مناقشات وسوالف بنات نادي الكتاب

[كراميلا مرة]

اهي مجموعه قصصيه
بس اكثرها احسه مو مفهوم
وسلامات
الحال من بعضه

 

[شموخ روحي]

خلصت من كتابين وباقي اجزاء من بقية الكتب


أدعوكم لقرأة يوسف المحيميد رائع خصوصاً كتاباته بالألفيه 2 لهُ فنتازيا خاصه ..

ترددت كثيراً في قرأته سنه كامله من المحاوله أنصحكم فيه نال إعجابً يتخطى حدود كسل ِ واقتحام كتاباته

 

[غيدآء]

السلام عليكم

الله يسلمكم حبوباتي

انا لي الحين بكتاب الرحيق المختوم !

.....

بنات تذكرون لمن طلبت اي كتاب للرسائل المتبادله بين مي زياده وجبران خليل جبران!

المهم عقب ما وفرته لي على نسخه الكترونيه الاخت تريآق مشكوره ..حبيت اني ابحث بهالمجال...زبدة الموضوع لقيت رسائل مشابهه لغسان كنفاني لغاده السمان!

بس كرهتهااااااااااااااا...لعدة اسباب!!

غاده السمان نشرتها في كتاب وما نشرت رسائلها لغسان يعني بس رسايله اهو لها!

هذا شي

الشي الثاني ...انها ما احترمت خصوصية الرسايل لدرجة اني كل ماقريت رسايله واهو يقول انتي الوحيده اللي راح تقرين كلامي احسها مادري انانيه لمن نشرتهم!!

الشي الثالث ما احترمت عائلته من زوجه وابناء!!

خصوصا انه الرسايل كان يطرشها لها بلندن واهي بالعافيه ترد عليه. وبنفس الوقت اهو كان متزوج واب .!

صج كرهت طريقتها وتعاملها مع الموضوع...وحسيت انه غسان كنفاني اللي الكل يضرب فيه المثل بالقوه في كتاباته ورسوماته ..ضعيف جدا امام غاده...لكن ضعف كريه!!!


يعني محد يرضى يكون موقفه ابدا خصوصا انها رافعه الجام على قولتنا يعني ما تعطي لا حق ولا باطل بالموضوع...( لعوب ) !

اتمنى تقرون الرسايل خصوصا انها متوفره بمجلد الكتروني!

وقولوا لي رايكم !

 

[كراميلا مرة]

شموخ روحي

انا قريت الحمام لايطير في بريده ليوسف المحيميد
الفكره قويه بس بصراحه اسلوبه مليىء بالجنس فكرهته من جذي


غيداء
تصدقين انا ماقريت الرسايل بس من كلامك صج كرهت غاده السمان شالاسلوب

 

[ليلو جبريت]

غيداء انا سمعت بها الموضوع وسبحان الله صديقتي قالت نفس كلامج بالحرف الواحد

@@


كانكم واحد

المهم انا الي سمعته ان غسان وغادة كانوا متفقين ان اي واحد يموت قبل الثاني لازم ينشر الرسايل

لو ماتت غادة كان غسان نشر رسايلها يعني ما اعرف اتفاق ما ادري وعد


كوكو بكره باخلصها اليوم مشغولة للاسف

 

[غيدآء]

ليلى

غاده ما ذكرت هالموضوع ابدا..خصوصا انه في نقاد كثيرين علقوا على موضوع رسائله لها وكان فيه غموض انها ما نشرت ولا رساله من رسائلها له ابدا الا كرت وحيد كان رد من ردودها النادره عليه كاتبه فيه " شو هالبرد؟ " !

واهي اصلا ما جابت سيرة انه قال لها انشري رسايلنا لي متنا خصوصا انه قبل لا يغتالونه بجم سنه كانت اخر رساله لها منه كلها لوم وفيها الكثير من العصبيه والحرقه بسبب ردة فعلها على حبه لها!

والشيء اللي كرهته فيها زود انها قايله ...اي كاتبه او اي فتاة لها رسائل من غسان ياليت تنشرهم لانه صار ملك الجميع من القراء ويخص الادب!!

اي ادب الي يخلي الرسائل الشخصيه تنشر على الملآ ويجرح مشاعر زوجته وابنائه!!

هُناك ايضا رسائل متبادله بين كوليت خوري ونزار قباني ولكن كوليت اثرت ان يتم نشرها وقالت اللي يبي يعرف منو كوليت ونزار وقصتهم يقرا روايتي " ايام معه " ..!

احترمت كوليت كثيرا ..لانه الرسائل تعتبر خصوصيه وممكن انها تنزل من قدر الاديب او الكاتب خصوصا لو كان له شخصيه مستقله مثل غسان كنفاني...اللي صج صج انصدمت بضعفه امام غاده :/

 

[3oosh <3 MJ]

الحمدلله ع السلامة غيداء ،، عمرة مقبولة ..
انقهرت من سالفة غادة السمان حسيت اني اللي اطرش الرسايل لها لوول ..
بدور الرسايل وباقراهم انشالله ..

 

[غيدآء]

الله يسلمج عووش

ههههههه ..زين حسيتوا باللي احس فيه!

ياليت تقرينهم وتقولين لي رايج..!

علشان نتناقش اكثر بخصوص ادب الرسائل !

 

[غيدآء]

كراميلا..

ياليت تقرينهم متى ما توفرت لج الفرصه ..وتقولين لي رايج بعد !

 

[ليلو جبريت]

غيداء تشوقت اقراهم خل انقهر معاكم

 

[غيدآء]

هههههه

ليلى اقريهم وانقهري معانا شورانا غير اننا نقرا ونشجب ونستنكر

 

[كراميلا مرة]

لولو
براحتك


غيداء
ان شاء الله بقراهم

انا قريت ايام معه وتوني ادري انه كوليت خوري تقصد نزار قباني

 

[ليلو جبريت]

بصراحه انا تعجبني غادة احب المرأة اللعوب <<< بتتكفخ

كوكو سوري لاتزعلين مني قعدت اصحح روايتي الجديدة وتعبت عن جد \:

بكرة اكملها واقولج


بنات خلاص السبت بنقرأ حق حياة الياقوت ؟؟


من بيشارك حاليا انا وكوكو وسمسمة


غيداء انا منزلة موضوع اسمه قلم ل قلم <<< بالانجلش في الاخبار شوفيه لو سمحتي

 

[أنثى اليمامة]

حقيقة أنا قرأت بعض الرسائل ، وفضلت ألا أقرأ زياده ، وكثير من النقاد عابوا على غادة السمان ، فعلتها هذه ,, وصدقتِ ضعفه أمامها كان قاسي جداً ، وكأنها تدوسه بحذاء .. عموماً انا شخصية غادة السمان ، لا أحبها .. أشعر أنها امرأه متكبره ، واستغلاليه واشعر كأنها استغلت جنون غسان بها ، لتستمتع برسائله وبالمقابل تحرق هي قلبه ، .. !

أتفق معك غيداء .. اساءت كثيراً لغسان . لان من يحب شخص ما ، ويجن به ، لا يحب يطلع اي شخص آخر على هذا الجنون ، وهو بالتالي امتلاك له .. فمن النذالة ان يعلن على الملأ ،
​

 

[غيدآء]

كراميلا

بالضبط..كوليت كانت تقصد نزار قباني!

ليلى

راح اذبحج ...ههههههههههه..لا بس جد المراه اللعوب احسها استغلاليه وانانيه!

وان شاء الله راح اشوف الموضوع الحين ^_^

انثى

بالضبط ..مثل ما تفضلتي..شخصية غاده فيها كبر!

 

[ليلو جبريت]

غساااااان متزوج ويعتبر رجل خائن

دامه يحبها ليش ماتزوجها اساسا بدل لايذل زوجته ويزعجها بعلاقة لازاوية لها

 

[كراميلا مرة]

لولو
عادي مو زعلانه
والله يعطيج العافيه

وانا بعد ماحب المراه اللعوب يبي لج طق

اطلعت على الس في بلاد الواق واق
والله حسيتها لاطفال
السلنطع والصرصار الزهر ومادري شنو


غيداء
انصدمت شكلي بقراها مره ثانيه عشان اوفق
اصلا ماكنت ادري ان كوليت لها علاقه بنزار

 

[غيدآء]

ليلى

ما انا قلت لج انه صورته اهتزت عقب الرسائل خصوصا امام الزوجه والابناء!

وطبعا البركه بغاده اللي ذابحتنا بانه الرسائل كنز للادب العربي ( هههههههه ) !


كراميلا

كوليت تعرفت على نزار ايام دراستها وبداية شهرته ومعرفته كـ شآعر !

 

[كراميلا مرة]

خلاص انا شكلي بقراها مره ثانيه
مع انه اثناء القراءه مليت منها يالله انتهيت منها
بس يمكن لاني عرفت الاشخاص استمتع:d

 

[غيدآء]

ايه كراميلا السرد بطيء وكله مكرر ...بس بـ صيغه ثانيه !

على العموم انا ما حبيت سرد كوليت ابدا ولا حتى شخصية ريم اللي اهي على اساس انها كوليت بالروايه!

حسيتها تافهه وما تفكر الا بالحب خصوصا انها طالبه! ( يعني المفروض تكون واعيه شوي ) اوعى من غيرها من بنات زمنها!

ما ادري هل كانت كوليت بهالسطحيه او شنو بالضبط!