ملاحظات بخصوص نادي فيلكس!

[kuwiati lady]

إلى إدارة المنتدى

الرجاء حذف الشتائم والتشهير الموجود في هذا الموضوع خاصة لوجود تعيين لأماكن وأسماء شخصيات مهمة

يجب أن لا تستخدم المنتديات لإشهار الحروب التجارية بين الشركات..

وإن أي مكان ناجح ومتفوق سيكون له أعداء ومنافسين بكل تأكيد..

باختصار هذا الموضوع من الواضح بانه موضوع مرتب ومدروس بين بعض الأخوات (لاأعلم لصالح من يعملون ولكن من الواضح انهم مستأجرين)
أغلب المشاركات قاموا بالتسجيل مؤخراً..

يجب العلم بأننا في دولة الكويت حيث تحترم جميع القوانين

وصراحة وزارة الصحة والبلدية مو مقصرة أبداً في التشييك والتفتيش على هذه الأماكن دائماً
وأي طعن في هذا الخصوص يعتبر إساءة لنظام التفتيش الدوري الذي تقوم به مشكورة البلدية

وجزاكم الله كل خير...

 

[بدويه بنت الخليج]

السلام عليكم

خواتي الكريمات انا لما تكلمت يشهد الله علي ان ماكان قصدي تشهير او تجريح حد او قطع رزق حد انا تكلمت من باب الخوف على صحة المشتركات بالنادي وانا مالي مصلحه او محد مستأجرني .. وبصراحه الاخت kuwaiti lady انا احب اقولج شغله اعتقد انا مش جديده بالمنتدى ومو توني مشتركه عشان تقولين اني مسجله عشان اكتب هالموضوع واخرب على النادي اعتقد انتي اللي توج اليوم مشتركه والدليل تاريخ اشتراكج وبعدين انا لما تكلمت بالموضوع تكلمت عن فرع الجهرا مش الافرع اثانيه ولو انا صج حد دازني او مستأجرني على قولتج جان تكلمت عن الافرع كلها بس انا تكلمت عن فرع الجهرا خصوصا حمام السباحه وماتكلمت عن الأجهزه او المكان او المدربات انا تكلمت لما شفت بعيني وسمعت بأذني ... بس صراحه اسلوبج وايد ضحكني ( مستأجره ) وين قاعدين بشيكاغو الله يهديج بس ...
وانا بصراحه تكلمت عشان الصحه والنظافه مش اكثر يعني مش معقوله البنات يتسبحون في ماي من اشهر ماتغير وترى فرع الجهرا مافيه الا مسبح واحد والكل يطب فيه بنات ومتزوجات وحريم كبار بالعمر وهالشي يسبب امراض والتهابات ...

 

[kuwiati lady]

الأخت المحترمة بدوية بنت الخليج
أنا فرحت كثيراً عندما عرفت أنني أضحكتك وانشالله جياتك كلها فرح
ولما قلت بأن بعض المشاركات هم مشاركات جدد بامكانك مراجعة الردود ومعرفة الجدد ونعم أنا منهم
الحقيقة أختي أنت من حقك تقولي رأيك وأنا من حقي أقول رأيي
أنا لا أقول بأنك غير صادقة لأنني لا أعرف الحقيقة ولا داعي للحلفان والقسم المتكرر طالما انت صادقة ولكن أختي اريد أن أسألك:
هل تعتقدين بأن التشهير والفضح والغيبة والنميمة هو حل لأي مشكلة أو خطا؟
متى كان قطع الرزق عن أماكن الرزق حلاً أو بالأحرى حلالاً؟
أنا واثقة بأنك متدينة وتخافين الله ولذلك أناشدك بأن تتقي الله وتتبيني وتحاولي الإصلاح بالطرق السليمة التي نص عليها الشرع
والتي لم يرد بأن أي منها يكون بالشتم والغيبة والتشهير
قال (ص): من رأى منكم منكراً فليغيره بيده فإن لم يستطع فبلسانه فإن لم يستطع فبقلبه وهذا أضعف الإيمان
بما انك تكلمت مع الإدارة في المكان أتمنى عليك بان تتابعي إذا استمعوا إليك و اصلحوا المطلوب وإن لم يفعلوا فإن هنالك وسائل عدة
يعني أنت كلمت موظفة هناك
إن لم تستمع تستطيعين التوجه إلى من هو أعلى منها ولو تطلب الأمر بأن تكلمي أصحاب الحلال (بدل أن تشهري بباب رزق الكثيرين)
أختي الحبيبة والله إني احبك في الله واخشى عليك...
شكراً لاستماعك ولو كانت ردة فعلك عكسية فأنا أشكرك أيضاً فاختلاف الرأي لا يفسد للود قضية...

 

[بدويه بنت الخليج]

اولا بقولج شي اختي kuwaiti lady

اولا بقولج شي المشاركات اللي تقولين عنهم شوفي تاريخ اشتراكهم وبتعرفين انهم مو مشتركات جدد

ثانيا انا كتبت هالموضوع عشان النصيحه مو التشهير بأحد وانا اعتقد ماشهرت بأحد نهائيا او قطعت رزق حد والا بنظرج اللي يتكلم عن الحق يعتبر ظالم وغلطان

ثالثا انا مو مشتركه بالنادي عشان اروح اتكلم مع ادارة النادي ياليت تقرين الموضوع عدل عشان تعرفين انا كنت رايحه بشترك وشفت وسمعت الكلام اللي دار بين المشتركات واللي ماسكه الاداره بالنادي وعشان اصحح لج المعلومه بعد اختي اللي مشتركه ولما سألتها قالت من زمان الماي ماتغير ورفيجتي لما اتصلت برفيجتها اللي تشتغل بالنادي رفيجتها اكدت لها ان الماي ماتغير من شهور عرفتي شلون الحين يعني موظفات فالنادي نفسه يأكدون كلامي

وبعدين اختي انا بسألج سؤال واحد انتي ليش اشتركتي بعد ماانا كتبت الموضوع وانتي داشه بقوه تتكلمين عن الظلم والتهجم وقطع الرزق ودافعين عن النادي وقال الله وقال الرسول ترى الحمدلله انا اعرف ربي عدل
شكلج تشتغلين بالنادي وداشه تشككين المشتركات بكلامي اذا انا كذابه اعتقد مشتركات فيلكس الجهرا لهم عيون ويشوفون اذا الماي تغير او لأ؟

وبعدين بقولج شي ترى اختي اليوم تقول انهم مسكرين باب المسبح عشان بيغيرون الماي بس بقولج ملاحظه مهمه اذا صج مثل مايقولون بيغيرون الماي ليش حاطين لزقات على باب المسبح ليش مايشلون هاللزقات عشان البنات يشوفون بعينهم صج اذا الماي تغير او لا؟
واذا على قولتهم في عمال شلون العمال دخلوا اذا المسبح في وسط النادي ومافيه اي باب خارجي حق المسبح ؟

ياليت تردين على هالشي

واخيرا ترى انا اكثر منج اتمنى ان النادي يستمر بالجهرا
وياليت تقولين حق اللي بالاداره عندكم عيب يقولون خل بنات الجهرا يحمدون ربهم فتحنا لهم نادي ترى بنات الجهرا بنات ناس وشايفين خير وماله داعي التجريح واذا الجهرا مو عاجبتهم يكفينا فخر ان سمو الامير طفولته قضاها بالجهرا

وتحياتي لج ...

 

[Flexgirl]

اختي الكريمة بدوية في الخليج انشالله الأمور راح تتصلح وللأحسن وانشالله يكون صوتج وصل والنادي مافتح الا لكن أخواتي عشان تستانسون فيه ويكون مصدر ترفيه لأخواتي من الجهرا ، وثاني شيء محشومة انتي واهل الجهرا والكويت كلها على راسي وبالنهاية كلنه خوات وعيال قرية ، أنا أتذكر زرت النادي عندكم وصج استانست وايد كان يوم حلو استانست مع المدربات والمتدربات بصراحة حلوين ونفسهم حلوة .... صراحة أنا الحين توني اقرى ردود الموضوع والعنوان تغير ماتوقعت الموضوع يحتد لي هالدرجة ....

 

[قلوووب]

السلااام عليكم ..اتصور انه الموضوع شبه انحل رقم انه صارت اشويت مشابكات ما اشوف لها اي معنا وصار جنه تحدي وضن وشك...المهم..مثل ماقالت الإخت افلكس غيرل انها بتساهم في توصيل رسالتج اتوقع من انه لازم يوقف الموضوع وتنهينه انتي يا بدوية من الخليج كما انه احنه نشكرها وتشكرينها وخلااااص بدل ما انه يصير فيه قالو وقيييل ..واا منتقده النادي في ستميت نادي غيره زيين..مثل مافي مطاعم وصخه ومطاعم نظييفه شالله حادج..وحاد اللي مو عاجبه..وكان الله غفورا رحيما..وانشالله رسالتج اللي تبينها مثل ما قلت تكونين قد صرحتي فيها وبنفسج قلتي مشتركات النادي مناك ماعندهم عين يشوفون الوضع خلاااص ما يحتاي ادله وتحقيقات..انتهى..وانتي قولي اللهم اني بلغت اللهم فعلم..
وارجو انه ما ينحذف موضوعي مثل السابق لأني ما اظن اني مختله بالأدب..
وشكرا لج ولجميع المشاركات
تحيااااااااااااااااااتي فلكسيه

 

[الحلم]

مشكوره اختي بدويه بنت الخليج على هالموضوع لاني انا عانيت من نفس المشكله بنادي لافام الخالديه بورسلان حوضهم( امخوضر)من الوسخ مايغسلونه واشوف وصاخته يوميا بعيني
يعني بعد مايصير ندفع اشتراك كامل واحنا مانستفيد من مرافق النادي
وبعدين الاخت ماقالت شي غلط وخايفه علينا من اللي يستهترون بصحه الناس وكل همهم الفلوس
واناشد اداره المنتدى انها ماتغلق الموضوع حتى الكل يستفيد وياخذ حذره
واشكرج مره ثانيه اختي بدويه بنت الخليج وعساج عالقوه...

 

[Flexgirl]

رد على موضوع فليكس عاجل

أرد أأكد على كلامي خواتي انشالله صوتكم وصل وأقولها محشومين يا أهل الجهرا والكويت كلها انشالله ولا تزعلين يا أختي بدوية ولا أختي ليدي كويتية ، والموضوع انشالله انحل ... ولو عندكم أي اقتراحات أختي الكريمة المرة الجاية أو أي استفسارات مايمنع انه تكتب برسالة للإدارة النادي أو مخاطبة المسؤول مباشرة ، وانشالله محد راح يقصر معاج والكلام موجهة للكل سواء من مشتركات فليكس الجهرا أو أي فرع من فروع فليكس، ولو بغيتي أي استفسار مساعدة في الي اقدر عليه وفي مجال عملي انشالله اقدر اساعدج واساعد خواتي كلهم وأرد أقول النادي ما نفتح إلا لكم وعشانكم ، ولو صار أي تهاون أو تقاعس من أي موظف ، أو سبحان الله تصرف خاطئ وقد يكون عن غير قصد هذا لا يعني أنه النادي ،و الإدارة أو أصحاب الحلال لا يهتم بآرائكم ..لأنه انتوا واجهتنه الحلوة الي نتشرف فيها وبصراحة نفس ماقلت لج أنا لما ييت فليكس الجهرا كنت حدي مستانسة لأنه المشتركات والمتدربات كلهم كانوا عسل ويهبلون ....

,,,, تفضلوا خواتي بقبول فائق الاحترام والتقدير لكن ، وبالتوفيق انشالله ,,,,


أختكم
Flex Girl

 

[o_mermaid_o]

ويع وانا كنت كل يوم اسبح لاعت جبدي

 

[حساسة وايد]

اشوه انكم قلتولي عاد انا قاعدة ادور نادي الحين

 

[بدويه بنت الخليج]

مشكوره اختي بدويه بنت الخليج على هالموضوع لاني انا عانيت من نفس المشكله بنادي لافام الخالديه بورسلان حوضهم( امخوضر)من الوسخ مايغسلونه واشوف وصاخته يوميا بعيني
يعني بعد مايصير ندفع اشتراك كامل واحنا مانستفيد من مرافق النادي
وبعدين الاخت ماقالت شي غلط وخايفه علينا من اللي يستهترون بصحه الناس وكل همهم الفلوس
واناشد اداره المنتدى انها ماتغلق الموضوع حتى الكل يستفيد وياخذ حذره
واشكرج مره ثانيه اختي بدويه بنت الخليج وعساج عالقوه...

العفو حبيبتي ومشكوره وايد على مشاركتج ... انا ماتكلمت بهالموضوع الا من خوفي على صحتنا لأن هالشي يسبب امراض سواء لنا احنا البنات والمتزوجات وبالتالي المتزوجات ممكن ينقلون هالجراثيم والامراض حق ازواجهم ... والله يحفظ الجميع ان شالله....

ومشكوره مره ثانيه ..

 

[بدويه بنت الخليج]

رد: رد على موضوع فليكس عاجل

أرد أأكد على كلامي خواتي انشالله صوتكم وصل وأقولها محشومين يا أهل الجهرا والكويت كلها انشالله ولا تزعلين يا أختي بدوية ولا أختي ليدي كويتية ، والموضوع انشالله انحل ... ولو عندكم أي اقتراحات أختي الكريمة المرة الجاية أو أي استفسارات مايمنع انه تكتب برسالة للإدارة النادي أو مخاطبة المسؤول مباشرة ، وانشالله محد راح يقصر معاج والكلام موجهة للكل سواء من مشتركات فليكس الجهرا أو أي فرع من فروع فليكس، ولو بغيتي أي استفسار مساعدة في الي اقدر عليه وفي مجال عملي انشالله اقدر اساعدج واساعد خواتي كلهم وأرد أقول النادي ما نفتح إلا لكم وعشانكم ، ولو صار أي تهاون أو تقاعس من أي موظف ، أو سبحان الله تصرف خاطئ وقد يكون عن غير قصد هذا لا يعني أنه النادي ،و الإدارة أو أصحاب الحلال لا يهتم بآرائكم ..لأنه انتوا واجهتنه الحلوة الي نتشرف فيها وبصراحة نفس ماقلت لج أنا لما ييت فليكس الجهرا كنت حدي مستانسة لأنه المشتركات والمتدربات كلهم كانوا عسل ويهبلون ....

,,,, تفضلوا خواتي بقبول فائق الاحترام والتقدير لكن ، وبالتوفيق انشالله ,,,,


أختكم
flex girl

هلا فيج حبيبتي ومشكوره وايد على اهتمامج .. وبصراحه تعاملج واسلوبج الراقي خلاني اغير فكرتي تماما عن النادي وياليت واتمنى فعلا واطلب من ربي انج تمسكين ادارة النادي بالجهرا .. لأن نادي واجهته الموظفين اللي فيه

وبالنسبه حق الشكوى انا ااكد على كلامي مره ثانيه واقولج البنات راحوا اكثر من مره حق الموظفه اللي ماسكه الاداره بالنادي واهي يمنيه وانا حبيت اوضح اهي منو عشان مااظلم باقي الموظفات مش قصدي التشهير او التقليل منها وكل مره تقولهم هاليومين بنغيره لين ماطاف اسبوعين عقبها بالاخير قالت انا تكلمت مع اخت صاحب النادي وماله داعي اذكر اهي منو عشان ماتقولون اني اشهر بأحد وقالت ماراح نغير الماي ولما البنات احتجوا قالت لهم اللي مب عاجبه بنوقف اشتراكه ..
بذمتج اختي هذا اسلوب راقي تتكلم فيه مع مشتركات النادي ..

احنا ماكتبنا هالموضوع بالمنتدى الا بعد ماشفنا مافيه اي تجاوب من ناحية الاداره ..
واحب اوضحلج شي اختي الكريم ترى احنا بالجهرا نتمنى فعلا ان النادي يستمر لأن قريب وعندنا فالمنطقه بس اذا النادي ماقاعد يحترم اهل المنطقه اسمحيلي اقولج في الف نادي بالديره غيره ومايلزمنا

وبعدين ياليت تكلمينهم يشيلون الزقات اللي حاطينها على باب المسبح عشان البنات يطمنون اكثر ان الماي تغير فعلا ...


وانا اشكرج مره ثانيه الف شكر واقول الله يكثر من امثالج وفعلا ياليت تجين تمسكين ادارة النادي بالجهرا


وملاحظه اخيره انا يابنات ماأشكك بكل فروع فيلكس انا تكلمت عن فرع الجهرا اما الافرع الثانيه انا ماقدر احط في ذمتي واشكك في نظافتها ... وفرع الجهرا انا تكلمت عن حمام السباحه واللي ماسكه الاداره هناك بس ..

 

[سيورة الأمورة]

عدل كلامج يا بدويه بنت الخليج ^*^

 

[ii DareeN ii]

الموضوع انتهى الغرض منة وياريت بنات في حال وجود اي شكوى لاي جه انتو مشتركين فيها تروحون تتقدمون فيها رسميا لادارة النادي او المعهد في حال انهم ماتجاوبو تقدرون تتجهون لحماية المستهلك الحجي بالمنتديات مامنة فايده