~~ًَ~~ ياللي خذيت قلبي هاته قبل لا تروح ~~ًَ~~

[ام عبودي1]

وينج استبرق

ناطريييييييييينج ,,,,,,

 

[استبرق أم علاوي]

السلام عليك

أسعدني مروركم وتشجيعكم

نونو
تعبت وانا أقره اللي كاتبته
وحياج الله معانا

تابعوني
أحاول اليوم اكملها واذا ما قدرت ان شاء الله ان شاء الله باجر
أعذروني على التأخير ردينا حق الطباخ والتنظيف عقب العيد << ربة بيت

 

[♥ الــزيــن ♥]

ناطرينج حبيبتي

 

[استبرق أم علاوي]

الكويت - المطار - الساعه 9:30 الصبح

الموظف : هلا حسون تفضل

التفتنا انا وهند ورانا وشفنا شاب طويل تقريبا آخر العشرينات جسمه رياضي ولابس تريننغ وحاط جنطه سبورت على خصره
وسيم بس حواجبه مخليته كأنه عصبي

حسين : هلا ضاري - ممكن << يبي البنات يوخرون عن المكتب

الموظف : هذي البنت اللي كلمتك عنها عندها أوراقها وجوازها وكل شي ما عليك اله انك تكلم القايد عنها

حسين <<ما لتفت على ساره كلش : مسويه فيزا

الموظف : اي كل شي

حسين : والثانيه معاها

ساره << قبل لايتكلم الموظف: لا انا بروحي

حسين << ولاكأنها تكلمه : أهلها عندهم خبر

ساره : اي عندهم خبر

حسين : ضاري عطني كل الاوراق والجواز خل امشي الحين لا نتأخر

ساره : انا عندي كل شي تفضل

حسين<<بدون ما يحط عينه بعينها : والجناط؟

ساره : بس هاند باق الباجي عند أهل...

حسين<<يطالع الأوراق : وشلون بتروحين عند القروب؟

ساره <<تطالع الموضف : ما ادري

الموضف : حسين تعال شوي بكلمك

دخل هذا اللي اسمه حسين داخل مع الموظف يتكلمون
حركات حسين كلش ما عجبتني يعني ثقيل وما يطالع بنات
اشوف الموظف من بعيد يكلم حسين ومالقطت الا كلمت ( أمانه )
استغربت هل أمانه معناتها انه يترجاه
ولا انه انا امانه عنده
ولا شنو بالضبط
طلع حسين ومشى التفت على الموظف

الموظف : يلا روحي بسرعه معاه مقر القروب

ساره : اوكي . هند يلا معاي

هند : لا ساره انا اتأخرت يلا اسلم عليج اهني ودير بالج من هذا تره حركاته غريبه
لاتسولفين معاه ولا تسألينه وايد عشان ما تندقرين

ساره : هند انتي من صجج بتخليني بروحي معاه انا بروح معاج ونلحقه ما ابي اركب معاه السياره

هند : ساره ...

ساره : هند اتخليني وانا بأصعب موقف

الموظف : اختي تره حسين ما راح ينطر

بدون ما احس قضبت ايد هند ومشيت بسرعه بلحق عليه وهند تكلمني وانا حاقرتها

ساره : الحين وين القاه وين راح

هند : انتي بتورطيني مع أهلي . كاهو اهناك واقف واااي شكله معصب وخري وخري خل يزفج بروحج

ساره : هذا شفيه

هند : يمعوده سكتي عنه وطاوعيه تره اهوا اللي بيوصلج حق اهلج اتحملي

ساره : امري لله

حسين : منو اللي بتسافر ؟

ساره : انا

حسين : وليش يايين ثنتينكم ؟

ساره : بروح بسيارتها وراك

مشى قبالنه واحنا وراه محترين من تصرفاته
هند تتكلم شوي شوي عشان ما يسمع

هند : واي الله يعينج انا بيي معاج مو عشان شي - بس عشان لا يذبحج بوسط الطريج ههههه

ساره : ههههه - شفيه جذي نفسيه قطيعه اللي يقول ميتين عليه

حسين بس التفت علينه اخترعنا وقمنا انطالع يمين ويسار من الخرعه
رد طالع جدام قمنا نضحك على نفسنا
طلعنا من المطار

حسين : وين صافطين سيارتكم

هند : بالمسافط بالطابق الثاني

حسين : ركبو سيارتي خل اقطكم على سيارتكم ونمشي

هند / ساره : ان شاء الله

ركبنه سيارته صرت انا قبال منظرته من اول ما طاحت عيني بعينه قمت ارجف ومسكت ايد هند حيل هند اتأشرلي تبي تعرف شالسافه -أشرتلها على المنظره قامت تضحك

حسين : وين ؟

ساره << مخترعه : ها

حسين< بحده : السياره وين - وين صافطينها

هند : هذي الالتيما الحمرا اللي على يمينك

وقف حسين يم السياره نزلنا من السياره بسرعه وركبنا سيارتنا من
اول ما دخلنا السياره بطيناها ضحك

ساره : وااااي يمه رعب رعب ههههههههههه

هند : انتي شفيج خايفه جذي قمتي ادزيني واحنا ننزل من السياره

ساره : خفت تنزلين قبلي واظل بروحي وايطقني ههههههه

هند : هههههههههههههههه خزته بس تذبح


واحنا قاعدين نضحك سمعنه صوت هرن نقزنا بمكانه
شقلت هند السياره واحنا ميتين من الضحك
لحقنا سيارته وطول الطريج ضحك ونتطنز عليه وعلى تصرفاته
وقاعده أشوف عينه بمنظرته انه قاعد يراقبنه اذا احنا وراه ولا لأ
وكان ماسك الموبايل يتكلم
وصلنا المقر ولا انشوف باص كبيييييير من طابقين ويمه وداخله ناس وايد حريم وريايل ويهال


هند : ما شاء الله القروب وايد كبير - ان شاء الله في مكان حقج

ساره : شدعوه الباص شكبره اكيد فيه مكان - ننزل ؟

هند : اي لازم نروح حق القايد ونقوله

ساره : تتوقعين حسين ماقاله

هند : اممممم والله ما ادري

ساره : بدام يابنه لي هنيه اكيد قاله

شفنا حسين نزل من السياره وراح صوب واحد تقريبا بالثلاثينات يكلمه ويأشر صوبنا
بعدين أشر بإيده أنه تعالي

هند : طلع اسمج - إعدام

ساره : شكله هذا القايد نزلي معاي

هند : حبيبتي لي هني وخلاص لازم ارجع والله تأخرت وايد

ساره : شنوووووو نطري تطمني علي راح ياخذوني معاهم ولا لأ

هند : عشر دقايق ولا زم اروح

شفنا حسين ياي صوبنا معصب خفنا ونزلنا بسرعه


حسين : ليش اناديكم ما تنزلون ؟

ساره << مرتبكه : ان شاء الله

حسين : نعم ؟

هند : كنا ننزل الأغراض

حسين : وين الأغراض؟

راحت هند السياره بسرعه تنزل جنطتي
وانا بضحك بس قاضبه ضحكتي قصب


حسين < بعصبيه : تتمسخرون علي ؟

ساره : لا محشوم - بس تدري انا بروحي وما اكو احد معاي ف

مشى حسين وهوا ماخذ هاند باقي بيحطها بالباص وانا ما خلصت كلامي عصبت من تصرفاته حسسني انا احنا يهال
واحنا وايد معطينه ويه فقررت اني اغير تصرفاتي معاه

هند : بسم الله شفيج الشرار يطلع من عينج

ساره : انا اعلمه امشي

رحنا صوب القايد وكان ويها بشوش ومريح

ساره << مبتسمه : السلام عليكم

يوسف : عليكم السلام يااااا

ساره : ساره

يوسف : والنعم معاج يوسف قايدكم

ساره : ينعم بحالك تشرفت بمعرفتك

يوسف : تسلمين - الأخ حسين قالي عنج - وانتي بتظلين معانا لي نوصل مدينة جلاسكو وعقبها اذا في واحد من أهل يستلمج من هناك.

ساره : ان شاء الله انا أعطيهم خبر

حسين : أهلج بأي مدينه ؟

ساره < توجه الكلام حق القايد : العاصمه ادنبرا جم تبعد عن مدينة جلاسكو

حسين << يتحداها : ادنبره وايد بعيده

يوسف : يبيلها طياره

ساره : يعني لازم على طول احجز من اوصل جلاسكو

حسين : انتي شرايج <<طالعها من فوق لي تحت ومشى

احرجني قبال القايد فقررت اني انتقم

يوسف : احنا لازم بعد نص ساعه نمشي اوكي جهزي حالج

ساره : اوكي - مشكور والله يعطيك العافيه

يوسف : ولو نحنا شو عملنا ههههه

ابتسمتله ومشيت رحت حق هند

ساره : هند انا وايد يو عانه مو ماكله شي من الصبح

هند : تعالي خل نروح ماكدونالدز ناكلنا شي وارجع وانا امشي

ساره : اوكي تره بس عندنا نص ساعه

هند : اوكي

ركبنا السياره وشفت حسين من بعيد قاعد يتكلم بالتيلفون وواقف يم مجموعة حريم وريايل مبين من أهله
قلت بنفسي : اعرف شلون انتقم منك
رحنا ماكدونالدز وكان زحمه طلبنه وقعدنا ناكل صارت 11 الا 10
قلت حق هند لازم نرجع الحين

هند : ساره اخذي معاج أكل تره الطريج 12 ساعه تقريبا - راح تيوعين

ساره : اوكي

وصلتني هند لي الباص ولا نصهم راكبين الباص مو باقي الا الر يايل قاعدين يحطون باجي الجناط
وحسين سلم على أهله وصعد يعني بروحه بيسافر بدون أهله
نزلت من السياره وسلمت على هند وحظنتها حييييل

ساره : هند راح اشتاقلج ادعيلي اوصل بالسلامه

هند << صوتها مبحوح : ساره بليز دير بالج على نفسج

ساره : هند لا تبجين والله الحين ابجي << دمعت عينها

هند : ساره دزيلي مسجات طمنيني

ساره : اوكي- حبيبتي سلميلي عليهم كلهم

هند : اوكي

رحت عند القايد

يوسف : فضينه لج مكان تفضلي

صعدت الباص ولا انا مكاني بالطابق الثاني يم خدامه كانو حاطين يمها ياهل - شالو الياهل حطوه بحظن الخدامه
وانا قعدت مكانه وحسين كان مكانه تحت
وحرك الباص
.
.
.
يتبع

 

[استبرق أم علاوي]

قولولي شرايكم بهل جزء
وابي اعرف انتقاداتكم عن القصه
ككل قبل لا اكملها

 

[ام عبودي1]

ما شالله تشوق القصه ...

ياليت تكملين ...

 

[B!g Sm!le]

وااااااااااايد حلو البارت

يعطيج العافيه
وبلييييييز لا تطولين علينا

 

[][ كويتية ][]

لووووووووووول هالحسين يصرقع
كملي البارتات روووعه
(شكله راح تصير علاقة حب بين سارة و حسين)

 

[استبرق أم علاوي]

ادنبره - غرفة حمد - الساعه 11 الظهر

حمد : نعم تفضلي ؟

رغد : حمد انت مع منو اكثر أحمد ولا محمد عيال عمك

حمد << مستغرب : ليش ؟

رغد : انت جاوب على سؤالي بالاول

حمد : أحمد . ليش؟

رغد : ومنو عصبي أكثر

حمد : ليييييش ؟

رغد : شنو ليش ليش ليش انت جاوب يايتك السالفه بالطريج

حمد : اففففف أحمد

رغد : اوكي شرايك نطلع نتمشى

حمد : انتي شفيج شكو هذا بهذا ؟ شسالفة أحمد ومحمد ؟

رغد : أممممم ولا شي بس اللي خاطبها أحمد رفيجتي وكانت قاعد تسألني

حمد : يعني الحين بتقنعيني انه هذي سالفتج

رغد : حمد خلاص انت شكلك قاعد تتهرب ماتبي تطلعني

حمد : انا اللي اتهرب ولا انتي

رغد : حمد بتطلعني ولا لأ؟

حمد : اطلعج بس مو الحين اول بطلع مع الشباب

رغد : ماابي مابي مابي شنو كله الشباب انا اوله

حمد : حبيبتس خلاص انا واعدتهم

رغد : خلاص روح انا زعلت

حمد : اه وانا اقدر على زعلج - قومي لبسي

رغد << مستانسه : بعد عمرييييييي اموووواه << قامت تحضنه



روان وفاطمه وفجر وألماس نزلو اللوبي

روان : فطوم بقولج شي
فاطمه : قولي !

روان : الصراحه الصراحه اللي في بالج صح

فاطمه : اللي في بالي اللي في بالي ؟؟!!

روان : ههههه اي اللي في بالج اللي في بالج

فاطمه : انتي ومحمد ؟

روان : اي

فاطمه : اصلن الشي واضح تدرين ليش

روان : ليش ؟!

فاطمه : لانج وايد قاطه نفسج عليه

روان : انا ؟؟؟؟؟؟ حرام عليج والله اني اسوي روحي ثقيله اقباله

فاطمه : شنو ثقيله كله لاحقته وين مايروح وتتبوسمينله

روان : عيل شلون تبينه يحس اني حابته ؟

فاطمه : حبيبتي محمد ثقيل مو سهل

عبد الهادي : روان

روان << تلتفت : نعم يبا

عبد الهادي : انا بروح شوي مع عيال عمج نتمشى
خليج مع البنات ولا تروحين مني ومني اوكي

روان : ان شاء الله يبا - منو بيروح معاكم

عبد الهادي : انا وحمد وأحمد ونواف وفيصل - اخذي هل فلوس مصروفج ولا تفسفسينهم

روان : بس

عبد الهادي : ليش مايكفيج

روان : لا قصدي بس انتو اللي بتروحون

عبد الهادي : اي بس

مشى عبد الهادي بيروح يلحق الشباب
روان تسأل فاطمه مستغربه

روان : عيل محمد وينه

فاطمه : ما ادري

فجر : انتو شفيكم حاطين راسكم براس بعض وتسولون شدعوه عطونا ويهه

روان : هههههه شدعوه احنا معاكم قالبا وقالبا

فاطمه تبون تشربون شي

فجر : يالله يبي شي

قامت فاطمه راحت داخل السوبر مارك اللي بالفندق وكان صغير
شافت محمد هناك - محمد حب انه يختبرها ويعرف سر الابتسامه
اللي ابتسمتله يم الغرفه

محمد : فاطمه شتسوين هني ؟

فاطمه << نصدمت : البنات يبون عصير

محمد : منو أي بنات

فاطمه : خواتك وروان

فاطمه وهيا تتكلم خذتلها عصيرات وراحت عند الكونتر بتدفع

محمد : لا لا خلي على حسابي

فاطمه << منحرجه وصارت خدودها حمره : لا عادي عندي فلوس

محمد << طلع الفلوس : ميخالف دخلي فلوسج مايصير انا موجود وانتي تدفعين

فاطمه << وهيا ماشسيه : مشكور


محمد عجباه خجل فاطمه وتواضعها وانه ماتحط عينها بعينه وهوه يكلمها
واستغرب انه ما ابتسمتله ولا كلمته وهوه كان فاهم انه يمكن معجبه فيه

فاطمه راحت بسرعه حق روان

فاطمه : روان لحقي قولي منو شفت

فجر \ روان : منو

فاطمه : محمد

روان خزت فاطمه - ماتبي فجر تعرف انها معجبه بمحمد

روان : اي ويعني

فاطمه << فهمت : لا بس اهوه اللي دفع فلوس العصير

ألماس : اي عادي محمد كله جذي

روان : جان شريتي شي ناكله بعد

فاطمه << فهمت : روحي انتي شتري بس - مطراش انا عندكم

قامت روان ودخلت السوبر ماركت بس ماشافت محمد وردت طلعت
راحت حق البنات

فجر : ها ما شريتي شي - ولا محمد مو هناك

كلهم : هههههههههههههههه

روان<<مرتبكه : تره بايخه - انا راده اسألكم شنو تبون

فجر : هههههههههه وليش ما سألتينه مساعه ولا من اللي ماخذ عقلج ههههههههه

روان : اوووو ما راح اشتريلج شي انزين - فاطمه ألماس شنو تبون

كلهم : ههههههههههههههههه

روان : ماشي ضحكو ضحكو

راحت روان السوبر ماركت شرت شبس بس حقها وردت حق البنات
قامت تاكل بروحها وهما يضحكون


منال طالعه من غرفتها مع عبدالله وعيالها بيروحون يتغدون بالمطعم وشافت أزهار بالممر

أزها : منال ماشفتي البنات

منال : لأ يمكن تحت باللوبي او بغرفتهم

أزهار : لا مو بالغرفه خل انزل اشوفهم انتو بتنزلون ؟

منال : احنا بنروح مطعم

نزلو كلهم وشافت ازهار البنات وراحتلهم وتهاوشت معاهم انه خلوها بروحها

روان : طقينا بعد طقينها - انتي بطيئه

أزهار : انا أعلمكم

فجر : وشكو نازله مع منال وعبدالله كنتي معاهم؟

أزهار : لأ شفتهم بالطريج وسألأتهم عنكم وقالتلي منال انه بيروحون المطعم

فجر : صج _ اشرايكم

كلهم : شنو ؟

فجر : لحظه

راحت فجر تركض حق منال وقالتلها انه بيروحون المطعم معاهم يتغدون ومنال رضت
راحت فجر قالت حق البنات وراحت فاطمه تقول حق أهلهم عشان يصير عندهم خبر
وصعدت بالاصنصير طابق غلط وشافت قبالها اجنبي طالع من غرفته قاعد يطالعها من فوق لي تحت
وفاطمه جسمها وايد حلو ومغري
قرب منها وقالها
.
.
.

يتبع

 

[miss-fofo]

شنو شنو قالها



لا مو جذي يعلقون الواحد

 

[ام عبودي1]

شصار بعدين .................

لاتاخرين علينا ............. هههههههههه

 

[♥ الــزيــن ♥]

ناطرينج حبوبه

 

[B!g Sm!le]

لا ما يصير جذي

شنو قالها؟
نزلي البارت بسرعه بليييييييييز ههههههههههه

 

[استبرق أم علاوي]

الكويت - طريج السفر - الباص - الساعه 11

كنت قاعده بالباص طول الطريج والياهل اللي يمي يروح حق امه ويرجع ويحن
ويبجي - اتأذيت منه وايد -- ودزيت مسج حق محمد وابوي نفس المسج
" انا الحين بالطياره يمكن اتدقون وتشوفونه مغلق تره ماكو سيرفس "-- وعقبها سكرت الموبايل
وكل بين فتره وفتره القايد يسألني اذا ابي شي او محتاجه شي - بس انا استحي اقوله انه
المكان مضايقني - لانه زين انه لقالي مكان
وقفنا عند استراحه بحدود السعوديه - نزلت عشان اشتريلي شي آكله بالطريج - دخلت وشفت بنتين تقريبا من عمري
واقفين يضحكون ويسولفون ابتسمتلهم وردولي الابتسامه سمعتهم يقولون

؟ : ايمانو جسمه يشوق واااي

ايمان : طاع هذي حطت عينها عليه انا اللي صدته بالاول

؟ : شوفي خل انمر قباله واللي يطالعها او تحس انه يبيها راح يكون من نصيبها ههههه

ايمان : لا لا ابتسام الصراحه انتي جريئه

ابتسام : انتي شفيج ماراح نسوي شي بس نشوف شنو يسوي نمر وحنا ساكتين

قلت بنفسي الحمدلله والشكر بنات مو محترمين - وكان عندي فضول اشوف منو الشخص اللي يتكلمون عنه
مشيت وراهم اسوي روحي اشتري - شفت حسين واقف يشيل كوارتين ماي عشان بيحطهم بالباص -مرو البنات قباله
عرفت انه عنه - مالتفت عليهم راحت ابتسام الزقت فيه وحاشها وهوا يشيل الكرتون

ابتسام<< بدلع : آآآآآآي عورتي

حسين : << مايدري شالسالفه : اسف ماشفتج

ابتسام << ابتسمتله : No problem حصل خير

مشت ابتسام وراحت حق ايمان

ايمان : انتي حقيره احنا ماتفقنا على جذي

ابتسام : انتي خبله انتي شفتي انه ما عطانه ويه لازم نتحرك ونسوي شي ثاني
انا شسويلج اذا انتي ما تزحزحتي من مكانج وسويتي شي

ايمان : جب جب انا اعلمج

حسيت انهم بنات قليلات الادب وحتن اسلوبهم وصخ - بس بنفس الوقت ابي اعرف كل شي راح يسونه
شريت صمون وشبس وعصيرات واهم شي علوج - وانا طالعه من المحل كان حسين تو داخل مستعيل
بيشيل باجي الكراتين طاحت عيني بعينه حسيت اني ارتبكت وخصوصا لمن شاف جيسي انحرجت حسيت
اني شاريه اغراض وايد -- وخر عن الباب عشان اطوف وانا بعد وقفت عشان يطوف -- ردينا مشينا مع بعض ووقفنا
وقف واشرلي بأيدا انه طلعي -- طلعت وانا فيني ضحكه -- صعدت الباص وشفت مره كبيره بآخر الثلاثينات تقريبا مع بناتها صغار بالكرسي اللي قبالي

الحرمه : السلام عليكم

ساره : وعليكم السلام

الحرمه : انتي بروحج صح ؟

ساره : اي صح

الحرمه : حبيبتي اذا بقيتي شي او نقصاج شي لا تترددين تعاليلي انا اساعدج اعتبريني مثل اخت الكبيره
معاج ام بدر

ساره : مشكوره وماتقصرين انا ساره

ام بدر : عاشت الاسامي

ساره : عاشت دنياج

قعدنا نسولف انا وام بدر وقتلها قصتي وشلون طارة الطياره - مشى الباص وانا قضيته كله سوالف معاها--
الحمام (تكرمون) كان فوق في طابقنا وانا كنت قاعده يم السلم والناس صاعده نازله ازعجووني - والبنات الثنتين ابتسام وايمان طلعو قاعدين بالكراسي اللي وراي طبعا قرقه وضحك وسوالفهم كله عن شباب والمغازل
انا وام بدر دخلنا بسوالف وايد وكل واحد قاعد يتكلم عن نفسه قامت اتسولفلي عن قصتها اهيا وريلها انه انفصلت عنه -- وانا كنت مندمجه معاها --
بنفس الوقت صعد حسين بيدخل الحمام ( تكرمون ) كان منزل راسه عقب ما دخل سمعت البنات اللي وراي يضحكون

ابتسام : والله اطيحه اطيحه ما اخليه

ايمان : انتي هبله الريال حتن ما شافج ولا يدري عنج

ابتسام : انتي شكو حدج محتره

قامت ايمان وقفت وهيا كانت جهة الدريشه المحت حسيت توه طالع من الحمام بس ابتسام ما شافته ولا تدري ايمان ليش وقفت
طلعت ايمان من مكانها وصارت قبال حسين والممر ضيج -- اضطر حسين انه يرجع عشان ايمان تمشي وكان منزل راسه -- حسيت ابتسام احترررررت -- دخلت ايمان الحمام وحسين نزل -- ثانيتيين وايمان طلعت وقعدت مكانها

ايمان : هاشرايج ؟

ابتسام : خبله امبيييي اي شي يعني الحين يكون مسويه حركه

ايمان : ليش انتي شفتي عيونه شلون قام يتفحصني وده ياكلني فيهم

ابتسام : هههههههههههههه مصدقه عمرج ههههههههههههههه اي شييييييييييييي مسخره والله

ايمان : جب حدج محتره


كنت اسولف مع ام بدر بس بالي معاهم -- حسين ما دره عنهم وكل وحده تقول طالعني انا --
حسيت انه قاعدين يمسخرون نفسهم وهما مايدرون عبالهم شي حلو اللي يسونه او وناسه

صعد القايد وكنت طبعا انا بويها لاني قبال السلم

يوسف : ها سارونه محتاجه شي

ساره : لامشكور ما تقصر

مشى القايد وقف جدام -- وانا اقول بنفسي هذا وايد مطيح الميانه -- وصعد وراه ثنين شباب مع حسين ماسكين قواطي وعصاير -- ووزعوهم من جدام لي وره -- وكان هذا الغدا - كلنا خذينا الغدا واحنا ساكتين الا ايمان وابتسام

ابتسام : مشكور

حسين مارد عليها

ايمان : شنو في القوطي ؟

حسين<<وهوا ماشي : بطلي وتشوفين

احترو البنات من اسلوبه وكل وحده قامت تتحلف فيه وانا قمت اضحك عليهم من داخلي -- اتغدينا وعقبها نمت شوي -- بس نايمه وانا مو مرتاحه من ازعاج الياهل اللي يمي - والصاعدين والنازلين سمعت صوت واحد معصب وصوت كان عالي
بطلت عيني وكان حسين واقف يم الكرسي اللي انا قاعده عليه ومجابل البنات ويكلمهم وهوا معصب

.
.
.
يتبع

 

[ام عبودي1]

يعجيج العافيه .... ماقصرتي ..

وناطرينج يالغاليه ...

 

[Zoz.Q8]

بليييييييييييز كمليييييييييييييييييييييييييي كملييييييييييييييييييييييييييي

 

[استبرق أم علاوي]

مشكوريين على التشجيع

انتظرونيييييييييييي مع البارت القادم

 

[غمـــ ^^ ـــازه]

وييييييييييينج نااااااااطرييييييييييينج

القصه اتينن موطبيعيه

 

[رفيف الورد]

تسلمين حبيبتي عالقصه حيييل روعه وربي يخلي لج ما بين عينج وقلبج ويحقق لج كل اللي يتمناه قلبج عاجلا غير آجلا آمين يا رب العالمين يا حبيبتي

 

[ام عبودي1]

عسى ماشر استبرق موقوفه ........

طمنونا عليها ....