السلام عليكم
شلونكم بنات؟؟
عيدكم مبارك
بدخل بالموضوع على طول
أمس الله يسلمكم .. أتفقنا آنا ورفيجاتي أن نروح مطعم البلد اللي بالديره
و من الصبح مشينا و عقب ما خلصنا رحنا ركبنا واحد من هالقوارب اللي عند مطعم مركز سلطان
و عقب ما خلصنا قالوا أنهم بروحون بنك بيري اللي بالمرينا وآنا قلت لهم أنتوا نزلوا آنا بنطركم بالسياره
لأني ما أحب المرينا المهم رفيجتي ما رضت تقول ما أقدر أخليج بروحج بالسياره فهونوا
المهم في محل عصير بالسالمية عالبحر أسمه يبيله عصير
هم نزلوا و آنا قلت لهم ما أقدر أنزل لأني حصرانه شوي و إذا قعدت برا مع البرد بانحصر زياده المهم
هم نزلوا و طلبوا لهم و آنا قعدت بالسيارة أنطرهم
بعدين دقيت عليهم قلت لهم خلاص ما أقدر أصبر زياده لازم نمشي ألحين
قالوا نروح أي مجمع ودشي الحمام هناك قلت لهم لأ خلونا نروح البيت بالمره دام أنكم منتوا رايحين مكان ثاني
آآآسفه بنات طولت عليكم بس السالفه لازم أقولها
المهم قلت حق رفيجتي لا تمشين بشارع البلاجات لأن شطوله وكله إشارات فطلعنا من السالميه
و دليتها الطريج اللي ينزل من الدائري الخامس و يودي على خط الملك فهد
واللي خبيره بالشوارع و تدل بتعرف آنا وين أقصد
المهم رفيجتي أول مره تمشي بهالشارع و آنا ما كنت أدري أنها أول مره تمشي فيه
حتى لمن وصلنا عند اللفه شفتها طايره كنت بقول لها خففي بس قلت فشله كل شوي منبهتها
وهي أكبر مني فسكت وما قلت شي
المهم
لمن بدينا ننزل من اللفه شفت السياره قامت تلف فينا يمين ويسار آنا عبالي أنها تستهبل
ما وعيت ألا السياره لفت فينا لفت كامله لمن صرنا بعرض اللفه وآنا أصارخ من قمة راسي
وأنتوا تعرفون طبعا أن هذي اللفه الناس ينزلون منها طايرين لأنها نزله
المهم آنا أصرخ على رفيجتي أقول لها عدلي السياره وهي مرتبكه و مصدومه
آنا لمن شفتها مو صوبي خفت أنها على ما تستوعب ألا مليون سياره داشه فينا وكان وقتها على حظنا محد مر بالشارع
ألا سياره و الحمدلله ما حاشتنا
المهم آنا قلت أتصرف بسرعه قبل لا تروح حياتي حاولت أفتح الباب مو راضي ينفتح
و آنا لا تشوفون شكلي جني مينونه المهم بطلت الدريشه بفتح الباب جان هي تستوعب وتعدل السياره
وعقب ما عدلتها آنا بطيت بجيتي من الخرعه وطلعت بره ولمتني رفيجتي وبعدين شفنا السياره ما فيها شي ألا التاير داش داخل السياره وقلت أني أبي أسجد سجدة شكر بس تحسفت أني ما سجدت يمكن عشان المكان نازل ويمكن لأني للحين حصرانه
المهم عدت على خير
بس همن وقفتنا غلط و ممكن أي سياره تحوشنا فآنا قلت لها عدلي السياره لا تدخل فينا السيايير
حتى الشاحنات تمر من هاللفه وجم مره بغوا يحوشونا بس هي ما هتمت فيني
فقررت أني أخليهم بالسياره لأني أبي حياتي إذا هم بايعين حياتهم..و بسبب وقفتي تقريبا 4 سيارات وقفوا يبون يساعدونا وشاحنه مالت مثلجات ..
وقبلها دقيت على أختي وقلت لها السالفه وقلت لها تيي تاخذنا وحتى رفيجتي نفس السالفه
المهم أن عقب يت أختي وخذتنا ورديناهم بيوتهم ورجعنا بيتنا
عقب ما رجعت البيت رديت استرجعت كل شي صار
تذكرت لمن كنت واقفه برا السياره و تذكرت اللي كنت أفكر فيه...
تذكرت أن البنات هالمره ما قالوا دعاء الركوب
تذكرت...
أن كان ممكن هاليوم يكون آخر يوم بحياتي .. وأني بموت بحادث .. و أن كان ممكن يحطون أسمي مع الوفيات بجريدة اليوم اللي بعده ..
تذكرت أن كان ممكن أموت وآنا حصرانه .. مو على وضوء .. و مو مصليه الظهر .. وصليت الفير متأخر
و من بين هالأشياء أني لمن صار كل هذا ما فكرت بالشهاده ما فكرت أني أقولها بس فكرت بحياتي وأني راح أودع الدنيا
فكرت بهالخاتمه و حمدت ربي أن كتب لي عمر يديد و أن أن شاء الله ربي يكتب لي حسن الخاتمه
عرفت أن ربي له حكمته باللي صار ينبهني أني أوخر عن أشياء غلط أسويها من بينهم أني أصلي الفير متأخر
أني أتجنب أحش بالناس .. يمكن لأني خفيت عن السنن والدعاء بسبب دوامي و دراستي ربي يبي ينبهني على هالشي
تذكرت أني كنت دايما أفكر أني ممكن أموت بهالعمر وممكن أموت بعد عمر طويل
ممكن أموت بخاتمه حسنه وممكن بخاتمه سيئة ممكن أموت على شهاده و ممكن أموت على شي غير الشهاده
تذكرت أني كنت دايما قبل ما أنام أفكر أني ممكن اليوم أنام وما أقعد مره ثانيه من نومي
تذكرت أني دايما أفكر بالمستقبل وشنو مخبي لي من أحداث وأتخيل حياتي بالمستقبل وأتخيل وأتخيل و عقب ما أعصر مخي أكتشف أني ما راح أعرف شبصير فيني باجر ولا اللي عقبه ولا بالمستقبل لأن بكل سهوله كل اللي بصير مو بيدي هذا شي ربي كاتبه من يوم كنت في بطن أمي
بنات..ديروا بالكم من الذنوب ديرووووووا بالكم منها
حاولوا كثر ما تقدرون تبعدون عنها .. و أدعوا لنفسكم بالمغفره والتوبه والرحمه .. والخاتمه الحسنه
وتذكروا هالآية ودايما خلوها يدام عينكم
لمن يقترب أجلكم..قال الله عز وجل ::: "وما تدرى نفس ماذا تكسب غدا وما تدرى نفس باى ارض تموت "
و فكروا بالآخره وخلوا الدنيا آخر همكم .. عشان ربي ما يحطكم بمثل الموقف اللي آنا انحطيت فيه
والحمد لله رب العالمين على كل حال آنا ألحين فيه
والحمد لله رب العالمين على أن عطاني عمر يديد أعوض فيه ذنوبي بحسنات
و عسى ربي ما يحطكم بهالموقف ولا ينعاد فيني الموقف
ويبعدكم عن الشرور ويحفظكم ويغفر لكم و يرحمكم
و شكررررررررررررا لكل من دخل موضوعي وقراه
مابي غير أنكم تستفيدون من تجربتي اللي عساكم ما تنحطون فيها
ملحوظه أخيره ::: خالتي ويانا بالمنتدى وتعرف نكي .. خالتي واللي يعافيج إذا قريتي موضوعي لا تقولينه حق أي أحد لأن أمي ما تدري باللي صار حتى أختي لا تسألينها عن اللي صار
و مع السلاااامه
شلونكم بنات؟؟
عيدكم مبارك
بدخل بالموضوع على طول
أمس الله يسلمكم .. أتفقنا آنا ورفيجاتي أن نروح مطعم البلد اللي بالديره
و من الصبح مشينا و عقب ما خلصنا رحنا ركبنا واحد من هالقوارب اللي عند مطعم مركز سلطان
و عقب ما خلصنا قالوا أنهم بروحون بنك بيري اللي بالمرينا وآنا قلت لهم أنتوا نزلوا آنا بنطركم بالسياره
لأني ما أحب المرينا المهم رفيجتي ما رضت تقول ما أقدر أخليج بروحج بالسياره فهونوا
المهم في محل عصير بالسالمية عالبحر أسمه يبيله عصير
هم نزلوا و آنا قلت لهم ما أقدر أنزل لأني حصرانه شوي و إذا قعدت برا مع البرد بانحصر زياده المهم
هم نزلوا و طلبوا لهم و آنا قعدت بالسيارة أنطرهم
بعدين دقيت عليهم قلت لهم خلاص ما أقدر أصبر زياده لازم نمشي ألحين
قالوا نروح أي مجمع ودشي الحمام هناك قلت لهم لأ خلونا نروح البيت بالمره دام أنكم منتوا رايحين مكان ثاني
آآآسفه بنات طولت عليكم بس السالفه لازم أقولها
المهم قلت حق رفيجتي لا تمشين بشارع البلاجات لأن شطوله وكله إشارات فطلعنا من السالميه
و دليتها الطريج اللي ينزل من الدائري الخامس و يودي على خط الملك فهد
واللي خبيره بالشوارع و تدل بتعرف آنا وين أقصد
المهم رفيجتي أول مره تمشي بهالشارع و آنا ما كنت أدري أنها أول مره تمشي فيه
حتى لمن وصلنا عند اللفه شفتها طايره كنت بقول لها خففي بس قلت فشله كل شوي منبهتها
وهي أكبر مني فسكت وما قلت شي
المهم
لمن بدينا ننزل من اللفه شفت السياره قامت تلف فينا يمين ويسار آنا عبالي أنها تستهبل
ما وعيت ألا السياره لفت فينا لفت كامله لمن صرنا بعرض اللفه وآنا أصارخ من قمة راسي
وأنتوا تعرفون طبعا أن هذي اللفه الناس ينزلون منها طايرين لأنها نزله
المهم آنا أصرخ على رفيجتي أقول لها عدلي السياره وهي مرتبكه و مصدومه
آنا لمن شفتها مو صوبي خفت أنها على ما تستوعب ألا مليون سياره داشه فينا وكان وقتها على حظنا محد مر بالشارع
ألا سياره و الحمدلله ما حاشتنا
المهم آنا قلت أتصرف بسرعه قبل لا تروح حياتي حاولت أفتح الباب مو راضي ينفتح
و آنا لا تشوفون شكلي جني مينونه المهم بطلت الدريشه بفتح الباب جان هي تستوعب وتعدل السياره
وعقب ما عدلتها آنا بطيت بجيتي من الخرعه وطلعت بره ولمتني رفيجتي وبعدين شفنا السياره ما فيها شي ألا التاير داش داخل السياره وقلت أني أبي أسجد سجدة شكر بس تحسفت أني ما سجدت يمكن عشان المكان نازل ويمكن لأني للحين حصرانه
المهم عدت على خير
بس همن وقفتنا غلط و ممكن أي سياره تحوشنا فآنا قلت لها عدلي السياره لا تدخل فينا السيايير
حتى الشاحنات تمر من هاللفه وجم مره بغوا يحوشونا بس هي ما هتمت فيني
فقررت أني أخليهم بالسياره لأني أبي حياتي إذا هم بايعين حياتهم..و بسبب وقفتي تقريبا 4 سيارات وقفوا يبون يساعدونا وشاحنه مالت مثلجات ..
وقبلها دقيت على أختي وقلت لها السالفه وقلت لها تيي تاخذنا وحتى رفيجتي نفس السالفه
المهم أن عقب يت أختي وخذتنا ورديناهم بيوتهم ورجعنا بيتنا
عقب ما رجعت البيت رديت استرجعت كل شي صار
تذكرت لمن كنت واقفه برا السياره و تذكرت اللي كنت أفكر فيه...
تذكرت أن البنات هالمره ما قالوا دعاء الركوب
تذكرت...
أن كان ممكن هاليوم يكون آخر يوم بحياتي .. وأني بموت بحادث .. و أن كان ممكن يحطون أسمي مع الوفيات بجريدة اليوم اللي بعده ..
تذكرت أن كان ممكن أموت وآنا حصرانه .. مو على وضوء .. و مو مصليه الظهر .. وصليت الفير متأخر
و من بين هالأشياء أني لمن صار كل هذا ما فكرت بالشهاده ما فكرت أني أقولها بس فكرت بحياتي وأني راح أودع الدنيا
فكرت بهالخاتمه و حمدت ربي أن كتب لي عمر يديد و أن أن شاء الله ربي يكتب لي حسن الخاتمه
عرفت أن ربي له حكمته باللي صار ينبهني أني أوخر عن أشياء غلط أسويها من بينهم أني أصلي الفير متأخر
أني أتجنب أحش بالناس .. يمكن لأني خفيت عن السنن والدعاء بسبب دوامي و دراستي ربي يبي ينبهني على هالشي
تذكرت أني كنت دايما أفكر أني ممكن أموت بهالعمر وممكن أموت بعد عمر طويل
ممكن أموت بخاتمه حسنه وممكن بخاتمه سيئة ممكن أموت على شهاده و ممكن أموت على شي غير الشهاده
تذكرت أني كنت دايما قبل ما أنام أفكر أني ممكن اليوم أنام وما أقعد مره ثانيه من نومي
تذكرت أني دايما أفكر بالمستقبل وشنو مخبي لي من أحداث وأتخيل حياتي بالمستقبل وأتخيل وأتخيل و عقب ما أعصر مخي أكتشف أني ما راح أعرف شبصير فيني باجر ولا اللي عقبه ولا بالمستقبل لأن بكل سهوله كل اللي بصير مو بيدي هذا شي ربي كاتبه من يوم كنت في بطن أمي
بنات..ديروا بالكم من الذنوب ديرووووووا بالكم منها
حاولوا كثر ما تقدرون تبعدون عنها .. و أدعوا لنفسكم بالمغفره والتوبه والرحمه .. والخاتمه الحسنه
وتذكروا هالآية ودايما خلوها يدام عينكم
لمن يقترب أجلكم..قال الله عز وجل ::: "وما تدرى نفس ماذا تكسب غدا وما تدرى نفس باى ارض تموت "
و فكروا بالآخره وخلوا الدنيا آخر همكم .. عشان ربي ما يحطكم بمثل الموقف اللي آنا انحطيت فيه
والحمد لله رب العالمين على كل حال آنا ألحين فيه
والحمد لله رب العالمين على أن عطاني عمر يديد أعوض فيه ذنوبي بحسنات
و عسى ربي ما يحطكم بهالموقف ولا ينعاد فيني الموقف
ويبعدكم عن الشرور ويحفظكم ويغفر لكم و يرحمكم
و شكررررررررررررا لكل من دخل موضوعي وقراه
مابي غير أنكم تستفيدون من تجربتي اللي عساكم ما تنحطون فيها
ملحوظه أخيره ::: خالتي ويانا بالمنتدى وتعرف نكي .. خالتي واللي يعافيج إذا قريتي موضوعي لا تقولينه حق أي أحد لأن أمي ما تدري باللي صار حتى أختي لا تسألينها عن اللي صار
و مع السلاااامه
والله فلم رعب
