آكتبيـلنا قصـة ولادتـج هني ~شـآركينا بتجربتـج ~لرفـع معنويـات الحامل ^_~

[fofo90]

قرة عيونه
الحمدالله على سلامتج حبيبتي ومبروك مايبتي يتربى بعزكم

 

[fofo90]

قرة عيونه
الحمدالله على سلامتج حبيبتي ومبروك مايبتي يتربى بعزكم

 

[فخر البداوه]

قرة تندمج مع قصتي الحمدلله على سلامتج

 

[قرة عيونه]

حبيباتي الله يسلمكم يارب

وعقبال كل الحوامل يولدون بالسلامه

بس وين الباقي وين قصصكم قصتي صارلها ٦ شهور محد جا كتب بعدها هههه

 

[baa6aa]

انا نسيت احط قصه ولادتي هني .. يلا خل احطها لكم


الخميس 13/3 كنت بدار الشفا بالطوارئ كان فيني طلوق بس مو قويه حيل وحركة البيبي كانت حيل قليله قعدت عندهم تقريبا ساعتين الى 3 ساعات جان دكتورة الطوارئ تكلم دكتورة مي بالتلفون و قالتلها عن وضعي كله فطلبت منها يدخلوني الولاده و يعطوني طلق صناعي دام ان حركتها كلش مو زينه فخايفه ان فيها شي وصج دخلوني الولاده بروحي لان الغرف الكبيره كلها فل و ماكو غرف ثانيه يقدر احد يدش معاي .. دخلوني الساعه 7 المغرب لي الساعه 12 و انا مخليني بس جذي بدون اي معنى و محد طل بويهي لين وصل خبر حق امي وابوي وياو المستشفى وتناجروا مع الدكاتره و طلعوني لان دكتور الولاده اللي موجود مو راضي يعطيني طلق يقول عادي طاف باليوم كله طفت 10 حركات باليوم كافي .. و صج سوينا اوراق خروج و طلعت على مسؤوليتي..

مراجعاتي كانت كلها برويال عند دكتورة زينب بس اخر شهر على حظي الدكتورة كانت متعورة و ماخذه اجازة فاضطريت اراجع عند دكتورة مي بدار الشفا .. بس من عقب موقفهم هذا و شلون هامليني قلت مابي اولد عندهم خيره مع ان كنت مخططه خلاص ابي هناك

عقب ماطلعت كلمت دكتورتي زينب الوتس اب قلتلها كل اللي صار جان تقولي تعاليلي السبت ضروري اولدج دام البيبي حركتها تقولين مو اوكي وتجيك اذا كنت مفتوحة او لا لان من اول التاسع و انا 1 سم فاذا ليلحين 1 توسعني وتنطر علي شوي او تولدني .. اخترعت من كلامها وماقلت حق احد و سكت وحطيت موعد عندها الاحد .. يعني عناد راكب راسي خايفه اروح

الاحد 16/3 عندي مراجعه الساعه ٣ العصر فرحت لها فحصت وانا 2 سم و راسها مو بالحوض بس خافت تنطر فحطت لي بالونه داخل عنق الرحم عشان يتوسع
تبارك الرحمن ايدها خفيفه بالفحص ولمن حطتها ماحسيت
اول ماخلصت بلش العوار جان تقول ان البالونه تهيج الرحم ان يبدي طلوق عشان يتهيء ولاده
ودخلوني جناح ميموسا جناح الولاده وعطوني تحميله طلق
قالت كل ٦ ساعات تحميله .. واي وقت تشوف ان الطلق صار منتظم خلاص ولاده على طول واذا خلصنا ال٣ ومافاد راح تحط درب طلق صناعي
لان التحاميل دورها تهيء الرحم للطلوق قبل ويساعد على نزله الراس قبل ماتتهور بالطلق الصناعي
حطينا التحميله الاولى الساعه ٥ العصر و الطلوق بارده خفيفه وحاطين لي الكره بالغرفه وكل شوي اقوم اناقز عليها وعقب التحميله لازم ساعتين اظل بالفراش مع جهاز التخطيط ماتحرك و عقب هالساعتين عادي اتحرك
الساعه ١١ ردو حطو مرة ثانيه و تميت لي ٢ الفير طلوق زادت كنت ابجي منها بس بعدين خفت
اخر تحميله ٥ الصبح يوم الاثنين 17/3 .. وكنت ليلحين ٢ سم
اول ماحطوها بلشت الطلوق العدله ونطروا علي ساعتين شافو ان الطلق حيل عالي فوق ال100 وكنت منهاره بجي قمت اطق روحي من العوار فدخلوني غرفه الولاده وياتني الدكتورة تسال اذا ابي ابره ظهر او لا وقلتلها اي ابي وسالتني اذا في دكتور معين ابيه بالاسم قلتلها اللي موجود ..
عقبها رحت الحمام وانتو بكرامه و انا طالعه و لا احس شي ينزل اطالع ريلي ولا صج سائل ينزل .. جان يقولوني على طول خلج عالفراش لا تقومين .. طلع ماي الياهل انبط وانا مادري وكنت مو قادره حتى اوقف على حيلي من العوار محدبه ماسكه بطني و ابجي ابجي

دقايق جان ايي الدكتور والله ماذكر لا اسمه و لا شكله بس اذكر ان لمن قعدت عالفراش وعطوني المخده عشان المها وما اتحرك هني انهرت و قلتلهم خلاص مابي مابي احس بشي ابي بنج كامل ودوني غرفه العمليات سوولي قيصريه وابجي حييييل و الدكتورة يهدي فيني وامي بعد تقرا علي وتحاول تهديني .. بس ما رضا يقزني الابره لين هديت شوي و ثبت خذيت ابره الظهر الساعه ٨
بس من عقبها وانا جني جذابه .. كان يقولي شنو بيسوي قبل لا يسوي عشان ما اخترع ولا انقز ويقولي الحين بتحسين بشي بارد و الحلو فيه قبل لا يقزني الابره نفس اللي قرصني بيده عشان احس بوخزة و عقب دخل الابره مهد لي الوضع
الساعه ١١ الصبح وصلت ٤ سم ولا جديد راسها فوق .. كنت انام كل شوي و اقعد .. لان ماكو شعور بالعوار كلش .. وجهاز التخطيط يمي اشوفه يوصل فوق ال130 و انا اطالعه و اضحك اقول اللي اخترع الابره و الله يبيله بوسه على راسه ولا جان من الفير انا على نفس العوار
الساعه ٣ العصر كنت ٧ سم وبعد راسها فوق هني بلش مفعول الابره شويه يخف و بلشت احس بالعوار فقمت ابجي وطلبت منهم يزيدون الجرعه و صج لمن يات الدكتورة تطل علي طلبت منهم يزيدونها لي و الحمدلله بلش مفعولها بسرعه
لبسوني كورسيه لف عشان يبون ينزلونها لي تحت .. و ضغطو عليها من فوق
وقالو الساعه ٥ ابلش اسوي بوش لي الساعه ٦ كل ما شفت طلوق عشان ٦ الدكتورة اتيي وبعد لان عنق الرحم عندي طويل فما يبون اطول وقت طلعه الراس بس يبون الدكتورة اتيي يكون راسها تقريبا مبين
وصج بلشت ٥ اسوي بوش مع كل طلقه والسستر على راسي ماخلتني لين الستتر فحصت وجاست شعرها قالتلي وقفي ونادوا الدكتورة على طول
بس عشان ابلش اسوي البوش طلبت منهم يخففون الابره عشان احس واعرف شلون اسوي صج كنت احس بالعوار بس عالاقل عشان اساعدها واخلص اسرع
وصج ٦.١٥ الدكتوره عندي على مالبسو وجهزو كل شي
الدكتورة كانت حيل عجيبه ذكر الله ما يوقف من لسانها
على طول تذكر الله وحتى واهيا بعز اللوية تولدني كانت تنادي امي عشان توقف على راسي تقرا علي
٦.٤٠ انا والده الحمدلله
يبت احلى بنوته الله يحفظها وزنها كان 3.280 وطولها 49 سم

اول ما شالتها الدكتورة كانت ماتبجي كلش و حطوها على صدري لمده ثانيه وحده وشالوها انا هني انصدمت ان ليش ماكو صوت و ماخلوني اشيلها حطوها على الفراش وين يفحصونها شوي جان يطلع حسها هني كنت قاعده احاول ارفع عمري و الدكتورة تهديني وتقولي خلج خلج بطلع المشيمه لا تتحركين وانا اقولهم شفيها شفيها لين بجت الحمدلله جان اقعد ابجي معاها تطمنت ان مافيها شي
وعقبها بجم يوم لمن ياتني الدكتورة قالتلي بنتج كانت تعبانه لان عنق الرحم طويل و طولتي فاختنقت وانا ماحبيت اخرعج بس اشوه بسرعه رده عافيتها الله يحفظها يارب


والحمدلله على النعمه و يارب يرزق كل محروم و يحفظ عيالنا جميعا يا رب

 

[ككوته]

الف الحمدالله على سلامتج وسلامت الاموره تتربى بعزج وعز ابوها يارب

 

[انتيكا]

الحمدلله على سلامتكم دمعت عيوني حسيت نفسي مكانكم

الله يرزق كل محرومه يارب بالذرية الصالحه

 

[baa6aa]

امين ما قصرتوا بنات
وعقبال نسمع قصص الباقي ان شاء الله

 

[لوولوو_88]

و اخيرا يا دوري و اكتب قصتي لكم .. كنت انطر هاليوم و الحمدلله ربي رزقني و الفال لكم جميعاً

قصه ولادتي بوليدي حبيبي ربي يحفظه ..
تاريخ 30/9 .. مستشفى السلام .. دكتورة بادمسري ..

طبعا مثل ما تعرفون انا نزلت علي السدااده من تاريخ 19/9 و بآخر فحص لي كنت 2 سانتي .. و كنت فرحانة على أساس قربت الولاده بس مع الأسف ما كنت أحس بأي شي اللهم الثقل .. و طنشت الموضوع و مشت الأيام و كليت اناناس و كيوي و ببابايا و ماكو شي .. حاولت امشي هم ماكو شي .. لين يأست و قلت بخليها على الله .. في تاريخ 28 بديت اتعب ثقل على عوار بجسمي و ثقل براسي و بدت تنزل علي خيوط دم و إفرازات و هم طنشت .. لين تاريخ 29 انصحوني البنات اشرب كف مريم لاني فاتحة جزاهم الله خير و بعدها ياني عوار بظهري نفس المطرقة الي اون منه تقريبا 3 مرات أو 4 غير عوار الدوره بالبطن و نزل دم و يابلي طلوق و أنا صابره على نفسي على أساس لا يتعبثون فيني .. المهم رحت يومها أزور امي و شرحت لها العوار قالت طلوق قتلها ما عليه شي يحتمل قالت مو شرط و قامت تحن الوالده روحي المستشفى قلبي حاس انج فاتحة و تترجى فيني خل اطمن عليج ولا رديتها .. و فعلا رحت سبحت و تنظف و قبل لا اسبح و انتو بكرامه اشوف الدم مغرق الكير فري اول مره هالكثر اخترعت سبحان الله امي حاسة .. المهم و رحت المستشفى للطوارئ الساعه 12 و تسويلي سونار و تخطيط كل شي تمام و معاي طلق و فاتحة 3 سانتي .. و تقولي دخووول الله يا فرحتي شكبرها بفتك من الحمل و العذاب و الظيم .. و فعلا دخلوني الولاده و لبست لبس الميانين ههه و عطوني حقنة شرجيه المعفنا و بعدها ركببو البربيش الي اشوفه ارحم من الحقنة الشرجية الخايسه .. و بعدها ابتدى المشوار ..

و قعدت سوالف مع اختي العوده و ريلي يتناوبون علي و الطلوق دلع يهال و قلت للسستر ابي إبرة ظهر على الإتفاق و بعد الاستخارة .. طبعا مخلين الكمام يمي على ما يخلص التحليل الي لازم يسوونه قبل لا يعطونياها كان وضعي تمام و شي اتحمله .. و تنطر لولو الفرج و تنطر وين الإبرة و فجأة ولا دكتور التخدير داق .. و تصيييييير الصاعقة و الصدمة الكبيييييره @@




كلم اختي و قالها ما نقدر نعطيها إبرة ظهر لأنه لها سابقه جلطة و ممنوع عليها @@ .. و اختي تساحل فيه شالحل و الجلطة لها 8 سنين و اختي تشافت الي أهي انا و كان شي بسيط ما رضى .. للعلم بنات كانت جلطة خفيفه بالراس و الإبرة لها علاقه بالحبل الشوكي و توصل لي الرأس عشان مفعولها فخافو علي .. و إهما سألو اذا عانيت من أمراض من قبل و بلغناه عرف منه مو من التحليل ماله شغل ..

و ابلش انووووح و ابجي شلووووون بتحمل شلوووووووون و انا متعشمى على هالابره .. و ينقطع قلبي من البجا .. و بلشنا جد و بدأ الطلق يزيد و بطو الماي و زاد العذاب و انا اشفط بهالكمام يدوخ بس أحس بكل شي .. و يروحون و يردون علي على الفحص زاد 4 بعدها 7 سانتي و ما قصرت الدكتوره يتني على 4 الفير تطمنت علي و تواسيني على الإبرة انه ليش ماراح أخذها و مشت .. و زاد الطلق يا بنات و بديت اهستر لأني حسيت بكل شي و اصرخ من قمة راسي و كل ما رد قلت يا رب يا مخلص النفس من النفس خلصني و أقول يا رب فوق طاقتي صبرني ابجي .. و اختي تبجي و امي بعدها تهديني و حطو الطلق الصناعي قمت افرفر يا بنات و أقولهم تكفون قيصري و الدكتوره المناوبه أتكلم ابرود ماله داعي يا حبيبتي دنتي 7 سانتي قتلها كيفي بفلوسي ابي قيصري هههههه فصلت عليها .. و اصرخ بمووووووت و يحطون الكمام و أقولهم مابيه يخنقني لانه مع الصراخ ابي هوا و يكون الطلق حامي ف يحطون الكمام احسه يقمتني اشيله انفصام هههههه المهم و ارد اون و أن زاد صرخت اااخ شي لا يوصف اببدددددد .. و اشيل الاكسجين و أحاول أقوم لا شد العوار و أقول لأمي يما حسي فيني ما اقدر أتحمل والله لو ريلي يشوفني بهالحال يرضى قيصري تهلوس هههه .. طبعا على 8 سانتي يت دكتورتي و صبرت علي صبر شديد لاني بدعت بالصراخ و غيره و كنت مجلبه بالكمام و هذا خلاهم يخففون من قوه الكمام و كانت أكبر غلطة سويتها المفروض اشم لا زاد الطلق بس عشان لا ادوخ انا و البيبي المهم لين يا وقت طلعت الرأس و شلون لازم اسوي بوش وقت الطلق ربي نزل علي قوه و صرت اسوي بوش و أقولهم طلع الرأس و ارد اسوي بدون صراخ لأنه خلصت طاقتي المهم سويت 5 بوشااات و انا اشددددد لين طلع الراس و بعدها جم بوووووش و طلع ولدي حبيبي .. طبعا حسيت بالمقص و حسيت بتفقص البطن عشان المشيمه .. قطوووه على صدري و نمت و ردو نظفوه و بسته حبيبي و متنحه فيه اقول حبيبي حبيبي .. و نممممممنتتتتتت و قعدت و أقول الحمدلله قبل و بعد .. و مادري شلون استحملت و كان نفس الحلم ..

اغلاطي مثل ما قلت أني جلبت بالكمام ولا رضيت اهدا و هذا خلاهم يخففونه و خلاني أحس بالألم أكثر و خلاني اصرخ و طاقتي تروح على الفاضي ..

و أخيرا المستشفى روعه و اهتمام ما خلتني السستر بغرفه الولاده كانت مجابلتني دكتورتي يتني قبل الولادة و حزت الولاده شي حلو فيها رغم أنه ولادتي نص الليل بس يت و تطمنت علي ..

و سلامتكم .. و الامومه اتينن وربي يرزق كل محرومه و يبلغ كل حامل بضناها ♡

 

[اهذريبك~]

3 ايام على فترات قريت الموضوع و الحمد لله خلصته

في قصص حلوووة و تريح و قصص تخوف


ان شاء الله ربي يسهل علي و ادخل اكتبلكم قصتي

 

[baa6aa]

واااي لولو ماشاءالله عليج قويه اللي تحملتي ماشاءالله
والحمدلله على سلامتج و ربي يحفظ لج الشيخ يارب و يرزقج بره


اهذريبك
الله يسهل عليج يارب و عقبال قصتج

 

[Newbaby]

قصصي ماحب اذكرها كلها عمليات قيصريه والثالثه يايه بطريج

استغفر الله من حللت وانا احاتي القيصريه واقرا مراضيع اذا ممكن اولد طبيعي بعد قيصرتين



هذا حلم بنسبه لي


افكر اروح بريطانيا لذا يعطوني مجال اولد طبيعي

 

[baa6aa]

يخافون من الطبيعي بعد القيصريه اذا كانت الفتره بينهم قصيره عشان احتمال الجرح يتبطل .. و يضرج و يضر الياهل
وهالموقف صار معاي مع حماتي والحمدلله على كل حال بنتها حاليا مقعده فيها نقص اكسجين من الولاده بسبه ان اصرت على الطبيعي والدكتور كان قايل لها ماكو مجال فصار اللي صار والحمدلله على كل حال
فالافضل اخذي استشاره اكثر من دكتور و الله يسهل عليج يارب

 

[~Rou7~]

الحمدلله ع سلامتكم وع البركه المواليد الله يصلحهم

 

[floor]

الف مبرووك وعقبالنا وكل الكروشاات

 

[joorey]

الحمدلله على سلامتكم

 

[مذهلة2013]

قصه ولادتي

يوم الخميس كان عندي موعد عند الدكتور حيان الاحمد كان الساعه ٤ العصر و كان يوم الخميس الفير عالساعه ١ الفير كنت ابجي اقول حق ريلي تعبت ابي اولد? وكنت ادعي اني اولد لاني تعبت من المشي يوميا عالتراب وبالمجمعات المهم الفير وانا كلش بنام وريلي يمي كحيت جان ينزل علي شي ولااقول حق ريلي ترا قاعده ابول هههههه وينزل وينزل ومايوقف كلمت دكتوري حيان الاحمد وقالي روحي السيف ولاده ورحت وانا ينزل علي الماي حييل رحت ولا فاتحه بس سانتي?والراس مومحشور عدل بالحوض هالكلام كان على الساعه ٧ الصبح دشيت عطوني الدرب وحقنه وتحميله وقعدت امشي وادعي وادعي المهم يه دكتوري على ١٠ وقعد يهديني ويشرحلي كل شي بيصير وبيعطيني تحميلتين مع طلق صناعي طبعا انا من الاول ابي ابره ظهر والمهم راح حيان وموصيهم امشي ومااكل ولاااشرب لانه لاسمح اكون قيصري ف ياخذ احتياطاته قعدت امشي وادعي واقرا قران وبعدين عطوني ابره الظهر كانت عذاب ريلي ماسك ايدي وانا ابجي حييييل عورني هالدكتور حيييل?وبعدها مااحس بريولي وناسه وحطولي بربيش ووتحميله ثانيه المهم دكتوري يتواصل مع السسترات على طوووول وارتفعت حرارتي اشوي ورجعت المهم فحصنا على ٥ كنت ٢مازاد حيل يه دكتوري حيان وقالي خلاص راح اعطيج طلق صناعي من ٦لين٩وايييلج٩ اذافتح الرحم والراس انحشر نكمل واذا مانزل الراس حيييل والرحم مازاد وايد خلاص قيصري لانه البيبي اخاف يتعب عطوني طلق وصارت٩ ويه حيان فحص ولا٢.٥ قالي خلاص قيصري عشان الياهل مايتعب وانتي تتعبين وطبعا قعدت ابجي حيل خايفه وريلي دش وياي غرفه العمليات وحيان قاعد ويتغشمر ويسولف ويقولي انتي قويه المهم شفت بنتي نتفه حييييل وزنها٣.١٠٠تقريبا شفتها جان ابجي وقعد يخيط الدكتور ويسولف وقعد وياي بالافاقه ويسولف ويضحك ربي يفتحها بويهه والحمدلله خلصت صج تعبت حيل ١٥ ساعه بغرفه الولاده وبعدين حولوني قيصري كل هذا خيره من ربي والحمدلله خلصت وربي يرزق الكل ولاده سهله

طبعا دكتوري غني عن التعريف اينن وهادي و يهدي الوضع ومايخوف ويقعد يضحك على طول وياي حتى بغرفه الولاده يضحك وخلاني صج انسى الوضع بغرفه العمليات

مستشفى السيف اينن والسسترات عسسسل ايننون وحبوبين حييييل

 

[لآ بيرلآ]

الف الحمدلله على سلامتج مذهلة ومبروك ماياااج حبيبتي

انا ااراجع عند حيان وناوية اولد بالسيف باذن الله دعواتكم

 

[~Rou7~]

الحمدلله ع السلامه مذهله الحمدلله ع كل حال

 

[مذهلة2013]

الله يسلمكم حبايبي

لآ بيرلآ

اختيار موفق باذن الله
دكتور شاااااااطر ومستشفى حلوووو