(المنتج الخدعــة ) >> حسافة عطوكـ أكبر من حجمكـ <<تجاربكمـ الكل يشاركـ

[عطاء أنثى]

رد: (المنتج الخدعــة ) >> حسافة عطوكـ أكبر من حجمكـ <<تجاربكمـ الكل يشاركـ

آه آه آه

انا كل شي تقريباً جربته كنت مقصه فيه خخخخخ

اول شي دراريع الحريم كنت كاشخه عند حمولتي بدراعه من معرض وبعد اسبوعين لقيتها طبق الاصل بالعربيد ):
لا واقل من نص السعر


وحده صاحبة مشغل بالمنطقه العاشره مدحوها مدح وتعنيت لها وكااااانت جد لوووووعه


بودره تضيق المنطقه الحساسه من المغرب لتاجره مو جوده بالمنتدي والله علبه صغيره حيل بشي وشويات واخرتها طلع خرابيط جنه رمل


مهاد اللصق مت عشان اشتريه من تاجرات المنتدى وكان سعرهم اوفر 17 الواحد او اكثر رحت سنتر بوينت شريت الواحد 7 او اقل


كفر وحده تقول انه من برا وكان سعره اووووفر حيل فوق الميه وكلمتها كان اسلوبها موحلو وتقول موعاجبج لاتزعجيني بالاسأله الزايده خخخخخ وقاحه


بدلة العيد اللي طاف رحت مجمع وشريتها من محل تقريباً 32 واللبناني اللي يبيع لي يهاليط فوق مخي مافي منها وخرابيط ورحت للمبااااركيه وكانت الصدمه لقيتها اهي بالضبط ب 12 اهي اهي اهي نصب


هذا اللي متذكرته الحين ومليون بالميه لي رده خخخخخ

 

[chakletaA]

رد: (المنتج الخدعــة ) >> حسافة عطوكـ أكبر من حجمكـ <<تجاربكمـ الكل يشاركـ

ليس كل مايلمع ذهبا


>>> يعود السبب لقله المعرفه الكافيه

احيانا

 

[om.aboodi]

رد: (المنتج الخدعــة ) >> حسافة عطوكـ أكبر من حجمكـ <<تجاربكمـ الكل يشاركـ

ياليت الحريم يخافون الله احنا ربات البيوت مانطلع وايد خصوصا وضعي يهال صغار فالنت سهل لي لكن اروح المعلم وانصدم ان نص اللي فيه يبيعونه التاجرات دبلين ليش

 

[بدوية بملامح كشميرية 86]

رد: (المنتج الخدعــة ) >> حسافة عطوكـ أكبر من حجمكـ <<تجاربكمـ الكل يشاركـ

ياكثر مانقص علي



1 - طلبت سمبوسه من وحده اهني تبيعها
الله يديم النعمه فيها شعر يعععععع

2 - المشد الاندونيسي خررررطي خساره فلوووسه

3 - خلطة تطويل الرموش عيوني شوي وانعمي منها الحمدلله عدت علي خير

4 - طلبت زيت للشعر وخلطه للوجه هم من المنتدي وكله خرررررطي

5 - ولي عوووووده مع طلبياتي الفاشله 

 

[zntoosha]

رد: (المنتج الخدعــة ) >> حسافة عطوكـ أكبر من حجمكـ <<تجاربكمـ الكل يشاركـ

الموضوع رائع :eh_s(7):
وتوني خلصته كله الحمدلله ارتحت ههههههههههههههه

بنات قبل لا ابلش بالخدع الي صارتلي احب اوضح شي
اولا الشي الي ينفعني مو شرط ينفع غيري والعكس صحيح
ثانيا لازم لما نشتري خلطه ولا شي من هالسوالف نلتزم بالتعلميات
يعني اذا انا ما التزمت بالتعليمات وما انتضمت عليه وماشفت نتيجه مو ذنب البنت ومايصير اذم فيها




بسم الله ابلش
طبعا وايد تخدعني الجمل المسطره وعلى طوووووول اطلب
وكل طلباتي خشاشي هيهيهيهيهيهيهي مابي انزف :ggdw:


المهم
- مره طلبت من تاجره هني بالمنتدى خلطه الرموش الي البنات وصلوها للسما والتزمت فيها شهر كامل ولا شفت اي نتيجه واخر يومين قامت تحرق عيني واليوم الثالث قمت من النوم ولا عيوني مورمه حدها للاسسف :eh_s(2):



- مره طلبت خلطه سنفره للجسم مع الهرده من تاجره بالمنتدى اولا وصلتلي بدون هرده مع العلم ان اهيا موضحه انها سنفره الهرده واستعملتها مرتين واكيد من مرتين مارح استفيد منها لازم اداوم عليها
بس الي نفرني من السنفره ان كان فيها ملح اليوكو ولما اسنفر فيها تحرررررق حررررق وااااي وانا اول مره مادري وحيييل اسنفر يما انشوى جلدي حبيبي ههههههههههههه :eh_s(11):



وطلبت من تاجره هني كريم للويه بيبي فيس الكريم حلو وشغلها مرتب حده ونظيف واستعملت الكريم لين خلص ما اقول اني التزمت 100% بس كنت مواضبه عليه الي شفته بس نعومه ماشفت تفتيح ولا شال لا الحبوب ولا اثارهم للاسف وانا الحلوه لما اطلب شي ويعجبني شكله اطلب حق حريم اخواني معاي :27d66a9c24b146327bf ههههههههههههه



وطلبت من نفس التاجره كريم للخطوط الي بالجسم الكريم وااايد حلو وعجبني خذيته مع الديرما رول بس الكميه حيل حيل صغيره يعني من جم استعمال خلصت وما شفت نتايج مبهره يمكن لان الفتره كانت قصيره مادري



ومره طلبت من تاجره هني صندوق فيه العاب زوجيه وحركات امبيه يفشل الالعاب ورق والزيوت والنكهات اهيا معبيتهم بغرش صغار ما جازفت واستعملتهم :eh_s(14):
وطلبت منها عطر مثير وااااااااااااي شقول يا بنات ريحه خياااااس والله بدون مبالغه كثر ما اهوه خايس ما اقدر اشمه :rgewrg:



ومره طلبت من تاجره هني قمصان نوم وما ايوز طلبت حقي وحق اختي والله حدي تفشلت اهيا قالت فري سايز لما وصلو مايدشون فينا مع اني مو متينه ؟؟؟ وواحد بدون لا البسه مشقوووق تخيلو والكوالتي حده خاااايس لا خام ولا خياط يعني الصوره شي والواقع شي والله ما سكت لان كانو غالين وطالبين وايد مو شويه وكلمتها اهيا قالتلي مو مشكله اردهم ورديتهم بس خليت واحد حق البيت وبيني وبينكم كسرت خاطري التاجره تقول مو منها من المصنع يابوهم جذي حقها



مره طلبت من تاجره مشهوووره حدها كحل الاثمد وكاتبه الاصلي واااي لما حطيته بعيني انحولت هههههههههههههههههههههههههههههههههههه
واي جني حاطه تراب بعيني وقطيته
وخذيت منها زيت حق الشعر من ريحته مو قادره استعمله الريحه حدها خياااااااااااس



ومره طلبت من تاجره البيضه مالت الريل والله لما شفتها جنها سجاجين خفت استعملها وقطيتها



ومره طلبت كريم مخدر وطلبت جم حبه حقي وحق الربع :gathering: هههههههه مايسوي ولااااا شي



ومره طلبت ورق عنب من تاجره انا وااايد عجبني بس اهلي ما عجبهم واستغلوه بس مادري اي تاجره نسيت بخاطري اطلب منها ما ابي اجازف اطلب من تاجره ثانيه ويطلع مو شي



وااايد قرقت وااي تعبت

ان تذكرت شي برد ان شاءالله :eh_s(7):

 

[zntoosha]

رد: (المنتج الخدعــة ) >> حسافة عطوكـ أكبر من حجمكـ <<تجاربكمـ الكل يشاركـ

صج بنات نسيت اقولكم عن خدعه كبرى :eh_s(4):



والطامه الكبرى اخييييه ما انسى هاليوم

يمعت خواتي بزوارتنا وحريم اخواني وقعدنا نطالع موقع تاجره هني بالمنتدى معروفه بالاغراض الزوجيه وان شغلها امريكي

وهذي تبي هذا وهذيك تبي هذا ويمعت الطلبات وطلبتهم ولما وصلو والله ان ويهي مو بس انقص الا انمسح :eh_s(1):

امبييييييييييييييييييييه امبييييه من قلب


اولا اهيا كاتبه ان منتجاتها كلها امريكيه والله يا بنات شقول وشخلي
طلبنا شمعتين عليهم حبيبي وعمري وسعرهم شوي اوفر على شكلهم والله لقيتهم بسوق شعبي واااايد رخاص :eh_s(14):

وطلبنا نكهات قطيناهم بالزباله تكرمون لان اولا مو نفس الشكل وثانيا اهيا معبيتهم بغرش صغااااار حيل وطعمهم والله بدون مبالغه
( دواااا كحه )

وطلبنا حلاو ومادري شنو للجسم وااي العلب ابداع لا امريكي ولا شي خووواره وكلهم انقطو بكرتونهم
وزيوت المساج اهيا معبيتهم بغرش صغااار


صج انبطت جبدي منها ومعروفه هني مادري ليش النصب :eh_s(14)::eh_s(14)::eh_s(14):

 

[zntoosha]

رد: (المنتج الخدعــة ) >> حسافة عطوكـ أكبر من حجمكـ <<تجاربكمـ الكل يشاركـ


وعلى طاري بنك بيري
اول ما بطل مخي مو راضي يستوعب روب مثلج وقلت لازم اجربه ولما شفت الطوابير قلت اكيد لذيذ بس مو مستوعبه روب مثلج شلون :eh_s(10):

المهم رحت جربته لاعت جبدي ماعجبني خير شر
وانتقدت الاوادم والطوابير

بس مره دق علي اخوي وقالي بيب بنك بيري ايبلج معاي قلتله يالله اوكي ابي شي بارد يوم يابه وكليته وااااي ذبت بطعمه ايييننن وادمنت عليه :rerrerek:
بس في مشكله انا اكل اصغر حجم ووعلى اخر شي انغث وتلوع جبدي منه مادري ليش بس بعدها بساعه اشتهي اكله مره ثانيه

 

[مروقه على الكوفي]

رد: (المنتج الخدعــة ) >> حسافة عطوكـ أكبر من حجمكـ <<تجاربكمـ الكل يشاركـ

رحت بازار فيه مندوبات شريت طابعة الاضافر ولمارحت البيت لقيت الاسفنجة الي تستخدم للطباعه موموجوودة
وشريت كريمات من مصر مزودين نص السعر انقهرررت يعني مدبله السعر وناس يبعونه ارخص
واخرمره رحت شريت اله غزل البنت اول مره اشتغلت ثاني مره ماتشتغل
وشريت منظم الجزم والجواتي الله يكرمكم ماعجبني كله قماش حتى الفواصل بين الجزم قماش شلون بالله انظم
امممم والكريمات والخلطات الحمدلله مااغامر لاني استخدمت كريم تبييضض شركة معروفه في السوق وبقع وجهي ابيض بس الحمدلله ان شاءالله تخف البقع
وامي شرت كريمات الطعم وووع طعمهاسيء على قولت الاخت الي قالت دوواء كحة

 

[بخـــارى]

رد: (المنتج الخدعــة ) >> حسافة عطوكـ أكبر من حجمكـ <<تجاربكمـ الكل يشاركـ

موضوع احبه وااااااااااااايد

 

[صمت المرافئ]

رد: (المنتج الخدعــة ) >> حسافة عطوكـ أكبر من حجمكـ <<تجاربكمـ الكل يشاركـ

زميلتي بالدوام قالتلي سالفة عن دوامها القديم
تقول إن وحدة معاهم بالدوام اتييب بضاعة
قمصان نوم حلوة ورخيصة <<< 5 دنانير
واللي فيه حركة ب 8
تقول ودايم ننطر بضاعتها ونشتري منها
بالآخر اكتشفوا إنها تشتري القمصان من سوق شعبي !!! :eh_s(1):
والمصيبة إن القمصان سعرهم دينار ونص بس
حتى اللي فيه حركات بدينار ونص :eh_s(14):
قلت لها قلعتج <<< شماته
السوق متروس ورخيص
وانتوا ينصبون عليكم هالحريم :krkrkr:
​

 

[الملكه85]

رد: (المنتج الخدعــة ) >> حسافة عطوكـ أكبر من حجمكـ <<تجاربكمـ الكل يشاركـ

ااب
ااب

 

[الاحمدية]

رد: (المنتج الخدعــة ) >> حسافة عطوكـ أكبر من حجمكـ <<تجاربكمـ الكل يشاركـ

يا بنات ممكن اقول الاشياء اللى استفدت منها اخذت من اخت لنا فى المنتدى اهنى زيت يمنى للفراغات والله والله نبت شعرى وغطى الفر اغات اللى بشعرى وفرحت ودعيتلها حتى زوجى استعمله ونبت شعره برغم ان عنده صلع وراثى واخذت منها خلطة تخسيس والله والله الشاهد على ان نزل وزنى 4كيلوا بلشهر والعلبة خلصت كله قبل سنه وان شاء الله بطلب منها خلطة التخسيس اي اسمها على ما اظن التاجرة واصلة بارك الله فيها اي الزيت كان على 20 والخلطة 10

 

[الاحمدية]

رد: (المنتج الخدعــة ) >> حسافة عطوكـ أكبر من حجمكـ <<تجاربكمـ الكل يشاركـ

يعلم الله انى لا اعرفها لا من قريب ولا من بعيد شفت اعلانها وطلبت والحمد لله الله يرزقها الرزق الواسع

 

[الاحمدية]

رد: (المنتج الخدعــة ) >> حسافة عطوكـ أكبر من حجمكـ <<تجاربكمـ الكل يشاركـ

اب اب اب

 

[ام سالم العنزي]

رد: (المنتج الخدعــة ) >> حسافة عطوكـ أكبر من حجمكـ <<تجاربكمـ الكل يشاركـ

الله المستعان ترى عادي الدنيا تجارب وشي طبيعي الفشل هو رديف النجاح ومو كل شي يناسبنا ممكن غيرنا يمدحه بس احنا ما يناسبنا
انا عن نفسي
مشط البف صدمه وصداع ومفارش الاظاءه تفشل ولصقات التبييض يعني مفعولها حلوه بس بسيط واشيا كثيره بس والحق ينقال في تاجرات هني يحرجونج بتعاملهم الراقي واللي ناسبني الخلطه الصابونيه لفلبينيه عبده والله حسيبها ناسبتني وحتي بنات عمتي جربوها بعدي واستانسو عليها ومام دعيج طلبت منها ورق عنب وموالح بصراحه بيضت وجهي الله يجزاها خير راهي وسعره مقبول والله حسيبهم واعلم بنياتهم وهذا شهاده حق مني لاني استفدت منهم
والله المستعان
*

 

[هونها يارب]

رد: (المنتج الخدعــة ) >> حسافة عطوكـ أكبر من حجمكـ <<تجاربكمـ الكل يشاركـ

وايد اسستخدمت وتطلعت اى شى

 

[رووو الروح وووح]

رد: (المنتج الخدعــة ) >> حسافة عطوكـ أكبر من حجمكـ <<تجاربكمـ الكل يشاركـ

الحمدلله استفدت واااايد من الموضوع

لاني كم مره كنت ناويه اشتري قمصان نوم بس سبحان الله ماشريت لي يومكم

ومره شفت تاجره تبيع قميص نوم عجبني طرت فيه كانت تبيعه ب 8

وسبحان الله رحت السوق الا الاقيه هو طبق الاصل ب2.750

وشلته على طوووووول ومفرش المساج كم مره كنت بطلبه مع الزيت

بس سبحان الله كل مره ااجل وزين اني دشيت الموضوع​

 

[قمر بيت أبوها]

رد: (المنتج الخدعــة ) >> حسافة عطوكـ أكبر من حجمكـ <<تجاربكمـ الكل يشاركـ

رفــــع مـوضـوع يسـتـاهـل الطــرح

 

[أمانينو]

رد: (المنتج الخدعــة ) >> حسافة عطوكـ أكبر من حجمكـ <<تجاربكمـ الكل يشاركـ

هاي حبوبات
عاد انا ام المقالب
حدي مقصه
في وحدة بردها هني ذكرتني بالصندوق الفاشل اللي طلبته
حتى مسميته box of shame

والسالفة انه زوجي كان مسافر فحبيت افاجئه وصبغت الصالة سويتلها نيولوك
وانشغلت مع الصباغين ومشاوير اكسسوارات للبيت
ونسيت اجهزلي قميص حلو وحركات رومانسية لغرفتي
ولا اطلب صندوق رومانسي اللي فيه قميص مع ناموسية وحركات
طبعا الصورة عجييييبة تايغر بوردي والقميص شكله روعة
ولمن دقيت قالت عندي احمر بتايغر قلت حلو
وطبعا الصندوق ب35 ومع التوصيل 37
ولمن وصل
وااااااااي يفشل
وكان الوقت حده حده
لان اليوم الثاني كنت بروح الصالون ما يمديني احوس ادورلي بديل
وصلني الكرتون احس كان مستعمل
لان عليه بقايا شمع من برا
وحاطتلي شموع بو 100 والناموسية لوووووعة ترتر
وكان في ديكور نفس الكرة يتعلق بالسقف بالصورة كان حلو تخيلوا شنو حطتلي بداله
حطتلي الزينة مالت اعياد الميلاد تفشششششل
واما الزينة والديكوريشن منتفتلي ريش وماخذتلها كيس تايغر مقصصته على شكل قلوب
طبعا اليوم الثاني يوصل زوجي شسويت
كان عندي قميص نوم مو لابسته ما فطنتله
وعندي شموعي وحركاتي
واطلع كل شي عندي واسوي جو
وحطيت الشموع الصغيرة عالزولية على شكل قلب كبير وحطيت كيكة مكتوب عليها اشتقتلك
وكان الله غفور رحيم
وبس تخسرت 37 دينااااااااار
بس اللي قهرني اسلوبها
انا المندوب كان تحت عندي
ومن بطلت الصندوق ما عجبني
دقيت عالمندوب مايرد ومامر حتى 5 دقايق
ما مداه يطلع من المنطقة
كأنه موصيته مايرد
وادق عليها تقوللي انتي اللي اخترتي هالشغل ومو شرط نفس الصورة
وتخلي زوجها يرد علي الحقيرة
دزيتلها مسج قلتلها انا اول مرة بحياتي اتحسب على احد وفلوسي مو حلال عليج


اما التجارب الثانية فهي لا تعد ولا تحصى
لكن عادي عندي لان ما حسيت بالغش
والغلطة مني لان لازم ابحث عن الشغلة قبل اشتريها


طلبت خلطة مزيونة وشقرا الصابونية وكريم دلال معاها
صراحة عجيبة واحلى مافيها حجمها حيييييل راهيه

 

[اميره1980]

رد: (المنتج الخدعــة ) >> حسافة عطوكـ أكبر من حجمكـ <<تجاربكمـ الكل يشاركـ

مسكرة لوريال الذهبية امدحوها لي وااااااااااايد و طلعت خربوطة
المسكرة صحيح انها تطول بس الطول عادي مو حيل و ما تكثف كلش