رد: ^^••^^تجمع حوامل مواليد شهر **نوووفمبـ11ـر2013** ^^••^^
الحمدلله الذي بنعمته تتم الصالحات ..
الولاده بتاريخ ؛ 11/8
المستشفى : رويال حياة
الدكتوره : ماجده اليتامي
يوم الخميس 11/7 كان اخر يوم بشهري وبنفس اليوم كان موعدي مع الدكتوره ،، الفحص كان نتيجته 2 سم بس وسوتلي توسعه وعقب التخطيط ومافي اي بوادر او شي المهم قالتلي الدكتوره اشرب خروع مع عصير مانجا واذا ماولدت خلال هاليوم مراجعتي الاحد ولان وزن الياهل كبير ..
طلعت وشريتلي عصير ورديت البيت ارتاح من الساعه 3 انا بالبيت ومالي خلق اتحرك جسمي يعورني حنيت على ريلي ابي فرايديز بعدين رحنا ..
الساعه 9 كنا بفرايديز سبونز طلبت الي ابيه وقلتله اذا ماشبعت باخذ ربيان البيت ههههههه
المهم وصل الطلب ومع اول لقمه تيبست ورديت عادي ورد التيبس لمن قعدت احسب ولا العوار كل 5 دقايق .. ريلي عباله اتغشمر قالي اخلص الستيك ونطلع نطرته وقلتله لي البيت اذا ظل العوار كل 5 دقايق اخذ الاوراق من البيت ونروح المستشفى .. واحنا بالدرب شاف ان من صجي وعلى طول كمل طريجه وصلنا المستشفى وكانت الساعه 10 بليل وغرف الفحص كلها فل مافي مكان دخلوني غرفه ثانيه فحصتني ولا 3.5 تقريباً حطت التخطيط ولا الطلق وايد حامي موقادره اقعد براحه كل ماييني العوار اون واذكر الله لين دخلوني ولاده الساعه 10.30 تقريباً او 11 الا ربع ..
بدلت ملابسي وقعدت وريلي معاي شوي ولا اقوله لايعه جبدي مابي انام جان ارجع تكرمون الي بجبدي كله وقمت ارجف ..
شوي ولاعمتي داشه واهو راح اييب الاوراق والاغراض من البيت ..
ظليت عالطلق لين الساعه 1 الفير هني ماقدرت وخذيت ابره الظهر مع اني كنت وايد معارضه وماابيها بس صدري عورني من الكمام وقاعده ارجف عمتي دقت على ريلي وقالتله اذا عادي اخذها او لا وبس في دكتور المهم ان وافق بس حطولي اياها جان اطخ عياره مافيني شي وايد ارتحت خدرت ..
قعدت على هالحال لين الساعه 4 الا ربع الفير يت دكتورتي على اساس اني فتحت 7سم .. ولمن فحصت قالت الراس وايد عالي ننطر عليها .. وسكروا ابرة الظهر عشان اساعدهم ..
صارت الساعه تقريباً 5 الفير وفتحت 10 سم بديت احس بالعوار صج وكل طلقه احاول اسوي بوش كثر ماقدر ..
الي صار هني ان ضغطي يلعب صاعد ونازل ومع الطلق الياهل نبضه يقل ومايساعد نفسه
حشر راسه بالحوض وموراضي ينزل اكثر وخافوا ان الحبل السري يلف عليه وكل شوي يلفوني يمين ويسار يحاولون ان يلفون الياهل او يمكن يقلب بس مافاد
هني الدكتوره قالت راح احولها عمليه اهي والياهل تعبوا ماقدر انطر عليها اكثر .. لاني رجعت مره ثانيه وقعدت اصارخ عليهم ان صدري يعورني ماقدر تعبانه .. بعد استفسارات عمتي وان ماقدر طبيعي وليش الدكتوره شرحتلها الوضع ووافقت وكلمت ريلي ..
يه دكتور التخدير وعطاني جرعه الحياة الي طخيت وانسدحت بعدها .. وودوني غرفه العمليات ..
ظل ورا راسي يقولي بس راح تحسين بلمسات على بطنج خفيفه وغطوني بشراشف دافيه وبس احس احد يمسح على بطني .. ماطولوا الا والدكتوره تباركلي وتقولي تسمعين صووته قلتلها اي ووروني اياه حبيبي نتفه .. يه دكتور التخدير سالني بستيه قلتله لا جان يقولهم ييبوه مره ثانيه خل تبوسه شالوا الكمام من ويهي وبسته جان يسكت حياتي شعور يديد وغريب جنه مو حقي هالياهل هههههههه .. شفت الساعه ولا 6الا ربع الصبح ..
قعدت بالافاقه لين 8.30 عقب صعدت الغرف والحمدلله شفت البيبي عقب ..
جني طولت بالحجي بس هذا الي صار معاي من بدايه الطلق لين ولدت بالسلامه ..
والحمدلله على كل حال
