والحل انا مليت

[مشاعلksa]

السلام عليكم ورحمة الله وبركاته
اخواتي انا عمري24سنة
اصغر اخواتي ومتسلطه جدا احب طوالة اللسان والمشاكل وما اخلي احد فحاله
احب انتقم لو وحده ترمي كلمة بسيطه ما اخليها لين اهزءها او اني انتقم من تحت لتحت
وهذا الاغلب
احب اخذ حقي لما تبرد السالفه لانسوها وعدا عليها وقت
ارجع انتقم اخواتي 7ما اكلم ولاوحده منهم لنهم مثلي وشخصياتنا ماتتفق مع بعض
دايم نتهاوش الى ان قررت اقاطعهم الحين وحده من خواتي ما اكلمها من 7سنوات
والباقين من3سنوات
اكرهم ما اطيقهم وانافيني شغله سيئه هي اني اضحك بوجهك وانتي عدوتي تسولفي معي وانا افكر كيف احرق قلبك
طبعا انا بهالدنيا ما احب الا امي وخطيبي وبس وكل العالم اكرهم صديقات ماعندي
ولا ابي لاني اعرف ان الحريم كلهم خاينات وكذابات ولهم الف وجه
اوك انا مو راضيه عن حالي
بس مو قادرة اتغير
شغله وحده دايم اخفيها والحمدلله انهم مايعرفونها للحين اني من داخلي طيبه وحنونه ولاعمره بين علي

دايم ابين لهم قوية والكل يقولون فلانة بسم الله منها لاتقربون صوبها
بعد كل مشكله او انتقام اسويه اجلس ابكي واقول اهم اللي جبروني اسوي كذا
كلهم ضدي وعلى فكرة انا وحيدة امي وابوي اخواتي مو شقيقات
يحبون بعضهم لاكن انا لان ابوي غير ابوهم مايحبوني عشان وانا صغيره بهذلوني
الحين ابي الحل لاتقولون تصالحي مع خواتك لاوالله لين انحط بالتراب ما انزل نفسي لهم
ال3سنين زي 30 سنة مافرقت معي
انا ابي حل بس عشان هالشي ماينقلب على اهل زوجي لاني الحين بادية ف زوجي جالسه اقسيه على هله وهو الحين يسمع الكلام بس اخاف بعد العرس يقلب علي و تخترب حياتي
وعلى فكرة فكرت بطبيب نفسي بس ما ارضاها على نفسي بسبب هالهيلق ادخل عيادات نفسية

 

[بتول الرياض]

لا حول ولا قوة الا بالله
شدعوه عاد اختك ولك سبع سنين ما تكلمينها وش هالجفا اعوذ بالله تصالحي مع خواتك احسن لك ترى قطيه الرحم ما تجوز
الله يهديك يارب

 

[لمى الهاجري]

لا تقسين ريلج على اهله

 

[روح مغليهاM]

قطع الرحم لايجوز
لايدخل الجنه قااطع رحم


وشنو ماترضين لنفسك الطبيب النفسي ع فكره هو طبيب عادي مومعناه الي يروح مجنون
احس حياتك وتفكيرك واسلوبك (كله تفكرين بالشين ماعندك نيه زينه) لازم يتغير من والى
صعبه عيشتك كذا
امك راضيه عن زعلك والقطاع الي بينكم(اهم شي رضااه فما اتوقع عادي عندها)
ماسالتي نفسك ليش يحبون بعض وانتي لا؟؟
اي تتنظرينهم يحبووونك وانتي هذا اسلوبك وتفكيرك
وكلامك متنااقض اسمحيلي مايهمك غير امك وخطيبك وتبين تتغيرين كيف تجي ؟؟
ولاتقسين زوجك ع اهله تذكري (كما تودين تدان)لك يوم لاتنسين
وصدقيني اذ هذا تفكير ربي مارراح يوفقك

سوال ليش تقسين زوجك ع اهله شنو الفااايده من هالحركات وهالحقد
اسمحيلي انتي لازم تتعالجين مو كفو تكوني زوجه وام

افتحي صفحه جديده بحيااتك واتركي الحقد عشان ربي يوووفقك ويريح بالك
ادري مومرتااحه بحركاتك هذي ومسببه لك توتر نفسي
مافيه احلى من الطيبه والنيه الزينه


الله يهديك

 

[..<< ندى الورد >>..]

امبيه انتي مو صاحيه انتقمتي من اهلج تبين تقسين قلب خطيبج على اهله ..!

وتبينا نساعدج بعد !!

هذول اهلج مالج غنى عنهم اختج من لحمج ودمج من صلب ابووج ٧ سنين مقاطعتها ؟؟ شنو هالقسوه اللي عليج

اصحي ياماما الدنياا دواره باجر لا كبرتي والا واجهتي مشكله مع ريلج منو بيوقف معاج وانتي لا ظهر ولا سند يحميج ..؟؟

انتي مو بعيده باجر تنتقمين من زوجج

حبيبتي انتي دامج من داخل طيبه وحبوبه ليش ما تطلعين هالجانب الزين لج للناس وانتي بس تطلعين القسوه والجبروت ؟؟

الناس تنفرر منج من قسوتج و انتقامج الناس قامت تخاف منج حراام عليج وهذا توج صغيره *

 

[hazel eyes]

انتي لوو تفكرين ان الدنيا زايله وان الدنيا ماتسوى وكلنا مصيرنا للتراب ماراح يكون هذا وضعج انصحج بتغير اطباعج تدريجيا لان لو انتقمنا من كل واحد قال لنا كلمه ماراح نخلص بتصير حياتنا انتقامات وهواش الحل ابدي صفحه جديده مع نفسج قبل الناس حاولي تغيرين نظرتج عن الحريم اكسبي خواتج ترى مالج غيرهم وابدي حياتج مع زوجج بالشخصيه اللي داخلج الطيبه الحنونه حاااولي دايما تذكرين نفسج باطباع الرسول صل الله عليه وسلم وتذكري اخيرا ان الاعمال ماترفع اذا كان الشخص متخاصم مع احد وانتي ماخليتي احد ماخربتيها معااه اعملي لاخرتج قبل الدنياا

 

[khawla&tito]

مممم باين عليج انتي وحده طيبه بدليل انج تبجين بالنهاية اكيد كان في موقف وانتي صغيرة اهوا اللي خلاج تصيرين بهالشكل معليش ماكو احد كامل بهالدنيا ابدي حياة يديدة مو كل الناس منافقين وجذابين وكل ماضحكتي بويه وحده وانتي داخلج شر تذكري ريلج يمكن يسوي فيج نفس ماتسوين لهم حاولي تسوين اعمال خيريه فرجي عن انسان كربه ساعدي فقير وشوفي الفرحه بعيونه صدقيني بيتغير حالج انا لاني اعرف وحده نفس شخصيتج بالضبببببببببط تكره الحريم كللهم تضحك بويوهم وداخلها نار وحقد حياتها كلها جحيم ومو متهنيه بحياتها
انا ماودي اقول لج شاللي صار لها اكثر لان ماودي توصلين للمرحله اللي اهيا وصلت لها

والله يوفقج

 

[الداعية بأخلاقي]

تأملي معـــي اختي

هالحديثين عن نبينا عليه الصلاة والسلام فيما معناه

١- ( لا يؤمن أحدكم حتى يحب لأخيه مايحب لنفسه )

٢- ( لا يحل لمسلم أن يهجر أخاه فوق ثلاث ... إلا أن قال : وخيرهما الذي يبدأ بالسلام )

وكذلك بين أنه لايدخل الجنه قاطع رحم

الله يهدينا وإياك ويجعلنا ممن يستمعون القول ويتبعون أحسنة

 

[ام حموديNEW]

الله يهدييج بس
فكري ورااج حياه جديده وعيال بأجر ينكسر قلبج وتموتين بحسره اذا شفتي عيالج يعاملون بعض جذي
ويمكن يقسون عليييج
حاولي تغيرين من نفسج قرببي لله سبحانه وادعي يحنن قلبج
اقري القران وبيلين قلبج على اهلج
وترى الدنيا رايحه بغمضة عين كثر ماتقدرين لا تروحين منها وفي احد يدعي عليج او حتى مايترحم عليج

 

[Patcholli]

اقري القران وخافي ربج هاذا كله ذنب على كاهلج
نصيحه راجعي دكتور نفسي يساعدج ويعالجج ..

 

[Môre N!Ce]

الله يعينـچ :'( ويشفيچ

 

[مفسرة الاحلام]

بقولك 3عبارات وحطيها دايم فى بالك :

((كما تدين تدان واي شي تسوينه والله ثم والله انك لاتشوفين اثره فى حياتك سؤا كان خير او شر))

((صفي نيتك وخلي تعاملك مع الناس من اجل الله وهمك هو الله كل الناس يصيرون معك ملائكه والكل يحبك ويحترمك))

(( اتقي دعوة المظلوم فان ليس بينها وبين الله حجاب))

اكثري الدعاء ان الله يصفي نيتك ويصلح حالك ابد ماكانت الطول اللسان او الهواش مع الناس قوة

 

[fulla 7elwa]

الله يعينج على نفسج الصراحه

 

[english muffin]

مستحيل انج طيبة
الطيبة تفكر الف مرة قبل لاتأذي احد وبالنهاية تقول ربي كريم
اعوذ بالله من كيد النساء
الله يشفيج ويهديج

 

[solitude]

انتي مب طبيعيه
يعني قاطعتي خواتج وخلصتي منهم جا دور اهل ريلج
حتى الريال تبين تقاطعييينه من هله

تووبي ياماما الدنيا ماتسوى
شهالتكبر والجبروت اللي انتي عايشه فييه

انا من كبر صدمتي انه في ناس جي مادري شكتب وشخلي
ماقول الا الله يعينج على نفسج ويعين ريلج بعد
الله يشفييج بس

 

[اميره1980]

حسبي الله و نعم الوكيل فيج
قاعدة تفرقين ريلج عن أهله
ما اكتفيتي باهلج و خواتج و فرقتيهم رايحة للناس الثانيين و تفرقينهم
انا اقول روحي صيدلية بيتكم و بلعي كل الدوا خل الناس يفتكون منج
صج مريضة انتي روحي للطب النفسي احسن
حشا بومة و دودة انتي شنو هذا ؟

 

[بنوته 123]

لا إله إلا الله حرام هائج إلي تسوينه للتقسين الولد علي أهله تري والله تشوفينا بحياتج ويتزوج ولدج وتسوي مرته مثل ما كنتي تسوين وشلوون!؟ ما تكلمين خوااتج حرام عليج إنزين إذا ما تبين تكلمينهم إكفيهم خيرج وشرج والله يصلج يااارب ويهديج

 

[جنون العاطفه]

اعوذ بالله من قسوة القلب

تقربي من الله اكثر ومو مشكله كلمي دكتور نفسي مو عشان احد عشانج حتى ترتاحين داخليا

ولاتقسين زوجك على اهله حرام يمكن ما عندهم غيره

واختك كلميها حتى لووو فيها عيوب لحمك ودمك ما يجوز ي اختي

ادري ان ممكن شي غصب علييك بس ادعي الله يلين قلبك وتتغير حياتك للافضل
ولك منا الدعاء ​

 

[!! دلوعته !!]

اعووووووووووووووووووووذ بالله
ياربي لاتقسي قلوبنا يارب
وتخليلي خواتي
عاادي تراي الخوات يتهاوشون ويردون يتصالحون
احسج شايفه نفسج حيييييييييييييييييييييييييييل
اسفه بس هاذا الي حسيته من اسلوبج وكلامج

 

[A L F A J R E Y]

لاحول ولا قوه الا بالله العلي العظيم
من تواضع لله رفعه

شلون قادره تعيشين جذي انتي بنعمه عندج اهل وعزوه حتى لو كانوا من اب ثاني
حتى لو كانوا اقسى منج
حتى لو معاملتهم مو زينه تقربي منهم يبا لاتتقربين منهم لكن بادري بالسلام وصدي بكيفج على الاقل تكبرين ب عين نفسج انج سويتي الي عليج ويمكن ينكسرون ويتعدلون

صله الارحام يا حبيبتي صله الارحام
شلون تقولين انج تبين تتغيرين وانتي من الحين تحاتين وتخططين ان ممكن ريلج عقب الزواج يحن على اهله وماسمع كلامج !!
خافي ربج بهالريال الي اختارج نصه الثاني وبتكونين ام لعياله

تبين تقطعينه من اهله !!! الي بيصيرون حسبه اهلج لي متى هالتخوف وتتهربين من الناس ماتبين تعيشين بكوكب بروحكم بعد بدون ناس !!!

لو كل الحريم على قولتج كذابات وخاينات جان ماشفتينا احنا يا بنات منتدى كويتيات ملتفين حولج ونبي نساعدج انج تصيرين انسانه افضل واحنا لانعرف بعض ولا من مذهب واحد ولا من قبيله وحده ولا من عايله وحده

استغرب انج تقولين " الحمدالله " انهم مايعرفون اني من داخل طيبه وحنونه !!!!!! انتي غلطانه بالعكس خل يدرون انتي تحبين احد يذمج ويقول بعدوا عن فلانه ترا اهي شرانيه !!! بعد عمرن طويل والله يخليج لو الله اخذ امانتج عقب موتج شنو تحبين ان ينقال عنج الحمدالله ان الله فك الناس من شرها ؟؟؟ والا والله والنعم فيها وموتها خساره ؟؟ والله يرحمها 1000000 مره ويدعون لج مو عليج !!! اي وضع تحبين !!!!

مو عيب الواحد يمد ايده بيد غيره علشان يساعده روحي حق دكتوره نفسيه شالمشكله !!!!

الله يحنن قلبج ويوفقج يارب