نظرة الناس لابلة الروضه

[الزين يفرض نفسه]

ابلات الروضه شنو نظرة الناس حقكم ؟؟

اهلج رفيجاتج غير تخصصج الناس الكل لمن تقوليلهم ابلة روضه تكفين شنو يقولون ؟


انا متخرجه بتخصص رياض اطفال اشتغلت بس ميداني والحين قعدت كورس عشان الزواج

وكل ما احد يسالني شنو تخصصج ولا شنو بتشتغلين

تعفس ويهها

تسكت

تنصدم

ردها يكون الله يعينج

تخيلوا وحده قالتي وييييييييع قطتها بويهي


انا هني قلت بس ماقدر اتحمل حسيت خلاص ماني مشتغله ابلة روضه


اللي اسمعه منهم ان ابلة الروضه يروح صوتها واهي تصرخ على اليهال
ابلة الروضه تكرمون تغسل اليهال من وصخهم بالحمام
ابلة الروضه توكل وتشرب اليهال وتمسح وتنظف بعدهم
ابلة الروضه تسكت ياهل يبجي وتضحك ياهل زعلان
ابلة الروضه بس ترسم وتلون وتروح فلوسها على اغراض الصف
ابلة الروضه تنقز وتستهبل وتنط مثل العرقوز

يعني بكل اختصار يحسبون الابلة خدامة ؟!!!!!

ليش ؟؟!!!!!

ليش ما يقولون عنها مربية تربي الاطفال وتعلمهم اداب دخول الحمام واداب الطعام والنظافه ؟ ليش ما يحسبونها انها تتعب وتشقى ويروح صوتها عشان تغني وتونس الاطفال وتعلمهم المهاراات وتوصل لهم المعلومات ؟ ليش مايحسبونها الام الحنون الثانيه ولا الطبيبه النفسيه اللي اطبطب على كتف الطفل وتعطيه كل ما يحتاجه نفسيا؟ ليش مايقولون انها تنزل مستواها لي مستوى الطفل عشان يعرف ويفهم وستانس بدال ما يقولون عنها مهرجه ؟!!!


وفي احسن الاحوال يقولولج ان شغل ابلات الروضه مافيه شي زايد بس يعلمون الاحرف والاعداد والالوان ويغنون بس ...!!!!

انزين وين تعبنا وجهدنا ؟ يعني عبالكم لمن ادشون الروضه كل شي فيها من شغل الناظره ؟ ياما وياما الابلات سووا وسووا وصبغوا ونظفوا وعدلوا وربتوا صفوفهم ... ياما وياما كانت الافكار من الابلات وتسرقها الناظرات تنسبها حق نفسها ... ياما وياما صار شغل الروضه كله على راس الابلات ... ولمن ولي الامر ايي الروضه ويشوف الصف اينن والطفل مستانس فيه حابه وحاب ابلته ويشوف حفلة التخرج وحفلات المناسبات فيها الرقص والغناء والتمثيل واللبس وكللللل شي بادق التفاصيل يتعبون عليه ابلات الروضه وترى شي مو سهل .... واخر شي يقولون ابلات الروضه شغلهم سهل ومالهم حق يعترضون على شي ؟!!!!!



لي متى نظرة الناس حق ابلة الروضه انها ما تتعب .... او انها خدامة ؟!!

 

[دنياك دنياي]

صح كلامج انا تحطبت اكثر منج وحتى يوم كنت بالتربية العملية حبطوني احباط مو طبيعي انا اشتغلت صارلي سنه اهو صج تعب ومصاريف بس اول سنة ولا بعدين لما يكون عندج اغراضج وشغلج ما تحتاجين تشترين بعدين ما عليج من الي يقولون تغسلين اليهال لا كل مستوى او كل فصل له فراشه معينة اهي الي تغسل الياهل بعدين يكفي انج معلمة وقاعده تعلمين اليهال وهذا كل تأجرينن عليه المفروض تفتخرين بهالشي وما عليج من كلام احد بس انا اقووولج الروضه والي فيها اهم الي يحببونج بشغلج اذا كانو المدرسات اووكي والاداره عسل راح ترتاحين وتحبين شغلج واااااايد وصدقيني اي وظيفة فيها تعب ومشاكل وبلاوي

وقم للمعلم وفي له التبجيلا كاد المعلم ان يكون رسولا في تقريبا مثل مقااام الرسووول الي يوصل الرساله شنو احسن من جذي؟
أ

 

[الزين يفرض نفسه]

صج كلامج وهذا انا اللي مقتنعه فيه وابي كل الناس يعلمونهم

صج ان كل وظيفه فيها تعب وبلاوي ومشاكل الروضه تختلف من ابلة لي ابلة حسب عطائها وحسب المدرسة اللي تشتغل فيها والابلات والادارة بس هذا ما غير ونظرة الناس شي غير

الناس ليش ما يقتنعون او ليش ما يعرفون الحجي اللي انتي كاتبته ؟؟

والله العظيم من اول ما دشيت كلية التربيه قالولي شلج بالتدريس ولمن تخصصت رياض اطفال يبتسمولي ابتسامه صفرا غصصصب يجاملون وانا اشوف نظرة الشفقه بعيونهم جني انا مسكينة ولا طاره طراره الشغل ما جني داشه بكيفي معنه معدلي كان يسمع ادش كليات وايد ومنها الادارية اللي اصلن قبلوني فيها بس انا فضلت رياض الاطفال وادرس واتحمس للشغل واقول عندي افكار وبسوي وبسوي وطوووول هالسنين بالدراسه وانا اشوف الاستهزاء بمكانة المعلم واشوف نظرات الشفقه ونظرات التعجب وحتى نظرات الاحتقاااار والله شفت نظرات الاحتقار منهم جنه اللي جدامهم فراشه ماجنه المربيه اللي تربي عيالهم ولو يدرون ان ابلة الروضه تربي عيال لان بعض الاهالي ما يربون عيالهم من الصغر ولا يعلمونهم اداب ومهارات يعتمدون اعتماد كبير على الحضانه والروضه والمدرسه ....


فاقولج من ايام الدراسه لي الحين يعني صارلي 7 سنين تقريبا وكل يوم يسالوني شنو شغلج واشوف هالنظرات اللي تحبططططط والتعليقات اللي تجرح والكلام اللي يخليني اقعد بالبيت ولا اني اشتغل ابلة روضه

 

[nero]

الناس ما يعرفون طبيعة عملنا شنوو

لان الطفل يرجع البيت ما عنده واجبات ولا كتب .. يعرف منها ولي الامر ولده شنو سواا داخل اسوار الروضه

اغلب الي اقولهم انا مدرسة روضه .. يقولون يا بختج طقطقة وغناوي ماكو كراااف

ما يدرون ان الكراف عندنا .. وانج من تدخلين ليما تطلعين مجابله صفج والبريك عندنا اقل من بريك المدرسات الباجي يادوب نص ساعه والا ساعه الا ربع بس

هذا غير الفترات .. الي طوول اليوم تجهيز الوسائل والاداوت والصرف وتجهيز المؤثرات الصوتيه وكل الوسائل الي توصل المعلومات للطفل ..

اما عن سالفة تغسل اليهال .. هم بعد عبالهم احنا طول اليوم بالحمام مع الاطفال.. بس هذا ما صاار ولا يصير في فراشات يقومون بهالمهمه

وصح كلامج معلمة الروضه تربي وتعلم .. لان الاطفال من بيئات مختلفه وكل واحد ايي مع حصيلة لغوية ما تدرين شنو اهي .. ف لازم تدربينه على انتقاء الفاظه وعلى التصرف الصحيح بالمواقف لان وايد اطفال يتعاملون بالعنف مع ابسط موقف يمرون فيه

وبالنهايه اقول لكم يا ابلات الروضة .. كل عام وانتو بخييييييييييييييييير

خلاص خرجنا عيالنا .. والاسبوع الياي اخر اسبووووع

بدت فترة الراحه والاستجمام _03BA:

 

[محظوظه ومحبوبه]

الشغل موعيب ولا حرام المهم انج تبدعين فيه وتخلصين لوجه الله وخلى صوتج اهو المسموع والباقى من حرتهم يتكلمون انا سامعتهم يقولون اشكال والوان ماعليج منهم انتى المعلمه على العين والراس

 

[raw]

يا بنت الحلال

الحرة تجيب العرة على قولتهم

اللي تقول جدي يا محترة يا ما تدري عن شنو تتكلم بس تحب تكلم وتسوي روحها تعرف كل شي

انت اكبر واعقل من ان الحريم اللي ما عندهم سالفة يشككونج بالتخصص اللي انتي اخترتية كمهنه لج

وبعدين انتي اربع سنين تدرسين وتجي وحدة بسالفة تزعزع ثقتج بنفسج ؟؟

ما عليج منهم

وابلات الروضة كلهم الله يعطيهم العافية

 

[أم الجوري]

من صجكم تتكلمون انتوا ؟؟؟
أشفيها أبلة الروضة ؟؟؟؟؟؟
أخاف ما نتعب ولا ندرس ولا نهلك مثل غيرنا من المدرسات !!!!!!!!!!!!!!
لا حبيبتي قولى انا أبلة روضه بفخر
احنا لا نغسل الجهال ولا نلبسهم حفاظات

أحنا معلمات أجيال
واللى مو عاجبة يطق راسه بالطووووووووووووفه

 

[الشهدوالدموع]

آآآآآآآآآآآآآآآآآآآآآه ...:0bee2e8d89:.خلي اللي بالقلب بالقلب....المشكلة ختى ولي الأمر او ولية الأمر ...ماتحترم ابلة الروضة ودايما يكلمونج كأنج خادمة حق ولدهم ...ولا لما يشتكون ليش ملابس ولدي وصخة ليش تكرمون ولدي صروالة وصخ ..كانج مادرستي وعندج بكلريوس..ساعات حتى سلام مااايسلمون ...والناس اللي حوالينج لماتقولين لهم تعبانه من الدوام يقولونلج الله يخلييييييج ..شقااعدة تسوين كل بس تغنون حق اليهال وتصفقون وترقصون مااايدرون ان اللي قااعدين نسويه حق الأطفال مو اي احد يقدر يسويه..الله يعينا ويفتخها علينا:0bee2e8d89:

 

[ريحانة_14]

الله يعطيك العافية يابنات

وعساكم عالقوة إن شالله

تحياتي وتقديري لكل معلمات رياض الأطفال

 

[الزين يفرض نفسه]

raw انا اللي خلى ثقتي بنفسي وبتخصصي تزعزع مثل ماتقولين اهو مو لان وحده كلمتي ولا 2 ولا 3 ولا 10 واااااااايد يقولولي نفس الكلام حتى زميلاتي بالجامعه اللي من تخصصات ثانيه غير الروضه يشفقون علي ولا يستغربون ني متخصصه رياض جني طايحه من عينهم

وحتى في ناس وايد قراب علي ومن اهلي مو مره ولا مرتين ولا ثلاث كل مناسبة كل مايشوفوني ها ماشتغلتي؟ اي قعدي بالبيت شبعي راحه بتشوفين الكراف عدل بالروضه ... اي ليش التحبيط ؟! مو عاجبج سكتي مادري منو مساعد على تربية عيالج واهم بعمر 3-6 سنين اخاف الخدامه بس !! اكيد الروضة وابلة الروضه

الشهد والدموع صح انا سامعه من ابلات من طريقه معاملة اولياء الامور لابلة الروضه صراحه لهم حركات مايستحون شوفي عيالهم شلون صايرين ... هذا الشبل من ذاك الاسد ... اقلب القدر على فمها تطلع البنت مثل امها

ريحانه مشكورة يا عمري ومشاركتج على راسي

واشكر كل ما شارك بالموضوع وابدا رايه

 

[القرآن ربيع قلبي]

ليش جذي بنات بالعكس انا كل ما اشوف مدرسة روضة اقول والنعم فيج والله يعينج على المجهود الي تبذلينه ولما يشكون عيالي يمة الابلة زفتنا والا شي والله ما عمري اشتكيت لانه انا عندي عيال وادري حاسة فيها وبالضغط والمسئولية اكثر عندهم ويكفي انهم كويتيات بناتنا منا وفينا ولما ادش الروضة ينشرح صدري لما اشوفهم واشوف اخلاصهم والف تحية وتقدير لكل لكل ابلة روضة عموما والله يوفقكم ولا تتاثرون بالكلام لان الكلام السيء في كل مجال وانتو فعلا مربيات اجيال فاضلات الله يجعله في ميزان اعمالكم واحتسبو الاجر

 

[нάγoηά cнεмίsтяγ]

لا حبيبتي أبلـة الروضـة حالها حال باجي الوظايف الإنسـانية اللي تخدم المجتمـع انتي قاعدة تسوين وظيفـة أول شي حلال ثانيـاً فيها خدمة انسـانية يعني مو عيـب ولا حرامـ بالنسبـة للناس ريحي نفسج وقولي بالطقاق بكلامـ الناس اي والله صج .. احنـا شكو بكلام الناس كلامهم ما يخلص أهم شي راحتج انتي بالوظيفـة ورايج انتي والا راي الغير مو مهمـ ترى لأن وجهات النظر تختلف آنا امي كانت مدرسة روضة وتقاعدت والحمدلله ولا مرة احد قالها هالكلامـ يعني محد نقد تخصصها .. وعندي ثنتين بالصـف يقولون امنيتهمـ يصيرون أبلات روضـه وبعدين هالوظيفـة تشبع غريزة حب الأطفال بصراحة وايد تضايفت لمه قلتي خلاص مابي اصير ابلة روضـة مجرد سماعج لهالكلامـ !! لا تتأثرين بحد بليييييييييييييز:eh_s(14): ولـو وظيفتج فيها شي غلط او سمعة مو زينـة جان ما خطبوج هالناس الطيبين ومبروك حبيبتي الزواج عسى الله يهنيج انشالله

 

[chocosign]

حبيبتي لا تخلين احد يسبب لك احباط
بس قولي لهم كافي اني قادرة اتعامل مع اكثر من عشرين طفل في وقت واحد واقدر احل مشاكلهم واراعي الفروق بينهم في وقت الامهات مو قادرين يتعاملون مع اطفالهم
ولما تقولين انا معلمة روضة كوني فخورة بهالشئ لانك باختصار المعلمة الانسانة

 

[مشغوله و محتاسه]

لا يبا مو صحيح ..

عندنا بالعايلة معلمات روضه وما سمعت ان احد تحجى عنهم جذي ..

و اللي يقولون هالحجي جهله و ما يفتهمون .. لان الحين صار في وعي و تقدير اكبر لدور معلمة الروضه ..


ما عليكم منهم

شغلكم صعب و متعب و تستاهلون كل التقدير عليه خاصة اللي تشتغل بضمير : )

 

[أبوي تاج راسي]

الصراحة تنقال الروضة نعطيها اكثر ماتعطينا من اول الدوام الى اخرة وانت مشدودة اعصابج وتعب ومسئولية والاطفال كل ماهم بالنازل قلة ادب وفوضى عجيبة.باعكس بالمراحل الثانية اشرحي حصتج واطلعي . والصف لازم يكون جاذب للطفل وتراكضين ورى الفراشات حق تنظيف الصف انا كل سنة اجيب شركة تنظيف ببداية الكوس الاول والثاني .والروضة ماينفع معاها الا المدرسة اللي تطنش.والمجتهدة تتعب تعب مو طبيعي.

 

[المرام]

حبيبتي يكفي ان تخصص رياض الاطفال لاعلى نسبه من الخرجين المتوجهين لتخصص التربيه

 

[الزين يفرض نفسه]

ادري وادري وادري


بس ماقول غير انهم جهله وناس سطحيين :\


القران ربيع قلبي مشكوه مشكوه مشكووووووة على هالكلام الحلو اللي يفتح النفس الله يوفقج ويعطيج على قد نيتج ويخليلج عيالج

 

[BaiTotia]

أنا أمي الله يخليها مدرسة روضة

إهي المهنة حيل صعبة ويبيلها بال طويييييييييييل وصبر مع اليهال

يعني كافي إنه التدريس صعب ومتعبببببب و فوقه إنج تدرسين يهال الصغار هذا الشي المتعب اللي فيه

و لما يقولون لج الله يعينج مو قصدهم تخصصج مو زين ولا طايح من عينهم

بس مهنة متعبة وإنتي تدرين هالشي

ولو تقولين لأمي أنا أبلة روضة بتقولج بعد الله يعينج ههههههههه

الله يعطيج العافية

 

[soseta]

انا بعد ان شاءالله بتخصص رياض اطفال , وكل ماسالتني وحده بالجامعه شنو تبين تتخصصيين وعرفت روضه ..
تفتح عيونها وتقول وييييييه ليش ومن الكلام البايخ اللي يبط الجبد ..

والله وصلت لمرحله مااحب احد يسالني شنو تبين تتخصصين , استحي اقول ..
مايدرون ان الروضه اصعب مرحله , واهيا المرحله اللي تتكون فيها شخصيه الطفل ..

وتدرين ماينلامون , من اللي يسمعونه ..

وحده من الخريجات الكورس اللي طاف قالتلها وحده ليش روضه ومن هالكلام , قالت وييييييييه مدام كله نفس المعاش ليش اتعب نفسييييييي ..

للاسف مو بس ابله الروضه اللي ينظرونلها بنظره انها اي شي ..
صايره مهنه التدريس بكبرهاااااااااااا اي شي ..


ولو تفكرين ترا صج الناس ماينلامون , كليتنااااااااااا 90% من البنات مجبورين عليها , واللي داشينها عشان انها سهله , واللي عشان المعااااااش ..


وعلى طاري الروضه , تصدقين ان حتى امي وابوي يقولونلي شنوووووو روضه ؟؟
بس هم انا ابي روضه , كافييييييييي اعلى نسبه قبول حق التخصصات اهيا رياض اطفال ..


بس متى ربي يفكنا من هالبنات اللي يدشون هالتخصص عشان حاطيين في بالهم ان راحه ..

والله انا ابيه عشان حابته , بس للاسف الاشكال اللي تدشه عشان معاش وعشان اريح ومن هالكلام , هذول اللي خربوا علينا ..


بس هم ماعليج من كلام الناس , اذا بتسمعين كلام الناس ماراح تكملين حياتج ..

 

[شقرديه]

حبيبتي اللي يسمع كلام الناس يضيع اهم شي ان شغلتج حلال ولاتردين على احد وبعد اهم شي انج تكونين مرتاحه والطريج جدامج طويل تفاؤلوا بالخير تجدوا موفقه تحياتي لج