آنا زوجي مدرس عربي عنده خبره 28 سنه ومن 26 سنه وهو يدرس بس أولى ابتدائي يقول هو المنهج اليديد زين بس فيه بعض السلبيات والموجهين لما نناقشهم مايتقبلون نقولهم السلبيات يبونا انطبق بدون مناقشه بس اللي هو قاعد يسويه بالصف أنه يجمع بين الطريقه القديمه بالتدريس اللي هي تعليم الحروف منفرده والطريقه اليديده اللي الموجهين يبونها ويقول قاعد يلاقي نتيجه زينه يعني لما الطفل يتعلم حرف الألف وحرف السين وحرف الراء تالي يتعلمون اشلون يكونون كلمات من هالأحرف رأس /أسر وهذا يخلي الطفل يتعلم بروحه يهجي الكلمه ويقراها ونفس الطريقه يقدرون الأهل يسوونها بالبيت وتسمى هالطريقه تحليل الكلمه يعني الطفل يطلع شنو أحرف الكلمه وشنو الحركات القصيره اللي فيها مثل الكسره والفتحه وشنو يقدر يركب كلمات ثانيه من أحرفها مثلا أمل / ملأ فهذي الطريقه تخلي الياهل يعرف يقرا الكلمه موبس يحفظ شكلها! بس تنتبهون لنقطه مهمه أنج ماتعلمين الياهل أكثر من كلمه بالمره الوحده يعني لاتحاولين تشرحين له الجمله كلها أمل فراشه بيضاء كل أحرفها وحركاتها والأحرف الممدوده كلها بنفس اليوم علشان الياهل يقدر يستوعب وهم انتبهوا حق نقطه مهمه أنه درجات الأستيعاب تختلف من طفل لآخر وفي طفل بسهوله يحفظ الأحرف والحركات وفي طفل يحتاج وقت أكثر أو مايركز وينسى بسرعه! الله يعينكم يالأمهات ويعطيكم الصحه والعافيه ويوفق عيالكم ألحين بالسنوات الأخيره صار العبء كله عالأهل بالتدريس! الله يرحم أيام قبل اللي أهلنا لادرسونا ولادروا عنا والحمدلله تخرجنا ودخلنا جامعات ألحين بس طلعي عن الياهل يوم واحد وهديه بروحه قالتلج المدرسه أنتوا ماتدرسونه ولاتجابلونه اشلون تبونه ينجح!!
انتي صح
بس للأسف منهجهم يعطونهم الجملة كاملة .. وهالاسبوع جملتهم فيها 5 كلمات يدد ..
أمل قالت أنا أحب ألوان أختي إسراء ..
طبعا بنتي بدعت .. شلون احفظها 5 كلمات يمييييع ؟؟ أحب وأختي متشابهين .. وهي ما تعرف الفرق ..
اوكي في ياهل عنده قدرة على الحفظ بدون ما يسأل شنو وليش ويقدر يحفظ الجملة مثل ما اهيه واييب درجات زينة ومو لازم يعرف يتهجى اللي حاطين المنهج ما يبونهم يتهجون ولا يقرون يبونهم يحفظون ..
بس في طفل ذكي .. وعنده فضول .. ويسأل .. ليش الهمزة هني فوق ؟ وهني تحت ؟ وهني الالف بدون همزة ؟ وهني همزة ع السطر ؟؟ شقولها ؟؟ حفظي وانتي ساكته ؟؟ حاولت اشرح لها .. ياهل بأولى ابتدائي من ثاني اسبوع ثاني درس بتستوعب كل هذا ؟؟ الحركات والمدود والهمزات وانا اللي قاعده اشرح لها لأن لو بنمشي ع المنهج كدينا خير ..
اخر شي .. لم شفت السالفة خربانة والمنهج كله متشابهات .. قلت لها مايخالف علشان خاطري حفظيه جذي وتالي تعرفين .. والحين انا مصممة ادخلها قاعدة حلبية بأسرع وقت علشان أصلح سواد ويه اللي حاطين المنهج العبقري الصراحة ..
