صبا
New member
- إنضم
- 30 مارس 2006
- المشاركات
- 403
- مستوى التفاعل
- 0
- النقاط
- 0
.
.
حبايبي كويتيات صج صج أبيكم تساعدوني حتى لو بدعاء وكلمة تريح قلبي
الله يسلمكم أنا وزوجي متزوجين من خمس سنين عندي منه بنت و ولد الله يحفظهم
كان ...كان زوجي كل حياتي ودنيتي ومستقبلي أحنا اثنين ندعم بعض ونشجع بعض وطموحنا فوووق
تزوجنا عن حب وعشنا أحلى ايام زواج ما يطلع مع ربعه كل معانا سافرنا نكمل دراستنا برا وحملت حملي الثاني
وما قدرت اكمل رديت وكمل ريلي وبعد الاجازة الصيفية رد سافر علشان يكمل بعدها وأنا بالكويت
عرفت أن ريلي يخوني اي يخون !! ريلي أنا اللي حبيته وكنت ابجي كل يوم على فراقه يخون
واللي يحز بالنفس والخاطر حزتها ان الكورس خلص وبدت الاجازة وكان يماطل على ردته للديرة
كل يوم يأجل ويوم خلاص تأكدت من الخيانه وشفت أن خلاص ما منه رجا وتغير
قبل لا يوصل الديرة بسبوعين كلمته قلت له بسافر أنا واليهال وأخوي أخذت الموافقة منه
حتى ما قال نطريني نسافر مع بعض ...
أهني عرفت ان ريلي خلاص تغير حتى غيرته علي رااااااحت وما صار حتى يخاف علي
كلمت محامي وهالمحامي معروف بالكويت كلها واسبوعين بالغصب يالله قدرت أقابله
قعدت وأنا مستحية وموو عارفه شقول الفشلة ان عرفني أنا منو بنته ومنو عمامي وديوانيتنا
المهم قلت له السالفة من بدايتها لي الخيانة
ووسئلني عن الخيانة واشلون ومتى وجم مره واسلوب ريلي ابتسم وووقال لا ما اطلقج ولا ارفع لج قضية
أنتي تحبينه وتابين تنتقمين !!! اهني حسيت أن انقلب الموضوع على راسي تميت ساكته مو عارفه شقول
سئلني يا فلانه انتي معزمه على الطلاق يمكن خمس مرات ورا بعض وكل مره بنبرة غير يوم حسيته
بيقوم ويهفني بقرب ما عنده ...قالي انا من يرد الديرة بكلمه وبقوله أن بترفعين القضية وعلى اساسه
أحدد ...ونصحني وقالي لا تخلين بنت بليس تاخذ ريلج منج ..ترا الغربة صعبة والشيطان يمكن وز ريلج
على المنكر خصوصا يوم تكون طالبة معاه و24 ساعه بويه بعض ...
طلعت وحسيت أني ما سويت شي وتحسفت اني رحتله لانه ما سوا اللي ابيه
رحت لشقتي وخميت كل شي لي ولعيالي وحطيتهم بشقتي بيت ابوي وكتبت له رسالة 20 صفحة بالوورد طبعتها
وحطيتها بظرف ...بنات ما اقولكم شعوري من صدمه وقهر وقلبي احسه بكل ثانية ينعصررر ضعفت أختفييييييت
صرت ما اكلم أحد ..كلمني أخوي وبلغني قبل ريلي ان ريلي بيرد بعد 4 ايام وكانت سفرتي قبل ردته بيوم
أنا ما كلمته وكنت امثل اني طبيعية واقوله حبيبي مشتااقتلك ومشتاقة لحضنك وايد خرابيط ما كان متجاوب معاي
وقلت له أنا حجزت للسفر وكلها اسبوع اهني سكت اشوي وقال أنا برجع بعد ما تسافرين بيوم ..كنت اتمنى يقولي كنسلي الحجز
قال روحي استانسي وانا اذا قدرت بلحقكم
انا قلت لا ما اسفر وطااف مو ضروري اهني عصب وقالي لا سافري استانسي وونسي اليهال!!! ما يدري ان وناستي كانت معاه
رحت لشقتي وهذي كانت اخرر مره اطبها حطيت الظرف وو سويت جم حركة بالشقة ما اقدر اقولكم خايفه تتطنزون
طلعت وانا ادموعي تصبصب اشوف الشقة فاضية طقت كعبي لها صدى وقلبي ينعصررر ومخنووقه
اتصلت بمكتب المحامي وبلغت السكرتير أن زوجي بيرد بعد جم يوم وأكدت عليه ...وبعد ساعتين اتصل السكرتير
وقالي لا تحاتين طمني الله يطمنه ...
طبعا الكل يستغرب بهالظروف وبتسافرين !!! اولا السفرة كنت ناويه اجهز لعرس اختي واتشرا
وصارت فرصة ريلي يرد الديرة وانا مسافره
طرشت له مسجات وووكنت ابي نص بالموافقه يقولي سافري وطرش لي رسالة بموافقته للمره المليون وده يحب راسي بس اسافر وهم اخوي وريلي
بينهم مسجات وهم كان موافق
المهم صار اليوم الموعود سافرت أنا واخوي وعيالي وصلنا وقضينا يوم عادي تسوقنا تعشينا وردينا تسوقنا وهلم جره
كنت أحاول اتناسى بس موو قادره انطر باجر متى يصيررر انطر اتصاله انطر والله بنات حتى نومي مو مثل الاوادم مغمضة
وكله افكر اقعد قبل المنبه يرن تعبببببببت قعدت نزلنا تريقنا وكان بخاطري اشبك بعرف متى توصل طيارته اليوم اي ساعه
ما قدرت هم طلعنا نتمشى ونتسووق افترررينا يوم قلنا بس ولعبت اليهال وكانو مستانسين ويضحكون من قلبهم اهني يتني البجييه وبجيت
فححححطت حتى اخوي اخترع مسكين ما عرف شيسووي صغيرر مو عارفه اشلوون ارقع
قلت له تعبانه !!! اي شي ...ردينا الفندق وقلبي كان يررقع قلت لخوي خلينا نكلم امي وابوي ونطمنهم وبعدين سكر جهازك
ليييش ما ليييش قلت له اذا تحبني سكره وطبعا رشيته بمبلغ نزل يتشرا من المحلات تحت .. جنا قلبي حاس انا ساعة الصفر دقت
ريلي يتصل فيني حطيته تيلفوني سايلنت وريلي يدق يدق يدق يدق وانا ما ارد كنت بتأكد قرا الرسالة ولا
اشوي ولا مسج تكفين ردي وأنا اهني والله استانست وحسيت براحه عرفت انه قرى المكتوب سطر سطر وعرف اني
ما كنت نايمه على نفسي بس صج حزتها كنت نايمه وكان يستغفلني !!
طلبت عشا وانا من زمااان ما كلت مثل الناس ضعفت وااايد كنت اتمنى الرشاقة ووصلت للرشاقة بس بعد هاسالفة
صرت اخرع لا رشاقة ولا بطييخ اشحلات المتن يم العصاقل يارب يارب ارحم حالي يارب
المهم بعد ساعتين طرشت له مسج وكان مسج جاف مافيه عاطفه وتم يدق وانا حاقره رد بمسج انتي فاهمه غلط
عرفت انه يرقع اللي ما يترقع ...وقعد يطرش مسجات وانا ما ارد كلها مسجا يتذلل بس يبيني اكلمه
ووبعده ساعه ما اتصل !! استغربت قلت اي خلاص تعب بعد اشيبي فيني عنده شينت الحلايا
ولا يرن تيلفون الغرفه كلللش ما توقعت ريلي يدور رقمهم ويتصل وبكل ثقة الووو اهوو الوو فلانه !! انا استوعبت انه ريلي
سكتت ما قلت ولا حرف والصدمه ريلي اول مره بحياته يبجي !! ويكلمني بطريقة هستيريه ويتذللي عمره ما كان جذي
صكيت التيلفون بويهه وفصلت التيلفون ... طرشت له مسج وقلت خليني ارتاح منك ومن اللي سويته فيني
ووويومتها قعدت ابجي ابجي ابجي ...
صار ثالث يوم وووجدولنا ما يتغير من مجمع لمجمع واسواق أكلم امي اطمنها
وريلي ماله لا حس ولا خبر أنا اللي عفته قعدت احاتيه بس قلت ارد واقول اشيبفيني عنده اللي مونسه
تغدينا والعصر ردينا الفندق نرتاح ... دخلنا الفندق ولا بال اللوبي يم الرسبشن واحد فز يوم شافنا !!
هذا ريلي !! اي ريلي سلم على أخوي وانا منصدمه وصرت مثل اللوك مو عارفه شسوي باسني
وأخوي أستاذن صعدنا فوق وهم منصدمه ومو عارفه شسووي تغيررر السيناريوو ؟؟!! وليييه
قلبي يرررقع يررررقع وما عارفه اشبيصير جني عرووس !! بنات كنت مستانسه على متضايقه على خايفه
ركبنا الاصنصير وكل يخزني وما تحجينا ولا قلنا ولا كلمه
دشينا الغرفة ولا يقعد يلمني ويبي يعتذر وأنا ادزه واهو يلم وانا ادز صرت اصارخ اليهال ينووو وصارو يصارخوون ويبجون اول مره يشوفونا نتهاوش
وكل ما سكتنا اليهال اشووي ردينا نتحجي وصوتنا يطلع ويصير صراح ويردون يبجون قلت له انت ما تقعد معاي بهالغرفة فاهم
المهم طلع ريلي نص ساعه وورد حجز غرفة لخوي لان أنا واخوي وعيالي كنا بغرفة مزدوجه مع بعض
وقال انا بنام اهني صرت اكلهم بصوت واطي مابي اليهال يبجون وبينت ان عفته وخلاص مابيك وقعدت ابجي والله اعيالي ينوو
سكتتت ونومت اليهال ورد اخوي اخذ قشه وراح غرفته وقال حق ريلي زين يت انا لاعت جبدي من اليهال اشلون مستحملهم
رديت عليه قلت اخاف معبرهم كله هايت بره علبو دراسه ومقزرها ..اهني حسيت اني خرتها جدام اخوي ...اخوي واهلي
ما يعرفون باللي صار قعد يضحك ريلي يرقع موقفه جدام اخوي .. طلع اخووي
ويي ريلي صوبي وقلت له ان قربت صوبي لسوي لك فضيحة انت بغنى عنها
نام على سرير وانا على سرير طفيت الليتات صار الدنيا خرمس اشوي اشوي تعودت عيني على ظلمه حسبالي
ريلي نام ولا يقوم اشوي اشوي وايي صوبي اهني انا هبيت فيه وقلت انا اشقلت لك جان ينصدم قالي بروح الحمام
قلت له الحمام موو من هالصوب ..أندقرر
ثاني يوم قلت حق أخوي ندور حجز ونرجع من باجر ...أخوي يقول ما تسوا كله يوومين خلينا نستانس
وريلي كان همه يضبط حجز ويرجع معانا ...
المهم طلعنا كلنا ونسنا اليهال بنتي مستوعبه وكل اشوي تنادي ابوها بس ولدي كان مو بالعه خير شررر
وطوول الوقت وادي اتحجى وادي اقول اي شي بس ما اقدر واحس ريلي مستانس وده بس يقعد معانا
لان يدري اذا تحجيت ما راح يسمع اللي يسره ..ردينا الفندق ونموو اليهال من التعب
واهني ريلي حلفني براس اليهال ما ارد واني اسمعه قعدت اسمعه اشبيقول ماكان عارف اشبيقول
انا ما استنغى عنكم انا احبج ..اشتبيني اسويلج تابيني اذبح عمري بس ترتاحين وكل ما سألته ليش سويت جذذي
يرقع ويقول ترا موو نفس اللي بالج ترا يتراوالج اهني انا قعدت ابجي وانفجرت بوييه وطلعت كل اللي بقلبي
تم يطلب السماح لي الفيررر وأنا اقولها خلاص كل شي انتهى واهو يقولي خلينا نرد الكويت وكل شي يتصلح صليت ونمت
وقعدوني اليهال الصبح قعدنا ونزلنا تريقنا وانا عيوني مورمه من كثر البجي تريقنا انا وريلي واخوي وعيالي
ولا يرن موبايل ريلي ويرد اول شي يرد السلام بنبرة ترحيب وبعد اشوي تغيرت نبرته وخزني وكان منصدم
وكله يقول إن شاء الله إن شاء الله متى ؟؟ وين ؟؟ ما كمل ريوقه اهني عرفت ان هذا سكرتير المحامي فرحت وايد
وشفتها منكسر و كانت باجر طيارتنا الكويت وريلي ما حصل حجز
يوم صعدنا الغرفة كان ساكت طوول الوقت وأنا خايفة ...كنت ارتب الملابس وااشطب اللسته وكنت اسوي نفسي مو فاهمه
اشصاير واسوي نفسي مشغولة ...جان يقووولي من صجج حقررته جني ما اسمع شي
فلانه ..أنا قاعد احاجيج من صجج تبينا نتطلق !! اهني رديت عليه بصوات عالي وكنت حدي معصبة
قلت اي مثل ماكان من صجك تخوني مع هالزفرة أنا من صجي ابي اتطلق حسبالك اللي سويته
يخليني اقوم واحب راسك واقول انك ريال ونعم فيك !!! غلطان وقلت له حجي وايد ما عرف يرد
طلعت أنا واليهال وأخوي شريت كاكاو وخرابيط لصووغة سافرت انا واخوي واعيالي وصلنا ريلي المطار وكان يرتاح بالاماكن العامه لانه ما اقدر
ارده يمسك ايدي ويقعد يعصر فيها ماكو ايام الحب ما يسووي جذي وباسني ولمني جني برووح مابرد ..وبعد بيوم ريلي وصل
وكان يتصل فيني وانا ما ارد كللش ...كان ماله ويه يطب بيتنا حسباله اهلى يدرون باللي مسوويه
وابوي كله يسأل وين ريلج ليش ماتروحين ؟؟ ليش مازارنا ما يعرف يسلم على عمه ؟؟
من ثاني يوووم
ابوي متصل في يعزمه على الغدا ويقوله ليش ما تمر وكان ابوي زعلان على ريلي ويتشره ..اهني ريلي فهم ان محد يدري بالموضوع ويي وبكل وقاحه
يسلم وقاعد بنص البيت نزلت ولا منصدمه بوجوده قام وسلم علي جنه مافي شي
بعدها كل يوم عذر لبوي وامي اطلع برا اقول كنت طالعه مع ريلي اطلع اليهال اروح وارد وكلها طبعا كلها ترقيعات ابوي على طول مشغول
وامي بعد كنت اقنعهم أن شقتي يبيلها تضبيط وريلي بيرد لدراسته
المحامي رد اتصل بريلي وراح ريلي وعطاهم الزبدة ان طلاق مايبي يطلق وقال للمحامي يقنعني ارد عن قرار القضية
وقتها كان القضاء بأجازة حززت الصيف ...وريلي ما يقدر يحضر لا جلسات ولا يحزنون بحكم دراسته
انا هني خلاص تحطمت وعرفت ان السالفة يبيلها صبررر من قلب .....ابوي مايرضا على ريلي يغليه وخواني ربع ريلي حيييييل معاه
ما كنت اقدر اشتكي حق احد ...ريلي حاول يقرب لي بس انا على طوول كنت اصده وما اكلم وما اشغل الموبايل كللللش الا للضرورة
قبل لا يسافر بيوم اتصل كان صوته وايد حزين وكان يعتذر ويبيني انسى اللي صار واغفر له هالزلة اهني
انا وايد انهرت قلبي عورني اجازته قيناها بصد وزعل بس مع هذا ما عطيته ويه
صار يوم سفرته يى البيت سلم على اهلي وعياله وانا عيوني مغورقة مو عارفه شسوي كان ودي المه واقوله لا تسافر خلك معانا
اهو اللي بادر لمني وكان وايد متاثر ويحاول يخش ويهه صار احمر وانا مثل اللوح مو متجاوبه ودي بس في شي يمنعني
الحين صار له تقريبا 4 تشهر من سافر كلمت بتيلفون 3 مرات بببببس مره بيتاكد من رقم حسابي اليديد بيطرش مصرف اليهال
ومره بعد عمليتي يتحمد ومره بعيد الفطر وكل مره يتصل ما ارد كلللش بينا يوميا يطرش مسجات ما ارد الا للظرورة
كل ما حسيته مستانس يبين بالمسجات اكتب له مسج اذكره ان ما بقى شي ويرجع ونستأنف القضية اهني يتكدر
الحين صج مابقى شي على إجازة الكريسماس والاجازات الثانية وبيرجع فترة وانا مصممة اروح محامي ثاني واتطلق
وبنفس الوقت كللش مو خاطري اتطلق ...ودي ابقى مرته !! اي اناقض روحي بس ما اقدر افهم نفسي المشكلة كل ما
اشوفه احقد واتمنى اتطلق وانتقم منه واعلمه ان اللي سواه مو شوووية ...كل ما افتح الكام حق بنتي تكلم ابوه
من اشوفه احقد عليه ما ادري اشلون عبر لكم يمكن بس اللي مجربه الخيانة تفهمني
مو عارفه اذا رد اشبسوي ؟؟ وموو عارفه اشلون بنسى خيانته ؟؟
الحين وحسب ما اعرف اذا كلمت رفيجاتي اللي يدرسون معاه بنفس الجامعة ان شينت الحلايا انقلت وما صارت تمشي معاه
وكله يقعد مع شباب ...بس الله واعلم باللي يصير من وراي كل اسبوع يكرني ان هالشي ابدا ما راح يتكرر
عذروني طولت عليكم ...بس قوانين المنتدى اللي بتكتب تكتب مره وحدة مو مقطع ولا لا تكتب احسن
شورو علي مو عارفه شبسووي ؟؟؟
