آآه من الزمن ...

[meen_ana]

الجزء التاسع عشر
دخل خالد البيت وحاول انه ما يبين انه متضايق عشان محد يحاتي..
اليده: ها وين لقيته هالمصرقع؟؟
خالد: منو فيصل.. مسكين ها مصرقع..
اليده: لا ويه فديت ولدي فيصل انا يوم عقل وقام يفكر.. المصرقع هالثاني الي يسمونه غانم..
فطوم تضحك ذيج الضحكه العاليه من خاطرها.. : ههههههههههههههههههه
غانم: جب انتي .. بعد تتضحك.. زين جيه خليتي البنت تستانس..
فطوم وفي ايدها كرت وتتطالع غانم: هههههههه اقول بتسكت ولا (اتأشر بالبطاقه).. كيفك عاد..
غانم من شاف البطاقه قفط وارتبك ما عرف شو يسوي: سكتنا خلاص..
ام عبدالله: غرييييييبه اول مره اشوف غانم مطيع لهالدرجه..
فطوم: محد يعرف لع كثري..
اليده: عشان جيه انا اخترتكم لبعض..
فطوم اتصد صوب خوله: ردينااااااااااا
غانم: الللللللله ياهي وناسه اعرس وياها..
فطوم نقزت من كلامه اول مره تسمعه يقول جيه وتصد تطالعه تلاقيه يأشر لها من تحت انه بيراويها,..
غانم: يدووو.. شو رايج اعرس انا ويا فطوم بعد عرس فيصل على طول..
فطوم: هي والله يدو شو رايج..
اليده مستغربه منهم: اقول يا عيال انتوا شو فيكم اليوم مب على عوايدكم..
غانم: طاعوو هاي ما تستحي اشكره اتقول حق يدوتبا اتعرس صدق فصخت الحيا..
فطوم: جيه هو لبس عشان افصخه الحيا في دمي..
غانم: جب انتي ام لسان هاتي الي في ايدج عن اخذه غصب..
فطوم: لا بحتفظ فيه ذكرى.. يمكن في يوم احتاجه..
غانم: يا ربي.. فطوووووم اصطلبي..
وتم غانم ويا فطوم يتناجرون على البطاقه والباقي كملوا سوالفهم وفيصل بعده برع البيت .. رن تليفون البيت ركضت فطوم اترد عليه..
فطوم: الوو مرحبا بيت السيد خليفه من معي..
مريم: فطووم ويهد شو اتسوين هناك..
فطوم: مريووووووووم.. وانتي ليش ما تتصلين بيتنا عقب تتصلين هني..
مريم: انجبي لا.. يدتي العوده لازم اكلمها.. عطيني اياها ماروم ارمس وايد بيزغدوني هني في الجامعه..
فطوم: احسن عشان افتك منج..
غانم استغل الفرصه وسحب البطاقه وفل طلع راح غرفته.. وفطوم من انتبهت على البطاقه فرت التليفون عند يدتها وركضت فوق والكل يضحك على اشكالهم جنهم يهال..
اليده: هلا والله بالورده مريوووم الحلوه.. وينج يمي وينج.. اشتقنالج.. ما ييتي هالإسبوع..
مريم: يدو تدري امتحانات والبحث.. وهاي اخر سنتين يعني لازم اشد حيلي عدل..
اليده: الله يوفقج.. شخبارج يمي طمنيني؟
مريم: بخير ربي يعافيج انتي شو صحتج وشخبار عمي ومرت عمي والكل..
اليده: كلهم بخير يسلمون عليج... انا ما بطول عليج هاي امج رمسيها.. وعاد تعالي هالإسبوع خل انشوفج..
مريم: ان شاء الله بحاول..
.. .. ..
صعدت فطوم فوق ويوم حاولت تدخل غرفه غانم ما رامت كان قافل الباب ومب طايع يفتح .. عصبت ودخلت غرفه خوله شافت جدامها التليفون تذكرت هزاع.. قالت خل تتصل فيه تتطمن عليه..
فطوم: الووو.. هزاعيييي اشحالك؟؟
هزاع: هلا والله.. وينج حبيبتي غبتي عني اشتقت لج موووووووت..
فطوم: فديتك والله .. شو اسوي تدري بالضروف..
هزاع: انا عندي فكره شو رايج اتطلعين لج تليفون..
فطوم: لا شو ممنوع تبا اهلي يذبحوني.. لا انا اختي في الجامعه وما عطوها اصلا لأن ممنوع في الجامعه..
هزاع: انزين تبيني اييب لج تليفون والله صدق.. عندي تليفون ماباه وبطاقه بعد..
فطوم: لادخيلك انا جيه ارمسك وانا زايغه وين لو تليفون وبالدسه بعد..
هزاع: فطوم فكري.. لين متى بتم جيه اتعذب .. واتعذبين نفسج..
فطوم: اففف منك.. بفكر دومك تقنعني.. بس كيف بتيبه يا ذكي..
هزاع: ما يباله تفكير انتي بس وافقي والتليفون بتاخذينه من باجر جان تبين..
فطوم: اففف اوكي بفكر..
هزاع: ردي علي هاليومين لأني انا في دبي عقب ما بتلقيني هني برد العين..
فطوم: اوكي.. يلا بخليك احين لأني في بيت عمي.. باااااااي
هزاع:باي.. ولو اني زعلان بتصكين من غير ما تعطيني بوسه..
فطوم: عيب عليك انزين.. باي...
وبندت الخط.. وهزاع كان يالس ويا ربعه وحاط التليفون على الإسبيكر ويرمس وياها مفتخر بين ربعه إن ربيعته ما ترد له طلب غير الطلب الأخير من حقها لأنها اول مره تسمعه يطلب هالطلب..
فواز: انت من صدق بتييب لها تليفون ما عندك سالفه...
هزاع: يا اغبيا هاي حجه عشان تطلع وياي اونها تاخذ التليفون وبعطيها تليفون عشان تستانس..
عبدالله: والله وعليك افكار عجب..
هزاع: معلوووم ابوي..
فواز: اقول .. يلا خل انكمل لعب لا ضيعتوا الدور علينا..
.. .. .. .. ..
واتأخر الوقت والكل رد البيت.. وفطوم ركبت الموتر ويا فيصل عشان ترمس وياه شوي..
فيصل: شو استانستي هناك..
فطوم: هي وااااايد.. وانت ليش كله كنت يالس برع
فيصل: الجو كان وايد حلو قلت مابا افوت هالفرصه في القعده الحلوه هاي..
فطوم: وصدق عن موضوع زواجك؟؟ شو الي غير رايك؟
فيصل: ممكن ما تسألين اسئله اتخص هالموضوع لني مب راد على اي حد.. هالشي يخصني وبعدني هذا الشي الي الكل بغاه خلاص خل يتحمل..
فطوم: فيصل.. خاطري اطلع لي تليفون شرات باقي رباعتي طبعا بعد موافقتكم..
فيصل: لا.. ولا تناقشيني .. تحتاجين التليفون تبين ترمسين ويا حد ها تليفوني تحت امرج تعالي عندي وبعطيج اياه.. لكن تليفون خاص قبل الجامعه اسف..
فطوم: امم سكت ما بناقشك..
رن تليفون فيصل كان الي متصل غانم..
فيصل: هلا والله..
غانم وصوته حزين شوي.. : اقول فيصل انا ياي بيتكم اليوم ممكن ولا لا.. ابا ابات عندكم..
فيصل: خير شو صاير شو فيك وانا اخوك ليش متضايق..
غانم: انت رد علي ممكن..
فيصل: اكيد ممكن البيت بيتك.. بس ما قلت لي صاير شي في بيت عمي..
غانم: لا كل شي بخير بس انا شوي متضايق..
فيصل: خلاص عيل نحن نترياك..
غانم: خلاص ما بتأخر كلها مسافة الدرب..
وبند الخط عن غانم وكانوا توهم جريب البيت..
فيصل: ها غانم يقول بيبات عندنا اليوم مادري بلاه حسه متغير..
فطوم: هي انا بعد حسيته جيه من نزل من غرفته حسيت ويهه جالب..
فيصل: يوم بيي بعرف شو فيه..
فطوم : انزين انا نازله ابدل عشان اقعد وياه يمكن بيخبرني انا..
فيصل: هي صح انتي وياه اكثر من غيرج..
فطوم: اوكيك..
صعدت فطوم الغرفه وانتهزت الفرصه وكانت مستانسه في داخلها لأن اللون الي اختارته حق غانم من الألوان الي هو يحبها بعد.. كانت شاريه له قميص بودي لونه سماوي وفيه تموجات الكحلي ومناسب على جسم غانم لأنه عرض من اكتافه شوي.. وكانت ماخذه له عطر الشيخ من باريس غاليري وكلهم حاطتنهم في بوكس ومزينتنهم بورد مجفف وحاطه فيه بطاقه وهذا كله عشان يوم ميلاده.. وحطته في الغرفه الي هو بيرقد فيها..
وصل غانم وسار الغرفه عشان يبدل وينزل .. شاف بوكس على السرير ومحطوط عليها ورقه صغيره مكتوب الغالي غانم..
فتح البوكس قرا البطاقه وشاف الهدايا وتم يصيح ما قدر يتمالك عمره.. لكن الغضب الي هو يشعر فيه كان طاغي على كل شي.. شل البوكس وسار صوب غرفه فطوم دق الباب .. فتحت له فطوم الباب.. اول ما شافها فر البوكس على ويهها وتمت فطوم جامده مكانها مستغربه من تصرف غانم الغريب..
غانم: مابا شي منج.. يالخاينه.. خنتي ثقت اهلج فيج وتبيني اقبل منج هالهديه.. طحتي من عيني.. الله فضحج الحمد لله انه فضحج قبل لا تفضحينا.. ما يشرفني يكون عندي بنت عم شراتج وانا الي وحليلي اتحرى ان عندي بنت عم ولا شي مثلها في الوجود ودوم افتخر فيهاواخر شي تطلعين حالج حال كل البنات.. تف عليج يوم هاي تصرفاتج.. نعالي ما تسوينه تفهمين.. جرحتي قلبي قبل لا تجرحين اي شخص .. اونج افتكرتي فيني في يوم ميلادي روحي افتكري في هزاع مالج احسن مني تراه.. وانا الي طول عمري افتكر فيج.. البطاقه الي شفتيها تتحرين وحده كاتبتها لي.. لا حبيبتي ها انا الي كاتبنه لج مالت علي... وملايين غير هذي البطاقه كاتب بس انتي ما شفتيهم يمكن..
سمع فيصل الحشره الي صايره دخل وشاف فطوم اتصيح وغانم معصب والدموع منحسبه في عيونه ومثل المينون يعق كلمه ورا الثانيه من غير لا يسكت..
فيصل: هدوا هدوا.. شو فيكم؟؟
غانم: اختك المصون يا فيصل اتعدت حدودها وقامت اترمس شاب في التليفون..
من سمع فيصل هالكلام ما لقى عمره غير يصفع فطوم ذيج الصفعه واتطيح فيها الأرض..
غانم: تستاهلين.. واكثر من جيه بعد.. انا مشكلتي ولد عمج ولا جان ذبحتج من الضرب.. تف عليج وعلى ويهج..
فيصل بعصبيه: شقايل عرفت..
غانم: الله فضحها.سمعتها بإذني اترمسه في التليفون من غرفه خوله.. عشان جيه انا ما قدرت اصبر لين باجر قلت لازم ارمسها اليوم..
فيصل ما قدر يتحمل كلام غانم اكثر من جيه من سمعه قام يزيد الضرب على فطوم اخر شي يتوقعه ان فطوم اتسوي جيه.. سمعت ام خالد الصريخ وطلعت من الغرفه هي وخالد اما بو خالد ما كان في البيت يومتها كان ساير العزبه ويا اخوه خليفه..
خالد: فيصل شو فيك اتخبلت .. ذبحت اختك شو صاير..
فيصل: شو صاير.. قول له غانم شو صاير. اطربه.. اختك المصووووون ترمس شباب على اخر عمر.. وانا اشوف اليوم تطلب تليفون.. ولا 24 ساعه قابضه السماعه من البيت ترمس والاحظ اتغير رقم بس اتجاهل .. اقول لا اختي حبيبتي لا يمكن اتسوي هالشي..
خالد جن جنونه وهو الثاني بس تمالك نفسه ما سمح لنفسه يمد ايده على اخته شلها وياه الغرفه واما ام خالد فتمت اتصيح على سواد ويهها ومب قادره تتحمل الصدمه .. تمت اتصيح وسار فيصل يهون على امه لأنه خاف عليها عن يستوي بها شي..
خالد: فطوم لا تخافين.. انا ما بضربج الي ياج من الضرب مكفيج.. وانا مب ويا فيصل بهالإسلوب انه يضربج.. بس هذا مو معناته اني راضي عن الي سمعته.. بس فيصل من خوفه عليج ومن صدمته ما كان متوقع انج اتسوين هالشي .. لنه ما شفنا في حياتنا هالشي من مريم فما نتوقع انشوفه منج.. ممكن اتفهميني السالفه..
فطوم وهي مب قادره تسكت عن الصياح منزله راسها وما تقدر تتطالع اخوها ابد.. مسك خالد ويهها ورفعه: فطوم اتطالعيني.. انتي مراهقه والي في عمرج يسوي سواتج.. وهاي مب نهاية العالم بس ما صار شي اكبر من التليفون .. صارحيني عشان اساعدج..
فطوم: خالد انا اسفه.. سامحني اخوي .. احين استوعبت غلطتي.. انا كنت ماخذه الأمر بسهوله لأنك انت وفيصل كنتوا اترمسون.. ورباعتي اشوفهم يرمسون ومحد يصيدهم والي بتاخذ الي رمسته ..
خالد: فطوم حبيبتي.. رباعتج هاييل خبايل بييهم يوم وبيستوعبون ان الي يسوونه اكبر غلط.. وانتي تعتقدين ان هذا الي يرمسج بياخذج.. وين عقلج انتي اصحي.. انا رمست شفتيني خذت وحده فيهن.. مستحييييل ما اقدر اخذ وحده انا رمستها وهو نفس الشي والشباب كلهم جيه انا اقعد ويا الشباب واعرف سوالفهم.. وعمرج لا تقارنين نفسج فينا.. نحن اولاد صح الي سويناه غلط عند رب العالمين والله يغفر لنا.. بس الريال محد يعيبه هالمشكله والبنت على اقل شي خلاص..
فطوم: انزين بس هو نيته صافيه ..
خالد: فطوم.. يا بابا.. سمعيني.. الي نيته صافيه على قولتج ما بيرضى انج اتكلمينه من ورى اهلج بيخاف عليج .. والي نيته صافيه يدل باب البيت.. ليش يدخل البيت من الشباك مب الباب
فطوم: يمكن عشان اني صغيره..
خالد: لا حبيبتي ها مب عذر وانتي منو قال انج صغيره انتي باقي لج سنتين وبتخلصين ثانويه بتغدين حرمه ولا شيخه الحريم..
فطوم: شو الي بيرضيكم احين مستعده اسويه.. بس انت وفيصل وامي لا تزعلون مني... وغااااانم
خالد: غانم انا ما اوعدج انه ممكن يسامحج.. لكن نحن اهلج ما نقدر نتخلى عنج.. ومقدرين انج بنت صغيره .. وان نحن ابتعدنا عنج شوي.. خصوصا انا يوم فيصل مسافر انا كنت على هياتي ما اهتم في حد..
فطوم والدمعه في عيونها وحاسه انها مب قادره تتنفس ما لقت نفسها الا اتفر عمرها في حضن اخوها خالد وهاي اول مره لها تحضن اخوها وتمت اتصيح من خاطرها..
خالد: فطوم حبيبتي... سمعيني.. تبيني اثبت لج بنفسي اذا هذا الريال يباج ولا لا.. عشان لا تعتبرين ان نحن انقص عليج.؟؟
فطوم: لا اصدقك..
خالد: اقول هاتي تليفوني..
فطوم: ليش..؟
خالد: انتي هاتي..
فطوم: هاك..
خالد: سمعيني زين.. اتصلي فيه.. وقولي له اهلي جكوني وضربوني وخلاص ما اقدر اكلمك للأبد واذا تباني اخطبني..
فطوم: لا مابا
خالد: قلت لج اتصلي انا ابا..
فطوم: افف انزين.. (دقت فطوم على رقمه ورد عليها).. الو هزاع..
هزاع: هلا والله..
شل التليفون خالد وخلاه عالإسبيكر..
فطوم: هزاع بقولك شي...
هزاع: تامرين امر..
فطوم: اقول اليوم وانا كنت ارمس وياك من بيت عمي اخوي العود سمعني وصربني صرب.. وهددني اذا كلمتك مره ثانيه ما بيعدي على خير لا لي ولا لك..
هزاع: قولي والله..
فطوم: والله اليوم زخوني.. فعشان جيه انا قلت له انك تباني وبتخطبني..
هزاع: شو اتقولين شو اتخربطين .. ايه انا مالي شغل في مشاكلج .. خلج بصوب وخلني بصوب شو اخطبج.. اودر بنات هلي واخطبج انتي مينون..
فطوم انصدمت: عيل انت اتقص علي..
هزاع: سمي الي بتسمينه.. المهم لا اتدخليني بمشاكل ويا هلج.. لا بكلمج ولا تكلميني.. يلا باي..
بند الخط بويهها وزادت غصتها وتمت اتصيح زود على الي صار.. حست اشكثر هي هبله بهالشي الي سوته وانها خسرت اهم شي هو ثقه اهلها..
خالد: سمعتي بإذنج.. صدقتي.. شو رايج احين..
فطوم: سامحني خالد والله وعد مني ما ارد اسوي هالشي وعد والله وما بسوي غير الشي الي يرضيكم..
خالد: سيري احين عند فيصل اخوج واعتذري منه وبوسي راسه وقولي انج ندمانه واوعديه وسيري عند امي وراضيها..
فطوم: وغانم..
خالد: ما عليج انا برمسه .. يلا سيري..
فطوم ابتسمت وسارت عند اخوها فيصل.. ..

وهدت الأوضاع بين فيصل وفطوم وامها ولو ان المراقبه صارت اشد عليها بس فطوم راضيه لأنها عارفه انها غلطانه وتستاهل.. اما غانم فعلى حاله ما يداني يتجابل فطوم.. والهديه خالد خذاها غصب وعطاها لغانم رغم رفضه لكن يوم شاف ان خالد الي يابها ما قدر يرده خلى الهديه عنده في الغرفه لكن من غير لا يفتحها ولا يستخدم اي شي فيها سواء العطر ولا القميص او حتى الميدالية الصغيره.. وفطوم كان الهدوء ظاغي عليها والكل مستغرب ومحد درى بالسالفه حتى خوله ما درت.. وفطوم ماتروح بيت عمها خوف انه اتجابل غانم.. وحتى لو غانم سمع انها بتيي بيتهم ما يقعد عشان ما يشوفها.. ومرت الأيام على هذا الحال

 

[boys are toys]

مشكورة حبيبتي على هالقصة الحلوة
الله يعطيج العافية وفي انتظار باقي القصة

 

[غرنوووقه]

تسلميييييييين حبيبتي فديييتج مشكوووووووووووره

 

[boys are toys]

لازلنا في الانتظار
لاتنسينى ياحلوة لا ني تعلقت في القصةوادري انج مشغولة في الانتخابات الله يعينج

 

[meen_ana]

تسلمين حبيبتي لا عادي اليوم راح افضي لكم واكمل لكم وسامحوني على التأخير بس على ما ارتحت من الانتخابات ولويتهم صج تعب بس كان وناسه

 

[meen_ana]

الفصل الثاني من الجزء التاسع عشر

وطبعا مرت الأيام وخلصت فطوم امتحاناتها وبدت تستعد لعرس اخوها خالد اول شي طبعا ومريم بعد كانت مخلصه بتقدير امتياز قدرت تجتاز امتحاناتها باقي لها سنه وتصبح دكتوره مريم وهي بعد بدت بتجهيزاتها، طبعا مريم عارفه بموضوع فطوم لأن امها الي خبرتها عن السالفه..
فطوم: مريوووم ممكن اسألج سؤال؟
مريم: تفضلي سألي..
فطوم: شو اسوي عشان غانم يرد مثل اول وياي .. والله انا موول مب مرتاحه من يوم ما متغير علي غانم، كله ولا غانم والله هالإنسان وايد غالي علي..
مريم: مادري والله شو الحل وياه.. حاولي انتي اتكلمينه..
فطوم: موول حاقرني ما يعطيني مجال اتجابل وياه، تدرين من متى ما شفته يمكن ثلاث شهور ولا قبل لازم اقل شي اشوفه فوق الثلاث مرات في الإسبوع..
مريم: بس لا تنسين انتي الغلطانه..
فطوم: مريووووووم لا تردين اتذكريني بغلطي انا روحي ندمانه
مريم: عيل لازم اتحاولين اتحلين الموضوع..
فطوم: بليز حاولي اتساعديني .. ترا غانم وايد غالي علي.. ما يهون علي.. والله اتعذب يوم اسمع اسمه ولا طاريه واتذكر انه جيه كارهني..
مريم: اقول ممكن اتفضينها من سيره.. خل نروح عند المصممه عشان نسوي البروفه مال فساتينا..
فطوم: ليش اليوم البروفه؟؟
مريم: هيه اتصلت فيني اليوم قالت لي تعالي..
فطوم: بس انا لين احين مب مقتنعه في اللون الي اختارته لي احسه مب لايق..
مريم: لا بالعكس هاللون كان فكرتي انا قبل.. احسه لايق عليج ووايد بعد..
فطوم: بس اذا طلع بايخ تدرين شو بسوي بلبس فستانج..
مريم: مب قياسج..
فطوم: ما يخصني..
مريم: ان شاء الله بيطلع حلو انتي بس فكينا احين.. خل انروح..
وراحوا هم للبروفه مالتهم..

في بيت العم خليفه..
خوله: غانم تعال اباك شوي.؟
غانم: ما تشوفيني اتابع المباراة .. عقب بيي
خوله: قلت لك تعال.. الا هاي مباراة مسجله يعني مب مباشر.. يلا تعال بسرعه اقول لك
غانم: لا حول ولا قوة إلا بالله .. أمري لله ييت
صعدت خوله ودخلت غرفتها تتريا غانم عشان اتكلمه.. ودخل غانم عقبها..
غانم: ها شو السالفه؟
خوله: بلاك جيه واقف اقعد انزين عشان اخبرك السالفه..
غانم: وهاي قعدنا.. خبريني شو الي صاير..
خوله: انت شو بلاك ويا فطوم.. احس انكم مب على بعضكم اذا تجابلتوا وما اداني تسمع سيرتها موووول..
غانم: ما بلاني شي وياها..
خوله: غانم.. اتخش عني.. انا خوله ..
غانم: اذا انتي خوله انا غانم.. وبعدين قلت لج وكلامي اظني واضح.. مافي شي بيني وبينها.. خلاص
خوله: بحاول اني اصدق ولو اني مب مصدفه..
غانم: والله كيفج ما تبين اتصدقين..
خوله: المهم .. خل ننزل نتعشى احسن لنا..

في بيت ريم
ريم: افففف شو ها احس الوقت ضيق ومب قادره اخلص شي..
عواش: عفان الله انتي مووول مب مترقعه .. على الأقل ملجه خل يظهر وياج حاله حال اخوه خالد.. تستانسون .. ترمسون بعض ومادري كيف..
ريم: لا عادي بالعكس انا هالشي مب هامني تدرين ليش احس جيه احسن.. كل واحد يكون متشوق للثاني اكثر
عواش: الله يهنيج.. اول مره احسج صدق مستانسه ..
ريم: الحمد لله ليش ما استانس وانا باخذ الإنسان الي انا احبه..
عواش: عقبالنا يا رب..
ريم: ويييييه ليش مستعيله.
عواش: بس ابا حق يومين اغير جو اعيش حياة الزوجيه وعقب برد للعزوبيه
ريم: ههههههه.. جيه لعبه قالو لج..
عواش: انزين خلنا من هالرمسه تعالي خل نكتب شو الي خذنا عشان انعرف شو ناقص لج..
ريم: هي والله يبالي..

وتموا الكل يستعدون لعرس خالد وفيصل.. والكل مستانس الا فطوم وغانم وفيصل كل واحد في هم مب قادر يستانس وياهم.. ومرت الأيام وجرب موعد ملجه فيصل..
فطوم: ممكن ادخل..
فيصل: داخله الغرفه وتستأذنين..
فطوم: هههههه شو اسوي مؤدبه زياده عن اللزوم..
فيصل: شو تبين خلصيني مصدع ابا ارقد..
فطوم: بل بل .. ليش جيه كارهني.. انت بعدك حاط في خاطرك مني؟؟
فيصل: لا بالعكس فطوم انا ناسي السالفه ومستانس لأنج تغيرتي.. بس روحي متضايق...
فطوم: انت تبا ريم.. انا بعده هالشي مب داخل راسي..
فيصل: ممكن ما ترمسين في هالموضوع.. انا خلاص باخذ ريم وانتهى الموضوع..
فطوم: بس..
فيصل: لا بس ولا شي.. عندج موضوع ثاني ترمسين فيه..
فطوم: لا.. هي. اقففففففف ماعرف شو اقول..
فيصل: شو بلاج.. قولي وخلصيني..
فطوم: غانم..
فيصل: هيييييييه.. بدا القلب يحن يعني ..
فطوم: تراه ولد عمي مالي غنا عنه.. بليز رمسه والله ما اتحمل صده اكثر من جيه..
فيصل: بحاول.. بس انتي ابخص فيه.. تدرين فيه وفي عناده..
فطوم: اففففف عشاني حاول..
فيصل: ان شاء الله..
فطوم راحت له وباست راسه: تسلم لي والله
فيصل وهو يبتسم: يلا تصبحين على خير..
فطوم: فيصل احس اني محتاجه انام عندك.. تذكر يوم كنت صغيره ما انام الا وياك..
فيصل: ههههههه.. خلاص هاتي فراشج وتعالي..
وراحت فطوم يابت فراشها ونامت في غرفه فيصل وكانت وايد مستانسه حست ان علاقتها بدت ترد ويا فيصل احسن من قبل بعد.. رقدت وهي تدعي في قلبها ان الله يرد العلاقه ما بينها وبين غانم..

في بيت العمه هنادي
علي: امي تسمحين لي اتصل في نوره بنت خالوو..
هنادي: غريييييبه اول مره اشوفك روحك تطلب اترمسها ولا انت مب لهناك وياها..
علي: لا ترا اباها في سالفه ابا اتخبر عنها تدرين فيها هاي تعرف كل الأخبار..
هنادي: هي امي عادي اتصل تراها بنت خالتك مب غريبه..
علي خذا التليفون واتصل بيت خالته كلثم.. ردت عليه نوره..
علي: الووو نواري اشحالج .. شخبارج..
نوره: تمام انت شحالك.. غريييبه شو هالإتصال؟؟ تبا امي..
علي: لا ابا اكلمج انتي .. بغيت اتخبر منج عن شي..
نوره: خير شو السالفه..
علي: ماشي.. بس بغيت اسألج شو سالفه فطوم ويا غانم.. احسهم متزاعلين.
نوره: والله مادري انا بعد احس جيه اسأل فطوم ما ترد علي.. وغانم بعد ما يرد علي..
علي: انا بعد نفس الشي اسأل اي حد فيهم محد يقولي شو السالفه فقلت يمكن انتي تدرين
نوره: بس شكلها السالفه جايده لأن غانم ما يداني طاريها اما فطوم من تسمع اسمه تفز من مكانها تتريا نقول لها ان غانم سأل عنها ولا شي
علي: بس والله حرام هالإثنين بالذات يتمون جيه متزاعلين..
نوره: هي والله غامضيني..
علي: انزين عيل.. مشكوره الغاليه.. بس اذا عرفتي شي خبريني اوكي
نوره: ان شاء الله.. يلا بااااي
وبندت الخط عن علي وتمت اتفكر في الموضوع واتفكر انها تسوي خطه تجمعهم ويا بعض بس هونت خافت اذا حد فيهم زعل من الثاني..

يوم الخميس كان بو خالد ويا مرته وعياله معزومين على بيت اخوه خليفه عالغدى.. فطوم كانت متردده ان بعد هالفتره الطويله بتجابل غانم قبل كانت تروم تتعذر ما تسير العزايم لأنها كانت في المدرسه فكانت امها اتطلع اي عذر على غياب فطوم اما الحين فماتروم وخصوصا ان فطوم من زمان ما زارتهم.. مريم بعد كان موجوده.. الكل طلع وسار بيت العم خليفه..
اليده: يا حيا الله من يانا.. يا هلا والله.. وينكم وين هالغيبه اشتقنا لكم.. فطووم عمري تعالي عندي انتي بالذات زعلانه منج .. ما تزورين يدتج..
فطوم: شو اسوي تدرين امتحانات ودراسه غصبن عني..
اليده: احين مالج عذر .. اباج دووم اتزوريني..
فطوم: حاضر افا عليج..
مريم من دشت البيت من بعد فتره ما قدرت اتقاوم رغبتها انها تروح صوب الحوض وتذكر الأيام الي كانت تلعب فيها هني ويا ساره بنت طلال جيران بيت عمها..
يلست وحطت ريولها في الماي وتمت سرحانه وهي تلعب في الماي.. خوله من عرفت ان مريوم صوب الحوض راحت لها شافتها سرحانه وتلعب في الماي .. مشت شوي شوي وراها وفرتها في الحوض.. وتمت تضحك على شكل مريوم وهي متفاجئه..
مريوم: نا اراويج يا خولووووو (وتمت اترش ماي على خوله لين ما انخرست تقريبا.. وتوها فطوم داخله جان هي اتكمل واتفر خوله في الماي وتضحك على اشكالهم وهم يرشون ماي على بعض جنهم يهال.. بعدين طلعوا ثنتيناتهم وهم ناقعين ضحك وظهرت خوله ودشت البيت والكل يضحك على شكلها وهي خرسانه ماي.. واما مريوم ما طاعت تدخل راحت حمام الميلس اتغسلت ورتبت عمرها وطلعت من الحمام وفلت شعرها وبدت تربطه ولفت بعمرها الشيله وظهرت من الميلس جان تتجابل ويا ابراهيم بن طلال ولد جيرانهم وهي بهالمنظر كل لبسها مبلول ماي وفي قلبها تدعي على خولو لأنه بسببها طاحت في هالموقف البايخ.. ركضت ودشت البيت اما ابراهيم فتم باهت مكانه هاي ثاني مره يشوفها.. اول مره شافها في يوم ملجه خوله واليوم بعد شافها لأنه كان ياي يزور فيصل يوم عرف انه هني.. )
فيصل: يا حيا الله بو خليل اتفضل اقرب..
ابراهيم: الله يحييك
ودخلوا الميلس.. اما فطوم فدخلت غرفه غانم لنه ماكان موجود وتمت اتصيح.. واتصيح من خاطرها.. وحست وقتها انها فعلا اتحبه.. ما حست بعمرها غير ضامه مخده غانم وهي اتصيح غفت ونامت شوي.. ودخل غانم غرفته وهو ما يدري ان فطوم داخل اتفاجأ للي شافه جدامه فطوم نايمه على سريره وضامه مخدته بس طبعا كانت الشيله مغطيه شعرها... حس انه قلبه حن لحالها وانه اشتاق لها.. بس مسرع ما تذكر سالفتها ورد غيض .. حس بحد يمسك جتفه ويطبطب عليه صد وراه شاف مريم..
مريم: لين متى يا غانم.. قولي..
غانم: مريم افهميني والله مااقدر..
مريم: شوف حالها .. والله ما خلت حد في البيت الا وطلبت منه انه يتوسط عندك عشان تتصالحون.. امس يوم عرفت انه نحن بنيي عندكم اليوم تمت طول الليل اتصيح وكله اتفكر كيف بتجابلك.. غانم.. سامحها على قله عقلها..
غانم: مريم .. ما اقدر والله كل ما اتخيل انها كانت تعطي الحب غيري امووت وانا الي كنت احبها
مريم: هي ما كانت تدري بحبك..
غانم: لا تدري وانا متأكد .. فطوم مب غبيه .. بالعكس هي بهالسوالف وااايد اذكى من جيه..
مريم: عشان خاطري حاول.. شوف البنت كيف ضعفانه والله ما تاكل وكله اتفكر صدقني اتيها ايام ما تقدر تنام الا بنوم.. الكل خايف عليها..
غانم: مريم رجاء..
مريم: انا تحريت عمري ارمس واحد عاقل يفهم الكلام.. بس ذليت عمري زود. والله ما تستاهل ان وحده اتعذب عمرها جيه عشانك
غانم: قوميها خل تطلع من غرفتي ابا ابدل واتغدى واظهر ويا ربعي..
مريم: خوز مناك(دزته على صوب ودشت الغرفه وقومت فطوم بس شافت ان فطوم كانت واعيه وسمعت كل كلمه قالها غانم وكانت اتصيح في صمت عشان ما يسمعها غانم.. وتمت تحضن مريم وحاسه انها ضايعه)..
فطوم: والله حرام الي يسويه فيني..
مريم: خلي يولي ما يستاهلج..
فطوم: مابا شي خلاص .. (تمت اتصارخ ) خوزي عني مابا شي.. خليني في حالي..
مريم: هدي عمرج فطوم..
نشت فطوم من مكانها وطلعت من غرفتها وكان غانم وراها واول ما حطت ريلها عالدري عشان تنزل ما حست بعمرها الا مدوخه واتطيح من فوق الدري.. من شافتها مريم صرخت وركضت عشان تمسكها.. شافتها طايحه ومغمى عليها.. تمت تتطالع غانم بحقاره حست انه كل شي بسببه وانقهرت ليش ما تحرك من مكانه يوم شافها اتطيح.. اما غانم فكان مصدوم حاس عمره ضايع ما يعرف شو السالفه.. ما يعرف شو يسوي.. مثل الجبان دخل غرفته وصك الباب على عمره..

 

[meen_ana]

التكمله

الكل تم يحاتي حاله فطوم.. كانت في غرفه الكشف يفحص عليها الدكتور.. وطلع الدكتور من الغرفه على طول سارت عنده مريوم وفيصل وخالد عشان يطمنون على اختهم..
مريم: ها دكتور طمنا..
الدكتور: مافيش حاجه.. اتطمنوا.. بس شويه لازم تاكل وتقوي نفسها شويه.. وهي زعلانه من حاجه يعني..
فيصل: هي شوي..
الدكتور: خلوها ما تفكرش كتير في الحاجه ديه لأنه متعبها..
مريم: ما عليك انت دكتور.. بس نقدر نشوفها احين؟
الدكتور: طبعا تأدروا تشوفوها امااااااااااااال..
الكل دخل عشان يشوف فطوم ويطمن عليها وتوه كان بو خالد واصل وياه عمهم خليفه وشاب ثالث ما عرفته مريم فصدت عنه ودخلت الغرفه.. شافوا فطوم نايمه والكل حولها..
فيصل: امي اقول خلها ترتاح احين باجر بنرد لها.. مريوم بتقعد عندها الليله..
ام خالد: خلاص اوكي.. جان بغيتي شي مريوم اتصلي..
مريم: لا تحاتين .. بس انتي روحي..
والكل من بعد ما تطمن على فطوم طلع من الغرفه ورد البيت.. وعقبها سمعت مريم صوت الباب حد يدق.. استغربت قالت يمكن حد من اخوانها نسى شي.. يوم فتحت الباب استغربت معقووله غانم .. شو يايبنه..
غانم: تسمحين لي ادخل..
مريم وبصوت منرفز وعالي: خير شو تبا.. ما تبا اتشوفك هي.. شوفتك مرض لها..
غانم: حرام عليج مريوم انا الي فيني مكفيني.. دخيلج خاطري اشوفها واطمن عليها..
مريم: هههه شو.. عيد عيد.. تطمن عليها.. هاي غرفه فطوم.. متأكد انك مب مغلط
غانم: مريم والله حرام عليج.. انا بعدني احبها..
مريم: والي يحب جيه يسوي..
غانم: غصبن عني..
مريم سمعت كحه فطوم على طول ربعت داخل اتشوف بلاها.. ولحقها غانم .. وشافها توها تبا اتقوم من مكانها بس يوم شافت غانم ردت مكانها وتمت جامده مكانها... القميص الي لابسنه هو نفسه القميص الي خذته له.. وريحه العطر هو نفسه الي خذته له.. تمت امبهته مب مصدقه الي اتشوفه جدامها.. جرب منها غانم ومسك ايدها ورفعه وباسه..
غانم: الحمد لله على السلامه..
فطوم وبصوت واطي: الله يسلمك..

غانم: سامحيني فطوم.. بس والله انا مالي غناة عنج صدقيني لو مهما صار..
فطوم من غير لا تحس بعمرها تمت اتصيح وحطت راسها على صدره.. هو فز من مكانه بس ما حب يقولها شي.. واما مريم فتمت واقفه تطالعهم وهي ما تعرف شو اتقول ولا ترمس..
فطوم: غانم.. طلع القميص قياسك عيل..
غانم: ههههه.. هيه اتعرفين قياسي بعد.. وبعد ابشرج وايد عايبني..
فطوم: يعني ذوقي حلو..
غانم: اكيد يوم انج اخترتيه انا لازم ذوقج بيكون حلو..
فطوم: خقاااااااااق بعد..
مريم: اقول تبوني اخليكم بروحكم.. اايه جني اطرش في الزفه.. شو فيكم .. اي قميص واي ذوق.. شو السالفه..
غانم: فطوم شو رايج بالناس الي يرزون ويوهم..
فطوم: مادانيهم موليه..
غانم: ولا انا
مريم: ويا هالويوه.. اصلا اقولك انت ايه ما عندك بيت.. يلا اطلع برع رد بيتكم.. اتلاقي امك امبلغه الشرطه عن اختفاء الطفل مالها..
فطوم: ههههههههه .. يلا روح البيت
غانم: شو يردني البيت انا احين.. بتم افكر فيج في الدرب..
فطوم: عيب عليك.. ترا بعدك عدوي اللدود..
مريم زخت غانم من ظهره ودزته برع الغرفه وتمت تضحك على شكله وهو يترجاها تودره.. ويتم عند فطوم..
ومرت الأيام وردت العلاقة ما بين غانم وفطوم وصارت أحلى من أول.. ووصلنا لموعد ملجه فيصل... الي كان الكل يترياها ويترقب هاليوم.. يعتبر هاليوم نقطة تحول كبيره في حياة فيصل.. يا ترى كيف بيتصرف.. شو بيكون موقفه..
عواش: ريم شو فيج مرتبكه الي يشوفج يقول اول مره بتشوفينه وبتقعدين وياه..
ريم: عواش بييج مثل هاليوم وبتحسين فيني..
عواش: بس انا ما باخذ فيصل عشان احس فيج
ريم: سخيفه تدرين
عواش: لا مادري.. هيهيهيهي
ريم: ملييييييييييييييييييييييقه.. خوزي عني ..
عواش: ههههه وحليلها احمرت من كثر ما عصبت.. يلا يلا حبي قومي جهزي عمرج الريال في الميلس يترياج عيب عليج تأخرتي عليه
ريم: ادخل عنده بروحي؟؟
عواش: لا شو رايج ام احمد.. وام عبيد وام سالم .. وفطوم.. وخالد ومريوم.. والكل يدخل وياج
ريم: صدق ارمس ما اتغشمر..
عواش: يا حبيبتي هاي اول مره من بعد ما ملجتوا بالسلامه بتقعدين وياه مو معقوله بنرز ويهنا وياكم.. لازم تاخذون على بعض شوي عقب برز ويهي لا تحاتين
ريم: حلفي انتي بس.. ما بخليج
عواش: والله ما عرفت لج توج اتقولين محد بيدخل وياي.. واحين اتقولين ما بخليج.. اقول انتي الرمسه وياج ما تفيد يلا نشي ودخلي عند الريال عيب عليج .. بيكرهج من اول يوم
ريم: لا شو يكرهني..
وربعت من حجرتها وسارت الميلس عشان اتشوف فيصل تمت تتعدل عند الباب قبل لا تدخل.. تمت اتدق الباب وعواش تأشر لها ادخلي ما يحتاي اتدقين الباب.. وهي تمت اتجادل عواش وفجأة شافت فيصل فاتح لها الباب وهي مب منتبهة بعدها اترمس عواش بالإشارات ويوم عواش شافت الباب انفتح ربعت وصعدت فوق الدري.. وهني انتبهت ريم ان فيصل واقف يطالعها تم يضحك عليها وهي من فشلتها تمت امنزله راسها ودخلت الميلس..
فيصل: وعليكم السلام..
ريم: ها اسفه نسيت.. السلام عليكم
فيصل: وعليكم السلام..
ريم: اااااااااسمحلي تأخرت..
فيصل وبلهجه غريبه: لا جان تميتي فوق عند اختج عادي ترا بتم هني انا .. نقعيني بعد ساعه ساعتين ولا ثلاث عادي..
ريم: اسفه والله ما كان قصدي بس كنت اتلبس واتجهز.. عشان انزل..
فيصل: والله ما اشوفج مسويه شي ذاك الزود الي يخليج هالكثر تتأخرين..
ريم فزت وتمت تتطالع في فيصل الي كان يبدل في القنوات.. استغربت من كلامه.. ليش يكلمها بهاللهجه الغريبه من اول يوم..
ريم: شو تشرب..
فيصل: سم
ريم: شو..
فيصل: لا .. ها.. ماشي.. اي شي
ريم:لا بس انت شو اتحب بارد ولا حار.
فيصل: لا شو حار.. ييبي شي بارد ابرد فيه على جبدي من الحر..
ريم: حــــر.. بس انت في البيت يعني المكيفات شغاله
فيصل: ليش حرام عند الإخت الواحد يحر..
ريم: ها.. لا عادي.. دقايق وبييب لك كوكتيل انا مسويته
فيصل: ما احب الكوكتيل.. ييبي لي ليمون احسن..
ريم: ان شاء الله..
طلعت ريم من الميلس وهي تفكر شو بلاه فيصل حتى شوفه مب قاعد يطالعها.. يكلمها من غير نفس.. تمت اتوسوس في قلبها ودخلت المطبخ عشان اتسوي له ليمون.
فيصل تم يفكر .. حاس نفسه اهبل.. (( ياربي انا ليش جيه.. عفان الله هاي اول مره اجابل البنت فيها ليش انا جيه.. وحليلها ما قالت شي .. بس انا شو بلاني لازم اهدي نفسي شوي.. ما عليه يا فيصل هدي عمرك احين.. الأيام يايه خل كل شي حق عقب الزواج))..
خلصت ريم العصير وودته لفيصل في الميلس..
فيصل: عنج عنج انا بشله..
ريم زاد تعجبها حست بغموض تصرفات فيصل مره جاف ومره طيب.. يا ترى شو بلاه: لا عادي
فيصل: قلت لج هاتي مابا اتعب هالإيدين من احين..
ريم استحت ونزلت راسها
فيصل: ياويلي.. ياويلي عالمستحى انا ماروم عليه..
ريم: ها شو عيبك العصير..
فيصل: انتي حاطه صبعج فيه.. اكيد بيحلو ..
ريم احمرت وتلون ويها من الخجل فشلت الريموت وتمت اتبدل في القنوات شحب عنها فيصل الريموت وما خلاها اتكمل ..
فيصل: هاتي شتبين به الريموت خليه.. خلج وياي انا اليوم اتفرغي لي.. ترا تدرين ما بشوفج ليوم العرس ما باقي غير ثلاث اسابيع وليتهم يتجدمون..
ريم: هههههههه
فيصل: حلات الضحكه يوم طالعه من ثمج..
وتمت ريم قاعده ويا فيصل لين فليل .. ويوم روح عنها رد البيت وحاس نفسه مخنوق مب قادر يفكر بأي شي .. حاس ان راسه مفتر من كثر التفكير.. كيف قلبه يطاوعه انه ينتقم من الي سوته هنوف عن طريق ريم.. ريم الطيبه الحنونه كيف يجرحها.. ريم اتحبه من كلامها ومن نظراتها هالشي واضح.. حس نفسه في صراع كبير مب قادر يتقبل اي شي.. شل عمره وسار صوب شاطئ جميرا يقعد هناك مع نفسه شوي ويشكي للبحر همه .. لعله يرتاح شوي.. وساق ريس كامل وراح صوب البحر ونزل من الموتر وسار ويلس عالشاطئ وتم يفكر.. وانسدح وتم يطالع النجوم فوق تذكر يومتها كان في نفس هالقعده بس في بريطانيا مع هنوف.. تم يتخيل ويهها مرسوم في السما .. يتذكر بسمتها وكل شي فيها ما قدر يمسك عمره وتم يصيح.. كيف بيوم وليله فقدها فقد هنوف.. لا مستحيل.. ما قدر يقاوم رغبته في السبوح في ماي البحر وشل عمره ونزل الماي وتم يسبح.. ونفس الوقت كانت في عايله قاعدين على بعد امتار منه.. بس هو ما كان منتبه عليهم .. وهو يسبه ما انتبه ان عمق الماي بدا يزداد وهو قام يبتعد من الشاطئ فجأة حس عمره بيغرق.. حاول انه يصرخ يزقر على اي حد يلحق عليه..


العنود: عبييييييييييييد.. شوف مناك في واحد بيغرق شكله.. العنود بنت تدرس في التقنيه عمرها 21 سنه عندها 5 خوات واخو واحد اكبر عنها بأربع سنين يعني 25 اسمه عبيد.. وخواتها سلامه 17 سنه عذاري معرسه عندها ولد ، جواهر بعد معرسه بس ما اتييب عيال وتدرس في بريطانيا ويا ريلها دراسات عليا،لطيفه عمرها 14 سنه،ساره عمرها 9 سنين..
عبيد: هي والله .. قم جسوووم وياي.. (جاسم ها ريل عذاري)
جاسم: يلا قم..
قام عبيد وياه جاسم ودشوا البحر سوا والكل كان يطالع وهو خيفان على الريال الي بيغرق الي هو فيصل.. شلوووه وطلعوه من الماي وتم يسعفه جاسم ووياه طبعا عبيد..
عذاري: وااااي طاعوا كيف الريال مزرق.. زين ما اختنق..
مطر ولد عذاري: ماما منو هذا..
عذاري: مادري ماما..
مطر: حرااام ليش ماماته خلته بروحه هني..
عذاري: هههههه فايج هالولد..
العنود: هاكم ماي...
جاسم : اختك يا عبيد غبيه.. الريال سارط ماي البلا من البحر وانتي يايبه له ماي..
العنود: وانا شو دراني.. وبعدين لو سمحت لا تقول عني غبيه..
عبيد: ايه انتوا الإثنين استحوا اشوي.. اتخيلوا الريال يقوم يسمع رمستكم شو بيقول ميانين..
جاسم: محد مينون إلا انت.. عنبوك سبوح ما تعرف .. اقولج عنووودوو ياسه من الصبح اقول حق اخوج اسحبه صوب الرمل.. يالس يغرقه زود..
عذاري: ما عليك منه هذا من زود ما متأثر بأفلام المافيا..
وهني تم يكح فيصل وقام فتح عيونه شاف جدامه جاسم وعبيد.. هني قامت عذاري وسحبت وياها العنود وراحوا صوب امهم وابوهم..
مطر: اويه بابا الريال فتح عنونه..
جاسم: اسكت فضحتنا غربلك من ولد..
عبيد: اقولك من الصبح شل ولدك وحل عن الريال.. اثره اذا تعب منك انت وولدك..
مطر: انا شو يخصني انتوا يبتوه..
فيصل: السموحه منكم ازعجتكم..
جاسم: افا عليك اخوي.. لولانا جان انت هناااااااااااااااااااااك..
فيصل: هي والله.. تسلمون لي .. ماعرف كيف ارد هالجميل لكم
عبيد وضرب بالقو عظهر فيصل ومن قوه الضربه تم يكح: افا عليك حنا اخوان..
جاسم: كسرت ظهر الريال مب ايد عليك..
عبيد: اسمح لي اخوي والله هب قصدي أذيك..
فيصل: لا افاعليك.. بس خف علينا شوي.. كسرت ظهورنا..
جاسم: هي والله صدقه.. ما عليك منه ها متعود عالدفاشه..
عبيد: تبا اتجرب الضربه جسوووم..
جاسم: خلك بعييييييييد بعييييييييييييد.. الا ما عرفنا اسمك الأخو..
فيصل: وياكم فيصل .. وانتو..
عبيد: وياك عبيد النابوده..
جاسم: وياك جاسم الملا..
فيصل: لي الشرف والله..
عبيد: اقرب تعال اقعد تقهوى ويانا..
فيصل: لا مشكورين ما قصرتوا بروح البيت اريح لي شوي..
جاسم: والله ما خليناك اتروح إلا وتتقهوى عندنا.. أفا والله ..
فيصل: تسلم والله من ذوقك..
عبيد: هي وانا ويا جاسم ..
قام فيصل وقعد ويا ابو عبيد وجاسم وعبيد وتموا يسولفون وخذوا على بعض بسرعه.. واما العنود فما كانت شاله علينها من على فيصل.. وخصوصا انه جسمه مكشوف وعليه جتاف عريضه ولها هيبه فكانت منعجبه في شكله وفي شخصيته..
سلامه: اميييييي شو بلاج.. عيونج طلعوا من مكانهم بس عيب عليج الريال بيلاحظ..
العنود: صخي دخليج انتي لو اتشوفين الي انا اشوفه بتحسين..
سلامه: انزين خفي عالريال كلتيه بعيونج..
العنود: ياربي يخبل شكله سلوووووووووووم.. عذاري.. شوفيه شوفيه.. ياربي شوفي هالحلاة..
عذاري: وافديته اخوي.. عبيد من يومه وسيم وحلو..
العنود وتضرب على راس عذاري: يالهبله هب عبيد.. هذا الي عداله الغريق...
عذاري: عيب عليج.. اشلج بالريال تتطالعينه..
العنود: شوفي شوفي عيونه بس.. وااااااااي ولا ضحكته لا امبوسيبل..آي كانت بيليف ذات..
عذاري: ههههههه طاعوا هاي الخبله انتوا بس.. والله جسوومي فديته احلاهم طاع طاع شو يسوي لي حركات هالريال.. (وتمت اتأشر حق جاسم عيب بيشوفك الريال وبيرمس علينا.. وهو ولا معبر ويتم يأشر على ويهها ويأشر عالقمر.. ويأشر على قلبه.. وهي تضحك عليه)
عبيد: جكيتك.. عيب عيب عليك اتغازل جدام الريال..
جاسم: ياربي من هالحسود اللدود.. اغازل حرمتيه اشلك انت راز بويهك..
عبيد: شوف فيصل بخبرك قصه هالروميو.. لا تستغرب من تصرفاته.. متخبل في هالحرمه الي معطينه اياها وين ماانسير فاضحنا يقعد يتغزل فيها..
فيصل: خله ياخذ راحته.. الله يهنيك.. حلاته اصلا .. شو فايده الحب اذا الواحد فينا ما يعبر عن مشاعره اتجاه الثاني..
العنود: هي والله.. (وتنهدت عقبها)
الكل صد صوب عنود وتم يضحك على شكلها وفيصل إلتفت لها وتم يضحك في خاطره من الطريقه الي تنهدت فيها العنود.. ارتاح لهاي العايله والشباب من خاطره.. واستأذن منهم لنه تأخر وامه كانت اتحاتيه كل شوي اتدق عليه.. قام وشل عمره وسلم عليهم وركب موتره.. دار عقب رد لهم لأنه نسى ياخذ ارقامهم..
فيصل: خلاص احين ارقامكم عندي.. ما يخصني لازم اتمرون صوبنا.. مطلوبين بعزيمه..
عبيد: افا عليك حاضرين..
جاسم: طاع هالدب.. استح على ويهك.. بس حق الأكل جاهز
فيصل: ههههههههه .. يلا اترخص عنكم تصبحون على خير..

 

[meen_ana]

الجزء العشرون

ورد فيصل البيت ومن التعب الي يحسه رقد.. وكان مزجم المسكين.. دخلت عليه امه تتطمن عليه لقته راقد وهو حتى مب متلحف جان اتلحفه وتروح عنه..
ام خالد وهي طالعه من غرفه فيصل لقت ليت غرفه خالد مفتوح دقت عليه الباب..
خالد: تفضل..
ام خالد: بلاك امي ما رقدت لين احين..
خالد: ماشي امي كنت قاعد على النت ادور على الفنادق الي ابا احجزها حق شهر العسل..
ام خالد: لا تقعد وايد جدام الكمبوتر هذا مب زين لعيونك ..
خالد: ان شاء الله.. إلا اقول فيصل رد ولا بعده..
ام خالد: رد.. يقول كان ساير البحر شوي..
خالد: البحر!!! في هالليل.. شو عنده
ام خالد: والله انا مادريبه اخوك هذا الواحد ما يعرف شو الي في راسه..
خالد: شو رقد.. ولا بعده واعي
ام خالد: توني داخله عليه كان راقد..
خالد: خلاص باجر بكلمه وبشوف شو بلاه لا تحاتين انتي بس يا احلى قمر (قام وباس راسها)..
وراحت عنه ودخلت غرفتها عشان اتنام..

في بيت خليل النابوده
العنود: ياربي سلامووو بعده على بالي مب قادره انسى شكله.. اااااخ يهبل شكله وهو خرسان .. ياربي انا كيف برقد احينه..
سلامه: والله انتي ماعندج سالفه.. من الصبح وانتي قابضتنه وملوعه جبدي فيه.. بس فديت طلووووول حبيبي.. ولد عمي الغالي .. ماشي احلى عنه
العنود: انتي شو دراج.. خلج ويا مطوور مالج ها.. كيف كيف بنساااه قوليلي..
دخلت عليهم لطيفه: هههههههههههه
سلامه: بسم الله دشت الخبله هاي.. شو عندج..
لطيفه: تعالو دخيلكم شوفو .. هههههه ماروم ماروم ارمس..
ساره: سلوووووووم تعالي والله بيفوتج..
قامت العنود وسلامه وربعن برع الحجره عشان يشوفون شو السالفه.. شافو عبيد وجاسم قاعدين يترقصون ويتضحكون شرات الخبايل استغربوا بلاهم..
العنود: عذاري.. شو بلاه ريلج تخبل.. وخبل اخوي وياه..
عذاري: صخي صخي انا روحي خيفانه عليهم مادري شو ياهم بسم الله..
عبيد: اووووووه.. خرعتكم.. ههههههههه جسووووم شوف شوف عذاري كيف اتخاف وهوووووووو
جاسم: ههههه.. انا بطيييييييير فوق فوق جيه بعيييييد.. كااااك
العنود: ياربي والله تخبلو ..
عذاري: هههههههه والله اشكالهم اتضحك.. شوبلاهم
سلامه: اقول اختيه جيكي عليهم يمكن سكارى
عذاري: لا ويه.. توهم اشحلاتهم ويانا
العنود: اقول هاتو ماي بارد خل انرشه عليهم عشان يصحصحون..
راحت ساره ويابت غرشه ماي بارده وتموا عنود وعذاري يرشونه عليهم.. وقاموا شي وحسوا بالوضع راحوا ورقدوا..
دشت عذاري وويا ريلها الحجره: جسووم شو صاير فيك بسم الله ليش جيه
جاسم: شو جيه..
عذاري : مادري احس بك مادري كيف مب مصحصح.. مخترش شي بلاك
جاسم: لا ما بلاني شي.ز بس احس راسي ثجييييل ويعورني.. بس انا اراويه ها عبيد اخوج .. باجر احين مب فايجه له ابا انام
عذاري: عبيييد.. ليش شو مسوي..
جاسم: اقول صخي عني احين ابا ارقد باجر باجر..
توها عذاري بتطلع من الغرفه: على وين.. تعالي تعالي.. ماشي بتخليني ارقد روحي.. يا رووووووحي..
عذاري: هههه بسير اطمن على عبيد...
جاسم: ليش بلاه..
عذاري: حاله من حالك..
جاسم: اوووب عيل اشتغل مفعوله عند عبيد.. والهرم سواها فيني بعد
عذاري مستغربه: اي دوا:؟.؟؟
جاسم: اقول تعالي انتي بس وما عليج من عبيدوو ها..
عذاري صكت الباب والليت وراحت عند جاسم.. واما عنود فما ودرت عبيد الا يوم رقد.. وهي تضحك على شيفته وراحت ورقدت والكل رقد..
اليوم الثاني الصبح الساعه 10... في بيت خليل النابوده

سلامه: عنوووووود قومي بسج رقاد..
العنود: ويه ويه الطقم .. لا .. يالجلبه يا سلووووووووم .. اخ خربتي علي..
سلامه: بسم الله والحمد لله والشكر شو فيج..
العنود: توي كنت بفتح علبه الطقم وبشوف الي فيه وانتي ما قصرتي خربتي علي...
سلامه: اي طقم اي خرابيط.. قومي امي تزقرنا.. قومي..
العنود: كله منج يالحماره خربتي الحلم.. كنت بشوفه ..
عذاري: شوفيكم اتصارخون ..
سلامه: ههههههه كالعاده اختج الخبله هاي مادري بلاها كل يوم اعاني وياها.. مره طقم .. ومره كوشه.. ومره دبله.. وباجر اخاف اتقول لي حصان بعد..
قامت عنود ومن غيضها فرتها بمخده بس ما يت على سلامه ..
سلامه: فري عدل مره ثانيه.. (شلت المخده) شوفي جيه يفرون (وفرتها على عنود)..
عذاري: هههههه .. والله هبل.. نشي يالدبه بسج رقاد.. لازم نشلشل اغراضنا ونروح قبل لا يجرجون علينا عقب ال12..
العنود: لا حرااااام مابا ارد بوظبي..
سلامه: لازم ما تبين .. اتفكرين في الطقم.. هههههه
عذاري: لا وانتي الصاجه.. الغرييييييق..
العنود: اقول انا الي ما عندي سالفه ارمس شراتكن.. يلا برع برع..
الكل طلع من الغرفه وهم يضحكون على العنود وحركاتها.. كل يوم تحلم انها بتعرس.. افف كل تفكيرها في الزواج بعكس سلامه.. غير عنها كليا .. صح انها مخطوبه لولد عمها طلال.. بس مب من النوعيه الي تفكر في الزواج قبل الدراسه.. اهم شي عندها اتحقق اهدافها رغم ذلك هي اتحب ولد عمها بس ما تبرز مشاعرها دايما..
جاسم: ماعليه يا عبيد.. انا اراويك..
عبيد: اسكت اسكت.. جان مب انا الي راويتك شغلك احين...
جاسم: عيل انا اتحط لي الحبوب في الجاي..
عبيد: لا والله ونسيت عمرك..
جاسم: وحده بوحده..
عبيد: وانا شودراني انك تبا اتسويها فيني
جاسم: ولا انا الي ادري احين..
عذاري: شو بلاكم عالصبح تتناجرون..
عبيد: ما تشوفين ريلج ها مادري بلاه.. وانتي اكيد متآمره وياه
عذاري: روحو لا.. مب فايجه لسوالفكم..
رن تليفون عبيد..
عبيد: رقم غريب.؟؟ منو متصل لي هالحزه..
جاسم: رد عشان اتعرف منو..
عبيد: الووو..
توها العنود ظهرت من غرفتها وطلعت الهاند باج مالها عشان يودونه السياره..
عبيد: هلا والله فيصل.. اشحالك.. اسمح لي الغالي ماعرفت رقمك..
عنود من سمعت اسم فيصل فرت الهاند باج من ايدها ولزقت عند عذاري لأنها جريبه من عبيد.
عذاري: بسم الله بلاج..
العنود: صخي صخي ابا اسمع..
سلامه تتطالع عنود من بعيد وتضحك على حركاتها وراحت تتريق ..
عبيد: لا... خلها فرصه ثانيه..
فيصل: لا ثانيه ولا ثالثه.. ترا انتوا ضيوف هني وبتردون بوظبي اليوم يعني يادوووب انشوفكم مره ثانيه.. انا مرمس الوالده وهي بعد قالت ماشي مايروحون بوظبي الا هم متغدين اليوم عندنا..
عبيد: لا والله تسلم اخوي..
فيصل: اخبرك انا ما علي منك.. المهم اترياكم.. بس عطني جاسم بسلم عليه..
عبيد: هب حاله هاي يا اخويه.. اختيه وامايه هني مايصير كلنا نزعجكم..
جاسم: هات هات انا بتفاهم وياه (وسحب التليفون عنه)
فيصل: هلا والله بو محمد اشحالك.. واشحال الولد..
جاسم: والله بخير وعافيه..
فيصل: هااا انت وحرمتك ان شاء الله لازم اليوم اتشرفونا مالي شغل..
جاسم: ياخويييه اشلك بالعباله هاي كلها وعوار الراس خل عنك ياخوووي..
فيصل: اخبرك انا ما علي منكم.. اليوم كلكم معزومين على الغدا... والرقم عندكم يوم تجهزون وتبون اتون اتصلو فيني وبدلكم بيتنا..
جاسم: على راحتك.. ما بنردك هالمره.. بس هااااا حط في بالك المره اليايه عندنا..
فيصل: خلاص تم مره..
جاسم: يلا في امان الله ..
فيصل: مع السلامه..
والعنود الضحكه شاقه ويهها وراحت عند عبيد..
العنود: شو يبا منك هذا..
عبيد: ماشي الريال عازمنا على الغدا عندهم ..فشيله والله انروح بيتهم اول مره وايدينا خاليه..
عذاري: ماعليك.. بنزل ويا جاسم وبنروح اقرب محمصه وبناخذ حلويات وبناخذ ورد وبنيي.. وانت عاد تجهز لصلاة عشان يوم انرد اتروح انت وابويه وجاسم للصلاة وانا وامايه وسلامه ولطوف وعنود بنترياكم عشان عقبها نروح سوى عند العرب..
عبيد: خلاص مره تم..
العنود ربعت وشلت الهاند باج مالها ودخلت الغرفه.. وهي تغني..
نظره على غمزه وعلى بسمه تهني بي
وضحكه بعد بسمه على كلمه صرت حبيبي
صرت انت في عيني اجمل عناويني
وانت بس انت ولا غيرك يملا قلبي
يازين مافي زين في عيوني مثل زينك
ولو غبت في لحظه انا قلبي سأل وينك
يا نشوتي وذوقي لك انت بس شوقي
ومطبوع في روحي وغرامي اول وتالي
سلامه: شوفيج شوفيج تخبلتي مره وحده.. جنج بتعرسين اليوم..
العنود: صخي صخي دخليج.. اكرميني بسكوتج..
سلامه: لا يكون وصلج الطقم.. وشفتيه.. هههههههه
العنود: انتي شو بلاج.. حلي عني.. خليني مستانسه..
سلامه: ما يحق لي اعرف شو الي مونس قلبج هالكثر..
العنود: بنروووح بيتهم اليوم..
لطيفه: بيت منو..
العنود: وصلت الملقوفه.. بيت ها الي اسمه فيصل..
سلامه: الغرييييق
لطيفه: احين هالشي يونس.. وعع .. ماداني اسير بيت ناس ما نعرفهم..
عذاري: يلا ما خلصتوا.. خلصوا بسرعه ما نبا نتأخر على العرب..
العنود: انا شوي وبخلص..
عذاري: انتي اليوم الظاهر بتسوين حفله.. شوي شوي هدي..
العنود: ياربي شوفيكم علي خلوني على راحتي يانااااس..
والكل تم يضحك على حركاتها..

 

[meen_ana]

في بيت بو خالد..
خالد: صباح الخير امي.. شو هالربشه واليوله في البيت جنه بيونا ناس..
ام خالد: هيه امي.. اهل ربيع فيصل بيون عندنا.. الي ساعدو فيصل يوم بغا يغرق امس..
خالد: هههه هي سمعت السالفه توني من فيصل.. عفان الله ما يعرف يسبح ولا شو
فيصل: بس بس .. انت ما تصدق تسمع شي..
خالد: انت مادري بك ما تعرف تسبح على طول شربت الماي..
فطوم: ااااااااااااااااااااه .. صباح الخير..
خالد: صكي ثمج اتقولين كاراج قوم قمبر..
فيصل: ههههه هي والله ذكرتني بقمبر المسكين.. امسات شو سويت فيه اقول لك.. خبلت به بغيت اغير الآيل مال السياره .. خبلت فيه صيحته المسكين..
خالد: هالمسكين يوم يشوف رقعه ويهي ولا ويهك مسكين يبا يشرد يدري ان بنخبل به.. بس شغله ما عليه كلام الصراحه
فيصل: هي الصراحه شغله مرتب ونظيف
فطوم: اقول امي قول حق الخدامه اتسوي لي بيض عيوووون
خالد: هاتي عيونج خل اسوي بهم بيض
فطوم: ههه يالسخيف..
فيصل: زين بيونا ناس اليوم وعندهم بنت على عمرج جيه عمرها يستوي 16 ولا 17 يعني على عمرج..
فطوم: وات وات وات.. منو بيي اور هوم تودي..
فيصل: ههههههه.. شو بلاج بققتي عيونج.. ربيعي واهله الي ساعدوني امس من الغرق..
فطوم: هيييييه.. بس انا مب فايجه اجابل حد..
فيصل: لا بتحبينهم مبين عليهم ناس خريشه القعده وياهم اتونس ..
مريم: منو الي اتونس القعده وياهم.. اكيد ريم..
فيصل: شو ياب طاري ريم احين.. انا ارمس عن ربيعي وهله..
مريم: اي ربيع فيهم.. ابراهيم.. ؟؟
فيصل: ليش انا ما عندي ربيع غير ابراهيم.. لا هاييل اهل هذا الي انقذني امس من الغرق لأنهم من بوظبي وبيردون اليوم قلت لازم اعزمهم اليوم.. هاي فرصتهم يعني..
مريم: اهاااااا.. زين زين اتسوي..
ام خالد: هي امي شوي ساعديني اليوم في المطبخ مافيني روحي اقعد في المطبخ.. انتي عليج الحلويات .. ويا فطوم..
مريم: خلاص تم افا عليج امي.. انتي امري بس.. بس لا تنسين يوم انخلص اتحطين صبعج في الحلويات عشان يزيد السكر فيه
الكل: هههههههههه
ام خالد: ههههه.ز ويه تسلمين لي والله ..
خالد: امي الا وين ابوي..
ام خالد: بينزل احين . كان يسبح .. تراه بيروح وياكم الصلاة
..
قامت فطوم من خلصت ريوقها ودقت على بيت يدتها...
اليده: الووو
فطوم: هلا والله بالغلا كله.. هلا بالسكر.. هلا بالورده..هلا بماي الورد.. هلا بالطش والرش
اليده: وافديت بنتي انا.. اشحالج يدوو شخبارج.. وينج امي اشتقت لج
فطوم: موجوده .. تدرين بي ماروم استانس في يومي غير لما اسمع صوتج كل صبح..
اليده: ايا العياره.. صوتيييي.. ولا صوت غنوووووم
فطوم صخت واحمر ويهها: لا لا لا.. افا..
اليده: الله يخليكم لبعض.. ويخليني لليوم الي ازفكم لبعض فيه..
غانم: منو منو..
فطوم: لا تقولين له يدو اني انا الي عالخط وياج..
اليده: وانت شلك .. ارمس منو ماكان.. صدق رزه
فطوم: فديتج يدو.. امممموح.. هزبي .. كشخه..
غانم: افا يدوو.. جيه يعني.. هاي اخرتها تهزبيني جدام الي ترمسين وياهم..
اليده: مادري عنك ترز بويهك.ز
قام وغانم لصق بيدته وتم يلصق اذنه بالسماعه يبا يسمع صوت الي ترمس وياه يدته..
اليده: خوز خوز مناك.. والله لا اضربك بهالعصا..
فطوم: ههههههههههههههه
غانم: سمعت صوتها خلاص عرفتها.. هالعفريته.. ليش اتكلمينها عالصبح هاي صاحبه شؤم.. الله يستر احين وانا ساير الصلاة ..
اليده: ماعليج منه ها.. وانت يوز ما يخصك ببنتي ومحد مشؤوم هني غيرك انت يالهيس..
(وضربته يدته بالعصا على ريوله وهو يناقز يبا يقوم من عندها)..
غانم بصوت عالي: انا اراويج اتريي..
فطوم: هههههه.ز خاطري اشوفه وهو ينضرب.. كشخه .. تشفين غليلي فيه.. اقول يدو عطيني اياه برمسه شوي..
اليده: خلاص سلمي على امج والكل.. هاك يالعنز رمسها تبا اتكلمك..
غانم: افاااا انا عنز احين.. انا غنووم الأسد اطلع عنز.. مقبوله منج يدوو..
اليده: بلا رمسه زايده عن ازغدك احين.. ياويه البط..
غانم: انا بط.. نسيتي الخنزيره هاي فطوم..
اليده: محد خنزير غيرك..ما يخصك في بنتي ترا بحرم عليكم اترمسون بعض..
غانم ركض: لا خلاص خلاص... كله ولا الزعل.. دخييييييلج.. انا ما صدقت رديت ارمسها ..
اليده: وليش كنتوا متزاعلين.. ؟؟؟
غانم: ها.. لا .. هاتي هاتي نقعتي البنت اتلاقينها وهي قاعده احين باضت.. وقاعده على بيضها..
فطوم: يالهرم احين انا الي بايضه.. نسيت عمرك.. جنك بقره مال دعايه لورباك.. البقره الضاحكه..
غانم: على الأقل احسن من ويهج .. اتقولين مغني فارين عليه طمام..
فطوم: انا اراويك.. خلاص خلاص مب قايله لك الي بغيت اقوله .. يلا باااي
غانم: خلاص خلاص توبه.. انا الخنزير.. انا العنز انا كل شي.. بس انتي لا تزعلين تكفييييين
فطوم: هيه خلك جيه..
غانم: ههه والله البنات ينقص عليهم بكلمتين..
فطوم: شوووو
غانم: ها لا ماشي.. اقول انتي عمري وقلبي وكل شي..
فطوم: هيييييييه اتحرى بعد.. المهم اسمع اباك اليوم اتي بيتنا عالغدى..
غانم: ليش شو السالفه..
فطوم: ماشي في ناس يايين بيتنا اليوم.. واباك اتكون موجود اتخقق فيك..
غانم: هييييييه جيه السالفه.. خلاص انتي قلتي لخالد وفيصل اني بيي.
فطوم: هيه اصلا انا امس كنت قايله حق خالد اني بقول لك اتيي بيتنا عشان تتغدى عندنا اليوم..
غانم: خلاص عقب الصلاة بكون عندكم ان شاء الله. يلا تامريني بشي.. مادموزيل..
فطوم: حلوه هاي مادموزيل طالعه منك.. ههههههه لا سلامتك.. بس لا تتأخر..
غانم: حاضر كم فطوم عندي انا افاعليج بس..
فطوم: هههه.. يلا باي..
غانم.: باي.. وبند عنها..
وبندت فطوم عن غانم وسارت عشان اتصلي الظهر وتتجهز هي ويا مريوم عشان تروح تساعدها في المطبخ ويسوون السويتات سوى..

بعد صلاة الجمعه
سلامه: يلا امي نحن جاهزين وهذو ابوي ويا جاسم وعبيد وصلو..
ام عبيد: يلا امايه قومن خل انروح ما نتحير عليهن اكثر عيب..
عبيد: ها جاهزين.. يلا خل انروح تراني اتصل بالريال وخذت منه العنوان..
العنود: ادل البيت عدل عن اتضيعنا ونتأخر..
جاسم: انتي عن الهذره الزايده.. قلنا لج خذنا العنوان وبيتهم ما يضيع.. يلا نشو..
وقام الكل وركبوا الموتر عشان يروحن بيت فيصل..
..
العنود وهي تغني... (عندها صوت وااايد جميل.. الكل يحب يسمع صوتها يوم اتغني لأن صوتها ناعم وحلو)..
آه يا هوا لو تجمعنا سوى وتاخذنا لبعيد
تحلى أيامي تتحقق أحلامي وفي قلبي الفرحه اتزيد
سنيييييين ساكن خيالي..
دايم حبك في بالي
وفي قلبي آه يا قلبي..
وفي قلبي انت الوحيد...
اه يا هوى لو تجمعنا سوى وتاخذنا لبعيد
تحلا ايامي وتتحقق احلامي وبقلبي الفرحه تزيد
خلاص ارحم حنيني تعاااال نور سنيني
وفي قلبي آه يا قلبي
آآآه انت الوحيد..
انت الحب الي سهرني عايش فيني ما يفارقني
اهواك اهواك ولا يوم انساااك معاك احلامي وروحي فداك
لأنك ساكن خيالي دايم حبك في بااااالي
لآنك ساكن خيالي دايم حبك في بالي..
وفي قلبي آه يا قلبي..
وفي قلبي انت الوحيد
عبيد: الله عنووود ياني اشتقت لصوتج.. ليش صخيتي غني غيرها.
العنود: ههه صوتي مب ببلاش يسمعونه.. هاي بس جيه مال دعايه..
عبيد: شو فيج اليوم مربوشه.. خبريني
العنود: ماشي.. انا دومي مربوشه
سلامه: انا اعرف بلاها لازم عشان الطقم..
العنود: انجبي انتي بس هالي فالحه فيه رمسه عالفاضي..
عبيد: اي طقم..
العنود: ماشي اتخربط هاي .. خلها خلها..
لطيفه: اقول عبيد جاسم لف يمين..
عبيد: والله.. افف ليش ما خبرتوني رمستو وياي ونسيتوني.. احين لازم ارجع..
سلامه: هههههههه.. شوي شوي.. الله يستر بعد من الي ياي..

 

[meen_ana]

فطوم ومريوم منشغلين ويا الطبخ والسوالف كل وحده فيهم قاعده تتخيل اشكال الي يايين. ويعلقون ويضحكون وكل شوي امهم تهزبهم لأنهم يضيعون وقت وما يخلصون شغلهم..
مريوم: اففف احين ها وين اعقه امي..ماشي مكان هني..
ام خالد: ماشي غير اتصبينه في الحديقه الي برع..
مريوم: عطي الخدامه اتروح..
ام خالد: لا خل احتاجها انا احين .. انتي وديه
ودق جرس البيت.. يعني الضيوف وصلو ومني زادت ربشه فطوم ومريوم ما عرفوا شو يسوون مريم هدت الي في اايدها وقامت وغسلت ايديها وراحت غرفتها فوق.. ونفس الشي فطوم وام خالد..
طلع فيصل وياه خالد وغانم عشان يستقبلونهم برع..
العنود: الللله سلووم.. شوفيه شوفيه.. ياربي.. خبال..
سلامه: ايه انتي ثقلي شوي..
عذاري: عيب عليكن.. اثقلن شوي.. خلو السوالف عنكن احين..
العنود: اف منج.. غثه..
عبيد: يا هلا والله .. اسمحلنا اخوي متعبينكم ويانا والله مايصير...
فيصل: اهلين.. افا عليك لا تقول هالرمسه .. حياكم والله شرفتونا.. اعرفك ها ولد عمي غانم واخوي العود خالد..
عبيد: يا هلاوالله..
فيصل: خل الحريم يدخلون من هالباب..
عبيد: يلا امي مثل ما قالكن الريال من هالباب..
دخلوا الحريم وتموا يسلمون على بعض ونزلت فطوم ويا مريم وسلموا على الحريم.. وقعدوا وياهم.. اما مريوم ما طولت بالقعده سارت المطبخ عشان اتشل الجدر عشان اتصبه برع مثل ما قالت لها امها..
عبيد: جاسم.. اقول شليتوا الحلويات والورد من السياره..
جاسم: مافي شي في موتري.. خليته في موترك ما شلوه..
عبيد: شو هالفشله.. بقوم بسير اييب الأغراض اوكي..
قام عبيد وراح في الموتر عشان اييب السامان وهو في السياره شاف انه ناسي تليفونه وفي مس كول شل التليفون كان طلال ولد عمه الي متصل.. رد اتصل ويكلمه.. كان عبيد مدخل السياره داخل البيت.. يعني في الكاراج وعالصوب الي مجابله كانت شي جيه مثل حديقه صغيره جدام باب المطبخ الي برع.. وطبعا عبيد سيارته مشملنها بالمخفي.. مول ما يبين شي.. كانت مريوم طالعه من المطبخ والوقايه محطوطه بس جيه على راسها يعني ما لافتنها عدل.. وانتبهت على السياره..
مريوم وهي ترمس عمرها: اللله هاي رنج الديده... خبااال شكلها.. ودي اشوف شكلها كيف من داخل...
تمت مريوم تمشي شوي شوي وتوايج اذا في حد في الحوي عن يشوفها .. وهي تمشي علقت الشيله بغصن الشيره الي موجوده في الحديقه الصغيره بس هي ما راحت اتشلها عشان اتروح واترد بسرعه.. وجربت من الجامه الي جدام بس عالصوب الثاني من صوب عبيد.. وعبيد مب مصدق عيونه من الجمال الي يشوفه جدامه.. ومريم لصقت ويهها في الجامه وتمت تتطالع داخل وهو مب قادر يصك عيونه تم يطالعها.. ويضحك على شكلها كيف توايج..
مريوم: ابيييه.. في حد في السياره..
ربعت على طول سحبت شيلتها ومن السرعه انطرت الشيله ودخلت داخل البيت.. وهي محمره من الفشيله..
وعبيد ناقع عليها من الضحك: والله غزاله ماشاء الله عليها..
وشل عبيد الأغراض ودخل داخل البيت..
فيصل: وين سرت ياريال.
عبيد: ماشي والله نسيت تليفوني وبعدين ها شي بسيط يايبينه لكم واسمحولنا عاد على القصور...
خالد: لا افا عليك.. شو قصوره بعد.. ما قصرتوا.. ليش متعبين ومكلفين على اعماركم... كافي انكم ساعدتوا فيصل...
جاسم: لا والله ها اقل من الواجب ما يصير اول مره يايين بيتكم..

في ميلس الحريم..
فطوم:انزين يا سلامه شو انتي علمي ولا ادبي..
سلامه: لا حبيبتي شو يوديني ادبي ولا افهم في الحفظ انا .. علمي..
فطوم: شو سهل ثاني علمي.. انا سمعت انه وااايد صعب..
سلامه: هي هو صعب.. بس احسن من الأدبي.. انتي شو ناويه تدخلين..
فطوم: والله ان شاء الله علمي ..
العنود: مريم شو تخصصها..
فطوم: طب.. باقي لها سنتين وبتخلص..
عذاري: ماشاء الله عليها .. الله يوفقها.. انا بعد اختي جواهر تدرس ماجيستير احين في بريطانيا ويا ريلها في كارفورد..
ام خالد: الله يوفقها.. ويردها لكم بالسلامه..
ام عبيد: هي والله.. ملينا من غربتهم.. اشتقنا لهم..
ام خالد: وجواهر كم من العيال عندها.. ؟
ام عبيد: لا جواهر وحليلها الله ما رزقها بعيال.. هي وريلها..
ام خالد: هييييه.. الله يسهل عليها..
ودشت عليهم ريم وعواش ويا امهم.. كانت ام خالد قايله لهم ايون عالغدى بعد عشان يقعدون ويا الحريم.. ومريوم من فشلتها وربكتها مب عارفه شو اتسوي..
فطوم: مريوووم.. شو بلاج تعالي.. ريم وعواش يايين بعد..
مريم: اسكتي عني فطيييم .. استوالي موقف خاااايس وايد الصراحه.. فشيله..
فطوم: شو صار..
مريم: اقولج شفت سياره ربيع فيصل عيبتني قلت ابا اشوف داخلها كيف وهي مخفيه ما عرفت ان في حد داخل كنت اوايج والريال داخل ياهي فشيله فطوووووم
فطوم: ههههه اتخيل شكلج.. هههههه.. اتضحكين.. من لقافتج يوزي
مريم: شو اسوي ان انزين.. تدرين فيني .. يعيبني الرنج..
فطوم: المهم خلج احين طاف طاف.. اتصير تراها.. تعالي الميلس انا قاعده روحي وياهم
مريم: اقووول.. فطوم.. اخاف الريال ها فتان ويقول حق فيصل ويجتلني..
فطوم: لا ما اعتقد.. اتهقين يعني..
مريم: مادري يمكن..
فطوم: لا ان شاء الله ما بيقول.. تعالي احين المهم...
وسارت مريوم وقعدت ويا الحريم .. وتموا يسولفون وتغدوا وخلصوا غداهم على خير..
واما العنود فمن عرفت ان ريم هي حرمه فيصل تمت امبوزه ومغيضه وساكته..

عند الرياييل..
عبيد: ها غانم شو ناوي تدرس..
غانم: ان شاء الله هندسه كهربائيه..
جاسم: هيه يعني شراتي.. شد حيلك عيل...
غانم: والله .. شو اتشوف اوكي..
جاسم: هي وايد اوكي..
عبيد: ههههه شله الكهربجيه بتستوون..
جاسم: صخ صخ .. خلني ساكت احسن..
خالد: ليش شو تخصصه..
جاسم: ههههه.. هذا.. حمالي.. ههههه لا.. اسولف.. انت قولهم
عبيد: سلمكم الله درست اداره اعمال.. قسم المحاسبه..
خالد: زين والله..
عبيد: اي زين الله يخليك.. كله كرف..
فيصل: اصلا اي شغله لازم يكون فيها كرف..
عبيد: هي والله.. (سرح عقبها عبيد يوم شاف ابتسامه فيصل تذكرها.. كيف تركض وشعرها يتطاير.. كانت لامه شعرها على فوق ويتدلدل منه خصل على خدودها.. والخدود محمره من حراره المطبخ.. اااااه ياهي قمر)..
جاسم: حوووو وين سرحت..
عبيد: ها لا ماشي وياكم..
فيصل: اي ويانا.. الا سرحان.. ههههههههه
الكل: ههههههههه

وخلصت العزيمه والكل قام عشان يروحون.. الحريم سلموا على بعض وراحوا ركبوا الموتر.. والعنود من غيضها ما سلمت عليهم عدل.. (كيف.. مستحيل.. لا ما اقدر اصدق.. كيف فيصل معرس.. احبه .. لا ارجوووووك يارب.. والله اني اباه .. )..
وفطوم ومريوم والبنات كلهم تموا يوايجون من الدريشه عشان يشوفون رياييلهم ..
ريم: والله اشكالكم اتضحك شقايل لازقين بالدريشه..
عواش: صخي انتي.. ما تبين اتشوفين ريلج .. شوفيه كيف يتخاشم وياهم..
ريم: فديته ريلي احلاهم..
عواش: اقول .. منو ها الي غانم يسلم عليه..
فطوم: وين وين خل اشوف.. مادري والله..
مريم: فطوم هذا الي يسلم على فيصل هذا الي شفته في الموتر.. بس صدق موتره خبال..
فطوم: حتى هو وايد حليييو الصراحه..
مريم: بس والله فشيله.. ان شاء الله ما قال شي..
ريم: عواش ها جنه ريل عذاري.. لأنه شوفي ركبت وياه الموتر.. وحليلها حامل وتعبانه.. وها ولدهم مطر الي كانت ترمس عنه..
عواش بصوت عالي وهي مصدومه: لاااااااااااااا.. مستحيل.. جاسم معرس.. ؟؟
الكل صد صوبها كيف عرفت اسمه.. ???

 

[meen_ana]

عواش ربعت وطلعت من الغرفه وسارت غرفه فطوم وتمت اتصيح .. لحقتها ريم عشان اتشوف شو فيها.. بس كانت عواش قافله الباب واتصيح ومب طايعه تفتح لها الباب..

ريم: عواش .. افتحي.. انا بروحي محد وياي.. شو فيج..

عواش: خليني بروحي ريم الله يخليج

ريم: شو اخليج روحج اتخبلتي ماشي خبريني بلاج....؟؟؟

عواش قامت وفتحت الباب لريم ودخلتها وردت قفلت الباب .. عشان محد يدخل اما فطوم ومريم كانوا قاعدين تحت ويحاتون بلاها بس ما قالو شي حق مرت خالهم عشان ما تحاتي وهالشي ما يمنع عواس من انها ترمس..

ريم: شوفيج عواش.. قوليلي.. انا اختج..

عواش وهي اتصيح: ريم.. شو اقول لج.. جاسم طلع معرس.. الجذاااب

ريم: كيف يعني.. ليش انتي اتعرفينه..

عواش: هيه اعرفه دومي اكلمه على المسنجر.. انتي ما تعرفين شو يعني لي جاسم.. ومن فتره لفتره اكلمه عالتليفون.. حبيته والهرم ما قالي انه معرس..

ريم: الله يهداج يا عواش.. انتي احيدج عاقل كيف اترمسينه..

عواش: مادري يا ريم.. مب انا الي كلمته .. مادري سالفه طويله طريقه الي اتعرفت فيها عليه..

ريم: بس يا عواش انتي كيف اتحبين واحد وياج عالنت .. ترا شباب النت كلهم جيه كذب وخداع.. كل همهم التسليه انتي كيف اترمسينه..

عواش: ريم انا وثقت فيه.. وحبيته من كل قلبي.. ما قالي انه معرس ولا بعد عنده ولد عمره 5 سنين

ريم: هدي عمرج احين.. وفكري عدل .. انسيه خلاص..

عواش: كيف انسااااه.. ما اقدر يا ريم.. فهميني.

ريم: والله فاهمتج يا عواش .. بس شو بتسوين تراه هذا طلع هب ريال وجذاب ما ينفع اتحبينه..

عواش: ولا بعد يقول لي انه يباني ويبا يخطبني.. ليش جيه يخدعني..

ريم: اقولج انتي حافظي على نفسج وسمعتج.. عشان محد يدري حاولي تنسينه.. ولا تقولين له انج عرفتيه وانج شفتيه في بيت عمتج.. عن يقول شي حق فيصل..

عواش: لا بس لازم اهزبه واقول له اني اكتشفت هالشي.. بس ما بقول له كيف..

ريم: بس اهم شي تقطعين علاقتج فيه.. واتخلين في بالج انج تنسين فكره انج تتعرفين على واحد بهالطريقه.

عواش: هي والله توبه خلاص.. بس اقول لا تقولين لهم شو السالفه..اذا بتقولين حق مريم اما فطوم مابا..

ريم: خلاص عيل.. قومي غسلي ويهج وهدي عمرج خل ننزل لهم

عواش: اه يا ريم لو تدرين بالنار الي احس به.. والله اني ودي اجتله.. ليش شو الي استفاده احين يوم جذب علي.. والقهر بعد ان عذاري كانت اتسولف عنه بشكل..

ريم: الحمد لله انها يت من الله وكشفتيه على حقيقته..

عواش: بس اموت واعرف شي واحد ليش الرياييل جيه يسوون..

ريم: مادري يوم بنرد البيت بنتناقش انتي بس نزلي احين..

تحت في الميلس الكل كان قاعد ومتيمع .. مريم كانت اتحاتي عواش شو بلاها.. انا فطوم فمن جافت غانم خلاص نست كل شي..

فطوم: هاا.. بيضت الويه جدام الضيوف..

غانم: اصلا امبوني امبيض الويه وين ما اكون..

فيصل: هيه مره دخليك عاد..

غانم: لا والله بذمتك يعني ما بيضت الويه..

خالد: اقول فطوم ما عليج من سوالف فصووول واتعرفينه كيف.. لا غانم اكثر واحد كان يسولف وياهم..

غانم: سلمت يالنسيب.. وانتي فطيم شو بيضتي الويه جدام الحريم.. اباهم يقولون خطيبه غانم حرمه سنعه والنعم فيها..

استحت فطوم من كلام غانم ونزلت راسها.. وابتسمت ..

غانم: يا ويل حالي انا.. وين اول مره اشوف فطيم تستحي..

مريم: شو فيكم على ختيه.. محد له شغل فيها.. بنوته اشحلاتها لازم بتستحي..

غانم: ما قلنا شي.. شو فيج انتي مب على بعضج اليوم.. شي صاير..

فطوم تذكرت عواش وتوها بتقوم تظهر من الميلس شافت عواش وريم داخلين الميلس.. اما ريم من شافت فيصل فاستحت ونزلت راسها..

فيصل: مب بس فطوم اتعرف تستحي.. حتى حرمتي فديتها..

بو خالد: اقول ام خالد من يعرسون العيال انا وانتي بنسافر شهر عسل..

خالد: عااااااش الأبو عااش

مريم+ فطوم: ونحن؟؟

بو خالد: خلكم عند يدتكم اتونسونها..

فطوم: لا والله.. من زمان ما سافرنا.. ماشي يايين وياكم

مريم: هي والله صدقها فطيم.. وبنشل عواش بعد ..

ام خالد: وشو رايك انقول حق بوالريم.. وموزه ايون ويانا..

بو خالد: والله ما عندي مانع.. فكره حلوه.. شو رايج انسير ماليزيا..

ام خالد: هيه احسن بلاد مسلمه وفيها وايد عرب يروحون لها..

غانم: افا عمي وانا العزابي ما بتشلوني وياكم.. ؟

بو خالد: خلاص انت تخبر من ابوك وامك جان يبون ايون بعد خل انروح سوا احلى شي..

فيصل: والله دنيا قاموا يخططون ونحن محد.. يوم نحن موجودين ما يروحون مكان..

خالد: شو تبافيهم انت.. نحن بنعرس وما علينا منهم.. بنعيش حياتنا ويا حريمنا رواحنا..

غانم: ياني اغار منكم.. افففففف

مريم: هههههه.. لاحق لاحق..

فطوم: عواش.. شو بلاج ساكته مااحيدج تسكتين.. العاده تاكلين الكل بلسانج..

عواش: انا اليوم مستمعه اخزن كل شي حق يوم ثاني اقعد اناقشكم فيه من غير وجود الكبار..

فطوم: ههههه.. هي والله.. هالكباريه مشكله.. بس شو بتيين شو رايج..؟

عواش: دام ان ريامي بتودرني روحي.. بيي وياكم ولا بتخبل روحي في البيت..

فطوم: هي والله صدقج الوحده مووول مب شي..

فيصل كان سرحان ويفكر.. من بعد ما سكع كلام خالد عن الزواج.. لا مستحيل.. كيف بعيش ويا غيرها تحت سقف واحد ما اقدر اتخيل.. والله ما اقدر.. هنوووف ليش استذلتي فيني مب حرام عليج.. والله حرام.. انا حبيتج من كل قلبي اخر شي جيه اتسوين فيني.. وهان عليج اني اخذ غيرج وتم يطالع في ريم الي كانت موخيه راسها وتلعب بصبوع ايدها.. وريم.. حراام اني اظلمها وياي.. انا ما احبها.. مااحبها.. وحرام اني انتقم من هنوف فيها هيه.. ما سوت لي شي غير انها وافقت علي يوم امي خطبتني لها وحبتني.. ما ارتكبت اي جريمه في حقي.. لا حرام حرام.. ريم طيبه.. مابا اظلمج وياي.. ليش اتحبيني ما استاهلج.. رفعت راسها ريم ولأول مره اتلاقت نظراتهم.. تعجبت ريم من الطريقه الي كان يناظرها فيه فيصل.. حست بحزنه.. وفيصل ما شل عينه من عليها ولا هي للحظات بعدها ما قدرت ريم انها تستمر في نظراتها وخت راسها وقامت من الميلس وسط هالحشره الي كان الكل عايش فيها بالسوالف والربشه.. وراحت الحديقه الي برع تتمشى فيها.. وفيصل لا اراديا لحقها..

فطوم: شوفو شوفو.. العشاق متواعدين برع..

عواش: اشعليج منهم.. غيرانه.. خليهم..

غانم: اقول فطيم قومي قومي..

خالد: اتهبي.. اقعد.. مب سايرين مكان..

عواش تمت تتطالع فطوم وتضحك عليها.. وتمت تقهرها بحركات ايدها (حرررررره)..

غانم: هههههههه .. مسكين خالد روحه مقهور اصلا احين ما يبا يشوفني ويا فطوم عشان ما يزداد قهر.. وحليله دخل الفتره الحرجه ما شاف خولوو من اسبوعين احين.. هانت بوالوليد ما بقى غير اسبوعين كمان

خالد: جب انت.. اكرمني بسكوتك..

فطوم: احلى شي في عرس خالد اني بكشخ وبستانس.. اخيرا بعيش اجواء عرس.. انا عرس عبدالله ما اذكره عدل.. كنت اصغر..

عواش: هي والله حتى انا بعيش اجواء العرس لأول مره لحد من اخواني.. وريماني عاد العروس شي شي..

ام خالد: الله يتمم الأفراح على خير ...

ريم قعدت على كرسي كان محطوط في حديقه البيت.. وكان ظهرها صوب فيصل.. وتمت تتطالع على جانب شيره وتبتسم.. فيصل استغرب تم واقف وراها يتأملها.. ويمشي شوي شوي صوبها.. وريم مندمجه مب حاسه بوجود فيصل وراها..

فيصل: شو اتسوييييين.. جكيتج..

ريم: امي.. زيغتني.. شوي شوي علي..

فيصل: امييي.. يا حلاتها وهي طالعه منج.. جنج ياهل..

ريم: ياهل.. تذكر فيصل يوم كنا يهال قاعدين نلعب هني انا وانت ومريوم وعواش..

فيصل: هههه شو ذكرج بهالأيام..

ريم: تذكر ولا لا قول لي..

فيصل: هي اذكر وحتى هالشيره كانت شوي اصغر.. بس احين ماشاء الله اتقولين ناطحه سحاب..

ريم: هههههه .. لا والله ناطحه سحاب مره وحده.. خف علينا بالخريط ها.

فيصل: اقول.. انتي شو كنتي تتفحصين الشيره من شوي.. اشوفج تتطالعين وتتضحكين.. ولا اترمسين النمل.. ؟؟

ريم: لا والله.. ارمس النمل اونه.. اقول تعال براويك شي..

فيصل: وين...؟

ريم: هني على جذع الشيره من تحت..

فيصل: اكيد بيت النمل..
ريم: اي نمل.. تعال انت

قام فيصل ويا ريم وقعدو على العشب.. وريم تمت تلمس قطعه من الشيره وتقوله يطالعها.. وجرب فيصل ايده من هالجزء في لحظه تلامست ايدينهم ببعض.. استحت ريم وسحبت ايدها بسرعه وتم فيصل يناظر في عيونها .. وخدودها الحمر من الخجل..

فيصل: ياويلي عالخجل ها كله..



ريم سكتت للحظه بس غيرت السالفه عشان يشل عينه من عليها: شوف هالجذع.. اتحيد يوم كنا نلعب جان اتييب سجين وتكتب اسمي وانت كتبت اسمك.. عشان اتراضيني يوم مريم فرت علي الكوره.. وقلت لي.. ريم يوم بنكبر بنكتب اسامي عيالنا تحتهم..

فيصل تم ساكت .. حس عمره ما يذكر اي شي من هالذكريات.. وانصدم يوم عرف ان ريم اتحبه من الصغر وللحين هي اتحبه.. ماعرف شو يقول لها.. انا ما اذكر شي.. لا هالشي بيضايجها.. اقولها انتي شرات اختي.. ما اقدر هي صارت حرمتي.. ولا اقول انا احب غيرج.. حرام ما اتحمل اني اشوف الدمعه والحسره بعيونها.. ريم ريم ريم.. اه يا ريم.. ما اتصور اني بعد هالفتره بصير ريلج وبكون وياج تحت سقف واحد..كييييييف.. ؟؟

ريم: فيييييصل.. شو فيك.. سرحت.. ما تذكر؟؟

فيصل: بلا شقايل ما اذكر..

في هالوقت دخلت عمته كلثم الحوش بسيارتها وياها كانت نوره..

فيصل ما صدق انه لقى فرصه يقدر يتهرب فيها من تساؤلات ريم.. : اوه.. عمو كلثم يايه.. نشي نشي خل انسلم عليهم..

ريم ما حست بتهرب فيصل لأنه موقف طبيعي ممكن يسويه..

كلثم: هلا والله بفيصل.. المعرس اليديد.. اشحالك؟؟ الله العروس بعد وياك.. هلا والله ريماني اشحالج امي..

ريم: الله يسلمج بخير..

فيصل: وينج والله لج وحشه عموو.. ما شفناج من متى.. اوه نواري.. اشحالج؟

نوره: بخير.. مبروك فيصل.. مبروك ريم..

ريم+فيصل: الله يبارك فيج..

ريم: عقبالج نوروو

كلثم: لا ويه.. تو الناس.. على بنتي.. وراها دراسه اولى بها..

فيصل: حياج عمو .. دخلي داخل.. ليش واقفه هني..

دخل فيصل ونادى على امه عشان يسلمون عليها.. فطوم من شافت نوره من فتره طويله صار لها ما شايفتنها.. ركضت وضمتها وضربت على راسها..

فطوم: يالطفسه .. وينج انتي... تعالي تعالي ؟لا امطج من شعرج للحجره..

غانم: شوي شوي.. على بنت الناس.. شو تبين تذبحينها.. خلج حنونه.. خييييبه امحق حرمه بناخذها هاي بتعذب العيال..

نوره: هههههه.. شوالسالفه.. خلاص قررتوا تاخذون بعض..

فطوم: شو اسوي اخاف اذا ما خذته اتم عانس..

غانم: ههههه.. يعني في النهايه انتي محتايه لي..

فطوم:شو انسوي بعد.. اخاف انتم عوانس وعقب الدوله تشتكي من وجودنا واتكنسل ويزنا وانصير شرات السيلانيات يطرشونا السيلان عشان نخدمهم..

نوره: هي والله... غانم: عيل نورووو الحقي علوو يترياج

نوره: لا .. علوو ماباه..

 

[غرنوووقه]

تسلمييييييين يالغاليه
انتظر البقيه

 

[meen_ana]

فطوم: قلناها قبلج.. وخذنا البصل بقشوره اخر شي..

غانم: منو البصل..

فطوم: اوه سوري.. كان قصدي الورد بجذوره.. بس خانتني العباره..

غانم: اتحرى بعد (غمز حق خالد) حريم ما ايوم الا بالعين الحمرا..

وما انتبه على عمره الا وكوره صغيره يايه على راسه يوم صد وراه شاف فطوم وتربع تصعد الدري تشرد عنه تروح الغرفه..

غانم: انا اراويج.. خل اخذج بس.. بذكرج بهاليوم اتريي

خالد: اقول ابويه.. شو متى بيخلصون تشطيبات الفله..

(بو خالد كان بادي بناء فله عباره عن جناحين الي ضام هالجناحين صاله كبيره قسم لخالد والثاني لفيصل.. كل واحد راح يعيش بالقسم الي تابع له كأنه في بيت بروحه كل شي منفصل عن الثاني غير الصاله)..


بوخالد: والله باجر بيون مال الجبس بيركبون الجبس وعقب بنييب شركه تنظيف عشان يغسلون البيت.. وعقب ما يخلصون ها كله راح نشتري الثريات وانركبهم عشان يوصلون الكهربا وانجيك على المكيفات.. عشان انجوف شغلها كيف.. وان شاء الله قبل العرس كل شي جاهز..




خالد: باذن الله...



نوره وفطوم كانوا قاعدين فوق في الحجره ويسولفون.. وفيصل توه صاعد غرفته.. رن تليفونه..

فيصل: يا هلا والله اشحالك عمر..

عمر: والله بخير.. اخبرك وينك انت..

فيصل: في البيت ليش..

عمر: ماشي والله قلت ابا امر عليك البيت لأن الأهل توني موصلنهم المطار ومتعايز ارد بوظبي قلت بيي اقعد عندك شوي..

فيصل: افاعليك.. ماشي اليوم لازم اتبات عندنا..

عمر: لا شو ابات عندكم .. مب حلوه

فيصل: اخبرك عمر انت اتعرف ان هالكلام ما يمشي علي.. بتبات يعني بتبات..

عمر: الله يهداك انت بس.. المهم ان شاء الله جيه كلها نص ساعه بكون عندك..

فيصل: خلاص مره حياك البيت بيتك..

..

في بيت عبيد النابوده..

عبيد كان قاعد في البلكونه.. ويطالع البحر.. بحكم ان بيتهم مطل على البحر.. وهو يتذكرها كيف كانت تختلس النظرات لسيارته.. ااه منج.. ولا هالعيون.. كيف ابنساهم.. مستحيل. مرسومين رسم ماشاء الله.. ولا هالشعر.. وفي لحظه انتبه لنفسه.. انا كيف اسمح لنفسي اني ارمس عن وحده من اهل ربيعي.. صدق اني ما استحي.. بس ياربي كيف انسى.. والله ان طول الدرب وانا اذكر ملامحها.. غزاله وهي تمشي.. والله انها خذت عقلي ..



وقف من التفكير الي ذبحه قام عشان يروح عند العنود ويقعد وياها .. ويشوف اذا بترمس عنها ولا لا راح خذا له عصير من الثلاجه وصار صوب غرفتها.. يبا يعرف عنها اي شي.. اسمها اي شي.. قام ودق باب غرفتها ودخل شافها قاعده على الكرسي الهزاز الي في البلكونه ومعطتنه ظهره..



العنود: اقرب اخوي.. تعال..



عبيد: لا يكون بترقدين ولا شي..



العنود: لا تعال انت .. اتعرفني دومي عالسهر..



عبيد مشى وراح صوب الكرسي الي محطوط حذالها وقعد ومن رفع راسه يطالع بويه عنود .. فز من مكانه وصرخ وفر العصير تحت.. وسلامه كانت قاعده في الحديقه جان اتحس بشي خيس شعرها جان تتطالع الا العصير منصب عليها وشاف عبيد واقف عالبلكونه.. وهو يضحك على العنود وعلى عمره وعلى سلامه.. وسلامه ميته من الغيض ليش انها اتخيست.. قامت ودخلت الحمام الي في غرفه الضيوف الملاصقه للميلس عشان تتغسل...



عبيد: الله يغربل ابليسج.... شو هاللي حاطتنه بويهج .. اتخرعين ويا هالويه..



العنود: ههههه.. وانتوا الرياييل شو عرفكم بسوالفنا.. ها ماسك.. قناع عشان البشره..



عبيد: لا والله وجيه ما حطيتي طماط وخس وخيار.. سلطه يعني على ويهج.. تراني احيد في التلفزيونات اشوفهم يحطون..



العنود: هههه.. يا خفه دمك.. شعندك ياي عندي اصلا..

عبيد: هههههههه.. ماشي ياي اطمش على هالويه.. الي ما يتشاهد.. الا ما شفتي عنودي.. شقايل فريت العصير تحت اتخيل انجب على راس منو..



العنود: اكيد كارتيني..



عبيد: لا وين.. كارتيني راقده..



العنود: عيل قاسم الطباخ ماشي غيره..



عبيد: لا لا لا.. انجب على راس سلامه.. ههههه لو اتشوفين شكلها ويا نظارتها..



العنود: قول والله... هههههه هالوسواسيه الله يعينك على لسانها



عبيد: هي والله..



هني رن تليفون عبيد كان الي متصل ربيعه ثاني العليلي.. (ثاني ها ربيع عبيد بس اصغر عنه عمره 23 سنه واااايد ويا عبيد .. دومه يبات عند عبيد وساعات عبيد يبات عنده.. دومهم في سفراتهم وطلعاتهم لازم يكونون سوا.. ثاني ابوه صاحب شركه بوثاني للمقاولات.. احدى اكبر الشركات في المنطقه.. )..



عبيد: هلا والله ثاني اشحالك..



ثاني: والله بخير.. ها مسخن عمرك حق اللعب الليله.. تراني ياينك وماشي غالبنك غالبنك.



عبيد: ههههه .. ثنووووي الظاهر انت وايد تحلم أحلام يقظه هالأيام..



ثاني: بنشوف منو الي يحلم هالأحلام..



عبيد: ها وين الي قال بييني من وقت..



ثاني: شو اسوي يا اخوي.. انشغلت ويا الأهل تدري بعد عرس الرضيعه احين كل يوم طلعات هالأسواق..



عبيد: الله يعينك الصراحه على شغل الحريم الي ما يخلص..



ثاني: يلا كلاها ثانتين الا وانا مبركن في كاراجكم..



عبيد: هيه شفتك.. خلاص انت عيل ادخل العرفه وانا بخاويك..



ثاني: لا تتأخر علي تراني مسخن مره للعب..



عبيد: عشر دقايق وانا عندك..



بند عبيد عن ثاني .. وراح غرفته عشان يتلبس ويشل وياه عصير والفطاير الي شارنهم ويوديه غرفه الضيوف.. وثاني طبعا دخل الغرفه.. وعلى طول طلع كندورته وشل السفره وحطاهم على العلاقه وقعد يرتب الأوراق عشان اللعب.. والا يحس بصوت في الحمام .. استغرب.. قالم يمكن كارتيني اتغسل الحمام وطنش الموضوع..



وسلامه من خلصت سبوح.. شلت ثيابها اللي منخرسه بالعصير عشان اتوديها غرفه الغساله وتغسلهم (من عاده سلامه ما اتحب حد يغسل ملابسها غيرها هي او امها ما تحب الخدامه تلمس ثيابها).. ومالقت شي تتستر فيه غير فانيله رياييل كانت معلقه قامت لبست الفانيله مع شلحتها البيضا وتمت اتلف شعرها بالفوطه الموجوده.. وظهرت من الحمام.. كان بين الحمام والغرفه مثل غرفه تبديل صغيره يعني هي ما راح تقدر اتشوف حد داخل الغرفه غير يوم تظهر من هالممر الصغير.. فشافت عدالها سله ملابس على طول فتحت الفوطه وبدت اتنشف شعرها وتفرده .. وقتها ثاني لمح شعرها يوم جرب عشان يشوف .. شافها.. جدامه.. تم امبهت وهو يطالع طول شعرها.. ومشكله سلامه انها ما تشوف بوضوح من غير نظاره .. يكون مغبر جدامها.. وسلامه كانت ناسيه نظارتها في الطاوله الي في الحديقه.. يوم طلعت من غرفه التبديل ما لاحظت ان الي جدامها مب عبيد اخوها..

 

[meen_ana]

سلامه: اقول عبيد.. انا لبست فانيلتك انزين لأني اتهايزت اسبح في حجرتي... كله منك ويا هالعصير ما لقيته غير اتصبه على راسي..



وثاني مستغرب.. وفي نقس الوقت منبهر فيها.. مب عارف شو يرد عليها .. لما تلاقت عيونه بعيون سلامه .. تمت عيونهم ملاقيه بعضها للحظات وعقبها فر راسه عنها.. وقتها بعد ما دققت فيه سلامه عرفت انه مب اخوها.. تمت اتصفع ويها..



سلامه: يا سواد ويهج يا سلووووووووم.. ها مب عبيد



ربعت سلامه وظهرت من الغرفه وتذكرت انها ناسيه نظارتها.. راحت بسرعه وشلت نظارتها من على الطاوله ودخلت البيت



عبيد: بسم الله شو فيج تربعين..



سلامه من سمعت صوت عبيد وقف قلبها.. لا بالله ماسلمتي يا سلووم



سلامه: ها.. لا ماشي.. والله عبيد ممممممماكنت ادري انه..



عبيد: شوفيج اتعلقين في الرمسه.. روحي يمي نشفي عمرج بتمرضين..



سلامه: ها.. هيه.. اوكي..

عبيد وهو يضحك: هههه سلووم.. شو كان العصير حلو طعمه..



سلامه: اشوه..



عبيد: شوو..



سلامه: ها لا ماشي.. بس اقول.. ما عليه انا اراويك.. اتريا بس.. الصباح رباح..



عبيد: انا شارد مب في غرفتي بسير عند ثاني



سلامه: عند منوووووووو؟؟؟؟



عبيد: شوفيج جنج اول مره تسمعين باسمه.. ثانيييييييييييييي (تم يصارخ بإذنها)



سلامه: سمعت سمعت.. خلاص صمخت اذوني..



عبيد: مادري عنج اتقولين لي منو؟؟



سلامه: روح روح..



عبيد: هههههه والله انج مب صاحيه الظاهر ان العصير اثر على مخج..



........



في الغرفه كان ثاني في عالم ثاني .. مب مصدق الي شافه .. معقوله هالبنت تتغير وتحلو لهالدرجه.. اتذكرها يوم كانت صغيره بكشتها ونظارتها الكبيره.. وهدوئها الدائم.. وحليلج.. والله احلويتي.. وجنها كانت لابسه فانيلتي... ها شو فانيلتي.. اخييييج.. الله يغربلج من بنت.. اعيييج ماداني حد يلبس ثيابي.. بس فداج .. فدا هالجسم والله.. افف انا شو قاعد اقول.. هاي اخت ربيعي كيف ارمس عنها جيه.. انتبه ثاني لكتاب طايح على طرف الكنبه الي موجوده عالزاويه الجريبه من الحمام.. راح وجلب الكتاب على صوب الغلاف.. شاف انها من احدى روايات عبير



أول صفحه مكتوب عليها خاطره قصيره..



لاني بخسران ولاني براجيك *** ولاني مثل غيري بجيك بحنانـــــــــــــــــي



أن جيتني بقول يامرحبا فيك *** يامرحبا يالي بحبه عمانـــــــــــــــــــــــــــي



بفرش لك العينين وبالرمش أغطيك*** وبحرسكبعيوني وداخل كيانــــــي



وتبقى حبيبي مثل ماكنت أناديك *** وتبقى حروف أسمكبقلبي معانــي



وأن رحت عني بدعي الرب يحميك *** ويحفظ حبيبي لو حبيبي نسانـــي



ويبعدك عن كل الدروب المشاويك *** وبطلب لك التوفيق وأحلى الأماني



ماعندي الا كلمه لازم أهديك*** على الأقل واجب رفيق الزمانــــــــــــــــي



من لا يعدك ربح خله يقفيك *** ومن لايعدك شي خله يشانـــــــــــــــــــــي



( ملاحظه.. الخاطره من كلمات .. الحزينه)

تم يتأمل الكلمات.. ومن سمع صوت عبيد.. على طول خش القصه تحت سفرته.. ودخل عليه عبيد لقاه يلعب بالأوراق..



عبيد: هاااا شو.. الدور حامي..



ثاني: انت تعال وشوف كيف بنغلبك.. بخليك اتصيح..



عبيد: هههههههه.. اتصيح اونه.. بنشوف منو الي بيصيح في النهايه..



بدا ثاني يوزع الأوراق وبدأوا في اللعب.. كل واحد فيهم كان يفكر في الي شافه.. عبيد يفكر في مريم.. وثاني يفكر في سلامه.. خلصوا الجوله الأولى ولا واحد فيهم قادر يغلب الثاني..



ثاني: لا بالله اكيد في شي.. غش ما يخصني ما بلعب



وفر اوراقه على الطاوله..



عبيد: احين انا الي اغش.. قول انك مب رايم علي.. ولا انت الي اتغش..



ثاني: اقول عبيد انت يوم كنت تلعب احس بك مب صاحي اتفكر في شو وانا اخوك.. قول لي..



عبيد: هلا.. شو.. شو اقووول شو احكي.. (وتنهد) .. ااااااه



ثاني: لا الظاهر السالفه مب هينه.. قوم قوم.. خل نقعد ونسمع سالفتك .. الظاهر السالفه عوده



عبيد: هههه.. يا ريال اشعليك انت مني .. خلك باللعب..



ثاني: ها .. هاي الأوراق ولميتها .. يلا قول...



عبيد: شو اقول.. اقولك يا ثاني شفت اليوم شوفه ما ظني لو ادور الدنيا بشوف شرواتها..



ثاني: اوووووووب السالفه جايده شكلها..



عبيد: كم بعيش وانا بعيد عن ناظرها..



ثاني: ناظرهــا.. هههههه



عبيد: اخبرك بتقعد جيه تتمصخر علي ما بكمل..



ثاني: عبيداااااااان.. والله وصرت حساس ما تتحمل.. من الغزال الي شل بهواك صوبه..



عبيد: والله يا ثاني انها ما تغيب عن بالي.. كل شوي اذكرها .. نظرتها وضحكتها.. وكل شي فيها يذبحني...



ثاني: هههههه.. انا ما احيدك ترمس عن البنات جيه.. انت يادوب اترمسهن وعقب ما تشبع منهم ما تنشد عنهن ولا تطريهن..



عبيد: لا هاي غير عن كل البنات يا ثاني.. هاي اخت ربيعي..



ثاني اتعجب وتم بناظر بعبيد اول مره يرمس عن خوات ربعه: اي ربيع؟؟



عبيد: فيصل مال دبي الي خبرتك عنه.. اليوم عزمونا عالغدى في بيتهم.. اقولك شفتها..



ثاني: كيف واشلون.. ومتى ..



عبيد: ربك ارسل هالملاك جدامي عشان اشوفه.. واتبهدل من شوفه..



ثاني: هههههه.. والله حالتك صعبه.. يبالك بندول اكسترا ..



عبيد: اقولك كنت قاعد في السياره وهي مره جدامي اتوايج في السياره واشوف عيونها كيف من الخجل والفشله.. ولا الشعر يا ثاني..



ثاني: ههههه.. حالتك تعور القلب..



عبيد: باجر بنسير دبي..



ثاني: خيبه ليش.. شو عندك



عبيد: بسير ديار الحبيبه..



ثاني: عدال يا قيس..



عبيد: مادري شو وليلى في العراق مريضه.. يا ليتني الطبيب المداويه..



ثاني: ههههه خبصت القصيده بكبرها.. اقول اقول .. ارقد احسن لعل وعسى تحلم فيها..



عبيد: توني ساير عند رضيعتي عشان اذا بتقول لي اي شي عنها .. اسمها ولا اي شي..



ثاني: وشو تتريا سير اسألها..



عبيد: تراك انت خربت ما لحقت.. انطق الا وانت متصل..



ثاني: ههههه احسن.. احترق.. باجر اسأل



عبيد: شو ينطرني..



ثاني: الشوق يا عيني..



وعقبها كل واحد راح على فراشه وهو يفكر باللي خذا عقله وتفكيره.. وثاني من كثر ما يفكر تم يتجلب وما ياه نوم.. ويوم وايج على عبيد شافه نايم.. شل روايه عبير وطلع في الحديقه عشان يقراها.. وقعد على الكرسي الي محطوط برع.. وفتح على القصه الي كانت بعنوان..


(البحيرة السوداء)..

 

[meen_ana]

وبدا يقرا فيها.. واندمج بقرايتها.. ويوم تعب حط الكتاب على الطاوله وتم يتمشى في الحوش وهو يفكر والا هو يتفاجأ يشوف جدامه فانيلته معلقه على الحبل..



ثاني: اوه.. فانيلتي..



شلها وتم يشم ريحتها.. عجبته الريحه الي عليها لأن الفانيله كانت ناشفه ومكوايه ومبخرينها..



ثاني: والله انج ذوق يا.. (انتبه لنفسه انه بيذكر اسم اخت ربيعه فرد سكت)..



ونش شل الكتاب ودخل غرفته عشان ينام.. ..



..



في غرفه سلامه.. الساعه 3.45 الفجر..



سلامه: انا كيف تميت جدامه جيه.. صدق اني غبيه.. والله لو طلال يدري بيذبحني.. صدق اني غبيه.. المشكله في هالنظاره من غير هالنظاره عفان الله عميا ما اشوف شي..



وتمت تتذكر شكلها كيف.. ههههههه.. اتخيله كان يضحك على شكلي اكيد .. شعري كشه.. ولابسه فانيله رياييل وسييييييعه علي.. وشلحتي التنوره.. والله انج هبله.. اوووه شو بلاني افكر في هالخبل.. بس الي اخاف منه هالخبل يقول حق اخوي وعقب ما اسلم منه.. خله يولي لا انا شو دراني انه داخل.. وبعدين كله من عبيد ليش يفر العصير علي ويخيسني....اه طلال وينك مشتاقه اشوفك والله.. من متى صار لي ما شفتك.. احين رمسه ومانروم انرمسك على الأقل شوفه اتشبع الي في خاطري..

الجزء الحادي والعشرون



في بيت طلال النابوده (ولد عم عبيد)..

طلال: امي.. متى بنسير بيت الخطيبه..

ام طلال: يوم بتصير خطيبتك قول انها خطيبتك..

طلال: لا حووووول.. شو فيج شو فيج.. انتي من اييب لج طاري سلامه تنغاضين.. وبتم اقول خطيييييبتي

ام طلال: يا يما.. يا طلال يا حبيبي.. اسمعني.. انا ابا لك الزين.. شو بلاهم بنات خالك ولا بنات خالتك.. كل وحده احلى عن الثانيه..

طلال: امي انا ابا وحده من هني في البلاد.. اما انتي بنات اخوج ولا اختج الي تبيني لهم مب هني في السعوديه .. يعني ما اعرفهم عدل.. اما سلامه رابي وياها واباها من وانا صغير انتي تدرين.. بس اخلص الكليه باخذها..

ام طلال: انت شو هالأفكار.. وشو يعني لو عايشين بالسعوديه..

طلال وهو يقلد وحده من بنات خالته: يا يما بعدين انا بتعقد.. كل شوي بتقول لي.. (يا طلال مو كذا.. كذا.. مررررره مو حلو.. دحين دحين جايه يما.. ).. (كل احترامي للسعوديه واهلها لا تفهموني غلط).. مابا يعني مابا.. انا غير سلامه مابا

ام طلال: احين انت بتاخذ اللهجه حجه عليهم.. مب حاله خذي.. وبعدين انت تدري فيني انا وام عبيد ما نتوافق ابد

طلال: وانا اشلي فيكم.. انا باخذ سلامه ولا باخذ امها..

ام طلال: خلط فطين يا ولد.. بعدين ام عبيد بتوز بنتها عليك.. وبعدين انت ايش عرفك انها تباك..

طلال: عاشت امي السعوديه.. ايش عرفك.. طلع العرج طلع.. امي ما يحتاي انها تقول عشان اعرف المهم اني احس بنظرات عيونها حب وحنين ..

ام طلال: بس بس فكني بيبدأ يشعر دحين..

طلال: اقول ماميتووو.. انا طالع.. ويمكن امر بيت عمي اوكي..

ام طلال: الله يهديك يا ولد..

.. ..



الساعه 10.45 الصبح.. في بيت العم خليفه(دبي)

خوله: غانم .. نش يلا تأخرنا..

غانم: اففففف الواحد ما يقدر ينام براحته في هالبيت..

خوله: لا نام يوم بنرد من السوق.. قوم يلا.. وراي اشغال بنتأخر..

غانم: انتي متى بتعرسين اتفكينا من شرج.. اففففف.. خل ريلج يتولاج

خوله: لا إله إلا الله.. شو هاليوم الي ما بيعدي على خير.. نش يلا .. كلها فتره بسيطه وبتفتك مني..

غانم: ياحيج.. كل يوم بتشوفين فطييم.. وانا ياحسره علي..

خوله:اقول انت وايد ترمس تراك.. نش يلا بتأخر..

كانت يدتهم تمشي في الممر وسمعت خولو وهي تحتشر.. دخلت عليهم الحجره شافت ان غانم مغطي ويهه باللحاف وخوله اتنششه وتسحب عنه اللحاف..

اليده بصوت واطي: اقول خولو خوزي انا بقومه لج..

اول ما زاحت خولو من مكانها.. جان ترفع اليده عصاتها وتضرب غانم ..

اليده: مسود الويه.. قوووم..قمقم الله عصبك وكسر الله ركبك ..

غانم من حس بالضربه فز من مكانه واقف على السرير وهو ماسك اظهره حاس انه لابق من حراره الضربه..

غانم: نشيت نشيت.. شو ها.. انتي عصاتج هاي بييني يوم بكسرها ..

اليده: كسر الله ضلوعك.. يلا قم..

غانم: بل بل بل.. مب حس عليها هالعيوز.. طبله اذني انطرت..

اليده: اتبلبلت احنوجك.. الظاهر ضربه وحده ما تكفي.. لا تخليني اطر الطبله الثانيه

غانم: هااااااااا .. ما اسمع شو اتقولين.. طريتي اذني كيف بسمع.. ابا تعويض..

عصبت اليده من حركاته جان تضربه على مؤخرته..

غانم: اااااااااااخ.. وايد يعور.. نشيت.. وها جدامج بسير الحمام (نسى غانم انه فوق السري ولازم ينتبه.. كمل مشي صوب الحمام الا وهو يحط ريله على الهوا ما لحق يطالع تحت الا وهو طايح على ويهه).. خشمي .. مب كافي طبلتي.. احين خشمي انكسر..

خوله: ههههههههه.. احين اظني طار الرقاد عدل.. يلا نش بلا دلع.. ربع ساعه وانزل تحت..

غانم: ولا حد مفتكر لا في خشمي ولا في طبلتي..

اليده: طبول ام علايه اتسدك .. روح خذ لك واحد منها..

غانم: هههه.. هي والله

..

ونش غانم عشان يتغسل ويتلبس ويروح ويا خوله السوق عشان اتخلص شروات الزهبه وكان عندها بروفه عند (يارا) عشان فستان العرس.. ونزل غانم كان لابس القميص الي كانت يايبته له فطوم هديه .. وجينز مناسب له.. وكاب.. ونظارات.. كان طالع شكله روعه.. وغانم من النوع الي جسمه رياضي يعني وايد حلو

خوله: وااااااااااااااااو. زقرت اليوم شعليك.. والله لو مب اخوي جان رقمتك

اليده: الظاهر يبالي امرغج انتي بالعصا.. منقوووود عند العرب.. شو هالرمسه بعد..

خوله: لا دخيلج يدووه.. الا العصا .. مب قادره اتحملها..

غانم: دخيلج يدو.. امرغيها.. اباها اتجرب اشوي من العذاب الي احس به من ورى هالخيزرانه

اليده: وحلييييله ولدي غانم.. مغبوووووون.. اقرب اقرب عند يدوتك..

خوله: شو السالفه.. اليده راضيه عليك اليوم..

غانم: عسى دووم ياربي

.. اليده: تعال ابغيك .. فديت صنعتك انا.. اقول انا من طالع عليه .. اثاريك على يدتك.. (بصوت واطي شوي) غانم ما بتودي يدتك السينما.. ابا اتخقق فيك شوي..

غانم: افا عليج.. وفي حد يرفض رفقه الغزلان..

اليده وهي مستحيه تضرب غانم على جتفه: ويدي عليك غنوووم..

خوله: هههههه احمرت يدوو..

ام عبدالله: ههه.. شو فيكم متكودرين حذال يدتكم.. حبه حبه عليها..

غانم: اقول خولو.. مب ظاهر وياج اليوم.. مواعد الغزال بظهره..

خوله: لا والله اتهبي.. ظهرني عقب لك الغزال.. وحفيدتها بعد شو تبا زياده.. غزلان يرافقونك..

غانم: فقدت شيفتج من بنت.. احين انا اطري الغزال.. انتي اشعنه رازه بفيسج..

خوله: اقول قم قم.. حسابي وياك في الدرب.. يلا قم شغل الموتر.. وراي شغل انا وانت بتأخرني..

غانم: يدووو.. وصيتج بفطوم..

اليده: ههههههه.. روح يا حبيبي..

غانم وهو يسوي عمره يغما عليه: وااااي قالت لي حبيبي ما اصدق..

اليده: ههههههه..

وقام غانم وظهر ويااخته عشان يوديها السوق..

في السوق كل ما دخل محل خذت خوله لعمرها شي الا وياخذ لفطوم بعد.. اخر شي دخلوا محل باريس غاليري.. وماشي من شاف جدامه شنطه (لويس فيتون) عيبته وقال الا ياخذها لفطوم بعد.. بس المشكله ماشي غير حبه وحده وخولوو بعد عايبتنها الشنطه..

غانم: اخبرج انا شايفها قبلج وانا الي اباها..

خوله: غنوووم فديت روحك انا لعلي ما اخلا منك.. بس انا هاي خاطري فيها والله..

غانم: اخبرج هاي الشنطه مووول ما تليق عليج .. هاتيها

خوله: انزين شوف شنطه ديور اليديده بناتيه وحلوه..

غانم: ماشي انا ابا هاي.. هاييلاك ما يدشون مزاجي

خوله: فديت رووحك انا

غانم: ما يمشي وياي هالكلام..

بين جدالهم وكل واحد يضارب عشان ياخذها يت حرمه ثانيه وخذتها وضاعت عليهم الشنطه هم الإثنين

خوله: زين جيه.. روحت الشنطه علي..

غانم: احسن.. مادام انها مب انتي الي ماخذتها انا راضي.. احين بسير اخذ شنطه الديور..

خوله: حشى.. لو حرمتك شو بتسوي اظني بتخم لها السوق بكبره

غانم: هي نعم حرمتي.. لو تبا المركز بشتريه كله لها

خوله: عدال عدال.. لا تخرط وايد مب زين على قلبك عن يوقف..

غانم: لا تخافين شغال 24 ساعه..

خوله: يا ثقل دمك.. انزين تراني ميهوووده حدي.. قم خل انسير كوفي شوب ناخذ لنا كابتشينو..

غانم: لحظه خل ادفع انزين..

خوله: لازم مريش .. توك مستلم المعاش..

غانم: احم احم..

طلعوا من المحل وساروا قعدوا في الستار بكس الي في صحارى سنتر.... قام غانم عشان يودي الأغراض عند الأمانات لأنها كانت وايده .. خوله كانت قاعده روحها ومجموعه من الشباب توهم داشين دخلوا وقعدوا ورا خوله....تموا في البدايه يتحرشون في خوله..

.. : يا لبيه.. كم بعيش

.. : تكفين نظره تروي غليلي..

وخوله من كثر ما مرتبكه وخايفه .. طاحت عنها قاشوقتها.. توها بتوخي عشان اتييبها قام واحد فيهم وشلاها..

.. : وحده شرواج لازم ما اتعب ايدها..

خوله صدت عنه.. وما عطته ويه وتمت تتطالع غانم.. اذا ياي .. بس ما شافته زاد خوفها..

الشاب ها حس بربكتها.. جان يقوم وايي وراها شوي ويقول لها .. : الحلو ليش خايف..

هني توه كان غانم داخل الكافيه وشاف هالمنظر .. على طول زخ الولد وتم يضربه..

خوله: غانم.. بس عن المشاكل خل انروح...

.. : اااانا اسف.. ببببب سسس.. كانت قاسوقتها طايحه عطيتها اياها..

غانم: لا والله .. يوم عطيتها ليش ترمس وياها..

خوله بخوف والدموع في عيونها: قم غانم خل انروح..

غانم من صد وشاف الدموع في عيون خوله ودر الولد وقام عنه وسحب خوله بالقو وطلع عن الكافيه .. وخذا الأجياس...

غانم: والله يا خوله ان طلبتي مره ثانيه قعده في الكوفي اراويج..

خوله وهي تدمع: غانم وانا شو دراني انه بيصير جيه.. وبعدين انت تأخرت علي..

غانم:بس خلاص.. صخي.. ويلا جدامي امشي اشوف دخلي البيت..

خوله دخلت البيت وهي اتصيح.. (خوله من النوع الي حساسه واااايد من اقل شي تذرف دموعها).. وربعت سارت غرفتها فوق..

اليده: وابوووي على بنيتي بلاها اتصيح..

غانم: ماشي ما بلاها شي.. اقول انا ساير ارقد. ميهوود حدي..

ام عبدالله: يا ربي.. شو بلاكم يا عيال..

غانم وبصوت عالي: قلت لكم ماشي.. خلاص..

وربع غانم راح غرفة خوله فوق.. شافها منسدحه على السرير واتصيح..

غانم: تسمحيلي ادخل..

خوله: شو بعد ياي اتصارخ علي..

غانم: خوله.. حبيبتي .. لا تزعلين مني.. والله حبيبة قلبي انتي.. انا كنت معصب.. مادري راسي افتر.. ما اقدر اشوف حد يتحرش في اختي واسكت عنه..

خوله: بس انا اشعلي اتصارخ علي حرام عليك.. انا مالي شغل

غانم: انا اسف حقج على راسي من فوق.. امموح على راسج ولا تزعلين.. يلا عاااد ضحكي

ابتسمت له خوله ابتسامتها الرقيقه.. وظهر من غرفتها وسار يبدل ثيابه.. عشان يتغدى ويا اهله

 

[meen_ana]

الفصل الثاني من الجزءـ 21ـ



ام عبدالله.. واليده كانوا زايغين.. أول مره يشوفون غانم بهالعصبيه.. وخوله اتصيح .. تموا يحاتون مب عارفين .. كل واحد راح تفيكره مكان.. الي يقول اكيد شافوا خالد وياه وحده ورجع لسوالفه.. ولا انه سوو حادث.. والا والا.. ماعرفوا شو يسوون.. لين سمعوا صوت ضحكه عاليه من فوق الكل صد صوب الدري عشان يشوفون من الي يضحك..

خوله: الله يغربل ابليسك على هالنكت يا غنووم..

غانم: انزين بقولج غيرها.. احلى والله..

خوله: بس بس.. والله بطني عورني.. هههههههههه

اليده: اللهم كملهم بعقلهم يا رب..

ام عبدالله: يما خوله اشفيج .. مسخنه انتي اليوم ولا شي..

خوله: ما بلاني شي .. ليش امي..

اليده: مو توج كنتي اتصيحين..

خوله: لا من كثر الضحك كنت اصيح..

غانم: وانا كنت معصب لأن طبلتي الثانيه انطرت من ضحكاتها في الموتر..

اليده: تعالو انزين احين اتغدوا..

خوله: وافديت اكل امي.. ياني اشتقت له..

ام عبدالله: خوله انتي صاحيه.. الي يسمعج يقول انا اول مره اطبخ ولا جني دوم انا الي اطبخ في البيت.. قولو بسم الله وكلو يلا..

غانم: اقول يمي.. امس يوم كنت في بيت عمي قالي اخبركم انهم ناوين من بعد عرس فيصل والمدام الي حذالي.. يسافرون ماليزيا.. فطبعا انا بروح وياهم.. وقالي عمي اخبركم عشان انسافر سوى..

ام عبدالله: والله فكره.. ودنا انسافر انغير جو.. نشرد من الحر الي هني .. مهلكنا.. وبنقول حق عبدالله وحصه بعد..

اليده: لا ويه تراب الإمارات ما اودرها..

غانم: يدوو عاد كلنا بنسافر واذا انتي تميتي ما بنروح.. تعالي انغير جو..

اليده: بس لا تنسون تذكره حق عصاتي.. ههههههه

غانم: اوهووووو لازم بعد هالعله ايي ويانا..

اليده:معلوم لازم..

ام عبدالله: خلاص انا برمس ابوك.. وبخليه يرتب ويا بوخالد..

غانم: الله وناسه.. اخيرا بنسافر..

حمده الصغيره توها كانت طالعه من المطبخ تركض وياها قلاص الآيس كريم وتركض.. وحصه (امه) تركض وراها..

حصه: حمدووو.. هاتي القلاص.. مو وقته احين..

حمده: مابا.. انا احبه .. احين باكله.

حصه: ياربي من هالبنت الي ما تسمع الرمسه.. قلت لج هاتي .. ولا تراني بضربج اذا زخيتج.. هاتي اقول لج.

حمده: ماااااااااااااااااابا..

حمده تركض ومب منتبه للنزله الي جدامها واتطيح على الرخام.. الكل من شافها طاحت .. قام من مكانه وراح لها.. بس حمدو الصغيره كانت اتصيح بشكل كبير من شلت راسها من على الأرض شافو دم يقطر منها الكل زاغ,,

غانم: عبدالله.. بوحمده.. تعااااااال بسرعه..

عبدالله كان قاعد في مكتبه من سمع صريخ غانم قام من مكانه وظهر من المكتب.. ونزل بسرعه شاف الكل متيمع على حمده..

عبدالله: شو فيها.. ؟؟؟؟ !!!

غانم: طاحت توها ..

حصه كانت اتصيح زايغه على حمده.. : نش عبدالله خل انوديها المستشفى..

عبدالله: شقايل طاحت..

اليده: ماشي من شطانتها.. ما تسمع رمسه امها.. وتركض ما تشوف جدامها جان اتطيح..

عبدالله: خلاص يلا هاتي عباتج وخل انروح..



راحت حصه ويابت عباتها.. وطلعوا بسرعه عشان يودون حمده المستشفى..

غانم: عبدالله.. اووووووووه.. لا تنسى اطمنا..

اليده: طبلتي (جان تضربه على ريوله بالعصا).. طريت اذني .. هدي شوي..

غانم: هااااااا.. شوووو.. ما اسمع

الكل تم يضحك على شكل غانم وهو يسوي عمره ما يسمع..

.. ..

في بيت طلال النابوده..

ام طلال: اخبرك عامر.. انا مابا طلال ياخذ بنت عمه.. اباه ياخذ بنت اخوي فيصل..

بوطلال: ياربي من هالحرمه.. شوفيج انتي.. خلي الولد على راحته..

ام طلال: شوف.. والله يا عامر .. تراني حلفت.. ورفات ابوي المرحوم.. ان يوزته سلامه لاني مب حاضره عرسهم وبغضب عليه ومب قاعده هني ولا دقيقه.. بسير السعوديه عند خوي فيصل..

(عامر.. الي هو ابو طلال.. شخصيته ضعيفه.. ما يقدر يوقف بويه زوجته.. دايما ام طلال هي الي مسيطره على امور البيت.. وتمشي اوامرها..)

بوطلال: فكيها سيره يا حرمه.. الولد ماقال بيعرس احين وراه سنه يدرس فيها.. يمكن يغير رايه

ام طلال: انت قوله..

بوطلال: شو اقول له..

ام طلال: انه ما ياخذ بنت عمه..

بو طلال: انا عمري ما جبرت عيالي على شي.. وانا مب قايل شي.. وانا الي علي اني اصرف على زواج ولدي يوم بيعرس..

ام طلال: انت عمري ما خذت منك لا حق ولا باطل.. بتييبون لي الجلطه انت وولدك..

ناعمه (اخت طلال):شوفيج يما تصارخين .. ماهي حاله ذي.. مب قادره ارتاح في بيتي

ام طلال: اقول فكيني انتي بعد..

ناعمه: هدوا شوي.. ماهي حاله.. دحين الجيران بيسمعونا وش يقولو عنا..

(ناعمه متربيه بيت جدها في السعوديه عشان جيه اللهجه السعوديه طاغيه على رمستها)..

ام طلال: يقولو ما يقولو.. وانا اشعلي منهم..

ناعمه: يبا.. كلمها قول لها شي... والله عيب..

ام طلال: والله خوووش.. احين انتي يايه اتعلميني العيب.. ؟؟

بوطلال: يا بنتي يا ناعمه هاي امج من يومها جيه.. مشكلتج انتي ما كنتي بينا فماتعرفينها عدل.. لازم تتعودين خلاص..

ناعمه: يا صبر أيوب..

وطلعت راحت جناحها وصكت الباب عشان ما تعيد تسمع الحشره الي مسوتنها امها..

ناعمه بنت ناعمه فعلا.. كلها احاسيس ومشاعر.. تحب الشعر مووت.. دومها تقضي يومها في كتابه الشعر.. تقعد في هالبلكونه الي مطله على كورنيش بوظبي.. وفاله شعرها.. وتقعد تكتب..

وفي هاليوم كانت مفتقده لجدها ولقعداته.. وكتبت هالكلمات

هذي دنيانا حبيبي لا تألــم .. تجرح وتقسى وما تحــاتي
ما يهمها من شايل بقلبه هم .. تشيل القلب منا ف كل الاوقــاتي
ان طلبت ما ترد بحاضر وتم .. تجلب الطلب الى جروح وعلا تي
واتردلك بكاسٍ من السـم .. وتسلب الروح منّـا يا حياتي
اتسلّى بالعذاب واتزم بك زم .. وتاخذ الطيـّب وتسبب في الوفاتي
هذي الدنيا تاخذ اللي نبـاهم .. تضحك ونحن نبكي احســراتي
تنزف عيوننا من دمــوع دم .. وهي أبد بالأحزان ما تبـــاتي
تغدروأبد ما تفكر إنها ترحم .. بل اتزيد من الــونّ ونـّــاتي
أبيك لجروحك وأحزانك تلم .. وتروح في نــومٍ سبــاتي
ومني لك حبي وأكبر ضــم.. ودي أشفيك من الجروح الدامياتي
أبيك حبيبي بس تعـــلم .. إنك ما بتســتـفيد من العبـــراتي
الدنيا بتبقى اتحطم واتحطـم .. ما يهمها من تعرض للممــــاتي

ملاحظه الكلمات من الكاتبه.. JR0O0O7..منتدى مرسى الإمارات



سكرت دفتر اشعارها وراحت غرفتها عشان اتنام..

 

[boys are toys]

مشكورة على القصة الحلوة
وفي انتظار باقي الاجزاء

 

[غرنوووقه]

يسلموووووووووووووووووووووووووووووووووو
القصه مره رووووووعه تسلمين
بس لاطولين علينا

 

[meen_ana]

العفوو حبيباتي واليوم بكمل لكم كميه حلوة عشان خاطركم يا متابعاتي

 

[meen_ana]

في بيت ريم&عواش



عواش لا ليلها ليل.. ولا نهارها نهار.. كل يوم اتفكر في جاسم.. وتحاول انها تستوعب.. كيف جاسم جيه يسوي فيها.. قالت لازم اتخلي حد لهالأفكار وقررت تتصل في جاسم واتكلمه..

عواش: الوو..

جاسم: هلا والله بغناتي.. هلا والله .. يامطول الغيبات.. جاب الغنايم

عواش: هههه.. زين انك عرفت.. غنايم.. يايبه لك هالكووم غنايم جسووم

جاسم: شو بلاه حسج متغير حبيبي..

عواش: لو سمحت لا تتعدى حدودك ولا تقول لي حبيبي..

جاسم: لا في شي.. اكيد في شي

عواش: ليش والي بيكلمك ما بييه شي من وراك.. إلا اشياء يا جاسم .. يا منافق

جاسم: بل.. منافق.. ليش.. شو صاير.. هدي

عواش: شو اهدي.. شووو.. خبرني..

جاسم: لحظه .. شوي شوي.. حبه حبه.. شو صاير قولي لي..

عواش: تبا مقدمات ولا كاش في الويه

جاسم: لا انا مااحب المقدمات.. عطيني في ويهي جيه..

عواش: كشفت سرك يا جاسم..

جاسم: عواش ما احب كلام الألغاز هذا.. شو صاير

عواش: لو سمحت.. اسمي عايشه..

جاسم: لا.. احلفي ان اسمج عايشه توني ادري اتصدقين

عواش: اخبرك بلا استهبال.. انا متصله اقول لك انك خاين وجذاب ومنافق.. واحقر واحد شفته في حياتي..

جاسم: اقول عن الغلط حدج عاد..

عواش: ليش انت خليت فيها حدود.. اقول.. مب فايجه اسمع صوتك القذر اكثر من جيه.. اخبرك عيب عليك اتهيت لهالوقت برع البيت.. وعيب عليك بعد عندك حرمه مثل الورد اشحلاتها.. تتطالع غيرها.. روح جابل عيالك احسن بعد.. والله لو عذاري تدري بسواتك بيوقف قلبها..

جاسم من سمع اسم عذاري افتر راسه.. كيف عرفت انه معرس.. وكيف عرفت اسم حرمته بعد.. من الصدمه تم ساكت ما يرمس ولا كلمه

عواش: شوفيك.. توه لسانك شو طوله ينقط عسل.. منصدم صح.. بس لا تخاف.. مب نذله ولا هبله عشان اسوي مشاكل بينك وبين عذاري .. مب عشانك على فكره يعني.. عشان عذاري.. لأنها ما تستاهل حد يضايقها هالبنت الطيبه.. بس اهم شي الحمد لله يوم كشفتك.. وعرفت لعبتك.. انا انسانه اخاف ربي.. ما بفرق بين اثنثن .. لأن كما تدين تدااااااان

جاسم: للللللحظه عايشه .. بببقولج شي..

عواش: هههههه.. بعد قام يعلق وهو يرمس.. اقول لا تقول ولا اقول.. بس حبل الجذب قصير.. حسافه كل دقيقه ضيعتها وياك.. وكنت صادقه وياك.. اخبرك انا طلعت رقم يديد.. ورقمي ها بقطعه.. يعني احلم انك توصل لي..

جاسم: عواش.. لا .. بليز..

عواش: شو تبا تلعب علي لعبه يديده.. لا تحاول.. انا ماباك عفتك ..

جاسم: بس..

ما لحق يكمل رمسته الا ورقعت التليفون بويهه عواش.. وعلى طول اغلقت تليفونها وشغلت البطاقه الثانيه.. عشان ما يتصل فيها جاسم..

وجاسم حس راسه يدور.. مستغرب .. كيف قدرت تعرف.. تم يفكر.. يوم كان في دبي هل صادف وشافها.. بس حتى لو شافها كيف بتعرف اسمها.. حد قال لها.. بس انا مب قايل لحد اني ارمسها.. هي سألت عني.. بس كيف بتعرف ان عذاري طيبه.. وبهالصوره الي وصفتها.. لا لا ما اقدر افكر زود.. راسي بينفجر.. كيف جيه.. بس خساره مابا افقد عايشه..

احتار واحتارت معاه افكاره.. ماعرف شو يسوي.. ورد البيت.. لقى عذاري قاعده تتطالع تلفزيون وتاكل فراخ ويا ولدها مطر.. شافهم وصعد يروح غرفته من غير لا يسلم عليهم بعد

عذاري: سلام لله.. عطنا ويه يالحلو..

مارد عليها جاسم.. قالت اكيد هاي وحده من حركاته..

عذاري: ماما مطوور.. هاك الفراخ كله لك.. انزين لا توصخ الميلس..

مطر: ياربي من هالأم كله تتحسبني غبي ما افهم.. يعني يا مطر لا اتيي وياي..

عذاري: يالشيطان.. هههههه

وصعدت.. شافت باب الغرفه مفتوح.. دخلت ولقته فار غترته وعقاله علىالفراش.. وهو في الحمام..

عذاري: احم احم.. روم سيرفز..

جاسم: اسبح..

عذاري: انا في معلوم انت سبح.. بس انت مافي معلوم انا يريد سوي ليفه حق انت..

جاسم: عذاري مب اليوم.. باجر باجر..

عذاري: نو نو نو.. بابا لازم انا سوي ليفه حق انت.. عشان ها كله وصخ طلع برع.. بعدين ريحه مال انت يصير واجد جيين..

جاسم تم ساكت ومارد عليها.. استغربت عذاري لتصرف جاسم عمره ما سواها وياها من يوم ما عرسوا.. كيف جيه يعاملها.. اكيد صاير شي.. قررت انها تطلع من الغرفه وتترياه يخلص عشان اترمسه..



في بيت عبيد النابوده

عبيد: ثاني. والله انها ما تغيب عن بالي.. انا في الدوام .. ولا في البيت كل تفكيري فيها..

ثاني: اخبرك.. روح روح.. سير عند رضيعتك انشد عنها على الأقل اعرف اسمها ..

عبيد: اتصدق يبالي.. عيل السموحه منك.. خذ راحتك

ثاني: دومي ماخذ راحتي في هالبيت.. يلا نش بسرعه عن ترقد رضيعتك
عبيد نش وربع سار عند العنود عشان يعرف منها اي شي عن الي ماخذه كل تفيكره.. وتم ثاني قاعد في الحديقه.. استغل الفرصه وتم يكمل قرايه كتاب روايات عبير مال سلامه..



عبيد: مرحبا .. العنود .. ما اصدق عيوني.. كل هالجمال.. ياربي كم بعيش انا

العنود تتطالعه وهي فاجه عيونه: عبيد حبيبي مسخن..

عبيد: وانا اقول ياربي كيف البنات ميتين علي.. اثاريني قمر عليج انتي ..

العنود: ههههههه.. خرف وقعد هالشيبه

عبيد: لا دخيل هالضحكه تراني ما اتحمل..

العنود: لا تحمل.. شوف.. (وتمت اتفج له اسنانه وتضحك)..

عبيد: بيض بيض.. اتقولين بياض الثلج.. الإخت تستخدم سيجنال توم المبيض الجديد..

العنود: هههههههه

عبيد: تعالي اشتقت لج ابا اسولف وياج شوي

العنود: عبيييييييييد ولد بو عبيد.. يبا يسولف ويا العنود.. معقوله

عبيد: هيه معقوله ونص.. مالي غيرج في هالبيت اصلا..

العنود: سولف سولف..

عبيد: اخبرج.. شو استانستي في بيت هل دبي..

العنود تذكرت فيصل .. آآآآه يا ذابحني.. ليش ذكرتني فيه يا عبيد.. والله اني تعبانه منه..كم بتحمل بعده.. ما انام الليل وانا كل تفكيري فيه.. خذا عقلي.. معقوله حبيته.. ولا هذا اعجاب.. ياربي.. كم بتحمل.. ليته يحس بذره هالإحساس..

عبيد: عنوووود.. هود هود.. السلام عليكم.. وين سرحتي

العنود .. ها.. شو.. انا هني.. وياك وياك

عبيد: شو وياي.. بسم الله .. جنهم ما عيبوج هل دبي..

العنود الا عيبني .. عيبني ونص.. :ماشي.. استانسنا عليهم.. ناس طيبين ماشاء الله عليهم.. والنعم فيهم..

عبيد: لا يعني.. كيف حريمهم .. كبار صغار..

العنود: شو هالأسئله الغريبه..

عبيد: انتي شو بلاج.. اسأل ناس استوا ربعي ابا اعرف عنهم يعني..

العنود: اهااااا.. ماشي عندهم بنتين.. وحده اصغر من سلووم بسنه.. والثانيه تدرس في العين طب.. باقي لها سنتين وبتخلص.. يعني سنه دراسه وسنه تدريب.. وشفنا بنات خالهم.. وحده جيه على عمري.. والثانيه خطيبه ربيعك..

عبيد احتار من سمع طاري بنت خالهم.. تم يفكر يا ترى هي اخته ولا بنت خاله.. ما عرف احين.. وحس عمره مب قادر حتى ينشد عن اسمها.. بس تجرأ وقال لعنود السالفه عشان يحسم الأمر ويعرف منو الي شافها..

العنود: والله مادري.. الصراحه هم مريوم كانت في المطبخ تشتغل.. وهم عواش.. كانت اتساعدهم..

عبيد: اااااااااااااخ.. كيف بعرف احين..

العنود: انت صدق حبيتها..

عبيد: اقولج مب مفارقتني.. كله افكر فيها.. اتقولين لي حبيتها..

العنود سرحت بأفكارها . يحليلك يا عبيد.. حالك من حالي.. ما تقدر اتشلها من بالك مثل ما انا مب قادره اشله من بالي... اي والله ياخوي.. حاسه بعذابك..

عبيد: شو بلاج كل شوي تسرحين

العنود: ماشي.. افكر اي وحده فيهن ممكن اتكون...

...



سلامه كانت قاعده في الصاله... زقرها ابوها عشان اتييب له كوب جاي.. قامت وراحت المطبخ.. ومطبخهم برع البيت.. لازم تظهر من الباب الخلفي عشان تقدر اتروح له.. لأن المطبخ التحضيري الي داخل كان مقفول.. لأنهم يغيرون طقم الكبتات فيه..

راحت وهي تتحرطم..

سلامه: شو ها .. احين الفلم بيخلص عشان الجاي.. يعني ما قدر يقول حق عنود ولا لطووف.. كله انا كله انا..

ثاني جاسه يوع.. وبحكم انه متعود انه يدخل المطبخ لأنه يدري ان المطبخ الخارجي محد يدخل فيه..غير الطباخ والخدامه.. راح المطبخ.. وتم يتعبث بالثلاجه يجوف فيها شي ياكله.. كان قاعد على الأرض ويطالع..

سلامه دخلت المطبخ وشافت باب الثلاجه مفتوح وان حد قاعد لأنه الباب مغطي فما تقدر اتشوف من.. (كانت لابسه بيجامه بنفسجيه .. عليها ورود صغاري لون الوردي والأبيض.. وحاطه على راسها شيله صلاة عشان اذا طلع الطباخ لا يشوفها مكشوفه..)... سلامه حطت في بالها ان الي قاعد عبيد.. لأنه يسهر دوم.. واكيد ياع..

سلامه: اقول عبيد.. انا تعبانه الله يخليك سو لي هالخدمه .. الإنساااااااااانيه.. سو حق ابوي جاي لأني مووول مب فايجه.. وغير جيه بيفوتني الفلم..

ثاني من سمع صوتها عرفها.. حس عمره منجمد مب قادر يتحرك ولا يلف راسه.. شل تفاح وقام سكر باب الثلاجه.. تم يصد راه شوي شوي.. جان يشوف سلامه حاطه راسها على طاوله المطبخ عالصوب الثاني.. حمد ربه.. وحاول شوي شوي انه يشرد عشان ما تحس وتشوفه..

سلامه شافته بس من ظهره ولأنه كان لابس جلابيه عبيد فما لاحظت انه مب هو..

سلامه: اخبرك.. وين شارد..(جان تمسكه من جلابيته من ورى وتسحبه صوب الكبت الي فيه الجاي).. يلا هاك الجاي.. وهالكوب.. ووو

علقت ما قدرت اتكمل كلامها من شافت ويهه.. جابلت عيونها عيونه..وهالمره غير.. عن قرب.. كانت اقرب منه.. الي يفصل بين جسدها وجسده شعره..افتر راسها ما عرفت من الربكه شو اتسوي.. ماعرفت كيف اتفل.. توها بتركض وتظهر من المطبخ.. ما انتبهت انه دايس على طرف شيله الصلاة.. فطاحت على الأرض واتعورت ريلها..

ثاني: سلمتي..

سلامه من فشلتها ما عبرت لألم ريولها ولا قدرت اترد عليه وطلعت من المطبخ ودخلت البيت.. ليش ياربي .. لييييييش يستوي لي هالموقف البايخ .. ودايما وياه.. اففف.. وين اودي ويهي.. واحين ابوي ما طلب مني الجاي الا يوم صاكين المطبخ الي داخل.. شو هالحظ النحس.. ولا بعد اطيح جدامه.. والوقح يقول لي.. سلمتي... (سكتت شوي).. لا حرام ليش وقح ما قال لي شي.. بس بعد .. انا الحماره.. ليش اسحبه يعني لازم لازم عبيد الي يسوي الجاي.. سويه انتي.. اسميني غبيه بعد..

ابو عبيد: سلوووووم ويهد ما قلت لج هاتي لي كوب جاي..

سلامه: ها... بببس ابوي المطبخ الي داخل مسكر.. والي برع اخاف الطباخ يكون هناك مافيني..

ابو عبيد: بنات اخر زمن .. ما منكن فايده..

عبيد: شوفيك ابوي.. مب زين عليك اتصارخ.. روف بحالك شوي..

ابوعبيد: هاي اختك.. رفعت لي الضغط من متى وانا قايل لها هاتي لي كوب جاي..

سلامه: انزين شو اسوي المطبخ الي برع مابا اروح له.. وبعدين لا تنسى ابوي ان ربيع عبيد هني .. يعني عادي يمشي في الحوش مابيه يشوفني..

عبيد: خلاص ولا يهمك ابوي.. احلى كوب شاي.. بييبه لك.. انت هدي بس..

بو عبيد: لا تبطي انت بعد.. ماصار كوب جاهي عنبو.. عنلاتكن من عيال..

عبيد: ماعليج من ابوي سلووم.. تدرين به انتي..

سلامه: وبعدين شو هالحاله ربيعك ها متى بيفارج مب قادرين نرتاح..

عبيد: شوفيج انتي.. ما يخصج في ثاني.. ها ربيع عمري.. رابي وياه.. وانتي تدرين بهالشي.. يوم انا عنده ويوم هو عندي..

سلامه: شو ماعنده بيت..

عبيد: اقول .. بسير اييب الجاي حق ابوي.. عن يمرغني بعصاه..