البارت ال 23 :
قرر فواز ان يخطب شيخه ... يوم خطبة الرياييل الظهر فواز راد من الدوام مبجر وقاعد يتغدا مع امه : يماا ماعليج امر ابيج اليوم تبخرين لي دشداشتي وغترتي وراي خطبه
ام فواز : خطبة منو ؟
فواز : خطبة يوسف رفيجي ... انا مو قلت لج ان بيخطب ساره ال....... بنت عم نوره مرة فيصل .
نوريه ام فواز : اي صح ... الله يتمم عليه انشالله عاد يوسف يهبل ... والله لو عندي بنت ماعزيتها عليه
فواز : تصدقين يما على كثر ماعرفت وشفت عمري ماشفت واحد قلبه ابيض مثله الله يسعده ويوفقه
ام فواز : الفال لك انشالله ان خطبة يوسف تشيشك وتخليني اخطب لك ... ماصارت فواز فرح قلبي ... ابي افرح فيك
فواز : انشالله قريب
ام فواز : شرايك اخطب لك اخت رشا مره اخوك سعود
فواز : لا ماحب سالفة اخوان ياخذون خوات
ام فواز : وانا كل ماقلت لك عن وحده طلعت فيها عذروب ... شكلك قاعد تاخذني على قد عقلي بس تبي تسكتني
فواز : لا والله حشى اصلا هالمره انا جد ناوي ... بس خل اخلص من خطبة يسوف وأتفرغ حق خطبتي
ام فواز : صج والله ... ادور لك يعني ؟
فواز : لاادورين ... البنت موجوده ومنا وفينا ... لاوفوق هذا انتي تحبينها
ام فواز : منو هذة ؟
فواز : قلت لج خل نخلص من خطبة يوسف واعلمج كل شي ... ياخبر اليوم بفلوس باجر يكون ببلاش
-------------------------------------------------------------------------
شيخه كانت بالدوام قاعده بمكتبها
حمود : صباح الخير
شيخه : هلا صباح النور
حمود : شلونج شيخه ؟
شيخه : الحمد الله بخير
حمود : وين لميا ؟
شيخه : الحين يايه ... تصور جم ورقه وراده
حمود : ليش ماتصورهم هني
شيخه : المكينه خربانه
حمود : ياكثر ماتخترب هالمكينه ... خل اشوف الفني يدور لنا صرفه ........ شلونج ويا الشغل مرتاحه؟
شيخه : اي والله حييل مرتاحه
حمود : عسى دوم ... شوفي خلصي اللي بيدج وتعالي لي مكتبي التقرير اللي امس سويته ابيج تغيرين فيه جم شغله تعالي اعلمج اياهم
شيخه : انشالله
طلع حمود شيخه ماوخرت نظرها عنه صج مزيون ... وفوق زينه ولد خير ونعمه بنات الاداره كلهم زايغين عليه ... وكل بنت بالادراه تكشخ وتهتم بنفسها يمكن تقدر تلفت نظره .
ردت لميا الاداره : شيوخ حمود كان هني ؟
شيخه : اي شدراج ؟
لميا : لمحته طالع من هني .... شكان يبي ؟
شيخه : يبي امره المكتب اغير بالتقرير اللي سويته
لميا : يابختج ... ياريتني انا اللي سويت التقرير عشان اجابل ويهه
شيخه : شدعوه عليج ؟
لميا : شنو شدعوه علي الولد مافيه شي ينقط ... شعندج اليوم بالليل ؟
شيخه : اممم ولا شي .. ليش ؟
لميا : اشرايج نطلع ؟
شيخه : اوكي ... بس وين ؟
لميا : شرايج شوكلت بار البدع
شيخه : اوكي صار
ردت شيخه تكمل شغلها والايرن تلفونها .........شيخه : الو
فواز : شلونج شيخه ؟
شيخه ( الصوت مو غريب عليها بس مو ذاكره صاحب الصوت ) : منو معاي ؟
فواز : معاج فواز
شيخه ( استغربت حيييييل من زمان حيل عن فواز ) : ياهلا ومرحبا فواز
فواز : هلا فيج ... شلونج ؟
شيخه : بخير الحمدالله ... انت شلونك ؟
فواز : والله بخير .... اول شي ابي اعتذر اني داق عليج ادري انها حركه مو حلوه بس بصراحه انا في موضوع شاغل بالي وابي اكلمج فيه قبل لا اخطي فيه اي خطوه ومالقيت طريقه اقدر اكلمج فيها الا اني اتصل عليج .... والحمدالله اني للحين مسيف رقمج جان توهقت
شيخه : خيير انشالله ؟
فواز : اكيد خير .... سمعي يابنت الناس انا بقولج اللي بخاطري وفي بالي ... صراحه انتي للحين بخاطري وانا ابيج ومن فلينا الخطبه وانا افكر شاللي غيرج علي ولالقيت سبب قلت يمكن انه مارحتي لان اهلج اجبروج علي
ووخرت عنج من غير مااضغط عليج او اسبب لج اي احراج وهم ماحبيت اني افرض نفسي عليج ... انا الحين داق اقولج انا للحين ابيج وخاطري انج تكونين من نصيبي بس قبل لا اكلم اهلي او اهلج قلت اكلمج اعرف رايج عشان مااحرج نفسي جدام اهلي
شيخه : -------------------
فواز : يقولون السكوت علامة الرضا
شيخه : -------------
فواز : انزين ... انا ابي اسمعها
شيخه : دامك فهمتها .. ليش تبي تسمعها ؟
فواز : خاطري اسمعها
شيخه : -------
فواز : يعني تخلينها بخاطري
شيخه : شنو اقول ؟
فواز : قولي ابيك
شيخه : فواز بليييييز لاتحرجني
فواز : دام هالكثر بتحرجج مو الا ... انشالله اليوم اكلم امي ... بس سمعي مو اقولج نملج تقولين ابي اجهز هدومي ماتنفع .... اهقى ان بهالسنه اللي افترقنا فيها صار عندج هدوم وايد
سكر فواز التلفون من شيخه وخلاها بدنيا ثانيه اخيرا الدنيا بدت تراضي شيخه ... كانت الدنيا مو سايعتها من الفرحه ... يتلها طاقه مو طبيعيه من الوناسه خلصت اللي بيدها ... وراحت حق حمود مكتبه :
حمود : ياهلا توه مانور المكتب
شيخه ( انحرجت شوي ) : منور بوجودك تسلم
حمود : قعدي
شيخه : لا عادي
حمود : شنو لاعادي ... بتتعبين من الوقفه مطول انا التقرير كله بيتغير
شيخه : ليش ... كله غلط ؟
حمود : اي ... بس الغلط مو منج مني انا الاوراق اللي عطيتج اياهم امس ماكانوا هم الاوراق اللي ابيج تسوين لهم التقرير ... يعني لازم تعيدينه كله
شيخه (تنرفزت لانها صج كانت تعبانه عالتقرير ) : مو مشكله ... اليوم اخذه البيت احاول اخلصه وانشالله باجر اسلمه لك
حمود : لا شنو تاخذينه البيت ... اوراق الدوام ماتطلع برا الدوام ... ياريت انج تقعدين تسوينهم هني
شيخه : مايمدي الدوام بيخلص بعد اقل ساعه ...
حمود : ادري ... تاخري بالشركه ... دقي عالبيت قولي عندي شغل وبتاخر في ناس يتاخرون لليل هني
شيخه ( ماعجبها الكلام ) : انشالله
ردت شيخه المكتب حدها معصبه ... لميا : شفيج معصبه ؟
شيخه : هالحمود يبيني اعيد التقرير من اول ... لاوفوق هذا قال مااودي الاوراق البيت يعني لازم اتاخر هني اليوم عشان يمديني اخلصهم
لميا : ويييييييييه يعني ماكو طلعه اليوم ... خلاص عيل انا بقعد وياج ؟
شيخه : من صجج ؟
لميا : اي شوراي ... البيت ملل ماعندي شي اسويه ... اقعد معاج نسولف واساعدج عشان نخلصه بسرعه
شيخه : واااااي صج مشكوره ... صج كان ضايق خلقي اني بقعد بروحي
عقب ماخلص الدوام مر حمود المكتب عند شيخه والا يلقى لميا
حمود : لميا شمقعدج ؟
لميا : ماكو اساعد شيخه
حمود (مستغرب ) : زين تسوين عشان تخلصون بسرعه ... دام جذي انا ماشي ... الله يعطيكم العافيه
لميا : الله يعافيك
حمود : شيخه ... لما تخلصين من تقريرج صوري منه نسختين خلي وحده عندج وحده دزيها السكرتاريه
شيخه : انشالله
في بيت بو جاسم الوضع كان حده لويه وشطه ... ام جاسم بس تسنع بالديوانيه خلت الخدم 3 مرات ينظفونها ... وكل شوي مبخره
ساره : يما حرام عليج ... ريحي عمرج من الصبح تحوسين
ام جاسم : الهي نفسي مابي افكر
ساره : تفكرين بشنو ؟
ام جاسم : ولاشي
ساره : يما شفيج .... خبصتيني
ام جاسم ( راحت قعدت يم بنتها وعينها مغورقه ) : مو مصدقه انج بتروحين عني .. انا ماعندي غيرج .. صج البيت بيفضى من بعدج
ساره ( لمت امها ) : حياتي يما ... مو الا اتزوج خلاص اتم عندج ولا اشوفج تبجين
ام جاسم : لا انشالله تروحين عند ريلج وافرح فيج .... بس ماني قادره اتخيل نفسي من غيرج ... انتي دايم مجابلتني
ساره : يما ترا بس خطبه ماعرست للحين
ام جاسم : تدرين سوير انا حلفت ابوج ان يشرط على يوسف شرط وانشالله ان يوسف يوافق
ساره : شنو هالشرط ؟
ام جاسم : انا قلت حق ابوج ان يكلم يوسف تسكنون عندنا
ساره : وين نسكن عندكم ؟
ام جاسم : احنا مزهبين دور جاسم اللي كان بيسكن فيه مع شيخه ... بس دام ان الله ماوفق بينهم بخلي حقج ويوسف
ساره : وجاسم ؟
ام جاسم : اذا تزوج يانبي له دور او يطلع .... اهم شي انج تكونين عندي
ساره : انشالله ماطمعون يوسف فيني من اولها ... اسكنه ببيتنا باجر اصرف عليه
ام جاسم : انجعمي ... يوسف ماعليه قاصر بدال الدور يقدر اييب لج بيت ... انتي قولي عسى يرضا .. انا قلت حق ابوج يحاول فيه ... سوير اذا مارضا انتي ساحليه قولي هذي امي مااقدر اخليها من هالكلام
ساره : اصلا غصبن عنه بيرضا ... انا صج مااقدر اخليج
ام جاسم : انزين قومي لبسي
ساره : ليش ؟
ام جاسم : شنو ليش ... اليوم خطبتج ؟
ساره : اي خطبة الرياييل .. انا شكو البس لا يكون بروح لهم الديوانيه
ام جاسم : لا بس اكيد عمامج بيدشون يسلمون عليج ويباركون لج
ساره : يوسف ماراح يبارك لي
ام جاسم : لا بس عمامج
ساره : دام اني بلبس خلي ايي معاهم ... لان مالي خلق اليوم البس واكشخ وباجر هم البس تقولون ياي يبي يقعد معاج ... خل البس مره وحده
ام جاسم : شكو ايي .. لا ايي ولاشي
ساره : يما انا مو قلت ان ابي اتعرف عليه عدل قبل الملجه .. خل يدش دام ابوي وعمامي موجودين
ام جاسم : انتي من صجج ... مايصير
ساره : لا يصير انا بقول حق ابوي ... انا ماقلت بقعد بروحي معاه .. وانا كنت شارطه
ام جاسم : كلميه بالتلفون ... اكيد ان بيدق يكلمج
ساره : انشالله مااقزرها معاه تلفونات .... يما خلي يدش مع ابوي وعمامي ... خل اشوف طريقته اسلوبه
ام جاسم : انتي شكلج وايد تشوفين افلام مصريه
ساره : انا بقول حق ابوي
صج راحت ساره حق ابوها اللي بقى يفلعها بالاول بس قدرت تقنعه ان مافيها شي دام ان معاها محرم
اذن العشا ويه يوسف واهله وطبعا فواز اللي كان منحرج يدش الديوانيه ... بس حيل ارتاح لما شاف اهل جاسم وعمامه شلون يهلون فيه ... اللي ريحه انه حس ان مابخاطرهم شي عليه ... وان مافي اي صعوبات ان يخطب شيخه ... جاسم كان مبين عليه ان حييييل فرحان باخته ... جاسم صج كان مستانس هو وايد يحب ساره مع ان مو النوع اللي يبين مشاعره بس هو يخاف عليها من الهوا الطاير .... يوسف حس بحب جاسم حق اخته ووايد حب جاسم واستانس عليه وهم جاسم حيل ارتاح حق يوسف .
صقر اللي طول الخطبه كان ساكت الكلمه ماتطلع منه الا بالغصب ... حاول يوسف يسولف معاه بس صقر كان حيل ناشف ... عقب ماتمت الخطبه وياو الرياييل يمشون .. ابو جاسم خذا يوسف على جنب
ابوجاسم : يوسف عمام ساره بيدشون يباركون لها شرايك تيي معاهم ؟
يوسف ( طار من الفرحه زين ما لم عمه ) : انشالله عمي
ابو جاسم : خلاص عيل اذا مشوا الاهل وفواز دخلنا داخل احنا
يوسف : خلاص انشالله
يوسف من وناسته ولهفته زين ماطرد اهله من الديوانيه كان ميت يبي يدش داخل بسرعه
مشوا اهل يوسف وفواز .. ويوسف تم خالد وصقر استغربوا ليش ما مشى
بوجاسم : حياك يوسف معانا تبارك حق مرتك
صقر ( جنه احد لاته كف شكو يدش يوسف هذي خطبه مو ملجه .... وشكو يقولون له مرتك )
خالد : عمي انا بمشي عالعموم بالبركه والله يتمم عليكم انشالله ... يلا صقر مشينا
صقر : لا ابي ابارك حق خالتي ام جاسم
دخلوا داخل الرياييل .... يوسف كان منحرج ومنزل راسه صقر كان قلبه يدق بسرعه تحسف انه دش عرف ان ماراح يستحمل شوفة ساره ... جاسم راح ناده اخته
ساره كان شكلها حيل حلو كان صج مبين انها عروس كانت لابسه نفنوف ابيض للركب فيه دانتيل ومسويه شعرها ويفي خفيف وحاطه تاج سيلفر ... عمامها باركوا لها بس صقر ولاقرب او تكلم ظل واقف مكانه .. هي لمحت زوول صقر بس ماطالعت صوبه ماهقت انه بيدش
يوسف : مبروك ساره
ساره : الله يبارك فيك
صقر ( من غبر مايحس ) : ساره
ساره (لفت عليه .. مستغربه ) : ------------------
صقر (توهق ماتكلم شوي تالي استوعب انه لازم يقول شي ) : وين خالتي ؟
ساره : فوق
صقر : انا صاعد لها
صعد صقر فوق بس ماراح حق خالته ماكان يقدر ان يبارك حق احد وقف شوي فوق عند نهاية الدرج تالي نزل الموجودين على بالهم ان بارك وخلص اول مانزل استاذن ومشى ركب سيارته صار يفتر بالشوارع جنه مينون مايدري وين يروح
فواز رجع البيت والا يلقى امه بالصاله ناطرته
نوريه : شلون خطبتكم ؟
فواز : الحمدالله
نوريه : الله يتمم عليهم انشالله
فواز ( رايح صوب داره ) : انشالله
نوريه : وين رايح ؟
فواز : داري
نوريه : تعالي قولي منو اللي بتخطبها ... مو انت قلت لما تخلص خطبة يوسف بتعلمني
فواز : الحييييييين عرفت ليش قاعده ناطرتني
نوريه : من اول ماطلعت وانا قاعده ماتحركت انطرك ... يلا علمني
فواز : بخطب شيخه
نوريه : اي شيخه ؟
فواز : اخت نوره مرة فيصل
نوريه : وااااااي فواز ياملقك ... تكلم عدل
فواز : انا قاعد اتكلم عدل بخطب شيخه
نوريه : انت من صجك
فواز : اي ليش مستغربه ؟
نوريه : بس هي تزوجت جاسم ولد عمها
فواز : واطلقت منه
نوريه : وخير ياطير
فواز : شنو يعني خير ياطير ... يعني البنت مو على ذمه احد اقدر اخذها
نوريه : انت ينيييت ... تاخذ مطلقه
فواز : واذا مطلقه مافيها شي ؟
نوريه : مافيها شي اذا انت مطلق او ارمل او ناقصك شي ... بس انت ماعليك قاصر الف بنت تتمناك ليش تاخلك مطلقه .... ليش تظلم بختك
فواز : لا اطلم بختي ولاشي البنت خوش بنت واذا على قولتج الف وحده تتمناني حتى هي الف واحد يتمناها
نوريه : كيفهم هالالف واحد ... ليش انت تكون منهم
فواز : يما شفيج اللي اعرفه انج تحبين البنت نسيتي شلون كنتي تتكلمين عنها لما قلتي لي اخطبها بالاول
نوريه : انا للحين احبها ومابقلبي عليها شي بس مو معناة اني احبها انك تاخذها بالاول كنت ابيها لك لما كانت بنت الحين الوضع تغير
فواز : يما لاتغير ولاشي ... البنت مالها ذنب انها طلقت ... ماندري شبينها هي وريلها
نوريه : كا انت قلتها ماندري شبينهم ... شحادك يما تاخذلك مطلقه على قولة المثل لوفيه خير ماتركه الطير ,,, انا مااقول ان الغلط منها بس هم يايما ليش تصير بوضع ماتدري شنو هو
فواز : يما البنت انا ابيها وحابها ... الله يخليج لا تصعبين الموضوع علي
نوريه : ترضاها على نفسك يافواز
فواز : شاللي ارضاها على نفسي ترا انها مو مطلقه مو عيب ولاحرام
نوريه : انا مو قصدي انها مطلقه
فواز : عيل شاللي ارضاه على نفسي
نوريه : ترضى تاخذها الحين وهي مطلقه عقب ماتركتك وهي بنت
فواز : شنو ؟
نوريه : اول يوم انها بنت ومافي شي يعيبها مابغتك والحين لما طلقت تاخذك
فواز استغرب كلام امه هو كان مفهم امه انه هو اللي يبي يفل الخطبه مو شيخه
: شدراج
نوريه : انا امك تهقى مااعرفك انت كنت طاير بالبنت وانت خاطبها ماعندك سالفه الاهي وتعد الايام عشان تملج عليها وفجاه قلت تبي تفل تهقى لهدرجه انا مدمقه وعقب مافليتوا الخطبه بفتره قصيره خذت ولد عمها .... انا ماكلمتك وقتها لان مابغيت اضايقك وقلت كل شي نصيب وان الله بيعوضك باللي احسن منها بس الحين ماني ساكته اذا انت ترضا تاخذ بنت كسرت فيك وخلتك عشان غيرك انا ماارضاها لك .... انا البنت احبها واتمنى لها كل خير ... بس انت ولدي حشاشة يوفي اللي يبيعك بفايده ابيعه بتراب ... هالسالفه تنساها مره وحده ولا تفتحها معاي مره ثانيه
ولاتقص على نفسك وعلي وتقول حابها وابيها متى امداك تحبها انت ماقدرت تنساها لان حز بخاطرك انها تركتك من غير ماتعطيك سبب يريحك ... انا بروح انام وباجر بكلم حريم اخوانك يدورون لك بنت الحلال اللي تعزك وترزك وانشالله الله يعوضك خير
فواز مع انه وايد كان يفكر ب شيخه بس ولا مره فكر فيها بنفس الطريقه اللي فكرت فيها امه ......... ولامره خطر بباله ان شيخه تركته عشان جاسم يومها ماقدر ينام كلام امه كان صح شنو هالبنت اللي تنفل خطبتها عقب شهر تنخطب حق واحد ثاني ..... وصح هي مارضت فيه وهي بنت الحين لما تغير وضعها راح ترضا فيه احتر فواز يومها اكثر من حرته يوم فلت خطبته من شيخه لان توه يفهم السالفه عدل.....
دق فواز عل شيخه مع ان الوقت كان متاخر شوي : هلا شيخه ....
شيخه : هلا فيك
فواز : ماني مطول عليج لاني ادري ان الوقت متاخر بس بسالج سؤال وابيج تجاوبيني عليه بكل صراحه
شيخه (مخترعه ) : شنو ؟
فواز : انتي ليش فليتي خطبتنا ؟
شيخه (سكتت شوي ) : شياب هالسؤال على بالك الحين ؟
فواز : بس ابي اعرف
شيخه ( ماعرفت شتقول كلش ماعندها جواب حق هالسؤال ) : -----------
فواز : ليش ساكته ؟
شيخه : مادري شقول .... سؤالك فاجئني ؟ انت ماسالتني اياه اول مافلينا ؟
فواز : ماكنت ابي اعرف الجواب لان ماراح يفرق وياي لان بكل الاحوال كنا بنفل بس الحين ابي اعرف
شيخه : ليش ؟
فواز : ابي اعرف السبب اللي خلاج تفلين مني بالاول راح والا لا
شيخه : اي راح
فواز : جاسم
شيخه : شنو ؟
فواز : انتي تركتيني عشان جاسم ؟
شيخه : --------------
فواز : انزين انتي تركتيني لانج ماقدرتي تحبيني كثر جاسم والا تركتيني لانج عرفتي ان جاسم ناوي ياخذج
شيخه :----------------
فواز : يعني قزرتيها علي ؟
شيخه : لا والله مو جذي السالفه
فواز : عيل؟
شيخه : اسمع السالفه خلصت وانت الحين مالك حق تنبش فيها
فواز : شلون مالي حق السالفه تخصني
شيخه : وقتها ... بس الحين احنا بنبدي مره ثانيه يعني لازم تنسى اللي كان اول
فواز : يا سلام انسى ... واذا باجر رجع جاسم بتهديني
شيخه : فواز ..... انت عقلك براسك وتعرف خلاصك اذا انت مو واثق من قرارك ان تخطبني وعندك شكوك ماله داعي تخطبني وتعيش بشكوك
فواز : انا داق الحين عشان اوخر هالافكار اللي ببالي ............... انا مابي اخذج وانا حاس ان يوم ماكنت بنت مارضيتي فيني والحين لان وضعج تغير رضيتي
شيخه : شقصدك ؟
فواز : كلامي واضح مافيه قصد
شيخه : قصدك اني عشان اطلقت يعني صرت ابيك
فواز : انا ماقصدت جذي
شيخه : عيل ؟
فواز : ---------------
شيخه : تدري شلون انا ماابيك ولاتكلم اهلك
فواز : الحين انتي شفيج تتكلمين جذي
شيخه : اتكلم عادي .... المطلقه ماتبيك يادكتور فواز ... عن اذنك الوقت وايد تاخر وماعندي كلام زود اقوله
سكرت شيخه التلفون من فواز وحست بجرح كبير ... ماهقت ان فواز ممكن بيوم يحرجها جذي ....... يومها صج حست بمرارة كلمة مطلقه
اليوم الثاني الصبح
ساره كانت نايمه والايرن تلفونها ....... ساره : الو
يوسف : صباح الخير
ساره : منو ؟
يوسف : يوسف
ساره ( فزت من نومتها ) : يوسف ؟
يوسف ( يضحك ) : ههههههههههههه
ساره : شفيك ؟
يوسف: شلون تغير صوتج لما قلت لج يوسف
ساره : لاتغير ولاشي
يوسف : ذكري ربج اول ماسمعت صوتج على بالي داق على واحد من الربع
ساره : ---------------------
يوسف : لايكون زعلتي ؟
ساره : لا اصلا انا واثقه من صوتي
يوسف : شعندها اصاله ؟
ساره : جم الساعه الحين ؟
يوسف : ماصارت 7
ساره : 7 الصبح ؟
يوسف : اي
ساره : مو جنك داق مبجر شوي
يوسف : حبيت اصبح بصوتج عشان يصير يومي حلو
ساره (انحرجت ): ----------------
يوسف: شدعوه ماتبين تسمعيني صوتج ؟
ساره : مادري شقول
يوسف : قولي اللي تقولينه كل شي منج حلو ...... انا وصلت الدوام لما تقومين من النوم دقي لي
ساره : انشالله
يوسف : نوم العافيه
ساره : يعافيك
يوسف : احلام سعيده
ساره : مشكور
يوسف : تغطي عدل
ساره : انشالله
يوسف : تامرين على شي ؟
ساره : سلامتك
يوسف : --------------
ساره : خلاص عيل باي
يوسف : لا هونت ماني مسكره بقعد بسيارتي شوي اسولف معاج
ساره : ودوامك
يوسف : عادي في دكتور غيري .... بسولف معاج شوي
جاسم بالدوام يفكر ب جنى هو من امس يفكر فيها ..... حيل عاجبته وداشه خاطره وخاطره يخطبها اليوم قبل باجر ... بس لما فكر عدل شاف كلام ساره صح ان توه مطلق مسرع مايخطب بس هو خايف انه تنخطب حق غيره تالي يتحسف انه ما خطبها ........... : انا ليش مااكلمها بيني وبينها وابين لها ... عالاقل اقيس نبضها
قام جاسم من مكتبه رايح الاداره الماليه حق جنى وهو مايدري شقول او شلون بقولها : صباح الخير جنى
