السلام عليكم ...
بدش بالموضوع على طول انا من قبل عندي حاله اجهاض بالشهر الثاني
وبعدها حاولت وشديت حيلي اني احمل بس الله ماكتب المهم ,,
وحده من رفيجاتي شارت علي اروح حق د.نجيبه القطان بالسالميه مكانها
رحت الشهر الي طاف وكشفت علي قالت كل شي سليم بس عندج بويضه وحده وحجمها 16
تقول اهو زين بس لازم تاخذين منشطات ..
خذيت ابره ميني بيوووور منشط وقالت لي تعالي ثاني يوم صارت وكشفت علي والبويضه كبرت صارت حجم 18 قالت لي وايد زين وكانت بتعطيني ابره تفجيريه بس خفت وماخذيتها نحشت ههه
وصار جماع لمده 3 او 4 ايام ونطرت وجان تيني الصاعقه نزلت علي الدوره هالسبوع اللهم لك الحمد تعبت عالفاضي وقطيت فلوس عالفاضي واحس اني ظلمت نفسي يمكن مااحتاج هالابر ..
ادري قرقت عليكم بس اول مره اكتب موضوع اهني بهالقسم واشرح فيه حالتي :eh_s(16): الله يساعدنا يارب ويمسح على قلوبنا بخبر حملنا يارب عاجلا غير اجلا يارحيم لطفك ورضاك...
المهم انا دورتي منتظمه الحمدالله كل شهر تيني ماتقطع الف الحمدالله والشكر :yaaaaaarb: بس مشكلتي بعدد البويضات وحجمها الوسط الي اعرفه لازم يكون الحجم من 18 لين 22 ...
فا قررت اني اخذ منشطات طبيعيه عشان تكبر البويضه عندي وابي تطلع لي اكثر من وحده شنو بويضه وحده بس :eh_s(16): وايد يقولون ماراح تحملين على بويضه حبطوني وانا اليوم بلشت اخذ منشطات الي بالصور تحت راح اشرح لكم طريقتي اذا في شي غلط مسويته نبهوني والي تبي تزيد شي تقولي عشان نفييد بعض ...
رحت الجمعيه وشريت العده الي اهي ...
خذيت لي عصير اناناس طبيعي بدون شكر يقولون انه ينشط المبايض..
وخذيت لي جنسنغ بودر اشربه معه الحليب الصبح او النسكافيه او الجاي ماحبيت طعمه بس ان شاءالله يعطي نتيجه يارب ...
وخذيت عسل العويد مخلوط في حبه البركه ... وايد ناس مدحو حبه البركه
هذي صورته خذيت زياده عشان احكه ويا الاكل والريوق لبنه وتوست احط فيه :ggdw:
وخذيت سم سم وكنت باخذ كاجو ومكسرات بس خفت امتن بروحي مو ناقصه متن وزني 84 امبيه يبيله رجيم
والوالده قالت لي خلطيهم معه تمر اكلي وحده اول ماتقومين ووحده قبل لا تنامين
حطيت فيه حبه سوده وسمسم وزيت سمن نص قفشه عشان مايلزق بالايد وانا اسويه كوور
وهذا شكل كووووور
والجنسنغ والعسل راح اشربه بس الصبح على الريج لانه احس وايد اشياء خلطتهم ويا بعض جذي كافي ولا انقص شي ابي رايكم وفي احد جرب نفس خلطتي ويابت نتيجه او تعرفون احد نفس حالتي وجرب شي كبر البويضه بس بدون حبووب تسوي تكييس وتخرب الرحم
ناطره ردودكم ,,,:eh_s(8):
