وا حر قلباااااااااااااااااه !!!

[سارووه الاموره]

حبوبه نظمي جدولج اليومي وبتشوفين عند فراغ واايد وتسلي بهالفراغ لج انتي وريلج والبيبي تقدرين تحطينه عند اهل ريلج اذا اهم حبوبين مو شرط الوالده ....

 

[**وقفة فرس**]

حياااااتي....هذي مرحلة كلنا مرينا فيها خاصة اللي مدلعة عند أهلها وما جربت تمسك بيبي...تحسين إنج مو مع الناس وإنج كبرتي 20 سنة بس هذا كله وهم وصدمة من المسئولية...وترا ألحين الطلعة مع البيبي أسهل وأخف من بعدين...شلون باجر بتجيبين الثاني والثالث...شالصعوبة في دزة المسج وحركة خفيفة وسهلة منج؟؟؟هذا إنت دشيتي المنتدى وكتبتي وقاعدة تكتبين..يعني في وقت...نظمي وقتج وحطي خدامة...وحقوق زوجج عليج لا تهملينها بس بحدود المعقول...اهو بعد لازم يتفهم وضعج ويعينج..قعدي معاه وفهميه شتحسين فيه وشنو محتاجة منه....الله يوفقج وكل مسلم

 

[cute00]

حبيبتي ما حبيت اطلع قبل ما ارد عالموضووع
الطفل بهالعمر كلله ناايم
وحاولي انج تنظمين نوومته بحيث من الساعه 11 ونص ينام عالاقل 4 ساعات وتشوفين نفسج بهالساعات
وبعدين نصيييحه لا تركضين لولدج كل ما صرخ اذا كان مبدل ونظيف وراضع شبعان حطيله مصاصه وينام لا تعودينه عالشيل والحط
راااح تتعبييين
والطلعه عادي حطيه عند خدامة امج

 

[الجــادل]

حطيلج نيرس حق البيبي

على الاقل لو شفت ليل

عشان تشبعين نوم

وتعدل نفسيتج وتفضين لروحج

وبعدين حطي خدامه تشيل شغل البيت

 

[whitish]

قولي الحمدلله ولا تسوين من ولا شيء شيء بالعكس هذي المفروض تكون احلي فترة بحياتج الزوجية

الله يوفقج

 

[اميرة-الاحجار]

امبيه العنوان يخرع ههههههه
حبوبه عادي الاكتئاب يحوش الوحده من النفاس لي جم شهر بعد شوي تحسين انج خامره وظايق خلقج وكئيبه
مو شرط تروحين السينما اشتري الدي في دي توي ستوري وحطيه بالبيت وسوي قعده رومانسيه اشتري الفوندو وحطي شموع وخلي ولدج ينام ماي غريب شوي جرعه زايده وخلي ولدج ينام نوم العوافي وسهرو مع بعض
بالبيت لاتخلين ريلج يتعود على سهر برى البيت ترى بعدين بياخذها عاده والعاده تصير طبع وبعدين ماراح يتعدل الوضع من الحين سوي حركات قبل وشنو يعني طرشي رساله وايميل خو وانتي قاعده ماتكلف شي والعصير بعد جهزيه وحطيه بالثلاجه متى مافضيتي واعطيه قبل الطلعه
ان شاء الله بس يكبر ولدج شوي بيتحسن الوضع بس لاتعودين ريلج يطلع وايد بدونج

 

[.،:"$الـعـوبــــة$":،.]

عادي ياقلبي ، بس أول الشهور ، بس بعدين يصير عادي ويونس بعد ،،​

 

[شيري]

[

b]انتي أم يديده وموعارفه شي عشان كذي متوهقه وبكا الياهل مضيق خلقك والياهل الرضيع لازم ينام مابين 20 - 22 ساعه باليوم وهذا كلام الاطباء والكتب العلميه واذا ولدك ارتاح انتي بترتاحين وممكن انتي عندك نقص فيتامينات بعد الحمل والولاده عشان كذي تعبانه ومالك خلق والحل أخذي الفيتامين اللي كنتي تاخذينه وقت الحمل والدكتور يقول لازم نستمر ناخذه لحد6شهور بعد الولاده وبالطلعه حطي ولدك بعربه ودزيه واهو نام عادي وماراح تحسين فيه بكتبلك كم شغله إن شاء الله تفيدك وتعرفين مشكله ولدك باللبكي عشان ترتاحين وتنظمين وقتك​

الياهل ما يبكي باستمرار الامن :​

1- بطنه فيه غازات من الحليب>>>>>>>دواء للغازات موجودبالصيدليه يشربه الطفل ويرتاح
2_عنده إمساك وقبض من الحليب وبطنه يعوره>>>>>لازم يوميا بطنه يمشي فسوي له مساج بسيط علي البطن ودلكيه بشوي زيت زيتون أو دواء من الصيدليه
3_الحفاظه قديمه ومتروسه ماي فمأذيته ويحس بحراره تحت>>>>>> تبديل الحفاظه باستمرار وحطي طبقه من كريم سودو للحفاظات حطي علي المؤخره وبين الفخوذ
4-جسمه حارويحكه >>>>يتسبح يوميا قبل لا ينام أولما يقعد ويتدهن لوشن أطفال وينحطله بودر تحت الرقبه وتحت الأباط وعلي الظهر والبطن بيحس بالبروده ويرتاح
5-سرته ملتهبه>>> نظفيها بقطنه فيها ماي بالمسح علي خفيف واذا فيها احمرار أو ناقزه برا وديه الطبيب يعطيه دواء لها
6-أذنه ملتهبه وأكثر الصغار كذي >>>>>طبيب المستوصف يفحصه واذا ملتهبه لازم مضاد حيوي
7- يحس بالجوع >>>> رضعه مشبعه كل 3 ساعات
8-لسانه فيه فطريات بيضا ء من الحليب والمميه >>>>>>شربيه شويه ماي ورا كل رضعه وامسحي لسانه بشاشه فيها جلسرين سائل
9-الياهل المولود يخترع من ايده اذا تحركت واهو نايم تفززه أو يشمخ نفسه >>>>لفي ايده بالشرف وزهمليه بدون ربط بشدجسمه ويرتاح
10-يبي الشيل والهز>>>اذا بكي لا تشيلينه خليه بسريره وعطيه رضعته فالسرير
ونصيحه لا تحسسين ريلك انك متضايقه من الياهل ترا بكرهه ويمل منك خليه يشارك وحسيه بالفرحه بالولدمثلا قوليله ياحلوه نايم واشحلاته ومن هالكلام [/b]​

 

[شيري]

توني اشوف ردي اشطوله <<<<<< اتمني يفيدك

 

[LA TROO7]

الله يعينج لازم احد يساعدج يأ أمج يأ اختج يأ امه وخليه هوو بعد يساعدج يقعد عنده شووي وانتي تنامين مافيهااا شي تراا هم هوو ابووة

وبلشي رجيم عالخفيف عشان تضعفين وحاولي تتأقلمين مع هالوضع انسي حياتج قبل ولا تقارنين كلش

 

[روحي تحبه غصب]

ياحياتي عورتي قلبي اللي انتي فيه شي طبيعي لانه اول مولود وخايفه وماتعرفين تتصرفين

طبيعي الياهل يبجي اول ثلاث شهور بسبب الغازات ومالج الا تعطيني نقاط عند الصيدليه اسمها(gaz)(غاز)
يريحه وخليه ينام ولاتنسين تمهدينه لان الياهل يخاف من ايده ليمن يحركها واهوا نايم وتلاقينه يتفزز


ولاتغلطين وتهملين ريلج وتهملين نفسج ترى في رياييل يغارون من اليهال ويتضايقون
يعني حاولي تعدلين نومت ولدج خليه قاعد فترة قبل المغرب لي الساعه 9 وبعدين بدلي البامبرز وعطيه حليبه
وصدقيني راح ينام وعشان مايقعد عليج تالي الليل عطيه حليبه بوقته قبل يقعد واهوا نايم

وعلى الطلعه مع ريلج ومشتاقه للطلعات والتمشي ومحرومه بسبت ولدج وحسب كلامج ماتقدرين تخلينه عند احد ماااااالج الا الخدامه

انا طولت عليج بس كسرتي خاطري بس لاتنسين تشترين الدوا من الصيدليه لانج راح ترتاجين من بجيته وبنفس الوقت راح تهتمين بنفسج وبريلج

 

[منـــاي]

اشكركم جميعا على الرد ريحتوني بصراحه

 

[om MaRyooM]

مشالله البنات ماقصرو بالردود وافادوج ..

وعموما ياقلبي انتي مو اول ولاآخر وحدة يصير فيها جذي .. وللحين الياهل عمره شهر يعني لازم تشدين حيلج وتكونين قوية وقد الامومة لأن في ناس مشتهية ريحة الياهل بس ووراه طريج حرام لازم تستحملينه

وبالنسبة للطلعات تقدرين مرة بالاسبوع تطلعين مع زوجج وتحطينه عند الخدامة تروحين كافيه مثلا بس ساعة ساعتين تغيرين جو وتردين ..
ولو عندج احد من الخوات ممكن تحطين الياهل عندهم ..

بس عموما ياقلبي والله كلنا جذي لابد حياتنا تتغير بعد الولادة وعاد الشاطرة اهي اللي تقدر تأقلم روحها وتهتم بالياهل وبزوجها ولاتنسى نفسها بعد اهم شي .. عشان لايظيق خلقه ريلج بعد وينحاش من البيت

حاولي تكمتين شعورج يمه ووريه انج قد المسؤولية وان كلها فترة وتزول


والله يسهل امرج ياقلبي بس هونيها وتهوون ..

 

[om MaRyooM]

نسيت شي مهم

بالنسبة للعنونو الحلو الامور الله يحفظه لكم نصييييييحة لاتخربطيله بالادوية على بو تبينه يرتاح من الغازات
والله شكثر حريم كانو ينصحوني بسوالف للغازات وبامبي من الصيدلية وماي غريب ومادري شنو من هالخرابيط

ولما جربت على بنتي كانت بس تحن وتبجي . . فقررت اني ماأعطيها ولاااااااا دوا اللهم شوية ينسون مغلي بالماي مع حبة سكر نبات وولما يدفى اعطيها ياه .. لأن الينسون يهدي الياهل ويريحه .. وبسسسسس


عندي قاعدة كثر ماتخربطين بمعدة الياهل كثر مايبجي ويحن .. ديري بالج

 

[..فروحه..]

الله يعيينج

 

[خاتم ذهب]

ديري بالج تري اذا ماترستي عينه خلاااص اكيد بيدور هل الاشياء برررره وانت بس حق اليهال
لاااااااااااااااااااااااازم انج توفقين بين الزوج والطفل انت طفل واحد الله يخليه ومسوي جذي اشلون لو تيبين الثاني
فكري عدل وشنو يعني لو زاد وزنج 10 كيلوو سوي دايت ولبسي حق الريال

 

[سمسومه]

ربي بعينج لا تحاتين إن شالله ... لما تشيلين البيبي قولي يارب عيني يارب عليك ولا على غيرك


سئلي الله و محد بعينج غيره سبحانه

 

[كويتيه مذهله 87]

اشدعوه حبوووووبه حياتج متوقفه مع ولدج كل الي اعرفهم عندي بيبي ولا بد 2 و3 يطلعووون عاادي

انتي قسمي وقتج وشي طبيعي اول بيبي بتحسين حياااتج تغيرت

 

[سفيره الهم]

اول شي الطفل بعمر الشهر اذا يبجي على طول معناته غازات خص اذا حليبه سميلاك
الحل"انج تسوين هالخلطه لا تخافين وتقولين راح يضره انا ام لاربع اطفال وكلهم كنت اعطيهم الخلطه من ثالث يوم ولاده الخلطه من الحواج عشان الغازات تروح وينام الطفل نومه حلوه الخلطه هي ينسون وكراويه وبابونج تاخذين مقادير متساويه وتفوحين ماي ولما يفوح الما حطي المقادير وصكري الجوله وخليهم ينقعون عشر دقايق وعقبها صفيه وحليه بشوية سكر وعطيه ولدج قبل حزة النوم بليل وشوفي النومه الطويله ودعيلي طبعا يكون قبلها بساعه راضع حليب رقمين بس
اذا تعبتي حيييييييل وما عندج خدامه تساعدج ولو بالشي البسيط دوري نيرس يوميتهم بعشره رفيجتي كانت جايبتها وقت انفاسها لانها كانت قيصريه ما تقدر تعتني بالبيبي وامها تعبانه وكانت تمسك البيبي من عشر بليل لي عشر الصبح ويوميتها عشره
وحبيبتي نظمي وقتج
موفقه

 

[فديت بعلي]

الولد ياتاخذينه يا عند احد
وماتقدرين تحطينه عند احد ...
يعني الله يكوووووون بعونج ..
اخذيه مجمع سوق