البارت العاشر :
تكدر خاطر ام خالد حيل من مكالمة نوريه ... ضاق خلقها على بنتها وحدها كانت منصدمه ومستغربه توه فواز كان عندهم وماكان فيه شي شاللي غيره وخلاه يعوف شيخه .... احتارت ام خالد بالسالفه واحتارت شبتقول حق شيخه كان قلبها يعورها على بنتها ... كانت تحسب ان فواز هو اللي مايبي شيخه مادرت ان العكس ....
شيخه لمادرت ان فواز فل الخطبه حدها انصدمت شلون بهالسهوله يفلها من غير ماحتى يحاول يتفاهم كانت تحس ان فواز متعلق فيها ... كانت تهقى ان عالاقل بخليها جم يوم تالي يكلمها او ان يسوي مشاكل ...........
فواز قرر ان ينسحب من حياة شيخه بكل سهوله كان يقدر يتحمل اي شي الا احساسه انه ان البنت انغصبت عليه وانها ما وافقت برضاها ..... فواز انكسر خاطره من شيخه حس بخيبة امل كانت حيل عاجبته وحيل مرتاح معاها واللي كان محيره شاللي غيرها عليه ماكانت جذي انشغل بال فواز من شيخه وماعرف يرتاح وشيخه منشغل بالها حاسه انها ظلمت فواز واجرحته وبنفس الوقت مستانسه ان جاسم يبيها بس مو عارفه شالخطوه اليايه.
انتشر خبر فسخ خطبة شيخه بالعايله الكل استغرب من هالخبر فواز الكل يتمناه وشيخه ما تنعاب وكان يبين انهم مرتاحيين الكل ماكان يدري شالسبب ..... نوره لما سمعت الخبر من امها وايد تضايقت واحترت على اختها ... وطلعت حرتها بريلها فيصل اللي ماكان بدري عن شي ... كان قاعد يلعب مع عياله بالصاله .
نوره : فيصل ... شنو هذا اللي سواه فواز ؟
فيصل (مستغرب) : شفيج تصرخين ... شمسوي فواز؟
نوره : تدري ان فل الخطبه ؟
فيصل : من صجج متى ؟
نوره : تسوي روحك ماتدري .... اكيد كنت عارف وخاش عني
فيصل : حشى والله ماكنت ادري ولا حتى ياب لي طاري ... انزين شالسبب ؟ ليش فل ؟
نوره : مادري
فيصل : شنو ماتدرين ... اختج ماقالت لج شي
نوره : انا ماكلمت شيخه ... امي اللي بلغتني ... تلقى اختي ضايق خلقها ومقهوره ... عقب ماجهزت وكل الناس دروا فل الخطبه
فيصل : الله يعوضها انشالله
نوره : اكيد مو هامك لو ان شيوخ هي اللي فاله الخطبه جان قلبت حياتي جهنم
فيصل : نوره انجعمي وقلبي ويهج لا صج اقلب حياتج جهنم.... فلوا والا قعدوا شتبين اسوي انا
نوره : احنا غلطانين من الاساس ان وافقنه عليه عاد من الاول مبين انه غثيث
فيصل : نوير جب والا والله لا اقوم اكسرج ... ذلفي داخل مابي اشوف ويهج
ساره اول ماسمعت الخبر دقت على شيخه : شيوخ صج اللي سمعته ؟
شيخه : اي صج
ساره : انتي غبيه والا شسالفتج من صجج ....
شيخه : جاسم درا ؟
ساره : انا شدراني عنه درا او لا ... خليه يولي وكلميني ... شيوخ ليش سويتي جذي والله فواز ماكو منه ...
شيخه : ساره كل شي نصيب
ساره : شيوخ قومي اكلي بندول والا شربي كلوركس خنوديج المستشفى حق فواز يمكن تكسرين خاطرة ويرجع لج
شيخه : اي شي صح قالولج هبله
ساره : وليش اللي سويته مو هبال ؟
دش جاسم الصاله والا يلقى ساره تكلم شيخه .... قعد يمها يبي يعرف شقولون ... ساره : شيوخ شوي واكلمج .. باي
جاسم : صج فواز فسخ الخطبه ؟
ساره : اي
جاسم : ليش شاللي صار ؟
ساره : اسال نفسك
جاسم : يعني مو فواز اللي فسخ الخطبه ... شيخه اللي فسختها
ساره : مادري
جاسم : سوير شفيج علي ... ليش صايره نفسيه ؟
ساره : مافيني شي
جاسم : سوير ترا انتي اختي ومالي اخت الا انتي مااحب انج تزعلين علي .... ترا والله ماكنت ابي اخرب عليها ولاشي بس كل اللي السالفه اني تحسفت ان في بنت مثل شيخه طول عمرها تحبني وتفكر فيني وانا ماقدرت هالشي ولا حسيت فيها ..
ساره : جاسم انت اخوي انا مااكرهك بالعكس احبك حيل بس اللي يضايقني ان في وايد مواقف احس انك تكون فيها اناني وماتفكر الا بنفسك .... يعني حتى لو انك تحسفت على شيخه جان حطيت هالشي بقلبك ومابينت
جاسم : خلاص اللي صار صار وانشالله الله يعوضهم .... وشيخه الف واحد يتمناها
ساره : نعم .... انت شتقول انت مو ناوي تاخذها ؟
جاسم : مادري مافكرت
ساره : انت تبي تجلطني والا شنو ؟ .... مو تقول انك متحسف عليها
جاسم : اي بس انا عمري مافكرت فيها الا كاخت اصلا ماكو اي مشاعر لها ..ما اتخيل انها تصير زوجتي
ساره : عيل شكو تتكلم وتخرب عالبنت ؟
جاسم : انا اللي كنت اقصده اني متحسف ان كان في بنت تحبني وادور رضاي وماحسيت فيها
ساره : تصدق انك ماتستاهل شيوخ
جاسم : اوووووووووووووووو زهقتيني انا اخوج والا هي اختج
ساره : والله ياجاسم ان ماخطبت شيوخ والله اني ازعل عليك طول عمري
طلع جاسم متنرفز من عند ساره ركب سيارته : اشفيها هذي غصب احبها يعني .... والله ماافكر فيها غير انها اختي ... شلون تصير زوجتي ... وووووووووووووووووووع حتى خيال مو قادر ..سرح جاسم وذكر ريم .... ريوم شحالج الحين ؟ حدج ماصدقتي افل منج اللي حتى مسج ماكو ... رن تلفون جاسم والا اللي داقه ريم ... جاسم : لو طالب مليون احسن
احتار يرد او ما يرد هو حده مشتاق لها ... بس مايقدر يكلمها هي متزوجه .. قام يشوف رقمها : والله ابيج بس مااقدر ارد ... ريم تمت ادق لينا فصل ... دزت له مسج :
Wallah eshtagt lek wallah eni a7bek ….. ta3bt mn '3eerek
ريم دزت له اكثر من مسج مسجات تترجى فيها ومسجات دلع وحب ... اول ما رن تلفونه رد : نعم ؟
ريم : اخيرا رديت والله حرام عليك اللي تسويه فيني
جاسم :ليش شسويت .......قلتلج احبج وتالي طلعت متزوج
ريم : جاسم والله اني كنت خايفه اقولك ... حبيبي والله ماافكر بغيرك لاتصير قاسي جذي
جاسم : سمعي يابنت الناس ... انا قلت لج من قبل لاتخليني اشوف رقمج مره ثانيه ... ليش داقه الحين
ريم : موقارده اعيش من غيرك ... مو قادره افكر بشي غيرك
جاسم من داخله كان مستانس ان قاعد يسمع هالكلام من ريم كان متعود ان هو اللي دايم يبين مشاعره الحين الوضع تغير صاير هو اللي موقفه صار قوي ........ كان مخليها تتكلم من غير مايقاطعها .. كان كلامها يرضي غروره
جاسم : ريم لوسمحتي لا ادقين انا ريال خاطب الحيين وكلها شهر او اثنين واملج
ريم هي تبجي : شنو ؟ انت جذاب انت تقص علي
جاسم : شكو اقص عليج ... شبيني وبينج اللي بينا انتهى
ريم : مااصدقك انت تبي تحرني
جاسم : قلتلج خطبت ... فهمي عاد
ريم : اذا انت صاج قولي شسم اللي خاطبها ؟
جاسم : انا خطبت شيخه بنت عمي ... خوش بنت ومني وفيني لا فوق هذا تحبني موت
جاسم ماكان بباله ان يخطب شيخه بس اتصال ريم هو اللي خلاه يفكر بهالشي ... ولما فكر فيه عدل عجبته الفكره ... ليش لا شيخه حلوه وتحبني وعارفها عدل ... رجع جاسم البيت راح عند ساره : شلونج سارونه ؟
ساره ( بنفس ) : هلا
جاسم : يعني زعلانه ؟
ساره :----------
جاسم : تهقين اذا خطبت شيوخ الحين توافق ؟
ساره (نقزت من مكانها ) : من صجك؟
جاسم : كلش ولازعلج
ساره : لا يبا اذا انت ماتبيها لا تاخذها هذا زواج مو لعب
جاسم : ادري انه زواج مو لعب .. بس انا فكرت ولقيت اني ماراح القى احسن من شيخه
جاسم كلم امه ... ام جاسم حيل استانست لانها تحب شيخه بس قالت حق جاسم ان البنت توها فاله مو حلوه يخطبونها على طول خل ينطرون شوي وتالي تخطبها ...ساره دقت على شيوخ تبشرها
ساره : شيوخ عندي لج خبر يسوا مليون !!!
شيخه : شنو ؟
ساره : جسوم بيخطبج
شيخه : حلفي هو قالج ؟
ساره : اي وبس جذي حتى كلم امي ... بس امي قالت خل ننطر شوي ونخطبج
شيخه : ليييييييييييييييش ؟
ساره : بسم الله توج فاله من فواز خل يطوف وقت شوي
عقب ما طاف اكثر من شهر على فسخ خطوبة شيخه وفواز ... اخطبت ام جاسم شيخه ... الكل استانس ام خالد حست ان الله عوض بنتها خيير ... العايله كلها اشتطت على موضوع زواج شيخه ... ام جاسم كانت طايره من الفرح ان ولدها البجر بيتزوج ... والكل حايس يجهز حق الملجه ... جاسم قال حق اهله ان يبي يملج بسرعه ومايبي عرس لانه مايحب اللويه والحوسه ... ام جاسم وام خالد وايد تضايقوا لانه مايبي عرس فقالوا بسوون ملجه كبيره واتفق جاسم مع شيخه ان يوم الملجه تسكن عنده ... اهل جاسم ماكانوا مزهبين له دور ببيتهم فقرروا ان ياجر على مايخلص بنيان وتضبيط البيت ... خذا جاسم وشيخه شقه عالبحر شيخه كانت تحسب ان جاسم مستعيل لانه يبيها يمه باسرع وقت ... اما اللي ببال جاسم كان شي ثاني .......
شيخه : ساروه يوم الملجه انتي اللي بتروجين معاي الصالون ؟
ساره : لا مابي ... ابي اكون بالحفله من اولها لا اخرها ... ملجة اخوي هذي
شيخه : سوير يعني منو يروح معاي .... نورة مالها خلق وصايره اعصاب ... ان راحت معاي بتعورلي راسي حنه وبتقعد تتهاوش مع الكل .
ساره : اوووووووووووو .... الحين انا شاريه بدله سعرها قريب الالفين عشان اقعد بالصالون
شيخه : شدعوه بالفين ؟ انا اللي اسمي العروس بدلتي 3400 انتي بدلتج ب 2000
ساره : هذي ملجة اخوي وبنت عمي يعني لازم بدلتي تكون توب .... شيوخ عندي فكره شرايج انييب اللي تحط لج مكياج وتسوي شعرج للبيت ونقول ان ندفع لها زياده ونخليها تحط لج وتحط لي ... والله احسن من روحة الصالون ... جذي اكون انا بالحفله وكل شوي اطل عيج واذا تبين شي بس ادقين اصعد لج
شيخه : خلاص خوش .... خل ادق اكلم الصالون
شيخه كانت وايد مشتطه ومستانسه كانت الدنيا مو سايعتها من الفرحه .... ولاهية بتجهيزات الملجه
اما جاسم كان لاهي بشي ثاني ... كان مرة يرد على اتصال ريم ومرة مايرد كان مستانس ان يلعب باعصابها
جاسم : ريوم الف مره اقولج لا ادقين
ريم : جسوم انت تحبني مااصدق انك قدرت تنساني
جاسم : لا قدرت ... ترا ملجتي الخميس لايكون اشوف رقمج مابي ازعل زوجتي
ريم : شنو تخاف منها
جاسم : لا اخاف على زعلها
يوم الملجه الليتات زينت بيت بوجاسم واحواض الورد والزرع موزعه بالحوش وعند المدخل وريحة البخور تارسه البيت .... الحفله كانت بسرداب البيت اللي صبغوه ورتبوه حق الحفله ... اهل جاسم يابوا نصممه تصمم ديكورات الحفله ... الكوشه كانت حده تينن وكلها ورد ابيض ... شيخه كان شكلها وايد حلو وراقي ... كانت بدلتها سكريه كوكتيل التوب دانتيل ضيج ومن عند الخصر تصير كلوش ولها ذيل ورافعه شعرها ماكانت لابسه طرحه ... ام شيخه اول ماشافت بنتها بنفنوفها دمعة عينها ... ام خالد : مبروك حبيتي الله يتمم عليج .... واااااااي شيوخ مو مصدقه انج بتروحين عني
شيخه : يمااا واللي يعافيج لا تبجين والله ابجي
نوره : وييييييييه قلبتوها مناحه ... شيوخ لا تبجين ترا اللي حطت لج مكياج مشت ... يعني اذا ساح كحلج حده بيخترب شكلج
نوره كان شكلها وايد حلو والحمال كلش ماخرب عليها ... كانت لابسه بدله زيتيه غامجه فيها قصه تحت الصدر وخامتها طايحه .... اما ساره كانت حدها زوغه كانت لابسه نفنوف ذهبي بسيلفر ومسويه شعرها روماني
دشت شيخه على اغنيه هب السعد .... كانت حدها مستانسه اخيرا بتاخذ الانسان الوحيد اللي حبته ... اول مادخلت الصاله وشافت بنات عمها و امها ونوره وساره وام جاسم واقفين لها عند الكوشه نزلت دموعها غصب
بنات عمها كانوا فرحانين فيها حيل ... ساره ماخلت اغنيه مارقصت عليها ... وشيخه كانت مستانسها فيها قربت دشة الرياييل والحريم تغطوا ... الرياييل واقفين برا ينطرون متى يدشون ....
جاسم كان واقف برا مع ربعه وعيال عمه وخواله كانوا كثار قريب الاربعين واحد
صقر : مبروك بو محمد
جاسم : الله يبارك فيك ... الفال لك
صقر : عن قريب انشالله
جاسم : شكلك ناوي
صقر : هي النيه من زمان موجوده ... بس انشالله اخلص جامعه واخطب على طول
جاسم : الله يتمم
صقر : عاد خشلي بشتك اخذا حق ملجتي
جاسم : افا عليك البشت وراعيه تحت امرك
صقر : لا البشت بس يكفي
دقت ام جاسم على بو جاسم عشان يدخلون اول ما يسمعون الموسيقى ... جاسم مسك تلفونه ودز مسج : ana bdsh al7een la edegeeen wala edezeen msg …….. akalmej bajer
=============================================================
