رد: (( همــــــــــــس السهـــــــــــــاري ))
مرحبا بك جديد و مرحبا بك قديم
مرحبا ياغزال كان واصبح ظبي
وين مارحت حبك وسط قلبي مقيم
يامعلم دموعي تستبيح هدبي
في مجيك حشيم وفي مراحك حشيم
وسع الله لمثلك بالغلا مذهبي
في مراحك تشتت حلم ذاك الحليم
و في مجيك تلاشت ثورتي وغضبي
غلطتي من فراقك غلطة ٍ من حكيم
وانتظاري رجوعك .. حكمة ٍ من غبي
وبعد فرقاك ياما دجت ليل ٍ بهيم
الوسادة غثيثة و المنام اجنبي
انت آية جمال من خبير عليم
كم سجدت و طلبته واستجاب طلبي
بعد عرفك تساووا في عيوني الحريم
انعم الغيد عندك .. تشبه اشرس صبي
والله اني ظلمتك لو وصفتك وسيم
وقتنا له مطالب وآخرتنا تبي
بك تحفظ غريب و بك ميانة لزيم
وانفتاح انجليز .. في ثياب عربي
فيك خبث الغرور و بك براءة غشيم
المعاني قبيلي و الجمال صلبي
وسط جسمك مجاعة يضطهدها النعيم
وفي عيونك امان يبتليه السبي
لك عيون نظرها فيه حدة غريم
بالمواقف شجاع و بالزمان يعبي
ما حصل منك .. حق عند عم ٍ لئيم
ان خذيته خسرته و ان سمحت يهبي
ان خذيته لئيم و ان خسرته جحيم
وجعة ٍ تنتقلها لحيتي و شنبي
لكن الحب شانه في حياتي عظيم
في رجوعك نسيت و طاح كل حطبي
الخطا دوم وارد .. والمسامح كريم
المشاعر تحبك وانت منت بنبي
مثل ما سخر الله البشر لليتيم
سخر الله لأجلك حنظلي و عنبي
في غيابك لو اني ياحبيبي سليم
ما نصيتك وانا اقعد مرة ٍ واحبي
في غيابك نديم و في حضورك نديم
اختصرت برجوعك جرهدي و تعبي
مرحبا بك تقدم لك من اقصى الصميم
احمد اللي طلبته و استجاب طلبي
المحبة تجدد لك مع انك قديم
رحت مني غزال و جابك الله ظبي
