موضوع ((اللاصفي)) {{هالموضوع تجميع لافكار لاصفي مبتكره }}

[منورة]

نيرو ثبتي هالموضوووع مفيد حيييل حرام مايتثبت ^ـــــ*

 

[عهود الحب]

هلا بنات
والله انتوا الي تبدعون
تدرون محد خالي من الافكار بس منو فيكم يشاركنا ويقول

حلوة فكرتج اللون الاخضر انا شفت مرة مطبقين اللون الازرق بالطبيعة وسبق قلت لكم عنها كـ لاصفي هم روعه
يكون قصة عقب المثير عن رحلة اللون الازرق بالطبيعة وقام بتلوين السماء بلونه الزاهي و بعدها سكن البحر ولونها بلونه الصافي
وكملي القصة حسب هدفج او حسب خبرتج
المهم انه في ولد شاطر كان واقف ويشوف بعدها قام بتلوين لوحته بها واحضرها للمعلمة لتشاهدها وطلعي عاد من ورى السبورة لو ورقة بيضا وعليها شخابيط باللون الازرق


وتقولين لهم اطفالي يا اطفالي تحبون نسوي مثله < بالفصحى لو سمحتم ههههههههههههههههههه
بيقولون اكيد يا ابلة قولي يالله قوموا نتوزع مجموعات
تكونين حاطة مو لازم عالطاولات يبه خليها زولية وحطي لهم اوراق بيضا و قطن ابيض وازرق < رسم عن السحاب ويزينونه
حطي الوان اصابع ازرق بازرق

حطي قص ولزق ازرق مرسوم عليه سحاب و سمج و خطوط كأنها بحر و هكذا وخليهم يقطعونة ويركبونه بورقة كبيرة a3 يعني لوحة فنية وخلي اثنين او ثلاثة الي يشتغلون فيها ومعاهم المقصات والصمغ وهكذا

حطي تجربة استنباط درجات اللون الازرق عن طريق الالوان المائية

وخليج معاهم



حطي مشروع فني خل يسووون سيارة من كرتون الجواتي عزكم الله وتوايرها مغاطي بطول الماي
سووا على قولة منورة مراوح ورقية من اوراق لونها ازرق


سووا اللي تبون بس لازم المشرفة يكون عندها خبر اوف كورز




وموفقين بهالفترة صدقوني روعه وخاصة اذا تعرفون بالباوربوينت تخلين اللون ينترس جدامهم لايف عن طريق ضغطة زر هم روعة

 

[عهود الحب]

انا بعد مرة جربت فكرة التجارب العلمية بالهواء الطلق
وكانت شنو اول اسبوع عن الماء { طفو / خواص الماء / الماء والزيت }
والاسبوع الثاني { الهواء يحرك الاشياء وتجربة ثانية عن فوائد الهواء او انه له حيز بس احنا مانشوفه بس من خلال الاشياء الي يعبأها نشعر بوجوده } < نسيت اسم التجربة الثانية :/
اعتقد للهواء حيز < رقعوها عاد



التجارب الماء خلي رشودة هي المنبة ولا اغنية قطورة تهبل كبداية للدرس وعقبها دشوا على العالم الصغير طفل يكون فلتة الصف وشطور وانتي مدربته بتكلم ويسولف معاج كأنه هو الي يسوي التجربة


وتكونين سويتي نموذج عقب عاد حاطة انتي صحون الوجبات الشفافين وحاطة لكل طفل كوب ماي و حاطة عنده شغلات [ بلاستيك فلين ورق خشب حديد ] ويطبقون الطفو
التجربة الثانية مولازم الكل يطبقها لأنها توصخ خلي كل مجموعة لها تجربة
تجربة الماء والزيت انه الزيت ثقيل وينزل تحت والماي يرتفع فوق


خواص الماء انه لارائحة له ولاطعم ولالون طبقيها شلون ؟؟؟ حطي بطول ماي
بطل فيه قطعة فحمة صار اسود < غير صالح للشرب
الثاني فيه حطي قطعة نتيفة يابصل يا ليمونة يا اي شي له زفرة عشان غصب يشمونها له رائحة نبتعد عنه

الثالث فيه ملح ناعم بيكون له طعم غير صالح للشرب


وهكذا الين يوصلون لبطل ماي كبير فيه ماي صافي وصبي لهم خل يشربون بالعافيه


وطبعا لاتنسون بنات سلوكيات الشرب بسملة دعاء + حمد


وعقبها نظفوا المكان ردوا للصف




الهواء :



حلوا لو كل طفل يلبس لبس اراجوزات ومعاهم تفافيخ
ترى الاطفال يحبون اللبس وانا هم احب البسهم شخصيات
لأنه لما الطفل يلبس زي ترى يتشجع ويصير جريء ويمثل
وجربوها وشوفوا



خليهم معاهم تفافيخ وخل يتفخون معاج تفاخية وحدة ثنتين عن طريق المنفاخ شنو تشوفون شنو داخل البالونه بطليها وطلعي الهوا بوجه طفل بيقولج هواء

ثاني تجربة سأليهم وين يكون الهواء موجود ايضا الكرات { كرة بلاستيك قابلة للنفخ }
ناقشيهم جيدا الوان الكرات وانفخي انتي اذا استلزم الامر لاتخلون الطفل ينفخ شي لأنه فيها نقد عليكم


حطي صور تواير السيارات او سيارة بلاستيك وقولي لهم عن التواير انه يملأها الماء


اطفال هل نرى الهواء ؟ لا ولكن نشاهد اثره على الكائنات


تعالوا خ نشوف الاشجار شلون تتحرك واكيد روضتكم فيها زرع
منو يحركها خل نقلدها


عقب دشوا بأنه الهواء يحرك الاشياء لو تقدرين تورينهم حبل الغسيل عليه ملابس مبلولة شوي لولا الهواء ما نشفت الملابس
المراكب الشراعية لولا الهواء ماتتحرك
الاشجار والازهار تتحرك ايضا بالهواء ولولا الهواء لما انتقل لقاح الزهور من مكان لمكان وهكذاا

حركوا فرارات الهواء بالهوا طيروا فقاقيع الصابون بالهوا




وهكذا

 

[عهود الحب]

لاصفي مشروع فني
عمل فرارات هوائية

الكل يطبق معاج مو مجموعة واحدة بس



كل طفل له ورقة ملونة احلى كشكل من الابيض
وتكونين مصورتها بالتصوير نقطة بالنص او دائرة كبيرة شوي ومخططة خط بكل زاوية
عطي كل طفل مقص ووخل يقص عالخط وعقب جيبوا عود مصاص ونلصق الزوايا عالنقطة الي بالنص وعقب نلزق المصاص ونشوف شكله
خل يزينونه



وبس




مشروع فني عمل اقنعة وجوه



رسمي شخصية القطرة وحطي دايرة العيون خل يقصون القطرة ويقصون العيون والحلج وعقب ركبوا خيوط او عود بلاستيك على جانب على اساس يمسكونها جدام الوجه اذا ماعندكم خيط مغاط او سير على قولتهم




تبون بعد ؟ افكار لمشاريع


عندكم افكار قولوا لنا

 

[ياسمينا]

اللاصفي هو الخروج من اسوار الفصل الى فضاء الابداع بس عاد مو فضاء الكون الخارجي
ومافيها شي لو تخلينها فترة حلوة وخيالية او سينما ومشاهدة افلام تربوية
بس خلي في لها خطوات واهداف

ماشاءالله روعه افكارج :ggdw::ggdw:

 

[طيرشلوا]

انا سويت مع عيالى ايام خبرة صحتى وسلامتى العاب حركية عن الخبرة ولعبانهافى الساحة وكان حدة وناسة واسمعى ضحك الاطفال

صج صج وناسة ورروعة

 

[طيرشلوا]

و تقدرون تسوون العاب حركية لخبرة الماء والهواء واهم شئ تكون برا الصف مع هالجوالحلو الحين

 

[thbanh^_^7ayrh]

هاي عهود الحب ومنج نستفيد ابي اقدم لاصفي العاب التربويه شلون خطواتها وعطيني مثل لعبه طبقتيها على الاطفال

 

[_مجروحه_]

خلووووووونا نفعل هالموضوع من جديد
همتكم يالحلوين

 

[kokah]

ماشاءالله عليكم وايد حلوين ادروسكم بس ودي صراحة اطبق مال الالوان بس ابي طريقتة بالضبط

 

[Om-FahooDy]

هلا بنات
مشكورييييين عالافكار الحلوة

نبي لخبرة الجمعيه التعاونيه

 

[راقية باخلاقي]

بنات

انا شريت من ام سالم سى دي

والله حلو وفيه افكار مرتبه خوش شي انصحكم فيه وادعولى

اسمة


الانشطة اللاصفيه المبتكرة

 

[فطيرة فراوله]

انا حضرت ورشه عن اللاصفيات المبتكره
منها رحله في حديقة الرضه ويتعرفوون على كل شي فيها خصوصا ان الجو حلو هاليومين
لا صفي الحيوانات يلبسون لبس الحيوانات وكل واحد يتكلم عن الحيوان الي يحبه وشنو فايدته اذا له فوايد لنا
لا صفي الالعاب الشعبيه القديمه عن الالعاب الشعبيه كلها ويقلدونها ونلعب معاهم
والصراحه يعطيكم العافيه خوووش افكاااااااار

 

[عهود الحب]

اي خوش فكرة فطيرة فراولة الله يسامحج
اشتهيت الفطاير بهالوقت :/

 

[فطيرة فراوله]

يحليلج عهوود هههههههههههههههههههههههههههههههههههههههههههههههه
الصراحه الموضوع مفييد وحلوو وقيم ولاازم يتثبت ويتفعل علطووول لذلك
للرفع للرفع للرفع

 

[عهود الحب]

شفت لاصفيات مبتكرة وحبيت اجدد العهد بهالموضوع
لأنه حلو وعزيز على قلبي < اقعد عالتعبير


بالنسبة لطريقة الالعاب التربوية للي سألت عنها ترى بسيييييييييييييييطة
شخصية محبوبة من خلال مسرح العرايس
او من خلال اللبس تزور الاطفال
وتعطيهم بطاقة دعوة لزيارة ركن الالعاب التربوية وتكون باسم احسن طفل بالصف
وهناك يجد الطفل هدية كبيرة ومع الموسيقى يعطونها لبعضهم البعض ولما توقف الموسيقى توقف الهدية عند احد الاطفال


يبطل الهدية ويستخرج منها قطعة معينة
ووجه حزين
القطعة تكون من احد الالعاب وتقولين لهم الشكل { خلنقول المربع } حزييييييييين ممكن نساعده يااطفال
منو بيقولنا من وين اتى هذا الشكل
الين يتوصلون لركن الالعاب التربوية
وهناك نلاقي بقية اجزاء اللعبة
تقولين لهم اسم اللعبة
وتناقشينهم باجزائها والوانها
واحجامها
وفوايدها كلعبة بشكل مبسط عاد مو تدققون فيها


ومنو وفرها لنا
بلدنا الحبيبة الكويت
شنو واجبنا
لما نلعب ونخلص نردها لمكانها ونحافظ عليها من التلف والضياع
يلا نوقف وندعي لبلدنا
اللهم اجعل هذا البلد آمنا وسائر بلاد المسلمين



وبجذي حققتي كل الاهداف الوجدانية والسلوكية والدينية والوطنية بشكل مبسط
علميهم طريقة اللعب

وبعدها قسميهم لاربع او 3 مجموعات حسب عدد اطفالج
وعقبها خليهم يلعبون على نفس اللعبة
وتكونين متسلفة مثيلاتها من بقية الصفوف جيرانج


وبعد ماتخلصون ترتبون المكان وتردون الالعاب لركن الالعاب التربوية
وممكن تحطين اغنية عن اللعب
مثال لعبتي يا لعبتي
وهي نشيدة من قنة طيور الجنة تلاقينها بالمواقع
وفي شغلات تقدرين تثرين فيها الدرس من خلال المسابقات
وسلااااااااااامتج



ادري الدرس بسيط بس هذي طريقتي
وفي طرق اكثر تشويقا
لو احد عنده طريقة غير عني يقولها





للعلم الالعاب التربوية الجديدة غنية وثرية ووممكن الاستفادة منها بهالنشاط اللاصفي
بس احرصي انج تذكرين الاسم الصحيح للعبة التربوية

 

[عهود الحب]

شفت مرة لاصفي وحيل عجبني ويصلح لبلدي الكويت
لوحة كبيرة ورسموا علم الكويت
والالوان ملوت العلم بصموها باصابعهم الاطفال وايدينهم عن طريق الوان الاصابع
فهمتوني بنات ؟؟؟؟؟
الوان الاصابع بالوان العلم
وسووا مشروع علم الكويت عن طريق البصمة


وعاد طريقة العمل انتووووا وافكاركم





في بعد لاصفيات انا خاشتهم اذا تبون بطرحهم للعرض للكل
واللي تستفيد
تدعي لي بالولد الصالح الله يخليكم

 

[عهود الحب]

تسلمين فطيرة فراولة
كل مااشوف نك نيمج
اتلخبط
< بطينية

 

[فطيرة فراوله]

هههههههههههههههههههههههههه يحليلج يا عهود يبيييييييله عاد فطاير
يااااااااارب ياااااااارب يااااااااارب ارزق عهوود الحب الولد الصالح السليم المعافى كامل الخلق والخلق يا ارحم الراحمين يالله وانشالله انا بعد وياج يرزقنا بتوووم اولاد ياااااارب
والله لا يحرمنا من افكارج يحليلج والله

 

[ندى الرياض2]

جزاكم الله خير