ميزانيتي ما تساعد ومضطره اسوي استقبال!!

[مشتطـه]

بصراحه انا طقيت الناس بالطوفـه



اللي بيتحجى فداه ذنوووبي


من اسويله لعوير و زوير

لا وبالاخير بيقولون وعووووو يا ذووقها


شحقة اعور راسي واكلف على عمري على ناس داشه مليون استقبال وما ردها بتنتقد

انا طالبه يوم ولدت و الريال متكفل ب 1000 دينار ولادتي ودكتوري وكل شي
بس مو ملزووووم ولا من حقي اخذ من فلوسه عشان الحريم



احسن شي الـ طاااااااااااااااااااااااف

اقط 70 دينار والا 100 على ورد يومين ويخيس

والا على بالونات يوم وتنبط !!!


والا على كيلو حلو ب 43 دينار !!!!

والا على بووووفيه من كل شي نوع حلو وفطاير

شحقة التفقق


كل واحد ومقدروووه
مو ملزوم يهق نفسه عشان ناس فسقااانه

انا هذا مستواي محد عاجبه يقضب الباب
مايشرفني حضوووورة


حجزت جناح الثريا ليلته ب 190 بالسلام شحلوه يبيض الويه

يبت كيلوين حلو الكيلو ب 14
يبت موالح وجاي وقهوة
وتوزيعات ناعمه وذررربه


لا بالونات ولا ورد ولا مفارش ولا صواني ولا شي
كل شي بسيط
محد مدح ولا احد ذم

اهتميت بشكلي انا جدامهم بس

 

[مشتطـه]

انا توزيعاتي من نودي هني بالمنتدى وياانا
سويت 90 حبه بس

 

[مسك اسود]

المهم تقومين بالسلامه والباقي كله سهالات
كلميني على الخاص ودي اساعدج

 

["*آآآنؤؤؤقهـ*"]

ماقصروا البنات

 

[Sugar cube]

حبيبتي لا يكلف الله نفسا الا وسعها

اهم شي راحتج و سلامتج لا تضغطين على نفسج

بس اذا مضطره تسوين استقبال اصلا حلاته ناعم و راقي بعيد عن الخبه

اخذيلج كفر ناعم و ذرب زيدي عليه كوشيات ناعمه بتطلعه و لا بحسون انه عادي

او كفر ناعم و ثرو يبرزه بدون كلافه و لا خبه و لا شغل المشاغل اللويه

مو شرط تحطين ورد و اذا تبين اكتفي ابوكيه ناعم و اختاري الورد اللي ما بكون غالي

الحلوو اختاري اللي يكون طعمه حلو و سعره زيين

قهوه و جاي

الصحون تلقين بوايد اماكن حلو و رخيص حتى لو عندج من قبل او عند امج او خواتج طقم ذرب استخدميه ترا محد بثبت المهم يكون عاجبج

العصير و الموالح اخذي بحدود ميزانيتج

ماله داعي بلونات و هالسوالف اصلا ارقى بدونهم

التوزيعات احس صارت شي قديم لا تحطين

خلج واثقه ان البساطه تحلي الامور

 

[قشطـــة]

ماحب هذي السوالف مووووووول

حلو ومالح فطاير قهوه شاي عصير وبس

لا مفرش ولا ورد ولا شخبطان من هذا كله

المهم اطلع انا والبيبي من المستشفى بسلامه والحمدلله والشكر

 

[حلآوهـ حمرهـ]

مب شرط تضغطين على نفسج سوي اللي تقدرين عليه ..
وزين انج مابتسوين استقبال فالبيت عشان ترتاحين كافي البيبي بيستهلك وقتج وصحتج ..

انا بقولج اختي شو سوت كانت متازمه نفسج واخر الشهر وعندها عيال بعد ..

خذت طقم بو نفر من هوم سنتر واستخدمته بنفاسها عقب ..

حلويات بسيطة وفطاير نحن طلبناها لها .. شاي وقهوة
توزيعات بسييطة .. علبه بلاستيك داخلها صابونه اطفال وفوطة صغيرونه وجوكليت وبيزات لو قدرتي ونثرت فيها ورد مجفف ولفتها بشرايط زرقا وبس

والجلابيات اللي لبستها بروحها فصلتها خذت قطع ودانتيل وركبتهم ع كيفها وماكلفها شي

 

[شيخه عرب]

الله يقومج بالسلامه ما قصرو خواتنااا

 

[Stillness]

اي والله ماقصرتوا يزاكم الله خير

انا قررت اسوي وايد ناعم بدون توزيعات وبالونات وسوالف بس بشتري طقم مطارات وبايالات وفناجيل وحلو ومالح وعصاير وطقم صياني اهم شي الذرابه وتناسق الالوان ومابقى غير الكفر ودراعه ستن وكان الله غفور رحيما ..