ممكن تدخلون شوي ؟؟؟

[Truly]

السلام عليكم شلونكم يا حلوات كلكم و شلون رمضان معاكم

بنات انا وخطيبي كل شي بينا اوكي الحمدالله ونحب بعض من قبل لا نخطب و نملج مثل ماقلت قبل بموضوعي الاول

المهم بنات انا والله عشان احبه تغيرت عشانه قبل ماعرف اطبخ شي ولا اعرف شي بشغل البيت بس والله عشانه تعلمت وقاعده اتعلم كل يوم شي

و من ملجنا باديه اتعلم اطبخ و لما يسالني شنو تعلمتي اقوله تعلمت اقلي بيض اول مره و سوالف النواشف و الخفايف

قالي اوووووه هذا ماتعرفينه من قبل قلت انت تدري
وكل يوم يقولي انا خواتي يعرفون كل شي امي مدخلتهم المطبخ من كان عمرهم 14 تعلمهم قلت ماشاءالله الله يخليكم لبعض

و الحين تعلمت شلون اسوي صينية دياي يعني تطورت والله وشي زين كل يوم اتعلم

بس بنات زهقني كل ماقوله شي قال خواتي وامي

والله كلهم احبهم وعلى عيني وراسي

بس مو كل يوم جذي يقارني معاهم

احس مايعطيني فرصه و يحبطني

و انا ماقوله هالشي مضايقني لا اسكت بس كل مره

خصوصا اليوم

قالي خواتي اليوم الفطور كله عليهم قاعدين من 12 الظهر و يطبخون و يسون

واليووم القيمات الي سوها تهبل و التشريب ومادري شنو

بنات والله ادري يعشقني مثل ما اعشقه

بس ليش يقولي ماتعرفين مثلهم و كل يوم يمدح طباخهم

بدال مايشجعني و يقولي زين تتعلمين احسه مو مقدر اني قاعده اتعلم عشانه:eh_s(16):

ياريت تفهموني بنات
مو تتضايقون اهو يقولي عفيه وهالكلام بس بعد شنو بعد مايقول عن خواته

ودي مره اقوله سويت طبخه جديده اليوم بدون مايقولي خواتي يعرفون و يعرفون هالشي صج بدا يضايقني حيل و مقارناته بطت جبدي

ودي افهمه هالشي يضايقني يا بنات :eh_s(16):

شسوي شورو علي ؟

حطو نفسكم مكاني

و اسفه طولت عليكم

 

[Truly]

افااا ولا وحده ردت علي من امس :eh_s(2):

 

[franshiska]

حبيبتي يبي يحرج على شان تنافسينهم
انتي قوليله بس انا مو وحده من خواتك ولا تربيت بالبيت اللي فيه خواتك على شان اصير مثلهم
ولااااااااااااا تحطني بمقارنات معاهم
لانك اكيد ما ترضى اقارنك باحد من اهلي راح تتضايق ويمكن تكره هالشخص بعد

 

[قلبي محمد]

ممممم والله مادري شقولج حبيبتي
بس الظاهر ريلج يحب ان المرا تطبخ وتسوي اكلات فناتك
انتي كل مره سوي اكله غريبه ويديده وقوليله شوف انا قاعده اتعلم واسويلك كل يوم على شانك
واذا هم ياب سيرة خواته وامه ... انتي ردي عليه بضحك وقوليله لا تقعد تقارني فيهم اهم ماشالله يعرفون الطبخ من زمان بس انا على قدي وشوي شوي راح اتعلم
ريلج مو قصده يجرحج بس قصده انه يبيج تتعلمين مثل خواته وامه بس
انتي لا تاخذين الامور بحساسية واخذي الامور ببساطه وضحك

 

[مألوفة]

هههههههههههههه

يا حليلج

انتي شكلج حساسة او تغارين عليه زيادة حبيبتي عادى يقولج عن خواته لانو سوالف هاذي مالها شغل وشكله يحب خواته فها الشي ما يزعلج ولا يخليج اتضايقين
وبعدين لا صرتي عنده طبخي له وخل ياكل من ايدج ولا تزعلين اذا خواته اطبخو له وعطوه انتي اكليه بايدج ودلعيه شكله يحب البلعه ريلج لوول الله يوفقج

 

[كويتية نايس]

وعليكم السلام ورحمه الله وبركاته
حياتي صارحي قوليله انا اتعب واتعلم عشانك ابيك تشجعني مو كله تحبطني ترى بدا هشيء يضايقني
واتمنى افدتج

 

[Truly]

مشكوووووووورين حبايبي ودي اقوله بس اخاف يزعل و يفهمني غلط

مألوفه لا حبيبتي والله ماغار من خواته وامه بالعكس احبهم

بس قصدي ان كل ماسوي شي قال خواتي و خواتي ودي مايقارني فيهم بس

و يفهم ان انا توني اتعلم طبخ شوي شوي اتعلم واجرب عشانه بس

و انا امي قبل كانت تنصحني ادخل المطبخ و اتعلم بس ماكنت احب ههههههههه و الحين امي الله يعافيها كل يوم تعلمني شي

مشكووووورين فديتكم

 

[Truly]

و الي مستغربه منه يا بنات

قبل الزواج لما كنت احبه كان يدري ماعرف اطبخ وصارحته من قبل كان يضحك اقوله عادي يقولي اي

و بعد ماملجنا قال ابيج تتعلمين شوي استغربت ليش غير رايه

بس سمعت كلامه ولاني احبه اتعلم

 

[الحسن الرقيق]

(قوليله انا قاعده اتعلم شلون ادلعك واتكشخ لكـ ) .. والاكل مردي راح اتعلم واصيررر فنانه
بسس شوي شوي علي وراح اطبخ لك كل الاكل اللى تحبه وراح يجيييك يوووم ما تحب تاكل الا من ايدي ..

خليه يفكررر شلون بتدلعينه بدال لا يكفر شنو راح تطبخين له ..

 

[iLLuMinaTion]

انتي اللي تعلمينه شلون يتفاعل

 

[سارووونه22]

ريلج ذكرني بريلي اول ايام ملجتنه كان كله يسولف على طليقته سوت جذي وقالت جذي لين يوم بطيتها بويها قلت له انا مو فلانه عشان اسوي جذي وقلت له حبيبي ترى انا فهمت قصدك انك شنو تبيني اسوي ولا مااسوي خلاص فهمت واتمنى بعد لاتكرر هل موضوع لانه وايد ياثر فيني من يومتها ماياب لي طاري الحمدالله الحين كملنه 4 سنين مرتاحين انتي قوليله

 

[فوفو22]

لا تقولين له

نوعيته حبوب

باجر اذا تزوجوا بيذبحهم فيج

بقول زوجتي وزوجتي

اصبري عليه شوي

فوفو

 

[G!RLooNa]

قوليله حبيبي ترضى بكل مكالمه اقارن بينك و بينك اخواني؟؟؟ اخواني يسوون و انت ما تسوي اخواني يحطون و انت ما تحط اخواني كذا و انت كذا بكل مكالمه كل يوم ترضى؟؟؟ اكيد بتزهق و تتضايق و انا قمت اتضايق من مقارنتك بيني و بين خواتك خواتك غير و انا غير ماحب المقارنه بكل شي

ولا اقولج لا تقولينله ترضى اقرنك باخواني صج قارنيه فيهم شوفي شسوون اخوانج و اهوا ما يسوي لو اشياء تافهه و لي قالج بس ترت زهقتيني قوليله اهااااا هذا نفس شعوري بالضبط لما انت تقعد تقارني بخواتك

 

[Daleela]

انا من رايي لا تقولين سكتي احسن ومع الوقت ليه طاحت الميانه وظل يتكلم وبزياده هني تحجي

الحين خلج حبوبه

 

[أم توتو]

لا تقوليله طبيعي الريال بيقول خواتي وخواتي اجل بيقول بنات عمي وبنات خالي اناول متزوجت جذيه اختي فلانه واختي تعرف تطبخ وللحين يقولي بس انا ماسكت له اروح واتعلم منهم الطبخه واسويها ويتفاجا فيني مسويه نفسها خخخخخ

 

[دنيتى زوجي M]

صارحيه قولي له حبيبي بدال لاتشجعني تحبطني ادري خواتك يعرفون ووصلت هالمعلومه بس انا قاعده اسوي كل هذا عشان منو مو عشانك ؟ مابي شي جايد ابي تقدر واسمع كلام يشجع وقولي له هالشي يضايقج وماتحبين المقارنه يعني فهميه قولي له انت ترضى كل كلمه والثانيه اقارن بينك وبين اخواني وبس

 

[جوري 2007]

قولي اي ماشاءالله عليهم ومدحيهم انتي بعد وبس ، طنشي

 

[Truly]

مشكوووووووورين حبايبي ماقصرتو

ان شاءالله بسوي كل الي تقولون عليه

ماقصرتو فديتكم

ربي يوفقكم و يرزقكم بالي تبون

 

[** ام ملك **]

صارحيه حبيبتي مافي احسن من الصراحه .

 

[توت1]

فهميه قوليله انا ما احب احد يغارنى بغيري
قوليله انا احب امك وخواتهم وع عينى وع راسي بس لا تقارنا ببعض المقارنه مو زينه

وقوليله انا تونى اتعلم اهلي مدلعينى ودخلت المطبخ علشانك وسويت هالشي علشانك
وقوليله حبيبي شنو تحب انت من الاكل علشان اتعلمه لك وجذي

بس ارد واقول لا تبيين انج مهتمه له حييييييييييل ينحاش الرجاجيل كلهم جذي مره اهتمى ومره طنشي
مثلا قوليله انا دخلت اليوم وتعلمت الطبخه الفلانيه
ومره قوليله انا تعبانه اليوم وراسي يعورنى مالي خلق
عوديه ع جذي علشان بعدين لا تزوجتوا ان شاء الله يفهم انه مو متزوج طباخه وعلشان يعذرج بالمستقبل

والله يوفقج ياااااااااااارب