعدين بنتج بتتعقد وبتحس بنقص من خلال نظرتج

 

[لمعة اللولو]

رد : بنتى والعرس

الزواج قسمه ونصيب

بنتج تو مايا نصيبها ويمكن يطلع نصيبها احسن من نصيب بنات العايله : )

والله يرزقها ويرزق الجميع

 

[Mazyoona]

حيآتي جذي أنتي بنفسج بتعقدين بنتج !
لا تستعيلين على زواجها نصيبها مو رايح لغيرها
و اللي الله كاتبه بيصير

و اذا تبينها و اهي تبي تتزوج الحين
خل تقرأ البقرة يومياَ و تحافظ على الصلوات بوقتها و الأذكار
و تدعي بخشوع و رالله ما ينسى عباده ~

 

[قطوة@@]

رد : بنتى والعرس

الله يرزقها بالزوج الصالح

 

[FeShinGoOo]

رد : بنتى والعرس

بنتج جم عمرها ؟؟

 

[misS Sooso]

رد : بنتى والعرس

عمرها 21 بس
حرام عليج
لويوصل عمرها 30 ماتزوجت شنو بيدج يعني
شنو ممكن تسوين
هذا وعندج لابنات غيرها الله يعينهم

 

[رووحي لغاليها]

رد : بنتى والعرس

الله يرزقها يارب وتفرحين فيها يارب

 

[R'3wa-P!nKya]

اذا اهيا كبيره بالعمر شوفيلج خطابه والله يرزقها بولد الحلال يارب

 

[FeShinGoOo]

رد : بنتى والعرس

امبيه اتوقعت بنتج عمرها مو اقل من 28.!!
طلعت 21..!!!!!!!!!!
امبيه موضوعج عيييييييييييييييييييييييييب وظلم لبنتج والله العظييييييييييييييييييييم

 

[مزيونة كويتيات]

رد : بنتى والعرس

حرام عليج

انتي مسترخصه بنتج ولا شنو بالضبط

قاعده تبجين لان المرا مادقت بالله هذا حجي

نصيبها بعد ربج كاتب لها النصيب وبيوصل لي عندها ان شالله من غير بجي

الله يهديج

لا تحسسينها بهالشي وتعقدين البنيه ذبحتيها

 

[㋡..PRINCESS..㋡]

رد : بنتى والعرس

عسى الله يفرحج فيها و يرزقها بالزوج الصالح ..

 

[Om_Ksha]

والله البنات ماقصرووو
ومن ردودج احس ماكو فايده .. هذا تفكيرج ..

ماقول الا الله يهديج .. وحرام عليج .. حرام تعبين نفسج وتعبينها معاج لانها تحس فيج بدون لاتتكلمين

 

[Sosota_20]

رد : بنتى والعرس

بيـــه شدعـوه يبـاا
تـرا تطورنـه وهالتفكيـر قـديم

الدنياا ماتوقـف ع الزواااج .. واذا فـي نصيـب راح تتـزوج غصبـن عن الكـل
وحـرام عليـج لاتعقـدين البنـت لا تخليـن كل همهـاا الزواااج لاتحرجينهـاا أكثثثثـر

بعـدين ماتـدرين يمكـن خيـرهـ لهـاا ويمكـن تكـون بنتـج مرتـااحه اكثـر من المتـزوجـه

ياامه فـي بنات تـزوجو وريايلهـم اطلعـوو مو زينين وكـاهم مطلقـات ابيـوت اهلهـم
ولا ايي لها زوج ظـالم مايقدرهـا ولا ...إلخ !!

 

[يالبيه 17]

رد : بنتى والعرس

الله يوفقها ويرزقها باقرب وقت وتشوفينها احلى عرووووووووووس

 

[لؤلؤية]

رد : بنتى والعرس

تبيييين حل لزواج بنتج

والله انه سحر


ادعي ربج انتي سااااااااجدة
انه يرزقها الرجل الديِِن الهين اللين
اللي يهنيها ويقدرها
ودايما قولي بقلبج ياااارب تقدم لها اللي فيه خير

 

[وهج الخير]

رد : بنتى والعرس

حبيبتي انا ما الومك تخافين على لبنيه ما الومك
الام تحاتي من حبها لكن لبنيه صغيره ويارب ايكون
نصيبها جريب عالريال اللي يصونها بس نامي وارتاحي لان اللى مكتوب
لها بتاخذيه بالعمر اللى الله كاتبه لو تركضين ركض بتاخذ النصيب اللى مكتوب لها
والله يكتب لها النصيب الطيب والريال الطيب
جوفي هالايات وتمعني فيها الرضا بالنصيب وايد تلخص كل اللى بقوله

يَبْسُطُ الرِّزْقَ لِمَنْ يَشَاءُ وَيَقَدِرُ وَفَرِحُواْ بِالْحَيَاةِ الدُّنْيَا وَمَا الْحَيَاةُ الدُّنْيَا فِي الآخِرَةِ إِلاَّ مَتَاعٌ }الرعد26
وَرَبُّكَ يَخْلُقُ مَا يَشَاءُ وَيَخْتَارُ مَا كَانَ لَهُمُ الْخِيَرَةُ سُبْحَانَ اللَّهِ وَتَعَالَى عَمَّا يُشْرِكُونَ }القصص68
{اللَّهُ يَبْسُطُ الرِّزْقَ لِمَن يَشَاءُ مِنْ عِبَادِهِ وَيَقْدِرُ لَهُ إِنَّ اللَّهَ بِكُلِّ شَيْءٍ عَلِيمٌ }العنكبوت62
{قُلْ إِنَّ رَبِّي يَبْسُطُ الرِّزْقَ لِمَن يَشَاءُ وَيَقْدِرُ وَلَكِنَّ أَكْثَرَ النَّاسِ لَا يَعْلَمُونَ }سبأ36
{لَهُ مَقَالِيدُ السَّمَاوَاتِ وَالْأَرْضِ يَبْسُطُ الرِّزْقَ لِمَن يَشَاءُ وَيَقْدِرُ إِنَّهُ بِكُلِّ شَيْءٍ عَلِيمٌ }الشورى12
{اللَّهُ لَطِيفٌ بِعِبَادِهِ يَرْزُقُ مَن يَشَاءُ وَهُوَ الْقَوِيُّ العَزِيزُ }الشورى19

 

[وجدان الحلا]

محد ياخ الا اللي الله كاتبه له يعني لو فكرت طول اليوم وبجيت طول الليل ماراح يصير الا اللي الله كاتبه فهدي بالج ولاتيأسين من رحمة الله
الله يرزقها ويسعدها

 

[زوارة اثنين]

رد : بنتى والعرس

ياااااااااااااااااااعمرى كلكم والله
والله كلامكم ريحينى وسويت كل الى قولتوة وشغلت نفسى بالمدارس والطلعات بس الله يلعن بليس
المهم بنات سمعو شصار مع بنتى وعرس هالاسبوع بعد
كان عرس جارتنا ورحت انا وبنتى >>>طبعا بنتى لابسة عادى
الا اشوف هالحرمة اهى وبنتها يشرون على بنتى واطير فرررررررررررررح >>> مب راضية اتادب
وانتظرت بس الظهر الى الساعة 4 العصر وبس مااتصلت بسررررررعة طلعت مع صديقاتى عشان لا اصير مثل ذيك اليوم
الحمد لله هالمرة احسسسسسسن احس ان بنتى صغيرة وان انا متوكلة على الله وان اذا جاء النصيب بيجى مايحتاج اتعب نفسى
بنتى هالمرة ماحست بهاحرمةة الحمد لله
الحين تدرس ومنشغلة وبنت عمها اكبر منها مانخطبت بعد وهى صديقتها
والحمد لله رب العالمين
اصلى فى اليل ركعتين واستغفر الله وبس

 

[Pixels]

مت وانا اقرة القران وادعى واصلى تعبت يعنى خلاص مب تجى ولا انتظر اكثر
كلا ابجى واصيح عبالى جاء الفرج انا حزينة حزينة مقهورة اكتئاب افياااااخ

آنا فهمتج وفهمت معاناتج ربي يرفع عنج اللهم آمين .. بس ترى رب العالمين مجيب الدعاء ويحب يسمع دعاء عبيده له إدعي وتوكلي على الله وأيقني بإنه الله سبحانه سامع دعائج وبيحققه لج بإذنه تعالى .. لما تقولين دعيت والله ما استجاب دعائي وتعبت ويأست هذا يسمونه التعجيل بالدعاء وهو مو زين وما يرضي الله تعالى .. التوكل على الله أفضل العجلة ما يرجى خيرها أبدا .. والله سبحانه وتعالى قال بما معناه ولا تيأسوا من رحمة الله .. وبعد قال إدعوني استجب لكم (وهذا وعد من رب العالمين .. فهل يخلف الله وعده ؟؟!! حاشى لله .. تعالى الله وجل في علاه) وقل بعد سبحانه وتعالى إني أقرب لكم من حبل الوريد يعني الله سبحانه وتعالى أقرب لج مما تتخيلين .. بس إدعي لبناتج وحتى عيالج الصبيان بالأزواج الصالحين إللي يكونون لهم قرة عين ويعينونهم على برج إنتي وأبوهم .. ولا تستعيلين بتزويج بناتج وعيالج سألوا عدل قبل لا تعطون .. الرسول عليه الصلاة والسلام قال تخيروا لنطفكم فإن العرق دساس.

استغفري ربج وهدي نفسج وإدعي ربج بهدوء وسكينة ويقين بالاستجابه وصدقيني بإذن الله بيتحقق مناج من رب العالمين عيشي حياتج واستانسي مع بنياتج دامهم معاج ألحين باجر بإذن الله كل وحدة بتروح بيت ريلها وبتقولين سبحان الله فضى البيت علي من غير شر =)

ويمكن إنتي متعبة نفسية بنتج .. صدقيني إذا إنتي هديتي هي بتهدى بعد .. خلج الحضن إللي يحتويها وخليها تفرح وتستانس بحياتها لاحقة على الريل والعيال

الله يفرحج فيها أول شي وبعدين بخواتها وأخوانها ويبلغج فيهم إنتي وأبوهم وتشوفون عيالهم وعيال عيالهم وكذلك لكل الأمهات والآباء اللهم آمين آمين يا رب العالمين

 

[Om_HaTaN]

الله يرزقها ان شاء الله..

اختي كل انسان له نصيب بهالدنيا ..

سواء تزوجت او ما تزوجت لازم ترضين بقسمة الله ولاتحسسين بنتج بخوفج..

بالعكس اشغليها وساعديها ان تزيد من تعليمها او تشتغل بمشروع معين..

واتكلي على الله ولاتفقدين الامل ابدا لان الله يحب العبد اللي يتذلل واللي يلح بالدعاء..

بعدين اخذيها عند شيخ يقرا وخل يقرا عليها يمكن فيها نفس تصد الناس عنها..

انا اعرف وحده كل ماراحت مكان الناس تنهبل عليها ويدقون الناس ويجون يخطبون ومن بعد اول زياره ما يرجعون..

قرت عند شيخ وكان فيها نفس تخلي الناس تصد عنها ..

عطاها سدر ووصاها بالبقره وخلاها تتسبح بماي مقري وترش زوايا الغرف بماي مقري..

وسبحان الله راحت النفس والحين تزوجت وعندها عيال ومستانسه..

انا اوصيج انج تروحين عند شيخ الدين وديري بالج من سوالف البدع والدجل والتميمه والحافظه وماي الرصاص..

عشان الله يوفقها وتفرحين فيها