ميك آب ~ ميك آب ~ ميك آب

[!! D m i r a a !!]

يـا صانـع المكيـاج الله يجـازيـك
خليتني مخـدوع فـي شكـل خلـي​

الله يحـرق مصنعـك مـع مبانيـك
والمعرض الموجـود في بيكاديلي​

ادعي عسى تعمى وتنشـل رجليـك
هـذا دعائـي دوم لا جيـت اصلـي​

خليتني اركـض ورا البنت هاذيـك
واشوفها اجمل غـرام ٍ حصـل لـي​

قلبي عشقها ياحبيبي توماتيك
وان شافها قلبـي يرحـب يهلـي​

هي رحبت بـي وقالـت الله يحييـك
وقالت هلا باللي عشق زيـن شكلـي​

وقالت انا اجمل بنت في اللي حواليك
شف حسني الاخاذ وروجي العسلّـي​

طالعتها ثـم قلـت هالقلـب يبغيـك
ومن شاف حسنك خلى غيرك يولـي​

ابغي اشوفـك دون مكيـاج يكسيـك
وابغـي اشوفـك بالجمـال المحلـي​

قالت تبينـي افـرك الوجـه تفريـك
واشيل هالبـودر وروجـي وكحلـي​

قلت أي نعم قومي عسى الروح تفديك
ابغـي جمالـك هالطبيعـي يهـلّـي​

قالت دقايق راجعـه لـك واراويـك
ذاك الجمـال اللـي لعينـك يسـلّـي​

ويوم رجعت لي شربكتني الشرابيـك
وحسيت الارض تدور وانـا بمحلـي​

الخد كنه ياحياتي سيراميـك
والوجه شارع مثـل شـارع حولـي​

الوجـه كنـه بيـت كلـه شبابيـك
من هالحفر في وجهها اللـي يعلّـي​

كلـه سبـب مكياجـك الله يجازيـك
خليتني مخـدوع فـي شكـل خلـي​

ونصيحتي لكل شاب من غير تشكيك
لا لا اتسـرع ثـم تنغـش مثـلـي​

اللـي بـلا مكيـاج خلهـا حواليـك
واللـي تحـط مكيـاج خلهـا تولـي​

​

*مارأيك بكلام الشاعر ؟ وهل فعلاً الماكياج خداع ؟​

*كثيراً مايساء أستخدام الماكياج بوطنا العربي ، من وجهة نظرك كيف يساء أستخدام الماكياج ؟​

*قبل 3سنوات من الآن درج الماكياج بالألوان الفاتحه , وظن البعض إن الموضه هي الماكياج الخفيف ؟ مارأيك أنتِ ووش كنتِ تحسبين الموضه ؟<== هالسؤال ملغوم .​

​

*هل أنتِ من أنصار ماركات الماكياج الباهظ الثمن , أم الماكياج الإقتصادي .. مع ذكر السبب ( الرجاء مراعاة أذواق الأخرين ) ​

*ماهي ميزانتيك لشراء الماكياج ؟ ومتى تشترينه ؟ وأكثر شيء تكررين شراءه ؟​

*هل تؤثر اعلانات المواقع والمجلات .. أو شعبية منتج ( فلانه وعلانه مدحته ) أو تتبعين هواك .. أو يلعب بعقلك البائع بالمحل أثناء الشراء؟​

​

*هل تجدين صعوبه بالتعامل مع البائعين اثناء الشراء ؟ وهل تفضلين وجود عماله نسائيه بالمحلات ؟مع ذكر أسم المحل إللي تفضلينه ؟​

*هل تستعينين بخبيرات أو خبراء التجميل .. أو تفضلين الأعتماد على نفسك ؟​

*منتج إللي تعتقدينه سحري بعالم الميك أب ( من مقتنياتك وبالصوره)؟ ​

​

*منتج تخفينه عن الآخرين , وماودك أحد يكتشفه ... وإن وجد بالصوره ؟ ( وأعتبريه حصري لشمواه ) ؟​

*منتج ماتستغنين عنه نهائياً ؟​

*هل واجهتي بيوم من الأيام أنتقاد على مكياجك .. سواء إيجابي أو سلبي ؟ شاركينا به . ​

​

*هل ترفضين الظهور على الملأ بدون ماكياج ؟ أم مقتصر على أشخاص معينين ....​

*تكرهين المكياج الكوفر .. ماتحبينه , تنتقدينه ... لكنك تمارسين هذه الجريمه بحق الجمال ؟​

*من وكالة أنباء قيل وقال .. قالوا : إللي تحط مكياج شينه , وإللي ماتحط زينه ؟ عبري عن وجهة نظرك , وهل تعتقدين أن وراء هالمقوله قلبا حاسد , أم يداً لا تتقن الماكياج​

​

للاحاطه بكافة جوانب الموضوع الرجاء مشاهده العرض التالي
وللاطلاع اكثر يمكنكم البحث باسم Celebrities without makeup​

http://www.youtube.com/watch?v=VlwrDtq_RhM&feature=player_embedded​

[youtube]http://www.youtube.com/watch?v=​

​

​

 

[noona90]

*مارأيك بكلام الشاعر ؟ وهل فعلاً الماكياج خداع ؟
برايي المكياج يحلي بس مايغير يعني بدونه نفس الملامح




*كثيراً مايساء أستخدام الماكياج بوطنا العربي ، من وجهة نظرك كيف يساء أستخدام الماكياج ؟

يساء استخدامه لما يحطوا طبقات منه ويشوه بدل مايحلي




*قبل 3سنوات من الآن درج الماكياج بالألوان الفاتحه , وظن البعض إن الموضه هي الماكياج الخفيف ؟ مارأيك أنتِ ووش كنتِ تحسبين الموضه ؟<== هالسؤال ملغوم .


انا طول عمري احب المكياج الخفيف الاوربي اللي يحلي ومايبين ماتهمني شو الموضه المهم اللي يناسبني









*هل أنتِ من أنصار ماركات الماكياج الباهظ الثمن , أم الماكياج الإقتصادي .. مع ذكر السبب ( الرجاء مراعاة أذواق الأخرين )



انا مااستخدم المكياج الغالي حدي ماركات سنتر بوينت لسبب وحيد اني اخاف من مكياج الهنود


*ماهي ميزانتيك لشراء الماكياج ؟ ومتى تشترينه ؟ وأكثر شيء تكررين شراءه ؟


انا اشتري كل شهر واصرف حول 300 ريال مو اكتر
اكتر شي احبه الارواج
والشدوهات والبلاشر <<وش بقى هههههه
واللي اكرره اكون محتاجته



*هل تؤثر اعلانات المواقع والمجلات .. أو شعبية منتج ( فلانه وعلانه مدحته ) أو تتبعين هواك .. أو يلعب بعقلك البائع بالمحل أثناء الشراء؟

من ناحيه البياع هو يقرفني هههههه ومرات كتير اشتري عشان ارتاح منه
بس انا اكتب قائمة باللي مدحوه البنات واشوفه بالمحل اذا عجبني شريته










*هل تجدين صعوبه بالتعامل مع البائعين اثناء الشراء ؟ وهل تفضلين وجود عماله نسائيه بالمحلات ؟مع ذكر أسم المحل إللي تفضلينه ؟


اجد صعوبه اول شي يضايقوا الواحد ويجلسوا يلحوو عليه على منتجات مانكون نبيها او ماركة ماافضلها
وكمان لو بائعة افضل لانه البائع يقرب ويجلس يشرح ويحط الالوان وهالشي يضايقني
احب سنتر بوينت الاقي فيه كل اللي احتاجه



*هل تستعينين بخبيرات أو خبراء التجميل .. أو تفضلين الأعتماد على نفسك ؟

لا مااستعين باحد




*منتج إللي تعتقدينه سحري بعالم الميك أب ( من مقتنياتك وبالصوره)؟

احب فونديشون ماكس فاكتور ومااستغني عنه الوحيد اللي مايسمرني

ونفس الماركة البلشر الكريمي رهيب

المسكرة مرتاحة جدا مع ميبليين

والارواج احب ماكس فاكتور ثابته وحلوة
واحب شدوهات نكس اللي تيجي 3 الوان بعلبه وشدوهات ميبلين
وقلوسات نكس

اتوقع مابقي شي






*منتج تخفينه عن الآخرين , وماودك أحد يكتشفه ... وإن وجد بالصوره ؟ ( وأعتبريه حصري لشمواه ) ؟
لووول
مافي





*منتج ماتستغنين عنه نهائياً ؟
كريم المرطب و
المسكرة




*هل واجهتي بيوم من الأيام أنتقاد على مكياجك .. سواء إيجابي أو سلبي ؟ شاركينا به .

عمتي تحب طريقه مكياج عيوني











*هل ترفضين الظهور على الملأ بدون ماكياج ؟ أم مقتصر على أشخاص معينين ....


لا ماارفض بس مااحب
احب تشوفني الناس وانا مرتبه



*تكرهين المكياج الكوفر .. ماتحبينه , تنتقدينه ... لكنك تمارسين هذه الجريمه بحق الجمال ؟

مافهمت بس مااحب المكياج الثقيل ابدااا




*من وكالة أنباء قيل وقال .. قالوا : إللي تحط مكياج شينه , وإللي ماتحط زينه ؟ عبري عن وجهة نظرك , وهل تعتقدين أن وراء هالمقوله قلبا حاسد , أم يداً لا تتقن الماكياج


مو الكل الحلوة تبين بالمكياج وبدونه








يسلموووو قلبو موضوع حلووو

 

[كيم كارداشيان]

*مارأيك بكلام الشاعر ؟ وهل فعلاً الماكياج خداع ؟

لا موب دايما .. أنا عندي يقين إن كل بنت فيها جمال خاص .. بس المكياج يغطيه أو يظهره بحسب الاستعمال :rerrerek:
​

*كثيراً مايساء أستخدام الماكياج بوطنا العربي ، من وجهة نظرك كيف يساء أستخدام الماكياج ؟​

استعمال الميك أب مرتبط بالثقافة .. وحتى الملابس والأكل .. وكل شيء مرتبط بالثقافة .. المجتمعات الغير مثقفة يسود فيها الميك أب الغير متناسق .. والعكس صحيح ..

*قبل 3سنوات من الآن درج الماكياج بالألوان الفاتحه , وظن البعض إن الموضه هي الماكياج الخفيف ؟ مارأيك أنتِ ووش كنتِ تحسبين الموضه ؟<== هالسؤال ملغوم .​

الالوان الفاتحة والغامقة موجودة ف كل موسم .. بس اللبس والمناسبة والمكان والوقت يحددون أيهما أفضل للاستعمال

*هل أنتِ من أنصار ماركات الماكياج الباهظ الثمن , أم الماكياج الإقتصادي .. مع ذكر السبب ( الرجاء مراعاة أذواق الأخرين ) ​

بشكل عام مكياجي كله ماركات .. بس أستعمل أحيانا أشياء رخيصة .. ومن وجهة نظري اللي للاستعمال اليومي أحبه اقتصادي وخفيف .. واللي للمناسبات أحبه طويل الامد ولونه حلو فيكون غالي ..
وعموما الاساسات والكونسيلر وأدوات التغطية ورسم الملامح أخذها غالية علشان أضمن جودتها ..

*ماهي ميزانتيك لشراء الماكياج ؟ ومتى تشترينه ؟ وأكثر شيء تكررين شراءه ؟​

ما عندي ميزانية محددة .. بس ما عندي ادمان شراء .. أشتري اللي أحتاجه وموب مهم سعره .. وأشتري مرة شهريا أو كل شهرين بحسب نواقصي .. واللي أكرر شراءه هو الشيء اللي يعجبني وما ألقى شيء بجودته .. وعادة يكون كونسيلر

*هل تؤثر اعلانات المواقع والمجلات .. أو شعبية منتج ( فلانه وعلانه مدحته ) أو تتبعين هواك .. أو يلعب بعقلك البائع بالمحل أثناء الشراء؟​

بصراحة أكثر شيء يأثر فيني اعلانات المجلات .. لأني وايد أقرى مجلات نسائية وصارت لي كمن مرة اني حبيت منتج من الصورة المنشورة وحطيته على الويت ليست وشريته ..
كلام البنات ما يأثر فيني وايد لأني أحس اني أعرف اختار لنفسي أفضل من غيري إلا إذا كانت وحدة خبيرة فعلا ومتمكنة وأتابعها من زمان مثل أم علي أو عز النفس يغنيني أو مطيرية أو أي بنت من الاسماء اللامعة في المنتدى وفي الغالب مشترياتهم تثير حماسي وأشتري شيء معين من مدحهم بس على شرط أكون أحب البارند , لأن فيه ماركات ما أحبها وما أصدق انها تنتج شيء سنع مثل بينيفيت!
بالنسبة للبياعين فما يقدرون علي .. لأني أشطر منهم باختيار مكياجي :ggdw:

*هل تجدين صعوبه بالتعامل مع البائعين اثناء الشراء ؟ وهل تفضلين وجود عماله نسائيه بالمحلات ؟مع ذكر أسم المحل إللي تفضلينه ؟​

أحب أتعامل مع الحريم بكل شيء .. أحس براحة لأني أتحرج شوي من الرياييل بحكم تربيتي مع إن دوامي مختلط بس ما أخالط الرياييل إلا بحدود الشغل ..
أحب أشتري من سيفورا وبوبي براون .. وباريس غاليري ,, وهارفي نيكلز ودبنهامز .. ومن السوق الحرة أحب أغراضهم واااايد وعموما أحب أتشرى ف دبي أكثر من بوظبي مع إني من أهل بوظبي بس الصراحة مولات بوظبي ما تنظاق من الشباب :eh_s(11):

*هل تستعينين بخبيرات أو خبراء التجميل .. أو تفضلين الأعتماد على نفسك ؟​

أروح الصالون في عرس حد من أخواني أو خواتي .. أو مناسبة خاااصة جدا جدا .. وغير جيه بروحي أحط مكياجي حتى لأعراس هلي ..

*منتج إللي تعتقدينه سحري بعالم الميك أب ( من مقتنياتك وبالصوره)؟ ​

ما عندي شيء سحري .. بس فرش المكياج ممكن تغير تأثير أي شيء تستعملينه .. وهي فعلا العصا السحرية لأي مستحضر :rerrerek:

*منتج تخفينه عن الآخرين , وماودك أحد يكتشفه ... وإن وجد بالصوره ؟ ( وأعتبريه حصري لشمواه ) ؟​

شمواه!!! جنه هذا اسم منتدى ثاني ؟
ما عندي طبعي أحب أنصح وأخبر وأقول .. أي شيء زين أسوي عنه إعلان .. وأحب الكل يستعمله .. ويمكن أكثر شيء أمدحه مؤخرا ماله علاقة بالمكياج .. هو شامبو دوكراي لتساقط الشعر ,, فعلا منتج سحري .. :eh_s(7):

*منتج ماتستغنين عنه نهائياً ؟​

واقي الشمس .. وبعد من ماركة دوكري ..

*هل واجهتي بيوم من الأيام أنتقاد على مكياجك .. سواء إيجابي أو سلبي ؟ شاركينا به . ​

عادة أحصل مدح دايما .. بس يوم استعملت واقي ايفين الملون + شوية من فول كفر ميك أب فور ايفر .. الكل سألني عن لوك البرونز .. مع إني ما كنت قاصدة أسوي برونز .. بس طلع برونز راقي ..

*هل ترفضين الظهور على الملأ بدون ماكياج ؟ أم مقتصر على أشخاص معينين ....​

لا عادي .. ممكن أداوم بدون ميك أب .. ف رمضان أداوم بدون ميك أب ,, وإذا بشرتي تعبت أداوم بدون ميك أب وإذا بسوق مسافة طويلة ما أحط ميك أب .. وإذا بسافر بالطيارة مسافة طويلة ما أحط ميك أب إلا مرطب وبودرة وماسكرا

*تكرهين المكياج الكوفر .. ماتحبينه , تنتقدينه ... لكنك تمارسين هذه الجريمه بحق الجمال ؟​

الكفر موب جريمة .. بدليل معظم نجمات السينما يسوونه .. عدن اختيار الالوان المناسبة هي الجريمة .. بس مع ذلك أنا مكياجي بشكل عام طبيعي ونيود يعتمد على إبراز الملامح .. وإضاءة الويه ..
في المناسبات أحط مكياج أقوى طبعا .. بس يكون وسط طبيعتي ما أحب أسوي مهرجان في ويهي بس أكيد أحب يكون شكلي حاطة ميك أب منسق وراقي ومبرز جمالي

*من وكالة أنباء قيل وقال .. قالوا : إللي تحط مكياج شينه , وإللي ماتحط زينه ؟ عبري عن وجهة نظرك , وهل تعتقدين أن وراء هالمقوله قلبا حاسد , أم يداً لا تتقن الماكياج​

ممكن .. بصراحة ممكن تكون اللي قالت هالمقولة ما تعرف تحط ..
لأني أشوف العكس بصراحة .. أشوف اللي يحطن ميك أب هن حلوات وعارفات جمالهن ويقدرنه .. بعضهن يسيئن التقدير له .. وبعضهن يحترمن حدود جمالهن ..
بس موب معنى هالشيء إن الل تحط موب حلوة .. لكن خلينا نقول إن إحنا بنات واهتمامنا بجمالنا أمر طبيعي .. ويفترض البنت تهتم لجمالها حتى لو كانت متدينة ومرباية تربية صارمة يفترض تتعدل وتتجمل قدام ربيعاتها وأهلها وزوجها .. وحق نفسها بعد .. لأن التجمل يعزز الثقة بالنفس ,,

​

 

[tea_rose]

:yaaaaaarb:
شكرا علي الشعر الاكثر من رااااائع
بس المشكلة اسئلتج يبي لها اجااااابات
انة بالدوام
:bbbiu::bbbiu::bbbiu:

 

[عزوتي خمس صقور]

لي ردة​