ولدي ونقص الاكسجين

[شمشونه]

بنات انا ولدي عمره شهرين وفيه نقص اكسجين حاد والقصه من الولاده (انا جاتني الولادة بأول اسبوع بالتاسع وتوني باول الولاده طلق خفيف والرحم مفتوح 2سم هبط نبض الجنين فجأة ومستشفى العدان اخرني حيل بالولادة مع ان الجنين تعبان ردوني البيت قالوا انتي باول الولادة وانتي بكر فراح تطولين تردين البيت احسن وماقالو ان التخطيط كان غير مطمئن حسبي الله عليهم ورديت وتعبت بعد 6ساعات ورديت المستشفى وسوولي تخطيط وبعدها صارت العفسه اشوف ناس تركض وناس تصارخ واسمع كلمات مثل قيصريه ومات وسسترات العدان طبعا بدفاشتهم المعروفة يلبسوني وبدون توقيع عالعملية سوولي قيصريه والله العظيم كل هذا باقل من خمس دقايق وماكنت ادري ليش كل هذا بعدين عرفت ان ولدي انولد ميت وسووله عملية انعاش وسيده نقلوه للعناية المركزة وبعدين شرحولي الحاله بعد ثلاث ايام من الولادة بعد اصرار مني اني اشوف ولدي عرفت ان ولدي صار فيه نقص اكسجين حاد نتيجة تاخير بالولاده فهمني الدكتور شنو النتايج اللي ممكن انها تصير ممكن اعاقه ذهنيه اوجسديه وتشنجات وتلف كلي بالمخ طبعا انا انهرت وصرت اروحله كل يوم اقرا عليه سورة البقرة كامله مع الاذكار وحالته تتحسن شوي شوي وطبعا الي عرفته ان نقص الاكسجين ماتبين نتايجة الابعد 6شهور
والدكتور قالي قولي الحمدالله ولدج كانت نسبة ان يكون طفل سليم 5% والحين صارت50_60% وهذا نادر مايصير وولدي الحمدالله صارله 10 ايام طالع من المستشفى بس كل ما اسال هل هو طفل طبيعي يقولون ماندري هذا بعلم الغيب راح تراجعين بولدج لين يكمل خمس سنوات
حسبي الله على مستشفى العدان بسبب التاخير والاهمال
واللهم لا اعتراض اللهم اني لا اسالك رد القضاء ولكني اسالك اللطف فيه
بنات ابي اعرف ناس عندهم حالات نقص اكسجين شديد ابي استفسر منهم
الله يشفي مرضانا ومرضى المسلمين

 

[ii DareeN ii]

اول شي ترا معروف مستشفي العدان بسوالفة ويا اليهال صارت ويا ولد اخوي لكن راح الله يرحمة الحمدالله الله سلم لج وليدج والي اعرفة ان هالحالات بعضها طبعا مو الكل يصير وياهم بطئ نطق او يتاخرون بالمشي لكن يودونهم علاج بالخارج المانيا يعالجونهم وان شاء الله يكون طبيعي ومايحتاج استمري بالقران وادعي ربج وراجعي فيه طبيب مختص زين في د السعيد مال الاطفال زين وشاطر لو تراجعينة عشان يشوف حالة الولد احسن لج

 

[om_3esa]

الله يشافي ولدج انشالله استمري بالقرايه ووديه عند احد يقره عليه ويعطيه ماي مقر ي وانشالله يااااارب يتشافي والله يخليه لج ويبلغج فيه

 

["غلا مطير"]

حسبي الله عليهم

حبيبتي ديري باااااااااالج انا اختي جذيه وعطووووها ادويه زادت الحاله عندها
وووديه براااا احسن والله يحفظه ويخليه لج ياااارب

 

[الرهيييفه]

الله يشافيلك ولدك

شوفي حبيبتي انا نفس حالتك وعندي بنت "نقص اكسجين "
بس هذا الكلام قبل سبع سنوات كنت بكر وجاني الطلق ورحت الفروانية الله يسامحهم وقعدت 3ايام اتولد وتعبت حيل بعدها ولدت وجبت بنت طبعا انعشوها وحطوها بالعناية شهر كامل وصابتني حالة نفسية في نفاسي وكنت ماأقدر اروحلها الا قليل بسبب الخياط المهم لما طلعت من العناية اخذتها للبيت وقالي الدكتور ماراح نعرف وين الخلل الا بعد فترة وتميت معاها علاج وادوية وقراية عليها ولما كبرت عرفت الخلل وين ( صار معاها مشاكل في البلع والكلام والحركة ) والحمدلله هذي نعمة من الله ولازم نشكرة عليها

والله يصبرك ولايصيبك الملل أو التعب اتعبي معاه وراح تشوفين نتائج حلوة ان شاء الله

 

[um-naser]

اللي لاحظته من حالت بنتي -عندها تشنج- و الحالات اللي شفتهم بمستشفى مبارك قسم الأعصاب ان الأدويه مسويه حق الأطفال صعوبه بالبلع وشد بأعصاب الرجل و حركات لا اراديه و هذا عن تجربه بنتي لما صار فيها تشنج بسبب خرعه_كانت خايفة من لعبه_ وبعدها تكرر عليها التشنج مرتين عطوها دوا ديباكين ولما ظلت تتشنج كان الدكتور يزيد الجرعه لما وصلها فوق المعدل تدرون اشصار فيها قامت فجأت تطيح ينشل نصها اسم الله عليها و قامت تسعبل وماتقدر تصعد الدرج و تعرج و تضحك بطريقه هستيريه وبعدها تتشنج نصها وطلب الدكتور اعادة الاشعة المغناطيسيه طلع بداية ضمور بالدماغ مع ان الاشعه اللي قبلها قبل العلاج كانت طبيعيه تماماوالبنيه مولوده طبيعيه وما فيها الا العافيه
طبعا الدكتور مو مقتنع ان الدوا مسوي فيها هالسوالف رفض انه يوقفه ويبي يعطيها واحد ثاني معاه انا رفضت ووقفت دواها بالتدريج وألحين الحمدلله راحت هالأعراض بس التشنجات موجوده وان شاءالله ناويه أوديها بره
نصيحه ودوا عيالكم بره لأن علاج الكويت مال الأعصاب يسوي تخلف

 

[@ الحلوة @]

فل لن يصيبنا الا ما كتبه الله لنا ونعم بالله
صاجة اختى ما اتيى البلاوى الا من ..........
والله يعينج ويعين الخوات وماجورين ان شاء الله

 

[شمشونه]

مشكورين حبايبي على ردودكم وعسى الله يشفي مرضانا ومرضى المسلمين

 

[ام حنونة]

الله يشافيه ..