ولد وسط بنتين

[ElN00R]

السلام عليكم يابنات شلونكم
انا حبيت اخذ رايكم بشغله للي عندهم خبرة بهالموضوع الي هو صغير 7 سنوات وسط بنات اكبر منه واصغر منه ب سنه وسنتين، خياراته كلها مثلهم الألوان، الألعاب، الاهتمامات بشكل عام
انا مره قريت ان الحل يكون مع ابوه او خاله وعمه واولاد من عمره
للأسف كلهم مو متوفرين حتى بالمدرسة ماعنده اصدقاء ومره اضربه زميل ف الفصل معاه.

شخصيته ضعيفه
هادي
خواف (يخاف من كل شي حتى الحشرات او الصوت العالي)
يحب ألعاب البنات
حنون ماعرف شلون افهمكم حنيته لكن يحب يبوس خواته ويلممهم
طريقة كلامه فيها دلع

الي بتقولي شتري له سيارات وتشيرتات سوبرمان وجذي انا جربت لكن مانفع

من ناحية الابو ماعنده اسلوب ولمن عرف بالموضوع في موقفين حابه اذكرهم

على تشريت وردي قاله كلام غلط ينقال حق ولد صغير احرجه يعني وصرخ عليه لأن الولد كان ماسك تشيرت يبيه

مره البنات طلبو اسكريم مثل بعض هو كان يبي مثلهم ابوه صرخ عليه وغصبه يشتري نوع غير وتم الولد يبجي وبعدها صار الموقف اسوأ واسوأ ف أنا غسلت يدي من الأبو خلاص وحبيت استفيد من خبراتكم لاتبخلون علي

 

[أم حسوون]

السلام عليكم ، ما عنده عيال خاله أو جيران أو عيال صديقاتج المقربات ، المهم خليه يختلط بصبيان ويتعود عليهم ، لأن شكله متأثر حيل بخواته لأنه معاهم على طول ، دخليه نادي كراتيه أو سباحة خليه يطلع مع أبوه بروحه بدون خواته ويروح مع أبوه للديوانيه ، وخليه يروح المسجد مع أبوه يشوف صلاة الجماعة ، والله يرزقج بأخو صالح له .

 

[صابرين]

واااي نفس مشكلتي والله بس انا العودة 4 سنوات واهوا 2 واللي تحته 4 شهور
نفس الشي احسه دلوع وبسرعه يبجي ويبي نفس العابهم لدرجه صرت اقسى عليه شوي اذا بجى اعصب اقوله لااا تبجي انت ريال ولا احضنه وايد
مااادري شسسوي المشكله كل النوادي مايستقبلون الا 4 سنوات وفوووق

ترا انتي اهون مني وددييي نوادي كرة قدم احسن شي لا تودينه كراتيه ترا هالرياضه تخليه قصييييير ديربالج
الله يرزقنه برهم ويفرحونه ويرفعون راسنا ياارب

 

[صابرين]

وااااااي لااااااا ترا انا موحامل ضاق خلقي لما شفت التوقيع توني والدة بس التوقيع مخرف

 

[زين ودلال]

شركيه بنوادي

ولا تزفونه وتعصبون عليه لا قلدهم راح يعاند وتدشون بمشكله اكبر

لا تبينون له ان اهو بمشكله يبيلها حل

عادي خليلعب مع خواته بالعابهم لان مسكين صج شنو يسوي ماعنده احد يلعب معاه لعب مع خواته واليهال اغلبهم يحبون المشاركه

خلي الوضع عادي

انتي حببيه بالعاب الصبيان لعبي معاه

اشتريله بلايستيشن

 

[om mido]

لا تغصبينه يسوي شي اهو ما يبي يسويه
انتي لازم تحسسينه ان اهو غير عنهم يعني مثلا تركبين السيارة اهو يركب جدام اذا كنتي تسوقين وقوليلهم ان اهو الصبي فاهو الي يقعد جدام
عندج شي بالبيت بتسوينه يبيله مثلا قوة ناديه تطلعين معاه جمعيه مكان خليه يدز العربانه معاج خليه يشيل اغراض معاج يعني لا تساوين بمعاملتج بينهم عامليه غير عن البنات
والله يخليه لج ان شاءالله

 

[طيبة83]

الوحيد الي يقدر يساعده في هل شي ابوه

عموما الشذوذ الجنسي بعيد الشر عن ولدج وكل عيال المسلمين من اهم اسبابه نقص حنان الابو فالولد اذا كبر يدور حنانه من احد ثاني

انتي اخذي زوجك بالحيله لا تحطين في باله ان ولدج يقلد بناتج بالعكس دايما سولفي لزوجك ان ولدج ريال وغير عن خواته وتصرفاته تشبه ابوه وقوليله انه متعلق فيه ويقول اذا كبر يبي يصر مثله

ونفس ما قالت وحدة من البنا خل يروح المسجد صلاه الجمعه يشوف الرياييل

 

[انصاريه قمره]

حبيبي عووور قلبي حييل
صاجه زين ودلال فقير ما عنده احد يلعب معااه الا خواااته انزين شركيه بنااادي تكواندو خليه يرافج صبيان من عمره معقوووله ما عنده عيال عمام او خوااال انزين عيال جيرانكم ؟؟ حسسيه انه اهوو ريال البيت مثل ما قالت وحده من البنات خليه يقعد جدام واعتمدي عليه بأمور كثيره وابوووه لا يزفه ويطقه تراااا هذااا مو اسلوووب يتعامل فيه مع طفل ريلج فاهم التربيه غلط الله يهديه