- ذ ر بـه -
New member
قوه بنات شلونكم انشالله زينين
من زمان ما كتبت موضوع بقسمكم ,, اشتقتلكم وااايد
انا توني صغيرونه ما عندي بيت ولا شي , ادعولي اشتري بيت الأحلام في القريب العاجل
( يالله ادعولي):eh_s(6):
بس احب الديكور واصمم ببيوت الأهل والأصدقاء وأنمي موهبتي ومعرفتي من خلالكم وبصراحه وايد فادني هالقسم
وبكلمكم اليوم عن شي مهم وااايد وانشالله تستفيدون ويكون الموضوع خفيف وحلو و إييوزلكم
ما أطول عليكم موضوعي عن...( مدخل البيت)
الانطباع الأول مهم، ,
وبالنسبه للديكور الداخلي، مدخل البيت اهو اللي يعطي الضيف الانطباع العام ،
عشان جذي بقولج على شغلات مهمه لازم ما تتجاهلينها بالنسبه للمدخل:
أول شي بقولج ليش هالمكان لازم ما تجاهلهينه .؟
لأنه هالمكان يسلط الضوء على ذوقج وشخصيتج وشكثرانتي تهتمين بالتفاصيل,
عشان جذي يحتاج منج لشوية جهد، حتى لو بقطعة سجاد أو لوحة أو مزهرية مع منظره وغيره من الإكسسوارات.
خلي المكان يترك تأثير:
هذا الركن يعطيج المجال لاستعمال ألوان قوية،
يعني تقدرين تضيفين اللون بورق جدران ولا ألوان الطوفه أو (الأقمشة) مثل الستاير أوغنفه انتيك أو سجاد, أو (إكسسوارات) مثل لوحة أو نبات.
((وترى ورق الجدران المنقش اذا استخدمتيه بالممرات الطويلة والضيجة ولا بالسلالم يعطيج انطباع ان المكان عريض وطويل ووسيع)).
انتبهي حق التفاصيل:
فكري في المدخل على أساس انه غرفة مستقلة بحد ذاتها، وعطيها نفس الاهتمام بالتفاصيل.
إذا كان واسع، تقدرين تحطين كرسي مبتكر انتيك ولا كلاسيكي مثلا يعطي انطباع بالأناقة والفخامه ، أو طاولة صغيرة.
لأنه ركن الكل يستعمله ووايد يستعمل واكيد معرض للتلف, خاصه اذا كان المدخل الوحيد، عاد انتبهي حق الحواف ، ونظفي الطوف والسقف من الغبار على طول لأن بسرعه يتراكم بهالمكان ,
(وجونا ما يقصر, أربع فصول بيوم , تطلعين مشتيه تردين تنفضين الغبار من هدومج).
المهم نرجع حق محور حديثنا ...
غالبا سقف المدخل يكون عالي ، عاد انتي استغليه وزينيه بلوحات أو صور العايله الكريمه ولا سفراتج ومغامراتج,, أو منظره كبيرة
(عاد المرايا تعطي إضاءه اكثر).
أو تسوينه كلاسيك، مثلا تحطين تليفون قديم فوق الطاولة ولا حطيلج بشتخته وغيرها من الأمور,
(عاد انتي تفنتقي بس لا تمصخينها وتكثرين , عبالهم داشين متحف)
وهم إذا كان السقف عالي تقدرين تزينينه بدريشه عوده ( هذا اذا انتي بانيه البيت)
أوإضاءة كبيرة تتدلى من فوق (حلوه مني تتدلى. ها ؟.)
أو شمعدانات معلقة ( شغل رومانسي )
واذا كان عندج مساحه ودرايش كبار، بدال الستاير ممكن تستعملين نباتات عالية تغطي الجزء الأسفل من الدريشه, عشان ما تحجب الضوء مثل الستاير وهم تحافظ عالخصوصية وتدخلج الضوء الطبيعي ( وهم زين حق الترشيد)
نيي حق الأشياء إلي لازم تتجنبينها يا حلوه:
ـ استعمال المدخل كمخزن لأغراضج الشخصية،
لأن هذا المكان اللي تطيح عليه العين بمجرد فتح الباب, وهم بعد عشان لا يضيعون اغراضج وتبلشين العالم , ولا تلطشج الخدامه .
( اخ يالخدم والله اذا صارت خدامتج زينه قام حظج وصغرتي 10 سنين )
(ياكثر ما اطلع بره الموضوع) ما علينا... المهم
ـ إذا كنت تحطين جاكيتج ولا جنطتج بالهالمكان، فقد حان الوقت لكي تستثمرين هالمكان بشي أنفع وتشوفيلج مكان ثاني،
لأن هالمكان لازم يكون مرتب طول الوقت
ـ إذا كان المدخل ينفتح على باقي غرف البيت لازم تفكرين عدل في الألوان اللي بتنقينها اللي تعطي جو عام مريح للعين.
والطريقة السهلة والمضمونة أن تكون الألوان بدرجات متشابهة،بس تتغير ألوان الإكسسوارات، مثل السجاد والأرضية. (مثلا: إذا كان المدخل ارضيته خشب, استعملي زل بالصاله )
ـ مهما كانت مساحة المدخل أو طريقة تصميمه، المهم يكون مرتب مريح للعين ويمنح الإحساس بالدفء.
وحطي نفسج مكان الضيف , اوقفي شوي عند الباب وتمعني فيه وفكري في اللي ناقصه وفي اللي مخربه : هل لون الطوف ولانوع الأرضية ولا بس تحتاجين تضيفين إكسسوارات, أو تنظفينه, أو تخففين من الأشياء المتراكمة فيه.
ـ مرات يكون المدخل قريب من السلم (طبعا اكيد راح يكون هذا مدخلج الثاني) فاستعملي المساحة تحت السلالم بذكاء ولا تضيعينها يا شاطره.
إذا كانت عالية وايد حوليها غرفة صغيرة حق التخزين, أو تكرمين حق الجواتي، وبجذي تضربين عصفورين بحجر:
ترتبين المدخل وتخزنين أغراضك الشخصية (بعيدا عن عيون الملاقيف).
وسلامتكم ... واتمنى استفدتو من الموضوع وعجبكم
وشكرا....
