هذا حظي ونصيبي .....

[rawabi]

هااااااااااي بنات .... اكو جم وحده منكم يتمون ينطرون البارت اليديد ويتعطلون ... ترا انا بس بارت واحد انزل باليوم يعني اذا نزل بارت الظهر ماراح ينزل شي بالليل والعكس ... لاني احس اني خربت قصتي الاولى زينه وحمد لاني كنت انزل بارتين او ثلاث باليوم ... انشالله عالظهر بنزل البارت اليديد ...... انشالله يعجبكم :eh_s(6):

 

[yaamye]

عفيه لاطولين ناطريج على احر من الجمره
لايوقف لايوقف لايوقف
:0bee2e8d89:

 

[rawabi]

البارت ال 13 :
بيوم من الايام جاسم كان قاعد يتغدا قعدت شيخه جباله : جاسم
جاسم : هلا
شيخه : انت تخوني ؟ ؟؟؟؟؟
جاسم غص باكله زين ماطلعت روحه بغصته .. تم ساعه ياله ردت له الروح ... جاسم : شنو ؟
شيخه : شفيك بغيت تموت ... قلت لك تخوني ؟
جاسم(مخترع ) : ليش ؟
شيخه : بس اسالك ؟
جاسم : اكيد لا

سكتت شيخه وظل جاسم يطالع فيها ينطر اي كلمه .. جاسم : بس ؟
شيخه : اي بس
جاسم ماقدر يكمل اكله ولاعرف حتى يقعد ساكت قام يخربط بالكلام مايدري شقول بس المهم ان يتكلم يلهي شيخه عن الافكار اللي براسها ... يومها جاسم طفه جهازه وماطلع من البيت من الخرعه .. ريم كسرت تلفونه وقامت تحاتي .. ريم : هذا وينه من امس مادري عنه .... امبي لايكون عقب ماخذا اللي يبي فل حده ماله امان هالجاسم ... بس انا استاهل ... ماقطع تفكير ريم ومحاتاتها الا تلفونها اللي رن هقت ان جاسم المتصل بس خاب ظنها دانه صديقتها هي اللي كانت داقه ... دانه هي صديقه عمر ريم وتعرف كل اسرارها : هاي ريوم ... وينج ؟
ريم : بالبيت
دانه : اشرايج نطلع ؟
ريم : لا مابي مالي خلق
دانه : شنو مالج خلق مو عوايدج ... شفيج ؟
ريم : دانوه جسوم من امس ماادري عنه ... كل ماادق عليه جهازه مسكر
دانه : يمكن عند زوجته
ريم : واللي يعافيج هو لو زوجته نايمه يمه دز لي مسج .. اكيد في شي .. حدي خايفه ؟
دانه : من شنو خايفه ؟
ريم : اخاف انه عقب ماشبع مني مل وناوي يسحب علي
دانه : لا مااهقى هو يحبج
ريم : بلاج ماعرفتي جاسم ... وااااي مادري شسوي
دانه : ريوم ليش ماتتزوجينه ؟
ريم : هااا اتزوجه ... وريلي ؟
دانه : الله يخليج اللي يسمعج يقول ريلج طال بويهج والا حاسب لج حساب ... انا اقول ترا جاسم فرصه ماتتعوض اخذيه والا تتحسفين طول عمرج
ريم : وعيالي ؟
دانه : اللي يشوفج تدرين عنهم ... اصلا هم كله عند يدتهم وابوهم ... انتي بس ام جدام الناس مو هذا كلام ريلج والا نسيتي كلامه لج اول زواجكم ......................

خل اقولكم سالفه ريم و ريلها ... يمكن بعضكم يقول شلون ريل ريم ماحس فيها كل هالوقت ... ريم متزوجه بدر ضابط بالجيش حده محترم والكل يحبه وهو يموت بعبود ونصور عياله بس مايواطن ريم ... قبل 7 سنين .. تعرف بدر على ريم كان طالع مع ربعه وشاف ريم وحده عجبته ورقمها وصار يكلمها ومتى ماقدر طلع معاها ... على يوم من الايام كانت ريم طالعه من بدر يفترون بالسياره والا يشوفها اخوها ويا بدر طبعا لحقهم من شارع لشارع حاول بدر يضيعه ا ينحاش ماقدر ... طبعا اخو ريم طاح ببدر طق ولما رجع البيت كمل على ريم .. ابو ريم كان ريال شديد حيل مارضى ان يعدي الموضوع مرور الكرام راح حق ابو بدر وكلمه .. ابو بدر ريال وايد يخاف الله مصلي ومسمي وله اسمه بالبلد ماحب اييب فضايح ومشاكل زوج بدر غصب حق ريم ... بدر مع ان كان منعجب ب ريم ... اعجابه انقلب كره لما تغيرت معاملة اهله له وشلون ان تزوج وهو توه عمره عشرين بالنسبه له كل شي صار بسرعه ومن غير رضاه ... حس بدر ان كل حياته تغيرت من لحظة طيش و طبعا ريم كانت ياهل عمرها 19 ماحاولت تكسب بدر او تتقرب تزوجته لهت مع رفيجاتها وطلعتها ...و سبحان الله رزقها بالولدين عبدالله وناصر مع ان ريلها مايقرب لها وايد..... تعرفت على جاسم بالصدفه وحده كان عاجبها لان جاسم فيه وايد مواصفات اي بنت تتمناها وغير هذا كان حده ميت على ريم وعاجبته ريم عوضت النقص اللي ياي لها من صوب ريلها من جاسم وتقربه لها
هذي قصة ريم مع ريلها ..... نرجع حق قصتنا .
ريم سكرت التلفون من دانه وظلت تفكر بكلام دانه : اي صح انا ليش مااتزوج جاسم .. عالاقل حياتي معاه بتصير احسن من حياتي الحين ... اول هالشي كان صعب حييل لاني حتى لو تطلقت صعبه ان جاسم ياخذ مطلقه وعندها عيال بس الحين اذا جاسم طلق زوجته راح يقدر ياخذني محد راح يقول شي لان حتى هو مطلق ... بس مااهقى ان جسوم يطلق بنت عمه وليش يطلقها الشرع حلل 4 ... الفكره حييل عجبت ريم وقررت انها ترسم على جاسم زواج بس اول شي لازم تحاول تتخلص من شيخه ... وانها تصير بروحها ببال جاسم .

جاسم قعد الصبح من النوم بروح الدوام لقى شيخه قاعده ... جاسم : شمقعدج من صباح الله خير
شيخه : بس جذي شبعت نوم
جاسم : والله لو عندج دوام ماقعدتي مبجر جذي ... انا ماشي تبين شي ؟
شيخه : سلامتك
شيخه صارت اطالع جاسم وهو يطلع من الشقه اول ماطلع نزلت دموعها نهر على خدها ... شيخه كانت شاكه ان يخونها وكانت تجذب نفسها ... بس عقب غصته امس عرفت ان صج يخونها ... مو هي اللي تتوه عن جاسم وهو يجذب ولو هو ولد عمها و رابيه معاه قبل لا يكون ريلها ... شيوخ تاهت بدوامت افكارها ماعرفت شتسوي هي مو ماسكه على جاسم شي ... لو اهلها اسالوا شدراج ان يخونج شبتقول لهم بتقول غص وهو ياكل وعرفت ..
جاسم اول ما ركب سيارته شغل تلفونه لقى وايد مسجات miss u من ريم على طول دق عليها لان يدري ان ريلها بالدوام ... ريم ( بصوت وحده يبين انها نايمه ) : الو
جاسم : نايمه ؟
ريم : اكيد نايمه الساعه ماصارت 8 ... شقعدني مبجر ؟ وينك امس ؟
جاسم : ريوم سكتي امس بغيت اموت
ريم : شفيك ؟
جاسم : شيوخ حاسه بشي عنا ؟
ريم ( نقزت ) : شنو ؟ ليش شصار ؟
جاسم : امس اسالت اذا انا اخونها ؟
ريم : يمكن بس جذي تسال
جاسم : لا انا متاكد انها حاسه بشي ... سمعي هالجم يوم كلش لا ادقين ولا ادزين مسجات ... اذا انا قدرت دقيت
ريم : شدعوه كل هذا خوف
جاسم : مو خوف بس مابي مشاكل مع بيت عمي انتي ناسيه انها بنت عمي
ريم : انزين

جاسم سكر التلفون من ريم لان وصل الدوام ... ريم حدها استانست : فرصه ويت لي عندي اذا شيخه درت ان جاسم يخونها اكيد بتطلب الطلاق بس ياربي شلون اخليها تدري ... هذي صج يبيلها تخطيط ... ريم وجاسم فجوا عن بعض جم يوم ... ريم تحاول تلقى لها فكره تخلي شيخه تعرف ان جاسم يخونها ... وجاسم مجابل شيخه عشان مايخليها تشك بشي ... بس المشكله ان خلاص شيخه عافت جاسم ... شيخه من زمان تعبانه منه والحين مع سالفة الخيانه ماصار يفرق معاها يجابلها او لا ... صار وجوده مثل عدمه ... شيخه صار عندها كل شي عادي لا في شي يحزنها ولا في شي يونسها وصلت مرحله فقدت فيها الاحساس ... من وين تييب قلب تحس فيه وقلبها جاسم خذاه ... ماعرفت الحب الا معاه وماعرفت الشوق الا معاه وماعرفت التعب الا له وماعرفت الخيانه الا منه ... شيخه كانت تدري ان علاقتها بجاسم انتهت بس ماتدري متى بيعترفون هي وجاسم ان قصتهم انتهت ... ماكانت تدري ان في طرف ثالث زهب النهايه ماكانت تدري ان ريم خلاص لقت فكرتها وخطتها اللي قعدت تخطط لها ايام .

كان باقي شهرين وتخلص السنه الدراسيه ... صقر راح حق امه : شلونج يالغاليه ؟
ام خالد: زين تذكرت ان عندك ام
صقر: اصلا انسى الدنيا والا انساج ... بس والله لاهي تدرين كورس تخرج
ام خالد : الله يوفقك انشالله وتفتك
صقر:اي والله يما ادعي لي ..... يما انا احبج
ام خالد : خلص جم تبي ؟
صقر : الحين اقولج احبج تقولين جم تبي ... ماهقيت انج انسانه ماديه جذي
ام خالد : والله انت ماتقول يما احبج الا طلبت فلوس ومن تقول يما خاطري المج اعرف ان المبلغ كبير
صقر: والله عارفتلي يما ... بس هالمره مابي فلوس ... بس حاس بحب قوي ناحيتج وابي احس بحنانج وحبج لي مو انا ولدج الغالي
ام خالد: الله يستر حب وحنان وولدي الغالي بجمله وحده معناته ان شي قوي حيل ... صقور تكلم خبصتني
صقر : صج جاكتني ..... يما ابي اتزوج
ام خالد : ههههه ياحليلك والله كبرت
صقر : يما شنو شايفتني امشي وماميتي بايدي ؟
ام خالد : لا مو قصدي انت اصلا شيخ الرياييل ... بس مو جنه توك صغير .. تخرج بالاول
صقر : لا موصغير ... واذا عالتخرج بس باقي شهرين ... وانشالله بسرعه القى وظيفه يعني انشالله ماراح ينقصني شي
ام خالد : خلاص انت بس تخرج وانا ازوجك ومن الحين ادور لك بعد
صقر : لا لاادورين انا ادري منو ابي
ام خالد: منو ؟
صقر : ابي ساره بنت عمي
ام خالد ( مستانسه ) : والنعم ... بس شمعنى ساره ؟
صقر: كاسره خاطري جيكره وثقيله طينه قلت بدال لا تعنس واطيح بجبد عمي ااخذها استر عليها ... وكل بثوابه انشالله
ام خالد : الحين ساره هالقمر جيكره وثقيله طينه؟
صقر : شدراني عنج يما تقولين لي شمعنه ... يعني لازم تحرجني وتخليني اقولج ان البنت حلوه وداشه خاطري واني كل افكر فيها وماكو بنت تارسه عيني غيرها
ام خالد: ويعه صقور انت ماتستحي شهالكلام ؟ صج ماتستحي
صقر : شدراني عنج يما شنو يعني شمعنه ساره ... اكيد يعني انها عاجبتني والا شاللي حادني اخذها ... عليج اسئله يا ام خالد عجيبه
ام خالد : خلاص اسكت اول ماتتخرج اخطبها لك
صقر : انزين عادي اقولها ؟
ام خالد : شتقول لها ؟
صقر: اني بخطبها
ام خالد: صقور اش هالخفه ؟
صقر : لا خفه ولا شي ... بس كنت بطمنها انها ماهي معنسه ... بس خلاص اخليها مفاجاه احسن
ام خالد :انا اقوم عنك احسن لا استخف

صقر طلع من امه دق على شيوخ : شيوخه الحلوه شلونج ؟
شيخه : هلا وغلا بخير
صقر : سمعتي اخر خبر ؟
شيخه : خير؟
صقر: بخطب سوير
شيخه (حدها مستانسه ) : صج متى ؟
صقر : انشالله اول ما يخلص الكورس ... بس امي مو راضيه اقولها عاد انا قلت اكيد اذا قلت لج بتقولين لها
شيخه : شقالولك نقالة حجي ؟
صقر : لا بس ادري ما تخشين عنها ... عفيا شيوخ قولي لها وقولي شتقول
شيخه : افكر
صقر : حبيبتي غصب عنج اصلا .... انزين شرايج اليوم نطلع انا وياج وامي وابوي نتعشى برا ونادي جسوم من زمان مو شايفه
شيخه : صج ... عاد من زمان ماطلعنا مع بعض ... خلاص انا اقول حق جاسم وايي
صقر : مو اطولين ... خل اروح ابلغ امي وابوي
طبعا شيخه راحت حق جاسم تقوله ... جاسم : لا والله تعبان مالي خلق انشالله وقت ثاني .... وين بتعشون ؟
شيخه : مادري صقور عازمنا ... انا بلبس وبروح اوكي
جاسم : حبيبتي شيخه انا بوديج بيت اهلج ومتى ماخلصتي دقي اخذج
شيخه : ماله داعي اروح بسيارتي
جاسم : شنو ماله داعي ... جم شيخه عندي
شيخه راحت تلبس زجاسم دز مسج حق ريم : زهبي نفسج عقب ساعه تيين لي ... مشتاقلج موت
ريم قرت المسج حدها طارت من الفرحه واخيرا قرب يتحقق اللي ببالها ...
جاسم وصل شيخه.... طبعا هو وصلها وبيرجع ياخذها عشان ماترد الشقه على غفله وهو معاه ريم
شيخه طلعت مع اهلها كانت طلعتهم حيل حلوه ... حدها استانست حست ان نست الهم والحيره اللي عيشها فيهم جاسم .... مادرت ان الهم صار صديقها اللي ماراح يخليها ... كانت تسولف وتضحك مادرت شاللي ناطرها ومزهبته لها ريم

ريم دقت على جاسم : حبيبي ماقلت لي مرتك وين بتكون ... اخاف ترجع فجاه ( ريم تبي تعرف خطتها بتضبط او لا )
جاسم : لا تحاتين انا وديتها وانا اللي بردها
ريم : تدري شلون انا ببصفط وانت مر اخذني
جاسم : ليش عاد ؟ صفطي بالعماره ...
ريم : لا مابي هذيك المره يالله لقيت مصفط وانت ماترضى اصفط بمصفطكم
جاسم : خلاص يالله الحين ياي لج
خذا جاسم ريم شقته يومها ريم كانت احلى من كل مره كان شكلها يطير العقل ... جاسم حده كيييف عليها .. دقت شيخه على جاسم عشان ايي ياخذها ... جاسم : يلا ريم قومي اوديج سيارتج
ريم : شدعوه عليك نقزت جذي ... البس ونمشي
جاسم : لا اطولين
قط جاسم ريم على سيارتها ... وراح بيت عمه نزل سلم على اهل شيخه وتالي طلع هو وشيخه .... ركبت شيخه السياره وهي تصك الباب .. التفت : على جاسم : شنو هذا ؟
جاسم (ببرود ) : شنو؟
شيخه اسكتت شوي وكانت ماسكه شي بايدها : لا ولا شي .... انت طلعت اليوم مكان
جاسم : لا بس قطيتج ورديت
وصلوا البيت شيخه على طول دشت الدار ... كانت ماسكه بايدها اسواره على حرف ال R ... شيخه : منو R وشيابها سيارة جاسم ؟
اكيد كانت معاه وحده بالسياره وطاح منها الاسواره ... بس لو طاحت الاسواره شكو اطيح داخل يدة الباب ... لا والله هذي مو مطيحه اسوارتها هذه حاطتها عمدا ... بس ليش ؟.... وصلت المسج حق اللي تبي ريم توصلها حق شيخه ... شيخه عقب ماتمت طول الليل تفكر ومانامت فهمت المسج عدل هذي تبي تخرب بيني وبين جاسم تبي اخلي لها جاسم ... شيخه اشتغل فيها العناد : تحلم الا تحلم اخلي لها ريلي ... انا حتى لو صج مابيه وبخليه مااخليه لها ... اخرب عليها تالي اخليه .

 

[sh3ollah]

مو صج
موصج
في حقارة جذي
بطت جبدي
بس روابي ترى البارت صغير
يعطيج العافية يالغالية

 

[yaamye]

حقيررررررررررررررررره حدهااااااااااااا ريم وييييييييييييييييع اكرها ليش بتخرب على شيخه مسكينه
:0bee2e8d89:

 

[P!NKia]

عفيه على شيوووخ اى جذى الحريم السنعات ماتخلى ريلها لبنات الشوارع اللى نفس ريموووه
عااااااشت شيووووووخ

 

[shaja]

امبيه ريم حقيره ذكرتني بوحده نفس حقارتها
يسلمووو قلبي على البارت اينن..

ويتنغ يو حبيبتي...

 

[رفيف الورد]

عاشت شيخه عفيا عليج عندج إياها لا إتخلينها تخطف ريلج

 

[miss limoona]

وييييييييييييييييييع عمابعينها فوق شينها قوات عينها
فوق انها تخون ريلها بتخرب عالبنيه حياتها الله ياخذها انشالله
:0bee2e8d89:

 

[rose red]

الله ياخذج يا ريم !!
و زين تسوي شيخة !!
يلا روابي ناطرين باجر
ليش ما يصير بارتين باليوم؟؟ و الله قاعدين ننطر!

 

[*FaRaWlA*]

.زييييييييييييييييييييييييين تسوي شيووخ

عدل عدل عدل هذي الحريييييييييييييم

خل تعااندها و تمسك ريلها و تعطيها درس سنع

و تالي تتفرغ حق جسووم ........>>>داشه بقوه حدي

........

 

[دمعه حزينه]

اخ يابنت اللذينه ياريم يا جليلة الحيا ويع

وجاسم مال تكوفن وامسح راسه بالقاع

 

[PorscheGirl3]

يلا نااطره
بلييييز لا تعلقينا

 

[miss 3yara]

عاااشت شيووخ تعجبيني

 

[Beautifulgirl]

مشكوره على البارت 0 تدرين نفس مشكلتي ريلى كان يكلم وحده متزوجه 0 تصدقين كل ما اقره بارت قلبي يعورني 0 اخ ابي افهم ليش يخونون 0 كملى لا طولين علينا

 

[Sara.M]

والله شيوخه عفيه عليها امبييييييييه ريم صج حقيره .. . حاولي تخلين البارت اطول حبيبتي نآآطرينج

 

[ĈŵâįŽŶâ Мŕâβā]

ريم حدها نرفزتني مادري اذبحها اطقها مو زبن اشوفها جدامي حدها مو صج

ناطرين البارت

 

[مـ سهله ـو]

واي الله يعينها شيوخ وجااسم هذا حقير يارب اهله يدرون عنه ويكرهونه صج ما تسوى عليه !!

<<< حياتي مشكوره على البارت

 

[حرووف الشووق]

:0bee2e8d89: لا تعليق :0bee2e8d89:
ماادري شنو اقول كل يوم انصدم في جسووووووووووووووووووووووم لي هالدرجه اناني
:0bee2e8d89:

 

[جمال رباني]

امبي صج حيوانه , والله شيخه تستاهل وما تستاهل بنوفس الوقت والله للحين كاسر خاطري فواز