وينكم يالذربات ابي فزعتكم

[بنت ولا كل البنات]

يالغاليات اخت زوجي ملجت وابي اهديها هديه وابي افكار منكم شنو اهديها وبس سلامتكم

 

[منارو]

جنطة ماركه مع بوكها او حتى مع الحزام او الجوتي ((عزكم الله)) كلهم طقم نفس الماركه

 

[~ام خالد~]

عطيها فلوس اريح لج واهي تستفيد تاخذ فيهم اللي تبي
وديهم بيت الهدايا يحطونهم بعلبه ويزينونها
وتحصلين بعد شغلات وايد عندهم

 

[دلوعه زوجها]

السلام عليكم
شوفي اختي احلا شي تنوعين بلهديه انا ماحب اقدم هديه وحده بس وعندي افكار وااايد حلوه بس لازم اعرف جم ميزانيتج تقريبا عشان اقولج وصدقيني راح تقول احلا هديه يتني من مرت اخوي بس قوليلي جم حاطه ببالج وراح اظبتج

شكرا

 

[بنت ولا كل البنات]

دلوعه زوجها.....................400 دينار حدي

 

[دلوعه زوجها]

اوكي 400 حلوين وتقدرين تسوين فيهم احلا هديه خل اعطيج فكره حلوه ويديده وراح تسولف بهديتج طول عمرها من كثر مو راح تعجبها اوكي يلا الحين نبلش
اول شي
بما انه احنا علي ابواب الشتا اخذيلها بالطو شتوي من مانجو بو 50 دينار جذي
واخذيلها بو 100 دينار ماسكرا وبودر وكريم اساس وبلاشر وجلوس شانيل
واخذيلها ساعه دكني بو 50 دينار وتحصلين عندهم اشكال راقيه وحلوه واسعارهم مو غاليه وايد يعني تحصلين ب 50 شي راقي
ظل عندج 200 تشترين لها ب 150 قمصان نوم كشخه ومانصحج بل ايوب روحي نعومي او تيريمف اللي بلافنيوز فوق وبتحصلين عندهم احلا قمصان نوم وبيجمات حق عرايس
واخر خمسين تشترين فيها بوكس من بوابه الهدايا ب 12 الحجم اكبير وتكتبين عليها مبروك وتشترين من صيدليه بوتس اللي بل افنيوز كريم الجسم اللي علي فرواله فظييع ريحته تهبل ومعاه البدي سبراي ماله واخر 30 تقريبا اخذيلها فيه كفر ساتان حق البيت أو طقم روب وفوط كشخه حق الحمام وموجود بكل مكان تحصلينه واحلا شي ب لاسنزا
واخيرا حطيهم بلبوكس ورشي فوقهم ورد مجفف وسكري البوكس وعطيها الهديه وخليها تنبهر واهي تبطلها لانها كل شوي بتشوف شي حلو وغير عن الثاني
اتمنا اكون فدتج
شكرا

 

[دلوعه زوجها]

حبيبتي صج نسيت اقولج اذا تبين قمصان نوم فكتوريا سيكريت من امريكا مباشره عندي صديقتي تيبهم وحدهم حلوين والله اذا تبين اعطيج رقمها واهي تيلج البيت
شكرا

 

[دلوعه زوجها]

ماعطيتيني رايج !

 

[بنت ولا كل البنات]

والله خوش راي فديتج هي ملجتها الليله وودي ادزلها على بيتها باجر باقه ورد ووشوكولاته وش رايج حلوة الفكرة او لا

 

[بنت ولا كل البنات]

وينج

 

[دلوعه زوجها]

سوري حبي طلعت شوي
وحلوه سالفه ادزين ورد وكاكاو لأنها ماراح تتوقع انج بتعطينها هديه
ماقلتيلي اذا تبين قمصان نوم فكتوريا سيكريت عشان اعطيج رقم البنت
مشكوره

 

[بنت ولا كل البنات]

دزي لي رقمها على الخاص

 

[<< أزيان >>]

حبوبه عطيها فلوس او اشتري شي تستخدمه لأن بالنسبه للملابس والمكياج الناس اذواق يمكن مايعجبها ذوقك وفلوسك تروح عالفاضي ويمكن تفهم ان قصدك ذوقها موحلو لأنها صارت فيني شريت لحماتي هدوم العيد يعني بفاجأها والله انها غاليه ومن محل معروف وزعلت ومالبستهم وعندك حل ثاني اشتري قسايم من محلات الشايع بالمبلغ إلي تبينه وقدميها بعلبه كشخه وتروح اهي تتسوق وتشتري الي تبيه

 

[دلوعه زوجها]

حبيبتي دزيتلج رقم البنت عل خاص
اذا ماوصل قوليلي لاني اول مره ادز عل خاص خخخخخ
عليميه عادي
مشكوره

 

[اطباق ماي ورد]

البنات ما قصروا

وماشاءالله عليها دلوعة زوجها ما خلت لنا شى نقوله خخخخ

بس والله هم عطتنا افكار حلوه

 

[منارو]

حبيبتي صج نسيت اقولج اذا تبين قمصان نوم فكتوريا سيكريت من امريكا مباشره عندي صديقتي تيبهم وحدهم حلوين والله اذا تبين اعطيج رقمها واهي تيلج البيت
شكرا

حبيبتي ممكن الرقم لو سمحتي

 

[دمعة يراع]

خوش فكره دلوعه ..

 

[ssun2]

شكرا للاخت دلوعه زوجها ما شاء الله ماقصرت بس انا افضل مثل الاخوات ان تغلف الفلوس بكرت وعلبه حلوه علي ذوقها وتعطيها وهي علي ذوقها تشتريلها اللي تبيه ويعجبها.شكرا.دمتي لنا.