من فينا الغلطان ؟؟ عطيني رايج بسالفتي مع صديقة عمري .....

[آيه ^_^]

السلام عليكم ورحمة الله وبركاته
















بقولكم سالفتي مع صديقتي وأبي منكم رأي صريح من فينا الغلطان أنا ولا إهي؟؟

القصة ومافيها
أن صديقتي معاي من المتوسط
ودخلنا الثانوية مع بعض
وبعدين الجامعة
وبعدين اشتغلنا مع بعض في مكان واحد


واللي صار أن ياني نصيبي
وماحبيت أتكلم واسوي خبه لي بعد مااملج
لاسمح الله يطلع شي بالفحص الطبي أو يطلع الصبي عليه كلام
شلون ؟؟
أتكلم عن ولد الناس
وبعدين مايصير نصيب
ويطلع كلام علي وعلى الولد -مثل ماصار معاي في خطبة سابقة-
المهم
الحمدلله صار النصيب
وسبحان الله الأمور تسهلت لدرجة أن ملجت بعد الفحص الطبي باسبوع
والعرايس يعرفون حوووووسة العروس
تسوق
ولووويه
وتعب
وطلعة مع الريل حق الدبل

تخيلو هالحوسة تخلص باسبوع؟؟

المهم أن ماداومت إلا بعد ماملجت باسبوع
يعني اسبوعين ماشفت ولا كلمت احد
وخلالها كان جهازي مصكر لأن موفاضية أحك راسي موبعد أتكلم بالتلفون

داومت بعد اسبوعين غياب
شفت البنات بالدوام
قلت لهم أن تزوجت

الكل باركلي ومستانسين وشويه ويرقصون من الفرحه
إلا رفيجتي!!

باركتلي من غير نفس
وبعدين راحت قعدت بروحها بالسيارة!!!

رحت أشوف شفيها؟؟
ولا قاعدة تبجي !!!!!!
كأن أحد ميت
قلتلها عسى ماشر
قالتلي
أنت من متى مالجة
قلتلها اسبوع وويهي جذي

وتعطيني نفسية
قالتلي يعني ماتعرفين ترفعين السماعة وتقوليلي !!
قلتلها كنت مشغوله حيل ومافضيت
واشتغلت علي تحقيق وبالاخير قالتلي عفوا أنا مومصدقتج !!

يعني انا بجذب عليها عشان شنو مادري
بايقة ريلها انا ولا شنو؟!!

المهم قلتلها لاتصدقين وماتشوفين شر
وخليتها ومشيت ..

هذا اللي صار باختصااااار شديد

وعلى فكرة قبل شهر من السالفة
رفيجتي كانت قاعده بالدوام تسولف وقالت بالحررررررف الواااحد
أنا لما اتزوج ماراح اعلم أن مخطوبة ولا قص مهري اليوم ولااا شي
بعد مااملج واخلص راح اقول ان تزوجت
بالضبط وربي فوقي يشهد
هذا كلامها اللي قالتها بالضبط واجهتها فيه جان تتبلعم ماعرفت تتكلم..

والحين حضرتها تبي تحضر الخطبة وكتب الكتاب
ولا تبجي لما عدساتها تطيح وتقولي انت جذابه ؟؟!!

وشنو الشي اللي انا مجذبة فيه مادري وحياتكم

وياريت تعطوني رايكم منو الغلطان؟؟؟ أنا ولا هي؟؟
وتوافقوني ان موقف صديقتي سببه الحسد الله يكافينا الشر ولا لأ؟؟


:33_1185028183:
:33_1185028183:
:33_1185028183:

 

[عاشقه رويشد]

شوفي حبوبه عشان عمر ويه بعض حزت بخاطرها


انه ما قلتي وجذي


بس المفروض تعذرج

ولما بجت ماادري يمكن عشان تزوجتي قبلها واهيا لا لا حبيبتي انتي موغلطانه وكلنا ننششغل

المفرووض تقدر


وسالفه انها اجذبج هذي صج مو حلوه والله يهدي النفوس

 

[عاشقه رويشد]

وصارت معاي رفيجتي ما قالت لي عن اخوها لما توفي الله يرحمه

وكانت لاهيه وياه بالمستشفي اول شي تضايقت بس عذرتها

وعادي اتصير يعني بس رفيجتج حساسه شوي

 

[حجيه هيونه]

اكيد لو انا مكانها بيحز بنفسي وافهم غلط

بس اهي وايد يعني كبرت الموضوع ماكان له داعي البجي ومادري شنو


عموما نطريها لما تهدا وكلميها مارضت ترد تركيها اهي ترد براحتها


والله يوفقج


ملاحظه : تصرفج صح انج ماتبين تقولين لاحد هذي حرية شخصيه وانتي لج اسبابج المقنعه فماله داعي تخلين احد يضايقج بخصوص هالشي

 

[نور دربي]

صراحه تصرفج صح وخاصه في امور الزواج والفحص الواحد مايعلم إذا من نصيبه ولا لأا


وصراحه يعني عشان انها رفيجة عمر اكيد حز بخاطرها شلون ماقلتي لها بس اهي اشوي كبرت السالفه

وماعليه جم يوم وانتو راجعين حق بعض

اهي اكيد راح تعذرج بما انه الامور صارت كلها بسرعه

 

[Tulips]

شوفي انتو اثنينكم غلطانين

انتي غلطانه لان انتو رفيجات من عمر ما كان فيها شي اذا في هالاسبوعين اللي انشغلتي فيهم تفضين نفسج دقيقه وتقوليلها عن اخبارج .. حتى لو ماكانت راح تقولج عن ملجتها لانه بالنهايه كل واحد يسوي بأصله.. بس الفرق انج انتي لهيتي ونسيتي واهي ماكانت تبي تقول من الاساس

اهي غلطانه انها مصرحه من قبل ان محد راح يعرف عن خبر ملجتها ليما تصير وبعدين تقوم تزعل منج .. اشوف مالها حق تزعل


وبما انج قلتيلها انها قايله جذي انتي سويتي اللي عليج .. وانتي ذوقتيها كانت بتذوقج ياه ( انهاه ماتعطيج خبر عن خطبتها )واللحين اللي فهمته ان البنت تبي تحضر ملجتج .. طبعا هالشي راجعلج اذا بتعزمينها ولا لا بس لاتشيلين بقلبج واكيد عرفت غلطها من جذي طلبت تحضر الملجه ولا تخلين هالموقف يخرب صداقتكم وعادي تصير مشاكل بين الصديقات

 

[سنـــــا]

انتي قصرتي بحق رفيجتج لأنها على قولتج رفيجة عمر يعني اكيد اوقات طويله قضيتوها مع بعض والزواج مو شي بسيط يطوف مرور الكرام وماتدري رفيجتج الا بعد اسبوع من الملجه ( يحقلها تتضايق منج ) .
واهي كبرت الموضوع من محبتها وعشمها فيج ولانج غاليه عندها ..اذا صج رفيجتج لا تخسرينها حاولي تطيبين خاطرها

 

[3emya_Berry]

حبيبتي انيت مو غلطانه اهي حزت بخاطرها شوي باج ربتييج وتكلمج عطيها شوي مجال تفكر بينها وبين روحها الي سوته غلط شكو تبجي وتولول الله يوفقج يا عمري

 

[الرشوف]

شوفي انتو اثنينكم غلطانين

انتي غلطانه لان انتو رفيجات من عمر ما كان فيها شي اذا في هالاسبوعين اللي انشغلتي فيهم تفضين نفسج دقيقه وتقوليلها عن اخبارج .. حتى لو ماكانت راح تقولج عن ملجتها لانه بالنهايه كل واحد يسوي بأصله.. بس الفرق انج انتي لهيتي ونسيتي واهي ماكانت تبي تقول من الاساس

اهي غلطانه انها مصرحه من قبل ان محد راح يعرف عن خبر ملجتها ليما تصير وبعدين تقوم تزعل منج .. اشوف مالها حق تزعل


وبما انج قلتيلها انها قايله جذي انتي سويتي اللي عليج .. وانتي ذوقتيها كانت بتذوقج ياه ( انهاه ماتعطيج خبر عن خطبتها )واللحين اللي فهمته ان البنت تبي تحضر ملجتج .. طبعا هالشي راجعلج اذا بتعزمينها ولا لا بس لاتشيلين بقلبج واكيد عرفت غلطها من جذي طلبت تحضر الملجه ولا تخلين هالموقف يخرب صداقتكم وعادي تصير مشاكل بين الصديقات

اايدهاااا:denya::0bee2e8d89:

 

[جـــوووبـــا]

انا ما اعتقد انها حاسدتج بس هي وياج حيل وتبيج تقولينلها كل شي اول بول مثل كل مره فهالمره انتي ماقلتيلها وزعلت ومادري انا احس ان مافيكم احد غلطان بس هي حساسه زياده عن الزوم

 

[ToOoTi]

اهي زعلت عشان عشرة العمر بينكم ماشاء الله مو هينة
ربي يهدي النفوس بينكم
حرام الصداقة جذي تروح حاولي تهدين الامووور وفهميها وجهه نظرج
وربي يتمم عليج

 

[سيدة الكويت]

الصراحه أختى أنتى الغلطانه .....واحط خط عليها بعد..المفروض تقولين لها على الأقل انخطبت
وين راحت العشره ؟؟والأيام والذكريات؟ويوم راحت السياره تبجى مو عشان تزوجتى ...الكل ينخطب ويتزوج ...حز بنفسها أنج ما قلتى لها ........لا تزعلين منى انتى ما تعرفين معنى الصداقه........
والله يهديكم ويصفى قلوبكم .

 

[هدولى]

انتى غلطانه الحين عشره عمر وسنين مع بعض وماتعلمينها اشدعوه لويه وخبه على الاقل لو قايله لها خطبه مو بعد ماملجتى تقولين لها صراحه شى يجز بالنفس والله يهديكم .

 

[ملواكي]

حبيبتي اكيد يحز ابخاطرها وتزعل اذا كنتوا وايد قراب من بعض وعشرة عمر شلون ماتقولين لها

 

[cherry kisses]

من صجج اكيييييييد انتي الغلطانه امبيه رفيجتي حيل مادري عنها الا لما تملج !!
وبعدين اذا اهي قالت هالكلام يمكن ماكانت تقصدج انتي تقصد الناس بشكل عام واتوقع لو صارت الصجيه كانت راح تقولج
وبعدين شكو محتره و حاسدج ومادري شنو هذي رفيجت عمرج وانتي ادرى بس ماتوقع اشدعوى
لو انا بدالها بزعل ويصير بخاطري
ومستغربه ليش ماقلتيلها مادري احس اعذارج مو مقبوله بصراحه

 

[كيكه توفي]

مادري لوول انتي بعد جان قلتي على الاقل عقب ما حدتوا الملجه قلتيلها مو ملجتي وخلصتي تقولين

بعدين شدعوه عاد تبجي وكبرت السالفه المفروض تبارك لج وخلاص

عموما الله يصلح مابينكم

 

[يازمان العجايب]

انتي غلطانه
اهي رفيجة عمرج عشان جذي ارعلت عليج

 

[JANAA]

حبيبتي لا تتضايقين ولا شي اهي خذتها بالميانه انكم ربع ومع بعض من سنين فلا تتضايقين حبيبتي والله يتمم عليكي فرحتك يارب

خليها تهدا اشوي وكلميها وفهميها وقوليلها هم بعد انتي قلتي لو تزوجتي ما راح اتعلمين احد وادعيلها ان شاء الله بعد عرسك عرسها بولد الحلال

الله يكتبلك الي فيه الخير ويجعله زواجا مباركا ويتمم عليكم سعادتكم يارب العالمين

 

[brettey]

للامانه كنت بقول ان انتي الغلطانه لانها رفيجه عمرج وماتقولين لها اكيد بتضايق لان صارت معاي وتضايقت الصراحه

بس اهي حظرتها كانت قايله لما اتزوج ماراح اقول الا لما املج واخلص يعني لو اهي متزوجه قبلج كانت راح تسوي نفس الشي فمالها حق تزعل تسترييييييييح
لو مو قايله رفيجتج هالكلام كنت بغلطج انتي الصراحه
انا وحده حقيره للاسف كانت رفيجه عمري وتزوجت قبلي وماقالت لي الا عقب ما ملجت وحزت بخاطري الصراحه انا رفيجه عمرها وماتقولي واهي سوت حفله محفوفه بين الاهل وماسوت عرس اوكي مو شرط تعزمني بس اقلها تقول لي انها بتملج لانها قبل لا تتزوج كانت بمشاكل مع اهلها ليش طاحوا عليها طالعه معاه الشخص الي تزوجها وحكروها وكانت كل يوم تتصل وتتشكى وكنت اهديها ويوم انخطبت ماقالت لي حزت بخاطري وايد مو شويه وعقبها بشهرين انا ملجت وعزمتها على ملجتي صرت احسن منها وقلت لها اني انخطبت وملجتي اليوم الفلاني حياج اناتي وامج وعقبها اختلفنا لموضوع ثاني وقطعنا وماعزمتها على عرسي بس درت اني سويت عرس وعقب 4 سنين رجعت علاقتنا وردينا مثل اول وكانت تشكيلي من ريلها وانها بمشاكل معاه و.....الخ ومن سنتين تهاوشنا هوشه كبيره واكتشفت حقارتها حدها مينونه ومريضه نفسيا وعبالها كل الناس تغار منها مع انها لا جمال ولا اصل ولا فلوس الله يعافي المكياج والتفصخ متحجبه ولبسها الله لا يواريج وخسرتنا انا ووحده ثانيه كانت معانا هم كانت من اعز رفيجاتها والسبب احساسها بالنقص واحنا الي تصادقنا بس ارتحنا منها ومن ينونها

 

[غير كل الناس]

منتي غلطانه واللي يحبك يفرح لك مو يزعل الحمدلله والشكر