البارت ال 25 :
جاسم طار عقله لما امه قالت له عن جنى : انخطبت؟!!!!!..... منو خطبها ؟
ام جاسم : عبدالله ولد خالتك ناديه
جاسم : منو عبدالله ومنو خالتي ناديه؟ ..... خواتج مافيهم وحده اسمها ناديه ولا انا هالعبدالله اعرفه
ام جاسم : جسوم ... خالتك ناديه مرة ولد عمي عبدالرحمن
جاسم : يما انتي متاكده ؟
ام جاسم : اي متاكده .... هي قايله لي
جاسم : هو خطبها خلاص والا ناطر الرد منهم
ام جاسم : لا البنت موافقه والاسبوع الياي خطبة الرياييل
جاسم حييييل انكسر بخاطره .... كان خاطره ب جنى كان حاس ان هي البنت اللي يتمناها .
نوره كانت حييل متضايقه عالسالفه اللي صارت بينها وبين شيخه هذاك اليوم ...
كانت نوره قاعده مع فيصل ريلها بالصاله بس بالها كلش مو معاه
فيصل : الووووووووووووو
نوره : شفيك ؟
فيصل : وينج ؟ سرحانه بشنو ؟
نوره : ضايق خلقي
فيصل : افا .... يضيق خلقج وانا معاج ... شاللي مضيق خلقج ؟
نوره : متهاوشه ويا شيوخ ؟
فيصل : ليش .... عسى ماشر ؟ مادري ليش احس انج انتي الغلطانه
نوره : شكووووووووو ؟
فيصل : علامات الذنب مبينه على ويهج .... يلا تحجي شمهببه ؟
نوره : مو مهببه شي .... بس تناجرنا
فيصل : ليش ؟
نوره : طقت فهودي وزفيتها
فيصل : طقت فهودي .... انزين انتي زفيتيها بينج وبينها والا جدام فهودي يا شاطره ؟
نوره : ليش ؟
فيصل : لان اذا انتي زافتها بينج وبينها عادي خوات تنيازون ... بس اذا انتي زافتها جدام ولدج تطلعين بقره لان مايصير تزفينها جدام ياهل باجر يكبر راسه عليها
نوره : ها
فيصل : ويعاه ..... انا ابي اعرف انتي مخج مركب عوي والا شسالفتج .... نوير فكري ماما قبل لا تسوين شي .... ترا التفكير مايتعب وايد مايصير تزفين شيخه جدام عيالج هي خالتهم عيييييب
نوره : كنت معصبه ؟
فيصل : واذا معصبه تعلمي تمسكين نفسج ..... صج صج بقره حرتيني واكيد هي زعلانه منج الحين
نوره : اي
فيصل : قومي لبسي ولبسي عيالج خل اوديج
بيتكم
نوره : ليش ؟
فيصل : دام انا رايح حق فواز اوديكم هناك ... منها اطيبين خاطر اختج ومنها اسلم على اهلج
نوره : شعندك عند فواز ؟
فيصل : ماكو بنتعشا برا مع الربع بنروح ماكي
نوره : عشتاو .... انت تروح ماكي من متى ؟ والله دنيا عقب فريج صويلح ماكي ....... شالطاري ؟
فيصل : انجعمي انا اعرف ماكي قبل لا اشوف ويهج ... بس مااحبه عشان جذي مااروح له بس هالمره مجبور فواز هو اللي مختاره والعزيمه عشانه
نوره : ليش ؟
فيصل : امي ماعلمتج ان فواز خطب ؟
نوره : من زمان وفل
فيصل : لا خطب مره ثانيه ... وخطبة الرياييل السبت هذا
نوره : صج وليش انا دايما اخر من يعلم
فيصل : هقيت امي قايلتلج
نوره : امك من متى تقولي .... مادري شفيها علي ؟
فيصل : اي صح وايد ظالمتج .... عاد انتي خوش جنه كل يوم تزورينها وكل دقيقه رافعه السماعه عليها ... خصوصا اخر زوارتين حدج حريصه عالزوارات
نوره : كنت تعبانه
فيصل : انا قلت شي ماقلت شي
نوره : والله تعبانه
فيصل : الله يشافيج
نوره : لا يكون زعلان
فيصل : ليش ازعل ... ماسويتي شي بس مفشلتني جدام اهلي ومسوده ويهي
نوره : لا تقول جذي ... والله صج اني كنت تعبانه
فيصل : سمعي نوير .... انا ساكت عنج ولا يايب لج طاري لاني بشوف لوين بتوصلين ابي اعرف شاللي براسج لكن والله اذا تعبج هذا طول ودلعج هذا زاد صدقيني لا راسج هذا افلعه بالطوفه ابطه لج ... ولما ابط راسج وقتها بتزوج عليج لان مايصير اعيش مع وحده راسها مبطوط ... فهمتي
نوره : خلاص والله بزور
فيصل : بنشوف ... وترا هذي اخر مره اتكلم بهالسافه وياج ... لا تحسبين لاني احبج بتمشيني وبتسوين اللي تبين
نوره : شكو امشيك ... هذا كلام امك عرفت انا ليش ماازور ... كل مازرت لازم تقط نقزات علي اني انا اللي امشيك
فيصل : تقط نقزات تقط قنابل انا مالي شغل بتزورين وريلج فوق رقبتج
نوره : قلت لك بزور خلاص .... انزين من خطب فواز
فيصل : مادري
نوره : اي شي ماتدري
فيصل : ادري ... بس ماابي اقول .... تبين اتعرفين دقي على امي تعلمج
نوره : فشله مو داقه من زمان
فيصل : زيييييين تفتشلين
نوره : اوووووووووو خلاص بدق اسلم عليها واسولف معاها
فيصل : اللقافه ذابحتج تموتين اذا ماعرفتي
قامت نوره دقت على خالتها تسلم وتسال وطاحوا له سوالف
ام فيصل : دريتي ان فواز خطب ؟
نوره ( تستهبل ) : فواز ولد خالتي نوريه ؟
ام فيصل : اي جم فواز عندنا
نوره : مشالله .... متى خطب ؟
ام فيصل : الاسبوع اللي فات وخطبت الرياييل السبت
نوره : الله يتمم عليه ...البنت من اهلكم ؟
ام فيصل خرت الاكو والماكو حق نوره ونوره طبعا لما راحت بيت اهلها خرت اللي تعرفه حق امها وشيخه
نوره : دريتوا فواز خطب ؟
ام خالد : هو مو خاطب ؟
نوره : لا فل من زمان يقولون ماارتاح لها ... الحين خطب مره ثانيه وخطبه الرياييل السبت
ام خالد : من خطب ؟
نوره : خطب وحده اسمها هبه ال ... امها بنت ال .... للحين ماتخرجت اخر كورس بالجامعه عاد يقولون عقب مماتخرج بيملجون
ام خالد : الله يوفقهم
شيخه : الله يوفقه يستاهل كل خير
شيخه ضاق خلقها شوي مو وايد كان وجود حمود واهتمامه هو اللي خفف عليها حييييل صار هو الشي الحلو الموجود بحياتها
وهم قاعدين يسولفون رن تلفون البيت والا المتصله ام جاسم كانت داقه تعزمهم على ملجة ساره يوم الخميس
شيخه : اي خميس ؟
ام خالد : تقول هالخميس ... بسم الله توهم مخطوبين
شيخه : ماامداها تجهز شي
نوره : هم مو قالوا ان خطبتها هي ويوسف بطول على اساس ان تتعرف عليه عدل .... شيخه ساره مايابت لج طاري ان ملجتها الخميس ؟
شيخه : لا ... هي كانت داقه علي الصبح بس مارديت عليها كنت صج حايسه وقلت بدق عليها ونسيت ... اكيد كانت داقه تقولي
نوره : يمكن ... اليوم شنو ؟
شيخه : الاثنين
نوره : باقي 3 ايام ... ويييه حده مايمدي يزهبون شي الا اذا هم كانوا ناويين من زمان وتوهم يعلمون
ام خالد : لا مااهقى ... اظن انهم قرروا فجاه .. توه لما كلمتني يبين انها حايسه ومتوهقه
شيخه : بدق على ساره اشوفها اذا تبي شي
ام خالد : اي زين تسوين .... هم انا بقوم ادق على ام جاسم
نوره : ليش ؟
ام خالد : بقولها ان بشيل البوفيه ... كافي عليها الكوشه والدي جي والكراسي صج صج الله يعينها ولا عندها بنات يعاونونها خواتها وحده برا مع ريلها والثانيه اكيد لاهيه مع عيالها ... يلا شيوخ قومي دقي على ساره
ساره كانت تكلم يوسف : صج حرام عليك شنو نملج عقب 3 ايام ..... امي كان بيوقف قلبها لما قلت لها
يوسف : اسم الله على قلبها .... مادري شفيكم مخترعين ؟ حده عادي
ساره : انت مايفرق وياك دشداشه وبشت انا اللي بقعد احوس ادور لي بدله ونرتب الحفله
يوسف : انا مو حارني الا هالحفله اللي بتسوينها .... يبا قلت لج اسوي لج عرس ماكو مثله بس خل نملج الحين تالي يصير خير
ساره : لا والله انت ما تنضمن ... باجر تاخذني بهدومي .... انا مادري شلون قدرت تقص علي وتخلينا نملج جذي بسرعه
يوسف : لانج تحبيني رضيتي
ساره : من قال ؟
يوسف : ادري
ساره : يوسف اكلمك بعدين شيخه قاعد ادق علي ....... باي
يوسف : باي
ردت ساره على شيخه : هلا شيوخ
شيخه : هلا فيج عالبركه
ساره : واااااااااي شيوخ شفتي الحوسه اللي انا فيها بملج عقب 3 ايام ولا زهبت ولاشي
شيخه : انا استغربت ... هقيت ان الخطبه بطول
ساره : اي انا كنت ابيها اطول .... بس كله من امي
شيخه : ليش ؟
ساره : مو راضيه اني اطول مع يوسف بالمكالمات تقول ما له داعي ... ويوسف يحن يبي يملج .... تدرين اليوم الصبح قررنا ان الملجه الخميس اقوله ماشريت نفنوف يقولي لبسي بدلتج مالت العيد كلشاي عنده سهالات
شيخه : شرايج تاخذين بدلتي ؟
ساره: اي بدله ؟
شيخه : اللي كنت بلبسها حق ملجتي على فواز .... ولامره لبستها وهي كانت ذوقج
ساره : لا فشله ... خليها باجر تنفعج
شيخه : شنو فشله ... اليوم اييبها لج
ساره : بس هي غاليه
شيخه : واذا غاليه ماتكون اغلى منج .... وهم ايب لج جم بدله كنت شاريتهم حق اذا صار يمعة حريم او استقبال
ساره : لالالا بس نفنوف الحفله كفايه
شيخه : سوير لا تصرين حماره قلتلج اليوم ايبهم ... احنا مو خوات
ساره : دام احنا خوات عندي شي بقوله لج عشان مااخليه بخاطري عليج ...
شيخه : سالفة صقر ؟
ساره : اي شيوخ .... الله يعلم اني جد عزيت يوسف وحبيته ولو الف الدنيا مالقى مثله وصقر هم والنعم فيه وانشالله باجر يتوفق ببنت الحلال ... انا مابي اتكلم عنه لاني بكون على ذمة ريال غيره بس انا ابي اتكلم عنج مو عن صقر
شيخه : انا ؟
ساره : اي انا ماهمني صقر كثر ماهمني انتي .... شيوخ احنا كنا اكثر من خوات انا كنت اقرب لج من نوره اختج تتغيرين علي جذي وتحمليني ذنب جاسم
شيخه : اللي جاسم سواه مو شوي
ساره : ادري وهو غلطان من ساسه لراسه بس ماتحمليني غلطه انا مو قاعد اتكلم لانج ماوافقتي ان صقر ياخذني لان كل شي نصيب ويمكن هذا يكون خيره لي ... بس انا قاعد اتكلم شلون صرتي تعامليني لاتسالين عني ولا حتى تكلميني عدل مع انا عمري بحياتي ماغلطت بحقج وكنت دايم اوقف بصفج حتى جدام اخوي ... تذكرين لما كنت اقولج لاتاخذينه بتتعبين معاه ياما نصحتج بس ما سمعتيني ولما تمشكلتي معاه زعلتي مني انا
شيخه : -----------------
ساره : شيوخ انا احبج .... انا ماعندي خوات انتي عالاقل عندج نوره انا اللي مالي احد .... تدرين شكثر كنت اتمنى ادق عليج اسولف لج عن اللي يصير لي ... تدرين شكثر فقدتج يوم خطبتي ... طول عمري هقيت انج بتكونين معاي بكل شي ... بس انتي حتى مادقتي باركتي لي الخطبه ... ترا اذا جاسم اخوي انتي هم اختي
شيخه : سارة والله مو بيدي انا حدي اعتفست عقب جاسم ... بس والله حتى انا اشتقت لج
ساره : صج صج ولهتي علي ؟
شيخه : وايد
ساره : عيل تروحين معاي السوق اليوم ؟
شيخه : اليوم وباجر ولي يوم الملجه .... ويوم ملجتج ماني مداومه بقعد اجابلج
ساره : عيل باجر عقب دوامج مريني نروح السوق .... لبسي جوتي رياضه ورانا حوسه وبنطول
شيخه : اوكي .... عاد عندي سالفه مهمه بقولها لج
ساره : شنو ؟
شيخه : باجر تعرفين ؟
ساره : امممممم تحبين ؟
شيخه : شكو ؟
ساره : احساس
شيخه : مو حب .... اعجاب
ساره : حلو؟
شيخه : اووووووووووووووف
ساره : انتي حظج كله حلوين ... امج قاريه عليج
شيخه : قولي مشالله
اليوم الثاني بالدوام جاسم ماله خلق شي من امه قالت له ان جنى انخطبت هو صج متضايق .... وكلش كلش مايطلع برا مكتبه ... وهو قاعد يشتغل عالكمبيوتر ... دشت عليه جنى : صباح الخير
جاسم (من غير مايرفع راسه ) : صباح النور
جنى : شلونك ؟
جاسم (يطالعها ) : ماشي الحال
جنى : يايبه لك نسخه من القرار اليديد
جاسم : ليش مكلفه على حالج .... وين الفراش ؟
جنى (اندقرت حيييل هي كانت ولهانه على جاسم من كلمها ان يبي يخطبها ماشافته ... وكلش ما يمر الاداره لما وصل القرار لقت عذر عشان تروح له ) : مالقيته والمدير يبي الكل يوقع بالعلم ... عاد قلت ايبه لك لان اصلا انا يايه ادرتكم اخذ اوراق ( ترقيع )
جاسم : مشكوره ........... ( ورد يكمل شغله )
جنى : خلاص مااطول عليك تفضل القرار
جاسم : ---------------------
جنى : عسى ماشر شفيك ... جنك تعبان ؟
جاسم : يهمج ؟
جنى ( استغربت من طريقة جاسم ونفسيته .... وحدها توهقت شتجاوب مايصير تقول اي يهمني ولا تقول لا مايهمني ) : عن اذنك
جاسم : جنى
جنى : هلا
جاسم : ادري ان مو من حقي اسال هالسؤال .... بس ابي اعرف جوابه لاني بستخف من التفكير
جنى : خييييير
جاسم : تذكرين اني ييت كلمتج بموضوع الزواج
جنى : اي
جاسم : بينت لج اني ابيج واني بس اعرف رايج قبل ما اكلم اهلي
جنى : وانا قلت كلم اهلي مو انا
جاسم : ادري ... بس كان مفروض تخليني على علم مو اروح اكلم امي واعرف انج مخطوبه
جنى : انا مخطوبه .... مخطوبه ل منو ؟
جاسم : شدراني عبدالله .. عبدالرحمن اللي اذكر امه ناديه
جنى : عبدالله ال .......
جاسم : اي هو
جنى : كانت الخطبه هالاسبوع ؟
جاسم : اي صح مبروووووووك ...
جنى : الله يبارك فيك .... بس مو انا اللي انخطبت حق عبدالله
جاسم : عيل ؟
جنى : اختي
جاسم : امي قالت لي العروس اسمها جنى
جنى : العروس اسمها جنان ... اختي مو انا يمكن تلخبطت
جاسم : يعني انتي مو مخطوبه
جنى : لا
جاسم حس انه روحه ردت له ............ على طول رفع التلفون على امه
: الله يسامحج يما
ام جاسم : ويسامحك ... بس ليش ؟
جاسم : جنى مو مخطوبه
ام جاسم : اي جنى ؟
جاسم : اللي قلت لج عنها وقلتي لي ان انخطبت حق ولد ناديه
ام جاسم : وشدراك انها ماانخطبت ؟
جاسم : هي قالت لي ... اللي انخطبت اختها جنان
ام جاسم : عيل هي شسمها ؟
جاسم : يما تبين تجلطيني اسمها جنى
ام جاسم : وييييييه صج اهلهم ماعندهم سالفه نقصوا الاسامي مالقوا الا جنى وجنان ماكو اسامي
جاسم : كيفهم .... متى تخطبينها لي
ام جاسم : جسوم كافي الحوسه اللي انا فيها خل نخلص من ساره تالي اخطبها لك جاسم : يعني اليمعه
ام جاسم : عن التصرقع ... قلت لك بخطبها لك خلاص
جاسم سكر التلفون راح حق جنى : سمعي مو تقولين لي الدوام مكان مو مناسب ... ماني مطول انا كلمت امي تخطبج بس الحين هي لاهيه مع ملجة اختي الخميس يعني عالاسبوع الياي بدق ... جنى انا ابيج وصج اتمنى انج توافقين ريحيني الله يريحج تبيني او لا ؟
جنى : تهقى لو ماني موافقه ليش اقول لك كلم اهلي
ساره وشيخه كانت طلعتهم حيييل حلوه يحوسون من محل لمحل لينا طاحت ريلهم ... راحوا قعدوا بكافيه .. ساره : يلا شيوخ قولي شسالفة الحب الجديد
شيخه : قلت لج مو حب اعجاب
ساره : ماطاح الا انبطح ... منو هو ؟
شيخه : اسمه حمود ... ولد صاحب الشركه اللي انا فيها
ساره : يا انت ياللي ماتلعب الا على كبير..... حلو ؟
شيخه : زوغه .... حده زقرتي
ساره : اممممم هو منتبه لج ؟
شيخه : هذا اللي خلاني انعجب فيه حيييييييييييل مهتم فيني ... يعاملني غير عن باجي بنات القسم .... لازم كل يوم يسال عني تخيلس يطلع من مكتبه بس عشان يسلم
تموا ساره وشيخه سوالف مابقى شي ماسولفوا عنه ........... خلصوا طلعتهم وصلت ساره شيخه بيتهم حلفت عليها شيخه الا تنزل تقعد شوي عندهم ... نزلت ساره سلمت على خالتها وطلعت والا تلقى صقر برا توه نازل من سيارته .... صقر فز قلبه لما شافها على طول راح لها : شلونج ساره ؟
ساره : بخير
صقر : زايرتنا ؟
ساره : لا اليوم انا وشيخه طالعين وتوني موصلتها نزلت اسلم على خالتي
صقر ( مستغرب ) : طالعه مع شيوخ ..... شكله طاح الحطب بينكم ؟
ساره : الحمدالله
صقر (حده استانس ) : الله يبشرج بالخير ... ويتمم عليكم ... سوير انا اللي منعني عنج انه ماكنت ابي اكسر بخاطر اختي بس دام انتوا تراضيتاو وتصافيتوا مااهقى في شي يمنع اني اخذج
ساره : صقر انا ملجتي عقب باجر
صقر : كنسلي
ساره : شنو اكنسل موعد هو هذي ملجه مو لعب
صقر : بس انا ابيج
ساره : بس انا ابي يوسف
صقر : شنو يعني ؟
ساره : يعني انا ابي يوسف ماابي غيره
صقر: وانا ؟
ساره : الله يوفقك
صقر : خلي عنج العناد
ساره : شكو عناد .... صقر اذا السالفه عندك عالمزاج تهون لان اختك ماتبي وترد تبيني لان اختك ردت معاي .... انا مو مثلك انا مرتاحه مع يوسف ولا ابي غيره ولا افكر بغيره
صقر : تبين تحريني ؟
ساره : حشى علي .... اصلا ماارضى عليك الحره انت ولد عمي بس انا قاعده اقول الصج .... يالله عن اذنك باي
صقر مااستوعب من صجها ساره شلون تغيرت ... ساره ماتغيرت ولاشي بس خلاص قصتها مع صقر انتهت من زمان .
يوم الاربعاء شيخه راحت حق حمود المكتب : صباح الخير
حمود ( مع ابتسامه ) : ياهلا صباح النور...... شلونج ؟
شيخه : بخير ... انا صراحه يايه اطلب طلب
حمود : انتي تامرين ما تطلبين
شيخه : تسلم ... بس باجر ابي اخذه اذن مااداوم
حمود : افا ... ليش ؟ فيج شي ؟
شيخه : لا بس بصراحه ..... باجر ملجة بنت عمي وبكون لاهيه معاها حيييل ماراح اقدر اداوم
حمود : عاد انتوا الحريم اذا عندكم حفله تختبون حيل ... انا ماودي اعطيج الاذن بس مااقدر ارد لج طلب ... خلاص باجر لا اداومين بس الاحد تيين
شيخه : لا اكيد الاحد بداوم
حمود : خلاص عيل استناسي باجر والله يتمم عليها انشالله
شيخه : تسلم
الخميس بالليل كان الوضع حده حوسه ببيت بو جاسم ... ام جاسم بس تبجي ويوسف كل شوي داق
ساره : يوسف حرام عليك .... شفييك كل دقيقه داق
يوسف : كيفي مو صرتي زوجتي
ساره : والله ادري من وقت ماملجت وانت ادق بس حرام عليك خلني ازهب ... تبي انزل عند الحريم شكلي مبهذل
يوسف : اووووووووف انزين ... متى بتنزلين ؟
ساره : عال 10
يوسف : الله واييييييد عيل انا متى ايي ؟
ساره : اممم تعال عال 11:30
يوسف : لا والله 10:15 اييي
ساره : لا مبجر
يوسف : عيل دشي قبل ال 10
ساره : مايصير
يوسف : لا يصير
من حنت يوسف دشت ساره 9:30 كان شكلها يطير العقل نفنوفها كان سكري ضيج وفيه ذييل ومسويه شعرها تسريحه رومانيه ومكياجها كان حييل حلو وراقي اي لاينر وحمرا حمراااااا .... دشت ساره نزلت ساره على اغنيه .... اغنية راشد الماجد .. حدكم منكم شاف بالدنيا بدر الاغنيه قديمه بس ساره حييييل تحبها
شيخه كانت لابسه نفنوف قصير سيلفر يلمع وظهره عاري وشعرها ويفي وحاطه شدو درجات الرمادي وحمرا ورديه ... الكل زاغ عليها وطول الملجه ماقعدت .... لو ان ساره عندها اخت جان ماصارت مثل شيخه
صار وقت دخلة الرياييل دخل يوسف مع بو جاسم وجاسم بس .... جاسم كان جنه هو المعرس من حلاته كل البنات زاغوا عليه ام جاسم بس تذكر الله على عيالها ..
شيخه يوم شافت جاسم غصب عنها اذكرت يوم ملجتهم غصب عنها عينها دمعت
يوسف كلش ماطول بقعدته ... خذا ساره وصعدوا فوق الصاله الثانيه
يوسف : مبروك
ساره : الله يبارك فيك
يوسف : ليش قاعده بعيد ؟
ساره : مو بعيد
يوسف : قربي شوي
ساره :انشالله
يوسف : حلاة الادب .... انزين اقولج انا كنت حاجز مطعم بس طاف وقت الحجز ... شرايج نروح كافيه بدال المطعم
ساره : كيفك
يوسف : انزين انتي بتطلعين بهالبدله ؟
ساره : اكيد لا
يوسف اي عبالي ... عيل يالله غيري
ساره : اوكي شوي وارد
يوسف : ماتبيني ايي معاج .... اغمض
ساره : لا استريح .... ماني مطوله
يوسف : ترا صرتي زوجتي
ساره : درينا الف مرا تقولي
يوسف : اي اذكرج بس .... انزين تعالي بوسيني
ساره : لا ماابي استحي
يوسف : ترا صرتي زوجتي
ساره : والله ذليتني
يوسف : كيفي زوجتي
يوسف جابل ساره عدل اليومين اللي ورا الملجه ... يوم الاحد شيخه بالدوام يالها حمود : شلونج شيخه ؟
شيخه : الحمداللخ بخير
حمود : ها شلون حفلتكم ؟
شيخه : الحمدالله حدها كانت حلوه
حمود : بس مااهقى احلى منج
شيخه ( منصدمه ) : نعم
حمود : احسج انج كنتي احلى وحده بالحفله حتى احلى من العروس
شيخه ( حيييييل حيييييل انحرجت ماكان لازم يقول جذي ) : ------------
حمود : خوش عيل ... انا بطلع مبجر تامرين على شي
شيخه : سلامتك
جاسم من ملجت اخته وهو يحن على امه تخطب جنى ... امه عشان تفتك منه دقت تخطبها ... اهل جنى بالبدايه كشوا من الموضوع لان جاسم مطلق بس لما سالوا عنه الكل مدح فيه وجنى كانت تبيه ... وافقوا اهل جنى على جاسم ... جاسم حده طاااااااااار من الفرحه وحددوا موعد الملجه ... شيخه لما درت ان جاسم بيملج حست ان احد معطيها كف حدها انصدمت واحترت زوود لما درت ان جاسم هو اللي منقي العروس وحابها حست بغيره كانت تتمنى ان جاسم يتعاقب على اللي ساوه فيها
.
صقر حصل له وظيفه حدها زينه ومرتاح بدوامه بس مايفكر بالزواج يبي يبني مستقبله اول .
شيخه كانت بالدوام ناداها حمود مكتبه : شيخه قعدي بكلمج
شيخه : خيير
حمود : شيخه مابي الف وادور عليج انتي تدرين اني مهتم فيج وانج عندي غير اللي بالقسم
شيخه ( ويها وحمر ) : -----------
حمود : وانا من شفتج دايم ابين لج اهتمامي بس انتي مو قاعد تبينين لي اي شي ... واحس اني على معاملتي معاج استاهل منج احسن من هالمعامله
شيخه : ليش تقول جذي ... بالعكس انا قاعده اعاملك عادي
حمود : بس حيييل ناشفه
شيخه : يعني ... شسوي ؟
حمود : هو صح عشان مايطلع علينا كلام والناس مافيها خير ... بس مرات يصير ودي اقعد معاج اكلمج نسولف
شيخه : مادري والله شقول
حمود : سمعي اليوم دقي علي ونتفاهم
شيخه : ادق عليك ؟
حمود : اي اقولج انتي داشه خاطري
شيخه : شنو يعني ؟
حمود : يعني ابيج
شيخه : تبيني شنو ؟
حمود : انتي مو مطلقه
شيخه : واذا
حمود : يعني مافي شي تخافين منه ... وصدقيني ماراح تلقين مثلي واحد يدللج ويحبج
شيخه : انت شلون تتجرا تقول لي هالكلام
حمود: اتجرأ ... ليش انا شقايل ؟ طيبي خاطري وصدقيني ماراح تلقين من الا اللي يطيب خاطرج
شيخه كان هذا اقوى طراق عطيتها اياها الدنيا شلون فكر فيها حمود جذي ...شيخه يومها طلعت من الشركه ولا ردت لها مره ثانيه كرهت الناس وكرهت الدنيا صارت ماتطلع ولاترد دايم بالبيت ولاحد عرف اللي فيها .... هذاك اليوم دشت عليها امها : شيوخه حبيبتي عندي لج خبر حلو ؟
شيخه : خير ...
ام خالد :يايلج معرس
شيخه فرحت لما امها قالت لها جذي هي ماكان لها خاطر بالزواج بس حست انه هو خلاصها من نظرات الناس وظنونهم .... تعبت من تلميحات الناس ونغزاتهم حتى اهلها اللي هم اقرب الناس لها تغيرت معاملتهم لها عقب طلاقها قاموا يعاملونها جنها بيبي او مريضه نفسيه وايد يراعونها وايد يدارونها يحسبون حساب قبل لا يقولون لها اي كلمه
شيخه : موافقه
ام خالد : ماتبين تعرفين منو هو ؟
شيخه : مايفرق اهم شي انه خوش ريال وانا واثقه انكم ماراح تزوجوني اياه الا اذا كان زييييين
اك خالد : اسمه مشاري ال .........
شيخه : اسمه مو غريب علي
ام خالد : اي هو رفيج خالد اخوج وايي ديوانيه عمامج ..... حده محترم وحبيب مطلق زوجته الاولى نسره اذته
شيخه : مطلق ؟
ام خالد : اي
شيخه : انزين
ام خالد : بس هو عنده شرط
شيخه : يتشرط ... شنو شرطه ؟
ام خالد : يبي عياله يعشون معاه
شيخه : عياله ؟
ام خالد : عنده ولد وبنت صغار
شيخه : اخذ مطلق وعنده عيال ؟
ام خالد : شيوخه حبيبتي ... لا تنسين انج مطلقه
شيخه : بس طلاقي ماكان غلطتي ... جاسم هو اللي خاني وهو اللي ينني ,,,, هو اللي غلط وبالتالي هو ياخذ له بنت وفيها احسن المواصفات وانا اللي انظلمت بالسالفه اخذ لي بو عيال
ام خالد : هو ريال شايل عيبه
شيخه : لا هذا مو عذر كلش مو عذر ان هو ريال ...
ام خالد : شيخه ترا الريال اللي يايلج حده محترم وزين هو رفيج خالد اخوج وماسك منصب وولد عايله ترا يمكن هالفرصه ماتتكرر لج
شيخه : فرصه ؟
ام خالد : ياحبيبتي الحين البنات اللي ببيت اهلهم مو لاقيين ريل ... تبين تيين انتي تتشرطين
شيخه : عنده عيال واكيد انه اكبر مني دامه رفيج خالد
ام خالد : مو بوايد كلها 9 سنين ... بالعكس يكون راكد وفاهم
شيخه : ليش حظي جذي والله عمري مااذيت احد
ام خالد : بعد هذا حظج ونصيبيج
شيخه حست ان قلبها عورها لما سمعت هالكلمه من امها ... تذكرت حمود واللي قاله لها ... تذكرت تلميح فواز انها بترضى فيه لانها مطلقه ... ذكرت معاملة اهلها لها
ام خالد : شقلتي
شيخه : شقول ....... هذا حظي ونصيبي
الناس في هالدنيا حظوظ وكل واحد بياخذ نصيبه ..... جاسم من يومه محظوظ الدنيا ماقصرت معاه عطته اكثر مما يستاهل وشيخه الدنيا دفعتها ثمن اختيارها الغلط ثمن غالي ... ثمن خذا منها عمرها اللي راح واللي ياي .... كل واحد بياخذ حظه ونصيبه من الدنيا كل شي مكتوب بس كل واحد فينا يقدر يغير حظه يقدر يعدله .... اسعى ياعبد وانا اسعى معاك .... عالاقل لو ماتغير حظنا الردي يكفي انه نحس ان احنا حاولنا نغيره حاولنا نعدله مجرد المحاوله فخر والفشل لو ظل موجود بحياتنا بيذكرنا ان احنا حاولنا ........ الدنيا ماتعطينا اللي نبي احنا اللي لازم ناخذه منها نتعب عليه حتى لو ناخذ منها اللي نبي غصب المهم ناخذه عمرنا لانقول هذا حظنا ونصيبنا ونرضى .
بنات مشكورين عالمتابعه ومشكورين عالتشجيع كلامكم كان له اثر كبير علي وعطاني دافع وصج راح اشتاق لكم وانشالله القاكم مع قصه يديده قريب...
