منو فيكم اتستقالت من شغلها علشان اعياله وبيتها ؟

[Om Khaloody]

السلام عليكم بنات بدخل الموضوع على طول من فيكم قدمت استقالتها من شغلها علشان بيتها واعيالها ,, خاصتا انه الله خلقنا للتربيه وتكون طاقتنا وجهدنا لعيالنا ,, والي قدمت اتسقالتها اندمت ولا لأ واشلون خذيتي هالقرار الصعب ؟ ياليت نفيد بعض

 

[noorq8]

أنا , تركت الشغل عشان عيالي وبيتي والحمد لله ماندمت بالعكس استمتعت بكل مراحل نموهم وطفولتهم وأنشطتهم المدرسيه , القرار كنت أتخذه وتكرر أكثر من مره أستقبل وأرجع لكن بالأخير وبدون تخطيط حذفت الاستقاله ورجعت أميره ببيتي ......

 

[توتاتوتا]

انا استقلت بس قبل اجيب عيالي لان تعب بيت ودوام ولا افكر اتوظف حاليا مع ان احيانا ودي بشغله بس افكر بعمل تطوعي عالاقل مافيه التزام وامي قبلي تركت الوظيفه علشانا واستخيري قبل اي قرار

 

[CrystalQ8]

انا افكر بس خايفه اتحسف خصوصا مجال التدريس متعب

 

[Om Khaloody]

ماشاء الله عليكم زين اشوى يعني مو بس ابروحي ,, بس للأسف مافي احد يشجعني من أهلي أمي تقول لا تفكرين وزوجي مو مشجعني بعد
ياليت نسمع بعد تجارب البنات

 

[Om Khaloody]

الي استقلتوا تاخذون مصروف شهري من ازواجكم ولا اشلون ؟؟

 

[عقارية]

هل العلاقه بين الأزواج رسمية حتى يكون هناك راتب يلتزم به الزوج تجاه زوجته
احيانا مصاريف شهر تختلف عن شهر زيادة أو نقصان
الزوجة اللي تقوم بواجبها تجاه زوجها ما راح يبخل عليها بالعطايا وليس بالمعاش الشهري

بالتوفيق ، واستخيري قلبك وعقلك معاً .

 

[فرح العجرف]

حلو الوجده تهتم ابيتهاااا ..

انا استقلت لما كنت حامل .. ومارجعت للوظيفه ليما ولدي دخل الروضه ..

ماحبيت ابتعد عنه ابد ..

بس مشكله الزوج اللي يهتم لراتبج اكثر من بيته ..

وبالعكس مايصرف عليج حده مطتلبات البيت وبالغصب ولده ..

 

[bambena]

اتمنى اتمنى

 

[الأميرة جوري]

الله يكتب لج اللي فيه خير

 

[ناتشوو]

ماشاء الله عليكم زين اشوى يعني مو بس ابروحي ,, بس للأسف مافي احد يشجعني من أهلي أمي تقول لا تفكرين وزوجي مو مشجعني بعد
ياليت نسمع بعد تجارب البنات

اهم شي يكون الزوج مشجعج
ويقدر هالتضحية
خاصة من الناحية المادية
لازم مصرف شهري يناسبج

 

[Q8_QT]

والله مرات ودي أستقيل بس أحسها صعبة لأن هالزمن بصراحة ماتحلقين راس مع متطلبات الحياة والأسعار اللي كل ماله بالطالع ومثل ماقالت وحدة من الخوات شهر عن شهر يفرق مرات اييج شهر تكونين مزحومة وعندج التزامات واااايد ويادوب المعاش يكفي إذا خاطرج تقدمين استقالتج وخايفة تتوهقين جربي اخذي اجازة بدون راتب ( رعاية اسرة ) وشوفي الوضع شلون وطبعا قبل كل شي استخيري والله يوفقج

 

[اطياب طيبه.أم عبدالله]

انا استقلت من دوامي مع اني كنت مرتاحه وراتبي حلو علشان اربي عيالي وما اخليهم بايدين الخدم اللى ما يخافون ربهم

واحس ان هذا احسن قرار اتخذته بحياتي بارادتي البحته

صارلي حوالي اربع سنوات من استقالتي وما ندمت يوم ابدا واحس ان هالشي بمصلحة اعيالي

وبالنسبه للمصروف ما اخذ من ريلي اعتمد على البزنس اللى اديره من البيت بنفسي

 

[عيش و مرق]

صعبه ماقدر

 

[Ms. hypnotic]

ولله حبيبتي يعتمد على عمرج وعلى مدى صرفج بالشهر


انا رفيجتي عمرها 35 وعندها بنت وولد اعمارهم 10 اسنين و5 اسنين


استقالت مع ان معاشها قوي ماشالله وماتخلي شي بخاطرها الا وشرته تبارك الرحمن
وعيالها اتجابلهم لما ترجع من الدوام تنام لها ساعه او ساعتين وتقعد معاهم واتدرسهم واتمشيهم وريلها امقسمه الوقت بينه وبين عيالها

يعني امنظمه وقتها عدل

ويوم استقالت اندمت قد شعر راسها

معاشها مايكفيها

ريلها حليو بس مو معقوله كل شهر بعطيها مصرف لجنطه ماركه ولا بدل

كان يعطيها 200 دينار ومرات 150
اتقول ياليتها ماستقالت

انحرمت من اشياء وايد واهيا توها صغيره


فانا اقول على حسب العمر وعلى حسب اليهال

 

[زيتونه مرت باباي]

انا اعرف وحده استقاله وصارة اميره وملكه في بيتهااا ..
كانت تسوق وهدت السيااقه ..

ريلها كل شي يسوي لها ..

صج انها تقول المصروف احيانا مايكفينا لكن مرتااحه ..




انا وحده افكر اني استقيل لو تزوجة عشان اجابل عياالي ..
بس بالاول خل اتوظف
تالي يصير خير ..

 

[أم سيف وسلطان]

انا اقول خذي إجازه بدون راتب شوفي امورج على ألأقل شهرين

وشوفي عمرج

 

[كتكوته ورديه]

اانا اقول استخيري احسن وفكري عدل مليون مره وسوي لي يريحج

 

[^SwEeTa^]

انا استقلت و الحمدلله صار عندي وقت حق بيتي و عيالي و افتكيت من عوار الراس بالدوام هذي شالت و هذي حطت و هذيج مادري اشسوت

الله لا يعودها من ايام

 

[Melazlaza]

حبيبتي اذا انتي من النوع الحنون والحريصة على عيالج فاستقيلوا بدون تفكير
انا استقلت وربي لك الحمد نفسيتي ارتاحت حيل وهالشي انعكس على بيتي وزوجي والاطفال اصلا محد يعرفلهم غير امهم انا يصعقوني بعض الامهات الي يهدون عيالهم اطفال ورووود مع الخدم ويروحون الدوام بحجة والله هالزمن يبي فلوس انزين وهالزمن مايبي تربية وحرص اذا احنا امهات نعصب ونطق شلووووووووون الخدامة؟؟
والله فكة استقلت ارتحت من لوية الدوام ولوية الخدم لان ان قعدتي بالبيت منتي بحاجة خدامة والشي الي صج فرق معاي اهتمامي بنفسي صرت وايد اهتم وشكلي تغير للافضل الحمدلله قبل بيدي معاش وويهي مصفوق الحين على معاش ريلي وربي باركلنا فيه ودايما تذكري ان الي يترك شي لمصلحة ربي داعيلها مثل الام مع اطفالها فاهني ربي بيرزقج من اوسع ابوابه