نقاب اخر موضة

[الالماس واللولو]

صباح الخير يا اخواتي العزيزات

حبيت اقولكم على سالفة صارت لي و

عندنا وحده بالدوام منقبة في نفس المبنى بس مو بقسمي بقسم ثاني و يوم كنت مسافرة النمسا شفتها مو لابسه النقاب :eh_s(1): وكان معاها زوجها وبنتها واستغربتها ليش تسوي جذي يعني ليش شنو الهدف لما تقطه برا الكويت دام ان زوجها راضي انها ما تلبسه ليش ما تخاف من ربها...؟؟؟؟؟؟؟؟؟؟؟؟؟؟؟؟؟؟؟؟؟؟

لا وغير هذا لابسة بنطلون وقميص وملفع :cxxxp:

هل هي لابسته لله او للتقاليد عندهم يعني البنت لازم تلبس النقاب في فترة معنية بالعمر


ارجوا تشاركوني وتعطوني اراؤكم في هذا الموضوع :gathering:​

 

[دوللي]

الشغله هذي نشوفها حتى بالكويت مره كنت انا وريلي مطعم ولا الحرمه نزلت النقاب بالمطعم وكانت مع زوجها بعد والامر طبيعي واللي ما يخاف الله يسوي كل شي حبيبتي وكل شي بالزمن هذا عادي وما نستغرب منه

 

[ناعم العود]

انا اعرف بنات نغس الاشكال هذي كانو معاي في الكليه تلبس لما تطلع من اهلها واذا ادخلت الكليه نزلت كل شي وعلى فكره تيي مع الباص الظاهر اتخلي اغراضها في الباص ما تدري انه في فوقها رقيب حسيب

 

[الالماس واللولو]

انا اعرف بنات نغس الاشكال هذي كانو معاي في الكليه تلبس لما تطلع من اهلها واذا ادخلت الكليه نزلت كل شي وعلى فكره تيي مع الباص الظاهر اتخلي اغراضها في الباص ما تدري انه في فوقها رقيب حسيب

فان لم تستحي فافعل ما شئت

 

[الالماس واللولو]

الشغله هذي نشوفها حتى بالكويت مره كنت انا وريلي مطعم ولا الحرمه نزلت النقاب بالمطعم وكانت مع زوجها بعد والامر طبيعي واللي ما يخاف الله يسوي كل شي حبيبتي وكل شي بالزمن هذا عادي وما نستغرب منه

هذا زمن العجائب

 

[*دنــيـQ8 ــا الوله*]

انا اشوفه تصرف غريب ... اذا مو مقتنعه بالنقاب لاتلبسه ... يعني بالسفر غير وبالديره غير

 

[الاسطورة]

ليش حبوبه
في وايد بنات او حريم انفرض عليهم النقاب فرض
تلقينها ما تحبه او ماتبيه بس ماتقدر اتخالف عاداتهم وتقاليدهم تشوف امها متنقبهاختها العوده بنات عمها
وبعدين النقاب مو واجب علشان الله يحاسب المره عليه
الحجاب واجب

 

[..may..]

امممممممم أنا رأيي مختلف شوي ..

مع إني منقبه و ما أشيل النقاب يوم أسافر و مقتنعه فيه ..

بس النقاب حكمه غير حكم الحجاب .. يعني الحجاب فرض!! لازم تلبسه فكل مكان و فكل وقت .. بس النقاب شيء مستحب .. يعني إذا تنقبت تاخذ أجر .. و إذا شالته ما عليها ذنب ..

مثلها مثل اللي يصلي ركعتين الضحى كل يوم مثلاً .. إذا صلى له أجر و إذا ما صلى ما ياخذ الأجر و ما عليه ذنب ..

بمعنى.. السنن و الأشيا المستحبه الانسان حر يسويها إو ما يسويها .. محد له حق ينقد ..
اللي ننقد عليها .. اللي تخاف ربها مكان و مكان لأ .. أقصد الحجاب .. لأن هذا عليه حساب و عقاب ..


أتمنى أكون قدرت أوصل وجهه نظري ..

 

[سواري الليل]

أنا بقولج النقاب عند الغالبيه تقاليد انا مومتنقبه ماأحبه والسبه بعض البنات اللي شوهو صورته وفوق هذا انا فيني ربو مااتحمله يصير معاي نقص اكسجين لان اللي يزيد الحاله عندي عامل نفس نفسيه من وانا صغيره المهم اتزوجت وزوجي مافهم وضعي وجبرني عليه والمصيبه يقول الوجه موحرام عادي قلتله خل اقطه يقول لا وكنت بالمعهد وحامل فصارت الازمه على طول معاي وعلى طول معاى هبوط ونقص بالاكسجين كلمته عشان اقطه بالمعهد من البيت لي المعهد مارضى قلت زين بقطه بالمعهد ( ماحب هالحركه شيقولون البنات عني ) وهم مارضى يقول اذا اذا اختنقتي قطيه اقوله انا على طول مولاقيه نفس تقولي اذا يامعود حس الحماله متعبتي وزايدة الجيله ماكو مو حاس قلتله شوف ترى بقطه وانت وكيفك قالي قطيه وخلي البنات يتحجون عنج
المهم قطيته وهم والله كل يوم مختنقه هذا وانا قاطته لو كنت لابسته جان مت

ووحدهثانيه كانت منقبه وزوجها ماعنده مشكله من انها تقط النقاب بس جدام اخوانه فشله اذا اطلعو مطعم قطت النقاب بس جدام اهله لابسته احس حركه بايخه
وحده ثانيه متنقبه من عند اهلها زوجها يقول قطي هالخلاجين مالهم معني بس ماقطتهم تقول تعودت
فالاسباب والله واجد هذا غير اللي لابسته لان مالها خلق تحط مكياج او ماتبي احد يعرفها وغيره وغيره

 

[حنون المزيون]

مسكينه قطت نقابها بمطعم تاكل اشسوت المسكينه اشقاطه

وإلا تخليه يبربس بصحن الشوربه ... ترى ما أجرمت ولا سوت كبيره علشان ننظر لها هالنظره

بس يعني ياريت يحترم النقاب يعني مو منقبه وكحل وشدوا وحالتها لله والبف باللفه ونقاب تكفه لا اطيح

واااااااااااي تلوع جبدي منهم

والنقاب اللي تسافر دول أوربا وتقطه والله ما تنلام حق الطنازه هناك عليها وتفتيش بالمطارات ولعوزه

الا تقطه وتقط ابوه اللي يابه بعد

 

[معلمة روضه]

بصراحه

انا مو منقبه

بس اعرف بنات متنقبات بس بالدوام (وما الومهم)

تقول الكل عرف ويهي وفي البعض من الرياييل يقط روحه قط على اللي مو متنقبه لأنه مو شايف خير

طبعا انا اتكلم على اللي نقابهم للستر مو الموديل اليديد (أمسكني لا اطيح)

وبالنسبه لها اذا قطته بره ما الومها لأنه مو فرض وفي كثير من الاحيان يكون فتنه خصوصا ان بعض البنات عيونهم حلوه ولما تقط النقاب تصير استغفر الله,,,

وفوق هذا انا بلندن شوف عيني اشلون واحد خبل بالباص قام يسب وحد ويمد ايده يبي يقط نقابها

 

[عالي مستواها]

يمكن لها ظروفها وطالما انه زوجها معاها يعني مو قاطته من وراه فشغلة راجعلتهم

انا ما اؤيد هالشي والحمد لله سافرت اوروبا وكان نقابي وعباتي علي وحزتها كنت بالثانوية يعني صغيرة بس خلاص لبسي هني وهناك واحد

بعدين بليز بنات لا تفتون بفرضية النقاب لانه هذي الكلام فيها يطول والفتوى مو شي هين .. اني اقول حرام او حلال او فرض أو مستحب هذا يترتب عليه امور كثيرة لازم يكون واحد على إطلاع بالدين عشان يفتي

ويكفي قول الله تعالى " يا أيها النبي قل لأزواجك وبناتك ونساء المؤمنين يدنين عليهن من جلابيبهن ذلك أدنى أن يعرفن فلا يؤذين وكان الله غفورا رحيما "

فهل تعرف المرأة بشعرها أو بوجهها ؟

أكتفي بهذا القدر .. مابي أدخل بتفاصيل أكثر

 

[زينانه]

هذي اللي شفتيها قاطه نقابها بره
دليل على انها لابسه نقاب العادات والتقاليد فقط لاغير
يعني مو لابسته كستر وديانه
لا لا لا هذي لابسته عشان المجتمع والبيئه اللي هي عايشه فيها
وترى الاغلبيه جذي............وتشوفينها اذا سافرت تمردت
كان الديره مافيها الله ولا فيها حساب وعقاب...........استغفرالله

 

[بنت عز وما تنهز]

صراحه بنات انا ما افتي بس اقول في مذاهب حللت الوجه والكفين
وفي مذاهب حرمت

وتدرون ان في اختلاف المذاهب رحمه لنا يا المسلمين

وبعدين بالعمره او الحج كانت فاطمه رضي الله عنها وارضاها تشيل الغطي بالاماكن الي مو مزدحمه
والاماكن الي تكون فيها رجال تحطه

واغلب البنات لما يتنقبون مو لأنه حلال والا حرام
لأنه في مجتمع الاغلبيه منقبات فلما تطلع اهي بدون النقاب حتي لو مو حاطه مكياج تلفت النظر وتحس شكلها غلط
ولما تسافر تقطه عادي لأنه مو لابسته دين لابسته ستر من مجتمعها الي اهي عايشه فيه

وهذا رايي وارجو تقبله
ووتحياااااااااتي لكم

 

[روحـ الكويتـ]

انا بنسبة لى كل انسان خاص بنفسة هم بعد فى بنات لابسات مالافع وكاشفات والمكياج الصارخ وهم جياكر ومدلعات

 

[ام فهووودي]

انا اعرف وحده معانا بالدوام فيها مرض جلدي في ويهها وذا صار الصيف تلبس نقاب لانها تتعالج واهي مومتنقبه وبعدين اتقطه

بس مادري اذا هالشي يجوز او لاء

 

[لؤلؤية]

حبيبتي انا شفت شكثر جذي بالسفر..
بمطار الدولة الثانية مو منقبة..ولما نوصل الكويت..واحنا قاعدين ننطر الجناط..
اتفاجأ انه الريل واليهال نفسهم...بس الام تنقبت

جايز النقاب بالدول الاجنبية يلفت النظر وممكن تصير لهم مشاكل>>>يمكن

 

[Maryam]

حرية شخصية لها

 

[العنود]

والله يا بنات اللي تلبس النقاب علشات عادات وتقاليد ما تحترم النقاب وهذا اللي قاعد انشوفة الوحدة اذا سافرت بره قطته واذا راحت مطعم قطتة انا استغرب شنو هالجراة اتقطين نقابج والرياجيل يطالعونج معناتة مو لابسته دين لا والله ماخذتة كعاده انا بصراحة يا بنات لابسة النقاب تدين ورضي لله ولا يمكن اقطة علشان سافرت برة بالعكس هذا يزيدني شموخ بديني 0اللهم يا مقلب القلوب ثبت قلوبنا علي دينك)

 

[هوى الدار]

هذا نقاب عادات وتقاليد مو نقاب دين