ميزانية سفر .................. موضوع نقاش خاص بالكويتيات

[شهدQ]

فكرتي تسافرين










لازم ميزانيه




كم كلفتك سفرتك ؟؟ وكم كان عدد اسرتك ؟؟؟





كم يوم ؟؟وين سكنتي ؟؟


هل يعتبر المصرف راهي ام انه فقط للسياحة من غير تسوق



هنا تجربتك تنفع غيرك للي حابين يسون ميزانيه لدوله مازوها وينفعك اذا حبيتي تتعرفين على الميزانية المطلوبه لك اثناء العزم على السفر وشد الرحال .................؟




النحيسه اهي الي تدخل وماتتفاعل وتجاوب وادري ان الاغلب كريمات

 

[كي كي]

مشاركة: ميزانية سفر .................. موضوع نقاش خاص بالكويتيات

والله الموضوع عجيب ومن زمان بخاطري نفس هالموضوع الروعه بس ودي افيدج بس والله سفرتي حق ماليزيا السنه اللي طافت ما دفعت فلس احمر بس لما رحنا صرفت من معاشي بعض الاشياء واحنا هناك اشتهيت اصرف مع العلم انه ريلي ما كان يرضى

 

[زهور علي]

مشاركة: ميزانية سفر .................. موضوع نقاش خاص بالكويتيات

ميزانية السفر تعتمد على عدة اشياء اولها الوجهه يعني نوع البلد اوروبا او شرق اسيا والجزر او امريكا او بلد عربي+ عدد افراد العايلة + مع خادمة ابدون+ الفترة الى بقدونها + الفندق كم ستار

 

[mooomooo]

مشاركة: ميزانية سفر .................. موضوع نقاش خاص بالكويتيات

موضوع واااايد حلووو وانشالله يفيد الكل

 

[شهدQ]

مشاركة: ميزانية سفر .................. موضوع نقاش خاص بالكويتيات

شكرا حبيباتي

انا ببدأ

الوجهه ماليزيا

عدد الاشخاص 2 انا وزروجي

التذاكر 220 للشخص

والسكن الليله تقريبا اعتقد 23 دينار بالتايم سكوير بس روووعه وخمس نجوم وصاير نظام سويت غرفة نوم وغرفة جلوس واهو طبعا بالعاصمه كوالمبور

اما في الجزيره بيبانغ نسيت اسمه بس اهو بشارع الليل روووعه ورخيص ادوره واحط اسمه


طبعا الجزيره للمتزوجين روووعه لانها كلها رحلات وطبيعه ووناسه صرراحه ماتنمل اما العاصمه تصلح للي معاها يهال

باليوم متوسط الصرف من 35 الى50 دينار ( اكل ومواصلات وتذاكر دخول ) يعني بدون تسوق

 

[أوركيد]

مشاركة: ميزانية سفر .................. موضوع نقاش خاص بالكويتيات

شهودة...

آنا رحت ماليزيا مع اليهال على السيلانية وااااااااااااااايد وفرت

سافرت 3 أسابيع بالتذاكر والسكن والطيران الداخلي والشوبينغ وكله كله ...ما يت 4 الاف

بس السنة اللي رحنا اوروبا بس آنا وريلي...جريب ال4 الاف كانت المصاريف...اذا السكن اسبوع بلندن يكلف الف دينار

آسيا واايد ارخص من اوروبا وأمريكا واستراليا ...

 

[mooomooo]

مشاركة: ميزانية سفر .................. موضوع نقاش خاص بالكويتيات

اي والله صاجة أسيا وايد رخيصة

ومفكره هالسنة اروح تايلند بس الود ودي أخذ عيالي كلهم وحتى الخدم



بس جنهم يقولون غلت تايلند

اللي توها رايحه تبلغنا

 

[شهدQ]

مشاركة: ميزانية سفر .................. موضوع نقاش خاص بالكويتيات

شكراmooomooo

شكرا اوركيد وفعلا اسيا ارخص وهم احلى من اوربا عالاقل مافيها هالمسخره بالشوراع


تايلند مارحتلها مفكره اروحلها بس متى ماادري بس ان شاء الله بحط موضوع عنها قريبا وراح يكون شامل

 

[mooomooo]

مشاركة: ميزانية سفر .................. موضوع نقاش خاص بالكويتيات

يعطيج الف عافيه يا شهدكيوووو
اي والله انا كل من اعرفها يمدحها لي وبخاطري فيها

 

[شهدQ]

مشاركة: ميزانية سفر .................. موضوع نقاش خاص بالكويتيات

يالله ان شاء تزورينها قريب وتيبيلنا الصوغه هههههههههه

 

[ام عبدالمحسن]

مشاركة: ميزانية سفر .................. موضوع نقاش خاص بالكويتيات

السلام عليكم
انا رحت تايلند واييد أعجبتنى بوكت روعه والفندق واييد حلو بس مشكلته بانكوك وصخه لها ريحه واكلهم موزين حتى شارع العرب وصخ وفي ناس تسممو في الاكل احسن شىء تقعدين 3 ايام بانكوك علشان السوق واسبوع بوكت اما ميزانيه على ابو العيال.

 

[شهدQ]

مشاركة: ميزانية سفر .................. موضوع نقاش خاص بالكويتيات

صاجه ام عبد المحسن انا سامعه ان العاصمه ريحتها كلش خايسه

 

[dreamy]

مشاركة: ميزانية سفر .................. موضوع نقاش خاص بالكويتيات

بنات صراحة ماليزيا روعة من حلاتها سافرنا لها مرتين ورا بعض
العاصمة كولالمبور تينن
و الجزر لانكاوي و بيننج هم يننون و الميزانية تلقين رخيص و تلقين غالي
احنا عندنا قاعدة لما نسافر ناخذ احسن طيران و احسن فنادق و احنا عايلة ماشاء الله

و تايلاند انا رحت بوكيت و انصدمت وايد وصخة تكرمون جلاب و قطاوة قاعدين يمج بالمطعم
شنو هذا؟؟؟؟؟
اول ما وصلنا رحنا منتجع الهوليدي ان حلو بس هذا شارع العرب على قولتهم يلوع الجبد
قعدنا بس ليلة بعدين غيرنا رحنا katatani beach هذا بيتش بعيد و هادي يعني قمة الرومانسية
وطلبي من الفندق ينضم لج رحلات بحرية للجزر و انا شاء راح تشوفين مناظر قمة بالجمال

 

[جكورة]

مشاركة: ميزانية سفر .................. موضوع نقاش خاص بالكويتيات

السفر يبيله ميزانيه سنعه للتسوق والهدايــــــا والمطاعم والتمشي....... يعني حلاته الوحده تسافر راهيــــه مو حدك حدك ..... أهم شي الفندق النظيف والطيران المضمون مو ترانزيت ولاأرخص الخطوط.... جم مرة حصلتي سفرة لماليزيا وتايلاند بس زوجي يقول ترى السفرة محدود مانبي هدايــــا أو تبذير طبعا ماوافقت فحولت على الإمارات وأخذت فندق خمس نجوم وتسوقت لي وللزمن وطبعا على الطيران الأمارتي وكانت سفرة تهبل وكل شئ كان راقي وكلفتني السفرة أنا وزوجي تقريبـــا 700 دينار خمس أيـــام.....

 

[شهدQ]

مشاركة: ميزانية سفر .................. موضوع نقاش خاص بالكويتيات

صاجه دريمي ماليزيا روووعه

جكوره انا اايد كلامك 100% والسفره اذا ماكنتي راهية تطلع من خشمك مو حلو التغشف بالسفر

 

[ظلال القرآن]

مشاركة: ميزانية سفر .................. موضوع نقاش خاص بالكويتيات

كل ديره لها ميزاتها
شرق اسيا رخيصه انا وريلي وعيالي على القطريه وسكنت باالحسن الفنادق
واحد منهم كنت ماخذه فيلا بمنتج وحمام سباحه خاص ومغطى وناسه صج ديره سياحيه
4000 مع المشترى الي بالهبل بس ها حررررررررررررر
اوربا فنادق تلوع الجبد والتكاليف الضعف بس ها طبيعه غير وبراااااااااد
عموما بالصيف بروح النمسا والمانيا ان شاء الله والحين قاعده ابحث بالنت ادور على شقق نظيفه احسن من السكن بالفنادق فنادقهم ضيجه

بنات الي تعرف عن شقق زلمسي تدزلي على الخاص

 

[mooomooo]

مشاركة: ميزانية سفر .................. موضوع نقاش خاص بالكويتيات

ظلال القرآن في منتديات مثل travel4arab.com
وبعد arab-traveler.com
هذي منتديات مختصه بالسفر .... تقدرين تسجلين وتدشين عالديره اللي انتي مسافره لها وتسئلينهم اللي تبين

والله يوفقج انشالله

 

[شهدQ]

مشاركة: ميزانية سفر .................. موضوع نقاش خاص بالكويتيات

صحيح كلامك مومو خوووووش منتديات روووعه وتوفي بالغرض

 

[ظلال القرآن]

مشاركة: ميزانية سفر .................. موضوع نقاش خاص بالكويتيات

ويه انا مطيحه بمنتدى العرب المسافرون
بس قلت ابي كويتين مجربين الشقق تدرون احنا الكويتين ذوقنا واحد

 

[شهدQ]

مشاركة: ميزانية سفر .................. موضوع نقاش خاص بالكويتيات

ظلال ترى الي يكتبون بمنتدى العرب المسافرون رايهم مابعده راي

اتكلي على الله ثم عليهم