منهج العربي اليديد أولى ابتدائي .. ويح قلبي

[رفرف]

شلونكم امهات ؟؟؟


انا بنبط ..
بنفجر ..
بيصير فيني شي من منهج العربي اليديد ..
ابي اعرف اللي مألفين المنهج شلون يفكرون بالضبط ؟؟؟
بس يبون يقولون عدلنا المناهج .؟؟ للأسوأ ؟؟
على ايامنا مع حمد قلم كله حروف بسيطة وسهلة واول شي نتعلم الحروف ..
امي تقول بثانية ابتدائي نقرا الجريدة ..

الحين انا مدرسة بنات خامس ما يعرفون يقرون وعالمنهج اليديد الصراحة أتنبأ بمستقبل وااعد لعيالنا ..

الدرس الأول (أمل فراشة بيضاء) .. ماشي بلعناها ..
الدرس الثاني (إسراء فراشة ملونة) !!!!!

جم نوع للألف في الدرسين ؟؟ (همزة فوق .. همزة تحت .. همزة على السطر في نهاية الكلمة .. مد بالالف بدون همزة ) !!
بنتي قامت تمشي وتحط همزات بكل مكان مو فاهمة يعني شنو .. تقولي مو انتي تبين أكتب ألف هاذي ألف !! شقولها !!


الكارثة الثانية ..
الحركات .. جم نوع حركات يحفظووونهم اياه بدون ما يعرفون شنو هالحركة وشنو تسوي وشلون تأثر ع الكلمة ؟؟
(فتحة - ضمة - كسرة - تنوين - شدة - سكون ) !!!
ليييييييش ليييييييييييييييييييييييييش .؟؟

انا بنتي شاطرة اسمالله عليها وامأسستها بالحروف عدددل ..
الحين قامت تحفظ شكل الكلمة وانا عيزت عيزت وانا اصحح اماكن الهمزات والحركات ليش جذييي ؟
لا علموهم صوت الحرف .. ولا صوت الحركة (أشوه ان معلمينها بالروضة الحروف وانا مكملة عليهم جان علووووم )
بس جذي تعالو وحفظوه ؟؟


انا مو مدرسة عربي .. بس افهم يعني ..
وامي مدرسة عربي تقول شهذا ؟؟؟ا لاصل التدرج يعرفون الحروف يعرفون الحركات يتعلمون كلمات بسيطة يقدرون يتهجونها ويتعلمون صوت المدود .. مو من اولها جذي ..


واااي حده مرتفع ضغطي من المنهج ابي افضفض ..
صج ابي اعرف اللي مألفين المنهج شلووووون يفكروووون ؟؟

 

[الصابرة المحتسبة]

هلا رفرف

كل مالهم يصعبون المناهج بس ياليت على شي يسوى او تلاقين منو اللي يفهم ويشرح لعيالنا بطريقة حلوة وسهله إلا من رحم ربي.

 

[أغلى حبيبه]

ويييي قالو بسهلوونه علينااا

الله يعيييينااا

بنتي الاسبوع الياي اداوم خنشوف شصير

والله يسهل دراااستهم

 

[شهدالعسل]

واااااااااي انا بعد بنتي اسبوع الجاي
الله يكون في عوني
لازم نسوي موضوع حق تبادل المناقشات حق اولى ابتداي و نساعد بعضنا في دراسه عيالنا
اشرايكم يا امهات ؟؟؟

 

[جرح الناس]

حسبنا الله ونعم الوكيل لازم ياجماعة نتصرف مايصير جذى احد عنده فكرة وين نقدر نشتكى

 

[aloyaa]

اي والله آنا بعد محتاسه ويا ولدي مع منهجهم المعقد
شكوووو أمل فراشه !!!!! خربطو اليهال. والكلمات صعبه عليهم مو عارف يكتب لا فراشه ولا بيضاء

 

[رفرف]

أمل فراشة بيضاء تهووووون عن إسراء فراشة ملونة ..
كلمة اسراء بروحها فيها همزة تحت وهمزة على السطر ومد بدون همزة عيزت اشرح حق بنتي ماكو مو راضية تقتنع اقولها هاذي تحت لأن عليها كسرة تقولي شنو كسرة .. بالاخر قلتلها حفظيها مثل ما اهيه مو اهمه يبون جذي بس يحفظون وما يفهمون ؟؟


جرح ..
اشتكيتي ولا ما اشتكيتي ..
مستحييييييييييييييييييل يردون عن قراراتهم ××××××يطبقونها على عيالنا

 

[78MariMar78]

معاج حق رفرف

والله ولدي بعد بصف اول
ويحفظ الكلمة مثل ما اهي
ومو فاهمين ليش

ربي يعينهم ويعينا على المنهج

 

[nooral3ain]

اي والله نفس المشكله .كل مالهم وللأسوأ حتى المواد الثانيه .لو يردون على كتبنا القديمه وايد أحسن

 

[شيــوخه]

صراحه يا رفرف المنهج العربي بلمره مو داش بلمخ لا صغير ولا كبيرررررررر

انا بنتي اخذت السنه الي طافت كان تجريبي اما الحين صار هذا المنهج

المشكله يقلون ليش اليهال مايعرفون يقرون وهم اصلن ترتيب الحروف غلللللللط والله اول شي امل فراضه بيضاء اول شي الهمزه داشه عليهم عرض ثالث شي حرف الياااااااء << وين راح حرف الالف وين راح الباء اف شي لا يطاااااااق هذا السنه الي طافت اما هنسه بثانيه الله يستر عسى ماتيني جلطه من المنهج هذا
وفوق هذا كله لا قلتي صعب يقلون لج اعيال هلوقت ماكو شي صعب عليهم لانهم فاهمين وعارفين كل شي ماكو شي صعب عليهم والله حيره احترنا انتي ضربتيني على الوتر الحساس خليتيني اسولف واطلع الي ابجبدي

 

[r2004]

واي خرعتوني انا بنتي الاسبوع الياي ...ضاق خلقي صراحه الله يعينهم بنلحق على شنو ولا شنو

 

[السدره]

المهم يحفظ طالب اولى الحروف زين وبعدين اي طريقه يقدر يمشي عليها انا مدرسة عربي وبنتي رايحه اولى وقاعده ادرسها على الطريقه القديمه لانه ضروري تعرف صوت الحرف

 

[برنسيسة الشمال]

انتوا مكبرين الموضوع مو جذي من الافضل التعليم في الصعب والتدرج الى السهل بعدين مهم نفسيتج قدام ولدج عشان اذا شافج تقولين صعب
راح يتعب ومايحاول يفهم سهلو الموضوع واسترخوا وياهم طبيعي راح تتعبون في البداية بس ن شاء الله خير

 

[ام كويتية]

حسبي الله ونعم الوكيل
شنو هذه بعقدون الاهل و اليهال
و الله تعبنا من هالمناهج جنه حلاو ولا قرقيعان
كل ما يه واحد غير هالمنهج
مو اهم شضارهم
كله على المدرسات - اللي عندها ضمير طبعا- ولا الامهات
هذا اولى ابتدائي عيل الباجي شنو
؟؟؟؟!!!!!؟؟؟؟؟؟!!!!!!؟؟؟؟؟؟

 

[حلم الطفولة]

خواتي شلونكم ... تم تعديل بعض الردود لمنع التجريح بالجهات الرسميه.

صاجه رفرف أول أذكر كنت بثانيه ابتدائي أقرا الجريده ..
وبالنسبه للمنهج ,, ماعندي أولى ابتدائي بس حسيت غريبه أمل فراشه وإسراء فراشه .. ,, الله يعينكم .. ويصلحهم .

 

[كويتية صغيرة]

هذا الرابط
فيه يتكلمون عن نفس الموضوع
فيه كل مواضيع دروس العربي لسنة اولى على اساس تاخذون فكرة
كل درس عبارة عن جملة وحدة ..... يقولونها للطفل على شكل قصة مشوقة
وبس هذي القصة
http://q8yat.net/showthread.php?t=376478
و في النهاية المنهج الجديد له مؤيدين و له معارضين ..... انا من المؤيدين له بس يبيله ابلة شاطرة بس كمنهج لا وايد تطور للأحسن التعليم عن طريق القصص يعتبر افضل طريقة تعليمية للطفل

فلا تكبرون الموضوع ...... قارنوا المنهجين القديم مع الجديد وراح تحسون بتطور و فرق كبير
حتى لو عندك وجهة نظر سلبية عن مادة..... لاتكون جدام عيالك علشان لايكرهون المادة و هي لغة القرآن الكريم..... خليها بينك و بين الأبلة و انتى بعد تابعيه بالبيت باستمرار

و الله يوفق عيالنا و عيالكم

 

[أم عبووووود]

شلونكم خواتي

تدرون انا مع تطوير المناهج بس وين المدرسات الشطار اللي يوصلون المعلومة لليهال الا ماندر

صدقوني كل شي في بدايته صعب وشوي شوي را ح يتسهل عليكم ان شالله

الله يوفق عيالي وعيالكم يارب

 

[أم عبووووود]

هذا الرابط راح يفيدكم ان شالله كاتبته ضحية القدر

http://q8yat.net/showthread.php?t=398123

وان لقيت اي امتحان او ورقة مراجعه للصف الاول راح احطها فيه

ربي يوفق عيالي وعيالكم

 

[رفرف]

اول شي بنات انا ماقول هالحجي جدام بنتي .. ولا ابين لها انه صعب بالعكس كله اقولها انتي شاطرة واهوه سهل بتحاولين وتقدرين ..

ثانيا انا مو معارضة فكرة القصة بالعكس حلوة .وعاجبتني كفكرة . ترا حتى النسخ والكتابة انا عندي خل ينسخون لين تاخذ ايدهم ما احتج على كثرة الواجبات حتى ان شفتها كاتبة شي مو عدل او خطها مو عدل بالمدرسة امسحه لها بالبيت وترد تعيده ما يضرها .. بس الأصل ان تكون الكلمات بسيطة بالاول .. تتدرج للأصعب .. نفس الشي بالنسبة للهمزات والحركات ..

احتجاجي فني بحت على المنهج على القصة نفسها وترا حتى مدرسات العربي اللي اهمه اكثر الناس احتكاك بفئة أولى ابتدائي (بعكس اللي يحطون المناهج ويمشون وما ياخذون براي احد خاصة المدرسين اللي محتكين بالطلبة ويدرون شنو الاصعب شنو الاسهل شنو الانسب ) يقولون المنهج راح يخربط اليهال وماراح يتأسسون عدل والشاطر فيهم بيحفظ شكل الكلمة حفظ لا يقرون ولا يكتبون غير هالجملة اللي درسوها يعني انا مو يايبه الاحتجاج من كيفي ..

والله امس بالمدرسة قعدت مع مدرسات العربي لأولى قلت لهم تعالو فهموني انا غلط ولا المنهج غلط !! احتى وكيلتنا كانت مدرسة عربي ورئيسة قسم ولها خبرة اكثر من 18 سنة قالتلي الصراحة مادري شقولج حاولي تعلمينها انتي الاحرف والحركات بروحج او دخليها القاعدة الحلبية لأن تأسيسهم صح ويبدون بالاحرف .. !! عييل ليش انا مدخلتها مدرسة ؟؟
لصراحة الكل نقد علمنهج شنو همزات ومدود وحركات !! بالاول مثلا فتحات وضمات وكسرات .. تالي السكون والتنوين .. انا شلون احفظ بنتي وهي مو فاهمة ليش احط السكون هني وليش الهمزة هني فوق وهناك تحت وهني عالسطر !! وليش هني ضمة وحدة وهني ثنتين ؟؟ وليش لما اقول فراشة واحط ضمتين اقراها فراشتن وما كتبها جذي ؟؟ ترا الياهل ذكي ويسأل وبمنطقها صح ! لأن اللغة العربية صعبة واستثنائاتها واايد .. ليش ادرسها الاستثناء قبل الاصل ؟؟

ثالثا بالندسبة للتدرج من الصعب انا قاعدة اعلمها ع الصعب وماعندي مانع انا مو من نوعية الامهات اللي ماتابع او اييب مدرسين او حتى اعتمد ع المدرسة يأسسونها لي انا مأسستها .. ومعلمتها الحروف بروحي بالبيت من الروضة وتكتب وتنسخ من صغرها حتى منهج القرآن الحمدلله محفظه بنتي وااااااايد غير عن المنهج يعني انا لو شي فيه فايدة ومصلحة بنتي ترا ماراح احتج عليه .. بس ارد اقول المنهج ماله سالفة ولا يأسس ..

 

[اغفرلي يارب]

الله يكون بالعون يا امهات ظاق خلقي وحاسه بحباط