★★★ حزب معلمات التعيين الجديد \\4\\: بـاي تـدريـس .. هـاي عطــلـة ★★★

[منال القلب]

★★★ حزب معلمات التعيين الجديد \\4\\: بـاي تـدريـس .. هـاي عطــلـة ★★★

بسم الله الرحمن الرحيم
اللهم صل على محمد وآل محمد
السلام عليكم ورحمة الله وبركاته

الأرشيف:
الحزب الأول: http://www.q8yat.com/t608588.html
الحزب الثاني: http://www.q8yat.com/t695649.html
الحزب الثالث: http://www.q8yat.com/t794013.html











حزب معلمات التعيين الجديد (4) يحمل شعار:

تصبري وتحملي كلها جم أسبوع وتفتكين:082502bye_prv:

يا حلاة الإجازة الصيفية:wqedqw:

ماكو تدريس وأهلا بالربادة والنوم والأكل والتسوق.. :rerrerek:








حزب معلمات التعيين الجديد (4) برعاية

بهذي الشعارات الثلاث افتتح الحزب اللي اتمنى يكون حزب مثمر وفيه نشاط، وأوعدكم إني بكون نشيطة، لان الأسابيع الأخيرة في الدوام تكون بعيدة عن التدريس اللهم مراقبة وتصحيح. وإذا في وحدة متضايقة تتكلم علشان نخفف عليها ونرتاح ونوسع صدورنا.. شوي الموضوع موضوعكم والمكان مكانكم
الحزب راح يكون مفتوح إلى نهاية العطلة الصيفية ان شالله..

:::شروط الحزب:::

1- جميع المعلمات مدعوات للمشاركة سواء الي صارلها سنة أو 10 سنوات أو 5 شهور أو شهر واحد

2- يسمح بكل من تريد أن تصبح معلمة تشارك ويانا حتى تستفيد

3- يمنع مشاركة الطالبات سواء في المرحلة المتوسطة والثانوية لأنه خاص بالمعلمات فقط


وألحين نبدا مع بعض ونقص الشريط الاحمر واعلن عن الافتتاح

كل عام وانتوا بخير معلمات، بمناسبة قرب انتهاء السنة

الدراسية 2010 -2011

يارب يكون نهاية الكورس الثاني خالية من المشاكل والمداحر والأعصاب والنميمة.. آمين آمين آمين


= [ وقربنا من انتهاء العــــــــــــــــام الدراسي للفصل الثاني 2010 - 2011 ]=

 

[منال القلب]

رد: ★★★ حزب معلمات التعيين الجديد \\4\\: بـاي تـدريـس .. هـاي عطــلـة ★★★

لكل وحدة تبي تصير معلمة بإذن الله وعندها استفسار

أمثال ( توتي فروتي + فطومة + سدن ) الي سألو جم سؤال بالحزب الثاني، فهذي اجاباتي:


هذا الي بكتبه لكم... تعبت فيه ترا >>> خلصي شتبين يعني؟ لووول ابي منكم دعوة حلوة مابي شي ثاني


اول شي الله يوفقكم في وظيفتكم وان شالله تتوظفون وتستلمون المعاش
ويتبارك بكل فلس تقطونه ويبعد عنكم العين والحسد..



بالنسبة حق اسئلتة فطومة راح اجاوب عليها لأن اعتقد اهي نفسها اسئلة توتي فروتي وسدن:



وين تروحين عشان تحددين المقابله لما تتخرجين من آداب اللغه العربيه و تصيرين معلمة ؟

أنا تخصصي عربي آداب وتخرجت من الجامعة شهر 1 سنة 2010 يعني قبل سنة تقريبا. فلما تخرجت قعدت 3 شهور ونص بطالية. لكن خلال هالـ 3 شهور نزل " إعلان " استثنائي بالجرايد وفيه ان طلبة الكليات + التربية الي حابين يكونون مدرسين يراجعون وزارة التربية حتى يستكلمون الاجراءات.. وانا رحت الوازرة وكان في بنات من طقتي واذا انتي خريجة الكورس الأول نفس حالتي ف المفروض هالفترة ينزلون اعلان استثنائي انهم بحاجة حق معلمين. واذا ما نزلوا لازم تقدمين على " ديوان الموظفين " لأن الي بتخرجون من أي كلية ثانية ومنهم الأداب ويبون يصيرون مدرسين لازم على الديوان اول. أما الي متخرجين من كلية التربية يروحون وزارة التربية دايركت. وحق الي من التربية لما تروح مبنى وزارة التربية تروح مبنى رقم 2 البوابة الي بالويه.









و شنو الاوراق اللي تاخذينها .. ؟


المطلوب: ودي وياج ملف وحطي فيه كل المطلوب علشان لي طلبوا شي يكون عندج وما تضظرين تصورين وتروحين البيت مرة ثانية:

8 صور شخصية مقاس 4*6

5 صور شهادة ميلاد

5 صور جواز السفر

5 صور للبطاقة المدنية

5 صور للجنسية

4 نسخ من شهادة الجامعة ( بالألوان ) ولازم النسخ الـ 4 تاخذينهم من الجامعة يعني مو تاخذين نسختج وتروحين مال التصوير وتصورينهم بالألوان لأن الشهادة فيها رموز يبين انها اصلية او لأ.. فعلشان جذي روحي الجامعة " الشويخ " عند العمادة وطلبي منهم 4 نسخ بالالوان لان فيه ابيض واسود والي بالالوان اعتقد سعر النسخة 3 وشوي عن شهادتج الأصلية. وطبعا راح يقولون لج تعالي بعد 3 ايام تستلمينهم وعلى فكرة عليهم فلوس بس ناسية بجم انتي ودي وياج 2- دينار لان هناك فيه طوابع بفلوس ف ودي وياج خردة 20 يعني كل ما يكون وياج دنانير بترتاحين اكثر لان كل شهادة فيها طابع خاص فيها.. وديري بالج ان النسخ تطول على ما تستلمينهم فحطي بحسابج تطلبينهم مبجر وافتكي حتى تاخذينهم مبجر..


ورقة تحويل راتب على البنك الي فيه معاشج ان شالله لما ينزل


+

راح يطلبون منج تحليل دم + بول + فحص سريري وهو عبارة يفحصون صدرج وبس + اشعة حق صدرج

وكل هالأمور تسوينها بالمستشفى التابع حق منطقتج، انا سويتها بالاميري لان بطاقتي ع العاصمة وفي ناس بطاقتهم على حولي

ف يسوون في مستشفى مبارك وهكذا... ونتايج البول واشعة الصدر تاخذينهم بعد يوم كامل يعني سويتيه اليوم تاخذينه باجر

أما تحليل الدم يطول 3 ايام.. وبعدين تاخذين نتايج كل هالحوسة وتودينه المجلس الطبي الي صاير صوب مستشفى الصباح وهناك تسوين الفحص السريري وتحليل الدم وتعطينها نتايج الفحوصات الي سويتها وتقولج تعالي بعد أسبوع استلمي النتيجة
وبس تستلمين النتايج تاخذينهم وتروحين على وزارة التربية وهناك عاد راح ينطرونج اسبوع وبعدها تاخذين مباشرة العمل
وتروحين على مدرستج......


واذا كانت مباشرة العمل مكتوبة على تاريخ معين لازم تروحين ع التاريخ مو تقولين لأ برتاح اليوم لأن تعبت من الروحة والردة!! لان فرضا لو كانت مباشرة العمل صارت يوم الخميس وتقولين لا خلاص بداوم الاحد بداية الاسبوع لان الخميس نهاية الاسبوع راح ينخصم من معاشج على هاليوم والمعاش تاخذينه بعد مرور شهر من وظيفتج.



و جم شخص يقابلج بالمقابله ؟


بالمقابلة: انا قابلتني وحدة بس فتحت جدامي القرآن وخلتني أقرا صفحة كاملة بعدين قالتلي على جم كلمة شنو اعرابها... واعربت 3 صح و 4 خطأ لول وبعدها قالت انا بحطج متوسط قلتلها أوكي. يعني بنفس الوقت اهي تحددلج اي مرحلة ف انتي قولي لها المرحلة الي تبينها واذا سألتج ليش انتي قنعيها وقولي انج حاسة انج راح تتمكنين ومن هالكلام..




و شنو الاسئله اللي بالمقابله ؟

المقابلة: شفوي ووضحته فوق. والتحريري يكون عبارة عن امتحان من 4 صفحات والاسئلة مالته حيل صعبة بس لا تحاتين ما ياخذون عليه درجات يعني بس جذي شكليات. اهم شي دشي عليهم بكل ثقة ولا تحاتين لانهم اساسا يبون مدرسات ومو مستعدين يخسرون مدرسات...




متى تطلع نتايج المقابله ؟

نتايج المقابلة تطلع بعد أسبوع كامل يعني ان سويتيه الأحد بيطلع الأحد الياي.


و متى تباشرين دوام ؟

لما تخلصين تحليل الدم وكل الأوراق راح تتوظفين بعد أسبوع كامل من خلاصج من كل الإجراءات. وهذا رقم وزارة التربية حق الاستفسارات: 24840678وزارة التربية

 

[منال القلب]

رد: ★★★ حزب معلمات التعيين الجديد \\4\\: بـاي تـدريـس .. هـاي عطــلـة ★★★



لكل الابلات ولي انا لازم اذكر نفسي بعد.. في أشياء ودي أقولكم عليها حتى لا تطيحون بالغلط، وخاصة الابلات مع وقف التنفيذ الي ما

باقي شي ويتوظفون ان شالله.. هذي جم معلومة مني لكم اكتسبتها خلال الــ 11 شهر من بداية ما توظفت شهر 4 سنة 2010 ولحد

يومكم هذا، وترا ها.. شوفوا ما صارلي سنة وشفت اشياء عن 10 سنوات جدام لووول. انا الحمدلله كنت عارفة شنو يصير بالمدارس ببركة

هالقسم الي كانوا يحطون شنو الي يضايقهم فعلشان جذي لما رحت مدرستي وعايشت الجو ما استغربت بالعكس اندمجت

ومسكت الامور صح.. والحين راح أقول الأشياء بنقاط علشان تكون كل نقطة واضحة:


1- لا تسوين صداقة أبدا ابدا ابدا بينج وبين أي معلمة داخل المدرسة، لا تخلين العلاقة تمتد خارج اسوار المدرسة. انا ما أقولج خلج صنم ولا تتكلمين وبوزج شبرين، لا بالعكس خلج نفس ما أنتي لكن فرقي بين الصداقة و ( الزمالة ) حلو يكون عندج زميلات المهنة، لكن لا تتعمقين وياهم وايد خاصة إذا كنتي معلمة. لان مجمتع المدرسة ماله أمان، لا تقولين هذي نفس طبعي وعلى قلب واحد وبينا توافق لا حبيبتي هالكلام مأخوذ خيره، يمكن بالوزارات الثانية اي لكن بالتربية لأ والف لأ.. مو يمكن لي صارت صديقتج الروح بالروح فجأة ما عجبها الوضع وتنتقل وتروح مدرسة ثانية وانتي تكونين معطتها اسرارج وكل شي وهي فجأة فجت عنج لانج مو بنفس المدرسة. ولا تقولين صداقتنا تكمل برا المدرسة، لا حبيبتي نادر جدا بهذي الحالات تكمل الصداقة. فعلشان جذي خلج بحدود الزمالة فقط. وان صادف لوحدة حالة وفاة او زواج او ولادة عادي توجبين وتقومين بالواجب.




2- اذا صار لأي مدرسة حالات وفاة او ولادة او مناسبة سعيدة أو حزينة تخصها، قومي بالواجب، شوفي اذا الابلات كلهم بيحطون مبلغ معين حطي وياهم، اما اذا شفتي لخطبة قولي انا راح أييب هدية بروحي .


3- من أول يوم كوني صريحة علشان بعدين لا تننحرجين. اتكلم عن ( الأكل ) إذا انتي مو من النوع الي يحب ياكل بالمدرسة قولي لهم عندي نظام خاص واكل بالبيت. او انج عندج اكل خاص تييبيينه وياج الداوم. كل قسم فيه ثلاجة + قطية كل اسبوع على وحدة وفي افسام يسوون كل يوم الريوق على وحدة يعني انتي وحظج قسمج شنو نظامه. انا قسمي كل وحدة تييب ريوقها من بيتها ومحد لها شغل بالثانية وجذي مرتاحين اما اذا صارت مناسبة سعيدة تقولنا الابلة صاحبة المناسبة ترا باجر ريوقكم علي لحد تييب وياها ريوق. فعلشان جذي شوفي انتي شنو نظامج بالريوق وقوليها بالفم المليان علشان بعدين لا تتوهقين



4- اذا عندج طالبات يولج القسم وخاصة اذا كانوا 4 أو 5 لا تخلينهم يوقفون على مكتبج، اخذيهم وطلعيهم برا وكلميهم عند باب القسم. لان راح تحسبلج سلبية من السلبيات وان القسم من داخل صار فوضة والسبب انتي ويمكن رئيسة القسم مو موجودة ووحدة من القسم تفتتن عليج. فعلشان جذي اخذيهم برا القسم يم الباب وخلصي وياهم الأمور ودخلي داخل. اما اذا كانت طالبة وحدة او 2 فعادي



5- الإدارة ( ناظرة - وكيلة - اخصائية ) خلج رسمية رسمية رسمية جدا جدا جدا... حتى لو كانوا عسل وياج هم خلج رسمية. لا تقطين ويهج عندهم وايد.. انا اسلم عليهم لما أدخل المدرسة ولما يصير الهدة ان شفت وحدة منهم اسلم عليهم مع اني ما أصادفهم وايد.. علاقتي فيهم حيل رسمية وخاصة الوكيلة.



6- علشان تسكرين حلوجهم وما يتكلمون عنج بشي سواء الادارة او المدرسات تعالي المدرسة مبجر. مافيها شي لي ضبطتي المنبه على ساعة محددة. بالأول والأخير هذا شغلج يعني انا صح ماكلة تبن حشاكم.. كل يوم مضبطة الساعة على 5:30 الفير لان مدرستي بالديرة وانا بمبارك الكبير فلما اطلع من البيت 6:15 ولما اوصل المدرسة الساعة 6:55 هههه حاسبتهم بعد... اروح مبجر اقعد بالقسم ماكو احد ، اعدل مكتبي، احضر، اسوي امور ماقدرت اسويها من زمان لحد ما يطق جرس الطابور



7- لازم تعرفين نظام قسمج شلون صاير. يعني مو تفلينها من أول يوم وتقولين واي شحلاتهم طيوبات واحلى قسم. خلج أول شهر تراقبين الوضع وتعرفين تصرفاتهم وعلى اساس هالمراقبة تعرفين تتصرفين مع قسمج. وخاصة رئيسة القسم وان شالله ماتكون نسرة كوني حذرة منها. انا رئيسة قسمي عادية بس مرات تعر لكن مع هذا اعاملها رسمي. يعني مرات اضحك وياها واسولف بس هم مو قاطة ويهي عندها وايد. وجذي احس احسن علشان تعرف اني عارفة حدودي.


8- أي كلمة سمعتيها من أي أبلة ثانية سواء داخل قسمج أو من قسم ثاني، لا تقولينه. حتى لو كان سوالف واشياء عادية. لأن ممكن ينقلب ضدج وتصيرين انتي صاحبة المشكلة الي تنقلين الكلام المو محترمة. اما بخصوص الشغل عادي نقلي كلام وجنه العيد. اما هذي قالت وهذيك سمعت ابدا ابدا لا تحطين هالاشياء براسج علشان لحد يمسك عليج شي..


9- لما يكون عندج حصة دايما تلفونج حطيته على السايلنت واخذيه وياج او حطيه داخل الدرج وقفلي عليه بالمفتاح واخذي مفتاحج.. والاشياء المهمة من اوراق واقلام حطيها بالدرج اذا ماتبين احد يستخدمها، وتأكدي من جنطتج وبوكج ترا عيال الحرام والسرقة ما تعرف مدرسة من شارع..


10- حاولي تكونين مرنة. ولا تخلين المدرسة همج الوحيد، طلعي من المدرسة وانتي خلاص ناسية كل شي صار فيها، لأ عندج حياة خارجها.. ولا تفكرين فيها الا باليوم الثاني لما تدخلينها. ترا هذي وظيفة لا راحت ولا ردت، ليش تحرقين أعصابج لان ناظرتكم ذيبة؟ ولا الوكيلة اخلاقها زفت؟ ليش تحرين نفسج وما تاكلين لانج تأخرتي شوي وعطوج افادة؟.. انتي مو ماخذة معاشج اخر الشهر؟ مو كويتية؟ شنو يعني راح يفنشونج ويقولون لج رجعي البيت ماكو معاش؟ او راح يخصمون من معاشج؟ يخسون.. معاشج غصب عنهم ماخذته كل اخر شهر.. اهم شي طالباتج فاهمين وانتي مو مقصرة وياهم وبس.. ما أخلي اي شي ينكد علي.. انا ما اقولكم اني مرات ما اتضايق بسبة امور بس صدقوني من اطلع من المدرسة خلاص انساها وبالطقاق والله، ليش اخرب صحتي علشان جم وحدة معوقة تفكير!! الزم ماعلي صحتي وراحتي والله باجر لي مرضت وطحت ومت ( اسم الله علي وعليكم ) منو بينفعني؟ محد وراح اروح من جيس اهلي واهما ولا هامهم يعني باختصار خلج ريّالة داخل المدرسة ولا يهزج ريح وخففي من الحساسية...


11- ان شالله ما تكونين كثيرة الغياب. وهالشي نابع للظروف انا الحمدلله ما أحب أغيب الا اذا صار ظرف حيل يخليني أغيب. استأذني لوقت الحاجة ولأن صج انتي بحاجة للاستئذان بسبب موعد طبيب أو امور ثانية او او او او..





في الختام هذي أهم الأمور الي حبيت اوضحها.. والي اكيد حاشتني وبعضها سلمت منها والبعض ماقدرت بس حرصت اني مااكررها مرة ثانية بالمستقبل.


الله يوفقكم ويسهل عليكم ويفتحها بويهم، ويبعد عنكم الضيقة والهم والغم بحق محمد وآل محمد، اول ما تحطون ريولكم بالمدرسة دخلوها باليمين تسبقها المعوذات وآية الكرسي وتوكلوا على الله..

 

[منال القلب]

رد: ★★★ حزب معلمات التعيين الجديد \\4\\: بـاي تـدريـس .. هـاي عطــلـة ★★★

صورة حصرية مني ل شهادة راتبي واللي توضح جم راح يكون راتب المعلمة الكويتية تعيين يديد وأبي أشوف وحدة بعدين تسأل وتقول جم وجم.. هذا الجدول فيه بالتفصيل جم لج وجم عليج وجم يقصون منج التأمينات أشوف بس وحدة تسأل يويلها >> لوول يعني معصبة هههههه

 

[منال القلب]

رد: ★★★ حزب معلمات التعيين الجديد \\4\\: بـاي تـدريـس .. هـاي عطــلـة ★★★

مرحبا فيكم بنات حياكم الله، الحزب 3 راح يتسكر قريب ف حياكم نكمل هني..

 

[أم هيثـم]

رد: ★★★ حزب معلمات التعيين الجديد \\4\\: بـاي تـدريـس .. هـاي عطــلـة ★★★



بنوتات ..

ابي اصير مدرسه اجتماعيات ، انا خريجة علوم اجتماعية / جغرافيا
و انطر الديوان و ان شاء الله اسمي ينزل الدفعه الجاية ..

المهم ، ابي ادرس ثانوي و هل ممكن ادرس جغرافيا من اول سنه
او لازم اخذ سنه اولى اجتماعيات ؟ ..
و تدريسه غثيث متطلب او حلو ..


و شكرا

 

[jen2n]

رد: ★★★ حزب معلمات التعيين الجديد \\4\\: بـاي تـدريـس .. هـاي عطــلـة ★★★

الله يعطيج الف عافيه منوووله جزاج الله خير وبارك الله فيج موفقه دنيا واخره يارب

ان شاء الله انضم لكم قريب

بس بغيت استفسر الحين طلع ترشيحي بالديوان

ورحت الوزاره وعطوني اوراق اعبي فيها بياناتي وخذو مني اوراق

وقالو لي بعد اسبوع راح نتصل فيج

فالاتصال على اساس المقابله والا على اساس اسوي فحوصات؟

والفحوصات قبل المقابله والا بعد؟

واذا جاوبت غلط على اسئله المقابله يقولون لي ان غلط والا يمشوني لووول

واذا غلطت يعني ساقطه والا شنو؟

عن نفسي ادري التحريري بأكوون ضامنه اني اعديه

بس المقابله حاسه اني بتوتر وبخاف لاني ما احب اغلط بالاجابه لووول ارتبك اكثر

وايد حنيت وقرقت بس شسوي مثل ما قلت ما عندنا احد من الاهل صار مدرس والا مدرسه :/

 

[منال القلب]

رد: ★★★ حزب معلمات التعيين الجديد \\4\\: بـاي تـدريـس .. هـاي عطــلـة ★★★

أم هيثم: حياج حبيبتي نورتي الحزب الرابع، عادي حبيبتي مو شرط تدرسين باول سنة اجتماعيات، لكن هم بعد على حسب النقص في مدرستج.. يعني انتي وحظج بس بصورة عامة عادي حبيبتي.. وان شالله معلمات الاجتماعيات الي قروا كلامج يساعدونج..

 

[منال القلب]

رد: ★★★ حزب معلمات التعيين الجديد \\4\\: بـاي تـدريـس .. هـاي عطــلـة ★★★

جنان: الله يعافيج حبيبتي. بالنسبة حق سؤالج. الفحوصات تسوينها بالاول وتخلصينها بعدين تبلشين بالمقابلة وبعد المقابلة يدزونج على المنطقة التعليمية الي انتي تابعة لها ويحددونلج وين تدرسين بأي مدرسة. ولا تحاتين حتى لو جاوبتي غلط ما راح يقولون لج غلط واهم يبون مدرسات وااااي ودي اقرصج بسبة هالخوف الي عندج.. خلاص حبيبتي موضي وطلعت وصار مكانها المليفي صدقيني كل شي صار سهل. وان ماصرتي مدرسة قولي منال ما قالت.. ان شالله راح تكونين احسن مدرسة وشيلي الرهبة والخوف ترا انتي مو داشة حرب المقابلة خرابيط بخرابيط.. مافي مثلي كانت خوافة واستحي من ظلي ولما دشيت المقابلة كانت عادية

 

[منال القلب]

رد: ★★★ حزب معلمات التعيين الجديد \\4\\: بـاي تـدريـس .. هـاي عطــلـة ★★★

صباح الخير
جمعة مباركة عليكم معلمات...
أكثروا من الصلاة على محمد وآل محمد
تتضاعف الحسنات لما نقولها 100 مرة يوم الجمعة..

 

[jen2n]

رد: ★★★ حزب معلمات التعيين الجديد \\4\\: بـاي تـدريـس .. هـاي عطــلـة ★★★

جنان: الله يعافيج حبيبتي. بالنسبة حق سؤالج. الفحوصات تسوينها بالاول وتخلصينها بعدين تبلشين بالمقابلة وبعد المقابلة يدزونج على المنطقة التعليمية الي انتي تابعة لها ويحددونلج وين تدرسين بأي مدرسة. ولا تحاتين حتى لو جاوبتي غلط ما راح يقولون لج غلط واهم يبون مدرسات وااااي ودي اقرصج بسبة هالخوف الي عندج.. خلاص حبيبتي موضي وطلعت وصار مكانها المليفي صدقيني كل شي صار سهل. وان ماصرتي مدرسة قولي منال ما قالت.. ان شالله راح تكونين احسن مدرسة وشيلي الرهبة والخوف ترا انتي مو داشة حرب المقابلة خرابيط بخرابيط.. مافي مثلي كانت خوافة واستحي من ظلي ولما دشيت المقابلة كانت عادية

اهااا حلوووو

لووول شسوي حدي حدي خوافه

ان شاء الله يارب

مو في وحده بعد خرعتني اكثر تقول اللي قابلتها اسألتها عن مناهج الفلسفه ثالثه ورابعه ثانوي

واغلب الاجابات ما اعرفت لها فقالت لي لازم تكونين دارسه منهج ثالثه ورابعه وانا ما عندي كتب اصلا!

وحتى اسئله تخصص المساند اسألوها عنها بعد

ان شاء الله يارب اعدي هالمقابله على خير

 

[jen2n]

رد: ★★★ حزب معلمات التعيين الجديد \\4\\: بـاي تـدريـس .. هـاي عطــلـة ★★★

صباح النووور

علينا وعليج يارب

لااله الا الله محمد رسول الله

 

[منال القلب]

رد: ★★★ حزب معلمات التعيين الجديد \\4\\: بـاي تـدريـس .. هـاي عطــلـة ★★★

جنان: ان شالله راح تعدينها، ذكرتيني بمقابلتي درست كتاب ثنوي العربي مال اولى + ثانية ولا ياني منهم شي.. ريحي بالج سهالات ان شالله..

 

[بطاطا]

رد: ★★★ حزب معلمات التعيين الجديد \\4\\: بـاي تـدريـس .. هـاي عطــلـة ★★★

صباح الخير و مبروك افتتاح الجزء الرابع يا ابلات ​

 

[بطاطا]

رد: ★★★ حزب معلمات التعيين الجديد \\4\\: بـاي تـدريـس .. هـاي عطــلـة ★★★

يعطيج العافية ما قصرتي و الله

و تسلمين على النصايح المهمة فعلاً ، و كل مدرسة خل تشوف الوضع بالقسم عندها و تحاول تأقلم نفسها عليه و تبين اللي تبيه و اللي ما تبيه من البداية و لا تجاملين على حساب نفسج


و أهم نصيحة / لا تنقلين حجي سمعي و سكتي لا تقولين سمعت و شفت و هذي قالت و هذي سوت , خلج كلا ما تدرين << راح يموتون عليج صدقيني :eh_s(15):​

 

[منال القلب]

رد: ★★★ حزب معلمات التعيين الجديد \\4\\: بـاي تـدريـس .. هـاي عطــلـة ★★★

بطاطا: صباح النور حبيبتي والله يبارك فيج نورتي، اي والله صح كلامج لما تدرين ان في مشاكل وانتي بعيد عنها وما تتدخلين فيها قسمج راح يحبج لأنج مو نقالة حجي وراح يموتون عليج.. والله يعافيج يارب

 

[غرور وايل]

رد: ★★★ حزب معلمات التعيين الجديد \\4\\: بـاي تـدريـس .. هـاي عطــلـة ★★★

مشششكَورهـ ي عممممري ..

جزآج آلله آلف خخخخير ..

 

[* فطامي *]

رد: ★★★ حزب معلمات التعيين الجديد \\4\\: بـاي تـدريـس .. هـاي عطــلـة ★★★

الف مبرووك التجمع اليديد

وان شاء الله نستفيد و نفيد بعض


منووول والله نبهتيني على شي كنت حاسه سويت مصيبه
الإبلات و رئيسة القسم بينهم مشاكل عاد كل ما قعدت عند وحده فيهم تكلمت عن الثانية المهم رئيسة القسم قالت لي لا تاخذين منهم شي لووول فانا رديت ان اللي يسووونه من تحضير و اشياء ثانيه مفيده وبالعكس وواايد زينه قالت كيفك بس ترى شغلهم مو كامل أنا حدي انصدمت المهم و
لا اقول حق ابله صج هل حجي ولا الأبله تقول حق القسم ولا يعصبون طاحت برأسي قالوا لي اي شي تقولج غلط وبطوا الاكوا و الماكوا من مشاكلهم

وانا حدي انصدمت ما ادري اصدق منو وانا من النوع اللي ما احب اطنش احد اول ابين أني مالي خلق له

عاد بكلامج هذا خلاص شكلي بصكر حلجي بس اعرف نفسي اذا احد بيسحب الحجي سهل عليه

 

[ليان]

رد: ★★★ حزب معلمات التعيين الجديد \\4\\: بـاي تـدريـس .. هـاي عطــلـة ★★★

الله يوفقكم​

 

[منال القلب]

رد: ★★★ حزب معلمات التعيين الجديد \\4\\: بـاي تـدريـس .. هـاي عطــلـة ★★★

ليان: ويوفق الجميع تسلمين على الأب عزيزتي

غرور وايل: العفو حبيبتي نورتي

فطامي: الله يبارك فيج فطوم، وان شالله تكونين من النشيطات. إي ديري بالج من هالأمور، صج صج انا بعد لازم أسكر حلجي لأن صارلي تقريبا موقف مشابه لموقفج بس الحمدلله قدرت استوعب اني راح أكون بورطة. صدقيني كل ما كنتي ساكتة راح يموتون فيج ويحبونج.. والله يسهل عليج أمورج..


---------


درة + كلي أمل + كويتية عسل + ديجتال + سددن + الجود + أثير88 + توتي فروتي + قطوة وجذابة + قائم آل محمد + يا مطولة صبري......... والباجي وينكم!!! الحزب الرابع ناطركم.. وصلنا الصفحة الثانية ولا بينتوا