رد: تجمع مواليد مارس 2014 الله يتمم ويسهل يارب
السلام عليكم
الله يبارك فيكم وحده وحده بنات ما قصرتوا, و الفال لكم يا رب و تتسهلون مثل ما تسهلت.
قره ولادتي كانت يوم 26 يوم الأربعاء.
و مثل ما وعدتكم بكتب لكم كل شي صار معاي بالتفصيل :eh_s(7)::eh_s(7):
طبعا يوم الأثنين كان موعدي مع دكتوري و قال لي البيبي حجمه ممكن يوصل 4 كيلو إذا وصلت آخر التاسع, طبعا ضاق خلقي و قعدت أحاتي لأني بجريه.
طبعا آنا رجولي متنفخه من الخامس تقريبا, و من جم أسبوع سيقاني و فخوذي تنفخت, و قبل لا أولد بيومين أصابع إيديني تنفخت و خشمي تنفخ و قعدت أضحك و أقول حاسه إني مقربه مو باقيلي شي.
طبعا آنا ما كنت حاسه بأي آلام أو بوادر نهائيا, و ما أمشي و لا أشرب شي.
يوم الأربعا تقريبا من الساعه 6 الصبح و أنا نايمه أحس بعوار دوره خفييييف يروح و يرد, تجاهلته. بعدها قمت أحس جنه تنزل علي إفرازات, تجاهلتها. بعدين قمت بروح الحمام, و الا أحس نزل علي شي و طلع شوية ماي. رديت لبست و رحت قعدت زوجي كانت الساعه سبع و نص, قلت له قوم ودني المستشفى شكلي بولد.
اتصلت بخالتي و لبست و نزلت, أول ما ركبت السياره حسيت نزل علي شوية ماي, طلعت من العدان وصلنا دار الشفا توني بنزل رجلي من باب السياره والا أشر ماي شررر. زوجي نادى عامل بكرسي خذاني داخل للطوارئ.
الممرضه لما شافتنب قالت مادام نازل ماي يعني ولاده بس ننطر الدكتوره تفحص, فحصتني قالت 2 سم, ولاده.
طلعوني فوق غرفة ولادة خاصه دشت معاي خالتي دخلنا الساعه 9 إلا خمس تقريبا, فصخوني ملابسي الممرضات و حطولي حقنه شرجيه, طلعت اللي ببطني بعدين قعدت أنطر الطلق. طللقي كان عادي إلى خفيف بس يعني أحس فيه, بس كانوا يقولون لي مو طالع بالتخطيط, و عطوني كمام قالولي كل ما طلقتي استنشقي.
طبعا هذا تقريبا آخر شي أذكره بتمييز, الباجي كان مثل الحلم, أذكر الدكتور دخل علي يمكن الساعه 10 و قال مفتوحه 6 سانتي و آنا مو حاسه بالدنيا من الكمام, و كل ما تعورت خالتي تمسكه علي ليما أدوخ, و قعدت أقوم و أقعد و أحس أشياء تصير و مو مستوعبه, أحس بألم بس مو مستوعبته, و الحمدلله بفضل الله و منته الساعه 12 تقريبا كنت والده ولدي و خالصه. اللهم لك الحمد ارتحت ارتحت ما صدقت نفسي.
خيطني الدكتور و صعدوني غرفتي و أنا بعافيتي بس دايخه و متنحه شوي و زاروني أهلي كلهم و آنا حاسه و قاعده.
و رحت بعدين الحمام مع الممرضه قالت لي لازم تتبولين و الا نحط لج بربيش, ما قدرت أتبول و ضاق خلقي. بس آنا أصلا ما كنت شاربه شي.
بعدها شربت ماي شربت و رحت و الحمدلله تبولت و صار كله تمام.
الخياط كان خياط عادي طبعا الدكتور ولد الحلال ما غشني, آنا زوجي دق علي قبل العمليه قال لي يسئلون عشان الفاتوره تبين عادي و الا تجميلي خالتي قالت لي قولي تجميلي و قال لهم. و آنا دايخه بالعمليه أسمع الممرضه تقول حق خالتي ماله داعي تجميل و ألحين الدكتور يقول لج نفس الكلام, و الظاهر فعلا قال لها هالكلام و أنا مغمى علي.
الخياط عواره عادي بنات بس أحسه أكثر شي صوب الشرج مو المهبل, و عوار الورم الخفيف مو الشي اللي لا يطاق.
الممرضات يهبلون الله يجزاهم خير حيل زينين و الخدمه زينه و الأكل زين. و طهرت ولدي ثاني يوم بعد ما خذوا توقيعي و توقيع أبوه.
آنا خذيت أصغر غرفه عندهم, و الدكتور كان زكريا من عندهم, و حاسبونا 826 دينار من إلى. بعدها ردوا حق زوجي اليوم و احنا طالعين مادري جم, يمكن شي و ستين أو شي و سبعين.
و هاذي تجربتي بالتفصيل الممممل حق البجريات اللي مثلي
بس تبون الصج بنات, اليوم أول يوم أجي بيت أهلي, أول يوم من الأربعين يعني, و حاسه بغااامت الله لا يوريكم. حيل متضايقه. مو مستحمله أحد كلش :eh_s(2):
يمكن لأني أصلا ما أرتاح إلا ببيتي و بغرفتي و بحمامي. حتى الحمام مساع و آنا أتسبح لايعه جبدي منه, و كل شي لايعه جبدي منه, الود ودي أهد بيت أهلي و أشيل قشي و أروح بيتي :eh_s(2)::eh_s(2):
