ميزانية الولاده

[glby7sas]

السلام عليكم ورحمة الله وبركاته

بنااات اللي اولدو من قبل انا بكريه ومااعرف هالسوالف ممكن تقولولي جم حطيتو ميزانيه الولاده والاستقبال ؟؟ بحدود جم يعني

وبعد جم ميزانيه اهدوم الياهل ومستلزماته تقريبا جم طلعلكم


وبعد بالنسبه للتوائم هل تفرق قيمه المستشفى واشكثر تقريبا


بناات ياليت تفيدونا بهالموضوع والي ماتعرف ترفع الموضوع بدعوه حلوه وعسى الله ييسر علينا حملنا وولادتنا يارب

 

[نبض السعاده]

رفع لعيووونج

الله يهوون علي وعليج

 

[glby7sas]

شكرا نبض الله يرفع مقدارج يارب ويسهل عليج اللهم امين

باجي البنات وينكم فيدووونه

 

[كيميائيه]

بالنسبه للمستشفي
الافضل انج تحددين اي مستشفي بتولدين
وتاخذين منهم قائمه الاسعار
وتحطين في بالج ممكن قيصريه وممكن الاطفال يحتاجون شيشه

اما تجهيز البيبيات
جيبي ورقه وقلم وكتبي احتياجاتج لفتره الاربعين
والافضل دامهم توأم فقط،تجهزين لفتره الاربعين
تقريبا اذا بتجهزين بس لفتره الاربعين حطي بحسابج من 500-700 دينار
تشمل كل الاغراض من الى
ماعدا العربانه والمستلزمات اللي تحتاجينها بعدين
وممكن تجيج هدايا فلاتشترين

 

[كيميائيه]

والاستقبال حطيله 1000
يشمل الكفر - الخدمه- الحلو والموالح -جاي وقهوه -توزيعات -الورد
تزيين الغرفه

غرفه الاطفال
انا ماسويت غرفه فماعرف جم تكلف
بس راح تحتاجين كبت +سرير+صبغ الغرفه+سجاده +كرسي اوغنفه

وانا مثلج بجر وماكنت اعرف شي بس دورت بالنت وقريت
وحطيتلي جدول مشتريات
صج اني شوي كثرت بالهدوم
بس الحمدلله التزمت بالميزانيه اللي عندي

وربي يقومج بالسلامه وتشوفين عيالج بصحه وعافيه

 

[حياة 26]

اب لعبونج وربي يسهل علينا والولادة

 

[مرت الغلا]

ماقصرت كيميائيه كفت ووفت
انا اغراض البيبي مع السرير والكبت كلفتني ٦٠٠
الولاده حاطتلها الف
الاستقبال للحين مادري لان بعدني مابلشت بس عموما ماراح اتكلف فيه لان ماراح اييوني ناس وايد
ومابي اخب نفسي فيه فيمكن ٣٠٠ او ٥٠٠ تكفيني اذا مو اقل

 

[مرت الغلا]

ماقصرت كيميائيه كفت ووفت
انا اغراض البيبي مع السورير والكبت كلفتني 600
الولاده حاطتلها الف وبزيد عليها 600 احتياط
الاستقبال للحين مادري لان بعدني مابلشت بس عموما ماراح اتكلف فيه لان ماراح اييوني ناس وايد
ومابي اخب نفسي فيه فيمكن 300 او 500 تكفيني اذا مو اقل

 

[glby7sas]

مشكوره كيميائيه ماقصرتي

حياة الله يرفع مقامج يارب

مرت الغلا سمعت في بنات يجهزولج الاستقبال ب500 دينار





يالله يابنااات وينكم خلونه نستفيد

 

[مذهلة2013]

حبيبتي

اولا ولادات التوام غير عن الولاده العاديه
ثانيا استقبال عن استقبال يفرق تبين كشخه تبين عادي على حسب انتي الي تبينه
واذا توأم يعني بتجهزين اكثر من طفل واحد
نصيحه روحي مستشفى فيه ( حضانات ) احسن وعنايه للخدج والاطفال الصغار لانه نادرا نحصل وحده والده توأم تولد بالتاسع
وحاولي تجهزين نفسج من الاايام اليايه يعني للاستقبال كفر الولاده وجذي
ربي يسهل عليج

 

[baa6aa]

اذا كنتي تبين مستشفى خاص فالولاده تتفاوت من مستشفى لي الثاني بس شوفي تقريبا المواساه و رويال و السيف والسلام نفس الاسعار اذا كنتي تبين الغرف الكشخه حق الاستقبال يعني تحتاجين من 1500 لي 3 .. لان اذا لا سمح الله الولاده كانت قيصريه و تبين تسوين استقبال بغرفه كشخه راح تدفعين حوالي 3000
بس اذا كنتي ماخذه الغرف الحلوة الصغيره مو الكبيره حيل مالت الاستقبالات يبيلج 1500 اتوقع لان تتفاوت اسعارهم مع الولاده الاغلب يبدون من 700 تكون ولاده طبيعيه مع الغرفه يومين .. و كل ما كبرتي حجم الغرفه تدفعين اكثر
من ناحيتي اللي اشوفه مناسب اهوة دار الشفا الغرف مع الولاده تبلش من 500 ليلتين .. والملكي ب700 وكسور و الامبراطوري 1400 وكسور بعد وهذا كله ولاده طبيعيه بس اذا قيصريه تزيدين تقريبا 400 او 500 دينار

خلصنا من الغرف .. الحين حقج حق الاستقبال تبين كفر .. عاد انتي و ذوقج اذا تبين من اللي عندهم بوتيك يعرضون يبدون من 150 لي 600 و فوق وعلى حسب اختيارج .. او انج تركبين من زارا هوم او دبنهامز او هالمحلات اللي عندهم كفرات تركبين لج طقم يعجبج مع اضافات منج ..

السيفونير .. في بنات بانستغرام يبيعون لج سيفونير باسعار مناسبه او انج مثلا توزعين ككاو بعلبته من طقه قوديفا او ارماني بس اللي اعرفه ارماني العلبه اللي فيها ككاوة وحده ب2.500 او انج تطلبين لج ككاو من باتشي او اي مكان كشخه و تشترين علب من سرداب حولي وانتي تزينينه مثل ما تبين ارخص لج صراحه

والحلو او الموالح عليج الحسبه الكيلو او الدرزن من مكان لي مكان تفرق فهذي 200 تقريبا

والعصاير والخدمة و هالسوالف محلات العصير يسوون .. وانا مسويه فولو بانستغرام حق ميني بيري عنده خدمه الضيافه مع العصاير و كل شي واسعاره حيل مناسبه

وطبعا حقج تروحين طاهر او انور او القاسم او اللي يعجبج تشترين قمصان حق الاستقبال انا توني شاريه من طاهر مسوي تنزيلات و خذيتهم على 18 و 20 و كشخه حيل ما عليهم قاصر على امي ما صدقت السعر

بالنسبه لي .. في بنات بانستغرام اسمهم aj reception اتفقت معاهم وخلصت يسون الاستقبال كامل ب550 .. بس المطلوب مني السيفونير و الكفر و لبس الاستقبال و هدوم البيبي والحلو .. اهمه عليهم الصواني و العصير و المشروبات الحاره و الورد التزيين و يطلعون لج المكان لوحه فنيه واذا طلبتي الحلو عطيهم الفاتوره وبس ماعليج الا يوم الولاده تقولين لهم انا داشه الولاده و اهمه يتصرفون بالباقي انتي عليج جنطتج وجنطة الياهل
وبس جذي خلصنا المستشفى و الاستقبال

الحين عده الياهل

اذا كان في مجال انج تنطرين نطري لين السوق يصير تنزيلات وانا هذا اللي سويته و مو لازم انتي تشترين كل شي
انا مثلا شريت 5 بجامات حق الياهل مع المهاد و الفنايل الداخليه حق المستشفى و ياتني هدايا من حماتي و من امي بالاشياء الضرورية الثانية
غير رفيجاتي كل وحده قالت شنو احتاج تشتريلي بدل ما تقط فلوس على هديه غيرها راح اييب .. خليت رفيجاتي بينهم حطة و ياخذون العربانه و بنات عمي عده السباحه و والمميات و هالسوالف وجذي قسمتها منها تكون هذي هداياهم ومنها وفرت على عمري باشياء ضرورية

وغرفه الياهل انا شايفه غرف بايكيا تقريبا تكلف 250 وهذي انسب شي حصلته .. في اغلى باماكن ثانيه .. يعني الفراش بروحه يوصل 100 و 200 و 300 .. بس اللي ناسبني ايكيا صراحه
احس اني طولت عليج بس قلت اقولج كل شي بالضبط دام اني حاليا بهالحوسة و اذا احتجتي اي شي انا موجوده
واسعار المستشفيات و الغرف و الولاده تلقينهم بقسم التجمع على حسب اي مستشفى تبين

والله يقر عينج بشوفة ذريتج سالمه يارب

 

[glby7sas]

مذهله مشكوره حبيبتي زين نبهتيني مافكرت بسالفه الحضانات عبالي الكل عنده




بطه مادري صح جذي اقرا نكج او غلط ههههه مسكووره حبيبتي وايد وايد ماهقيت الولاده جذي مكلفه بصراحه امبي احس حتى لو ايمع مراح يكفيني كلش
اشوف في ناس ماتسوي استقبالات اثاري من جذي يكلف وايد بس عجبني سالفه البنات صج يفكونج وايد بدش عليهم بالانستقرام مشكوره حبيبتي

 

[شيخه كويتية]

الله يسهل عليكم حبايبي



��

الي تحتاج فازات عندي من الهولندي ورد مع كفري عارضتهم للبيع حياكم

 

[مذهلة2013]

مذهله مشكوره حبيبتي زين نبهتيني مافكرت بسالفه الحضانات عبالي الكل عنده

حبيبتي يمدحون حضانات مستشفى السيف
لانه هالمستشفى مادحه دكتور اختي

 

[glby7sas]

تسلمين شيخه كويتيه



مذهله صعبه السيف بصراحه غرفهم غاليه وانا ميزانيتي اتوقع حده حده

 

[مذهلة2013]

تسلمين شيخه كويتيه



مذهله صعبه السيف بصراحه غرفهم غاليه وانا ميزانيتي اتوقع حده حده

للامانه حيييل غالي الحضانه الوحده باليوم من 500 الى 700 دينار
بس يقولون ك عنايه للخدج وايد احسن بس اذا رحتي تشوفين الغرف تاكدي من حضانات المستشفى الي بتولدين فيه

 

[ديزاينر الكويت]

انا عن نفسي دار الشفا و بسسس
خذيت جناح الامبراطوري و سويت فيه استقبالي شوفيه بتوقيعي
و اقدر انسق لج استقبالج من الالف الي اليااا
و عن ملابس البيبي بحروة ال700 تكفيج كل شي لبس و احتياجات
و عن نفسج تكفيج بالكثير 300 غير ملابس طلوعج من الاربعين طبعا
و الله يسهل علي حواملنا الحلوين

 

[glby7sas]

مذهله مشكوره حبيبتي شسوي انا المشكله ريلي مايساعد كلش وله جان صرت راهيه بس الله يهديه


ديزاينر مشكوره حبيبتي وان شاءالله الله يسهل يارب بطلع على موضوعج بس مو الحين اقرر لانه بعدي بس اهم شي ابي احدد جم ايمع اول ماهقيت الولاده تكلف

 

[ام أسد]

عندج مستشفى لندن واايد حلووو رحتله وسالت عن الاسعار والحلووو المستشفى اتقطين الابرة تسمعين رنتها مافي ازعاج ولادة كاملة طبيعي يومين بالجناح الملكي ب٦٠٠ والكفر انا خذيته من وحدة مسويته عند ابرار الصولة خذيته ب١٥٠ والتقديمات باخذها من محل رهش بزاوية سنتر بلغي فكرة المعجنات وبحط ميني رينبو درابيل وميني قرص عقيلي مع الجاي لان اللي بييوني كلهم حريم كبار وحلووو قهوة كل مكان تلقين وورق عنب والتوزيعات اختي توها راحت دبي يابتلي ميني عطورات فرنسية احطه معاه كاكاو والكاكاو اخذه من مصنع بشويخ يسويه فرش جدامج الكيلوو ب ٧ ووحدة عند بياع الورد تزينه لي شغل ايدها عالحبة ربع دينار وطبعا التنسيق حق الاستقبال كل المنسقين مبالغين فيه اللي ب٥٠٠ واللي ب١٠٠٠ واللي ب٣٠٠ واهو كله ورد وشمعدان وشموع انتي شوفي افكار من النت وسوي نفسه والاكسسوارات موجودة بسنتر بوينت وكله تنزيلات واطقم الضيافة اللي تشوفينها بالانستقرام على ٨٠ و١٠٠ بالاسوقة الشعبية على ٥ و٨ يعني ماتكلف ولادتج كاملة ٨٠٠

 

[ام أسد]

عندج مستشفى لندن واايد حلووو رحتله وسالت عن الاسعار والحلووو المستشفى اتقطين الابرة تسمعين رنتها مافي ازعاج ولادة كاملة طبيعي يومين بالجناح الملكي ب600 والكفر انا خذيته من وحدة مسويته عند ابرار الصولة خذيته ب150 والتقديمات باخذها من محل رهش بزاوية سنتر بلغي فكرة المعجنات وبحط ميني رينبو درابيل وميني قرص عقيلي مع الجاي لان اللي بييوني كلهم حريم كبار وحلووو قهوة كل مكان تلقين وورق عنب والتوزيعات اختي توها راحت دبي يابتلي ميني عطورات فرنسية احطه معاه كاكاو والكاكاو اخذه من مصنع بشويخ يسويه فرش جدامج الكيلوو ب 7 ووحدة عند بياع الورد تزينه لي شغل ايدها عالحبة ربع دينار وطبعا التنسيق حق الاستقبال كل المنسقين مبالغين فيه اللي ب500 واللي ب1000 واللي ب300 واهو كله ورد وشمعدان وشموع انتي شوفي افكار من النت وسوي نفسه والاكسسوارات موجودة بسنتر بوينت وكله تنزيلات واطقم الضيافة اللي تشوفينها بالانستقرام على 80 و100 بالاسوقة الشعبية على 5 و8 يعني ماتكلف ولادتج كاملة 800