ياليت مت ـــــ ولا عشت افراقك 000خـــالــــد ودلال ــــ روايتي الثانية (مميزه )

[sara999]

رد: ياليت مت ـــــ ولا عشت افراقك 000خـــالــــد ودلال ــــ روايتي الثانية

:ch12: هاااااااااا ؟؟؟ شصار نزل البارت والا لا ؟؟




:eh_s(1):شنو!!! :eh_s(2)::eh_s(2)::eh_s(2)::eh_s(2): ليلحين ؟؟؟؟ :krkrkr:


بس اليوم بينزل انشالله ؟؟:eh_s(2): اييي ؟؟؟:eh_s(9): ايواااااااا انا ناطره

 

[ms.eng]

رد: ياليت مت ـــــ ولا عشت افراقك 000خـــالــــد ودلال ــــ روايتي الثانية

لاااااااااااااااااااء لا تقولوون وااااااااااي

انا عبالي القصه خالصه صارلي سبوع اقرى فيها ما توقعت ماكملت ;/

شعور حده مو تمام

ما تقدرين تنزلين بارتين على الاقل ؟ بليييز ;/

 

[برشلونيه q8]

رد: ياليت مت ـــــ ولا عشت افراقك 000خـــالــــد ودلال ــــ روايتي الثانية

بـنـات تدرون انا اكرهه خالد اهوا الي ياب حق نفسه كل شي << ادري بتطقوني بس صج اهوا ياب كل شي لنفسه

احلى شخصيه بالقصه عبدالوهاب ماكو مثله و الله

اممم كوكو حياتي بعد عمري يا قلبي انتي نبي بارتين اليوم عشان الامتحانات بتبدي بحاول كثر ما اقدر اذا فضيت راح ادخل

ااخخخ عوار قلب وقفت كل القصص الي اقراها عشان اندمج وياج يلا ننطر البارت على ناااااااااار

 

[عاشقة البحر 93]

رد: ياليت مت ـــــ ولا عشت افراقك 000خـــالــــد ودلال ــــ روايتي الثانية

والوعد اليوم اليوم الوعد ....

ايواا نااطرينج فدييتج ان شاء الله

 

[باربيه كيوت 9]

رد: ياليت مت ـــــ ولا عشت افراقك 000خـــالــــد ودلال ــــ روايتي الثانية

عفيا كوكو نزلي بارتين اليوم تكفين
الامتحانات كاهي تنطرنا الاحد تبدا
بلييز نزلي بارتين والاثنين نزلي بارت ونص <اطلع برآآ (h)
نآطرييينج آليووووووووم حوووبااي ;p

 

[ندوش الشوش]

رد: ياليت مت ـــــ ولا عشت افراقك 000خـــالــــد ودلال ــــ روايتي الثانية

نبي بااااااااااااااااااارتين مانبي بااااااااااااااااااااااااارت

 

[Ms.PinK]

رد: ياليت مت ـــــ ولا عشت افراقك 000خـــالــــد ودلال ــــ روايتي الثانية

Waiting 4 u ;*
fedaitch ​

 

[طابوقه]

رد: ياليت مت ـــــ ولا عشت افراقك 000خـــالــــد ودلال ــــ روايتي الثانية

واااي خووش روايه

 

[sweet.sanfoora]

رد: ياليت مت ـــــ ولا عشت افراقك 000خـــالــــد ودلال ــــ روايتي الثانية

وين البارت وين البارت وين البارت وينه !

 

[صعب الكلام]

رد: ياليت مت ـــــ ولا عشت افراقك 000خـــالــــد ودلال ــــ روايتي الثانية

نبي باااارت

 

[sara999]

رد: ياليت مت ـــــ ولا عشت افراقك 000خـــالــــد ودلال ــــ روايتي الثانية

:ch12:witing ana

 

[miss 3yara]

رد: ياليت مت ـــــ ولا عشت افراقك 000خـــالــــد ودلال ــــ روايتي الثانية

waiting ;**

 

[catcoooota]

رد: ياليت مت ـــــ ولا عشت افراقك 000خـــالــــد ودلال ــــ روايتي الثانية

watiiiing

 

[@حلاوة الدنيا@]

رد: ياليت مت ـــــ ولا عشت افراقك 000خـــالــــد ودلال ــــ روايتي الثانية

Waiting Waiting. Waiting

 

[Şhώasha . . ~]

رد: ياليت مت ـــــ ولا عشت افراقك 000خـــالــــد ودلال ــــ روايتي الثانية

ويييييييييييتنج ......

 

[أم جديله !]

رد: ياليت مت ـــــ ولا عشت افراقك 000خـــالــــد ودلال ــــ روايتي الثانية

up
up

 

[برشلونيه q8]

رد: ياليت مت ـــــ ولا عشت افراقك 000خـــالــــد ودلال ــــ روايتي الثانية

ننطرج اااخ تووه مدخلين علينا قوول

يلا ابي بارتين يبردون جبدي على القول الي دخل

 

[*caramel macchiato*]

رد: ياليت مت ـــــ ولا عشت افراقك 000خـــالــــد ودلال ــــ روايتي الثانية

يالله بنااااات ....زهبوااا الكلينكس....

 

[*caramel macchiato*]

رد: ياليت مت ـــــ ولا عشت افراقك 000خـــالــــد ودلال ــــ روايتي الثانية

اسفطت سارة عند بيت حمولة دلال .....دلال اتبطل الباب تبي تنزل ....

سارة : دلول لاتضيقين خلقج .... الله ماياخذ شي الا يعطيج احسن منه ....!!!!

دلال ماتكلمت ...ابتسمت ...وانزلت .....

ادخلت البيت ...بطلت باب صالتها ....ويلا زياد قاعد ينطرها....وكان لابس دشداشته...ليلحين مافصخها ...

دلال : السلام ....

زياد : وعليكم السلام .....(يطالع ساعته) جان ماييتي احسن ....

دلال : توها الساعة ماصارت11...وانا قتلك بقضي لي جم شغلة ...مابقا شي على سفرتنا....وانت شكلك توك ياي...

زياد يقوم من مكانه ...ومبين انه معصب :لا موتوني ياي... وانزين ياحلوة ...ليش لما ادق ماتشيلينه ...؟؟؟

دلال : لاني كنت ناسية موبايلي بسيارة اختي.....وماشفته الا عقب ماخلصنا كل مشاويرنا ......

زياد : اممم حلو....وماتعرفين اتدقين يوم شفتي رقمي....

دلال : مالي خلق تحقيق جدام اختي....

زياد : ويلا في احد ثاني اهم مني !!!!

دلال اتطالعه مستغربة : شنووو ؟؟؟ اشقصدك يعني ؟؟؟!!

زياد : عااد فهمي الي تفهمينه ....

دلال : قصدك واااحد ...انا اعرف واااحد؟؟!!!

زياد : تصرفاتج اتدل على هالشي ...!!!

دلال تضحك على استهزاء : حمدالله والشكر...عشان مارديت عليك ...ًصرت اعرف واااحد ...اممم شي جميل....كل يوم عن الثاني تثبتلي انك مريض ....

تعطيه ظهرها وتمشي...بتروح غرفتها ......

ايرها من ايدها حيل ...

زياد يصرخ : انا لما اتكلم ..تنثبرين اتكلميني ...مو تعطيني ظهرج وتمشين ....!!!

دلال : لاتصرخ علي لوسمحت.....

زياد : تحترمين نفسج ماصرخ عليج .....

دلال : اقول هدني هدني...ترا والله حدي مالي خلق اتهاوش معاك ...

زياد يهزها من ايدها حيل : احترمي نفسج ...وتكلمي عدل....لاوالله اتشوفين شي ماعمرج شفتيه ....

دلال : شنو بتسوي يعني ...مابقا شي ماسويتا.. حتى بأخلاقي وشرفي قاعد تطعني...بس بقى انك اتطقني...يالله طقني طقني ..!!!!

زياد ويها احمر وحده معصب : ايه اطقج ...وادوس ابطنج اذا مو عاجبج !!!!


اتطالعه بطرف عين ..وتبتسم : فيك خير سوها !!!!

اتوخر ايده...اتخليه وتمشي .....وتعطيه ظهرها .....

جان يمسكها من شعرها ....ويعطيها طراق على ويها ....

زياد يصرخ : دلوووول لا تطلعيني من طوري .....صيري آدمية احسن لج ....

دلال اتطالعه منصدمه .....وحاطه ايدها على ويها .....

دلال : انت من صجك اتمد ايدك علي ....اشلون تتجرأ !!!!


زياد توتر يوم طقها .....يطالعها اشلون معصبة...

زياد متوتر : آسف ...آسف ماكان قصدي....بس انتي طلعتيني من طوري...

دلال : انا الغلطاانه الي اعيش مع واااحد مريض نفسي مثلك ...

اتروح صوب طاولة صغيرة يم الباب ..فيها سويج سيارتها ....تاخذه ....

زياد يروح صوبها يمسكها ....

زياد: دلال تعوذي من ابليس ...انا ماكان قصدي...انتي استفزيتيني...

دلال : ماتوصل انك اتمد ايدك علي!!!..بس كفاية ...ماتهون علي نفسي اعيش مع واحد شكاك ومريض نفسك .. انا بروحي متحملة طبعك الخايس...هالدور اتمد ايدك ....لا بالله اكملت !!!!

تبي تفتح الباب ....تلتفت عليه ....

دلال : مابيك ...انا اكرهك....ابيك اتطلقني.....

زياد يروح صوبها ويلمها من ظهرها : دلال ..لاتقولين جذي...والله اني احبج ...اموت عليج ...ٍتحملي طبعي....

دلال اتغمض عينها وحدها لايعة جبدها : وخر عني....انا مابيك ...ومومجبوره اتحمل طبعك ....انا مـــــــــــــــا احبك ... غصب... ما أحبــــــــــــــــــــك !!!!

تفتح الباب...ويلا خالتها وحماتها..واقفين عند الباب..كانوا يايين ركض...يسمعون اصراخهم ....

خالتها : اشفيكم يما دلال ...اشصاير ؟؟؟؟

دلال ماترد ..اتنزل راسها وتمشي .....

زياد : دلال لحظة .......لحظة .....

فجأة تسمع دلال صرخة زياد...صرخة وحدة ....

تلتفت دلال ...ويلا تلقا زياد طااايح بالارض...وقاااعد يرجف يرجف ...وعينه صايرة كلها بيضه ...

الام اتقوم وتوخر الكرسي والطاولة الي يمه...

قامت مها افتحت ازرار الدشداشه...وافصخت نظارته... وخلته ينسدح على جنب...وارفعت راسه اشوي...

دلال حدها خافت ...قربت يمه ....

اخت زياد (مها) اتصرخ : لا تجيسينه ......


يظل على هالحالة اقل من دقيقة .....وبعدين يغمض عينه....واشوي ويبطلها ...يشوف دلال يمه قاعدة على ركبها ...وقاعده اتطالعه ...وامه واخته حواليه...ترفعه امه اشوي...واتخليه يقعد ....يطالع دشداشته ...ويلا كلها عزكم الله (بول) ....

كان قاعد يطالع دلال وامه واخته ...وحده منحرج ...جان تنزل دموعه....

دلال نزلت راسها مده...مهي عارفة شنو اتسوي...بعدين حاولت اتسنده على جتفها ..وراحت معاه الغرفة ...وخلته ينسدح بالفراش...وغيرت اهدومه....واقعدت معاه لين نام.....

اطلعت دلال .....وكانت الام ومها قاعدين بالصالة ...كانت دلال ليلحين منصدمة وموعارفة اشلون تتصرف....يوم شافته الام طالعة من الغرفة...

الام ضايق خلقها : نــــام ؟؟؟!!!

دلال اتهز راسها : ايه....

الام : تعالي بنيتي ...قعدي يمي بكلمج .....

دلال اقعدت وحدها مقموته ...ودها اتصرخ واتطلع كل الي بقلبها ...

دلال : ليش خالتي...ليش يا مها ؟؟!! ليش ماقلتولي ان فيه (((صرع))) ...

مها والام ساكتين ....موعارفين شنو يقولون ..لان الموضوع مايترقع....

مها : والله عيزنا من زياد ...وقلنا له ...بس ماكان راضي.....يقول ان مافيه شي...

دلال اتطالعهم منصدمة : اشلون ....؟؟!! هذا غش...اشلون ماتقولون لنا ؟؟!! هذي الامور مايصير تنخش؟؟!!!

الام اتدمع عينها :اهوا فيه هالشي من كان صغير...ومن يومها واهو ياخذ ادوية بانتظام ...ولا احد يدري الا انا واخوانه.. ولله كنا ناويين اذا خطبنا اي بنت ..انفاتح اهلها بالموضوع ....بس زياد يوم شافج ...تعلق فيج من البداية ...وخاف ان انقولكم وماتوافقون ....فـــا....

دلال اتقاطعها : فا قررتوا انكم تسكتوون !!!!!!

الام تمسح دموعها : انا أم ...اتعرفين شنو أم ...اضطريت اني اسكت عشان ولدي....اهوا حيل حساس من هالناحية .....(تسكت اشوي) ماتوقعت اتييله نوبة صرع.. اهوا من زمان مايتله....قلت يمكن ماتييله مره ثانية..مادري..مادري... يمكن عشان انفعل....

دلال : خالتي الله يهداكم ... وحتى انا بنت وعندي أم ...وامي لو اعرفت راح تحتر على شاني !!! حطوا مكانكم ابمكاني؟؟!! شنو راح اتكون ردت فعلكم !!!! ويلا علشان اهوا ولدكم قاعدين اتبررون ؟؟!! |(اتأشر على مها) يعني لو مها منحطه بهالموقف...شنو كنتي راح اتقولين !!!؟؟؟

دلال اتكمل : خالتي ...ادري انج ام ...والام دايما اتبرر حق اعيالها ...بس الصراحة خالتي...زياد موطبيعي...(اتحط دلال ايدها الثنتين على ارقبتها) خانقني ...قامتني...ماصارلنا مده متزوجين وقاعد يسوي فيني جذي...حتى قام يطعني بشرفي ومد ايده على وماصارلنا 4 اشهر مع بعض.....!!!!!

الام ساكته مدة ...: اهوا هالشي واايد مأثر فيه ..ومسويله حاله نفسية ...دايما يحس بالنقص ...ويحس ان موكامل...وان الناس اذا اعرفوا بالي فيه راح يوخرون عنه ...

الام اتروح عند دلال وتمسك ايدها الثنتين : والي يسلمج دلال ...لاتخلين ولدي بهالوقت ...ترا اهوا واايد يحبج ..وانا ولا مرة شفته يحب شخص هالكثر....على الاقل مو الحين ...او بالتدريج ...والي يسلمج ....

دلال حيل انحرجت من خالتها ...كانت خالتها وااايد طيبة وحبوبة ...وانحطت دلال بين نارين ...وهم زياااد وااايد كسر خاطرها ...واعرفت ليش اهوا كله يشك ومو واثق من نفسه ...لان هالشي كان مأثر عليه واايد....

دلال اتهز راسها وتدمع عينها : ان شاء الله خالتي...راح احاول....راح احاول....

راحت دلال غرفتها ....وكانت مشغله ليت الاباجورة ..اقعدت على طرف الفراش...وقامت اتطالع زياد واهوا نايم ....وايد وايد عورها قلبها ...وكسر خاطرها ....جان اتقوم اتبوسه على خده ...واتلحفه ....واتنام يمه بالفراش.....


.......................

بالمستشفى ....تقريبا الساعة 11 ونص....وعقب ماراحوا كل الناس...بس بقت شيخة وام خالد ....وخالد يالهم تالي....كان حده مزاجه متعكر عقب مااشاف دلال ....دخل خالد الغرفة ...

خالد : السلام عليكم ....

كلهم : وعليكم السلام ....

خالد يطالع امه : ها ..اشلون استقبالكم ؟؟؟

الام : ماشاء الله ...كل شي ايهبل ...كل من اعجبه .....

خالد يطالع منيرة : استانستي.؟؟ هذا الي تبينه .....

منيرة قاعدة ماسكه موبايلها وقاعدة اتدز مسجات : ايه اشواا ...في نااس اطلعو من اهني ميتين حره ....

خالد: الحمد الله والشكر...يعني انتي اتسوين جذي عشان اتحرين الناس ويلا عشان انتي اتحبين الزين ؟؟!!!

منيرة : هذي وهذي....؟؟؟

خالد يهز راسه : حريم حريم ...ان كيدهن عظيم ...

اشوي ويبون البنت ....لاتشوفون وي خالد ...يحس ان الدنيا مو شايلته من الوناسة .....قامت ام خالد وشالتها ...وقاعدة اتلعبها ...وبعدين راحت صوب خالد وحطته على حظنه ....

خالد : لا يماا انا اخاف اشيلها ...ماعرف ...

ام خالد: ماتعرف ..بس لازم تتعلم ....

كان قاعد يطالعها ...وعيونه تلمع من الوناااسه ....ويبتسم ...مو مصدق ان هذي بنته ..من لحمه ودمه ....

خالد يكمل : يما..انا نطرت منور تولد عشان اشاورج ...اشرايج ...راح اسمي البنت عليج ((سعاد))....

ام خالد : لا لا يما ...شنو سعاد ..هذي ويها وي وحده اسمها سعاد...شقره وبيضه وعيونها ملونه...سمها هالاسامي اليديدة الي اتونس...ليش اتعقد البنية ....وادري ان منور موبخاطرها الاسم ...

منيرة خامرة ...ماتكلمت ...يعني السكوت معناته الرضى ...والاسم مو عاجبها ....

خالد : ليش كاهي سعاد حسني ....في احلى منها بالدنيا ؟؟ والناس يحلفون براسها ...وكفايه ان اسمج ..اسمج الي يحليها اصلا...ومنيرة عااد كيفها عجبها ويلا ماعجبها ...البنت بنتي وشايله اسمي...

ام خالد : لا لا ..اسمي داااثر... وانا امك ...مايصيير لازم تتشاورون ....وبعدين انا ليلحين ما مت ...اشلون اتسمي علي انا عايشة..هااا؟؟!!!

خالد : ويه يماااا .....شخباري هالسوالف...لا لا بسمي عليج...

ام خالد : لا والله ...مابيك اتسمي علي...انا اسمي مو عاجبني...لو حصلي غيرته...شوفلك اسم ثاني وسم البنت ....

خالد يسكت مده ......يلتفت على منيرة ....

خالد : السالفة يت من نصيبج ...شوفي اسم حلو حق البنت خل اسميها ...بس مابي اسم مااايع ...شوفي اسم حلو وله معنى ....

منيرة : صج ....وناااااااااسه ...خلاص انا في اسم ابالي عاجبني...

خالد : شنو اهو؟؟؟

منيرة : (جوى) ....عاجبني اسم جوى ..

خالد : لا يبااا ...شالاسم البايخ.....

منيرة : بلعكس ...انا عاجبني ...ومعناته اعلى مراتب الحب ..يعني العشق !!!!

خالد ياااخذ نفس ...يطالع امه : اشرايج يماا ...

الام : والله كيفكم ...الاسم الي ايووزلكم ...البنيه بنيتكم ....

يطالع شيخة : اشرااايج شيوخ ؟؟

شيخة ترفع جتفها لي فوق ....وحدها مالها خلق منيرة : كيفكم ....

خالد يطالع البنت..ويجرب الاسم عليها : جوى...جوى ...


يروح باله بعيد ....يتذكر يوم كان يكلم دلال ...

خالد : واااي دلول...ابي اول مانتزوج تحملين على طول....

دلال : بس عااد ...عيب ....

خالد : شنو عيب ...ابي عقب 9 اشهر من زواجنا اتييبيلي بدور (بدر)
دلال تضحك : والله مو بيدي بنت ويلا ولد ...واذا يبت بنيه ...شلون يعني ...ماتستانس ؟!!!

خالد : اممم ...امبلا استانس...وخصوصا اذا كانت تشبهج ...

دلال تضحك حييل : يما منك ....انزين شنو انسميها ...؟؟!!

خالد : دلال ....

دلال : لا خالد ...صج ...شنو انسميها ...خو الولد امسمي نفسه (بدر) ..والبنت ....؟؟

خالد : مادري كيفج ...انا بسمي الصبيان ...وانتي سمي البنات ...

دلال : ليش تعال ...الي يسمعك اتقول سمي البنات وانت اتسمي الصبيان ...جم واحد ناوي انييب ؟؟؟

خالد : عشر ...5 صبيان ...و5 بنات ....

دلال تضحك : لا وانت الصاج ...كملهم خل يصيرون درزن !!!!

خالد : ياااحلوج وياحلو عيالج ....(يسكت اشوي) يالله ماقلتيلي ...شنو اتسمين البنيه ...

دلال تفكر : امممم ..ابي اسميها (لولو) على يدتي لولوة الله يرحمها .....




ام خالد : خالد ...وين رحت ؟؟؟

خالد : هلا يما ...سرحت اشوي ....خلاص باجر اروح اسميها (لولـ..) اقصد جوى....

..........................................

باجر الصبح ......دلال كانت قاعدة امبجر....اصلا اهيا طول الليل مانامت عدل...بس قاعدة اتفكر بسالفة زياد.....وحتى لمن اقعدت كانت قاعده بالفراش...حست ان زياد قعد من النوم ....قعد على الفراش ومنزل ريله على الارض.....يبي يقوم ...وكانت البردة اشوي امبطله ..و نور الشمس داخل اشوي بالغرفة...يتله دلال من ورا ...ولمته من ظهره...

دلال : صباح الخير.....

زياد ساكت ...ومنزل راسه .....

زياد منكسر : مو كنتي بتروحين بيت اهلج !!! يالله روحي ..ويلا عشان كسرت خااااطرج ......

قامت دلال وانزلت على الارض...وجابلته...ولمته من بطنه....

دلال : لا ماكسرت خاطري ...بس انا كنت معصبة اشوي ...والحين هديت ...

زياد ساكت وقاعد اتدمع عينه ...ولاف ويها الصوب الثاني : اذا بتقعدين على شان انا مريض روحي....انا ماحب اكسر خاطر احد...لان انا مافيني شي....

دلال : ادري ان مافيك شي....وهالشي الي صار عادي...يصير مع ناااس وااايد ...وماراح يغير نظرتي لك ...انت انسان ناجح بحياتك ...وعملك ودراستك ...اصلا انت كل بنت تتمناك ....

زياد اتطيح ادموعه على شعرها : لاتقولين حق احد !!! ولا اقرب الناس لج ....

دلال ترفع راسها اتطالعه : اصلا انا نسيت السالفة ....

دلال كان معورها قلبها على زياااد ...وكااسر خاطرها ..لان افهمت نفسيته ...واعرفت ليش ايسوي جذي....

زياد : انا اسف على شان مديت ايدي...وعشان قتلج كلام ... المفروض ماقولج هالكلام ...انتي مرتي حبيبتي...بس....غصبن على ...كلا منها ...كلا منها.....

دلال اتضم حواجبها مستغربه : كلا منها ....منو هذي ؟؟!!

زياد : الي دقت علي ...وقالتلي انج ليلحين اتحبين ((خالد)) !!!!

 

[هجران الليالي]

رد: ياليت مت ـــــ ولا عشت افراقك 000خـــالــــد ودلال ــــ روايتي الثانية

أمبيه مريض وقبلناها .. بس وحدة داقة عليه ( وتحبين خالد) هذي أكيد النسرة العلة منورررررررررررر

الحين عرفنا ليش يشك فيها! ظلمناه بالبداية بس كسر خاطري الحين

مشكورة على البارت ويارب تنكشف منور عند خالد ويطلقها

ناطرينج في البارتات القادمة وأحداث أكثر