نقلوني متوسط .. وانا اعيييييييييييط

[رفرف]

شلونكم ابلات ؟؟؟

اليوم انصدمت الموجهة قالتلي انهم نقلوني متوسط ..
ومدرسة بعيدة علي ..

بجيت بجييي ..
اول شي انا صارلي سنين ادرس ابتدائي ومتعودة عليهم واعرف اتعامل معاهم مابي متوسط ماعرف ولا احب اتعامل مع كبار ..

ثاني شي مدرستي الحالية بعيدة على بيتي ومتحملة لأن قسمي زينين وادارتي زينة ..
ناقليني مرحلة ثانية الادارة مادري شلونها وفوق هذا بعيدة علي شسوي ..؟؟

انا مرتاحة بمدرستي وناظرتي تبيني ..
حتى وايد عصبت لما درت انهم بينقلوني ..
اتهقون تقدر توقف قرار النقل يعني يطلع بيدها شي ؟

 

[Om JooD]

رفرف ..ويييييييي الله يعينج


حاولي اتكلمينها اتوقف النقل يمكن تقدر اتسوي شي

والا دوريلج واسطة

وبالاخير الخيرة فيما اختاره الله

بس لا تضايقين عمرج يمكن ايكون هاذا فيه خير لج

 

[رفرف]

تسلمين ام جود ..

بس انا كلش كلش مابي انتقل ..
يعني اذا لازم لازم وما قدرت ناظرتنا تسوي شي ..
بطلع من الوزارة بكبرها ..

يارب يطلع بيدها شي وما انتقل ..

 

[وافية*]

يماااااااااا خرعتيني انا تخصصي بالجامعة متوسط وثانوي وتوظفت ابتدائي اللة لايقولة انشاللة بس واللة اخاف يسوون فيني مثلج لاااااااااااااااا كلش ولا المتوسطة

اللة يعينج شوفيلج واسطة قوية وحاولي تقعدين واذا ماصار سلمي امرج للة والخيرة فيما اختارة اللة

بس انتي مدرسة شنو؟؟؟؟اخاف نفسي

 

[ليالي نجد]

الناظره بايدها ترفض واذا عندج واسطه شغليها

والله يكتب لج الخيره

 

[أسرار الطبيعة]

رفرف قلبي
حجي فاضي ناظره ما تقدر أو موجهه ما قدمت بنفسها نقلك
خذيها مني وأكيده
ممنوع نقل من الابتدائي إلا برضى المعلمه خاصة الكويتيه
تعينيك ابتدائي يا حبيبتي
مو على كيفهم
حريتيني الله يهداك..

 

[حنون المزيون]

أعرف وحده بالأصل متوسط ولمن صار السلم التعليمي انقلت ابتدائي وصار لها 4 سنين ألحين ناقلينها متوسط بس راح ريلها ودخل على المراقبه وشخلهم هذي كفاءة وجذيه اتيازونها ومالكم حق بنقلها لوما طلبت إهي وإن الخدامه وإهي الخدامه مخيره بين المكتب أو المكان اللي تشتغل فيه هالمره جذيه حال المعلم عندكم تنقلون فيه من مكان لمكان وعطاهم من هالحجي اللي يبرد القلب وترى تقاعدها موجود وبتخسرون كفاءه وشوفوا سجلها واحكموا

والله وقعت ورقة وقف النقل ودقت على ناظرتها وقالت لا تباشر فلانه وقفنا قرارها ... لا تسكتين عنهم وترى من حق أخر وحده يت عندكم بالقسم إهي اللي ينقلونها مو إنتي وإن باشرتي ترى طاح ما قام يعني رحتي فيها

والله يعينج

 

[رفرف]

مشكورين ريحتو قلبي ..

ناظرتنا كلش كلش مو راضية وانا شفتها شلون سيدة قضبت تلفونها وتحوس بالارقام يعني بنت الحلال انشالله مو مقصرة معاي ..
واهيه من قبل قايلتلي انتي بالذات لو تقدمين نقل راح ارفضه فما بالج بنقل اجباري ..
الحمدلله كافي لما الواحد يشتغل بضمير يلاقي تقدير ..


الموجهه قلت لها ماراح انتقل لو توصل اني استقيل ولا انتقل .. وانا صاجة ..
شنو هذا انا صارلي 4 سنين ابتدائي ومتعودة خلاص والحين بدت السنة صارلها شكثر وتعودت على بناتي وحضرنا ودرسنا وقيمنا الحين تنقلوني ؟؟
لا ويايبين لنا تعيين يديد تخيلو ان نصابنا 4 ..
ليش تييبون عندنا يدد وانتو تدرون عندنا فايض ؟؟

 

[white~heart]

شنو تخصصج ؟؟

 

[ماكوشغل]

الله ايكون بعونج .. احتريت من هالنقل المفاجئ

 

[رفرف]

تخصصي حاسوب

ماكو شغل
اشدراني الحين بنص السنة ينقلوني وين قاعدين ؟؟
وجان زين بنفس المرحلة جان سكت .. شكو موديني متوسط مادري
وانا ادري كله من ورا راس الموجهة الله يهديها ليش جذيه ع الاقل شاوريني هذا تغيير مرحلة ونظام تعودت عليه سنين مو تتصرفين بكيفج ..
تقولي لااااا انتي مستواج عالي وشخصيتج قوية مابيج تدرسين وندوز ورسام ومادري شنو حرام مو مستواج ..
بالله اذا مستواي عالي تعاقبيني جذيه ؟؟؟؟؟

 

[ضحـاوي]

صح الناظره مالها شغل

احنا بعد يانا نقل حق مدرستين والناظره انصدمت وعصبت

كل من ورا التوجيه

بس كويتيه ونقل اجباري >>>>> قويه

بالعاده النقل الاجباري للوافدات لا تسكتين روحي للتوجيه وكلميهم

واذا قالو مو مستواج قولي العكس ابتدائي مرحله صعبه وتوصيل المعلومه للياهل موسهله

الله يعينج

 

[الفجر البعيد222]

رفرف ما ابي اضيق خلقج
انا بعد نفس مشكلتج
السنة اللي طافت اول سنة لي تعييني ابتدائي ما مداني داومت شهر وصاني قرار ندب للثانوي
تخيلوا من ابتدائي لثانوي قوية وقلبت الدنيا وقعدت ووصلت للاستقالة بس اهلي اقنعوني اصبر هالسنة وتعدي وارجع ابتدائي
والحمد لله رجعت هالسنة ابتدائي وداومت شهر رمضان كله وبعد العيد على طول وصل قرار نقل لمدرسة ثانية بس اشوه ابتدائي
بس والله تعبت كل سنة بمدرسة
وتقولون الكويتية ما ينقلونها اجباري ؟؟؟؟؟؟؟؟؟؟؟؟؟؟؟

 

[هوى الدار]

احنا بعد نقلو من عندنا ابلتين مصريتين حاسوب للثانوي
مساكين انصدمو وحاولو يرفضون القرار ومراكض بالمنطقه بس ما نفع
بس الغريب انهم جابو مكان وحده من الي نقلوهم وحده كويتيه توها حديده فرش وقالو لان السبب ان الي مو تربوي تصعد ثانوي غير انهم راح يكوتون الابتدائي انتي عيل ليش ناقليج ثانوي؟؟؟؟

حاولي فيها راكضى مني مناك وعسى الله يوفقج

 

[أطــياب79]

والله يابنات انا قصتي قصة كنت اول ماتعينت ابتدائي وصارلي 4 سنوات وكل سنة مدرسة لااعت جبدي صايرة كأني مطلقة ياشايله اغراضي
ياحاطة اغراضي وهالكراتين تروح من مدرسة لمدرسة كل سنة ابي استقر بمدرسة ؟؟ ماكو وآخر شي ياني نقل اجباري للمتوسط زعلت اول شي وقلت بستقيل بس بعدين توكلت على الله وصراحة بنات؟؟
المتوسط من رأيي الشخصي احسن من الابتدائي على الأقل بطلت اصرخ

 

[رفرف]

اليوم قالولي ان القرار خلاص توقع وانا ما بذني ماي وماراح اروح متوسط غصبن علي ..
يمكن انا المدرسة الوحيدة بالكويت اللي احب شغلي مابي اروح مكان اكرهه ..

طبعا بقدم شكوى واذا ماكو فايدة راح اقدم استقالتي للأسف

 

[الفجر]

اليوم قالولي ان القرار خلاص توقع وانا ما بذني ماي وماراح اروح متوسط غصبن علي ..
يمكن انا المدرسة الوحيدة بالكويت اللي احب شغلي مابي اروح مكان اكرهه ..

طبعا بقدم شكوى واذا ماكو فايدة راح اقدم استقالتي للأسف

حاولي تكلمين التوجيه والمراقب واذا عندج واسطه زين على زين واذا عزمتي على الاستقالة
خليها استقالة مسببه يعني تذكرين فيها سبب الاستقالة وهو (تحويل اجباري للمتوسط) وياليت تقولين
للتوجيه انج بتقدمين استقالة مسببة يمكن يفيدج

 

[رفرف]

الفجر

مشكورة حياتي ..
الله يفرجها انشالله ..
بعد عمري قسمي رفعو معنوياتي يقولون ان طلعتي احنا كلنا بننتقل واللي بتطلع من الوزارة بكبرها واللي امكلمة الناظرة ما قصرو

 

[قوطي نيدو]

في هالفتره نقص شديد بالمتوسط و الثانوي

وايد مدرسات من الابتدائي صار لهم نقل للثانوي

لان الوزاره قايله اول شي لازم نسد النقص بالمتوسط و الثانوي

 

[رفرف]

قوطي نيدو ..

عدل في نقص ما قلنا شي ..
بس في اولويات .. ناس يمشي عليهم النقل وهم اولى فيه منا .. وبعدين احنا ..