منو ماخذه مطوع او خاطبها مطوع

[التوق]

تستخير والله يكتب لها اللي فيه الخير

 

[*مطبخ الذواقة*]

شوفي حبيبتي. .
تعريف كلمه مطوع تختلف من شخص ليثاني
بمعني في ناس : لما تشوف الواحد يصلي بالمسجد ومايترك فرض. ولا له سوالف مثل التدخين ومايحب يستخدم مفردات غلط بكلامه.

هذا ممكن يسمونه مطوع. حتى لو ماكان مربي لحيه طويله. .

وناس : اي شخص تشوفه ملتحي. .تقول عنه مطوع. .

فمستوى تقيم الكلمه يعتمد على مفهوم رفيجتج نفسها لمعنى كلمه مطوع


===

واسمحي لي راح اختصر لج تجارب حريم اعرف ماخذين رجال دين

اول واحد : متشدد الى ابعد الحدود. ..وتعبها معاه حيل. .. يمكن الحين صار لهم فوق ال 15 سنه. .وهو لا زال يتعامل معاها باسلوب الامر والنهي. . يعني جاف في تعامله. ..بس مع الكل حتى مع اهله خواته ومع بنته. ..

ثاني واحد : ..شكله الخارجي مطوع. .. و24 ساعه يعزم مطاوعه في بيته. ..ورايح راد على مؤتمرات وغيره. ..ومرته تحلف انه حتى الصلاه ما يصلي! !!!...وانها لو طلعت معاه اي مكان ما تبقى مره ماخزها. !! اكتشفت انها ملتزمه اكثر منه. ..


ثالث واحد :

هذا قعد معاها. . 12 سنه وهي كل ما طلبت شي قال ممنوع. .وحرام. .تلفزيون. : ماكو. .. دوام. .ماكو. ..تلبس عزج الله بعرس او عشا كعب ماكو. .. تطلع معاه. .لازم تلبس فلات. ..سايق. .ماكو. ..سياره لها. .ماكو

باختصار. .حطها في قرقور. ..

متى بدئ يتغير لما صارو عياله مراهقين بعمر 16 و17 سنه

سمح بالتلفزيون. ..
سمح لبناته بلبس الكعب في الحفلات. .
سمح لها عقب ما دخلت بنتها الجامعه انها تسوق سياره

ليش عشان يوفر على نفسه. .سالفه وصل البنت او انه يحط سايق...

اما الرابع :

فهذا كان قمه بالخل الله يصلحه ويهديه. .على كثر مالله معطيه نعمه وخير على كثر ماهو شحيح في بيته وعلى مرته. ..

والغريب انه متزوج. 4




---


هذه الحالات هي نماذج لقصص خوات اعرفهم شخصيا. ..

وهي ليست قاعده عامه. ...
في منهم رجال عرفو معنى الشرع الحقيقي ويطبقونه. .. لكن للاسف وجود تلك الشخصيات

السلبيه غطت على الشخصيات الايجابيه. ..




اسال الله لها التوفيق. .وان يكون زوجها من المطاوعه اللي يعرفون ربهم حق المعرفه .ويراعي الله فيها

 

[MRS.coupe]

برايي تقعد معاه او مع اهله تعرف منهم طريقة تفكيره
لعضهم ماخذين الدين منظر مو على اساس الدين التعامل
انا قوام عليها وانا اخذ عليها عادي
وفي بعضهم ما التزمو الا لان الدين من كثر ما تارس قلوبهم بدا يظهر على تصرفاتهم
​

 

[أميرة-]

المطوع حاله حال اي رجال فيه الزين وفيه الشين .. فيه البخيل وفيه العصبي وفيه الشديد يعني الطبايع تختلف مو كل المطاوعه نفس الطبايع


مو يعني ملتزم راح يعيشها بسجن فيه ناس ملتزمه بس لينه والتعامل معاها سلس أهم شي التوفيق والتوافق الفكري بينهم

 

[مــرح]

ما يدلل الا المطوع و مو الكل طبعاً والله يوفقها و يهنيها تستخير و تشوف

 

[اموووون_]

توافق من غير تردد كنت اعاني من نفس ترددها والحين احمد ربي مليون مره اني ما ضيعته من ايدي انسان ملتزم وضحوك ويحب الغشمره نروح مطاعم عادي بس سينما لا بس عادي عندي تلفزيون بالبيت وسافرنا كذا مره كافي انه ما يسافر الا انا معاه خل تستخير والله يكتبه لها اذا فيه خير بس شوفي اختي اذا رفيجتج فري حدها وسينما وطلعات وتسمع اغاني دايم ما انصحها

 

[قلب الزعابي]

بالعكس صح المطوع كل شي عنده ممنوع بس مع زوجته غير
والله الناس يدورون المطوع اللي خائف ربه وهي متردده
ولد عمتي مطووووووووع وكل شي ممنوع وحرام
بس من تزوج يودي مرته كل مكان ويمشيها ويحبها موت مايعرف وين يحطها
اول شي تستخير وتتوكل على الله

 

[مذهلة2013]

حبيبتي وايد مطوعين مرنين والله
انا خالي ملتزم حيييييل ماشاءالله عليه يعني عادي مو حيل حيل ملتزم بس ترا بعض الملتزمين بس اسم سوري عالكلمه
وفي بعضهم احسن من العاديين كطبع ومعامله لانها بيكون خايف الله في زوجته ويعاملها احسن معامله

بس رفيجتج خل تحط شروط اذا عندها

 

[Patcholli]

اذا تحس انها ماراح تقدر تتحمل وتستمر لاتجبر روحها

 

[New_bride]

المطوع آدمي حاله حال الباقي
له مشاعر واحاسيس واحتياجات

اهم شي مايكون متشدد بزياده و فاهم الدين والالتزام غلط


طبعا لا انا ولا غيري من اللي مخذين مطاوعه نقدر نفيدج اهم شي صلاة الاستخارة
واذا من نصيبها الله بيسخره لها وبيسر لها الموضوع وبيكون حلو على قلبها

 

[smo0o]

أنا زوجي مطوع و أحمد ربي ليل و نهار أني تزوجته

المطوع مثله مثل أي رجل بالدنيا يدلل و يعز و يخاف الله فيج و هذا أهم شئ

كل بنت تتمنى زوج يعينها عالطاعه و يذكرها بربها

أهم شئ يكون فاهم الدين صح

 

[Muhrah]

مطوع عن مطوع يفرق فيه اللي ملتزم عدل وفيه غير خل تقعد وياه