رد: ياليت مت ـــــ ولا عشت افراقك 000خـــالــــد ودلال ــــ روايتي الثانية
ارجعت دلال بيت اهلها....واول مادخلت البيت ...جان يدق عليها زياد....
زياد : الوو ...
دلال : هلا...
زياد : وينج ...
دلال اتعفس ويها : ابيت اهلي ...يعني ويني ....
زياد : امم ...ماطلعتي مكان ...
دلال ماقالتله لان مالها خلق تحقيق : لا ماطلعت .....
زياد : انزين اشفيج تتكلمين من طرف خشمج ؟
دلال : بس خلاص ...ماعندك غير وين رحتي ووين ييتي ومنو كلمتي ...بس ....مو انت يايبني بيت اهلي !!! خلاص وين بروح يعني.....يعني الناس اول مايدقون يسلمون ...يسألون ....
زياد : اقول تكلمي عدل...اعتقد اني ماقلت شي غلط ...
دلال :..............................
زياد : متى تبين اييلج ؟؟؟
دلال بنفس : مادري ....
زياد : انا بعد ساعة او ساعة وشي راح ايي ....اوكي
دلال متنرفزة: اوكي اوكي....
ادخلت دلال الصالة ...ولقت امها قاعدة...واقعدت على القنفة..كانت دلال شايله الجيس...
امها : الحين صارلج ساعة رايحة الجمعية ...وداخلة مامعاج الا هالغريضات ...
دلال: ايه ..كنت ابي هالاغراض بس....
امها : انزين ليش ماتطلعين ..ماتروحين ....كل يوم يايه اهني وقاعده بين اربع اطوف ...
دلال : شنو يما ..مليتي مني...
الام: لا والله حشا...اصلا انتي امونستني....بس ابيج تستانسين...
دلال حاطة ايدها خدها وضايق خلقها :انا استانس اهني ابيتنا...وبعدين وين اروح يعني ...و مالي خلق اروح اي مكان ....
امها : ليش كله ضايق خلقج وشايله هم الدنيا ...حتى ضحكتج نسيتها ....
دلال مالها خلق اترد على امها...لان ماكو فايدة من الكلام ...واتغير الموضوع : جني شفت سيارة نورة بره ....ردت؟؟!!
الام : ايه توها يايه .....
دلال اتقوم اتروح تصعد فوق عند نورة...اتطق الباب....
نورة تفتح الباب....
نوره : هاااااااااي.....
دلال اتلم نورة حيييل وتبجي....
نورة : دلول اشفيج ؟؟!!! تعالي دخلي دخلي....
دلال وهي قاعدة تبجي وتوطي صوتها : مشاري اهني..؟
نورة : لا لا ...تعالي...
دلال تقعد ....اتييبلها بطل ماي ابراج صغير....واتبطلها اياه...
نورة : هدي هدي...شربي ماي....
دلال تشرب اشوي.....وساكته...ونورة تمسح على ظهرها..هدت اشوي ....
نورة : يالله ...الحين قوليلي ....اشفيج ؟؟؟
دلال : نورو ..تعبانه...احس بختنق....احس بقمته مو طبيعية ...
نورة : منو شنو .....؟
دلال اتطالع نورة : قصدج من منو ؟؟؟
نورة : زياد !!!!
دلال : هذا المفرض اسمه (مرض) ....(لوعه) ....(قمته),,,,
نورة : انزين قعدي معاه ..كلميه... تفاهمي معاه....
دلال: وااي نورة عيزت عيزت...جان الطوفة تفهم اهوا يفهم ...استغفر الله...ماجنه انسان دارس ..مثقف...
تمسح عيونها : مخه مقفل ...مريض ....مرضني معاه ...احس اني مليت ...ماصارلي معاه 4 اشهر بس احس ماني قادره اتحمله .....
نورة : مادري شقولج دلال ....يمكن عشان انتي مومتقبلته....فيكون كلامه ثقيل عليج ....
دلال اتطالعها : حتى انتي نورة!!!! ليش عبالكم ابالغ ...ليش محد مصدقني....يكون ابعلمج ...حتى السيارة مانعني اني اسوقها ...بحجة ان اهوا فاضي ..يوديني وييبني...لاعت جبدي منه....انا متعوده عالحرية ابيت اهلي...مو متعوده احد يحقق معاي ...اوكي له حق يسألني وين رايحة وين رادة ...له حق يمنعني عن اماكن معينه مو عاجبته ...بس مو جذي ..قاموسه كله لأ لأ لأ ....بس ماني قادرة اتحمله ...
نورة : ميخالف دلال ...تحمليه ....باجر يتغير.....
دلال : وليش ؟؟ واشحقه ؟؟ مومجبورة اني اتحمل ....
نورة : شنو الحل تتوقعين ؟
دلال : الحل اني مابيه ...الود ودي اتطلق منه...بس لا امي ولا مشاري راضيين...كله حاطين اللوم علي.....
نورة : لا ..اهما يبون مصلحتج...
دلال: نورة ...اي مصلحتي ؟؟!! انا تعبت ..احس بيصيير فيني ضغط...املوع جبدي...ماتتخيلين اشكثر....بس يراقبني بس يتسمعلي...ايوديني وييبني...وكله مجابلني ....وماعنده سوالف..وكله معصب ومنفس.....لاعت جبدي...لا وبروح معاه امريكا....تتوقعين شنو راح اتكون حالتي...؟!!
نورة : يمكن الغربة اتقربكم حق بعض...
دلال : نورة لاتيننيني...لاتصيرين انتي.. وأُهم.. والزمن علي...
نورة : ميخالف دلال....خنكون واقعيين....يعني شالفايدة تتطلقين وتقعدين اهني بالبيت...الحين منو يبي مطلقة!!! ..سارة متزوجة ولاهية وباجر بتييب يهال وبتلهى ...وانا بييب ياهل وبلهى ...واتغمضين عين واتبطلين عين ...راح تلقين نفسج ابروحج....
دلال:نورة !! انتي المثقفة الفاهمة اتقولين جذي!!! عيل مالومهم!!! يعني ليش عندكم الدنيا توقف عند الزواج ...!!! شالفايدة اعيش بهم وغم...على ابو اني متزوجة!!! شالتخلف... مو مهم عندي اني اتزوج مره ثانية ....عادي...على الاقل احس اني انسانة من يديد ...اكمل دراستي...احقق اشياء وايد انا ابي اسويها .....ماقدر اسويها الحين ....
نورة : مادري عنج دلول....انا نصحتج...بس كل واحد ادرى بمصلحته.....اكيد في اشياء اتشوفينها احنا مانشوفها....
دلال : عليج نور....ياليت تفهمون هالشي...في اشياء ماتبين الا بالعشرة....واهوا عشرته ماتنبغا....اذا الحين ماصارلنا فترة كله اهواش...لا عدينا السنه اشلون ؟؟!!...اهوا اناني مايهمه انا شنو ابي...بس اهم شي شنو اهو يبي.. ماعنده غير انا وانا وانا وانا....لوع جبدي بنفسه ...يمدح نفسه ...ويعدد ميزاته ..وانا كنت اول واحد بدفعتي وانا انشط واحد بشغلي...وانا كل من يتمناني...
نورة: دلال انتي غلطانه بعد ...ليش طاوعتيه من البدايه ...
دلال : طاوعته لاني ابي اقصر الشر!!...لأاني قبلها بيومين كنت مكلمه امي ومشاري وحطو اللوم فيني ....لاني قاعد اشوفكم كلكم مستقرين ومستانسين ...وابي اصير نفسكم ....بس داخل نفسي ادري اني قاعده اقص على عمري....
تسكت دلال اشوي وتسرح ....وبعدين اتكمل : والي عور قلبي اكثر...اني تو امساع شفت خالد بالجمعية ....تخيلي نورو ...قاعد يشتري اغراض حق البيبي ...(اتغمض عينها وتنزل ادموعها) ماتتخيلين اشصار فيني يوم شفته .....
نورة : ايييييييييييه ...قولي جذي من زمان ....كل هاللويه عشان شفتي خالد ....!!!
دلال : نورة قلبي يعورني....يوم شفته حسيت روحي ردتلي...انا ماقدر احب اي احد ثاني....
نورة اتقاطعها : بس اهوا يحب مرته ...ومستانس ان بييله ياهل..ونساج خلاص...اصحي اصحي.....
دلال: اشدراج ...اعيونه قالتلي ان ليلحين يحبني....!!!
نورة: دلول ...مابي اقثج بالحجي....بس اهوا مستانس بحياته ..وانتي ولاتخطرين اباله...وسارة قالتلي.....
دلال : صج ؟؟!! اشقالتلج ....
سارة : ذاك اليوم كنت قاعده اسولف مع سوير...مادري اشياب طاري خالد ...جان اتقولي ان عبدالوهاب قايلها...ان خالد زين مع مرته ومستانس....ومدلعها...وتوه شاريلها مرسيدس G-CLASS...... خلاص...عيشي حياتج ...انسيه....اهوا مايدري عنج <<طبعا عبدالوهاب دايما يقول حق سارة كلام عن خالد..ان سعيد بحياته مع مرته....عشان يخلي سارة اتوصل الحجي حق دلال...ودلال اتشيل من بالها خالد ولا اتفكر فيه...
دلال اسكتت اشوي..واحترت غصبن عليها... واتكمل : عليه بالعافية...بلعكس ..انا استانس اذا عرفت ان اهوا مستانس...
نورة : دلول والله مو قصدي اضايقج ...بس ماحب اشوفج متعلقه فيه....جذي قاعده اتعورين قلبج عالفاضي...
دلال : انا خلاص مات قلبي عقب خالد....بس والله موعشان هالسبب انا قاعدة انتقد زياد...اهوا موزين معاي...اهو شخصية لاتحتمل....ليش اتبلى على الريال يعني...يمكن لو ان طبعه احسن من جذي يمكن جان مع الايام حبيته ونسيت كل شي...يعني انتي مشاري اخوي نساج الدنيا والي فيها ...بس زياد لايطاق....لايطاق...
نورة : امشي امشي خنطلع...خل نستانس...اهوا يرضى تطلعين معاي...خل اندق على سوير ونطلع....
........................................................
خالد قاعد مع عبدالوهاب بالشامية مول.....قاعدين ياكلون ابـ subway....
عبدالوهاب : خلود قولي...ودي اسافر مع المره بعطله الربيع ..وين اروح بو اسبوعين ...مسكينه ابي اونسها عقب الفاينل ...
خالد قاعد ياكل ...يمسح بالكلينكس : جم ميزانيتك ...؟؟
عبدالوهاب : 3 الاف...
خالد يفكر : 3 الاف..اممم ..اشرايك ....بوكيت...لان اوربا برد بالربيع ....
عبدالوهاب : والله بوكيت حلوة .....
خالد : ايه روح بوكيت اسبوع ..الجو عجيب بالربيع ....اصلا حر ...يعني عاادي تقدر تسبح ...وبرشوت وسوالف بحر ....راح تستانس....وبعدين روح بانكوك يومين ثلاث خل تتسوق المره هناك ....والله حتى الفين ماتطلع عليك السفره...
عبدالوهاب حاط ايده على ويها قاعد يفكر: ايه والله ...دششتها ابمخي....
خالد : انت عزّم ...وانا اسألك واحد من الربع ...خبره ..كل سنه مع اهله يروح .....
عبدالوهاب : ايه بعد خل اشاور سارة...يمكن ابخاطرها مكان ثاني....
خالد متردد : انزين على الطاري...ذاك اليوم كنت راح جمعية كيفان وشفت..أخـ.. أختها...
عبدالوهاب كان قاعد ياكل ...بسرعة طالع خالد ...ينطره يكمل...
عبدالوهاب :أيه ؟؟!!
خالد يسوي روحه مو مهتم ..يشرب كولا ..وياكل : اشلونها مع ريلها ؟؟؟؟ <<< صارله مده طويله مو سائل عنها ولا يايب طاريها....
عبدالوهاب : من اي ناحيه ؟؟
خالد : يعني ...مستانسة مو مستانسة.....؟!
عبدالوهاب : ايه زينه مع ريلها...ومابقا شي واتروح معاه امريكا...اهوا ملحق سياسي....<< وعبدالوهاب نفس الشي مع خالد...كان مايبين ان دلال بينها وبين ريلها مشاكل وان اهيا مستانسه مع ريلها ...عشان مايخليه يتعلق باي امل ...وعشان يعيش حياته....
خالد ياخذ نفس : ايييييه ....الله يوفقها ....
صار سكوووت ....
عبدالوهاب : اقول خلود ....شنو راح اتسمي بنتك ؟؟؟
خالد ياخذ نفس : مادري والله ...يمكن اسميها على امي ....
عبدالوهاب : سعاد ...سعوده ...امممم حلو حلو...تستاهل الوالدة...عاد ترضى المره...
خالد : اتخسي اتبطل حلجها ...بعد هذا الي ناقص..هذا اسم امي ....
عبدالوهاب: بس لازم اتشاورها ...يعني اهيا ام البنت ...لازم عالاقل تتناقش معاها...
خالد : امها ماقلنا شي...بس حبيبي الحريم ماينعطون وي..لا قتلها اشرايج...راح افتح على نفسي باب...واتييبلي الاسامي الماصخة مالت هاليومين ...لينا وليلاس وريماس وخرابيط ...مادري فـَـلبّن احنا..
عبدالوهاب : مادري خلود ...بس حرام يعني اهيا اتعبت فيها ...يعني من حقها ان يعجبها الاسم على الاقل...انت كيفك بس هذا رايي...
خالد : انا ماراح اسمي الا اسم انا مقتنع منه....مالي شغل فيها..
عبدالوهاب : اشفيك خلود!! ..انت كل ماتجدم خطوة جدام ترجع 10 ورا ؟؟؟ يعني يوم احسك زين معاها ويوم لأ !!!
خالد : شكوو شكوو وهيّب...لاتطق سالفة بسالفة ...انا عادي اكلمها زين ...وعاملها فوق الزين بعد ...
عبدالوهاب: بس انت ليلحين ماتحبها....!!!
خالد : عاد المحبة من الله ....هالشي لابيدك ولابيدي ولابيد اي احد....المهم اني قاعد احاول ...وقاعد ادوس على نفسي ..على شان بنتي الي يايه بالطريج ...مابي اتعيش بجو كله مشاكل...ومشحون....ومنيرة والله يشهد ان صارلي فتره متغير معاها...بس اني احبها ..عاد هذي يبيلها وقت .....
............................................................................
عقب جم يوم.. على الساعة 6 المغرب....ابيت ام خالد ......
شيخة قاعدة مع امها.....وقاعدين سوالف وتلفزيون وشاي وقهوة ...كان مافي احد غيرهم بالبيت ...وخالد وطلال طالعين...
ينفتح باب الصاله ...ويلا منيرة توها يايه من بره .....تدخل اتسلم وتقعد ...وبطنها صاير كبير...ويالله تمشي.....وتنسدح على القنفة....
منية : واي تعبانه حدي....بموت من الثقل...
الام :الله يعينج ياعمري... ها...قضيتي شغلج ....؟؟
منيرة : ايه..كان عندي نواقص رحت اكملها....اخاف اولد بأي لحظة...
شيخة موقاعده اتطالع منيرة....قاعدة اتطالع تلفزيون....
الام : رحتي مع السايق مثل ماقتلج..؟؟
منيرة : ايه عمتي...رحت معاه ...صج صج ماعبر اسوق بروحي...طاعي رييلي صايرة اشمتنها من الزلال ....
الام : ايه يما ...يا اتخلين خالد ايوديج ...يا تروحين مع السايق...
منيرة : لا عمتي..من صجج اروح مع خالد ...خالد يومه عن سنه ...مايحك اظهيرك الا اظفيرك ...انا اقضي شغلي بروحي احسن لي.....
الام : خلصتي شغلج كله ...؟؟
منيرة : ايه شغلي مال الاستقبال كله زهبته ...تقريبا خلصت ...
الام : وانا بعد زهبت الاستكانات الزينين والفنايين ..ومطاطيير القهوة والشاي....وطلبت الحلو من من بنت الروضان ومن واو ومن اوبرا وهم خذيت منهم معجنات ...وي هم وانزاح....
الام تلتفت على شيخة : شاركينا ......اشفيج ساكته؟؟
منيرة ساكته ...شيخة ساكته.....
الام اتهز راسها : الله يهديكم بس...يعني انتو مالكم الا بعض...لا انتي عندج خوات ولا انتي عندج خوات....
منيرة : عمتي خليها على راحتها....(اتكمل ) عيل عمتي وين الخدم ؟؟
ام خالد : تلقين قاعدين بالمطبخ ...ليش تبين شي...؟
تلتفت على ام خالد : عمتي ..ايه بقول حق الخدامة اتييب الاغراض من سيارة السايق....واتوديهم فوق....
ام خالد: قعدي قعدي...انا اناديهم .....
يدخل خالد البيت ....يطالع منيرة وشيخة .....
خالد : شيخو ...وين امي ؟؟؟
شيخة بنفسية : مادري يمكن بالمطبخ ....
يقعد بالقنفة الي يم منيرة .....
خالد : شنو توج يايه ...؟؟
منيرة تلتفت عليه : ايه ...كنت رايحة اشتريلي جم شغله ....بس خلصت شغل الاستقبال ......
اتكمل خالد : اقول خالد ...ابي فلوس...حق (الفله) مالت الاستقبال.....
خالد : انا من جم يوم من اسبوع مو معطيج الف ؟؟؟؟
منرة : ايه خلصت ...دفعت باجي العرابين ملوت السوفنيير....والورد....وشريت جم شغله بعد ابيها....اشدعوا اتكفي....
خالد : خلاص بعد اشوي اسحبلج واعطيج ....
منيرة : لا عطني الفيزا مالتك ...مو كل ساع بقولك عطني....انا اذا خلصت منها اعطيك اياها....
خالد يحط ايده بمخبات دشداشته ويطلع بوكه ...ويعطيها الفيزا....
منيرة تخمطها بسرعه : مشكوور.....
دلال تاخذ ايد خالد بسرعة .....واتحطها على بطنها ....
منيرة : شوف شوف اشلون تتحرك واترفس ...واي وازينها .....
خالد يبتسم ....حس بقشعريره من الوناسة ....
خالد : ايه والله ...اول مرة احس بحركتها قوية جذي....
منيرة : لان كبرت...فحركتها صارت اقوى ....
يت ام خالد وشافت منيرة حاطه ايد خالد على بطنها ...وايد وايد استانست ....بقلبها ((الله يتمم عليك ياخالد ..ويحنن قلبك عالى هالبنيه ))
خالد استحى من امه ...وسحب ايده ....
ام خالد : يالله مابقى شي...واتشيلها بيدك ....
خالد يبتسم : ان شاء الله.
عقب اسبوع تقريبا ......الساعة 3 الفير....
منيرة اتقعد خالد ....اهوا معطيها ظهره ...واتهز ظهره ....
منيرة : خالد ...خالد ...قوم....
خالد ناايم ومغمض عينه: هااااا... اشتبين !!!!
منيرة ماسكه بطنها : خالد بطني...بطني يعورني...احس فيني ولادة ....
خالد جان يفز : شنو....؟؟ يالله يالله قومي...غيري اهدومج....خنروح المستشفى...
قام خالد ولبس دشداشته بسرعه ...
منيرة : ييب جنطة الياهل..كاهي عند الباب...
خالد حده مختبص ....ياخذ الجنطة .....
منيرة : خالد ..قولي حق عمتي ...ابيها معاي....
خالد : اوكي...يالله امشي بسرعه ...
منيرة تقعد على الكرسي : اي ماني قادرة ...بطني....
خالد يعلي صوته : يالله قومي...بسرعة ....
يمسكها من ايدها ....ويسندها عليه...ويمشيها .....
واهوا بالطريج يدق على شيخة ...ويقولها ان منيرة فيها ولادة ...خل اتيي المستشفى .....منيرة تبيها معاها...
حده خالد متوتر ...ويحاتي...وداااايس حيل عشان يوصل رويال حياة بسرعة ...والحمد الله ان الشوارع خاليه ......
اوصلوا المستشفى وادخلت منيرة الولادة ....وخالد قاعد ينطرها بره ....اشوي واتيي ام خالد وشيخة ....
ام خالد حدها خاايفة ومتدودها : ها وينها ...دشت الولادة ....؟؟
خالد : ايه دشت ...من اشوي...
ام خالد : اهيا من اليوم المغرب واهيا اتحس بطلوق ...بس ماتوقعت انها ولادة ...توها داشة التاسع ....
خالد : تبيج دخلين عندها .....
شيخة : ليش ماتدخل انت بعد ؟؟؟
خالد : لا انا ماحب ادخل....
ام خالد : وين اروح ....؟؟
ايأشر لها خالد : من اهني....
راحت ام خالد ....واقعدت مع منيرة ..ساعتين وشي تقريبا ...لين اولدت ....
اطلعت الدكتورة ....وشايله البنت بايدها ....وقف خالد ....راح اهو وشيخة صوب الدكتورة ...قعد يطالع البنت ...سرح ...والابتسامة مافرقته ...مع ان البنت توها مولودة ...بس كانت صورة من الجمال..
الدكتورة : شفتها اشلون قمر.....
خالد يبتسم على مستغرب ....ولارد بكلمة ....
اشوي اطلعت منيرة ودوها الغرفة ...وكان خالد وشيخة والام ينطرونها هناك....حطوها على الفراش....كانت تعبانة....
شيخة راحت باستها ...
شيخة : الحمدالله عل سلامتج ....
منيرة : الله يسلمج ....
ام خالد اتطق خالد بكوعها ....
الام : روح بوسها على راسها .....
خالد : يما ..توني شايفها....
الام: اشفيك ...توها طالعه من الموت مسكينه ...بوسها وتحمد لها بالسلامة ...
خالد :افففف انزين انزين ....
راح باسها على راسها ....
خالد :حمدالله على سلامتج ...
منيرة تعبانه : الله يسلمك ...شفت البنت ...؟؟
خالد : اممم ...شفتها....
منيرة : حلوة .....
خالد : ايه حلوة ...تشبهني....
ام خالد : لا والله ...كلها منيرة ....
خالد : اشقصدج يما ...يعني انا مو مزيون ...؟؟
ام خالد : لا ماقلنا شي ...بس ماتشبهك.. تشبه امها ....
منيرة نص عينها امبطله: صج تشبهني عمتي....ابيها....يبوها ....
ام خالد : انتي ارتاحي...اشوي واييبونها .....
صار باجر...كان استقبال منيرة ....ام خالد اصبقت شيخة حق الاستقبال ...لان شيخة كانت رايحة الصالون ...وعلى ماتبدل ...
ام خالد اتدق على شيخة ....
شيخة : الووو هلا يما....
ام خالد : شيوخه نسيت البخور...وانتي يايه يبيه ...ويبي معاج..المفرش البيجي...سألي الخدامة ..انا قايلتلها اتزهبه ...واحسن لج لاتيين بسيارتج ...خلي السايق اييبج ...زحمه حيل...
شيخة : لا ...اشواا قلتيلي ...خلا ص ايي معاه ....
ام خالد : لاتنسين الاغراض.....
خذت شيخة الاغراض الي طلبتها امها ...وركبت السيارة مع السايق....وهي بالطريج ....
السايق : ماما شيكا ....انا بيقول شي....
شيخة : هممم بابو ..شنو تبي....
السايق : انا 17 سنه في اهني بيت ..انا كلو انتو يحبي...بابا كالد(خالد) بابا تلال(طلال) ..ماما سووااد ((سعاد))..كلو حبي...
شيخة : انزين شنو قول...
السايق : ماما انا قلبي في عوّر....واجد واجد....
شيخة : بابو راح تتكلم ويلا لأ ....شنووو؟؟؟
السايق: ماما شيكا...انا كل يوم ودي ماما مونيرا دوام ..سوق..كولو مكان ....
شيخة : انزين ...
السايق : ماما ...ماما مونيرا موزين ...يكلم واحد رجال !!!!!!
