ناوية اسافربعد العيد اشرايكم ماليزيا ولا تايلند

[رحيق]

احبكم في الله

الموضوع امبين من العنوان ناوية اسافر بعد العيد 10 أيام مع زوجي وعيالي اشرايكم اروح تايلند ولا ماليزيا
مو مهم عندي السوق أبي راحة واستجمام فردو علي أكون شاكرة لكم
اي دولة احلى فيهم ؟
اي دولة ارخص فيهم ؟
اي دولة احسن بالأكل ما أبي اتوهق مع اليهال ؟
أي دولة جوها احلى ؟
واي طيران تنصحوني ابي سعر زين لان اليوم شفت الطيران القطري التذكرة 125 فتذاكرنا تطلع تقريبا 800 واشوي

فاشرايكم ؟

 

[تيلي توبيس]

تايلند فيها اسوقه وحلوه بس العاصمه بانكوك يع وصخه وماليزيا رروعه انا بروح لها شهر 9 ان شاءالله بعد مدام تبين استجمام وراحه ماليزيا احلا وطبيعه ولا اروع كل اللي راح ماليزيا وتايلند مقارنه بين الدولتين كلهم قالو ماليزيا ومن ناحيه الغلا كلهم مثل الشي

 

[ام عبود9]

انا رحت مااليزيا

تصلح حق العاايله

وااااااااااااااااااااااااااااااااااااااااااااااااااااايد حلووه
تهبل

والجوو ولا ارووع


احلى شي

جنتق

قوولدن هوورس

افااموزا

الجبل

بصرااحه وااايد حلووه

 

[Samurai]

ماليزيا اكيد .. انظف و ارقى ..

 

[sweetkoko]

صراحه بوجهة نظري تايلند ماتصلح لبني البشر مو بس ليهال فاشله هالديره بكل مافيها تعيسه بجوها بوصاختها بتلوثها بأكلها بسياحتها بمناظرها بشعبها بكل شي
ماليزيا يعيبها جوها فقط اما سياحه نظافه واستجمام وتسوق ترفيه واولا وأخيرا اكل حلااااال وبالدرجه الاولي صج عائليه وتصلح لليهال
اما لو تبين بصيحتي هونغ كونغ راقية وسنعه جو روعه حضاره تطور ديزني لاند وملاهي مائيه متاحف شمع وفناتق عروض والعاب ناريه رحلات بحريه مرتفعات سوق بضاعه راااقيه شعب مثقف يتحجا انجليزي ومرتبين نظام واحترام عيب الوحيد اكلها لانهم بوذ الاكل بس الشي الصعب فيها وموفقه

 

[حـلا و ذوق]

مرحبا ..

انا رحت الديرتين وثنتينهم حلوين .. تايلند برامج و ماليزيا نظافة .

اي دولة احلى فيهم ؟
ثنتينهم حلوين .. انا رحت اول تايلند وبعدها ماليزيا .. وبيني وبينج تحسفت اني ماطولت اكثر بتايلند وقللت ايام ماليزيا ..


بخصوص ماليزيا ::

كوالالمبور مافيها شي كان برنامجنا طول اليوم سينما كوفي شوب ... بس ..

فيه منطقتين تقدرين تروحين لهم اللي هم جنتج .. تقريبا ساعتين من كوالالمبور .. بما انكم عايله اخذوا لكم تاكسي اتفقوا معاه على سعر يوديكم ويجيبكم .. ولان المسافة بعيدة ناس وايد يروحون الصبح بباص ويرجعون المغرب .. احنا قلنا ماتسوى سكنا فيها ليله .. يعني ليله ليلتين بالكثير كافيه .. هي مجرد مدينة العاب للكبار والصغار
فيه العاب خارجية برا تصير فيها العاب للكبار والصغار .. وتقفل من المغرب بعدها تنتقلين للالعاب المغطية داخل وهي للياهال .. وفيها مطعمين بس كنتاكي ومكدونالدز ..


المنطقة الثانية الي تقدرين تروحين لها اسمها صن وي لاقون وهذي تقريبا مسافة ثلث ساعه من كوالالمبور ..
فيها العاب مائية تقريبا مثل الاكوار بارك بس على اكبر واكشخ .. بس كله زحمة بالصيف وانواع الجاليات الي تشوفينهم .. بس هالمنطقة فيها مجمع حلو واغلب محلاته مصممينه ماليزيين هم يصممون بنفسهم بضاعتهم واسعاره رخيصة

اما بالنسبة لتايلند .. بانكوك هي بس تنفع للتسوق فيها مجمعين ارخاص .. طوكيو سنتر وبلاتينيوم ..
بس الديرة وصخه ولا انصحج فيها لو تبين استجمام ..

تبين استجمام عدل !! روحي بوكيت .. خصوصا شاطيء اسمه باتونق بيتش .. شاطيء حياوي وكله برامج ..


تلاقين كشكات منثرة كل كشك عنده عروض الرحلات نقي اللي يعجبج منها

فيه مراكب توديج رحلات للجزر ..
مثل جزيرة جيمس بوند ( مارحتها قالولي مدتها طويله وبي بي ايلاند احلى بس ناس وايد تمدحها )
جزيرة بي بي ايلاند ( روووووووعة ) عيالج بيتخبلون عليها شي مب طبيعي من الصبح ياخدونكم على الساعه 7 يردونكم الساعه 5 ونص
رحلة الرافتنق
رحلة لحديقة الحيوان ( يسوون استعراضات تماسيح وقرود شي عجيب )
الفانتسي ورلد استعراااااااااض خيالي لازم ماتفوتونه
وطبعا كفاية برامج البحر . من سابحة و . البراشوت .. الجي تي سكي وغيرهم

اي دولة ارخص فيهم ؟
اكيد تايلند طبعا كمواصلات + فنادق .. اهناك فنادقهم الخمس نجوم اسعارها مناسبة تعيشين ملكة
س اهم شي تاخدين الفنادق الي على البحر وهم عندهم مجمع حلو فيه محلات ومطاعم فاست فود وغيره بس حلوو المجمع ومرات يسوون شو واغاني بليل


اي دولة احسن بالأكل ما أبي اتوهق مع اليهال ؟
الدولتين فيها مطاعم عربية وايرانية وهندية وفاست فود مثل ماكدونالدز و برجر كنج وبيتزاهت وكنتاكي
طبعا المطاعم العربية بتايلند انا عندي انها ارخص من ماليزيا بشوي ...



أي دولة جوها احلى ؟
جوهم نفسه مايتغير طول السنة .. مايجيهم براد كلش حار بس مو مثلنا طبعا شوي اخف ويطق مطر بين الوقت والثاني:eh_s(15):


واي طيران تنصحوني ابي سعر زين لان اليوم شفت الطيران القطري التذكرة 125 فتذاكرنا تطلع تقريبا 800 واشوي

125 سعر ممتاز !! بصراحة بس المساففة اصلا فوق السبع ساعات لين تايلند حاولي ماتكون مدة الترانزيت طويله والطيران القطري ماعليه كلام

انا رحت مرتين على طيران الخليج ..

ان شاء الله افدتج

 

[عمشه المنتفشه]

طبعا ماليزيا خاصه اذا معاج يهال

اناا بتكلم عن الاكل لما رحت تايلند قعدت بالهوليداي ان ويمنا مطعم لبنانب يهبل ونظيف صرنا نتعشى ونتريق ونتغدى فيه لان ماتقدرين تاكلين ولاشي

انا استغرب اشوف وايد خليجيين بالفاست فود ياجماعه ترا مو بس لحم الخنزير حرام حتى ديايهم ذبح غير اسلامي والزيت اللي يقلون فيه

الفرايز ممكن يكون زيت خنزير حتى الحليب ومنتجاته ترا يستخدون زيت الخنزير حق كل شي لانه رخيص ديروا بالكم

ماليزيا وناسه حلوه لليهال

 

[لبا^زولي]

..........................

 

[رحيق]

أشكركم من كل قلبي على المرور
ووايد استفدت منكم

 

[رحيق]

شكر خاص للعضوة حلا وذوق
اشكرج جاوبتب عل كل اسئلتي

كفيتي ووفيتي

اسأل الله باسمة الحافظ ان يحفظ لج زوجج وبنتج والي في بطنج وكل اهلج
ويرضى عنكم ويرزقج من اوسع ابوابه

 

[رحيق]

المشكلة ان آنا وزوجي مختلفين اهو يبي تايلند وآنا أبي ماليزيا

اهو يقول يبي رحلات بحرية وأكل سمج طازج من المطاعم الي تختارين السمج ويطبخونه لج

وآنا أب اروح ماليزيا علشان اكلها الأغلب حلال وا أحاتي اليهال

الله ايسر الامور

 

[@الليدي لين@]

انا رحت ماليزيا ومارحت تايلند بس ودي اروحلها


انصحج بماليزيا وايد حلوه ,, والاستجمام بلنكاوي تهببببل

واسعار التذاكر وايد زينه حجزي قبل لا تغلى التذاكر

 

[أم سلوم الحلو]

انا مثل حالتج بس بعيد الاضحى
كنت ناويه لندن بس شهر11 برد على اليهال
قلت يامليزيا يا تايلاند
واييييييييييييييد محتاره لاني مو رايحه ولا وحده فيهم
بس شكلنا تايلاند

 

[سفرجل]

اذا اليهال معاج لااتروحين تايلند ماتفع لليهال
مع التايلند حلوه وارخيصه بس ماتنفع لليهال

 

[أم سيف وسلطان]

ماليزيا طبعا

 

[omy nour 3any]

ماليزيا وانتي مغمضه ....

 

[لون الماااااي]

رد : ناوية اسافربعد العيد اشرايكم ماليزيا ولا تايلند

بصراحه استغرب من الناس الي أول ماتسمع عن تايلند على طول تقول (وييييييييييع وسخه ومو نظيفه)
والسبب انا الناس الي قبلهم قالو نفس الكلام!!!
كل واحد يكتب الي شافه بصراحه لايصيرون ورا أراء غيرهم
(تايلند) لو اروحلها بالسنه مرتين ماراح امل منها طووووووووووول عمري
(ماليزيا) ما أفكر اروح لها مره ثانيه
وبالنسبه للشارع الوسخ في بانكوك تايلند -----هذا شارع امتداده تقريبا 40 إلى 50 متر في العاصمه يبيعون فيه الاكل الشعبي للشعب التايلندي (مثل العيش عندنا) وهو عباره عن حشرات بأنواعها مشويه (وزيارة هذا الشارع مو غصبن عليج ) اذا ودج تشوفين أكلهم وتصير عندج خبره وتسإلينهم عن اسماء الحشرات وعندج هواية التصوير (روحي) إذا ماتبين وتلوع جبدج (محد راح يطقج على ايدج)
بانكوك رائعه للسوق (بس انتي ماتبين سوق)
عندج زيارة المدينه المائيه(تركبين قارب وتتسوقين انتي وعيالج وتاكلون )لأن المدينه غارقه بالماء والناس بهالمدينه على رؤوسهم فاكهه(منظر جميل)
عندج زيارة (الزوو) روعه ومخيفه تدخلين قفص والحيوانات سائبه(مغامره)
زياره الشلالات بعيده شوي عن السنتر بانكوك
رحلات تراثيه (الرقص التايلندي والاصنام ) اشكالهم رائعه للتصوير
ورحلات كثيييييييييره ماتحضرني الحين(وانا سكنت في فندق ارنوما)مكانه رائع جدا بس في فنادق افضل منه لأنه 4 نجوم
اما بوكيت وما ادراكي ما بوكيت ( خياااااااااااااااااال) روحي (فانتاسيا) وادعيلي وااااااااااااااااااااااااو
روحي المجمعات مو للتسوق ولكن للتفرج وشوفي البنيان والحضاره والتقدم
رحلة جيمس بوند شي خيالي (راح تحسين انج ممثلة هوليوود وراح تمثلين فلم وتتدخلين كهوف مائيه وجزر متقاربه خضراء وتلال وسط البح
شاطيئ بوتونق بييييتج روعه (واذا رحتي لبوكيت)اخذو فندق (ديفانا بوتونق بييييتج) ماراح تنسينه طول عمرج وكأنج عايشه وسط ادغاااااااااااال والفراش كبر راحة اليد بألوانه الفسفوريه
اما جزيرة تشنغ ماي (فهي للإستجمام والراحه كما طلبتي)
سكنت في فندق 5نجوم (للأسف نسيت اسمه ) عباره عن اكواخ كأني فلونه
وزرت اكبر الشلالات في شرق اسيا وزرت مزراع الارز والخضار كان روعه
وقمت بتجربة الراليات(رالي السيارات) واااااااااااو حده متعه
هذا وبغض النظر عن رحلات الغابات والادغال والفيله (سفاري)
جوها رطوبه بس نفس رطوبة الخليج (اذا رطبت) والمغرب لااااااااازم ينزل مطر بغزاره (لازم الشمسيه معاج) وفجأه يتوقف وبعدها تزاولين برامجك مع براد الجو بعد المطر
لايطوفج ايس كريم عندهم(سوين سز) ملينا من باسكن روبنز وهاجن داز وغيرهم
وبالنسبه للأكل(لاتاكلون مطاعمهم)روحو مطاعم عربيه لبنانيه سعوديه يمنيه وهكذا
ولا يطوفج كششششششششششششششششخة التايلنديات يمه يمه من ذرابتهم وجمالهم وطولهم الموطبيعي ونعومتهم
ومالهم شغل فيج ولا يطالعون وعلى طول مبتسمين عشان جذي اسم تايلند( أرض الابتسامه)
باختصار تايلند عيشي المغامره والطفوله واكسري الروتين وتمتعي بالطبيعه الخلابه
_______________ماليزيا______________
مع احترامي لمحبي ماليزيا وروادها كأنج رحتي للخليج العربي
من كثر الخليجييين والخز مخازز
ولا زم تكشخ وتتنصب (يعني وين ووين الوناسه)والخليجيين يخزون لبسج وشكلج
ديره مستهلكه جدا جدا (رحلاتها ماتوصل رحلات تايلند ابدا)
مافيه الا مرتفعات جينتق احلى شي ومجمعاتها غااااااااااااااااليه

 

[لوازم العائلة]

رد : ناوية اسافربعد العيد اشرايكم ماليزيا ولا تايلند

انا بعد مفكره اروح تايلند وماليزيا ومحتاره مابينهم
مشوري يابنات

 

[ذراي]

رد: رد : ناوية اسافربعد العيد اشرايكم ماليزيا ولا تايلند

انا بعد مفكره اروح تايلند وماليزيا ومحتاره مابينهم
مشوري يابنات

روحيلهم اثنيناتهم لان الطريج واحد وفرق ماليزيا عن تايلند ساعة بالطيارة بس خلي اكر وقتج في ماليزيا وتقريبا ثلاث ايام الاخيرات خليهم تايلند
وهذا اقتراحي

 

[dяέἆᶆ qûếếἦ]

مرت اخوي راحت للثنتين بس استانست بتايلند اكثر .. وربي يكتب لكم الي فيه الخير