يبا شلونك(قصيده مهداه للوالدها متوفى )

[حلوه ومزيونه]

يبـه شلـونك

يبه شلونك...ملل هالــكــون من دونك ..

يبه شلونك ؟؟وتمضي رحلة الدنيا..

بليا طلة عيونك..؟؟!!

يبه شلونك ؟؟وشلون المرض وياك ؟؟

بعد ماهدك بدنياك..عساها تغمض جفونك ؟؟

تبي تدري عن احبابك ؟؟عن عيون تغنا بك ؟؟عن قلوب دفنها الشوق..واذا جاها الغفا جابك ؟؟

.. يبه امي تخيلك دوم...تغني لك مع القمرا..

يبه واللي خذاك بيوم....خذا بنيتك بكرا..

خذا.. وياماخذا.. وياما..خذا ناس يحبونك

يبه حنا صرنا كبار..توفقنا وتخرجنا..

يبه ماعاد فيه صغار..يموج بهالزمن كل شي..

وحنا ماتموجنا..على ذاك العهد نسري..

نبيع العمر والدنيا..ولا تخلف بنا ظنونك

يبه شلونك ؟؟تبي تدري عن اخباري ؟؟

عن افكاري وتذكاري ؟؟


اشيلك داخلي جمره ..وبعيون الحزن عبره..تغرقني .. وتحرقني..

اشوفك نجمة تجبر..مراعيها .. يراعيها..

واشوفك للرجوله اسم..اذا شد الزمن تقسى..واحلم من معاني الحلم..احسك مقبل بكرى..وعيا لايجي بكرى !!

يبه تذكر زمان مر؟؟
يبه تذكر مجالسنا ؟
مقلطنا ومجلسنا ؟
وحارتنا ومسجدنا ؟
يبه تذكر هدايا العيد ؟
صلاة العيد؟ وبشت العيد؟
يبه تذكر سوالفنا ؟
لاجل هذا ..
وكل هذا ..
اقول اليوم يايبــه ..
ملــــــــــــــل هالكون من دونك
يبه وينك ؟؟ .... ولهت لنظره من عينك ....
يبه وينك ؟؟
اشوفه طوّل غيابك !! ... و من ودّاك .... ما جابك !!
قالوا ما يدوم الزين !! ... و انا عندي امل للحين ..
و لكني اعرفك وين !!
يبه وينك ؟؟
عسى الداعي يبه بس خير ؟!!
عساك بخير .... مداين تكرم لعينك ...
بس ارجوك علمني ...
علمني .. يبه وينك ؟؟
سألت امي عن رجوعك ... ولا كني اعرفك وين !!
و قالت .. ما يدوم الزين !! ... و انا .. عندي امل للحين ..
في رجوعك !! .... يبه بس تكفى علمني ....
متى رجوعك ؟؟ .... يبه بس تكفى علمني .
وش احلى من طلوع اثنين ؟؟
طلوع الشمس .... و طلوعك
يبه وينك ؟؟
سألت امي ...... غيابك طال ؟؟
ولا كنّي اعرفك وين !!
و قالت مثل ما قالت .. حسافه ...
ما يدوم الزين ... مع كل هذا صدقني .. انا عندي امل للحين !!
سؤالي عنك يالوالد .. صار كما الموال
و اشوفه طال ... والله طال ..
حزين .. بلحنه و حروفه ... يخاف .. يموت من خوفه ... و قلب ٍ كان اقوى قلب ... ضعف .. من قسوة ظروفه ..
يبه ..
ارجوك علمني ...
تشوف اللي انا اشوفه ؟؟
انا اشوفك نهار و ليل ...
في وسط المجلس تصلي .. و تدعي الرب ييسر لي ..
يبه ..
ما عاد بي من حيل .. وين الحيل ؟؟
و انا اشوفك نهار و ليل .. مع اني ادري ما ترجع !!
غريبه .. بعدها تدمع .. عيوني من هموم البين !! .... و ادريبه مكانك وين !! ... مع َ هذا .. ارد و اسأل !!
يبه .... وينك ؟؟
و لا كني اعرفك وين !! شبكت العشر في غيابك ... على راس ٍ كساه الشيب .. و من وداك ... ما جابك ..
و لا ادري وش يخبي الغيب !! ... و جرح ٍ عذ ّب احبابك .... يبه ..عيّا يخف و يطيب !!
يبه.. كل جرح في الدنيا .. مصيره بالدوا يلتم ... و لكن البلا من جرح ..
نزف فرقاك ... بليّا دم !! ... و هذا الفرق في جرحي ... عجز يلقا الدوا دكتور .. انا جرحي غريب الطور !!!
ينزف ... بس بليّا دم .. و زاد الهم فوق الهم ... و دام انك يبه غايب ... جروح الغيبه ما
تـلتم ..
بس عندي امل للحين !! ... و لا كنّي اعرفك وين !!

يبه .. ذكراك تفرحني ....
في نفس الوقت تجرحني !! ... لا من جبت في طاريك ... دموعي غصب تفضحني ....

يبه .. تذكر ليالي الصيف ؟؟
عرس الحي .. و رقص السيف ؟؟
و كرم قلبك معَ هـالناس .. كل ٍ كان في بيتك ضيف ..
الا يا حيف .... الا يا حيف ..
زمن قاسي .. زمن قاسي ...
اخذ مني بلا رحمه ... اخذ مني اعز ناسي !!
و خلاّ لي سهر هالليل .. في عيني ضيف .. الا يا حيف !!


يبه وينك ؟؟
تعال و شوف ...
كبرنا مثل ما تمنيت ... درسنا كل ما حبيت .. نصلي مثل ما وصيت .. و ندعيلك في كل ظروف ..

يبه وينك ؟؟
تعال و شوف .. صحيح الدنيا ما ترحم ..
تجرعنا التعب انواع ... و لكن الأمل ما ضاع ..
و انا عندي امل للحين !! ... و لا كني اعرفك وين !!

يبه تذكر شطانـتـنا ؟؟
انا و اخواني و اخواتي ... معانا عيال حارتنا ..
نلعب في زوايا البيت .. يبه ... والله انا حنيت ..
لذاك الوقت في وجودك ... الا يا ريت ... الا يا ريت ...

ترجع .. يا يبه حنيت ..
حسافه الدنيا ما ترحم ...
خذت منا سعادتنا ... خذتك بعيد .. و خلتنا !!!

يبه امي تذّكرنا ... بأيامك قبل ما تروح ... تناديها.. يا روح الروح ..
تغازلها و تنظر لك .. مثل طفله ... ملامحها عشق مفضوح ...

في ذاك الوقت .. كنا صغار ...
معَ هذا ... كنا نغار ..
عليها .. او بعد منها ... كنا نغار
نحبك يا يبه ... ارجع .. مثل شمس الفجر .. اطلع
حزينه الشمس في غيابك .. و نفس الحزن في احبابك .. واخاف الشمس من حزني ..
تغيب و ما بعد تطلع !! .. يبه ارجع !! ... اذا لي خاطر فـ قلبك ..
تعال و زورنا بس يوم ... مع انه ما يكفينا .. نشوفك يوم .. نبي حضنك يدفينا .. و نشوفك دوم ..

لكن قلّت الحيله ... و يمكن مـ البطا ضاعت ..
و قلنا يوم !!

يبه سامحني بترخّص ... قبل ينشف حبر الأقلام .. كلامي بعده ما خلّص ..
و لكن موعد الأحلام .. حان ..
ولازم اوفي له.. بعد ما ضاعت الحيله .. اشوفك والوعد باكر !!
اذا فكّر يجي باكر ..!! .. و برجع اسألك وينك !!

بس لازم تجاوبني .. ترى عندي امل للحين !! .. و لا كني اعرفك وين ..!!

يبه شلونك ؟


ملل هالكون من دونك
يبه شلونك ؟
وتمضي رحلة الدنيا ... بليا طلة عيونك
لاجل هذا ... وكل هذا ... اقول اليوم يابـيـي

ملل هالكون من دونك

منقووول

النص الذي في الاعلى هو احد أجمل نصوص الشاعر مسفر الدوسري
هي قصيدة كتبها رثاء بوالده رحمة الله عليه



أنا حبيت أنقل لكم هالقصيده لأنها تعبر عما في داخلى


والله يرحمك يا يبا

 

[واحشنى موت]

:eh_s(11): قصيييييييييييييييده اكثر من روعه وتعبر عن الحب الحقيقى
للأب اللى هو اغلااا شى بهالدنيااا .. والله من اول بيت لاخر بيت ودمعى ماوقف
وتذكرت ابوى الله يرحمه وشميت ريحته فى كل كلمه وكل ذكرى ولا يمكن انساه
ويباا وينك يبااا وينك والله ملل هالدنيا من دونك
الله يرحمه ويسكنه فسيح جناته
مهمااا طال الوقت لايمكن انسى نظرة عيونك

 

[عناد]

يعطيج العافيه قصيدة مؤثره قلبتي المواجع

 

[lala2]

وينك ؟؟
تعال و شوف ...
كبرنا مثل ما تمنيت ... درسنا كل ما حبيت .. نصلي مثل ما وصيت .. و ندعيلك في كل ظروف ..
*******************************

واي عورتي قلبي من قريتها وانا ماوقفت دموعي
ذكرتيني بابوي الله يرحمه ويرحم جميع موتى المسلمين يارب

 

[مسك 3]

:eh_s(11): بجيتينا
صج ماكو مثل غلا الأبو الله يرحم ابوي
ويرحم ابهاتكم اللهم ارحم موتانا وموتى المسلمين

 

[جوهره الكويت]

صح لسان الشاعر وتسلم ايدج عالنقل ..

كافي انها عن الاب ....

 

[حلوه ومزيونه]

تسلمون حبيباتى على مروركم وتفاعلكم مع القصيده

والله يرحم امواتنا جمييييييييييييعا

 

[omneyaty]

ليش جذيه يا مزيونه بجيتيني


ابوي صار له 6 سنين ولما الحين يعورني قلبي الله يرحمه ويوسع منازله


والقصيده ترى بالانترنت مغنينها تعور القلب


صج ولهت عليك يا يبا باصعب المواقف ابيك

مالي الا الله سبحانه بكل الاحوال يوم فقدتك فقدت سندي بالدنيا

حسيت بضعفي الله يرحمك ويغفر لك يايبا

 

[حلوه ومزيونه]

امنياتى فعلا هذا احساسى اختى

والله يصبرج ويصبرنا على فراقهم

ويرحمهم ويوسع منازلهم امييييييييين

 

[omneyaty]

رديت فجيت الصفحه اقراها وابجي


عوار قلب

 

[.:. عبرة مُوادع .:.]

يكفي اني لا سمعت كلمة يبا صديييييييت والوقت لمته

الله يرحم جميع اموات المسلمين .....

 

[عسولة الكويت]

الله يرحمهم ويسكنهم فسيح جناته ويجعلهم مع الشهداء والصديقين وهذي الدنيا يابنات ماتدوم لأحد

قصيده تبجيييييي وصادقه

مشكورة على النقل ,,,,

 

[حلوه ومزيونه]

تسلموووووووووووووون خواتى على مروركم

 

[LaSt WoMeN]

مشكوورة على النقل .. وايد حلوة و مؤثرة

و الله يرحم والدج ان شاء الله

 

[حبيبته آنا]

المشكله ان قلبي مو عيني اللي بجت

 

[حلوه ومزيونه]

الله يصبرج ويصبرنا اختى

ويرحمهم ويغفر لهم

 

[نملة^فاصلة]

:eh_s(11): قصيييييييييييييييده اكثر من روعه وتعبر عن الحب الحقيقى
للأب اللى هو اغلااا شى بهالدنيااا .. والله من اول بيت لاخر بيت ودمعى ماوقف
وتذكرت ابوى الله يرحمه وشميت ريحته فى كل كلمه وكل ذكرى ولا يمكن انساه
ويباا وينك يبااا وينك والله ملل هالدنيا من دونك
الله يرحمه ويسكنه فسيح جناته
مهمااا طال الوقت لايمكن انسى نظرة عيونك

شلونج يا واحشني موت ......... فيني فضول صورة البيبي اللي حاطته ولدج بنتج لانها تينن وانا اموت على صور الاطفال وايد