السلام عليكم يا حلويين
بما اني عندي تجربة طويلة في هالمجال مدتها 4 سنوات متواصلة حبيت افيدكم واقولكم من واقع بتجربتي كيف تستفيدون من الرياضة اللي تسوونها
الرياضة اللي تضعف صدق هي السيكل المشي سواء في الخارج او على جهاز
السيكل يضعف منطقة الارداف خاصة
اما المشي الجسم كله
التمارين المختلفة اللي تعتمد على حركات معينة و ما تزيد دقات القلب و لا تخليك تعرقي تشد الجسم اكثر من انها تضعف
يعني اللي تمارس رياضة و تاكل على راحتها بينشد جسمها و يترتب
لكنها ما راح ينزل وزنها بسرعة و لا يزيد
و يمكن تلاحظ تغير في قياس الملابس لكن الميزان ثابت
و هذا نتيجة ان الدهون تحركت في جسمها و تكونت عضلات ادت لشد و ترتيب الجسم
و من نصيحة مجرب خلي اعتمادك الرئيسي في الرياضة على المشي و السيكل
اما التمارين خصصي لها 10 دقائق فقط لشد البطن و الارداف من ورا
يعني كل 30 دقيقة مشي او سيكل يقابلها 10 دقائق لشد الجسم
و انا ما اقول ان التمارين غير ضرورية بالعكس التمارين هي اللي تشٌكل الجسم
انا في اول سنة لي ما كنت احب السير المتحرك
و كنت اعشق الايروبك لدرجة اني كنت اسوي 3 ساعات متواصلة ايروبك في النادي
و كانوا خواتي يقولولي جسمك في عضلات و مشدود بس مش ناعم و انا كنت اطنش
بعد سنة مليت و وقفت لمدة شهرين في هالشهريين صار جسمي روعة
و لما سالت مدربتي قالتلي ان العضلات عندي تكونت فوق الشحوم و العضلات اساسا تحرق الشحوم بس ببطئ و اللي صار معاي ان في هالشهريين راحت العضلات اللي بنيتها في جسمي و الدهون معاها
عشان كذا للحصول على جسم حلو و ناعم لازم نحرق الدهون اولا و بعدين نكون عضلات
معاي و لا ضعتوا !
البرنامج اللي اتبعه وفقا لنصائح دكتورة علاج طبيعي ألمانية اعرفها ( عجوز لكن عليها رجول تطير العقل )
20 دقيقة مشي او سيكل و بعدها 10 دقايق اجهزة و تمارين
و ارجع مرة ثانية 20 دقيقة مشي او سيكل و بعدها 10 دقايق اجهزة و تمارين
و مرة ثالثة 20 دقيقة سيكل او مشي و بعدها 10 دقايق اجهزة و تمارين
يعني المجموع ساعة و نص
طبعا بتقولون عني مجنونة و خبلة اذا اباكم تسوون هالكثر
للمبتدئات انصح بمرة واحدة 20 دقيقة سيكل او مشي و بعدها 10 دقايق اجهزة و تمارين و بالتدريج تزيدها
بصراحة لما اخلص من الرياضة احس اني شعلة نشاط و ودي اطير بدال ما امشي
( احساس رائع)
و بالنسبة للتمارين باستخدام اجهزة و اثقال تسوين 14 مرة فقط و تنتقلين على التمرين اللي بعده 14 مرة
و بعدين ترجعبن للتمرين الاول عشان ما تنهكين العضلة
يعني مثلا تمرين البطن اسويه 14 مرة
و انتقل لتمرين يحرك عضلة ثانية مثل الارداف اسويه 14 مرة
و بعدها ارجع لتمرين البطن 14 مرة و مرة ثانية الارداف 14 مرة
لان الاثقال و الاجهزة ممكن انها تأذي العضلات اذا ما انتبهنا في استخدامها
و حبايبي ترى هالكلام كله من عند دكتورة علاج طبيعي و مساج و مدربة للرياضة في النادي و جربت كلامهم و الحمد لله استفدت فعلا و شفت الفرق في جسمي
مع ان وزني زيادة عن المعدل الطبيعي بعشرة كيلو لكن ما عندي مشاكل ترهل او زيادات تضايقني لما البس و اكشخ
يعني نوعا ما تقدرون تقولون سندي كراوفورد بسxl
و ان شاء الله تستفيدون مثلي بس ادعوا لي اضعف
