صباح الخير
بنات اليوم انا ابي اتكلم عن كم شغله ان شاء الله اتكون لها فايده لكم. وكلامي بيكون عن تجربه خاصه او انه شخص قريب حييل مني.
في البدايه ابي اتكلم عن مشكله كثير من النساء المتزوجات يشتكون منها, الا وهي انه ليش زوجها ما يقعد معاها بالبيت و ماله خلق يطلع معاها, بس ما عنده مانع يقعد لي الصبح بالديوانيه او يطلع ويا ربعه. النقطه المهمه اهني انكم لازم تعكسون السؤال, ليش اهو يحب يطلع مع ربعه او يروح دواوين؟ ترى يا بنات مو كل شي يدور حواليكم. يعني مو العيب فيكم.
المهم انا كنت بنفس هالحاله, تدرون شنو سويت؟
اول شي عرفت شنو اكثر شي ريلي يحبه بالطلعه, اتهقون شنو؟ الحداق
لا يحوشك الزفر.
المهم, الخطوه الثانيه كانت انه اسحب حجي من اخوي بما انه يكون مع ريلي بالديوانيه بعض المرات شنو سوالفهم, واكتشفت شي, طلع ريلي سوالفه كله عن البزنس, حده وده يبطله بزنس وكل يوم طالعله بفكره, وطبعا نص افكاره ابداع x ابداع...
المهم يا بنات اللي سويته كالتالي:
ييتله وقتله حابه اسوي مشروع اشرايك؟ وقعدت اسولف عن جم شغله اهو مسولف عنهم بالديوانيه. المهم اهو هني اشتط, وقعد يسولف عن الموضوع, وقام يعطيني كل اللي عنده وانا يعني اساعده بالبزنس بلان وما ادري شنو, والله يا بنات انه من يومها ما قام بروح الديوانيه الا كل وين و ويين, وكل شوي داق علي واهو بالدوام, واهو بالطريج بس يسولف.
يينا للحداق, اتصدقون اني حنيت عليه وقالي منتي قدها, المهم خذاني . لا تشوفون والله فيلم, سوالي تعذيب عشان يشوف رد الفعل بس الحمدلله طلعت قدها, لا وحدقت بخيط بعد :eh_s(9):
الزبده مثل مل يقولون. حاولي تتقربين منه عقليا, مو بس حبيبي وقلبي وتتقربين منه تلملم. خليج متفتحه وذكيه وكلميه بالمواضيع اللي اتهمه.
ترى الرجل يحب المراه الذكيه, واللي اتقولي يخاف منها, اسمحيلي. يخاف من اللي اتحسسه انه غبي او اهي اذكى او انه بيلعب وما يبي وحده ذاكيه تصيده.
نصيحه بنات, اللي ما تشتغل بس تقدر, تروح تشتغل, ترى هالشي يفتح عقلها ويخليها مواكبه لاهم الشغلات اللي تصير, ما رح اتكونين ممله وما عندج شي يديد غير العيال واللبس والمكياج. ان كنت امراه فارغه, سيعاملك على هذا الاساس. واللي ريلها مو راضي تشتغل, اتحاول تشنشغل بهوايه, بعمل خيري, باي شي. الرجل تعجبه المراه التي عندها هدف .
بنات اللي اتقول انا مالي الا بيتي وريلي واعيالي ووو, وبينها وبين نفسها اتقول اذا خاني وراح اكيد بيردلي. بعطيكم سكوب : احنا مو عايشين بفلم مصري للاسف. وليشت جميع النهايات سعيده واو عادله. وحتى لو رجع, بتكون شفقه, فهل ترضين بهالشي؟
كوني امراه متجدده بكل شي, بلبسك, باسلويك, بمكياجك, واهم شي بعقلك.
والله يا بنات انا قاعده اقول جذي عشانكم. انا اشوف تعليقات اهني من بنات والله يكسرون الخاطر والمشكله عايشين الدور ومصدقين.
ما تطلع من البيت. ما تسوي شي بحياتها, مدفونه بالحيا. اتقول بس ريلي عاجبه ومستانس. ايي طبعا بيستانس, عنده وحده ما تحجى قاطها بالبيت تربي تنظف وتسوي واهو عايش على كيف كيفه. واخر اليوم يؤد ويصير سي السيد. بل عزيزتي, هل هذا هو هدفك؟ وين احترامه لعقلك, وفكرك وكيانك؟ ترة محنا جواري.
واللي اتقول ملبسني نقاب وعبايه راس ومستانسه واتقول راضيه ربي. اتقصين على نفسج؟ الدين ما قال تلبسين نقاب وكف وكلج سواد ابسواد, ترى حتى حق العزاء مو اكثر من 3 ايام. على عيني وراسي الغاريه وهالكلام. بس حذا تحكم واعدام تام لشخصيه المراه وترى ان الله جميل يحب الجمال.
الغفله هذي والله اهي اللي مضيعتنا والله
سوري عالاطاله. اتمنى انه كلامي تاخذونا ابرحابه صدر بس والله هذا الواقع
وسلامتكم...
