♥♡♥ تجمع لجميـع مواليـــد 2014 حيــــــاكمـ ♥♡♥

[بطبعي رقيقه]

رد: تجمع مواليد أكتوبر 2014 بإذن الله

لولوو انا سجلوني معاكم
حامل بولد و آخر موعد حطي لي إياه 30 اكتوبر بس مادري ليش احس اني راح اولد اول عشره
امس ياني الم بآخر ظهري كلش ماقدر امشي ولا اشيل شي بس الحمدلله راح اليوم
وفي جم شغلة بشتريها عشان اسكر الجنطة كل يوم اقول بآجر وأأجل شغلي ،باجر بروح أخلص كل شي عشان ارتااح

 

[حمووشه المطيري]

رد: تجمع مواليد أكتوبر 2014 بإذن الله

هلا حبيبتي لولووو

انا موعدي باذن الله 25/10
وفيني ولد ان شاااء الله

يعني انا بعد مطوله سالفتي
سبحان الله من ندخل الثامن بس نبي نولد
بس يا بنات انتم تمشون ع حساب السونار ولا ع حساب الدوره

 

[طموحه بزياده]

رد: تجمع مواليد أكتوبر 2014 بإذن الله

الله يهووووون عليكم

انا والده بجري قبل 3 اسابيع

وانصحكم بالدعااااااء ان الله يسهل عليكم الولادة ولا تصير فيكم او بالبيبي مضاعفات

وانصحكم بابره الظهر حق الخوافه مثلي

 

[طموحه بزياده]

رد: تجمع مواليد أكتوبر 2014 بإذن الله

قصة ولادتي عشان اشجعكم


انا ولدت بجري قبل 3 اسابيع

وما كتبت قصة ولادتي لانشغالي ويبيله مخ فاااظي

وكاني الحين بقولكم قصتي

بسم الله الرحمن الرحيم

ولدت بتاريخ 26_8 ساعه 5 الفجر بدار الشفا عند الدكتور زكريا ابو المعاطي بديت اراجع عنده اول مادشيت التاسع وجبت احلا بنوته وجبتها بالاسبوع 38 و5 ايام


من دشيت التاسع ما حسيت بوادر ولادة واكثر شي كثرت منه المشي واكل تمر ( هذا اقصاي يعني مسويه شي هههههههع)

وفي يوم فصلت قلت ابي اوووولد جان اكل اناناس من الصبح لي الليل وانطر بوادر شي ماشيات ولم تظهر اي اعراض

ورديت للمشي مشي مشي مفيش فايده طبعا بحكم العطله والفراغه والزهقه والرطوووووبه مكثره مشي بالبيت ولا انا كسوله ومالي خلق

المهم وقفت كل شي لمدة 10 ايام بس منسدحه وابلع قلت بنفسي الولاده بتجي من الله شحقه ابجر بالشقا خل استانس بلعه ونووووووم

وفعلا اخر عشر ايام قبل ولادتي كانت سعيدة نوم وبلعه وسدحه وعطله لا مشي ولا بطيخ ومخي مطفي ماعندي مسؤوليه كلش


مراجعاتي كانت كل اسبوع وعطاني الدكتور موعد يوم الاثنين 25_8 عالساعه 4 العصر وكنت بالاسبوع 38 و4 ايام وقالي انه راح يسويلي فحص داخلي يشوف الرحم شلونه مبطل ولالا لين ولالا .. طبعا انا حدي مستانسه وانطر موعدي بفارغ الصبر لان جذي احس الصجيه قربت خخخخخخخخ

لا تلوموني بجر ومدري شسالفه ومستانسه لان لاعت جبدي من العطله وروووتين ممل ابي اكشن
جا يوم الاثنين المنتظر ولكن الساعة 4 الفجر مو العصر اللي هو موعدي هههههه (مشفوحه)

كنت سهرانه كالعااااادة منسدحه وابلع اخر شي كليته توست وحمسة مشروم وسلطة شمندر وبقدونس جزر

فجأة حسيت بعوار مثل عوار الدوره خفيف +تيبس بطني استمر دقيقه عقب فج
ما انتبهت الا يوم تكرر بعد 5دقايق نفس الطريقة عوار خفيف وتيبس بطني مدة دقيقه

عاد انا ماكو شغل واقوم اوووقف اشتطيت ليش واقفه مدري ههههههه

واوقف جدام الساعه بتأكد هل فعلا هذا هو الطلق اللي اسمع واقرا عنه انه منتظم كل خمس دقايق؟

وتمر خمس دقايق يالضبط ويجي نفس العوار والتيبس

واقوووووم انقز من الفررررررحه هياااااااا

وقالي قبل الدكتور اذا جا عوار كل خمس دقايق لمدة ساعه روحي المستشفي

عاد قلت لازم اتأكد انه كل خمس دقايق مدة ساعة
واقعد من 4 الفجر لي 5 وطلع فعلا كل خمس دقايق

وهني بدت استعديت رحت تسبحت واستشورت شعري وجهزت النواقص اللي بجنطتي حسيت وقتها باحساس اللي بتسافر سياحه هههههههه
وعقب ما تزهبت رحت قعدت زوجي من نومه وكانت الساعه 6 وقلتله فلان احس بعوار كل خمس دقايق ويقوم ينقز مخترع حسباله دقيقتين وبولد بغرفه النوم خخخخخخخخخخخ

ويقوم يدش الحمام ويطلع ويشوفني طبيعيه وعقب يصلي وشافني عاديه وماقال شي لان العوار توه خفيف

وصعدنا السياره وقالي وين اللي بالمسلسلات؟؟
ههههههههه

عاد فهمته ان العوار يزيد مع مرور الوقت كل مافتح الرحم زياده راح يزيد العوار وهالشي ياخذ ساعات علا ماينتفح اكثر <<< تقولون عاشر بيبي من الخبره هههههه ماخليت قصه ولادة ماقريتها وعرفت كل شي بالطلق والولاده فرايحه وانا عارفه ان اكيد بكون مفتوحه شويه

ودشينا طواري دار الشفا وفحصتني الدكتوره قالت 2سم طبعا الفحص عادي سهالات مادري ليش الحريم يهولون ويخرعون الوحده بس اهم شي اخذي نفس عميق وصكري حلجج وتنفسي من خشمج شهيييييق عميييييق وطلعي من حلجج زفير بطيء وقت الفحص

وسوت تخطيط مدة ساعه وطلع في طلق منتظم كل 5 دقايق

قالتلي العوار تتحملينه؟ قلت اي محتمل قالتلي انتي بجر راح تطولين واحنا ندخل الولاده علا 4 سانتي فأحسن لج روحي البيت وتعالي بالليل علي مايتبطل الرحم اكثر او اذا زاد العوار لدرجة غير محتمله تعالي واذا تبين ندخلج الحين كيفج بس الافضل لج ماتطولين عندنا

عاد ماصدقت علي الله تقولي روحي وتعالي باليل لاني سهرانه ودااااايخه ابي النوم حزتها ماهمتني الولاده همني النوم
اكل ومرعا وقلة صنعا هذي حالتي بالعطله ههههههههههه

وزوجي يوم طلعت من الطواري حسباله بطلع وبيدي البيبي ههههههه مسكين مو فاهم الولاده

ردينا البيت العوار زاد حبه بس محتمل ونمت ساعه 9 لان وراي ولاده الله اعلم متا بتجي وقعدت 2 الظهر العوار زاد بعد حبه ورحت الحمام عزكم الله ولا اشوف مخاط فيه خيوط حمر وخضر وعرفت انها سدادة الرحم اللي يقولون

حسيت اني كنت ادرس وقت اللي اقرا قصص ولادات والحين ميداني اشوف اللي قريته هههههههههه

وطبعا ماننسي ان موعدي مع دكتوري زكريا ساعه 4 العصر فقلت اروحله بس بيني وبينكم ما ودي اروح موعدي ابي اتأخر بالروحه اكثر مابي اروح المستشفي الا حده حده ما ودي يبهدلوني ويسوولي تجارب

ويدقون علي المستشفي ساعه 3 العصر يقولون مواعيد الدكتور اللي من 3 لي 5 تكنسلت لظروف خاصه

هههههه ابيها من الله سبحان الله وقلت حطولي موعد ثاني بنفس اليوم عند اي دكتور ( لان الزياره راح تكون مجانيه فما ودي يروح علي ابلاش)
وعطوني موعد عندي دكتور وائل ساعه 8

وتغديت عيش ومرقه لحم وكان غداي المفضل واحس العوار يزيد ماقدرت حسيت اني تعبانه فرحت نمت عشان العوار يفج وانام من 4 لي 6 العصر
واحس فعلا وقت مناسب اروح المستشفي واكل 7 تمرات واروح لدار الشفا عالساعه 7

ووقت الانتظار بالكراسي اهني حسيت صج عواااااار اقوا من بداية اليوم قلت لزوجي احس بعوار حيل شوف متا يدخلونا عالدكتور واتافف من العوار اففففف اففففففف طبعا افف هذي نفس عميق مو اف اف اللي مالي خلق <<<< تطبيق ميداني ههههههههه بنات استفيدو خخخخخخ

وندخل عالدكتووووور وقلت لزوجي لا يدش حسيت شي شخصي فحص داخلي خخخخخخخ

ويووم جا الدكتور بيفحص والسستر هنديه تمسك فخوذي وتقولي بحماس مملوء بالرعب سوي نفس عميق ولما جا الدكتور بيدخل ايده هذيج تصرخ نفس نفس والدكتور خوووووودي نفس ولما دخل ايده تصرخ السستر نفاااااس والدكتور يعفس وجهه جنه اللي يترقب صرخه مني بتفجر اذونه

صراحه حسسوني اني بولد مو بيفحصوني شدعوه لهدرجة الحريم يصرخون وقت الفحص ههههههههه استغفر الله

طبعا انا خذيت نفس وكتمته يوم دخل ايده وكان الوضع محتمل ولله الحمد

وقالي انتي قويه انتي تستاهلي قايزه نوبل انتي شاطره اوي ماشاءلله عليكي وانا جني بالروضه استانست يمدحني لان ماصرخت

وقالي مفتوحه 5 سانتي يلا دخوووول ويتصل عالطوارئ لان هة دكتور بالعيادة النساء ويقولهم بتجيكم وحده بسم الله ماشاءالله عليها ان شاءالله مش حتتعبكم خخخخخخخخخ واروح الطواري وتستقبلني الدكتوره وبعد ما كلمها الدكتور وسوا زوجي اجراءات الدخول واتصلوا علي دكتوري زكريا ابو المعاطي لاني ابيه يولدني ويخيطني بعد ما سويت سيرج مكثف عن احسن دكتور عموما كل دكاترتهم يمدحونهم

وودوني فوق لغرف الولاده وانا امشي مع السستر وهي توديني للولاده ومستانسه خخخخخخ وكل ماجا العوار كشرت .. انفصام بالشخصيه ههههههههه


طبعا سالوني احد بيدخل معاج بالولاده قلت لا وقالت ماشاءالله ليش ؟ قلت منو يدخل زوجي مابيه هههههه وماما موت اهي اهي وخواتي وحده مسافره ووحده عندها اعيال صغار مو ملزومه وعموما انا ماااااااابي احد

اول شي قلته يوم دشيت الولاده حتا مالبست اللبس الاخضر قلت ابي ابره ظهر هههههههههههه شكلي مايوحي اني خوافه من كلامي صح؟

بس فعلا ماني مستعده اجرب العوار لي زاد وابي ولادتي تكون ذكري حلوووه مو مرعبه وكلها ألم

حطولي حقنه شرجيه صراحه اسوا ذكري بولادتي وييييع حطتها وبعد عشر دقايق بدا المفعول وركض عالحمام عزكم الله اسهااااال


حسيت بدوخه من تكرمون الحمام حتا مارضت اقفل باب الحمام واشوا ماقفلته بعد خفت يغما علي

ورديت غرفتي الولاده الخاص العاديه
.وبعد ربع ساعه حسيت ابي الحمام وقلت للسستر بروح حمام جني طالبه استاذن من الابله خخخخخخخخ لان الحمام برا غرفتي مو حمام خاص

واروح ركض وحسيت بدوخه من الاسهال عزكم الله اأااه شعور خايس ومتعب

المهم رديت غرفتي ونمت عالسرير وخذو عينه من دمي عشان يشوفون تناسبني ابره الظهر ولالا

وصارت الساعة 10 فحصتي دكتوره الطواري قالت 6 سانتي واهني حسيت زاد اكثر العوار قالت انتي متاكده تبين ابره الظهر؟ قلت اي ليش؟؟ قالت السستر انتي ماشاءالله مافي صرخ لما سوي فحص خودي كمام احسن

قصدها ابره الظهر للي مايتحملن الفحص وراعيات صرخات تفجر الاذاني هههههههه


قلت وينها ابره الظهر ابيها وانا بقلبي : الله منعم علينا ليه ما اجرب ابرة الرحمة <<< متاثره بقصص الولادات خخخخخخخ

طبعا العوار زاد بس كاتمه الالم عن طريق التنفس شهيق زفير عميييييق .. اف عوار دوره مغص باسفل البطن شديييييد صج عوار عمري ماجربته يعني اقرب وصف له عوار دوره بس دبلاااااات الدبلااااااات

الساعه 10 ونص باليل
وجا الفرج وجا دكتور التخدير ومعاه ممرضته الخاصه ويقعدوني علي طرف السرير ويعطوني المخده المها وادنق وانا قاعده وانزل راسي عشان يتقوس ظهري ولاني قاريه واجد عن ابره ابظهر وشلون طريقتها فعارفه كل خطوه بسويها الدكتور عشان جذي ماخفت

ولما جتني طلقه قلتله في عوااار لحظه لان مايصير يشتغل لما يجيني عوار بعدين ما اكون ثابته وقت اللي بحط الابره ولما راح قلتله راح ويبخ مخدر موضعي ويشرحلي كل خطوه قبل مايسويها بس الله يهداه يوم غزني الابره ماقالي عشان استعد لاني مو قاعده اشوفه شنو بيسوي فنقزت نقزه من المفاجاة صج في عوار كاي عوار ابره بس فاجئني فقلتله بليز قبل اي خطوه قولي شنو بتسوي عشان اعرف

وقولي ابرة الظهر مرح تخليج تحسين بالتالي : الطلق والفحص الداخلي ولما الدكتور يخيطج اما وقت طلعة الراس مرح تحسين بالم بس راح تحسين بمثل شعور شي يضغط من تحت مو عوار



وبعد ربع ساعه تخدرت رجولي وراح عوار الطلق نهائي ويبين بجهاز التخطيط ان اكو طلقه قويه تجي بس ماحس فيها ماشاءالله صج حسيت براحه
وممرضة التخدير كل شوي تسالني اذا في عوار قولي
لان ابره الظهر جرعات ينتهي مفعول الجرعه ب ساعتين

وقعدت من ساعه 11 عالسرير وجدامي الساعه انام واقعد لي شوي

ساعه 1 وحسيت في عوار وسط مثل عوار يوم كنت 4 سانتي وقلت يجي عوار يجي ابيهم ينادون سستر التخدير قبل لا يروح المفعول كله واحس بالعوار الصجي وفحصتني 7 سانتي

وانطر وانطر ويجي ذاااك المغص القوووووووووووي افففق وينها السستر مالت التخدير نادووووها

عز الله كانت كل شوي تطل علي وتسالي يجي عوار ولالا خخخخخخ

الحمدلله جت وحطتلي بالدرب مالت ابره الظهر جرعه ودقيقتين وراح العوار نهااااائي وارتحت

ملاحظه: لاتنطرين تحسين بعوار قوي عشان يحطون لج جرعه ... اي عوار خفيييف اعرفي ان مفعول الجرعه بدا بخلص لازم تبلغينهم . هذي غلطتي قلت لا احسن انطر لما يزيد العوار ابلغهم


ساعه 3
فحصوني 8 سانتي وانا ماحس يالله لك الحمد والشكر

ساعه 4 الفجر جااااا دكتوري زكرياااااا يالله حيه وعليه لبس البيت و ماله خلق هههههه لبس دسوس وفحصني 9 سانتي

بدت الصجيه راح الدكتور برا

ساعه 5 الا ربع

دش الدكتور ولبس اللبس الخاص فحصني 10 سانتي

ورفعو رجوووولي ويقولي يالله شدي سوي بووش وانا ابي اشد بس مو حاسه بشي يعني منطقه مخدره يقولون شدي وانا احس جني اتنفس ماشد ويجووون ويضغطون علا بطني السسترات ثنتين بدينهم يضغطوني ويحاولون ينزلون البيبي ويقولون يلااااا سوي بوووش سيم سيم كاكا خخخخخخخ

فشله عند الدكتور بس خلصت بعد مفصخه من تحت
.واشد حيييييييل ابي احس اني اشد حسيت راسي عورني وعروق راسي بينت وانا احاول اسوي بوووووش وانا مو حاسه بالمنطقه التحتانيه ابووووووشش

جان يصرخ الدكتور وقفييييييي كفايه بين الراس يعني الحمدلله نفع البوش الي سويته

وبعدها حسيت بدوووووخه الظاهر قزوني ابره مخدر او شي جذي مادري صراحه بس شفت بنتي يوم يطلعها ويرفعو وونهاااا فووووق جدامي واحس جنه حلم جنه خيال ما كنت بمثل وعيي لما كنت اسوي بوش اكاد اجزم انهم اعطوني حقنه ما ههههههه


واسمع صراخ بنتي فجر اذني واااااا وااااااا واااااا واااااا وجسمها ابيض ويقطونها علي صدري فعلا فجرت اذني خخخخخخخ وانا بين الخيال والواقع اشوفها بعيوني وترفس وتتحرك والدنيا تدور فيني فديتهااااا الي ترفسني ابطني هذي هي جداااامي

يارب يرزق كل محروم بالذريه الصالحه


وقعد يخيطني الدكتور وانا اشوف بس احس بدوووووخه والغرفه مو ثابته كل شي يدور وحطولي كمام قالتلي السستر انه اكسجين عاد مادري هل هو الكمام اللي يخدر اللي يخلي الوحده تخربط ولالا بس ماخربطت انا

الساعه 6

خلص الدكتور الخياط وطلع هو والسسترات

وحسيت بعوار الخياط وتجيني نوبه بجي مو طبيعيه واقعد ابجي وابجي واشاهق جني بموت ودموعي اربع اربع من البجي مادري شفيني هل ابجي من العوار ولا من الصدمه ولا من الهبوط الحاد بالهرمونات بعد الولاده وتجي السستر ليش يبجي واقولها مافيني شي روحي

بعد ساعه كامله من البجي هجعت وتعوذت من ابليس وحمدت الله علي النعمه وعلي السلامه وقلت بنفسي عوار الخياط مرح يطول كلها جم يوم ويروح


ساعه 8 ودوني غرفتي

حجزت الجناح الملكي بدار الشفا

الخدمة ممتازه من سسترات واكل ونظافه وتعقيم وتنظيف شي يفتح النفس

وثاني يوم سويت استقبال

لله الحمد والشكر والمنه علي هبته اول العطايا


ادري طولت بالكتابه بس سهرانه حاليا وبنتي نايمه وماكو شغل هههههه


ادعولي بخدامه زينه اهي اهي

 

[لوولوو_88]

رد: تجمع مواليد أكتوبر 2014 بإذن الله

♡♡♡ لستة تجمع كروشات أكتوبر ♡♡♡


1- كلي هداوه .. 3/10 .. ( بنت )


2- TINA .. 5/10 .. ( بنت )
3- fg60 فوفو .. 5/10 ..


4- لوولوو_88 .. 7/10 .. ( ولد )
5- امورته .. 7/10 .. ( بنت )
6- حكاية قلب .. 7/10 .. ( بنت )


7- ككوته.. 9/10 .. ( بنت )
8- دلال الكويت .. 9/10 .. ( ولد )


9- HOPE91 .. 10/10 .. ( ولد )
10- سارونه .. 10/10 .. ( بنت )


11- اهذريبك .. 14/10 .. ( ولد )


12- باربي شمر 87 .. 20/10 .. ( ولد )


13- مهابه .. 21/10 .. ( بنت )
14- bulbul3001 .. 21/10 .. ( بنت )


15- أم نجلاء .. 22/10 .. ( بنت )


16- ^^ أم الزين ^^ .. 25/10 .. ( ولد )
17- ورده سورية .. 25/10 .. ( بنت )
18- سمراء كالخمري .. 25/10 .. ( ولد )
19- حمووشه المطيري .. 25/10 .. ( ولد )


20- بدون بس مغتربه .. 26/10 .. ( ولد )


21- الفوز حلو .. 28/10 .. ( ولد )
22- أم ناصر 2009 .. 28/10 .. ( بنت )


23- تولة مسك 030 .. 29/10 .. ( ولد )
24- BarBya .. 29/10 .. ( ولد )
25- انتيكا .. 29/10 ..


26- بطبعي رقيقة .. 30/10 .. ( ولد )


27- QA6RYA .. 31/10 .. ( ولد )



♡♡♡♡♡♡♡♡♡♡♡♡♡♡♡


ربي اتمم على الجميع انشاءالله

 

[لوولوو_88]

رد: تجمع مواليد أكتوبر 2014 بإذن الله

يا حلوج يا طموووحه ههههههه ضحكتيني ربي يسعدج .. مشاءالله ولادتج مشجعة و احلى شي التفاصيل عيشتيني معاج .. و الحمدلله على سلامتج و سلامة بنوتج ربي يجعلها من الذرية الصالحة .. و يرزقني نفس ولادتج بإذن الله ♡

 

[قلب زوجي وولدي]

رد: تجمع مواليد أكتوبر 2014 بإذن الله

أدعية تسهيل الولاده






(اللهم إني أسالك بأنك أنت الذي لا اله إلا أنت الأحد الصمد الذي لم يلد ولم يولد ولم يكن له


كفوا أحد أن تفرج عني ما بي يا فالق الأصباح يا مخرج الحي من الميت يا فالق


الحب والنوى يا من كسوت العظام لحماً وانشأته خلقا فتبارك الله أحسن الخالقين فرج عني


كربي وسهل لي أمري واجعله عبدا صالحاً يؤدى الأمانة واجعله عونا لها يارب العالمين وأعيذه


بك من الشيطان الرجيم – رب اجعله ذريه طيبه إنك سميع الدعاء).



(اللهم يامسهل الشديد ويا ملين الحديد ويا من منجز الوعيد يامن هو كل يوم في امر جديد اخرجني من حلق الضيق الى اوسع الطريق بك ادفع مالا اطيق ولا حول ولا قوة الا بالله)




(يا خالق النفس من النفس يا مخلص النفس من النفس يا مخرج النفس من النفس خلصني )


( لا اله إلا الله الحليم الكريم سبحان الله رب العرش العظيم والحمد لله رب العالمين)



قراءة سورة الفاتحة سبع مرات


وقراءة آية الكرسي ثلاث مرات


وقراءة سور الإخلاص ثلاث مرات


وقراءة سورة الفلق ثلاث مرات


وقراءة سورة الناس ثلاث مرات


وقراءة سورة مريم (للي حافظتها)

 

[Q6RYA]

رد: تجمع مواليد أكتوبر 2014 بإذن الله

صباح الخير بنات طموحه ذكرتيني بنفسي يوم بجري يبته اسبوعين قبل الموعد وعلى قولتج عالبجر الوحده فاضيه ماوراها شي ومترقبه وبس ناطره تولد

انا كنت في اجازه وهاليوم طلعت اتعشى مع زوجي كان خميس وهو طول الوقت نعسان ومو على بعضه حتى اقوله شفيك خربت الطلعه ههههههه كان وايد نعسان هاليوم وبس ردينا البيت اهو نام وانا ياني عوار الدوره الي يشد كانت الساعه 12 بس قلت اكيد عادي لان انا من دشيت التاسع اتيني امنان المهم بدلت ويت بنام احسن الالم خفيف بس مايخليني انام وبعدين لاحظت انه منتظم كل 10 دقايق او ربع ساعه جنه

وبس ماجاني نوم نزلت ودخلت المنتدى اسال البنات قالولي شكلج ولاده وكنت خايفه اقعد زوجي لان كسر خاططري كان تعبان ومابي اوديه المستشفى واخرع الناس بهالليل على ولا شي خصوص ان للحين باقي على موعد ولادتي المهم قلت باخذ شور واشرب شي افي قلت يمكن اقدر انام ليما لاحظت ان مو قادره اوقف في الشور كل ماياني العوار واظطر اقعد هني خفت وقعدت زوجي كانت الساعه اربع على طول قعد وقالي خلينا نروح المستشفى بس نتطمن عالافل المهم رحنا وقالتلي انتي مفتوحه 3 سانتي يعني اليوم وبكره ولاده عاد انا شنو استانست قالتلي ردي البيت وتعالي اذا نزل ماي او دم او صار العوار كل خمس دقايق (طبعا وقت الفحص انا بس جذي اصرخ من الخوف مادري اذا كان يعور او لا)

المهم ردينا واحنا رادين في السياره صار الالم كل خمس دقايق وانا اقول حق زوجي لا ليحين لازم ينزل دم او ماي او ماوصلت البيت حسيت اني مومتحمله الالم قالي خل نرجع احسن ردينا وهني اتصل في امي وقالها احنا الحين رايحين المستشفى وبس رحنا وكنت مفتوحه 5 سانتي هني كانت الساعه 5 تقريبا قالو حق امي الحين مافي غرف ولاده عندنا زحمه بنخليها في التخطيط طبعا تميت في التخطيط هدوني وراحو عني وانا تزيد على الطلوق واتالم شكثر صرخت لما اخر شي احس شي يدفع جان اناديهم يو الا قالولي انتي تسعه سانتي وللحين مافي غرف قالولي بنودلج بغرفه الطواري مو مشكله والاجان تفضى غرفه طبعا بين ال9 و10 هني طولت يمكن نص ساعه او اربعين دقيقه لاني بجر وهني الالم كان وايد قوي مايحتمل والطلوق ورا بعض لينما ولدت عال8 او 8 ونص الصبح يوم الجمعه ويبت ولدي حبيبي الحمدلله

امي كانت دايما تقولي انتي مابتكملين شهرج انا متاكده كانو معطيني تاريخ 19 كانت تقولي حدج لين عشره الشهر وصج ولدت تاريخ 5 الحمدلله على كل حال انشالله ماكون طولت عليكم بس هالمره احس بتم لين الموعد اذا ماطوفته واحس مو وايد مستعيله نفس ذيك المره لاهيه بولدي ونقله البيت بس ناويه اخذ مرضيه من عقب اجازه العيد مالي خلق دوام عالتاسع الله يعينا ويهون علينا جميعا

 

[الفوز حلو]

رد: تجمع مواليد أكتوبر 2014 بإذن الله

شلونكم بنااات
اليوم العصر رحتي مراجعتي الحمدلله كل شيء اوك ووزن البيبي زاد صار 2.100
بعد 10 ايام ادش ال9 شعوري غريب احس خوف ع وناسه ع مومستوعبه بصير ام وان ابطني نونو ههههههههه
طبعا للحين الكحه ماراحت بس خفت قالت لي انتبهي ممكن الكحه تسبب لج ولاده مبكره

 

[الفوز حلو]

رد: تجمع مواليد أكتوبر 2014 بإذن الله

طموووحه طول ماانا بالعياده اقرا قصتج وحدي متاثره وزوجي يضحك علي
قصتج مشجعه والحمدلله على سلامتج ومبرووك العروسه تتربى بعزج وعز ابوها
انا خوافه درجه اولى بستخير وشكلي ابر ظهر ماخذع ماخذه

 

[دلال الكويت q8]

رد: تجمع مواليد أكتوبر 2014 بإذن الله

بنان انا مافيني عوااااار كلش بالثامن كان فيني عوااار الحين خف حييل

شسالفه خايفه حدي

انا خلصت الاسبوع الاول من التاسع ولاطلق ولاشي اللهم ان كثرانه روحتي للحمام وصايره فيني حكه مو طبيعيه

 

[دلال الكويت q8]

رد: تجمع مواليد أكتوبر 2014 بإذن الله

بنان انا مافيني عوااااار كلش بالثامن كان فيني عوااار الحين خف حييل

شسالفه خايفه حدي

انا خلصت الاسبوع الاول من التاسع ولاطلق ولاشي اللهم ان كثرانه روحتي للحمام وصايره فيني حكه مو طبيعيه

 

[لوولوو_88]

رد: تجمع مواليد أكتوبر 2014 بإذن الله

انا نفس الحالة دلال بخلص الاسبوع الثاني من التاسع لا عوار دوره ولا عوار ظهر ولا شي .. ثقل بس عشان جذي شكلي مطووووووله والله أعلم .. لدرجة بأجر اول فحص لي و متهيأه اني مو فاتحة ولا ربع سانتي ..

جزاج الله خير قلب زوجي ..

 

[اهذريبك~]

رد: تجمع مواليد أكتوبر 2014 بإذن الله

مرحبا


اليوم كانت مراجعتي اول مراجعه بالاسبوع الاول من التاسع الرحم مصكر و حجم البيبي طبيعي

بس فيني التهابات و الدم ناااااااازل


شلون يفتح عنق الرحم

 

[بطبعي رقيقه]

رد: تجمع مواليد أكتوبر 2014 بإذن الله

الصراحه حدي اندمجت مع ولادتج :eh_s(9):الف مبرووك تتربى بعزج
بنات منو خايفه ووووبنفس الوقت متحمسة ؟ بقا لي 11 يوم وادش التاسع مالي خلق ريلي ولا بنتي ولا شي بس ابي انام

بس مادري ليش شعور الخوف مسيطر علي أكثر،، بولد بمستشفى الاحمدي ان شاء الله:yaaaaaarb:

 

[طهر.!]

رد: تجمع مواليد أكتوبر 2014 بإذن الله

نفس الحاله ثقل من غير لا عوار ولا شي ،شكلي بعوشر واظل بالتجمع بروحي :eh_s(16):

 

[بطبعي رقيقه]

رد: تجمع مواليد أكتوبر 2014 بإذن الله

لولو ممكن طلب؟ مثل ما ذكرتي لستة الحوامل حطي لستة اللي ولدوا وخلصوا:eh_s(17):

الافرازات حدها زايدة وما شاء الله احس نفسي حيل نشيطة مع انه نفسيتي ويع ومالي خلق احد
اليوم رحت السوق وخلصت جنطة البيبي وسكرتها وحطيتها بالصالة طبعا احس انجاز:eh_s(9):
الحين بقا لي لقنزات قطن حق النفاس رحت ريد تاغ مالقيت تهقون وين فيه؟

 

[حكآية قلب]

رد: تجمع مواليد أكتوبر 2014 بإذن الله

اااخ يا بنات


انا الثقل قاتلني قتل


عواار موطبيعي تحت ظهري يروح ويرد

و عند حدة البطن مكان جرح العملية و البنوته احس نازلة حيل

وكرشتي زوينه موكبيرة


اتعب حيل بالدوام بالقعدة اتعب بالمشي اتعب و بالنووووووم يمااااا اموت تعب

بنات انا بخلص الاسبوع الثاني من التاسع واحس اني بولد اخر الشهر

انا خايفه من 4 ايام الجاية لان الدكتور مسافر و اقول يارب اولد اخر تسعه ماني قااااادرة علي الحااااارق ذبحني اول مرة احس بحارق جذي بط راسي


حاليا اكلي بس عيش ابيض وروب بالغدا

والعشا روب و خيار

تعبت وهم حارج


انا فيني كسل موطبيعي و بالدوام عبالهم مو تعبانه
وقاعدة اخذ كل فتراتي وكلش مايريحون

مايشوفوني مداومة تعب بداوم الاسبوع الجاي بعد و خلاص اللي قبل العيد بغيبه كله بتعب و تعبت من نظرات الابلات احس يقولون شنوو هذي ماتتعب ?

 

[الطربوش]

رد: تجمع مواليد أكتوبر 2014 بإذن الله

بطبعي رقيقه
منو احسن دكتور في الاحمدي
وشلون خياطهم التجميلي بالنسبه لثالث بطن
وشلون رعايتهم
عندهم كمام نفس دار الشفاء او لا
انا مراجعتي كلها عندهم
بس ماجربت ك ولاده خايفه اولد عندهم
وشكراً

 

[الطربوش]

رد: تجمع مواليد أكتوبر 2014 بإذن الله

الله يسهل علينا ي بنات
انا حامل بعد في ولد
واخر يوم لي ١٠/٢٠