ياحظي المنسدح وشفيك مشقيني قمـ يامال الوجع قم غير احوالي

[meera15]

كملي لا طولين علينا


احس اهل منيره وايد سنعين ويعرفون الاصول
واهل احمد ينطبق عليهم المثل المصري (ناس تخاف متختشيش)

 

[م.بدوره]

اصبحت منيره طبعن مالها خلق تروح الدوام ... اتصلت اطلبت مرضي وردت كملت نومها
وعلى الساعه 11 رن تلفونها ولا عمها متصل عليها

منيره : السلام عليكم

العم : هلا منيره شلونج بالدوام

منيره : لا عمي مرضيه بالبيت انا

العم : انا وخالتج بنمرج عادي

منيره : حياكم الله

قالت منيره حق امها وامها قامت ولبست ونزلت قبل منيره تحت .. على ماقامت منوره وغسلت ولبست ونزلت لا اهم واصلين
سلمت عليهم عادي مها كان مالهم ذنب بلي سواه ولدهم ..صج ماعرفو يربونه بس مالهم ذنب

الخاله : والله احنا ماندري عن هالبنيه ياام بسام تتدرين سوالف رصبيان ماندري عنها

ياسلااااام ما تدرين وانتي اللي بذات قبل السالفه بجم يوم تقولين انا بنت احمد بسميها دلال واطالعينه وتضحكون... انتي ما تدرين وعلى طول ابله دلال تييب لج اوراق حق ولدج اللي بالابتدائي وانتي تطلبينهم ومرات تروح تيبينهم منها ... اللحين صرتي ماتتدرين ... حسبج الله يامنيره وهو نعم الوكيل

وسولفو مع منيره وامها وانهم مايدرون عن شي ولا عن اخلاق وطبع ولدهم مع منيره ... وطبعن كانو يتهمون منيره انها تنزل تتضحك وما تشتكي لهم ... شنو يا ناس انتو تبون تعرفون كل صغيره وكبيره بحياتهم .. شرايكم تتزوجكم منيره بدال ولدكم

الام : والله يا بو احمد قلت لك امس انا انطر اخوانها ويصير خير انشالله

العم: لا كبرونها يا ام بسام واذا على الصلاة انا امس كلمته واهو راح معاي المسيد الفير .. ووعدني مارح يقطعها وانه خلاص ماراح يرد حق البنيه كلش

الام : انتو تتدرون انه نقدر نطلعها ونفضحها ونخليها تتطلق بس همن احنا عندنا بنات وما نرضى عليهم ..فالله يستر عليها

العم : مايصير خاطركم الا طيب وفلوسها دين علي انا بذمتي

الام : انشالله مايصير الا الخير

الخاله : بس ياام بسام مانبي احد بدري احنا حتن حق اللي بالبيت قلنا انج تعبانه ويايه منيره عندج مانبي فضايح

واهم طالعين العم حق منيره :ستري علينا الله يستر عليج

الام : ها منيره شرايج تعطينه فرصة ثانيه هالمره

منيره :.......................................

الام : ادري انج مجروحه بس اكيد تعلم درسه احنا نحبسج اسبوع عشر ايام عنه اين ويقعد ترى ..

منيره : ان شالله يمه

الام : مثل ماقلت لج لا تيبن حق اخوانج اللي طاري البنيه الزفته هذي عشان لا يطيح من عينهم اكثر

منيره : ان شاء الله

 

[مـ سهله ـو]

والله لو انا ام منيره ما ترد ما ترد ما ترد

 

[م.بدوره]

ضاري : شنو يكلم بسم الله ما مداه يمل احنا سنين وبنين متزوجين ها تونا نفكر نتزوج على حريمنا ولا شنو مجرد تفكير هذا ما صار له 3 اشهر ومرافج ...منيره مقصره معاه بشي انتي تقعدين بكشتج وريحتج خايسه مثلن ودمج ثقيل

منيره : يشهد الله يا خوي ان الطيب من متر ينشم مني من راسي لريولي ولا قال بغيت قلت له تم ولبيه واذا على دمي تعرفوني دمي خفيف والله اني مثل القطوه بيده بس اهو ما يعطيني مجال كله مدقر فيني... بس الله يشهد علي مو مقصره لا معاه ولا مع اهله بشي

ضاري:اهااا شوفي يامنور كل ريال يمر بنزوه وهذي نزوته الاولى صج اهو استعيل المفروض بعد على الاقل 3 سنين يمل منج بس اهو الظاهر غبي ومتعود عليها .. احنا نقدر نفضحها لج ونبرد قلبج بس الله ستر عليهم احنا ماراح نفضحهم

بسام : انا اقول قعدي الفتره اللي تبينها ومتى ما حسيتي تبين تردين له قولي لنا عشان نيبه ونسمعه جم كلمه بالعظم

ضاري : انا انا اللي بسمعه لاني انا اللي قلت هذي يتيمه واهي امانتك وطق الصدر وقال قدها .. واللحين يايبها لنا مسبوبه ياليت منه لا من رفيجته

اااه يا اخوي ما تتدري شلون كان يعاملني مو بس اهي اللي هانتني اهو كان يهين ويسبني ويسبكم ويجرحني كل يوم 100 مره ولازم انام ودمعتي بعيني من القهر اللي كنت عايشته ..ماتدرون بالضيم اللي كنت عايشته واللي برد له بريولي وبرضاي

بتريدن يا منيره عشان وحده مثل هذي ما تخرب حياتج وتنتصر عليج ويصير اللي كانت تتمناه وتتطلقين .. بتردين يامنيره وما تدرين شنو ناطرج من حظ

يمكن تعدل وصار ريال ... يمكن صار احسن وخاف انج اضعين منه مره ثانيه ... يمكن حظج ردي وبتعيشين من حياة سيئه الى اسوأ

قعدت منيره تقربين 10 ايام ببيت اهلها وكان على طول يدز لها مسجات انه اسف وانه يبيها ويحبها وانه التزم بصلاته وانه اول ماترد بيسفرها او يوديها العمره وانه قطع علاقته بدلال وانه يبيها بروحها

اكيد يبيج يامنيره لانج اشرف انسانه عرفها او مرت عليه ...اكيد يبي يردج لانج الديايه اللي تبيض ذهب ...اكيد يبي يردج لانه انتي الوحيده اللي يامن انه اييب منها عيال وتربيهم على السنع وتصرف عليهم ... وبعد عمر طويل راح تورثين وراح يلعب بورثج لما يقول بس .. فاكيد بيسوي اللي اكو والماكو عشان تردين

ردت منيره بيت زوجها بعد 10 ايام وقبل لاترد راحت اشترت لها جهاز يديد تتدري انه ماراح اييب لها ترضاوة فاشترت ترضاوتها عشان لا اسالوها اخوانها تواريهم اياه ان هذي ترضاوتي جهاز يديد وغالي

 

[م.بدوره]

ادري طولت القصه عليكم وايد بس اهي تفاصيلها وايد شنو اسوي انا

على العموم بعد شهرين من هالسالفه صار تغيير بحياة منيره تغيير كبير

ودي اكمل لكم بس حدي منفلونزه ودايخه انشالله باجر تنختم قصة الحظ الردي مابقى شي عليها

بنات ادعو انه اللي يشفيني من الفلو
وادعو حق منيره حبيبتي بعد الدعاء لاخيك المسلم بظهر الغيب وايد حلو .. واهي محتاجه دعاءكم

نشوفكم على خير باجر مع اهم احداث القصه ونهايتها الن شاء الله

 

[مـ سهله ـو]

ادري طولت القصه عليكم وايد بس اهي تفاصيلها وايد شنو اسوي انا

على العموم بعد شهرين من هالسالفه صار تغيير بحياة منيره تغيير كبير

ودي اكمل لكم بس حدي منفلونزه ودايخه انشالله باجر تنختم قصة الحظ الردي مابقى شي عليها

بنات ادعو انه اللي يشفيني من الفلو
وادعو حق منيره حبيبتي بعد الدعاء لاخيك المسلم بظهر الغيب وايد حلو .. واهي محتاجه دعاءكم

نشوفكم على خير باجر مع اهم احداث القصه ونهايتها الن شاء الله

وي بعد عمري ما تشوفين شر حياتي عسى ربي يشافيج بأقرب وقت ويساعد منيره حياتي ويغير احوالها يارب :tek:​

 

[MeeMeeYoo_2]

الله يشفييج

والله يساعدها

ناطرييين

 

[منيرة خالد]

واي توني اشوف القصة وقريتها شنو منيرة هاذي صج سميتي بس ما فيها مني ابد لو انا جان من الملجه دايسة ببطنه وليش تصبر وتسكت

لا تردله ................. واذا اهي عنده اللحين الله يعينها عايشة مع عدو مو زوج

الله يشفيج من الفلونزا ............. كملي متابعتج قصه ترفع الضغط

 

[MaLSoNa]

الله يشفيج يارب .. وكثري ليمون ولاتشربين شي بارد

والله يوفق منوره ويبعد عنها الحظ الردي ..

ولاتطولين علينا ..

 

[قلب^الوله]

واااااااااااي حدي اندمجت

اكييد ولدت لوول

اكسسسسسسسسسسرت خاطري والله لو انا ماقعد ثانيه وحده

مشالله عليها متحمله عيني عليها بارده

قولييلهااااااااا انه انا اقولها : انتيييييييي قوييييييييه

وحسبي الله عليج يا دلال سبع التحاسييب
وهذا احمد يبيييييله طق لين يعرف منو يعامل

 

[أربيعينية]

مشكوره على القصه يا قلبي
اسلوبك وايد حلو ويشوق
خنقتني العبره اكثر من مره وأنا أتابع القصه
سأليني وأنا أقول لك اللي تدور الستر اشكثر ممكن تتحمل
اللي ما شاف شي من الدنيا يقول مو معقوله هالأشياء تصير !
كملي يا عمري ناطرينك

 

[وسن 11]

صراحه اللي باط جبدي بالقصه منيررررررره :tomato2:
ودي اصحصحها عدل ..............ولا السالفه واضحه من بدايه الزواج:eh_s(14):




:gathering:
بس اسلوووووووووبج رووووووووووعه

 

[فديت عيوني]

لي هني وصلت <<<< عشآن مآ آنسى



والله يشآفيج

 

[غزآل.آلكويت]

سسسلآمتج مآتششوفين ششر
يآلله نآطرينج
:‏(‏

 

[م.بدوره]

ردت منيره بيت عدلها وطبعن قبل لا تتطلع امها نصحتها انه لاتلومينه ولا تنفسين عليه ...خلاص ابدي صفحة يديده لعل وعسى يتعدل وينصلح حاله
شنو يتعدل يا ام منيره عمره العوي عوي ..ردتو منيره واهي اللي احلفت انها ماتبيه وماترده ..ما حسيتو فيها واهي تصرخ ماابيه ما حبه اكرهه يمه اكره ياخوي اكرهك يااحمد ... شلون احبك وانا انجرحت منك اكثر من مره .. مو قادره احبك الله اعلم ودي احبك بس مو قادره حتن ااتقبلت ... مو قادره حتن تقبل بيوم من الايام اييب ياهل منك ..مو متخيله مستقبلي معاك

سمعت منيره كلام امها وردت بيتها ما لامته على اللي سواه واهو بين لها انه بيتعدل وانه خلاص تعلم درسه وانه يقدر لها انه ما يابت طارت الفلوس حق اخوانها

ايي يمكن تعدل احمد بس تتدرون جدام منو جدام اخوانها لما يسالونها عنه ..يمكن مارد يكلم دلال بس للحينه باسلوبه ولسانه الوصخ اللي يعتبره غشمره واللي كان يذبح منيره مليون مره واهي تسمعه

ردينا على اللسان الوصخ وقلة الادب (( قمي يابقره ..تعالي يابهيمه ..خذي ليفة خوالج العراقيين )) انا اللي خوالي عراقيين الحمدالله الكل يدري منو انت وانا منو ..الحمدالله الكل يوم قبلت فيك فجو حلوجهم من الصدمه واهلك كلهم حاسدينك على الديايه اللي تبيض ذهب اللي عندك

بعد اسبوع من ردتها واهي بالدوام قعدت تقرى ايميلاتها شافت ايميل غريب و صل لها

(( بدريه انا اسفه اني خربت حياتج بس انا احب احمد من 10 سنين وحتن اكثر التفاصيل بحياته اعرفها وكنا متفقين على الزواج بس اهو تزوجتك انتي انتي اللي دخلتي بحياتنا وخربتيها اول مره ..بس خلاص انا اللحين بلتفت حق بيتي وعيالي وانتي الله يعينج عليه انا ادري انه يحبني ويموت فيني انا ومايقدر يعييش من غيري بس بحاول اصده انا اذا يالي مره ثانيه ..حاولي تخلينه ينساني مع انه ادري انه وايد صعب عليه ))
اسلوب دلال كان اسلوب خلط العسل بالسم

ردت منيره على هالايميل (( والله تبينه اخذيه كله بخيره وشره ما ابيه انا عليج بالعافيه ))

ولا اهتمت منيره حق الايميل خلاص ماصار يهمها شي وردت البيت والوضع خلته طبيعي

احمد بعد الغدا قاعد يسولف معاها

احمد : انتي من نحاستج وحقدت على دلال كبرتي السالفه ورحتي بيت اهلج

منيره : شلون يعني

احمد : يعني لو وحده ثانيه جان ماسويتي الهوليله اللي سويتها حق دلول

منيره : اهااا لو انا بسوي بس هوليلات على قولتك جان قلت عن الايميل اللي دزته رفيجتك

احمد: اي ايميل

منيره : تعال حبيبي وشوف

وفجت الايميل منيره وخلته يشوف

احمد: ليش مو اول ما ييتي قلتي لي

منيره : وليش اعطيها اهتمام اصلن مو اهي بس تتدري شنو الحلو انك معطيها الزاهر رقمك السري مال الايميل او معطيها ايميلي

احمد :................. خلينا ننام راسي مصدع وبليل بوديج سينما شرايج

منيره : اذا الله راد

وبليل مثل قال خذاها وودها سينما استانست منيره وايد ذاك اليوم صج بال احمد مو معاها بس استانست عشاها ودخلها سينما

ولما ردز البيت كان مود منيره عال العال وكعاده احمد اول مايي يفج ايميله وهالمره قال حق منيره فجي ايميلج

فجته منيره لقت ايميل من دلال (( اختي بدريه سامحني ان غلطت عليج ماكان قصدي انا مو طبعي جذي بس مادري شنو كان فيني ..سامحيني والله يوفقج ما احمد ))

ياسلام يالغبي جان لما زفيتها على ايميلها قلت لها بعد يومين على الاقل ادز الايميل مو بنفس اليوم تغثني الصبح وبليل تعتذر وانت اللي تحن علي اني ابطل ايميلي

هالكلام لاول مره منيره تنطق فيه الكلام اللي بداخلها طلع برا واسمعه احمد وانصدم ..اي صج انا غبي شلون طافت علي ..اي يااحمد طافت عليك

منيره : انت ما تتعدل والشرهه علي انا اللي رديت بس خلاص عوع عوع

احمد: قصري صوتج لا يسمعج ابوي على الاقل احترميه اللي يا لعندكم عشان يردج


منيره: وانا شكو ابوك ... تتدري انت ما ييلك وحده شريفه تتزوجها انت يبيلك وحده ق...

طرااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااخ

انطقيتي يا منيره سطار و عشان منو عشان دلال ..لاول مره بحياتج احد يمد ايده عليج يابنت الاحرار .. انطقيتي عشان رفيجته المصون ام العيال عشان شريفة روما ...ايا انج رخيصه يا منيره

 

[م.بدوره]

منيرة حدها تنحت وعيوناها قلبت بيض وبدال لا تبجي وتنهار ..اوقفت بويه وقامت تخزه

احمد : انا مارديت لها سمعتيني

منيره:......................................

احمد : سمعتني ؟

منيره :..............................


طراخ طراخ اي طقها مره ثانيه سطارين

احمد : سمعتني

منيره تنحت اكثر واحقرت ما ردت عليه ..حسبالكم الريال البطل وقف ايده لأ بدا يطق اسطارات عمرها ما اتوقعت منيره انها بتنطق هالعدد منهم بيوم واحد

احمد : لا تحقريني

منيره: خلصت انتقمت لها ودافعت عن سمعتها ؟؟ ماعايك امر خلني اروح انام اللحين

احمد : انتي اللي نرفزتيني انا ما كنت ابي اطقك

منيره : انا اكره اللي يطقني

احمد : خلاص والله توبه اخر مره ما راح امد ايدي عساها الكسر بس سامحيني وصدقيني مارديت لها ..سامحيني منيره

منيره وشي غصبن عليها من داخلها قال لها صبري واحتسبي : خلاص حصل خير بس لاتمد ايدك علي مره ثانيه

احمد : مابي احد يدري بلي صار

منيره اصحي اللي يمد ايده مره خلاص يتعود واهو طبعه يمج ايده بس الاشهر الاربعه اللي فاتو كان يمسك عمره ..منيره اصحي واللي يرحم والديك لمتى هالذل والاهانه ..تراج صغيره على الهم والغم ترا مو كل المتزوجين يصير لهم جذي .. ترا عادي تصيرين مطلقه وايد بنات اطلقو ... منيره اصحي

 

[م.بدوره]

وبعد اول سطار صار اي نقاش بينهم مهما كان يصرخ غليها احمد : اذا ما وخرتي والله اقوم اكوفنج اللحين

مرات منيره تسكت وتوخر ومرات ما توخر فتنطق ويرد يتسامح منها واهي تسكت .. اي بدى ييطقها

بتقولون شنو كان خلافهم ..؟؟ معظم الطق كان بسبب الاحترام واسلوب احمد اللي متبعه معاها كانت منيره ترفضه بس اهو نصر عليه مصر انه اهي بقره وحيوانه وانها مره تنداس تحت الريول

وكل يوم لازم خلاف بينهم ..كان يعصب اذا ماحطت له فوطه داخل عزكم الله الحمام ..كان يصرخ اذا قهوته فيها سكر شوي وايد ... كان يتنرفز اذا الماي للحين ماصار بارد ..وهذي حالهم كل يوم مطلع له شي عشان يصارخ ويعصب ومثل ماقلت لكم يمد ايده ..منيره عرفت كل انواع الاسطارات اللي ماشافتهم ببيت امها

ذاك اليوم طغى عليها بطق شوي وهددت منيره انها خلاص بتروح بيت امها جان ياخذها ويطلع فيها برا البيت تتدرون لوين وصلو للحدود ايي يبي يسفرها عشان تهدي قال اوديها الخفجي شوي وطخ

الشرطي : عفون اخوي عليك منع سفر

احمد : انا من اي شركه

الشرطي : شركه ... للالكترونيات

احمد : اوكي مشكور

وردو بطريج احمد يتحلطم وشلون بيقدر يدفع هالفلوس وانه يقدر يدبر 400 بس اهم يبون من 800 وانه هالمشاكل والقضايه اهي السبب اللي تخليه يتنرفز عليج يا منيره .. وانه بس يخلص القضايا اللي عليه بتعيشين يا منيره عيشة ملوك


احمد : تقدرين على معاشج تسلفيني 250 عشان اشيل منع السفر واقدر اسفرج و اونسج

منيره: احمد انا عندي بعد التزامات وايد

احمد : انا راح اعوضج عنهم كلهم بس خليني اشيل منع السفر

منيره :......................................

اي وصار وقت المعاش واخذ 250 وراح سدد على قولته اقساطه وشال منع السفر ..بهالوقت اهله سافرو وصار بالبيت ماكو الا اخوه ومرته ومنيره واحمد

احنا بدايه شهر 5 ..اي كل الطق اللي كلته منيره الفتره اللي طافت كانت باقل من شهر بنسبه كل يوم وترك طقه تقربين
منيره: احمد اتصل على عمي قوله وين مكان المحرر الماي بارد ما اقدر اسبح

احمد : حالج من حالي انا قاعد اسبح بماي بارد

منيره: بس انا ما استحمل الماي بارد ما اقدر ادخل تحته

احمد :اوووو لا تحنين تسبحي حالج من حالي او روحي بيت اهلج تنظفي

منيره :....................

احمد :نفستي يعني ياحيوانه

منيره: مانفست ما تكلمت ولا ابي ماي بارد اروح بيت اهلي اسبح

احمد : تعايريني انتي انع بيتكم احسن من بيتنا

منيره: منو تكلم اللحين عن الاحسن انا ابي ماي حار

احمد : جب واكلي خر...

منيره/ احمد شنو هالاسلوب لا تسبني

طرااخ : مووانتي اللي تعايريني انا احطج تحت ريولي وادوسج

اي يا منيره انطقيتي عشان تبين ماي حار تسبحين فيه .. يبي يستفرد فيج عشان اهله مو اهني

بعد هذي الطقه يا حق منيره هبوط صارت حتن ما تقدر توقف وتصلي

احمد : سوي لي غدا ونظفي المطبخ منو بينظفه لج الخدامه مو هني

احمد : غسلي الثياب ذبحتني هبوط هبوط

احمد : يابقره وين دشداشتي نزلي اكويها

احمد : انتي بقره ماتعرفين شي بشغل البيت
هذا اسلوب احمد كان ومنيره تسكت وتبلعها وتحقره وتمشي والدمعه بعينها انطق ونهان وانخان شنو هالعيشه ياربي

الام : منيره تعالي بيت خالج عطاج عمره

كان حزة غدا ومنيره قاعده تتطبخ غدا ريلها البيت مافيه احد ..ووصل ريلها وحطت له غداه ما قالت له انه خالها توفى مو اي خال خالها العود اللي رابيه عنده اهي

رن تلفونه وشاله طلع اخوه : شنو وشلون متاكد اوكي باي

احمد : كلمتي امج اليوم

منيره : اي ليش

احمد : خالج شلونه ؟؟

منيره : خالي عطاك عمره اليوم
احمد : يالغبيه جان قلتي لي انا اختبصت مادري انج تتدرين وشلون كنت ببلغك
منيره: انت تعبان قلت اغديك ولما تيي بتنام اقولك واروح بيت خالي
احمد : لأ انام والعصر على 5 انا اوديج
منيره: انشالله
احمد : يلا شيلي الاكل وغسلي المطبخ اخاف اهلي اييون اباي لحظه ..جان فرزتي اكل حق اخوي ومرته

منيره: فرزت لهم اول ما نجبت ودزيت حق مرت اخوك مسج

وشالت الاغراض ونظفتهم ورتبتهم وصعدت لقته نايم قالت ارتاح انا بعد شوي

وقعدو على ال4 ونص والبسو وراح قطها عند بيت خالها

احمد : خلي اختك تيبج بليل اناعندي شغل

منيره : انشالله

حسافه عليك يالطيب تروح والردي يقعد ويتنفس الهوى...حسافه على الرجال لما يضعيون واشباه الرجال يتمتعون بعز حريمهم .. حسافة عليج يارجوله لما تموتين حسافة عليج يارجوله لما تروحين

 

[MeeMeeYoo_2]

حبيبتي عدلي فوق الاميلات مكتوب بدريه مو منيره

يعطيج العافيه

 

[م.بدوره]

اهله لما عرفو بوفاة خال منيره وكان رجل صالح ومعروف بالديره يزاهم الله خير ردوو من سفرهم بسرعه

منيرهكان معظم يومها من ترد من الدوام تروح بيت خالها جثته توصل من امريكا بعد يومين ومرته نفسيتها تعبانه وماعندها الا بنت وحده تقوم بمنو واهي محتاجه من يقوم فيها ..فمنيره وامها واختها اوقفو معاهم واهو وايد يحبونهم ومتعلقين فيهم

كان احمد طبعن يقطها بعد الدوام واهي يا دبر احد ياخذها يا تنام ببت خالها على ما ايي ياخذها الصبح .. وكانت منيره تعاني من هبوط حاد بالدم ما تقدر تمشي اذا مشت طاحت بس كانت تحط على نفسها وتقوم وتروح

واهي بعزا خالها (( منيره حبيبتي بسافر لندن عند رفيجي اربع ايام او ارد ميخالف))

(( كيفك اللي تشوفه دام نفسيتك تعبانه روح استانس ))

(( زين تسلفيني وعلى المعاش اعطيج ))

(( ماعندي احمد ن وين ))

(( عندج فيزا مو لامستها كلش انتي عطيني واردهم لهم دبل))

(( اذا ماعطيتك فلوس بتزعل وتصير هوشه))

(( لا ليش ازعل هذي فلوسج ))

بس ماقالت له بتعطيه ولا لأ وردت البيت وخلال حوار عادي عصب وطنقر وطردها برا الدار

منيره : قلت لك اذا ما عطيتك بتسوي كل هذا وانا ما قلت لك بعطيك ولا لأ

وطلعت منيره وراحت نامت بدار الثانيه والصبح حست فيه دخل الدار
احمد : قومي ياحيوانه روحي بيت اهلج وفكينا من العزا اللي مو راضي يخلص

قامت منيره وراحت غسلت ولانه طافتها صلاة الفير بتصليها قضاء ولبست الثوب

احمد : وين قهوتي ما تشوفيني صار لي ساعه قاعد

منيره: اصلي واسويها لج

احمد : مابي منج شي يا حيوانهوالشرهه علي انا اللي تزوجت انا اللي موريال لتزوجت

منيره : ميخالف اصلي

احمد : انتي ما تستحين على ويهج مو متربيه اكلمج وتحقريني

منيره: ماحقرتك قلت لك بصلي

طراخ اي سطار لا سطارين وبعزا خالج .. بدال لا يقول اهي نفسيتها تعبانه لا اطقها لان الحريم عندنا ينداسون ولما اطقهم على الخد اليمين يعطوني اليسار
ما تدري يا احمد انه العد التنازلي حق منيره بدا من هالاسطار واهي راح تعطيك الفلوس كنهايه اختبار

ولما ردت من العزا اسحبت له فلوس حق الفيزا والتذكر واي اي قررو يحطون لها ستر ومطبخ فاحمد قال دامج انتي طلبتيهم انتي تتدفعين انا وراي سفر وما عندي
ودفعت منيره ذاك الشهر بالضبط 640 دينار وقبل لا يسافر عطاها بطاقة بنكه عشان لا نزل معاشه تسحب لها فلوس
احمد : سحبي 200 حق الجمعيه و5 حق اخوي والباجي لج اوكي
منيره : ان شالله

وسافر احمد من اهني راح لندن بفلوس مرته راح ديره مايحلم انه يروح لها من معاشه ومنيره بالكويت اهني ما بقى لها من معاشها الا القليل بس عندها بطاقته واهو قال لها عطي التزاماتي والباجي لج

ثاني يوم من سفرته خذت خواته وطلعتهم الافنيو وقالت المعاش اليوم ينزل خل اسحب وسحبت 400
الرصيد غير وافي ؟؟

شافت رصيده 375
طيب 200 الجمعيه
50 اخوه
10 ماتنسحب من البنك
يبقى لي 15 دينار

لا يا احمد الله يغنيني عنك خلهم لك

وطلعت من البنك وخذت البنات وتمشو وتعشو على حسابها وطبعن ما عجبهم المطعم الراقي اللي راحوه كانو يبون ماك يقولون اكله احلى
وردت منيره البيت عادي مادزت له مسج عن المقلب اللي سواه لها ولا شي كلها يومين ويرد ماراح يطول

راحت تروفاليو واشترت كفر يديد ومفارش حق الدار يعني تغيير شوي عشان لما يرد يستانس وطبعن غير البخور والعطور اللي خذتهم
وردت منيره وفلست ومن زواجها بالمعرس المتهني واهي مفلسه والسبب اهو

رد احمد من السفر كنت ناطرته ما عطاها ويه غسل وسبح وحط راسه ونام
وبليل قال لها قومي نروح خق خالتي (( بيت خالته يصدف يم بيت خالتها كلش ))
البست وراحت معاه واهو يبي يروح عشان يتشيحط بسفرته جدام اهله
ووقفت سيارتها اللي اهو سايقها جدام بيت خالته ..منيره شافت سيارة امها

منيره: احمد انزل اسلم على امي وايي بيت خالتك
احمد : شكوو احنا يايين بيت خالتي امج شكو
منيره : اخاف تتطلع وتشوف سيارتي وتاخذ بخاطرها علي
احمد : ذبحتني باهلج تتدرين بنرد البيت
وردو بطريجهم البيت واهي ساكته مندقره وساكته واهو يتحلطم واهي بقلبها تقول هذي يزاتي مسفرتك ومونستك ومقصره على نفسي
ردو البيت لا خالتها بويهاا

الخاله : شفيكم رديتو بسرعه
منيره : مافينا شي خالتي ...ومشت وسمعت احمج يقول انه بطنه يعوره
احمد لما صعد لها فوق : ليش نفسيتي على امي لو امج تكلمينها جذي
منيره: مانفست عليها كلمتها عادي بس ما ابيها تشوف عيوني مغورقه
احمد: وانتي ذبحتيني بس اكلمج تبجين
منيره :..............

احمد : نزلي سوي لي عشى

منيره : انشالله
********************************

وبعد هالحادثة بيومين بالضبط ..وهم قاعدين بصاله احم طرش منيره على شغله فلما يابتها له ما توازنت بيدها وبغت اطيح

احمد : عن الثوالة يابقره

تتدرون منو كان بصالة ؟؟ مرت حماها واخو احمد الصغير الفضيحه ولي جم مره يقل ادبه علة منيره والسبه احمد كان مصرح له

منيره : @@ ................

وبعد الغدا اصعدو طبعن احمد لازم ينام حتن لو توه قاعد من النوم..بس هالمره كان منسدح بصالتهم اللي فوق

منيره : احمد مابي منج الا انك تحنرمني جدام الناس
احمد : ماكنت ادري انهم موجودين
منيره: احمد شوف الرياييل شلون يحترمون حريمهم احترمني
احمد : انا مو متربي شتبين
منيره : دامك مو متربي ليش تزوجت عيل
احمد : جب وذلفي لا اسيج حليب امج اللحين
منيره : اذا مديت ايدك هالمره بنادي عمي يوقفك عند حدك
احمد : تهدديني يعني
منيره: ما اهددك بس انت زودتها وايدك صارت كل اسبوع اربع وخمس مرات تنمد

احمد : كيفي انا ريال وانتي احط واب... عليج
منيره : لا يا احمد مو بكيفك وقلت لك راح انادي عمي
قام احمد بكبره وبوزنه وسحبها من شعرها ورفسها على بطنها حاولت منيره تفلت منه ما قدرت كان يشليها من الغنقه هذاي ويحذفها على ذيج وبقبظه ايدها على عيونها اول مره يصير حق منيره هالموقف
حاولت تفلت توخر تنتدي عمها كان يحط ايده على حلجها ومدت منيره ايدها وراها لقت عليه اهي تحط فيها الكاوكاو شالتها وفلعتها براسه وحاولت تنحاش يوم شافها طقته ثار وصار جنه وحش قام يطقها ويقول مو انا اللي اطقني مره ومنيره تفلت منه وكل ما فلتت اللي يمها تمسكه وترقعه فيه ...بس يا احمد لاعت جبدي وصج اهو انصدم انها وقفت بويهه لاطقها طقته بس طبعن اهو وين واهي وين جنها قاعده تتغشمر لما اطقه
انحاشت منه وراحت غرفتها ولحقها وكمل طقه وحاولت تصارخ حط ايده على حلجها والثانيه على رقبتها حست منيره انها بتموت ..وخرت ايده حيل وطاحت على الارض ورجعت وشافت دم على الارض ..منيره رجعت دم شافت المنظر ما حست الا باحمد يناديها منيره منيره بطلي عينج وانه يقد عليها ماي ...منيره اغمى عليها

اخذها احمد وشالها وحطها بالحام عزكم الله وشغل عليها المي عشان تصحى ..وكان يعتذر منها ويبيها تبطل عينها بس منيره مو قادهر توقف على ريولها

على شنو تعتذر يا احمد ...تعتذر على طق 24 سنه بساعه ؟؟ تعتذر على شو بالضبط خلاص ماينفع العذر ..انت مت بقلب منيره ..وانت السبب الايد كانت ايدك اللي طق واللسان كان لسانك اللي يسب
كانت منيره بس تبي الكلمه الحلوه والمعامله الطيبه وكانت راح تعطيك عيونها ... بس انت ماعطيتها مجال ..انت بديت تجني على نفسك يا احمد


طبعن تقولون انه منيره بعد الطق هذا شالت هدومها وراحت وبيت اهلها وطلبت الطلاق ...اكيد هذي النهايه اللي مفروض تسويها منيره ...

 

[م.بدوره]

:dddds:

حبيبتي عدلي فوق الاميلات مكتوب بدريه مو منيره

يعطيج العافيه [/QUO
ويي ماعارف اعدل :0bee2e8d89: الظاهر حدي اندمجت بالدور وغصب اخذ مكان منيره :dddds:

ستري على ماويهتي:ggdw: