ودييييييييييي اسافر بس ماكو ميزانيه حدنا 1500 وين تودينا هذي :(

[حاااايره]

مرحبااااا

انا حزينه:0bee2e8d89:

وزعلانه

ومعصبه :eh_s(14):

وهم لايعه جبدي :cxxxp:

انا العام ماسافرت كنت حامل وزوجي وعدني هالسنه بسفره حلوه يعني يعوضني

والحين يتأسف يقول ماعنده ميزانيه اللي عنده بيدفعهم رسوم جامعته وانا قعدت ماعنده الا 1500 :eh_s(14):

شتسوي هذي ؟؟

لحد يقولي روحي الايمارات رايحتلها بالشتا اللي طاف ومابيها بالصيف ابي اغير ومصر ملييييت منها وما احبها بالصيف صياااعه وتركيا اكرهها كره العما وماليزيا رايحتلها ومابي اردلها >> فقرانه وتشرط



الله ياحلوين قولولي وين اروووووووووح شرايكم بسويسرا ؟؟؟ >>> اضحك اضحك

يالله يالشطار رشحولي ديره رخيصه وكويسه :ggdw:



سلاااااااااااااااااام

 

[بتبوتااا]

روحي شرم الشيخ حبيبتي ترى غير عن مصر بالمره شوفي ياقلبي لاتاخذين فندق غالي هناك اخذي فندق عادي

ورخيص ومع التذاكر يعني كله بيطلع عليج قولي الف ووشوي وترى 400 دينار تكفيج عشر ايام هناك والله ورب الكعبه ما ابالع احنا صرفنا حق عشر ايام بس مصرف 500 دينار مع العلم انا وريلي وخدامتي وثلاث يهال
وانا اقول لج شلون توفرين اول شي لايطوفج ريوق الفندق لانه مع الفندق ووجبه عشا او غدا هم بالفندق

يعني ان تغديتي بالفندق تعشي برا او تغدي برا وتعشي بالفندق وفي رحلات مع غداها او عشاهاا
واذا بتروحين سينما ترى التذكره ب 15 جنيه مادري 25 جنيه يعني دينار او 750 فلس والرحلات الشخص على 5 ونص او 6
واذا تبين تعرفين اي شي انا اقول لج حبيبتي وشوفي موضوع فراوله فوشيه مثبت عن شرم الشيخ وفي بعد موضوعي بس ادور الرابط اذا حابه دزيلي رساله

 

[بتبوتااا]

او روحي سوريا او ايران اذا كلش كلش يعني بس نصيحه والله روحي شرم الشيخ مارح تندمين

 

[^kloOot^]

تركيا رخيصه بالعكس حلوه

روحي سالى السفريات عن اسعار التذاكر

 

[حاااايره]

اهلين بتبوتا ماااااااااااااااااااشاءالله صرتيي بالثامن؟؟

بسرعه مشى الوقت والله اذكرج امس كنت انا حامل بال 9 وانتي بالرابع شلون جذي؟؟

وشرم ودي فيها بس مو كلا مفاصيخ >> شهالكلمه قديمه؟؟ لا جد مو كلا بكينيات وجذي؟؟ انا اغار >> عشتوو



وسوريا وايران لاااااااااااااااااااااا لاااااااااااااااااااااااا مستحيل لو ما اسافر طول عمري ما اجيهم مااحبهم من اسمهم



يسلمووووو يا عسل والله يهون عليج يااارب

 

[حاااايره]

ام جوري اعرف تركيا واسعارها صج تناسب ميزانيتي بس ما احبها >> قلتلكم طراره وتشرط

 

[miamy]

ممممممممممم

والله مادري ماحبيت ادش وما ارد

انا اقول قزريها شاليهات بالكويت بعد شتسوين.

اذا ما تبين دبي، ولا تركيا ولا سوريا ولا مصر وين تروحين

روحي البحرين شرايج

ترا السفر يونس تصدين شويه عن الديره والحر

 

[منورة الكويتية]

روحي تايلند
او المالديف بس غالية
المغرب
صلاله
هذا الي خطر ببالي

 

[@ دهن العود @]

نفس ميزانيتى

وقلت ماكو الا مصر اللى تمشى الحال ههههههههه بس هم يقولون هالسنه غاليه وهالميزانيه ما تكفيها

الله يعييييييييييييييييين

 

[شهدQ]

عندج سنغافوره لمدة 6 ايام ممكن تكفيج اذا على الطيران السيلاني وشهر سته قبل لاتطير التذكره والفنادق

او الهند او سيرلانكا لمدة 8 او 9 ايام

واعتقد هم الصين رخيصه فيها اماكن سياحية وتاخذين لج 3 ليالي بهونغ كونغ و5 ايام سألي بنت عبدالغني شربت تكلمت عن مكان رووعه هناك نسيت اسمه

 

[بتبوتااا]

هلا حبيبتي حايره لووول اي والله ماشاءا لله الوقت بسرعه يمر راح الكتير ومبقاش الا القليل

المهم ياقلبي من اناحيه البكينيات فراح تشوفين بكينيات

بس مالج شغل فيهم حتى اهم بحالهم ترى

انا عطيتج فكره وانتي فكري عدل او عندج بعد ماليزيا وسنغافوره وتايلند

 

[سمبوسة]

حبيبتي اذا انتوا بس اثنين ترا في أماكن واااايد انا أقولج
ممكن قبرص فيها منتجعات روعة
قبرص مثلا صج انها بحر بس الفنادق حلوة وفيها تمشي وسوق وشوفي هالفندق يينن ب 34 دينار الليلة والتذاكر على الجزيرة 88دينار للشخص
http://www.kiwicollection.com/property/londa-hotel
عندج مثلا أوروبا بتقولين غالية أقولج انت وشطارتج
مثلا ألمانيا التذاكر أقل من 200 يعني أربع امية دينار ,السكن في فنادق حلوة ونظيفة بحدود أربعين قولي اسبوع 280 دينار يعني بقالج ألف دينار مصرف من أكل ومواصلات واذا تعلمتي على القطار والاندر قراوند 3 دنانير كل مشاويرج باليوم لأن عندهم التذاكر عائلية يعني انتي وريلج 9 يورو باليوم تشاخطون بكل ميونخ روحة وردة على كيفج محد يحاجيج وهذا الكلام عن تجربة ومو لازم تتسوقين لأن هذا اللي ياكل الفلوس والله ما يسوى كل شي بالكويت ومنها بالقطار تقدرين تروحين النمسا حق سالزبورج ب 29 يورو يعني 12 دينار رايحة ديرة ثانية ورادة بنفس اليوم على فكرة بس ساعة ونص بالقطار واذا عجبتج فكرتي قوليلي أعطيج أماكن قريبة بحيرات وجبال تدوووخ والرحلات ما تكلفج أكثر من مية يورو تذاكر قطار وغدا وايس كريم ووناسة وممكن تروحين حدايق ببلاش خضرة وبط وتمشي وهذا ما تكلفج شي
هذا فندق هوليدي ان واسعاره
http://travel.travelocity.com/hotel...07/25/2008&returningDate=07/26/2008&pax_cnt=2

بتشوفين ان سعر الغرفة الستاندرد 153 دولار يعني 41 دينار الليلة وشوفي صوره

وهذا فندق 183 دولار الليلة ونظيف شوفيه
https://www.cheaptickets.com/Secure...e&z=554f&r=2&z=5550&r=3&lastPage=interstitial

وادعيلي اذا الله يسر لج انشالله

 

[وردة نقية]

أنتي مثل حالتي ربع زوجي كنادرة راحوا لفوا الدنيا واخرتها مارسوا الا على ابها

مسك زوجي كلامهم وماراح يوديني الا ابها.

الله يكون في عوني وعونج.

 

[Pissy Missy]

احسن شي تروحين حق سفريات ثقه واتقوليله ميزانيتج واهو يرتبلج رحله

عندج سفريات بودي والفهد وايد مضمونين وفاهمين

ومثل ما قالت بنوتااااا روحي شرم الشيخ ماتكلف و حلوه جوها غير عن القاهره

انا رايحتلها مع ريلي وتقريبا كلفتنا بهل حدود

 

[حاااايره]

ميامي الله يسامحج

البحرين بالصيف حرام الكويت ارحم

عموووما يسلموووو ياعسل



منوره تايلند وارده فكرتها يسلمووووو




دهن عود اي والله الله يعين بس الله يعينج على مصر ياربي خز مخازز ومصبنه وبنات فصعات وزحححححححححححححمه وحر وااااي ما اتحمل جذي مصر حلوه بس مو بالصيف




شهد يسلمووو حبوبه شكلي بشوف الصين ممكن اجربها؟؟؟

 

[حاااايره]

لااااااااااا لاااااااااا يا بتبوتا انا مابي مفاصيخ >> مصره على هالكلمه بس يسلموووو يا حلوه


سمبوووسه انتي 100 % معقوله ميزانيتانا تكفي؟؟

ابشرج زوجي قال لج 2000 وانا مو راعية شري بس بغير جوووووووووو زهقتني الكويييت عطيني بعد عجبتني فكرتج




ورده نقيه الله يهنيج بس انا مابي ابها لالففني العالم مايخالف اروح ابها بس مني والطريج اروحلها لااااا مابي





ام يوسف قلتلكم مااحب المفاصيخ ياربي اغاااااااار اغاااااااااااااار >>> عششششششششششششتوووووو اللي يسمعني يقول اللي عندي ريكي مارتن

 

[سمبوسة]

يالله جابليني ويبي بفك وبيبسي وانا بخطط لج _03BA:
بسم الله
أول شي التذاكر شوفي الله يسلمج انا العام رحت على القطرية كلفتني 230 دينار الشخص واحنا 4 وراح تلقين طيران ثاني أرخص مثل الأردنية رفيجتي وايد تمدحها بس يالله قولي 250 على الاماراتية أو القطرية ما دام الميزانية زادت :dddds: هذي 500 ونصيحة التذاكر حجزيها من مكاتب السفريات مو من الانترنت لانها وايد أرخص

السكن : اذا شفتي الروابط اللي دزيتلج اياهم هذي الفنادق معروفة عند الكويتيين وعموما انا قلتلج ألمانيا من بد اوربا لأنها أرخص بالفنادق وأرقى بالخدمات والنظافة فالفندق بيكلفج بالليلة 42 قولي خمسين يالله والمدة اسبوع 350 يعني السكن والتذاكر 850 وحجزي الفنادق بالانترنت والله أرخص وعن تجربة ما صادفت أي مشكلة فيها سهالات
بقى لنا 1150
شوفي من البداية أقولج بتروحين بتكاسي راحت فلوسج وروحي أبها مثل ما قالولج أحسن لج :dddds: لااااازم الأندر قراوند وترى سهل يمكن أول مرة تضيعون بس من تتعلمون عليه حده سهل ومتروس خليجيين والألمان طيبين ويساعدون المهم تحجزين تذكرة يومية ب9 يورو عائلية حق داخل ميونخ هذي تستخدمينها طول اليوم كثرررر ما تبين يعني من الفندق تروحين السوق وتروحين حدايق المهم أعطيج مثل
أول يوم تروحين بهالتذكرة من الفندق الى محطة مارين بلاتز وهذي منطقة الأسواق والمطاعم تمشي واكلي في ماكدونالدز الوجبة أظن ما تتعدى 5 يورو عقب روحي بالاندرقراوند حديقة الانجلش قاردن والدخلة ببلاش حديقة مثل الهايد بارك زرع وبحيرات وتمشي وردي الفندق ريحي عقب ردي المارين بلاتز للعشا وتمشي يم محطة القطار الرئيسية تلاقين محلات الأتراك شاورما وغيره قولي العشا 12 يورو واذا تبين الكافيهات العادية بيتزا وغيره العشا 35 يورو بالكثير
اليوم الثاني تروحين بالقطار من محطة القطارات الرئيسية الى قارمش وهي مدينة تبعد ساعة بالقطار عن ميونخ اذا ماني غلطانة تذاكر القطار العائلية كانت 30 يورو حقنا احنا الأربعة يعني 12 دينار تقريبا طبعا ما أبي أوصف لج الطريج نفس خط الوفرة:dddds:
هذي المدينة بتقضين فيها اليوم وما تشبعين هي جبال هي خضرة هي كافيهات هي بيوت ألوان وورود شي خيالي ومنها تروحين بحيرة بالباص ثلث ساعة وتركبين تليفريك بالجبل للقمة وبعدين تردين الفندق وتنامين على فكرة رفيجتي راحت نفس الرحلة مع سواق عربي كلفتهم250 يورو واحنا بس ثلاثين !!! شفتي لما أقولج انت وشطارتج
اليوم الثالث بتذكرة أم 9 يورو تروحين الحديقة الأولمبية تتمشين فيها عقب تروحين معرض البي ام دبليو طبعا هالطلعة حق ريلج أكثر_03BA: يعني نوسهم شوية بس الحديقة حلوة وفيها برج عاااالي تصعدين فوق وفيه مطعم وعقب روحي المغربية المارين بلاتز تعشي
اليوم الرابع تروحين بالاندر قراوند بحيرة ثلث ساعة عن ميونخ بحيرة محاوطة بالجبال طبييييعة سبحان الله وحواليها كراسي وكافيهات وباخرة تتمشى فيكم ساعة ما تملون نهائي ومارح تكلفج هالطلعة أكثر من عشرين يورو!!
اليوم الخامس تروحين سالزبورج وهذي بالنمسا طبعا الروحة بالقطار مو الاندر قراوند وسعرها 39 يورو تقريبا ومدة الرحلة ساعة ونص تتمشين بالمدينة وتتسوقين وتروحين حديقة النوافير وبيت موتزارت وتقدرين تروحين منها زلامسي بس شوي بعيدة يمكن بعد ساعة ونص من سالزبورج
اليوم السادس تروحين بالباص وهو نفس تذكرة الاندرقراوند هذي أم 9 :tek: تصلح للاندر قراند والترام والباص المهم تروحين قصر نيفين بيرج القصر رووووعة من أثاث وغيره وتروحين عقب الحديقة مالته كبيييرة ومليانه ورد وخضرة وفيها نهر بالنص واليوم السابع تمشي بالسوق وشري صوايغج وصكي جناطج وتعالي سولفي لنا شسويتي _03BA:
شوفي انا والله العام كنت حاطة ميزانية كبيييرة للسفرة بس والله زادت الفلوس بسبة القطار والاندرقراوند والتخطيط الجيد غيري راح نفس الرحلات وقط دبلات أهم شي الواحد يسأل ويخطط عدل واذا تبين دزي لي اميلج بالخاص أدز لج صور الأماكن وبس تعبت:cxxxp: ادعيلي الله يوفقني ويرزقني اللي في بالي

 

[بنت عبدالغني شربت]

وانا مع شهد سنغافوره وهونغ كونغ يهبلون وما يبيلهم مزانيه وايد

 

[lala2]

انا همن ميزانيتنا بحدود 2000 او اكثر شوي ومعانا عيالي 4
وين اروح ونفس طلب حايرة مابي اروح لللاماكن اللي اذكرتها
استثناء ماليزيا كم تكفينا ميزانية؟؟؟؟؟؟؟

 

[غيـ الناس ـر]

لا يحوشج اوربا ميزانيتج 2000 والله تروحين وتتوهقين هناك .. سمبوسه ما فكرتي بالشغلات الطارئه اللي ممكن تصير !!

السفره اللي فيها محاتاة والله احسن انج ما تسافرين لها ..


اوربا يبيلها واحد عنده بحسابه الاف شوي يرتاح باله وهو مسافر ما يقعد يحسب على نفسه كل شي ..

مطاعمهم بالمانيا ما تطلعين الا ب 40 او 50 دينار لشخصين .. انا مجربتها !

وفنادقهم يقولولج ب 40 الليله بس تعالي ليما تسوين جيك اوت قالو ريوق قالو عشا قالو مادري شنو


انا حجوزاتي مع ريلي بالفنادق 5 ايام كلقتنا فوق ال 600 دينار ..


انا اقول روحي عمان .. في منتجع اسمه الشانقريلا واااااايد راقي وحلوووو وترى عمان جوهم خيالي وطبيعتهم حلوه .. هذا المنتجع ليلته ب 200 دينار بس تروحين مرتاح بالج